Category: समाचार

काठमाडौं । शनिबार यता नेपालमा कोरोना संक्रमित फेला परेनन् । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोरोना अतिप्रभावित क्षेत्रबाट प्राप्त कूल ६६ वटा नतिजा परिक्षण भएको थियो ।

तर, सबै परिक्षण नेगेटिभ आएको छ । सरकारले सातवटै प्रदेशमा र्‍यापिड डाइगोनिस्टिक किटबाट कोरोनाको परीक्षणको तयारी समेत गरेको छ ।

लकडाउन गरिरहेको सरकारले परिक्षण समेत सँगै बढाउँदै कोरोना संक्रमणविरुद्ध लड्ने योजना बनाएको मन्त्रालयका प्रवक्ता डा. विकास देवकोटाले जानकारी दिए ।

उनका अनुसार प्रत्येक प्रदेशमा ५ हजारको दरले किट पठाइ सकिएको छ । सरकारले यो किटबाट सुदूरपश्चिमको कैलालीमा परीक्षण गर्न सुरू गरेको छ ।

किटले १५ मिनेटमै परीक्षणको नतिजा दिने बताएको छ । यसरी संकलन भएको किटको गुणस्तर जाँच्न कैलाली र कञ्चनपुरबाट २ सय नमूना राष्ट्रिय जनस्वास्थ्य प्रयोगशालामा ल्याइएको छ।

त्यसमध्ये ६६ नमुना परिक्षण गरिएको हो । नेपालमा करीव २४ सय परिक्षण भइसकेको छ । जसमा ९ जनामा मात्र कोरोनाको संक्रमण देखिएको छ ।

त्यसमा पनि १ जना निको भइसकेका छन् । कोरोना पोजेटिभ बिरामीको समेत कोरोनाको लक्षण नदेखिएको र स्वस्थ रहेको बताइएको छ ।

काठमाडौं । नेपाली कांग्रेसका १० नेताले सांसद विकास कोष र पूर्वपदाधिकारीको सुविधा कटौती गरी कोरोना भाइरस रोकथाम तथा नियन्त्रणमा लगाउन सुझाव दिएका छन् ।

उनीहरुले बिहीबार एक विज्ञप्ति जारी गरी यस्तो सुझाव दिएका हुन् । अहिले सरकारले खर्च कटौती गरी रकमको जोहो गर्न खोजिरहेको छ ।

संकटको समयमा खर्च कटौतीका लागि सांसद विकास कोषको रकम उपयुक्त हुने उनीहरुको सुझाव रहेको छ ।

कोरोना रोकथाम तथा नियन्त्रणमा पूर्व पदाधिकारीले पाउने सुविधा र सुरक्षा कटौती गरेर जनताको हितमा लगाउन समेत उनीहरुले माग गरेका छन् ।

संघीय सरकारले प्रतिनिधिसभा निर्वाचन क्षेत्रका लागि स्थानीय पूर्वाधार विकास साझेदारी कार्यक्रममार्फत प्रतिसांसद ६ करोड रुपैयाँ विनियोजन गर्ने गरेको छ ।

कांग्रेस नेताहरुले सुरक्षाकर्मीको तलब समेत नकाट्न सुझाव दिएका छन् ।

नेताहरु डा. चन्द्र भण्डारी, धनराज गुरुङ, कमला पन्त, रत्ना शेरचन, गुरुराज घिमिरे, गगन थापा, बद्री पाण्डे, जीवन परियार, प्रदीप पौडेल, रामकृष्ण यादव, कल्याण गुरुङ र किरण यादवले विज्ञप्ति जारी गरेका हुन् ।

सरकारले कोरोनाको संक्रमण पत्ता लगाउन परिक्षणको दायरा बढाउनु पर्ने उनीहरुको सुझाव रहेको छ ।

उनीहरुले कोरोना भाइरसबाट संक्रमित ब्यक्तिको पहिचानका लागि आबश्यक पर्ने परीक्षणका लागि चाहिने परीक्षण किट, पिपिइ लगायतका स्वास्थ्य उपकरण तथा सामग्रीको बन्दोबस्त गर्न पनि सरकारसँग माग गरेका छन् ।

नेताहरुले बिदेशबाट नेपाल आउन चाहने नेपालीलाई सहजै आउन दिने ब्यवस्थाको माग गरेका छन् ।

कोरोनाको महामारी चर्कदै गर्दा न्युयोर्क सहरमा ट्याक्सी चालकको काम गर्दै आएका राउल रोमेरोलाई माक्स लगाएर ट्याक्सी चलाउने कामलाई निरन्तरता दिंदा कोरोनाबाट सुरक्षित हुन सकिन्छ भन्ने लाग्यो  । न्युयोर्कमा कोरोना संक्रमण फैलिन सुरु हुँदादेखि नै रोमेरोले न्युयोर्क सहरका सम्पूर्ण ट्याक्सी व्यवसायीको नियमनकारी संस्था “ट्याक्सी एण्ड लिमोजिन कमिसन” को प्रत्येक सुचना नछुटाई पढ्दै आएका थिए । अन्य थुप्रै ब्यवसाय र काम बन्द भए पनि ट्याक्सी एण्ड लिमोजिन कमिसनको ‘ट्याक्सी सेवा अत्यावस्यक भएको हुँदा थप सतर्कता साथ ड्राईभरले काम गर्नु’ भन्ने सुचना रोमेरोले पनि पढे । कोरोनाले न्युयोर्कमा महामारीको रुप लिंदै गर्दा रोमेरोले अत्यावस्यक सेवा अन्तर्गत पर्ने भनिएको ट्याक्सी चलाऊने कामलाई नियमित गर्ने भएपछि उनको छोरीले गाडी सफा गर्ने लाइजोल, सुरक्षाको लागि पंजा र माक्स पनि बाबुको लागि किनेर ल्याइदिइन् ।एकतिर कोरोना संक्रमणको चिन्ता अर्को तर्फ रोमेरोले हरेक महिना तिर्नै पर्ने ११ सय डेरा भाडा, ४ सय ४० डलर गाडीको मार्गेज, लायबिलिटी ईन्सुरेन्स ३ सय २० डलर, ट्याक्सी डिस्प्याच फि १ सय ५० डलर, पार्किङ फि १ सय २० डलर, फोन बिल र ६० डलर ईन्टर्नेट शुल्क गरेर हुने मासिक २ हजार १ सय नब्बे साथमा मेडिकल ईन्सुरेन्सको मासिक शुल्कको बोझ थायो । त्यसको अतिरिक्त दैनिक उपभोग्य बस्तु किन्नु त छँदैछ । महिनैपिच्छे तिर्नु पर्ने यिनै अनगिन्ती बिलहरुले रोमेरोलाई कोरोनाको केन्द्र बिन्दु शहरमा कोठा भित्र सुरक्षित राख्न सकेन ।त्यो महामारीमा पनि ट्याक्सी चलाएर जिबिका चलाऊने सोच अनुसार रोमेरोले आफ्नी ३२ बर्षीया पत्नीलाई भने “न्युयोर्क शहरमा ट्याक्सी चलाऊनु मेरो काम हो ।  हाम्रो सिंगो परिवार त्यही काममा निर्भर छ” ।  रोमेरोले पंजा र मास्क लगाएर कामलाई नियमिता दिए ।

अहिले उनी बिरामी छन् । उनकी ३२ बर्षीया पत्नी स्याण्ड्रा पनि बिरामी छिन् । उनको जेठी छोरी ज्वाँई पनि बिरामी छन् । अहिले राऊल रोमेरो काम गर्ने अवस्थामा छैन । अप्रिलको पहिलो हप्ता पुरा हुन लाग्यो उनीसँग कोठा भाडा तिर्ने पैसा पनि छैन । ब्रोंक्सस्थित साँघुरो अपार्ट्मेन्टमा परिवारका साथ बसोबास गर्दै आएका राऊल अहिले कोरोना सुरु भै सक्दा पनि जोखिम लिएर काम गरेको पुराना दिन सम्झने कोशिस गर्छन् । कोरोना संक्रमण न्युयोर्कमा सुरु हुँदै गर्दाको सुरुवाती दिनमा राऊल ट्याक्सी ब्यबसायमा निकै ब्यस्त थिए । थुप्रै ट्याक्सी र उबर थन्किएका थिए तर राऊलको रफ्तार ब्यापक थियो । अस्पतालमा कोरोनाका संक्रमितको चाप बढ्दै थियो अनि शहरमा डाक्टर र नर्सको ब्यस्तता पनि बढ्दै थियो । तिनै ब्यस्त डाक्टर र नर्सलाई घरबाट अस्पताल र अस्पतालबाट घर गराउन पाएको राऊलले त्यतिबेला आफुलाई एउटा “हिरो” जस्तो महसुस गरेका थिए । महामारीको समय यस्तो सेवाको काम गर्न पाएकोमा राऊल गौरवान्वित थिए । उनले त्यतिबेला पेसेन्जरमात्र बोकेनन्, सिनियर सिटिजनको घर घरमा ग्रोसरी पुर्याउने सेवा समेत                                             गरे । बिस्तारै बिस्तारै राऊलको ट्याक्सीमा अस्पताल जाने बिरामी पनि चढ्न थाले ।  अस्पताल जाने कतिपय पेसेन्जरले आफु कोभिड -१९ टेस्ट गर्न अस्पताल जान लागेको बताएका थिए । राऊलको सानो “टोयटा क्याम्री” गाडी चढ्ने पेसेन्जर कतिपयले जोड जोडले खोक्ने गर्दथे । गाडी भित्र खोक्ने कतिपय ग्राहक कतिले मुख छोपेर खोक्थे भने कतिले मुख नछोपी खोक्थे । राऊल आफु मास्क लगाउँथे, पंजा लगाउँथे तर पेसेन्जर कतिपयले मास्क नै लगाउदैन थिए ।  

अहिले राऊल कोठामा बसेर गत मार्च १४ तारिकका दिन उनको ट्याक्सी चढने सबै ग्राहकको अनुहार र घटना सम्झिने कोशीसमा छन् । राऊललाई अहिले कुन ग्राहकले कोरोना सारेको हो त्यो पनि प्रष्ट अनुमान छ । उनी सम्झिन्छन्; “एक जना ग्राहकले उनलाई आफु कोभिड  -१९ पोजेटिभ भएको र अस्पताल जान लागेको भन्दै जोड जोडले खोक्दै थिए । पछाडि बसेर खोकेको पेसेन्जरको छिटा राऊलको सिटको पछाडिसम्म परेको अनुमान पछि राऊलले आफ्नो ज्याकेटको हूड उचालेर टाउको छोपेको उनी बातउँछन् । न्युयोर्क सिटीका ड्राईबरलाई आफ्नो पेसेन्जर अस्विकार गरेर बाहिर निकाल्न मिल्ने अधिकार छैन । २० मिनेट मात्र टाढा जाने ती ग्राहक बोकेको ४ दिन पछि राऊल बिरामी परे । राऊलसँग ज्वरो नाप्ने थर्मोमिटर पनि थिएन ।  राऊललाई निकै गार्हो हुँदै थियो । उनकी पत्नी स्याण्ड्राले लसुन र अन्य मसला भएको तातो- तातो सुप कर गर्दै खुवाउन थालिन् ।  राऊलको शरिरको तापक्रम बृद्धि हुँदै थियो ।पत्नी स्याण्ड्राले उनलाई कोठा बाहिर जान दिईनन । स्याण्ड्राले सिटी हट लाईनमा फोन गरिन र आफ्नो पतिको सबै लक्षण बताईन् तर उताबाट जवाफ आयो कि “अहिले अस्पताल प्याक छ घरमा नै आराम गर्नु” ।  

अहिले पत्नी स्याण्ड्रा, जेठी छोरी, ज्वाँई सबै बिरामी परेका छन् । उनीहरु सबै आफ्नै घरमा आराम गर्दै छन् ।अमेरिकी नागरिक राऊलको परिवार ४० बर्षदेखि ब्रोंक्समा बसोबास गर्दै आएको छ । राऊल लगातार अनइम्प्ल्वाईमेन्ट दाबी गर्ने सोचमा डिपार्ट्मेन्ट् अफ लेबरको वेब साईटमा ट्राई गर्दै छन् ।  तर कहिले सिस्टमले काम गर्दैन कहिले फोन गर्न खोज्यो फोन लाग्दैन । अब उनीहरुको आशा सरकारले पठाउने प्रतिब्यक्ती १२ सय डलरको प्याकेज अन्तर्गत आउने २४ डलर हिसाब गर्दै कुरेर बसेका छन् ।  

(यो आलेख वासिङ्टन पोष्टबाट उल्था गरेका हौं)

काठमाडौं । संसारभर कोभिड १९ को त्रास जारी छ । ३१ डिसेम्बर २०१९ मा चीनको बुहानमा पहिलो पटक देखिएको यस भाइरसले विश्वका करीव सबैजसो मुलुक प्रभावित बनेका छन् ।

सोमबार रातीसम्मको तथ्यांक अनुसार कोरोनाका कारण विश्वभर ७४ हजार ६ सय ७८ मानिसको ज्यान गएको छ । विश्वभर १३ लाख ४६ हजार दुई सय ९९ जनामा यसको संक्रमण पुष्टी भएको छ ।

त्यसमध्ये नेपालमा ९ जनामा संक्रमण पुष्टी भएको छ । २ लाख ५३ हजार ७ सय जना भने निको भएर घर फर्किसकेका छन् ।

संसारभरका मुलुकमध्ये सबैभन्दा धेरै मानिस इटलीमा मरेका छन् । सोमबार इटलीमा ६ सय ३६ जनाको ज्यान गएको छ ।

इटलीमा मृत्यु हुनेको कुल संख्या १६ हजार ५ सय २३ पुगेको छ । यस मुलुकमा संक्रमितको संख्या १ लाख ३२ हजार ५ सय ४७ रहेको छ ।

सोमबार ३ हजार ५ सय ९९ नयाँ संक्रमित देखिए । स्पेनमा मृतकको संख्या १३ हजार तीन सय ४१ पुगेको छ । यहाँ संक्रमितको संख्या एक लाख ३६ हजार छ सय ७५ पुगेको छ ।

अमेरिकामा मृत्यु हुनेको संख्या १० हजार ९ सय ८ पुगेको छ । अमेरिकाको न्युयोर्कमा मात्र ४ हजार ७ सय ५८ जनाको मृत्यु भएको छ ।

अमेरिकामा संक्रमितको संख्या ३ लाख ६७ हजार ५ सय ७ रहेको छ । फ्रान्समा सोमबार ८ सय ३३ जनाको मृत्यु भएको छ ।

फ्रान्समा एकै दिन धेरै जनाको मृत्यु भएको पहिलो पटक हो । अब फ्रान्समा मृत्यु हुनेको संख्या ८ हजार ९ सय ११ पुगेको छ ।

बेलायतमा मृत्यु हुनेको संख्या ५ हजार ३ सय ७३ र संक्रमितको संख्या ५२ हजार दुई सय ७९ पुगेको छ ।

जर्मनीमा संक्रमित संख्या १ लाख ३ हजार ३ सय ७४ र मृतक संख्या १ हजार ८ सय १० पुगेको छ । इरानमा ३ हजार ७ सय ३९ को ज्यान गएको छ ।

काठमाडौं । अब निजी अस्पतालका डाक्टरले पनि कोरोना रोगसँग लड्दा सरकारी डाक्टरसरह सुविधा पाउने भएको छन् ।

सोमबार बसेको मन्त्रिपरिषद बैठकले निजी क्षेत्रका डाक्टर सरकारी अस्पतालमा आएमा सम्बन्धित तहअनुसार मिलान गरी कामको अवसर दिने निर्णय गरेको छ ।

सरकारले कोरोना संक्रमण रोकथाम तथा नियन्त्रणका लागि सरकारी अस्पतालमा आएर काम गर्न इच्छुक निजी डाक्टरहरुलाई सरकारी डाक्टरसरह सेवा सुविधा दिने निर्णय गरेको छ ।

सरकारका प्रवक्ता डा. युवराज खतिवडाका अनुसार निजी क्षेत्रका चिकित्सकहरुले पनि सरकारी अस्पतालहरुमा आएर काम गर्न चाहेमा वा काम गर्न खोजेमा उनीहरुलाई सरकारी अस्पतालले स्वागत गर्नेछन् ।

कोरोना नियन्त्रण तथा रोकथाममा खटिने चिकित्सक, नर्स र सुरक्षाकर्मीको मनोबल उकास्न सरकारले शतप्रतिशत भत्ताको निर्णय गरिसकेको छ ।

काठमाडौं । प्रमुख प्रतिपक्षी नेपाली कांग्रेसका सभापति शेरबहादुर देउवाले कोरोना भाइरस संक्रमणका विषयमा पूर्वप्रधानमन्त्रीहरुसँग छलफल गरेका छन् ।

उनले कोरोनाको संकटसँग जुध्न आवश्यक रणनीति तयार गर्नु पर्नेबारे छलफल गरेको बताइएको छ ।

उनले पूर्वप्रधानमन्त्री लोकेन्द्रबहादुर चन्द, पुष्पकमल दाहाल ‘प्रचण्ड’, माधवकुमार नेपाल, झलनाथ खनाल, बाबुराम भट्टराई र मन्त्रिपरिषदका पूर्वअध्यक्ष खिलराज रेग्मीसँग टेलिफोनमा वार्ता गरेका हुन् ।

आइतबार सभापति देउवाले पूर्वप्रधानमन्त्रीहरूसँग टेलिफोनमा वार्ता गरी कोरोना संक्रमणसँग जुध्न सरकारले गरेका तयारी र अब चाल्नु पर्ने कदमबारे छलफल गरेका हुन् ।

सभापति देउवाको सचिवालयका अनुसार कोरोना संकटबाट नेपाल र नेपालीलाई जोगाउन ऐक्यवद्ध भएर गम्भीर ढंगले काम गर्न पूर्वप्रधानमन्त्रीसँग कुराकानी गरेका हुन् ।

देउवाले सत्तारूढ नेपाल कम्युनिष्ट पार्टी नेकपाका अध्यक्षसमेत रहेका प्रचण्ड, वरिष्ठ नेता खनाल र नेपालसँग सरकारका कमीकमजोरी सच्याएर जानुपर्ने बताएका थिए ।

वर्तमान संकट नेपाल र नेपालीमाथिको संकट भएको भन्दै दल भन्दा माथि उठेर समाधानमा लाग्नु पर्ने देउवाले बताएका छन् ।

सरकारले गरेको प्रयत्नलाई अझ प्रभावकारी बनाउने सन्दर्भका सभापतिले छलफल गरेका हुन् । नेपालमा अहिलेसम्म कूल ९ जनामा कोरोनाको संक्रमण देखिएको छ ।