काठमाडौं । नेकपा एमालेमा पुनः विवाद चर्किएको छ । यसको संकेत स्वयमः वरिष्ठ नेता माधवकुमार नेपालले गरेका छन् । उनले प्रधानमन्त्री एवम् पार्टी अध्यक्ष केपी शर्मा ओलीले नेकपा एकतालाई भङ्ग गर्न खोजेको आरोप लगाएका छन् । सोमवार साँझ सामाजिक सञ्जाल फेसबुकमार्फत उनले यस्तो संकेत गरेका हुन् ।
एमालेमा पार्टी विवाद पुनः चर्किएको सम्बन्धमा भने सोमबार दिउँसोबाटै चर्चा शुरु भएको थियो । खासगरी कर्णाली प्रदेशका सांसद एवम् पार्टीका नेताहरूमाथि विधान विपरीत गरिएको कारबाहीलाई अदालतले उल्ट्याएपछि ओली पक्षले भ्याकेट (पुनरावलोकन)मा जाने निर्णय गरेसँगै पार्टीमा विवाद फेरी बल्झिएको हो ।
सर्वोच्च अदालतको आदेशले कर्णाली प्रदेशका चार जना सांसदलाई स्वतः पुनर्बहाली हुने गरेर अन्तरिम आदेश दिएको छ । नेता नेपालले भनेका छन्, ‘स्थायी समितिका नेतामाथि कथित कारबाही, फेरि उहाँहरूसँगै वार्ता पनि गर्ने दोहोरो चरित्रले विभिन्न शङ्का उब्जाएकै थियो । जिम्मेवार भएर पार्टी एकता बचाउन अधिकतम लचक भएर प्रस्तुत हुँदा त्यसलाई कमजोरीका रूपमा लिएको जस्तो देखियो । ’
यस्तो छ माधवकुमारनेपालको स्टाटस कर्णाली प्रदेशका सांसद एवम् पार्टीका नेताहरूमाथि विधान विपरित गरिएको कारबाहीलाई अदालतले उल्ट्याएपछि फेरि भ्याकेटमा जाने निर्णयबाट पार्टीलाई एकता भंग गर्ने दिशामा लग्न खोजिएको प्रस्ट बुझ्न सकिन्छ ।स्थायी समितिका नेतामाथि कथित कारबाही, फेरि उहाँहरुसँगै वार्ता पनि गर्ने दोहोरो चरित्रले विभिन्न शंका उब्जाएकै थियो । जिम्मेवार भएर पार्टी एकता बचाउन अधिकतम लचक भएर प्रस्तुत हुँदा त्यसलाई कमजोरीका रुपमा लिएको जस्तो देखियो। सत्ता जोगाउन संविधानका विरोधी र दक्षिणपंथी तत्वसँग आत्मसमर्पण गर्ने, एकताविरोधी हर्कतलाई जारी राख्ने कुराले एकताबद्ध पार्टी बनाउने प्रयासविरुद्ध को कुन रूपमा लागेको छ ( सहजै देख्न सकिन्छ।असल नियतका साथ गरिएका अनौपचारिक वार्ता र सम्वादलाई रणनीतिका रुपमा प्रयोग गर्नेहरु र एकता विरोधी तत्वहरूसंग सावधान हुन सबैको ध्यानाकर्षण गर्न चाहन्छु।
अमृता के सी ( रोनी ) काठमाडौँ, असार ७। लायन्स क्लब इन्टरनेसनल डिस्ट्रिक ३२५ ए १ले सिन्धुपाल्चोक जिल्लाको मेलम्ची नगरपालिका र हेलम्बु गाउँपालिकामा बाढी पहिरो प्रभावितहरुको लागि राहत प्रदान गरेको छ।सिन्धुपाल्चोकमा मंगलबार साँझ आएको लगातारको वर्षा पछि मेलम्ची र इन्द्रबतिमा आएको बाढीले भौतिक संरचना सँगै धनजनको क्षतिको साथै कयौं बेघर भएका छन्।हालको विषम परिस्थितिमा राहतको लागि उक्त ठाँउबाट अपिल भैरहेको छ ।शुक्रबार लायन्स क्लब इन्टरनेसनल डिस्ट्रिक ३२५ ए १ का डिस्ट्रिक गभर्नर टंक बहादुर श्रेष्ठ, पूर्व गभर्नर एवं हालका मल्टिपल डिस्ट्रिक- जीएसटि (ग्लोबल सर्भिस टिम) कोर्डिनेटर लायन अनन्त प्रसाद भेटुवाल, लगायत लायन्स लिडर र लायन्स सदस्यहरु राहत सामाग्री लिएर मेलम्ची पुगेका थिए।लायन्स क्लबका डिस्ट्रिक गभर्नर लायन टंकबहादुर श्रेष्ठले नगरपालिकाले अनुरोध गरे बमोजिमका सामग्रीहरु नगर उप प्रमुख भगवती नेपाललाई हस्तान्तरण गरेका थिए।लायन्स क्लबले पहिलो चरणमा केहि सहयोग गरेको र आगामी दिनमा आवश्यकता अनुसार सकेको सहयोग गर्दै जाने डिस्ट्रिक गभर्नर श्रेष्ठले जानकारी गराएका थिए ।
लायन्सका पूर्व गभर्नर भेटुवालका अनुसार “खाद्यान्न चाहिन्न ” भन्ने माग बिपतमा परेकाहरुको छ।बाढी र पहिरोको कारण मेलम्चि क्षेत्र पुर्ण रूपमा डुबानमा परेकोले घरहरू क्षतिग्रस्त साथै मानिसहरू बेपत्ता समेत भइ धनजनको क्षति भएको छ। बिपतमा परेकाहरूले बस्ने, सुत्ने, लगाउने, दैनिक आवश्यकताका सरसामान तथा ढुंगा र जालि उपलब्ध गराईदेउ भन्ने नारा सहित आन्दोलन गरेको जानकारी विश्व न्युजलाई गराए।लायन्स क्लबले हालको परिस्थितिलाई मध्य नजर गर्दै सहयोग लिएर पुन मेलम्ची जाने वाचा समेत गरेको बताए।
जहाँ आवश्यकता त्यहाँ लायन्स भन्दै सेवा भावले अघि बढेको क्लबले बिपत्तिमा परेकाहरुको लागि मास्क ५ सय थान, टुथ ब्रस ५ सय थान ,टुथ पेस्ट ५ सय थान, स्यानीटरी प्याड ५ सय प्याकेट,हात धुने साबुन ५ सय थान,बच्चाहरुको लागि १३५ जोर लुगा, बल्यांकेट १५० थान, झुल सय थान साथै २२ सय केजी तरकारी लगायतको सामाग्री हस्तान्तरण गरेको थियो।आपत बिपतको घडिमा सहयोग गरेकोमा उप प्रमुख भगवती नेपालले लायन्स क्लबलाइ धन्यवाद दिएकी थिइन् ।
काठमाडौं । पछिल्लो २४ घण्टामा देशभर २२९७ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ६५८३ जनाको पीसीआरमा १५८४ जना जना ४३२१ जनाको एन्टीजेन परीक्षण गर्दा ७१३ जना गरि २२९७ जनामा संक्रमित पुष्टी भएको हो ।
यो सहित नेपालमा कोरोना संक्रमितको संख्या ६ लाख २२ हजार ६४० पुगेको छ । पछिल्लो २४ घण्टामा ३१३० जना संक्रमण मुक्त भएका छन् ।
यो सहित संक्रमण मुक्त हुनेको संख्या ५ लाख ५९ हजार९२८ जना पुगेको छ । संक्रिय संक्रमितको संख्या ५३ हजार ९४० रहेको छ ।
काठमाडौं । नेपालमा कोरोना भाइरसको नयाँ रुपको कोरोना फेला परेको छ । स्वास्थ्य तथा जनसंख्या मन्त्रालयले ४७ वटा डेल्टा भेरियन्ट पुष्टि भएका नमुनामध्ये ९ वटामा थप उत्परिवर्तन के ४१७ एन म्युटेसन भेटिएको जनाएको हो ।
मन्त्रालयले विज्ञप्ति जारी गर्दै ‘डेल्टा भेरियन्ट’ को नयाँ म्युटेसन भएको जनाएको छ । हालै मात्र त्यसलाई डेल्टा पल्स नामाकरण गरिएको हो। डेल्टा भेरियन्ट देखिएको कुल नमुना स्वाबमध्ये ९ जनाको स्वाबमा डेल्टाको उत्परिवर्तित रुप (K417N mutation) देखिएको हो।
त्यसलाई आधिकारिक नाम AY.1 दिइएको छ। केही समयअघि बेलायती पत्रिकाहरुले ‘नेपाल भेरियन्ट’ देखिएको भनेर दाबी गरेका थिए। तर त्यो नयाँ भेरियन्ट नभइ डेल्टा भेरियन्टको यही म्युटेसन रहेको थियो। युरोपका केही देशमा यसअघि नै के डेल्टाको (K417N mutation) देखिएको थियो।
हालै मात्र त्यसलाई डेल्टा पल्स नामाकरण गरिएको हो।यी भेरियन्टहरु बढी संक्रामक तथा सबै उमेर समूहका व्यक्तिहरुलाई असर पार्ने विभिन्न अध्ययनहरुबाट पाइएको मन्त्रालयको भनाइ छ ।
हालसम्म डेल्टा भाइरसको यस रुप नेपालसहित भारत, पोर्चुगल, बेलायत, अमेरिका लगायत १० देशमा पाइएको छ। यो म्युटेसनमा बेटा भेरियन्टकै जस्तो म्युटेसन देखिएकोले यसले पार्न सक्ने प्रभावका बारेमा वैज्ञानिकहरुले अझै अनुसन्धान गरिरहेका छन्।
संखुवासभा । संखुवासभामा सेफ्टी ट्याङ्की भत्किएर भएको दुर्घटनामा दुई जनाको मृत्यु भएको छ । जिल्लाको खाँदबारी नगरपालिका वडा नम्बर ४ सेकाहामा सेप्टि ट्याङ्की भत्किएर दुई जनाको मृत्यु भएको राससले लेखेको छ । दुर्घटनामा सेकाहाका ३३ वर्षीय तारावीर गुरुङ र २५ वर्षीय ईश्वर राईको ज्यान गएको छ ।
गम्भीर घाइते गुरुङ र राईलाई उपचार गर्न जिल्ला अस्पताल सङ्खुवासभा लगिएकोको थियो । उनीहरुको आइतबार बेलुकी उपचारका क्रममा मृत्यु भएको जिल्ला प्रहरी कार्यालयले जनाएको छ । घटनापछि स्थानीयले उद्धार गरी सदरमुकाम लगेका थिए ।
काठमाडौं । काठमाडौं उपत्यकाभित्र एक साता निषेधाज्ञा थप भएको छ। काठमाडौं, भक्तपुर र ललितपुरका प्रमुख जिल्ला अधिकारीहरूको आइतबार बसेको बैठकले जेठ १३ गतेसम्म निषेधाज्ञा थप्ने निर्णय गरेको हो।
थपिएको निषेधाज्ञा खुकुलो बनाइएको छ। निजी सवारी साधनहरू जोरबिजोर प्रणाली अनुसार खोल्ने निर्णय भएको हो। ट्याक्सीको हकमा तीन जनाभन्दा बढी बोक्न नपाइने गरी अनुमति दिइएको छ। पसल बार अनुसार खोल्न पाइने भएको छ ।
आइतबार, मंगलबार र बिहीबार ११ देखि ४ बजेसम्म सुन, भाँडाकुडा, अटो मोबाइल्स, विद्युतीय सामग्री खोल्न दिइने निर्णय भएको जनाएको छ ।
सोमबार, बुधबार र शुक्रबार ११ बजेदेखि ४ बजेसम्म सपिङ मल, कपडा, जुत्ता, साडी, कस्मेटिक्स, फेन्सी टेलरिङ पसल खोल्न दिइनेछ। शनिबार अत्यावश्यकबाहेक अरू पसलहरू बन्द गर्नु पर्नेछ।
निर्माणजन्य सामग्रीका पसलहरू हरेक दिन बिहान ११ बजेदेखि साँझ ६ बजेसम्म खोल्न दिइने। खाद्यान्न, दूध, किताब, फलफुल र माछामासुका पसलहरू बिहान ११ बजेसम्मखोल्न दिइनेछ।
काठमाडौं । पछिल्लो २४ घण्टामा देशभर २४४२ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ६६७७ जनाको पीसीआर १४२१ जना र ४२४९ एन्टिजेन परीक्षणमा १०२१ जना गरी २४४२ जनामा संक्रमण पुष्टि भएको हो । त्यस्तै पछिल्लो २४ घण्टामा ३४५६ जना संक्रमणमुक्त भएका छन् ।
काठमाडौं । आगामी १४औं महाधिवेशनमा विमलेन्द्र निधिले कांग्रेस सभापतिमा उमेदवारी दिने भएका छन् । नेपाली कांग्रेसका सभापति शेरबहादुर देउवाले सभापति उठ्ने बताइसकेका छन् । देउवाले शनिबार प्रदेश २ का नेताहरुलाई भेट्दै आफू सभापति उठ्ने बताएका थिए । सोही क्रममा निधिले आफु समेत सभापतिमा उठ्ने बताएका हुन् । उनले आफूले यसअघि पनि यो बारे सभापतिलाई भनेको भन्दै स्मरण गराएका थिए ।
उनले सभापतिमा देउवाको समर्थन चाहेको समेत बताएका छन् । निधि देउवा खेमाकै नेता हुन् । केन्द्रीय महाधिवेशन भदौ १६ देखि १९ गतेसम्म हुनेछ । यो महाधिवेशनले नयाँ नेतृत्व चयन गर्नेछ । चुनावको पूर्वसन्ध्यानमा हुन लागेको यो नेतृत्वले आगामी ५ वर्ष पार्टी मात्र नभई सरकारको समेत संचालनमा भूमिका खेल्न सक्छ ।
काठमाडौं । नेपालमा कोरोना भाइरसको संक्रमणबाट थप ३४ जनाको मृत्यु भएको छ । स्वास्थ्य तथा जनसंख्या मन्त्रालयले सार्वजनिक गरेको तथ्यांक अनुसार २४ घण्टामा उक्त संख्यामा मानवीय क्षति भएको हो । अब नेपालमा कोरोनाबाट ज्यान गुमाउनेको संख्या ८६७५ पुगेको छ । नेपालमा मृत्युदर १.६ प्रतिशत रहेको छ ।
नेपालमा पछिल्लो २४ घण्टामा कुल २४०१ जनामा कोरोना भाइरसको संक्रमण देखिएको छ । यो अवधिमा कुल ११ हजार ६ सय ९६ वटा परीक्षण भएको थियो । अब नेपालमा कुल संक्रमितको संख्या ६ लाख १९ हजार ६ सय ३५ पुगेको छ ।
पछिल्लो २४ घण्टामा नेपालमा ३६६० जनाले कोरोनालाई जित्न सफल भएका छन् । यससँगै कोरोनालाई जित्नेको संख्या ५ लाख ५३ हजार ३ सय ४२ रहेको छ । नेपालमा निको हुनेको दर ८९.३ प्रतिशत रहेको पाइएको छ । ्र
काठमाडौं । विश्व स्वास्थ्य संगठन (डब्लूएचओ) का महानिर्देशक टेड्रोसले नेपालको मुस्ताङमा एक नदीबाट कोरोना विरुद्धको खोप तार्न गरिएको प्रयासलाई लिएर स्वास्थ्यकर्मीको प्रशंसा गरेका छन् । साथै यो भिडियोमार्फत शक्ति सम्पन्न मुलुकहरुले देखाएको रवैयाप्रति उनले चिन्ता समेत व्यक्त गरेका छन् । कोरोना भाइरसविरुद्धको खोप वितरणमा स्वास्थ्यकर्मी खटिरहेको उदाहरणका रुपमा यो भिडियो प्रस्तुत गर्दैस्वास्थ्यकर्मीहरूलाई धेरै स्थानमा खोप पुर्याउन नसकिएको भन्दै उनले चिन्ता व्यक्त गरेका हुन्।
खासगरी खोप अहिले पनि धनी मुलुकको कब्जामा छ । उनीहरुले आफ्नो जनसंख्यालाई वितरण गरेर बाँकि रहेको खोप समेत बाँकि विश्वलाई दिने ठोस प्रक्रिया थालेका छैन् । खोप निर्माण गरिरहेका मुलुकले खरीद गर्न चाँहदा समेत उपलब्ध गराएका छैनन् । ट्वीटमा उनले कोरोना विरुद्धको खोप कार्यक्रममा खटिने स्वास्थ्यकर्मीहरूलाई धेरै स्थानमा खोप पुर्याउन नसकिएको भन्दै उनले चिन्ता व्यक्त गरेका छन् ।
उनले भनेका छन्, ‘मानिसको जीवन बचाउन स्वास्थ्यकर्मी कसरी खटिन्छन् भन्ने यो भिडियोले देखाएको छ। अझ पनि धेरै ठाउँमा यस्ता हिरोहरूलाई भ्याक्सिन नलगाइने कतिसम्म न्यायोचित हो ?’ डा. टेड्रोसले सेयर गरेको भिडियोमा बाढी आएको खोलामा लठ्ठी सहायताले खोप राखेको बाकस तारिएको छ ।
दोलखा । दोलखामा बग्ने तामाकोशी नदी पहिरोका कारण थुनिएको छ । नदीको बहाव थुनिएसँगै तामाकोशीमा जुनसुकै बेला बाढी आउन सक्ने भन्दै जिल्ला प्रशासन कार्यालय दोलखाले सतर्क रहन सूचना जारी गरेको छ । शुक्रबार साढे ९ बजे राति विज्ञप्ति जारी गर्दै प्रशासनले नेपाल चीन सीमा क्षेत्रको तिग्री कन्ट्रीको रोङ्चा सहर र त्यस आसपास भारी वर्षा भएको बताएको छ ।
वर्षापछि पहिरोले नदीको प्रवाह रोकिएको सूचना प्राप्त भएको भन्दै कुनै पनि समय तामाकोशीमा पानीको बहाव बढेर बाढी आउनसक्ने प्रशासनको भनाई छ । खतराको संकेत प्राप्त हुनासाथ सुरक्षित स्थान तिर जान र स्थानीय तहका पदाधिकारी र नजिकको सुरक्षा निकायमा तुरून्त जानकारीसमेत गराउन प्रशासनले अनुरोध गरेको छ ।
काठमाडौं । प्रमुख विपक्षी नेपाली कांग्रेसले विपक्षी गठबन्धनलाई निरन्तरता दिने भएको छ । प्रधानमन्त्री केपी शर्मा ओलीले पटक पटक संसद विघटन गरेसँगै विपक्षी दल एक भएका थिए । लोकतन्त्र र संविधानको रक्षाका लागि पाँच दलीय गठबन्धनलाई थप मजवुत बनाउनुपर्ने निष्कर्षमा समेत कांग्रेस पुगेको हो । कांग्रेसको केन्द्रीय कार्यसमिति बैठकले यस्तो निर्णय गरेको हो ।
कांग्रेस नेतृत्वमा नेकपा माओवादी केन्द्र, नेकपा एमाले (माधवकुमार नेपाल समूह), जनता समाजवादी पार्टी (उपेन्द्र यादव समूह) र राष्ट्रिय जनमोर्चाको विपक्षी गठबन्धन बनेको छ । यो गठबन्धनले सरकारलाई खबरदारी गर्दै आएको छ ।
२० चैत २०७७ मा बसेको केन्द्रीय कार्यसमितिको बैठकले पार्टी सभापतिको नेतृत्वमा सरकार बनाउन पहल गर्ने निर्णय गरेको थियो । सोही अनुसार विपक्षी गठबन्धन बनेको हो । आज बसेको कांग्रेस केन्द्रीय कार्यसमिति बैठकले १४औं महाधिवेशनको संशोधित कार्यतालिका अनुमोदन गरेको छ ।
काठमाडौं । पछिल्लो २४ घण्टामा देशभर २७६८ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ७५६९ जनाको पीसीआर १९६३ जना ५४६८ जनाको एन्टीजेन परीक्षण गर्दा ८०५ जना गरि २७६८ जनामा संक्रमित पुष्टी भएको हो ।
यो सहित नेपालमा कोरोना संक्रमितको संख्या ६ लाख १७ हजार ९४७ पुगेको छ । पछिल्लो २४ घण्टामा ४०२० जना संक्रमण मुक्त भएका छन् ।
यो सहित संक्रमण मुक्त हुनेको संख्या ५ लाख ४९ हजार ६८२ जना पुगेको छ । संक्रिय संक्रमितको संख्या ५९ हजार ६२४ रहेको छ ।
काठमाडौं । गण्डकीका मुख्यमन्त्री कृष्णचन्द्र नेपाली पोखरेलले विश्वासको मत प्राप्त गरेका छन् ।
नेपालको संविधान धारा १६८ को ५ अनुसार नियुक्त मुख्यमन्त्रीले ३० दिनभित्र विश्वासको मत लिनुपर्ने प्रावधान छ। सोही अनुसार पोखरेलले शुक्रबार विश्वासको मत लिएका थिए ।
प्रदेश सभामा कायम भएको कुल ५८ सदस्यमध्ये उनले ३१ जना सांसदको मत प्राप्त गरेका छन् । भने उनको विपक्षमा २७ मत परेको थियो ।
कांग्रेसका १५, माओवादी केन्द्रका ११, जनता समाजवादी पार्टी (जसपा) २, राष्ट्रिय जनमोर्चाका २ र एक स्वतन्त्र सांसद राजिव गुरुङ (दिपक मनाङे) ले उनको पक्षमा मतदान गरेका थिए । भने एमालेले उनको विपक्षमा मतदान गरेको थियो ।
उनी २९ जेठमा पोखरेल मुख्यमन्त्री नियुक्त भएका हुन् । प्रदेश सभाको सबैभन्दा ठूलो दलको नेताको हैसियतमा २९ वैशाखमा मुख्यमन्त्री नियुक्त पृथ्वीसुब्बा गुरुङले २७ वैशाखमा मागेको विश्वासको मत पाउन असफल भएपछि पोखरेल २९ जेठमा मुख्यमन्त्री नियुक्त भएका हुन् ।
काठमाडौं । नेकपा एमालेले कर्णाली प्रदेशका तीन जना मन्त्रीलाई राजीनामा दिन निर्देशन दिएको छ ।
एमाले कर्णाली प्रदेश संसदीय दलले मुख्यमन्त्री महेन्द्र बहादुर शाही नेतृत्वको सरकारमा सहभागी भएका माधव नेपाल समूहका तीन जना मन्त्रीलाई राजीनामा दिन निर्देशन दिएको हो ।
बैठकले सर्वोच्च अदालतको अन्तरिम आदेश बमोजिम प्रदेशसभामा एमालेको प्रदेशसभा सदस्यको रुपमा पुनःस्थापित गराउँदासमेत दलीय व्यवस्थाको आचरणविरुद्ध नेकपा माओवादी केन्द्रको नेतृत्वको सरकारमा रही रहेकाले तत्काल मन्त्री पदबाट राजीनामा दिन निर्देशन दिने निर्णय गरेको छ । सा
थै सर्वोच्चबाट पुनःस्थापित चारै जनालाई संसदीय दलको सदस्यको रुपमा भूमिका निर्वाह गर्न पनि निर्देशन दिएको छ ।
शुक्रबार बसेको एमाले संसदीय दलको बैठकले मुख्यमन्त्री शाही नेतृत्वको सरकारमा सहभागी भएका उद्योग, पर्यटन, वन तथा वातावरण मन्त्री नन्दसिंह बुढा, भूमि, व्यवस्था, कृषि तथा सहकारी कुर्मराज शाही र भौतिक पूर्वाधार मन्त्री अम्मरबहादुर थापालाई राजीनामा दिन निर्देशन दिएको हो ।
नेपाल समूहका सांसदले गत वैशाख ३ गते फ्लोर क्रस गरेर मुख्यमन्त्री शाहीलाई विश्वासको मत दिएका थिए । कर्णाली प्रदेशसभामा एमालेका २० (सभामुखसहित), माओवादी केन्द्रका १२, नेपाली कांग्रेसका ६ र राप्रपाका एक जना सांसद रहेका छन् ।
काठमाडौं । जनता समाजवादी पार्टीका अध्यक्ष उपेन्द्र यादव र संघीय परिषद्का अध्यक्ष डा.बाबुराम भट्टराई पक्षले निर्वाचन आयोगमा पार्टीको आधिकारिकता दाबी पेस गरेको छ ।
अध्यक्ष यादवसहित अशोक राई, राजेन्द्र श्रेष्ठ, लालबाबु राउतलगायत शीर्ष नेताहरूले आयोगमा पुगेर आधिकारिकता दाबी पेस गरेका हुन् । यादव पक्षका ३० जना कार्यकारिणी सदस्यको हस्ताक्षर आयोगलाई बुझाइएको छ ।
निर्वाचन आयोगको गत आइतबार बसेको बैठकले अध्यक्षद्वय महन्थ ठाकुर र उपेन्द्र यादवले एक अर्कालाई गरेको कारबाहिको सिफारिस कानुनसंगत नभएको भन्दै अद्यावधिक नगर्ने निर्णय गरेको थियो ।
आयोगले राजनीतिक दलसम्बन्धी दफा ५१ अनुसार विवरण अद्यावधिक गर्न अस्वीकार गरेपछि उपेन्द्र–बाबुराम पक्ष दफा ४३–४४ अनुसार आधिकारिकता दाबी गर्न आयोग पुगेको हो ।
बिहीबार बसेको बैठकले राजनीतिक दल सम्बन्धी ऐन अन्तर्गत पार्टीको आधिकारिकता दाबी गर्ने निर्णय गरेको थियो । ५१ सदस्यीय कार्यकारिणीमा यादवसँग ३० सदस्य छन् ।
जाजरकोट । जाजरकोटमा तीन दिन देखि वेपत्ता ७ जना अझै भेटिएका छैनन् । गाईभैँसी र बाख्रा चराउन जाजरकोटको जलजला पाटनमा पुगेका उनीहरु वेपत्ता छन् । तर, प्रतिकुल अवस्थाका कारण खोजि हुन नसकेको बताइएको छ । राससका अनुसार उनीहरू मंगलबारदेखि सम्पर्कविहीन भएका हुन् ।
कुशे गाउँपालिका औलरिजाका ३५ वर्षीय दिलबहादुर खड्का, २५ वर्षीय विक्रम खड्का, २८ वर्षीया चन्द्रा खड्का, १८ वर्षीय भविन्द्र खड्का, १२ वर्षीय मीम खड्का, १७ वर्षीया धनसरा खड्का र ४० वर्षीय कृष्ण रोकाय वेपत्ता छन् । बेपत्ता भएका उनीहरूको खोजीका लागि प्रहरी र स्थानीयलाई घटनास्थलतर्फ गएको छ ।
तर, लेक लाग्ने समस्याका कारण टोली नपुगिसकेको बताइएको छ । यो टोलीमा रहेका ४४ वर्षीय भक्तबहादुर रोकाय, १० वर्षीय ईश्वर रोकाय, १४ वर्षीय दुर्गा रोकाय र ५५ वर्षीया गङ्गा खड्का भने सम्पर्कमा आएका छन्।
जलजला पाटनमा २२ गाई, १० भैँसी र ५० बाख्रा मरेको अवस्थामा भेटिएको प्रहरीलाई उदृत गर्दै राससले लेखेको छ । बुधबार बिहान घटनाबारे जानकारी आएपछि प्रहरी र स्थानीय घटनास्थलतर्फ लागेका थिए । घटनास्थल पुग्न पाँच घण्टाभन्दा बढी लाग्छ ।
बेपत्ताको उद्धारका लागि गृह मन्त्रालय, प्रदेशको आन्तरिक मामिला मन्त्रालयमा पत्राचार गरिएको छ। उद्धार टोली बिरामी पर्नुका साथै पानी, हावाहुरी समेत आएपछि घटनास्थल पुग्न नसकिएको हो । पाटन समुद्र सहतदेखि चार हजार ८०० मिटर उचाइमा छ।
काठमाडौं । जनता समाजवादी पार्टी (जसपा)ले ओली नेतृत्वको सरकारमा सहभागी ९ मन्त्रीलाई कारवाही गरि पार्टीबाट निकाल्ने भएको छ । अध्यक्ष उपेन्द्र यादव पक्षको कार्यकारिणी समिति बैठकले यस्तो निर्णय गरेको हो । उप्रधानमन्त्रीसहित ९ मन्त्रालय लिएर महन्त ठाकुर पक्ष सरकारमा गएको छ । यो शक्ति वर्तमान सरकारमा सबैभन्दा ठूलो हिस्सा समेत बनेको छ ।
यसअघि यो समूहले अध्यक्ष महन्थ ठाकुर, वरिष्ठ नेता राजेन्द्र महतो, नेताहरु सर्वेन्द्रनाथ शुक्ल र लक्ष्मणलाल कर्णलाई निष्कासन गरेको थियो । बिहीबार बसेको बैठकले सरकारमा सहभागी बाँकी नेतालाई समेत निकाल्ने निर्णय लिएको हो । बैठकले लुम्बिनी प्रदेशका चार सांसदलाई स्पष्टीकरण सोध्ने निर्णय गरेको छ ।
उनीहरुले मुख्यमन्त्री शंकर पोखरेललाई साथ दिएका छन् । पार्टीभित्रको विवादबारे पुनः निर्वाचन आयोगमा फेरी जाने निर्णय जसपाले गरेको छ । आयोगले यो पार्टीमा दुबै पक्षको दाविलाई मान्यता दिएको छैन ।
सिन्धुपाल्चोक । सिन्धुपाल्चोकको मेलम्ची र हेलम्बुमा बाढी र पहिरोमा परी हराइरहेका मध्ये बिहीबार दुई चिनियाँ र एक भारतीय नागरिकको शव फेला परेको छ । उनीहरु मेलम्ची खानेपानी आयोजनामा काम गर्ने मजदुर हुन् । जिल्ला प्रशासन कार्यालय सिन्धुपाल्चोकका अनुसार यो घटनामा अझै १७ जना वेपत्ता छन् । ७ जनाको भने बुधबार शव फेला परेको थियो ।
हराएका मध्ये ४ जना मेलम्ची खानेपानी आयोजनामा काम गर्ने कामदार हुन् । बिहीबार चिनियाँ नागरिक गोङ टियान छियो, युचिझ र भारतीय नागरिक कमल लोचनको शव फेला परेको छ । उनीहरुको शव सिन्धुलीमा फेला परेको हो । मेलम्ची खोलामा आएको विनासकारी बाढीले सिन्धुपाल्चोकमा ठूलो धनजनको क्षति गरेको हो ।
काठमाडौं । राष्ट्रपति कार्यालयले एमाले अध्यक्ष केपी शर्मा ओली र कांग्रेस सभापति शेर बहादुर देउवालाई संविधानको धारा ७६ को उपधारा ५ अनुसार प्रधानमन्त्रीमा नियुक्त नगरेको सम्बन्धमा सर्वोच्च अदालतलाई लिखित जवाफ पठाएको छ । देउवासहित एक सय ४६ जनाले प्रतिनिधि सभा विघटन बदर गरी देउवालाई प्रधानमन्त्री नियुक्त गर्ने आदेश माग गर्दै दिएको रिटमा सर्वोच्चले सात दिनभित्र लिखित जवाफ माग गरेको थियो ।
आज प्रधानमन्त्री कार्यालय र राष्ट्रपति कार्यालय दुबैबाट सर्वोच्चमा लिखित जवाफ पेश भएको छ । कार्यालयले कांग्रेस सभापति देउवाले दाबी प्रस्तुत गर्दा दुई दलको मात्र समर्थन पत्र पेस भएको कारण उल्लेख छ । अरू दल नभएको, हस्ताक्षरको सिलसिला नमिलेको र कतिपय सांसदको दलीय हैसियत नखुलेको समेत राष्ट्रपतिको कार्यालयको तर्क छ ।
उता, प्रधानमन्त्री केपी शर्मा ओलीले आफूलाई समर्थन हुने भनी पेस गरेका दलका सदस्यले अर्का दाबीकर्तालाई समर्थन गरेको देखिएको कार्यालयले जनाएको छ । दुवै दाबी राजनीतिक दलको मान्यता एवम् दलका सदस्यले पालना गर्नुपर्ने अनुशासन तथा राजनीतिक नैतिकता अनुकूल नदेखिएको कार्यालयको भनाई छ । यो मुद्दा अहिले सर्वोच्च अदालतमा विचाराधिन अवस्थामा छ ।
काठमाडौं । पछिल्लो २४ घण्टामा देशभर २६०७ जना कोरोना संक्रमित थपिएका छन् ।
स्वास्थ्य तथा जनसंख्या मन्त्रालयका अनुसार देशभरका प्रयोगशालामा ७१७१ जनाको पीसीआर १७६८ जना जना ४७७३ जनाको एन्टीजेन परीक्षण गर्दा ८३९ जना गरि २६०७ जनामा संक्रमित पुष्टी भएको हो ।
यो सहित नेपालमा कोरोना संक्रमितको संख्या ६ लाख १५ हजार ९८४ पुगेको छ । पछिल्लो २४ घण्टामा २१४१ जना संक्रमण मुक्त भएका छन् ।
यो सहित संक्रमण मुक्त हुनेको संख्या ५ लाख ४५ हजार ६६२ जना पुगेको छ । संक्रिय संक्रमितको संख्या ६१७२५ रहेको छ ।
काठमाडौं । स्वास्थ तथा जनसंख्या मन्त्री शेर बहादुर तामाङले पहल गरेपछी काठमाडौं महानगरपालिकाले सिन्धुपाल्चोकको मेलम्ची र हेलम्बुका बढी तथा पहिरो पिडितको लागि २ करोड बिनियोजन गरेको छ । मन्त्री तामाङको विशेष अनुरोधमा काठमाडौं महानगरपालिकाका प्रमुख विद्यासुन्दर शाक्यले २ करोड बिनियोजन गरेका हुन् ।
आज विहान मन्त्री तामाङले मेयर शाक्यलाई कार्यालयमै बोलाएर भेटेपछि मेयर शाक्यले राहत घोषणा गरेका हुन् । अहिलेलाई २ करोड सहयोग उपलब्ध गराउने र आवश्यक परे थप सहयोग गर्न मेयर शाक्य तयार रहेको मेयरले जनएको मन्त्रीको सचिवालयले बताएको छ । मन्त्री तामाङकै पहलमा अनेरास्ववियु युवा संघ लगाएत विभिन्न संघ संस्था राहत लिएर सिन्धुपाल्चोकको मेलम्ची पुगेका छन् ।a
न्युयोर्क सिटीमा नेपाली-भाषीको संख्या तिब्र गतिमा बढेसंगै राजनैतिक चेतना र शक्ति पनि बढि रहेको छ। हरेक वर्ष नेपाल, ईण्डिया, भुटान, तिब्बत र बर्मा लगायतबाट आएका नेपाली-भाषीहरुको मतदाताहरुको संख्या बढ्दो छ। आउँदो प्रारम्भिक निर्वाचनले हामीलाई हाम्रो समुदायको आवाज उठाउन र हाम्रो प्रतिनिधित्व निश्चित गर्न एक विशेष अवसर दिएको छ।
न्यूयोर्क सिटीको प्रारम्भिक निर्वाचनमा कसले मतदान गर्न सक्छन्? तपाईं अमेरिकी नागरिक हुनैपर्छ, हाल मतदान गर्न रजिस्टर गरेको हुन पर्छ, र कुनै राजनैतिक पार्टीसंग रजिस्टर भएको हुन पर्छ। यदि यि कुराहरु तपाईंले पुरा गर्नु भएको छ या छैन हेर्न परेमा तपाईंले यो लिंकमा गएर हेर्न सक्नु हुन्छ: https://voterlookup.elections.ny.gov, या अधिकारलाई ७१८-९३७-१११७ मा फोन गर्न सक्नु हुन्छ।
कहिले र कहाँ मतदान गर्ने? ● प्रारम्भिक निर्वाचनको लागि चाँडै मतदान गर्ने अवधि: जुन १२ देखि २० सम्म ● प्रारम्भिक निर्वाचन: जुन २२ जानकारी: तपाईंको चाँडै मतदान गर्ने मतदान केन्द्र र प्रारम्भिक निर्वाचन (जुन २२) को मतदान केन्द्र फरक हुन सक्छ। तपाईंको मतदान केन्द्रको ठेगाना र खुला रहने समय हेर्न यो लिंकमा जानु होला: https://findmypollsite.vote.nyc
यदि तपाईंलाई दोभाषेको सेवा चाहिन्छ भने, न्यू योर्क सिटीमा मतदाता को हकमा तपाईंले दोभाषेको सहयोगको लागि कसैलाई (जस्तै, परिवारको सदस्य, या अन्य) मतदान केन्द्रमा लिएर जान सक्नु हुन्छ।
चाँडै मतदान गर्ने अवधि शुरु भई सकेको छ (जुन १२ देखि २० सम्म), र प्रारम्भिक निर्वाचन पनि अब केहि दिन मै हुनेछ (जुन २२)। यदि तपाईं मतदान गर्न रजिस्टर भई सक्नु भएको छ भने हामी चाहन्छौं कि तपाईं मतदान गर्नुहोस्! सिटीको जन प्रतिनिधिहरुले हाम्रो छर-छिमेक र हाम्रो शहरको विभिन्न मुद्दा र विषयहरुको प्रतिनिधित्व गर्छन्। उदाहरणको लागि, प्यान्डेमिकको बेला अधिकारले क्वारेन्टाईनमा बस्ने व्यवस्था र जन साधारणको लागि रासनको व्यवस्था गर्न सिटी काउनसिल सदस्य ड्यान्नी ड्रोमसंग प्रत्यक्ष काम गर्ने अवसर पाएका थियौं। काउनसिल सदस्य ड्रोमको हाम्रो समुदायसंग राम्रो सम्बन्ध भएको कारण, अनि अधिकार र अन्य संस्थाहरुले वहाँलाई यो कामको महत्व, क्षेत्र नम्बर २५ मा बस्ने समुदायको शक्ति, र खाँचो बुझाउन खेलेको सक्रिय भूमिकाले मात्र यो सम्भव भएको थियो। त्यस्तै गरेर, हामीले तत्कालीन अन्तरिम बोरो प्रेसिडेन्ट शारोन ली संग पनि मिलेर नेपाली समुदायहरुको लागि कोभिड १९ को बेला विभिन्न सहयोगहरु जुटाएका थियौं।
हाम्रो समुदायहरुको चासोको मुद्दाहरु प्रत्यक्ष रुपमा सिटी हलसम्म पुर्याउने जिम्मा सिटी काउनसिलको सदस्यहरुको हुन्छ। तुलना गर्दा, सिटी काउनसिल सदस्य भनेको नेपालको नगर र गाऊँहरुहरुको वडा अध्यक्ष जस्तो हो। न्यू योर्क सिटीमा तपाईंको जिप कोडको आधारमा सिटी काउनसिल सदस्यले तपाईंको छिमेकको प्रतिनिधित्व गर्छ, र तपाईंलाई कुनै कुराको चासो पर्यो भने सबभन्दा पहिला सम्पर्क गर्नु पर्ने वहाँहरु नै हुनुहुन्छ।
मतदाताहरुको हैसियतमा हामीलाई कसले प्रतिनिधित्व गर्नेछ भनेर हामीले रोज्न सक्छौं। यो हलुका संग लिने अवसर पक्कै होईन, र यो हाम्रो नागिक दायित्व मात्र पनि होईन – यो हाम्रो अधिकार हो, र हामीले यो प्रयोग गर्नै पर्छ। यो वर्षको प्रारम्भिक निर्वाचन झनै महत्वपूर्ण छ किनभने यसपालि न्यू योर्क सिटीको विधानसभाको सबै ५१ वटै सिटहरुको लागि प्रतिस्पर्धा हुँदैछ, र “टर्म लिमिट” (सिमित पदावधि) को कारण २०२२ को जनवरीमा जन प्रतिनिधिहरुले कार्य वहाली गर्ने बेला त्यो ५१ मध्ये ३५ वटा सित नयाँ अनुहार सम्हाल्नेछन्।
जुन २२ मा हुने निर्वाचनमा सिटी काउनसिल सदस्य वाहेक निम्न पदहरुको लागि पनि प्रतिस्पर्धा हुँदैछ:
● न्यू योर्क सिटी मेयर: मेयरको बारे सोंच्दा यो विचार गर्नुहोस् कि, मेयर भनेको सिटीको कार्यकारी निर्देशक हुन्। मेयरले थुप्रै सिटीको विभागहरुको प्रमुखहरु तोक्नेछन्, सिटीको निति परिवर्तनको प्राथमिकताहरु बारे निर्णय गर्छन्, र विधेयकहरुलाई स्वीकृति दिने या त्यस माथि “भिटो” (निषेधाधिकार) प्रयोग गर्न पाउनेछन्। न्यू योर्क सिटी मेयरको लागि जम्मा २२ जना उम्मेद्वारहरु छन् (१३ जना डेमोक्र्याट, २ जना रिपब्लिकन, र केहि स्वतन्त्र उम्मेद्वारहरु)। मेयरको उम्मेद्वार को को छन् भनेर जानकारी पाउन यो लिंकमा जानुहोस्: https://www.thecity.nyc/22233474/the-race-for-nyc-mayor-whos-running-to-run-this-town-in-2021
● कम्पट्रोल्लर: कम्पट्रोल्लर भनेको सिटी को पैसाको व्यवस्था गर्ने पद हो। कुन विभागले कति पैसा पाउने भनेर निर्णय उनले नै गर्छन्, सिटीको बजेट सम्हालछन्, र बोरो प्रेसिडेन्टहरुलाइ उत्तरदायी बनाउने जिम्मा पनि उनकै हुन्छ। कम्पट्रोल्लरको लागि १२ जना उम्मेद्वारहरु छन् (१० जना डेमोक्र्याट, र १-१ जना रिपब्लिकन र स्वतन्त्र उम्मेद्वारहरु जो निर्विरोध उठेका छन्। कम्पट्रोल्लरको उम्मेद्वारहरु को को छन् भनेर जानकारी पाउन यो लिंकमा जानुहोस्: https://www.thecity.nyc/22233698/what-to-know-about-the-2021-city-comptrollers-race-in-new-yor
● पब्लिक एड्भोकेट: सिटी सरकारको कार्यपालिकामा सम्पूर्ण सिटीको जनताको प्रतिनिधित्व गर्ने “पब्लिक एड्भोकेट” हो। हाम्रो एड्भोकेटको हैसियतमा हामीलाई जरुरी लागेको मुद्दाहरुमा उनले ध्यानाकर्षण गर्ने काम गर्छन्, विधेयकहरु प्रस्ताव गर्ने या समर्थन गर्ने गर्छन्, र यदि मेयरलाई केहि भएमा या केहि परेमा बहालवाला उत्तराधिकारी बन्न पहिलो क्रममा पब्लिक एड्भोकेट पर्नेछन्। पब्लिक एड्भोकेटको लागि जम्मा ४ जना उम्मेद्वारहरु छन् (२ जना डेमोक्र्याट र १-१ जना रिपब्लिक र स्वतन्त्र उम्मेद्वारहरु निर्विरोध उठेका छन्। सबै उम्मेद्वारहरुको बारे जानकारी पाउने यो लिंकमा जानुहोस्: https://www.thecity.nyc/22233762/what-you-need-to-know-about-the-public-advocate-race-in-2021
● बोरो प्रेसिडेन्ट: न्यू योर्क सिटीको हरेक बोरो को आ-आफ्नै प्रेसिडेन्टहरु हुन्छन्, र यो सबै पदको लागि निर्वाचन हुन्छ। विभिन्न संघ-संस्थाहरुको लागि पैसा छुट्याउने काम बोरो प्रेसिडेन्टले गर्छन्, कम्यूनिटी बोर्डको सदस्यहरु मनोनित गर्छन्, विधेयकहरु प्रस्ताव गर्न सक्छन् (उनीहरु आफैंले चाहिं त्यसमा भोट गर्न पाउँदैनन्, र शहर को जग्गा-जनिमहरु कसरी प्रयोग गर्ने भन्ने कुरामा उनिहरुको पहुँच हुन्छ। समुदायहरुको विभिन्न मुद्दाहरुमा ध्यानाकर्षण गर्ने (उदाहरणको लागि, जस्तै कोभिड र सो संग सम्बन्धित राहतको मुद्दाहरु) जिम्मा पनि उनीहरुको हुन्छ। हरेक बोरो मा को को यो पदमा उठेका छन् भनेर जान्न यो लिंकमा जानुहोस्: https://www.thecity.nyc/22233782/what-you-need-to-know-about-the-borough-president-races
यि जानकारीहरु धेरै हुन सक्छ, र बुझ्न गाह्रो लाग्न सक्छ। अनि कसको लागि मतदान गर्ने त? तपाईंले मतदान गर्ने बेला आफू, आफ्नो परिवार, र बृहत समुदायलाई असर पार्ने कुराहरुको बारे सोंच्नु जरुरी हुन्छ। के तपाईं कामदार हुनुहुन्छ? उम्मेद्वारहरुले कामदारहरुको अधिकारको बारे के भन्छन्? के तपाईं आप्रवासी हुनुहुन्छ? आप्रवासी मुद्दाहरुलाई सम्बोधन गर्ने उम्मेद्वारहरुको कस्तो योजना छ? के तपाईं अँग्रेजी बाहेक नेपाली, तिब्बती, या अन्य भाषाहरु बोल्नुहुन्छ? सार्वजनिक स्थलहरुमा भाषिक सेवाको सुधार गर्ने बारे उम्मेद्वारहरुको अडान कस्तो छ? उम्मेद्वारहरुको बारे जानकारी लिने सबभन्दा सजिलो ठाऊँ उनीहरु कै अनलाईन वेबसाईटमा हो (यदि तपाईंले उम्मेद्वारहरुको नाम गुगल गर्नुभयो भने सबैको आ-आफ्नै प्लेटफर्म को वेबसाईट भेटाउनुहुनेछ)। गएको केहि हप्तामा उम्मेद्वारहरुको फोरम (गोष्ठी) हरु पनि भएको थियो, जसमा उम्मेद्वारहरुले उनीहरुको प्लेटफर्मसंग सम्बन्धित प्रशनहरुको जवाफहरु दिनुभएको थियो। अधिकारले आयोजाना गरेको क्षेत्र नम्बर २५ (ज्याक्सन हाईट्स, एल्महर्स्ट) र क्षेत्र नम्बर २६ (वुडसाईड, सन्नीसाईड, लङ् आईलेन्ड सिटी) को फोरमहरु यो लिंकमा गएर हेर्न सक्नु हुन्छ: bit.ly/nycelections2021
यसपालिको निर्वाचनमा सबभनन्दा महत्वपूर्ण फरक कुरा के हुँदैछ भने, सिटीले यसपालि श्रेणी-वद्ध मतदान (“र्याङ्क चोईस भोटिङ्” – RCV) भन्ने मतदान गर्ने नयाँ तरिकाको शुरुवात गर्दैछ। RCV को प्रकृयामा मतदाताले आफ्नो ईच्छा अनुसार अधिकमा ५ जना सम्म उम्मेद्वारलाई श्रेणी-वद्ध गरेर मतदान गर्न सक्नेछन्, या चाहेमा १ जना मात्र, या २, ३, ४ जना मात्रमाई पनि श्रेणी-वद्ध गरेर मतदान गर्न सक्नेछन्। याद गर्नु पर्ने जरुरी कुरा के हो भने, तपाईंले अधिकमा ५ जना सम्म उम्मेद्वारहरुलाई मतदान गर्न सक्नु हुन्छ। अकसर गरेर साधारण निर्वाचनहरुमा २ भन्दा धेरै उम्मेद्वारहरु हुँदा ५०% भन्दा कम मत ल्याउने उम्मेद्वार पनि विजय हुन सक्छ। कसको विजय हुने भन्ने मामलामा मातदाताहरुको सरोकार अझ बढाउनको लागि, सिटीले सबै सिटी संग सम्बन्धित चुनावहरुमा RCV को नयाँ व्यवस्था शुरु गरेको हो। RCV लाई अझ राम्रो संग बुझ्न, र यसको विस्तृत जानकारीको लागि तपाईंले हामीले तयार पारेको छोटो कुराकानी भिडियो यो लिंकमा गएर हेर्न सक्नु हुन्छ: bit.ly/nycelections2021
हामीले आज मतदान दिने जन प्रतिनिधिहरुले नै पछि हाम्रो सरोकार भएको कुराहरु सुनिदिने जिम्मेवारी लिनेछन्। सिटीको स्थानिय चुनवाहरुमा कसको जित हुन्छ भन्ने कुरामा थोरै मतले पनि निर्णायक भूमिका खेल्न सक्छ। यसैले पनि यो हाम्रो लागि ठुलो अचसर हो, र फाईदा पनि। नेपाली-भाषी समुदाय अरु समुदायहरुको दाँजोमा सानै छ, तर हाम्रो संख्या तीब्र गतिमा बढ्दैछ। हाम्रो समुदायहरुले चासो राख्ने मुद्दाहरुको हितको लागि हामीले स्थानिय निर्वाचनहरुको नतिजाहरुमा अवश्य पनि केहि असर पार्न सक्छौं।
अधिकारको नागरिक सहभागिता अभियान बारे जानकारी: अधिकारले गत केहि महिना देखि मतदाताहरुमा निर्वाचनको बारे पहुँच पुर्याउने विभिन्न क्रियाकलापहरु गर्दै आएको छ। ति क्रियाकलापहरुको छन्: हाम्रो सदस्यता र सामाजिक संजाल मार्फत सुचनाहरु दिने, सिटी व्यापी मतदाताहरुलाई फोनहरु गर्ने, स्थानिय नेपाली व्यवसायहरु मार्फत आम सुचाना दिने, उम्मेद्वारहरुसंग भर्चुअल (अनलाईन) कार्यक्रमहरु गर्ने, र सडक अभियानमा विभिन्न सहभागी संस्थाहरुसंग सहकार्य गर्ने, आदि। मतदाताहरुलाई जानकारी दिने र वहाँहरुको प्रश्नहरुको जवाफ दिने स्रोतको रुपमा हामी काम गरि रहनेछौं। हाम्रो समुदायको सदस्यहरुले हामीलाई ७१८-९३७-१११७ मा फोन गर्न सक्नु हुन्छ, अथवा हामीलाई फेसबुकमा सिधै मेसेज पठाउन सक्नुहुन्छ।
न्यूयोर्क सिटी काउन्सिलका एक प्रभावशाली उम्मेद्वारले नेपाली भाषालाई सहरको सरकारी कामकाजको भाषा बनाउने उद्घोष गरेका छन् । न्यूयोर्कको २६ नम्बर डिष्ट्रिक्टबाट सिटी काउन्सिल उम्मेद्वार रहेका अमित सिंह बग्गाले नेपाली भाषालाई अमेरिकामा अहिलेसम्मकै सर्बोत्कृष्ठ सम्मान दिलाउने प्रतिबद्धता जनाएका हुन् ।
डिष्ट्रिक्ट २६ मा क्वीन्स बोरो अन्तर्गतका सन्नी साइट, उडसाइट, लङ आइल्यान्ड सिटी र एस्टोरिया पर्छन् । यी क्षेत्रमा नेपालीको बाक्लो बसोबास रहँदै आएको छ । अहिलेसम्म १२ भाषालाई न्यूयोर्क सिटीले सरकारी भाषाको रुपमा स्वीकारेको छ । त्यसमा उर्दु र बंगाली समेत समावेश छन् । नेपाली भाषामा भने सवारी साधानको लाइसेन्स लिन लिखित परिक्षा मात्र दिन पाइन्छ ।
बग्गाको क्षेत्रमा सिटी काउन्सिलका लागि सबैभन्दा धेरै उम्मद्वार खडा भएका छन् । सबैभन्दा पहिले उनले आउँदो जुन २२ को प्राइमरी चुनावमा डेमोक्रेटिक पार्टीका १५ जना प्रत्याशीसँग प्रतिश्पर्धा गर्नुपर्ने हुन्छ । प्राइमरी निर्वाचन जितेमा नोभेम्बरको २ मा हुने अन्तिम निर्वाचनमा उनी रिपब्लिकन प्रत्याशीसँग प्रतिश्पर्धा गर्नेछन् ।
उनको निर्वाचन क्षेत्र डेमोक्र्याटका लागि सहज रहँदै आएको हुँदा प्राइमरी चुनाव जितेमा नोभेम्बरमा निर्वाचित हुने संभावना प्रवल हुनेछ । बग्गाले आफु निर्वाचित भएमा स्थानीय स्तरका ‘कम्युनिटी बोर्ड’हरुमा तत्कालै नेपालीको प्रतिनिधित्व सुनिश्चित गराउने बताएका छन् । ‘आफ्नो समुदायमा बाटोघाटो स्तरोन्नती देखि मदिरा बिक्रीको लाइसेन्स वितरणसम्मको निर्णय गर्ने कम्युनिटी बोर्डमा नेपालीहरुको प्रतिनिधित्व भएको पाइँन, उनले विश्व न्यूजसँग भने- म निर्वाचित भएमा तुरुन्तै त्यस्ता बोर्डमा नेपालीको प्रतिनिधित्व सुनिश्चित गराएर नीति निर्माण तहमा नेपालीको सहभागिता बृद्धि गराउँछु ।’ त्यस बाहेक न्यूयोर्क विद्यालयमा दक्षिण एसियाको इतिहास पढाउँदा नेपालको इतिहास समेत समावेश गर्ने कार्यक्रम उनले सुनाए ।
बग्गाले आर्थिक न्याय बिना सामाजीक न्याय एवं अल्पसंख्यको रुपमा पहिचानको मुद्दा स्थापित गर्न कठिन पर्ने हुँदा रोजगारी सुनिश्चिततालाई आफुले मुख्य प्राथमिकताका राखेको बताएका छन् । तल्लो तहमा रहेका सबै न्यूयोर्कबासीहरुलाई आर्थिक न्यायको सुनिश्चितताको लागि बार्षिक १०० मिलियन डलरको ‘फेयर इकोनोमी फन्ड’ समेत बग्गाले प्रस्ताव गरेका छन् । त्यो रकम कामदार एवं भाडामा बसोबास गर्नेहरुलाई न्याय दिलाउन खर्च गर्ने उनको भनाइ छ । त्यस बाहेक क्वीन्समा दुई मात्र सार्वजनिक अस्पताल रहेकोमा निजी क्षेत्रका जमिन लिएर सरकारी लगानीमा स्वास्थ्य सेवा क्लिनिक विस्तार गर्ने आफ्नो योजना रहेको उनले सुनाए ।
भारत र पाकिस्तान विभाजित हुँदा पाकिस्तानबाट विस्थापित शिख शरणार्थी दम्पतीबाट जन्मिएका बग्गाले १४ बर्ष बिभिन्न सरकारी संरचनामा काम गरि सकेका छन् । उनले करियरको सुरुवात कंग्रेशनल स्टाफको रुपमा गरेका थिए । त्यस पछि न्यूयोर्क सिटीमै काम गरे । कन्जुमर प्रोटेक्सन विभाग र सोसियल सर्भिस विभागको डेपुटी कमिसनरसम्मको जिम्मेवारी निभाएपछि आफुले जागिर छोडेको उनले बताए । यी जिम्मेवारीमा रहँदा ४० मिलियन डलरको कम्युनिटी फन्डिङ कार्यक्रम आफुले सञ्चालन गरेको बग्गाको भनाइ छ । त्यो रकम नेपालीको हितमा काम गरि रहेको अधिकार, युनाइटेड शेर्पा जस्ता संस्थाले समेत पाएका थिए ।
बग्गालाई वर्किङ फेमिली पार्टी लगायत प्रोग्रेसिभ राजनीतिक संस्थाहरुले समर्थन गरेका छन् । अभिनेतृ सिन्थिया निक्सन, स्टेट सिनेटरहरु जेसिका रामोस, जुलिया सलाजर लगायत ४३ बिभिन्न संघ संस्था र प्रभावशाली व्यक्तिहरुले बग्गाको उम्मेद्वारीलाई साथ दिएका छन् । अरु उम्मेद्वारले अघि सारेका कार्यक्रम पनि राम्रा रहेको तर सरकारी संरचना र ब्युरोक्रेसीको काम गर्ने तवर तरिका आफुले भित्रैबाट बुझेको हुँदा अरुले भन्दा राम्रो परिणाम दिनसक्ने उनको दावी छ ।
काठमाडौं । मेलम्ची खानेपानी आयोजनामा काम गरिरहेका ८ जना मजदुर वेपत्ता छन् । मंगलबार साँझबाट आएको बाढी र पहिरोका कारण सिन्धुपाल्चोकको मेलम्ची क्षेत्र प्रभावित भएको छ । यो विपत्तीमा करीव दुई दर्जन मानिस हराइरहेको आंशका छ । यसमा मेलम्ची खानेपानी आयोजनामा काम गर्ने ८ जना मजदुर रहेको मेलम्ची खानेपानी विकास समितिले जनाएको छ । समितिका अनुसार आयोजनामा काम गर्ने ३ चिनियाँ, ३ भारतीय र २ नेपाली कामदार सम्पर्कविहीन छन् ।
आयोजनाका ७६ जनालाई भने बुधबार हेलिकप्टरबाट उद्धार गरिएको छ । उद्धार गरेका सबैको स्वास्थ्य अवस्था सामान्य छ । उद्धार पछि मजदुरहरुलाई काठमाडौं र धुलिखेल ल्याइएको छ। सम्पर्कमा आउन बाँकी रहेका कामदारहरूको खोजी भइरहेको छ ।
आयोजनाको हेडवर्क्स नजिकैको क्याम्पसाइट बाढीले बगाएपछि मंगलबार रातिदेखि नै प्रहरी, प्रशासन, नेपाली सेना, सशस्त्र प्रहरी र स्थानीयहरु खोजीमा जुटेका हुन् । बाढीले आयोजनाका क्याम्पहरू, उपकरण, निर्माण सामग्री, पहुँच सडक, पुल भने बगाएर क्षति पुर्याएको छ ।
काठमाडौं । गृह मन्त्रालयले मनसुनका दौरान आउन सक्ने बाढी पहिरो र डुवानको समस्याका कारण उच्च सतर्कतामा रहन आफ्नो मातहतका सबै निकायलाई निर्देशन दिएको छ । उच्च जोखिममा रहेका बस्तीमा आवश्यक सतकर्ता अपनाउन समेत गृहले सम्वन्धित जिल्ला प्रशासन कार्यालयलाई सचेत गराएको छ ।
विभिन्न नदी किनारा, खोला, खहरे तथा खोल्सा नजिकका वस्तीहरु बाढीपहिरो र डुवानको उच्च जोखिममा रहेको भन्दै गृहले वस्तीमा सम्भावित विपद् सम्वन्धी पूर्वसूचना ‘हाइ अलर्ट’ गर्न निर्देशन दिएको हो ।
डुबान हुने, बाढीपहिरो आउने र खोल्सा नजिकको बस्ती भासिने समस्या देखिने भन्दै गृहले जोखिममा रहेका वस्ती सार्न समेत निर्देशन दिएको छ । गृहले ७७ वटै जिल्ला प्रशासन कार्यालय प्रमुखलाई सम्भावित मनसुन जन्य जोखिमबाट जोगिन उच्च सतर्कता अपनाउन भनेको छ ।
सो क्रममा आवश्यक सूचना तथा सुुरक्षा, उद्धार तथा उपचार, राहत र पुनस्र्थापना कार्य तयारी थाल्न समेत गृहले निर्देशन दिएको छ । पश्चिम नेपालको सुर्खेत, मध्यपश्चिमा पोखरा, काठमाडौँ, तराई मधेशको जनकपुर र विराटनगर गरी पाँचस्थानमा हेलिकप्टर सहितको उद्धार टोली खटिएको बताइएको छ ।
