काठमाडौं । राष्ट्रपति श्रीमती विद्यादेवी भण्डारीले प्रदेश २ प्रमुख तिलक परियारलाई पदमुक्त गरेकी छन्। शुक्रबार एक विज्ञप्ति जारी गर्दै राष्ट्रपतिको कार्यालयले प्रदेश २ प्रमुख परियारलाई पदमुक्त गरिएको जानकारी दिएको हो।
मन्त्रिपरिषद्को सिफारिसमा उनलाई हटाइएको राष्ट्रपतिको कार्यलयले जनाएको छ।
काठमाडौं । प्रधानमन्त्री केपी शर्मा ओलीले असन्तुष्ट पक्षलाई संवादका माध्यमबाट मूलधारमा आउन आग्रह गरेका छन् ।
प्रजातन्त्र दिवसको अवसरमा टुँडिखेलमा आयोजित कार्यक्रमलाई सम्बोधन गर्दै प्रधानमन्त्री ओलीले हिंसात्मक गतिविधि गरिरहेका तत्वहरुलाई शान्तिपूर्ण मूलधारमा आउन आग्रह गरेका हुन्। उनले विप्लव समूहलाई सरकारी वार्ता टोलीसँग संवादमा आउन आग्रह गरे।
लोकतन्त्र आइसकेपछि पनि अन्य बाटोबाट अघि बढ्न सकिन्छ भन्ने तथा रोज्ने प्रवृत्ति कायम रहेको उल्लेख गर्दै उनले नेपाली जनता त्यस्ता कुराबाट सतर्क हुनुपर्ने बताए । ‘शान्तिपूर्ण राजनीतिको मूलधारमा आउन तथा अझै पनि यसधारमा समाहित नभइसकेका वा हुन नसकिरहेको पक्षलाई म यस अवसरमा संवादका माध्यमबाट शान्तिपूर्ण राजनीतिको मूलधारमा आउन आग्रह गर्दछु’, उनले भने ।
बृहत्तर राष्ट्रिय हित र लोकतन्त्रको पक्षमा एक भएर अगाडि बढ्नुको बिकल्प नभएको उल्लेख गर्दै उनले कुनै पनि अलमलमा नपरी विगतका बलिदानलाई सम्झेर अगाडि बढ्न अपिल गरे । ‘सानातिना मतभेदलाई छाडेर बृहत्तर हित र स्वार्थमा एकताबद्ध भएर अगाडि बढौँ’, राष्ट्रिय एकतामा जोड दिँदै उनले भने ।
प्रधानमन्त्री ओलीले जनसङ्घर्षबाट प्राप्त उपलब्धिको रक्षा गर्दै नेपाललाई एकजुट बनाएर आगामी दिनमा सुन्दर भविश्य रचना गर्ने साझा प्रयास अगाडि बढाउनुपर्ने र त्यसका लागि हाम्रा चिन्तन र व्यवहार राष्ट्रिय हितमा केन्द्रित हुनुपर्नेमा जोड दिए । ‘जनताको आकांक्षा सम्बोधन गर्ने दिशामा आगामी कदम अगाडि बढ्नुपर्छ’, उनले भने, ‘राष्ट्रलाई एकताबद्ध बनाएर अगाडि बढ्न म सबैलाई आग्रह गर्दछु ।
सो समारोहमा राष्ट्रपति विद्यादेवी भण्डारी ,उपराष्ट्रपति नन्दबहादुर पुन, प्रधानमन्त्री केपी शर्मा ओली, सभामुख अग्निप्रसाद सापकोटा, प्रधानन्यायाधीश चोलेन्द्र शमशेर जबरा, राष्ट्रियसभाका अध्यक्ष गणेशप्रसाद तिमिल्सिना, मन्त्रीहरु,सांसदहरु, कूटनितिक नियोगका प्रमुखहरु लगायत विशिष्ट व्यक्तिहरुको उपस्थिति थियो।
नेपाली सेना, नेपाल प्रहरी,सशस्त्र प्रहरी लगायतका विभिन्न संघस्थाले मार्चपास, कवाज, व्याण्ड तथा विशेष झाँकीहरु प्रस्तुत गरेका थिए
काठमाडौं । आज बृहत् नागरिक आन्दोलन अभियानले टुडिखेल प्रवेशको कार्यक्रम राखेको छ । आज प्रजान्तन्त्र दिवस, अर्कोतर्फ टुडिखेलमा सेनाको कब्जा, यसै परिस्थितिमा नागरिक आन्दोलनको अभियानले समेत कडा रुप लिने संकेत गरेको छ । अभियन्ताहरुले यसलाई टुँडिखेल मार्च भनेका छन् ।
आज दिउँसो २ बजे रत्नपार्कमा भेला भएर सहिद गेट हुँदै टुँडिखेल प्रवेश गर्ने बृहत नागरिक आन्दोलनको तयारी छ । नागरिक घोषणा सभाबाट विभिन्न विषय समेटिएको घोषणापत्र समेत जारी गरिने भएको छ । नागरिक अगुवा तथा पत्रकार नारायण वाग्लेले आजै तेस्रो जनआन्दोलन घोषणा हुने यसअघि नै बताएका छन् ।
सरकारको सिफारिसमा राष्ट्रपतिले संसद विघटन गरेपछि अहिले विभिन्न क्षेत्रमा आन्दोलन जारी रहेको छ । लेखक खगेन्द्र संग्रौला, नारायण वाग्ले, सम्पदा संरक्षणकर्मी आलोकसिद्धि तुलाधर, नेपालमान डंगोल, चेपाङ संघका जितेन्द्र चेपाङ, रिता शाहसहितका अभियन्ताले नागरिक सभालाई सम्बोधनको कार्यक्रम राखिएको छ ।
काठमाडौं । नेपालमा आज ७१ औं प्रजातन्त्र दिवस मनाइँदै छ। २००७ सालको क्रान्ति सफल भएसँगै १०४ वर्ष लामो निरंकुश राणाशासन अन्त्य भई प्रजातन्त्र स्थापना भएको दिनको सम्झनामा आज कै दिन हरेक वर्ष प्रजातन्त्र दिवस मनाउन थालिएको हो । आज प्रजातन्त्र दिवस मूल समारोह समितिको आयोजनामा सैनिक मञ्च टुँडीखेलमा विशेष समारोह संचालन हुन्छ ।
कार्यक्रममा राष्ट्रपति, प्रधानमन्त्रीसहित उच्च पदस्थ अधिकारी सहभागी हुने प्रचलन रहेको छ । आजै बिहान नेपाली नेपाली सेनाले ६ः२९ मा तोप सलामी र बिगुल बजाएर बढाइँ गरेको छ । जनताको क्रान्तीबाट सफलता प्राप्त भई जनताको शासनमाथि पकड भएको दिनका रुपमा यो दिनको महत्व ठूलो रहेको छ ।
प्रजातन्त्रकै जगमा लोकतन्त्र हुँदै देश अहिले संघीय लोकतान्त्रिक गणतन्त्रात्मक शासन व्यवस्थामा छ । जहाँ अब मुलुकको सर्वोच्च पदमा जनताकै छोराछोरी पुग्ने सक्छन् । यो दिनको उपलक्ष्यमा राष्ट्रपति, उपराष्ट्रपति, प्रधानमन्त्री, सभामुखसहित सबै दलका शीर्ष नेताले शुभकामना व्यक्त गरेका छन् ।
यता, सरकारको सिफारिसमा राष्ट्रपतिबाट करीव ६ सय कैदीबन्दीलाई समेत आजकै दिन आम माफी दिने निर्णय भएको छ । मन्त्रिपरिषद्को सिफारिशमा राष्ट्रपति विद्यादेवी भण्डारीले कैदीबन्दीको भुक्तान हुन बाँकी कैद कट्टा गरी माफी मिनाहा दिएकी छन् ।
राष्ट्रपति कार्यालयका सहायक प्रवक्ता केशवप्रसाद घिमिरेले जनाए अनुसार ४०१ कैदीको भुक्तान हुन बाँकी कैद कट्टा गरी माफी मिनाहा गरिएको छ । आजसम्म कम्तीमा ५० प्रतिशत कैद भुक्तान गरेका र असल चालचलन भएका १७९ कैदीको भुक्तान हुन बाँकी कैद समेत छुट दिइएको छ । उता, १५ जनाको विभिन्न अदालतबाट विभिन्न मितिमा भएका फैसला बमोजिम कैद, जरिवाना, सर्वस्वलगायत सजाय माफी गरिएको छ ।
काठमाडौं । प्रधानमन्त्री केपी शर्मा ओलीले स्वयं उपस्थित भई अदालतको अवहेलनाविरुद्धको मुद्दामा आज सर्वोच्च अदालतमा लिखित जवाफ पेश गरेका छन् । अदालतले प्रधानमन्त्री ओलीलाई अदालतको अवहेलना मुद्दामा सात दिनभित्र सबै बेहोरा खुलाई आफैँ लिखित जवाफ पेश गर्न गत माघ १५ गते आदेश जारी गरेको थियो ।
‘सर्वोच्च अदालतको मान, सम्मान र मर्यादाका लागि’ आफैँ उपस्थित भएर उनले लिखित जवाफ पेश गरेको प्रधानमन्त्रीका प्रेस सल्लाहकार सूर्य थापाले जानकारी दिए । प्रधानमन्त्रीले लिखित जवाफ मात्र दिए पनि हुनेमा अदालतको सम्मान गर्दै आफैँ आएर पेश गरेको उनले बताए ।
न्यायाधीश डा. मनोज शर्माको एकल इजलासले जारी गरेको आदेशमा “म्याद प्राप्त भएका मितिले बाटाको म्यादबाहेक सात दिनभित्र सबै बेहोरा खुलाई आफैँ लिखित जवाफ पेश गर्नुहोला”, भनिएको थियो ।
वरिष्ठ अधिवक्ता डा कुमार शर्मा आचार्य र अधिवक्ता कञ्चनकृष्ण न्यौपानेले सर्वोच्च अदालत, संवैधानिक इजलासमा प्रतिनिधिसभा विघटनसम्बन्धी विचाराधीन मुद्दामा अभिव्यक्ति दिएर प्रधानमन्त्रीले न्याय सम्पादनमा अवरोध गरेको उल्लेख गर्दै अदालतको अवहेलना मुद्दा दायर गरेका थिए । सोही प्रकृतिको आदेशानुसार चार पूर्वप्रधानन्यायाधीश मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीले पनि लिखित जवाफ पेश गरिसकेका छन् ।
काठमाडौं । सेयर बजारले फेरि नयाँ रेकर्ड बनाएको छ । बुधबार इतिहासकै सर्वाधिक उच्च विन्दुमा पुगेको सेयर बजारले आज त्यो रेकर्ड तोड्दै सर्वाधिक विन्दुको कीर्तिमान बनाएको हो ।
कारोबारको अन्तिम दिन नेप्सेले २६३६.६८ विन्दु पार गर्दै इतिहासकै उच्च विन्दुमा पुगेको हो । यसअघि बुधबार नेप्सेले २६११ विन्दु पार गरेको थियो ।
विहिबार सेयर बजार मापक सूचक नेप्से २५.२३ अंकले बढेर २६३६ ६८ विन्दुमा पुगेको छ । नेपाल स्टक एक्सचेन्जका अनुसार त्यसदिन २०६ कम्पनीको ८ अर्ब ७६ करोड २१ लाख ४६ हजार ७८५ रुपैयाँ बराबरको १ करोड ९६ लाख ४६ हजार ५७८ कित्ता सेयर किनबेच भएका छन् ।
विहिबार कारोबारमा आएका १२ वटा समूहमध्ये ९ वटा समूहको परिसूचकमा हरियाली छाएको छ भने ३ वटा समूहको परिसूचक राताम्मे भएका छन् । कारोबारमा आएका २०६ कम्पनीमध्ये ८४ कम्पनीको सेयर मूल्य बढेको छ भने ७८ कम्पनीको मूल्यमा गिरावट आएको छ । १३ कम्पनीको मूल्य स्थिर रहेको छ ।
आज लगानीकर्ताको रोजाइमा एनआइसी एसिया परेको छ । यसको सबैभन्दा धेरै ५६ करोड बढि कारोबार भएको छ । इन्फ्रास्ट्रकचर बैंकसहित ८कम्पनीका लगानीको सेयर मूल्य ९ प्रतिशत भन्दा धेरैले बढेको छ ।
काठमाडौं । नेपाल कम्युनिष्ट पार्टी नेकपा (प्रचण्ड–माधव) समूहले आजबाट चौथो चरणका आन्दोलनका कार्यक्रम गर्दैछन् । यसै सिलसिलामा दिउँसो ४ देखि ५ बजेसम्म टुँडिखेलमा मानव साङ्लोले घेर्ने कार्यक्रम राखिएको छ । चौथो चरणको संघर्षका कार्यक्रम अन्तरगत काठमाडौंमा मानव साङ्लो प्रदर्शन गगरिने समुहले जनाएको छ ।
काठमाडौंबाहेक विभिन्न जिल्लामा विरोध प्रदर्शन र सभा आयोजना गरिने भएका छन् । जिल्लास्तरमा विरोध प्रदर्शन र सभा आगामी फागुन १२ गतेसम्म जारी राख्ने बताइएको छ । गत माघ २८ गते तेस्रो चरणका कार्यक्रम सम्पन्न गरेको प्रचण्ड–माधव समूहले चौथो चरणका विरोधका कार्यक्रम थालेको हो ।
दिल्ली । भारतको राजधानी नयाँ दिल्लीस्थित रामलिला पार्कमा एक नेपाली युवक रुखमा झुण्डिएको अवस्थामा मृत फेला परेका छन् । भारतीय संचारमाध्यमका अनुसार उनको नाम २४ वर्षिय दिपेश थापा बताइएको छ । उनको नेपालको ठेगाना भने खुलेको छैन ।
भारतीय न्यूज एजेन्सी इन्डो–एसियन न्यूज सर्भिस (आइएएनए)ले जनाए अनुसार रुखमा झुण्डिएको अवस्थामा बुधबार उनको शव फेला परेको छ । उनी चिराग भन्ने स्थानमा ममको व्यापार गर्दै आएको बताइएको छ । मंगलबार साँझसम्म उनका साथिले दिपेशलाई देखेपनि त्यसपछि बेपत्ता भएका थिए । उनको शव पोस्टमार्टमका लागि अस्पताल पठाइएको बताइएको छ ।
गुल्मी । गुल्मीमा जीप दुर्घटनामा परी ३ जनाको ज्यान गएको छ । घटनामा ६ जना घाइते भएका छन् । प्रहरीका अनुसार बुधवार साँझ सदरमुकाम तम्घासबाट पराल्मी तर्फ जाँदै गरेको लु १ ज १९८८ नम्बरको जीप रेसुङ्गा नगरपालिका वडानम्बर–१४ ठूलो पधेरा भन्ने स्थानमा दुर्घटनामा परेको छ ।
दुर्घटनामा २७ वर्षिया गोमा नेपाली, २८ वर्षिया शान्ती नेपाली र ४८ वर्षका एकराज पोखरेलको मृत्यु भएको जिल्ला प्रहरी कार्यालय गुल्मीले जनाएको छ । दुर्घटनामा पोखरेलको घटनास्थलमै र २ जनाको गुल्मी अस्पतालमा उपचारको क्रममा मृत्यु भएको प्रहरीको भनाई छ ।
घाइतेमध्ये ५ जनाको गुल्मी अस्पतालमा उपचार जारी छ । एक जनालाई थप उपचारका लागि पाल्पा पठाइएको छ । जीपमा ११ जना सवार थिए । प्रहरीका अनुसार जीपमा चढेका २ जना भने सकुशल छन् । जीप सडकबाट ६ सय मिटर झरेको छ ।
काठमाडौं । नेपालमा थप १२५ जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप १२५ जनामा कोरोना संक्रमण पुष्टि भएको हो ।
यो सँगै कोरोना संक्रमितको संख्या २ लाख ७३ हजार ७० जना पुगेको छ । स्वास्थ्य मन्त्रालयका अनुसार ९१ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६९ हजार ३९४ जना पुगेको मन्त्रालयले जनाएको छ । संक्रिय संक्रमितको संख्या १ हजार ६ सय २१ रहेको छ ।
काठमाडौं । दोगडाकेदार गाउँपालिका–७ बैतडीकी १७ वर्षीया किशोरी भागरथी भट्टको बलात्कारपछि हत्यामा संलग्न भनिएका दिनेश भट्टलाई प्रहरीले सार्वजनिक गरेको छ ।
भागरथी पढ्ने सनातन माध्यमिक विद्यालयको कक्षा ११ मा पढ्ने भट्टलाई भागरथी हत्या प्रकरणमा संलग्नता पुष्टि भएको भन्दै भट्टलाई प्रहरीले पत्रकार सम्मेलन गरेर सार्वजनिक गरेको हो ।
उनि भागरथी पढ्ने सनातन माध्यमिक विद्यालयको कक्षा ११ मा पढ्थे । घटनामा प्राप्त प्राविधिक प्रमाण, प्रत्यक्षदर्शी साक्षी, साबिती बयान लगायतका आधारमा भट्टलाई पक्राउ गरिएको सुदूरपश्चिम प्रदेश प्रहरी प्रमुख उत्तमराज सुवेदीले बताए ।
उनीविरुद्ध ज्यान मुद्दामा म्याद थप गरेर विस्तृत अनुसन्धान हुने सुवेदीले बताए । भट्टविरुद्ध भागरथीले दाइले किटानी जाहेरीसमेत दिएको उनले जनाए ।
दोगडाकेदार गाउँपालिका-७ की भागरथी भट्ट माघ २१ गते विद्यालयबाट घर फर्किने बेला बेपत्ता भएकी थिइन् । उनको शव माघ २२ गते बलात्कारपछि हत्या गरेको अवस्थामा फेला परेको थियो ।
काठमाडौं । वरिष्ठ अधिवक्ता सतीशकृष्ण खरेलले प्रतिनिधिसभा विघटन राजनीतिक नभई संवैधानिक विषय भएको बताएका छन् ।
प्रतिनिधिसभा विघटन विरुद्धको मुद्दामा बुधबार एमिकस क्युरीका तर्फबाट सुझाव दिँदै अधिवक्ता खरेलले संसद विघटन राजनीतिक नभई संवैधानिक प्रश्न भएको बताएका हुन् ।
प्रधानमन्त्री केपी शर्मा ओलीले प्रतिनिधिसभा विघटन राजनीतिक विषय भएकाले कानुनी ‘रिभ्यु’ हुन नहुने लिखित जवाफ पेस गरेका थिए । उनले सार्वजनिक अभिव्यक्तिमा पनि आफूले राजनीतिक कदम चालेकाले अदालतले त्यसमा हात हाल्न नहुने भनेका थिए ।
‘प्रतिनिधिसभा विघटन संवैधानिक प्रश्न हो । कसलाई मन्त्री नियुक्त गर्ने भन्नेमा प्रधानमन्त्रीको राजनीतिक निर्णय हुन्छ तर संसद् विघटन राजनीतिक विषय होइन । यसलाई राजनीतिक प्रश्न भन्न मिल्दैन, यो संवैधानिक विषय हो,’ अधिवक्ता खरेलले भने ।
संसद् पुनःस्थापना भए अर्को प्रधानमन्त्री बन्ने विकल्प छ कि छैन भन्ने विषय भने राजनीतिक भएको खरेलले बताए । प्रधानमन्त्री ओलीको सिफारिसमा राष्ट्रपति विद्यादेवी भण्डारीले पुस ५ गते प्रतिनिधिसभा विघटन गरेकी थिइन् ।
त्यस निर्णयका विरुद्ध सर्वोच्च अदालतमा १३ वटा निवेदन परेका थिए । ती निवेदनमाथि माघ ४ देखि सर्वोच्च अदालतको संवैधानिक इजलासमा नियमित सुनुवाइ भइरहेको छ ।
अमृता के सी(रोनी)
काठमाडौं, फागुन ४। गोकर्णेश्वर नगरपालिका वडा नं ३ सुन्ताखान स्थित पिस एन्जल्स स्कुलको आयोजनामा सरस्वती पुजाको अवसरमा पहिलो पटक शान्ति पुस्तक दान दिवस मनाइयो।गोकर्णेश्वर नगरपालिका प्रमुख सन्तोष चालिसेको प्रमुख आतिथ्यमा शान्ति पुस्तक दान दिवस घोषणा गरिएको हो ।कार्यक्रममा गोकर्णेश्वर नगरपालिकाका प्रमुख सल्लाहकार दिपक रिसाल,साहित्यकार विजय चालिसे,संगितकार एंव प्राध्यापक अचुतराम भण्डारी,बि पि संग्रहालय संस्थापक अध्यक्ष पशुराम पोखरेल,नेपाली कांग्रेस महाधिवेशन प्रतिनिधि राजु सुनार,पत्रकार एंव हास्य कलाकार श्रीकृष्ण सिंखडा,गो.न.पा वडा नं ३ वडा अध्यक्ष राजेन्द्र कुमार भण्डारी,शिवपुरी गाउँपालिका अध्यक्ष रामकृष्ण थापा,समाजसेवी किरण बिष्ट,लायन जयराम बिष्ट,पत्रकार पुण्यप्रसाद गौतम,जनप्रतिनिधि विभिन्न संघ संस्था,क्लब,महिला समूह,बासुरी खल,लगायत नागरिक समाजका बिभिन्न तह र तप्काका ब्यक्तीहरुको उपस्तिथि रहेको थियो।
शान्ति र्याली सहित आयोजित कार्यक्रममा नगर प्रमुख चालिसेलाई नागरिक अभिनन्दन गरिएको थियो। कार्यक्रमको सभापतित्व विधालयका संस्थापक प्रिसिपल एंव अधिवक्ता राजेश कुमार बिष्टले गरेका थिए। कार्यक्रममा बिष्टले आफुले जातिय एबम सांस्कृतिक सङ्ग्रहालयका लागि आफ्नो जातिय परम्परागत सस्कृति झल्कने भेषभुषा,भाडाकुडा,पुजासामाग्री,कृषिअाैजार,लोकबाजा, विबाह ,उत्सव ,जन्म, न्बारान, पास्नी,,व्यापार ब्यबसाय आदिमा प्रयोग हुँदै आएका सामाग्रीहरु र किताबहरु संकलन गरि नेपालको एकमात्र पहिलो सङग्रहालय युक्त विधालयको निर्माण गरेको बताएका थिए । सांस्कृतिक संग्राहलय युक्त विधालयको नगर प्रमुखले समुद्घाटन गरेका थिए भने कार्यक्रममा जेष्ठ नागरिक ,साहित्यकार ,लेखक ,सांस्कृतिक कर्मी,समाजसेवी , देशभक्त ,पुस्तक एंव परम्परागत र विविध सांस्कृतिक सामग्री दाताहरुलाई सम्मान गरिएको थियोे।
कार्यक्रममा नगर प्रमुख चालिसेले आफ्नो नगरको चौतर्फी विकास आफ्नै कार्यकालमा गरिसक्ने प्रतिबद्धता जनाउदै संस्कृतिको संरक्षण र जगेर्ना सहित शिक्षाको बिकास गर्ने नेपालकै पहिलो विधालय आफ्नै नगरबाट सुरुवात गर्न पाउँदा हर्षित भएको बताए। समृद्ध राष्ट्र निमार्णको निमित्त शिक्षाको महत्त्वपूर्ण भुमिका रहने भएकोले फागुन ४ गतेलाई शान्ति पुस्तक दान दिवसको घोषणा नगर प्रमुखले गरेका थिए।
कार्यक्रममा शुभकामना मन्तव्य दिने अधिकाश वक्ताहरूले शिक्षा र सिकाइको लागि नमुना विधालय भएको बताउदै हाल कक्षा पाँच सम्म पढाई संचालन हुने विधालयलाई भोलिको दिनमा मास्टर्स डिग्री सम्मको पढाई संचालन होस् भनेर शुभकामना दिए।
हालै घोषणा गरिएको सङग्रहालय युक्त नेपालको एकमात्र पहिलो बिधालय हो ।
काठमाडौं । नेपाली कांग्रेस केन्द्रिय समिति बैठक आज बस्दैछ । पार्टीको १४ औं महाधिवेशन र आगामी कार्यक्रमबारे छलफल गर्न केन्द्रीय समिति बैठक बस्न लागेको पार्टीले जनाएको छ । दिउँसो दुई बजेपछि पार्टी कार्यालय सानेपामा बस्ने बैठकमा आगामी १४ औं महाधिवेशनको कार्यतालिका, संसद विघटनविरुद्धको आन्दोलनको समीक्षा र आगामी योजनाबारे छलफल हुने भएको हो ।
१३ औं महाधिवेशनबाट निर्वाचित कांग्रेसको वर्तमान कार्यसमितिको कार्यकाल २०७६ साल फागुनमा सकिएको थियो । विधान अनुसार एक वर्ष कार्यकाल थपिएको थियो । थपिएको कार्यकाल समेत २० फागुनमा सकिँदैछ । त्यसपछि कांग्रेसले संवैधानिक सुविधा प्रयोग गरी ६ महिना अवधि लम्ब्याउन सक्ने प्रावधान रहेको छ ।
आजको बैठकबाट सभापति शेरबहादुर देउवाले भदौमा महाधिवेशनको प्रस्ताव गर्ने सम्भावना रहेको छ । कांग्रेस पूर्वनिर्धारित मितिमा महाधिवेशन गर्न भने असफल भएको छ । अर्कोतर्फ संसद विघटनको विरोधमा कांग्रेसले समेत शक्ति प्रदर्शनको तयारी गरेको छ । यसअघि स्थानीय स्तरमा मात्र सिमित सभा अब केन्द्रिय स्तरमा समेत आयोजना हुने गरी तयारी गरिने भएको छ ।
काठमाडौं । बैतडीमा बलात्कारपछि विभत्स हत्या गरिएकी किशोरी भागरथी भट्टको हत्या प्रकरणमा नेपाल प्रहरीले ठूलो सफलता प्राप्त गरेको छ । प्रहरीले भागरथीको हत्या भएको १३ औं दिनमा हत्या अभियोगमा एक युवालाई पक्राउ गरेको छ । उनलाई आज सार्वजनिक गरिने भएको छ ।
दोगडाकेदार गाउँपालिका–७ की १७ वर्षीया किशोरी भागरथी भट्टको बलात्कारपछि हत्या गरेको अभियोगमा उनी अध्ययन गर्ने विद्यालयकै एक विद्यार्थी पक्राउ परेका हुन् । प्रहरीले सनातन माध्यमिक विद्यालयको कक्षा ११ मा अध्ययरत दिनेश भट्टलाई प्रहरीले पक्राउ गरेको नेपाली संचारमाध्यमले जनाएका छन् । उनले अभियोग स्वीकार समेत गरेका छन् ।
यद्दपी प्रहरीले उनलाई शंकाको घेरामा राखी पक्राउ भने गरेको थिएन् । यसअघि सोधपुछ गरी उनलाई छाडिएको थियो । भागरथी सोही विद्यालयको कक्षा १२ मा पढ्थिन । २१ माघमा विद्यालयबाट घर हिँडेकी उनको बलात्कारपछि हत्या भएको अवस्थामा भोलिपल्ट शव फेला परेको थियो ।
भागरथीको हत्या प्रकरण निर्मला पन्तको जस्तै हुने आशंका धेरैले गरेका थिए । सोहीकारण प्रहरीले यो प्रकरणमा निकै सुझबुझपूर्ण तरिकाले काम गरेको बताइको छ । दार्चुलाबाट बैतडी जाने बाटोबाट भित्री सडक हुँदै भट्टको घर जाने बाटोमा पर्ने लवलेक सामुदायिक वनमा सडकबाट ५० मिटर तल उनको शव भेटिएको हो ।
काठमाडौं । भारतीय गृहमन्त्री तथा भारतीय जनता पार्टीका अध्यक्ष अमित शाहले नेपालमा समेत भारतीय जनता पार्टीको सरकार बन्ने अभिव्यक्ति दिएको भाजपाकै एक नेताले सार्वजनिक गरेका छन् । त्रिपुरा राज्यका मुख्यमन्त्री विप्लव देवले केही दिन अगाडी सार्वजनिक कार्यक्रममै यस्तो खुलासा गरेका हुन् । उनले शाहले सन् २०१८ मा यस्तो योजना बताएको उनले सार्वजनिक गरेका थिए ।
शाहले दिएको भनिएको आपत्तिजनक अभिव्यक्तिप्रति नेपालले भने असन्तुष्टी जनाएको छ । भारतका लागि नेपाली राजदूत निलम्बर आचार्यले यसबारे भारतीय अधिकारीसँग कुरा राखेको बताइएको छ । शाहले सन् २०१८ मा एक कार्यक्रममा भारतीय जनता पार्टीले नेपाल र श्रीलंकामा आफ्नो सरकार बनाउने योजना रहेको बताएको देवले खुलासा गरेका हुन् ।
शाह भने यो विषयमा मौन छन् । उता, भाजपा समर्थक संचारमाध्यममा भने नेताहरुले ठट्टाका रुपमा शाहले भनेको विषयलाई देवले यो विषयलाई गम्भीर रुपमा उचालेको आरोप लगाएका छन् । तर, मुख्यमन्त्रीबाटै यो विषय सार्वजनिक भएपछि भने यसले भारत र नेपालमा समेत हंगामा सिर्जना गरेको छ । इन्डियन नेसनल कंग्रेसका नेता राहुल गान्धीले शाहको अभिव्यक्तिले छिमेकीसँगको सम्बन्ध विग्रने अभिव्यक्ति दिएका छन् । उनले यसबारे शाहले नै बोल्नु पर्ने उनको भनाई छ ।
काठमाडौं । नेपालमा थप १०५ जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप १०५ जनामा कोरोना संक्रमण पुष्टि भएको हो ।
यो सँगै कोरोना संक्रमितको संख्या २ लाख ७२ हजार ९ सय ४५ जना पुगेको छ । स्वास्थ्य मन्त्रालयका अनुसार ९९ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६९ हजार ३०३ जना पुगेको मन्त्रालयले जनाएको छ । संक्रिय संक्रमितको संख्या १ हजार ५ सय ८७ रहेको छ ।
काठमाडौं । जिल्ला अदालत काठमाडौंमा न्यायाधीशकै अगाडि कर्मचारीले एकआपसमा कुटाकुट गरेका छन् । इजलास अधिकृत र फाँटका कर्मचारीबीच कुटाकुट भएको बताइएको छ ।
न्यायाधीशकै अगाडि भएको सो कुटाकुटमा इजलास अधिकृत गोकर्ण शर्मा घाइते भएको अदालतका श्रेष्तदार भीमबहादुर निरौलाले बताए ।
प्राप्त जानकारी अनुसार नायब सुब्बा नेत्रप्रसाद बास्तोला र शर्माबीच कुटाकुट भएको हो । यसअघि भइसकेको आदेशको व्यहोरालाई लिएर शर्मा र बास्तोलाबीच कुटाकुट भएको उक्त अदालतले जनाएको छ ।
‘दुबैको दाबी पहिले अर्कैले आक्रमण गरेका भनेका छन्, सुब्बा सापको हकमा इजलासले घटना विवरण माग गरेको छ, उहाँले पनि छानबिन गरिपाउँ भनेर निवेदन दिनुभएको छ, हामी अनुसन्धानका क्रममा छौँ, अनुसन्धान गरेर दोषीलाई कारबाही हुन्छ’, निरौलाले भने ।
उनका अनुसार १४ नम्बर इजलासमा न्यायाधीश प्रकाशचन्द्र अधिकारीको अगाडि उक्त झगडा भएको हो । सोमबार इजलास प्रारम्भ भएर न्यायाधीश अधिकारी मिसिल अध्ययनकै सिलसिलामा रहेको अवस्थामा दुई जनाबीच झगडा भएको हो ।
नायब सुब्बा बास्तोलाले सिधै कार्यालय प्रमुखलाई बोलाउने गरी पत्र काट्नुपर्ने अडान राखेका थिए । सोही विषयलाई लिएर दुईबीच हात हालाहालको अवस्था सिर्जना भएको हो। घाइते शर्माको ट्रमा सेन्टरमा उपचार भइरहेको छ ।
निरौलाका अनुसार दुईबीच यसअघि भएको आदेश कुन ब्यहोरामा सही गराउने भन्ने विवाद प्रारम्भिक रुपमा देखिएको छ। मालपोतलाई भएको उक्त आदेशमा इजलास अधिकृत शर्माले सुरुमा कार्यालयलाई पत्र काट्नुपर्ने अडान राखेका थिए ।
काठमाडौं । नेत्रविक्रम चन्द ‘विप्लव’ समुहका संयोजक विप्लवसहित ३६ जना नेता कार्यकर्ता विरुद्ध मोरङका शिक्षक राजेन्द्र श्रेष्ठको अपहरण तथा हत्या अभियोगमा मुद्दा दर्ता भएको छ । ‘विप्लव’, खड्गबहादुर विश्वकर्मा ‘प्रकाण्ड’सहितका उच्च नेताविरुद्ध समेत ज्यान मुद्दा दर्ता भएको हो । सोमबार जिल्ला सरकारी वकिलको कार्यालयले विप्लवसहित ३६ जनालाई अपहरण तथा कर्तव्य ज्यानमुद्दा दर्ता गरेको जानकारी गराएको छ ।
उनीहरुमध्ये एक जना मात्र प्रतिवादी पक्राउ परेका छन् । समुहका मोरङ इञ्चार्ज डिबी सिलवाल भनिने धनबहादुर विक मोरङ प्रहरीको नियन्त्रणमा छन् । उनले भने अपराध अस्वीकार गरेका छन् । पक्राउ परेका प्रतिवादी विक हातहतियार तथा खरखजना मुद्दामा सोमबार नै पुर्पक्षका लागि कारागार चलान भएका छन्।
मिक्लाजुङ–१ बर्खेस्थित सरस्वती आधारभूत विद्यालयका प्रधानाध्यापक श्रेष्ठको २३ मंसिरमा हत्या भएको थियो। उनको घाँटी रेटेर विभत्स हत्या भएको हो । हत्या गरेको दिन नै नेपाल कम्युनिष्ट पार्टीको विप्लव समूहले घटनाको जिम्मेवारी लिएको थियो ।
काठमाडौं । सरकारले देशभर सम्पूर्ण सामुदायिक विद्यालयमा दिवा खाजाका रुपमा ‘जङ्क फुड’ दिन नपाउने नियम ल्याएको छ । राष्ट्रिय समाचार समितिका अनुसार शिक्षा तथा मानव स्रोत विकास केन्द्र सानोठिमीले सोमबार यस्तो नियम सार्वजनिक गरेको छ ।
‘विद्यालय दिवाखाजा व्यवस्थापन सहयोगी पुस्तिका’ प्रकाशन गर्दै केन्द्रले सामुदायिक विद्यालयका प्रारम्भिक बालविकासदेखि कक्षा ५ सम्मका विद्यार्थीलाई दिवाखाजामा ‘जङ्क फुड’ खुवाउन नपाइने नियम ल्याएको हो ।
अब विद्यालयहरुले स्थानीयस्तरमा उत्पादन भएका खानेकुरालाई प्राथमिकतामा राखेर दिवाखाजा तयार पार्नु पर्ने छ । केन्द्रले बालबालिकालाई उपयुक्त हुने ६० प्रकारका ‘मेनु’ तयार गरी पुस्तिकामा समावेश समेत गरेका छ ।
सरकारले विद्यार्थीलाई दिवाखाजाको प्रयोजनका लागि ७ अर्ब ७२ करोड ९३ लाख ३० हजार रुपैयाँ देशभरका सामुदायिक विद्यालयमा पठाएको छ । यो रकमले २९ लाख ४० हजार ७८९ विद्यार्थीलाई विद्यालयमा दैनिक खाजा निःशुल्क खुवाइन्छ ।
सरकारले कर्णाली भेगमा प्रतिविद्यार्थी दैनिक २० रुपैयाँ र अन्य भेगका विद्यार्थीलाई १५ रुपैयाँका दरले दिवाखाजा खुवाउने गरेको छ । यसले विद्यालयमा भर्ना हुने र विद्यालयमा नियमित आउने विद्यार्थीको संख्या कायम राख्न समेत ठूलो भूमिका खेलेको छ ।
काठमाडौं । नेपाली कांग्रेसका सभापति शेरबहादुर देउवाले नेकपा बैधानिकताबारे मौन बसेको भन्दै निर्वाचन आयोगप्रति आक्रोस व्यक्त गरेका छन् । यसले आयोगप्रति नै शंका उत्पन्न गराएको उनको भनाई छ । नेपाली कांग्रेसले आज भैरहवामा आयोजना गरेको कार्यक्रमलाई सम्बोधन गर्दै उनी आयोग अनिर्णयको बन्दी भएको भन्दै निर्वाचन आयोगप्रति आक्रोसित बनेका हुन् ।
आयोगले निर्वाचन नै गराउन नचाहेको त होइन भन्ने उनको आशंका उत्पन्न भएको उनले बताए । देउवाले अदालतमा विचाराधीन मुद्दामा यही गर भन्न नमिल्ने समेत बताए । यसबारे आफ्नै पार्टीमा फरक फरक मत आएको भन्दै उनले अदालतको निर्णय पर्खिनुपर्ने राय व्यक्त गरेका छन् ।
प्रतिनिधिसभा विघटन गरेको ६ महिनाभित्र चुनाव भइसक्नुपर्ने भन्दै कांग्रेस सभापति देउवाले निर्वाचन आयोगलाई मतलब नै नभएको जस्तो देखिएको उल्लेख गरे । उनले भने यो निर्वाचन आयोगलाई म यहीँबाट भन्न चाहन्छु, प्रधानमन्त्री ओलीले संसद् विघटन गरेको ६ महिनाभित्र चुनाव गराइसक्नुपर्छ ।’निर्वाचनको तयारी गर्न अदालतको निर्णय कुर्नु नपर्ने उनको तर्क छ ।
काठमाडौं । नेपालमा थप १२२ जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप १२२ जनामा कोरोना संक्रमण पुष्टि भएको हो ।
यो सँगै कोरोना संक्रमितको संख्या २ लाख ७२ हजार ८ सय ४० जना पुगेको छ । स्वास्थ्य मन्त्रालयका अनुसार १४४ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६९ हजार २०४ जना पुगेको मन्त्रालयले जनाएको छ । संक्रिय संक्रमितको संख्या १ हजार ५ सय ८१ रहेको छ ।
काठमाडौं । प्रधानमन्त्री केपी शर्मा ओलीले तीन वर्षे कार्यकालका उपलब्धि सार्वजनिक गरेका छन् ।
सिंहदरबारमा आयोजित कार्यक्रममा प्रधानमन्त्री ओलीले आफ्नो सरकारको तीनवर्षे उपलब्धि सार्वजनिक गरेका हुन् । समीक्षाका क्रममा प्रधानमन्त्री ओलीले सरकारले उल्लेख्य काम गरेको दाबी गरेका छन् ।
उपलब्धि सार्वजनिक कार्यक्रममा ओलीले आगामी वर्ष मुलुकमा १० प्रतिशत हाराहारीको आर्थिक वृद्धि हासिल हुने दाबी गरे । आफूले प्रधानमन्त्रीको कार्यभार सम्हालेपछि पहिलो वर्ष ७ प्रतिशत र दोस्रो वर्ष त्योभन्दा माथिको आर्थिक वृद्धिदर हासिल भएको बताए ।
ओलीले सरकारप्रति नागरिकको उच्च आशा भए पनि आफ्नै पार्टीभित्रको गुट उपगुटका कारण चाहेजस्तो काम गर्न नसकेको गुनासो गरे । आफ्नै दलका नेताहरूले नै संसदीय सुनुवाइको प्रक्रियासमेत रोक्ने काम गरेको उनको दाबी थियो ।
राजनीतिक स्थिरता, समृद्धि र सुशासनको नारासहित २०७४ फागुन ३ गते ओली नेतृत्वको सरकार गठन भएको थियो । आ फ्नो नेतृत्वको सरकारले स्थिरता, विकास र सुशासनमा चमत्कारपूर्ण काम गरेको प्रधानमन्त्रीको दाबी छ । तर सरकारका काममाथि विभिन्न प्रश्न उठ्न थालेका छन् ।http://<iframe src=”https://drive.google.com/file/d/1aWLBfMShKZGbmvS_GtOE1aRWrUjyw5g2/preview” width=”640″ height=”480″></iframe>
काठमाडौं । नेपालमा थप १०४ जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप १०४ जनामा कोरोना संक्रमण पुष्टि भएको हो ।
यो सँगै कोरोना संक्रमितको संख्या २ लाख ७२ हजार ७ सय १८ जना पुगेको छ । स्वास्थ्य मन्त्रालयका अनुसार १३१ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६९ हजार ६० जना पुगेको मन्त्रालयले जनाएको छ । संक्रिय संक्रमितको संख्या १ हजार ६ सय ४ रहेको छ ।
काठमाडौं । सर्वोच्च अदालतले ललितानिवास जग्गा प्रकरणमा अभियोगपत्र दर्ता गर्दाका प्रमाण झिकाउन आदेश दिएको छ ।
न्यायाधीशहरू डा। आनन्दमोहन भट्टराई र हरिप्रसाद फुयाँलको संयुक्त इजलासले आइतवार ललिता निवास काण्डको प्रमाण माग्ने आदेश दिएको हो। वरिष्ठ अधिवक्ता वालकृष्ण न्यौपानेले अख्तियार दुरुपयोग अनुसन्धान आयोग काठमाडौं समेतलाई विपक्षी बनाइ राजनीतिक नेतृत्वलाई बचाउने गरी आयोगले निर्णय गरी मुद्धा चलाएको भन्दै तत्कालीन प्रधानमनत्रीलाई समेत मुद्दा चलाउन माग गरेर रिट दायर गरेका थिए।
अख्तियार दुरूपयोग अनुसन्धान आयोगले दुबैलाई नीतिगत निर्णयमात्र गरेको भन्दै मुद्दा नचलाउने निर्णय गरेको थियो। २०६७र०६८ सालमा माधव नेपाल नेतृत्वको मन्त्रिपरिषदले प्रधानमन्त्री निवास बालुवाटार विस्तार गर्ने निर्णय गरेको थियो।
आदेशबाट ललितानिवास प्रकरणमा क–कसलाई कसरी उन्मुक्ति दिइएको थियो भन्ने टुंगो लाग्ने छ । ती प्रमाणका आधारमा सर्वोच्चले अन्तिम फैसला गर्दा नीतिगत निर्णय भनेर जोगाइएका व्यक्तिहरुउपर मुद्दा चलाउनुपर्ने वा नपर्ने टुंगो लाग्ने छ । अध्यक्ष नेपालले भने ललिता निवास प्रकरणमा आफूलाई प्रधानमन्त्री केपी शर्मा ओलीले नियतवश फसाउन खोजिरहेको गुनासो गर्दै आएका छन्। यो प्रकरणमा मुख्य अभियुक्त शोभकान्त ढकाललाई विशेष अदालतले थुनामा पठाइसकेको छ।
काठमाडौं । पशुपतिमा वेवारिसे शव जलाएर प्रशंसा बटुल्दै बीबीसीको १०० महिलाको सूचीमा परेकी सपना रोका मगरले विजयजंग बस्नेतविरुद्ध प्रहरीमा उजुरी दिएकी छिन् ।
काठमाडौं प्रहरी परिसरका अनुसार सपनाले बस्नेतविरूद्ध अभद्र व्यवहारको मुद्दा जाहेरी दिएकी हुन् ।
बस्नेतले युट्युब च्यानलमा आफूसँग सपनाका नग्न तस्वीरहरू पेनड्राइभमा भएको बताएका थिए। उनले ती सामाग्रीहरू सार्वजनिक गर्ने धम्की दिएका थिए।
एक समय सपना विनयलाई बुवा भनेर सम्बोधन गर्ने गर्थिन् भने विनय सपनालाई छोरी भन्थे । तर पछिल्लो समय आपसी विवाद बढेको थियो ।
सपनाका अश्लील फोटो आफूसँग मोबाइल र पेनड्राइभमा सुरक्षित रहेको भन्दै युट्यबुमा अन्तर्वार्ता दिएपछि उनीहरुभित्रको विवाद थप बाहिर आएको हो । विनयले सपनामाथि धम्कीपूर्ण चेतावनी दिएपछि महिला अधिकारकर्मीले प्रहरीमा उजुरी दिएर कारवाही गर्नुपर्ने माग उठाएका थिए । सपना विश्वकै १०० प्रभावशाली महिलाको सूचीमा परेपछि भने उनीहरुको सम्बन्ध बिग्रिएको थियो ।
काठमाडौं । प्रतिनिधिसभा विघटनविरुद्ध परेका रिटमाथि संवैधानिक इजलासमा आजबाट जवाफी बहस सुरु हुने भएको छ । प्रधानन्यायाधीश चोलेन्द्रशमशेर जबराले जवाफी बहसमा निवेदक पक्षका बढीमा पाँचजनालाई बोल्न दिनेछन् । यसअघि विहिबार सरकारी पक्षको बहस सकिएको हो ।
सरकारी पक्षबाट आएका जिज्ञासा र तर्कको जवाफ निवेदक पक्षले दिनु पर्नेछ । त्यसका लागि बढीमा ५ जना वकिलले समय पाउने सम्भावना छ । जवाफी बहस गर्न नेकपाका प्रमुख सचेतक देव गुरुङका तर्फबाट वरिष्ठ अधिवक्ता शम्भु थापा, रमण श्रेष्ठसहितको टोली खटिएको छ । त्यसबाहेक अन्य १२ निवेदकका तर्फबाट समेत वकिल खटिएका छन् ।
सरकारले पुस ५ मा संसद विघटन गरेपछि यसको विरुद्धमा संवैधानिक इजलासमा बहस जारी छ । प्रतिनिधिसभा विघटनविरुद्ध १३ रिट निवेदकका तर्फबाट ७० भन्दा बढी कानुन व्यवसायीले बहस गरिसकेका छन् ।
जवाफी बहस सकिएपछि एमिकस क्युरीमा रहेका पाँचजनाले आफ्नो धारणा राख्न सक्ने छन् । एमिकस क्युरीमा नेपाल बार एसोसिएसनका तर्फबाट बद्रीबहादुर कार्की, सतिशकृष्ण खरेल, विजयकान्त मैनाली, सर्वोच्च बार एसोसिएसनका अध्यक्ष पूर्णमान शाक्य र गीता पाठक संग्रौला तोकिएका छन् ।
प्रधानन्यायाधीश जबरा नेतृत्वको संवैधानिक इजलासमा न्यायाधीशहरू तेजबहादुर केसी, सपना प्रधान मल्ल, अनिलकुमार सिन्हा र विश्वम्भरप्रसाद श्रेष्ठ रहेका छन्।
काठमाडौं । बुटवलमा गरेको सभालाई सम्बोधन गर्दै केपी शर्मा ओलीले संसद पुनस्र्थापना भए देश अस्थिरतातिर जाने भन्दै अदालतले त्यसो नगर्ने बताएका छन् । उनले भने, ‘देशलाई अदालतले अस्थिरतातिर फर्काउने छैन भन्ने विश्वास छ ।’
ओलीले संसदले काम नै नगर्ने अवस्था आएपछि प्रधानमन्त्रीको विशेषाधिकार प्रयोग गरेर आफूले विघटन गरेको बताए । धारा ७६ ९१० को प्रधानमन्त्रीले ७६९७० बमोजित संसद विघटन गरेको र यो संविधानसम्मवत भएको उनले दाबी गरे ।
संसद पुनर्स्थापना भयो भने कुनै पनि पार्टीको बहुमत नहुने र त्यस्तो बेला अस्थिरता आउने उनले बताए । उनले अघि भने, ‘अब सोझै जनतामा जनादेशमा जानुपर्छ ।’
केपी ओलीले प्रचण्ड(माधव समूहतर्फ संकेत गर्दै कसको पक्षमा जनता छन् भन्ने मतदानबाट गनौंला भनेका छन् । आफ्नो पार्टीले प्रत्यक्षतर्फ बहुमत र समानुपातिकतर्फ ५० लाख मत ल्याउने दाबी गर्दै ओलीले भने, ‘त्यो घटाएर देखाए भयो नि ।’
काठमाडौं । नेकपा प्रचण्ड-माधव समूहका अध्यक्ष पुष्पकमल दाहाल ‘प्रचण्ड’ले प्रधानमन्त्री केपी शर्मा ओलीले हजारौं सहिदका बलिदानीबाट प्राप्त गणतन्त्रमाथि खेलवाडसँगै सहिदका सपना कुल्चिने प्रयास गरिरहेको बताएका छन् ।
फागुन १ गते ‘जनयुद्ध दिवस’ को अवसरमा पार्टीको केन्द्रीय कार्यालय पेरिसडाँडामा आयोजित सहिद स्मृति सम्मान कार्यक्रममा सम्बाेधन गर्दै ‘प्रचण्ड’ले प्रधानमन्त्री केपी शर्मा ओलीले हजारौं सहिदका बलिदानीबाट प्राप्त गणतन्त्रमाथि खेलवाडसँगै सहिदका सपना कुल्चिने प्रयास गरिरहेको बताएका हुन् ।
साथै, प्रधामन्त्री ओलीले चालेको कदमविरुद्ध आफू मर्नबाट नडराउने उनले बताए । उनले भने, ‘सहिदहरुले बलिदान गरेर प्राप्त गरेका उपलब्धी हामी गुम्न दिने छैनौं । जरुरी पर्छ भने फेरि बलिदान दिन तयार छौँ ।’
सात दशक लामो हजारौं सहिदहरुको संघर्षबाट प्राप्त भएको गणतन्त्र उपलब्धी खतरामा पर्न लागेको भन्दै अब सबै नेपालीहरु एकजुट भएर फेरि एकचोटी संघर्षको मैदानमा उत्रिनुपर्ने बेला आएको पनि उनले बताए । ‘आफ्नै आँखाअगाडि सहिदका सपना कुल्चिएको टुलुटुलु हेर्न सक्दिनँ । जरुरी पर्छ भने फेरि बलिदान दिन तयार छौँ,’ जनयुद्धकालीन पलहरु सम्झिँदै नेकपा अध्यक्ष प्रचण्डले भने, ।
काठमाडौं । नेपालमा थप ५७ जनामा कोरोना भाइरसको संक्रमण पुष्टि भएको छ ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ५७ जनामा कोरोना संक्रमण पुष्टि भएको हो ।
यो सँगै कोरोना संक्रमितको संख्या २ लाख ७२ हजार ६ सय १४ जना पुगेको छ । स्वास्थ्य मन्त्रालयका अनुसार १३३ जना कोरोनालाई जितेर अस्पतालबाट डिस्चार्ज भएका छन् ।
यो सँगै नेपालमा निको हुनेको संख्या २ लाख ६८ हजार ९२९ जना पुगेको मन्त्रालयले जनाएको छ । संक्रिय संक्रमितको संख्या १ हजार ६ सय ३१ रहेको छ ।