Category: समाचार

काठमाडौं । यसअघि तीन पटकसम्म सूचना टाँस गरी स्थगित भएको प्रतिनिभिसभाको बैठक आज बस्दैछ ।

आजको बैठकले सभामुख चयन प्रक्रिया थाल्ने बताइएको छ । त्यसक्रममा उपसभामुखको राजिनामा समेत आउने छ ।

सत्तारुढ नेपाल कम्युनिष्ट पार्टी नेकपाले शनिबार मात्र सभामुखका उम्मेदवारको टुंगो लगाएको थियो । अब सभामुख अग्नी सापकोटा बन्दैछन् ।

पुस ११, १६ र २७ गतेका लाई डाकिएको बैठक भने नेकपाबाट सभामुखका उम्मेदवार आउन ढिलाई भएका कारण स्थगित गरिएको थियो ।

बैठक आइतबार १ बजेका लागि बोलाइएको छ । आजको बैठकले सभामुख निर्वाचनको कार्यतालिका बनाउने छ । सभामुख चयन ३ दिनभित्र पुरा हुने छ ।

काठमाडौं । अग्नी सापकोटा नयाँ सभामुख बन्ने भएका छन् । सत्तारुढ नेपाल कम्युनिस्ट पार्टी (नेकपा)ले उनको नाम सिफारिस गरेको हो ।

यसअघि नेकपाका शीर्ष नेतृत्वले सापकोटाको नाममा सहमति जुटाएको थियो । त्यसपछि सचिवालयले बैठकले औपचारिक रुपमा उनको नाम अनुमोदन गरेको हो ।

अब सोमबार हुने निर्वाचन प्रक्रियाबाट उनी सभामुख बन्ने भएका छन् । सोमबार नै नेकपाको संसदीय दलको बैठक समेत बस्ने भएको छ ।

सभामुख उमेदवार बन्ने सापकोटा नेकपा स्थायी कमिटी सदस्य तथा प्रतिनिधिसभा सदस्य हुन् ।

उनी नेकपाको पार्टी एकताअघि माओवादी खेमामा रहेका थिए । उनी जनयुद्धमा सक्रिय भूमिकामा थिए भने जनआन्दोलनमा समेत माओवादीको उपत्यका ब्यूरो सम्हालेका थिए ।

उनी सांसदका रुपमा तीन पटकसम्म निर्वाचित भइसकेका छन् । उनी सिन्धुपाल्चोकका स्थायी बासिन्दा हुन् ।

उनी नेकपा अध्यक्ष प्रचण्डका विश्वासपात्र हुन् । प्रचण्डकै सिफारिसमा उनी सभामुख बन्न सफल भएका हुन् । ०५१ सालयता उनी अनवरत रुपमा प्रचण्डको सहयोगीका रुपमा रहिआएका छन् ।

पूर्वसभामुख कृष्णबहादुर महरामाथि बलात्कार प्रयासको आरोप लागेपछि उनले राजिनामा दिएका थिए । त्यसपछि यो पद रिक्त थियो ।

नेकपामा निकै विवाद र वहसका बीच नयाँ सभामुखको टुंगो लागेको हो ।

काठमाडौं । शुक्रबार प्रधानमन्त्री केपी शर्मा ओली र नेकपा अध्यक्ष प्रचण्डबीच भेटवार्ता हुँदैछ । सम्भवतः आज सभामुखको टुंगो लाग्ने नेकपाका नेताहरुले बताएका छन् ।

बिहीबारको वार्ता सहमति नजिक पुगेको र शुक्रबार सभामुखको टुंगो लाग्ने बताइएको छ ।

यद्दपी बिहीबार यसबारे ठोस के कुराकानी भयो भन्ने चाही खुलाइएको छैन ।

प्रतिनिधिसभा ६ माघका लागि बोलाइएको छ । त्यसअगाडी नै सहमति गरी टुंग्याउने तयारी शीर्ष नेताको रहेको छ ।

नेकपामा सभामुखबारे विवाद बढ्दै गएपछि त्यसको असर प्रतिनिधिसभा बैठकमा परेको छ । संसदका कामकारवाही ठप्प भएका छन् ।

कृष्ण बहादुर महराले सभामुख पदबाट राजिनामा गरेपछि यो पद रित्त छ ।

उपसभामुखले राजिनामा गर्न नमानिरहेको अवस्थामा नेकपाले यो गाँठो फुकाउन नसकेको हो । सम्भवतः आज यसले टुंगो पाउने अपेक्षा नेताहरुले गरेका छन् ।

काठमाडौं । बझाङमा बिहीबार बिहान भूकम्पको धक्का महसुश गरिएको छ । आज माघ २ भूकम्प सुरक्षा दिवस मनाउने दिनमै पश्चिम नेपालमा भूकम्पको अनुभव गरिएको हो ।

बिहीबार बिहान ५ बजेर ५९ मिनेटमा तल्कोट गाउँपालिकाको मेलबिसौँना केन्द्रबिन्दु भएर ३ दशमलव ८ म्याग्निच्युडको भूकम्प गएको भूकम्प मापन केन्द्र सुर्खेतले उल्लेख गरेको छ ।

भूकम्पको क्षतिबारे भने थाहा भइसकेको छैन । विसं १९९० माघ २ गते अपराह्न २ बजेर २४ मिनेटमा गएको भूकम्पको सम्झना र यसबाट हुने क्षति न्यूनिकरणसम्बन्धमा जनचेतना फैलाउन उद्देश्यले हरेक वर्ष यो दिवस मनाइन्छ ।

यस वर्ष २२ औँ राष्ट्रिय भूकम्प सुरक्षा दिवस मनाउन लागिएको हो । भूकम्पबाट सुरक्षित पूर्वाधार, दिगो सुख र समृद्धिको आधार’ भन्ने नारा यस वर्ष दिइएको छ ।

नेपालमा विसं २०५५ देखि माघ २ गतेलाई राष्ट्रिय भूकम्प सुरक्षा दिवस घोषणा गरिएको थियो ।

विसं २०७२ वैशाख १२ गते शनिबार ११ः५६ मा गोरखाको बारपाक केन्द्रविन्दु भएको भूकम्पले करीब नौ हजार मानिसको ज्यान लिएपछि यस दिवसको सन्दर्भिकता अझै बढेको हो ।

यस दिवसका अवसरमा मूल समारोह समितिले आज भक्तपुरमा विशेष कार्यक्रम राखेको छ ।

काठमाडौं । बालुवाटारको ललितानिवास जग्गा काण्डका आरोपित मध्ये एक शोभाकान्त ढकालको घरमा बम विस्फोट भएको छ । बुधबार साँझ उनको नागार्जुनस्थित घरमा बम विस्फोट भएको प्रहरीले पुष्टी गरेको छ ।

नागार्जुन, १ नर्सरी चोकमा उनको घर रहेको छ । विस्फोटले घरमा सामान्य क्षति भएको र पार्किङ गरी राखेको गाडीमा समेत सामान्य क्षति भएको बताइएको छ ।

मानवीय क्षति भएको छैन । प्रहरीले थप अनुसन्धान भइरहेको बताएको छ ।

विस्फोटको जिम्मा भने नेकपा विप्लव समूहले लिएको छ । उक्त समूहले केही दिन यता एनसेलका टावरमा समेत क्षति पुर्याइरहेको छ ।

उक्त समूहले विस्फोट लगत्तै पर्चा फालेको थियो ।

काठमाडौं । नेपाली कांग्रेस सभापति शेरबहादुर देउवाले विवाद समाधानमा पहल थालेका छन् ।

उनले आइतबार वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलासँग भेट गर्दै अनिर्णयको बन्दी भएको पार्टीलाई निकास दिने प्रयास थालेका हुन् ।

११ पुसमा केन्द्रीय समिति बैठकबाट १४ औं महाधिवेशनको कार्यतालिका ल्याएको र वर्तमान कार्यसमितिको अवधि १ वर्ष लम्ब्याएपछि पौडेल र सिटौला बिच्किएका छन् ।

बीना परामर्श बहुमतको बलमा पेलेर निर्णय आएको भन्दै नेताद्धय समूहले अन्य बैठकहरुसमेत निरन्तर बहिष्कार गर्दै आएको छ ।

त्यसपछि यी नेताहरुले जिल्ला सभापतिहरुलाई काठमाडौं डाकेर निर्णय सच्याउन देउवामाथि दवाव समेत दिएका थिए ।

सभापति निवास बुढानिलकण्ठमा आइतबार साँझ सभापति देउवा, पौडेल र सिटौलाबीच छलफल भएको छ ।

पार्टी भित्रको आन्तरिक विवाद सहमतिकै आधारमा मिलाएर जाने विषयमा छलफल भएको बताइएको छ ।

आन्तरिक कलहका कारण कांग्रेसले प्रतिपक्षीको भूमिकामा समेत आफूलाई दरिलो रुपमा उभ्याउन सकेको छैन ।

नेकपा विवादले प्रतिनिधिसभा बैठक प्रभावित भइरहेका बेला कांग्रेसल दरो रुपमा यसका विरोध समेत गर्न सकेको छैन ।