Category: समाचार

कल्पना घिमिरे

न्यूयोर्क/अमेरिका
रिजउडमा बन्ने भनिएको दुर्गा मन्दिर र नेपाली सांस्कृतिक केन्द्रको भवनको नक्सा पास भई निर्माण कार्य प्रक्रिया अघि बढेको छ । रिजउड नेप्लिज सोसाइटिले आइतबार ज्याक्सन हाइटमा पत्रकार सम्मेलन गरी महापूराणमा दान कबुल गर्ने दाताहरुलाई जतिसक्दो चाँडो रकम दिन आग्रह गरेको छ ।
न्यूयोर्कमा नेपालीहरुको सामुदायिक भवन र दुर्गा मन्दिर स्थापना गर्ने उदेश्यले नै सन् २०१७ अगस्ट २३ देखि २९ सम्म ज्याक्सन हाइटमा महापूराणको आयोजना गरिएको थियो । महापूराणको दुई वर्ष भित्रमा भवन निर्माण कार्य थालनी गर्ने भनिए पनि नक्सा पास गर्न निकै झमेला र अफ्ठेरो खेप्नु परेकोले समयमै सुरु गर्न नसकिएको सोसाइटिले जनाएको छ । ‘तर, दुई वर्षको अथक प्रयास पछि हामी नक्सा पास गर्न सफल भएका छौं’ भवनको नक्सा तयार गर्ने इन्जिनियर सूर्य लम्सालले भने, ‘भवन बेसमेन्ट सहित चार तल्लाको हुनेछ । भवनको क्षेत्रफल ८ हजार ३ सय ५० वर्ग स्क्वाएर फिट हुनेछ ।’ मन्दिरको ठेगाना १६–४७, हेन्कक स्ट्रिट, फ्लसिङ न्यूयोर्क, ११३८५ हुनेछ ।

दुर्गा मन्दिर बिधान २०१९ अनुसार मन्दिरको संस्थापक बन्नका लागि डिसेम्बर ३१, २०१९ सम्ममा कबुल गरेको रकमको ५० प्रतिशत बुझाउनु पर्नेछ भने जुन ३०, २०२० सम्ममा पुरै रकम दिइसक्नु पर्नेछ । मन्दिर बनिसकेपछि संस्थापक (फउन्डिङ मेम्बर) बन्ने ब्यवस्था छैन ।
सोसाइटिले विगतमा दुई वटा महापूराण आयोजना गरेको थियो । सन् २०१० र २०१७ मा गरिएको महापूराणबाट २२ लाख ३ हजार ६ सय ५३ अमेरिकी डलर संकलन हुने कबुल गरिएको थियो । तत्काल रकम दिन नसक्ने दाताहरुबाट कबुल गरिएको रकममध्ये हालसम्म आधा रकम पनि भुक्तानी भएको छैन । त्यसमध्ये हालसम्म ८ लाख ११ हजार ३ सय ६३ अमेरिकी डलर नगद भुक्तानी भएको छ ।

कबुल गरेको रकम छिट्टो दिन दाताहरुलाई अनुरोध

१३ लाख ९२ हजार २ सय ८९ अमेरिकी डलर रकम उठ्न बाँकी रहेकाले उक्त रकम छिट्टै भुक्तानी गर्न अनुरोध गरिएको हो । ‘हामीलाई अहिले काम सुरु गर्नै समस्या परेको छ’ सोसाइटिका अध्यक्ष राजेश भट्ट भन्छन्, ‘यस्तो पबित्र कार्यमा कबुल गर्नुभएको दान भुक्तान गरेर अब हामीलाई मन्दिर निर्माण कार्यमा सहयोग गर्नुस् ।’ हालसम्म उठेको ८ लाख रकम बाट जग्गा किनेको, आर्किटेक्टलाई तिरेको र महापूराणमा भएको खर्च कटाएर हाल २ लाख मात्र खातामा जम्मा रहेको जनाइएको छ । नपुग रकम बैंकबाट ऋण लिने र अन्य दाताहरुको खोजी गर्ने काम पनि भइरहेको अध्यक्ष भट्टले बताए । ‘सन् २०२० को जुन महिना भित्र सबै रकम बुझाउनु हुन बिशेष अनुरोध गर्दछौ’ उनले भने । आगामी जुन महिना भित्र उठाउनु पर्ने दान रकम उठाई भवन निर्माणको जमिन खन्न अनुमति लिने सोसाइटिको योजना छ ।
महापूराणमा ९ सय ९६ दाताहरुले मन्दिर निर्माणका लागि दान दिने कबुल गरेका थिए । जसमध्ये १८० जनाले ५ हजार अमेरिकी डलर भन्दा माथि दान कबुलेका थिए भने १२ जनाले ३० हजार अमेरिकी डलर भन्दा माथि दान दिने प्रण गरेका छन् । अधिकांशले मन्दिर बन्ने खबर सुनेर उत्साहका साथ कबुल गरेको रकम बुझाइरहेको पनि सोसाइटिले जनाएको छ ।
न्यूयोर्कमा सञ्चालित बिभिन्न संघ संस्थाहरुले निकै ठूलो रकम दिने प्रण गरेका थिए । तर, दुई वर्ष बितिसक्दा आधा रकम पनि बुझाएका छैनन् । त्यतिबेला प्रवासी नेपाली मञ्चले १ लाख ११ हजार १ सय ११ दिने कबुल गरेको थियो । हालसम्म २४ हजार मात्र बुझाएको छ । सुरुवाती चरणमा नियमित मासिक बुझाउँदै आएपनि बिचमा केही बिबादित बिषयमा सोसाइटि अग्रसर भएकाले केही समय रकम रोकिएको मञ्चका पूर्व अध्यक्ष सञ्जय थापाले जानकारी दिए । ‘सरकारको प्रतिनिधित्व गर्दै नेपालबाट आएका प्रधानमन्त्री, मन्त्रीहरु हाम्रा अथिति हुन् उनीहरुलाई दुव्र्यवहार गर्नु गलत हो भन्ने सोसाइटिले बुझ्नु पर्छ’ उनले भने, ‘सोसाइटिले गल्ती गरेको महसुस गरिसकेपछि हामीले यही डिसेम्बर महिनाबाट पुन रकम भुक्तानीलाई निरन्तरता दिएका छौं । हामीले मन्दिर निर्माण कार्यमा सहयोग होस र हाम्रो देखेर अन्य दाताहरुलाई पनि प्रोत्साहन मिलोस भन्ने ठानेर संस्थाका साथीहरुसंग छलफल गरीकन यति ठूलो रकम घोषणा गरेका हौं ।’
नेपाली जनसम्पर्क समितिले १ लाख २५ हजार कबुल गरेकोमा हालसम्म ५ हजार २५१ मात्रै बुझाएको छ । रकम संकलनका लागि समितिका सभापित आनन्द बिष्ट संग कुरा भइरकेको अध्यक्ष भट्टले जानकारी दिए । अध्यक्ष भट्टले ७५ हजार दान दिने घोषणा गरेकोमा पुरै रकम भुक्तानी गरिसकेका छन् ।
सोसाइटिका पूर्व अध्यक्ष पराजुली ले १ लाख १ हजार १ सय ११ कबुल गरेकोमा ४९ हजार ७८ बुझाइसकेका छन् । महापूराणका बेला गैर आवासीय नेपाली संघ एनआरएन अमेरिकाका पूर्व अध्यक्ष पौडेलले १ लाख दिने प्रतिवद्धता गरेका थिए । साथै टेक्सासका व्यवसायी गौरी जोशीले ६१ हजार १५० दिने घोषणा गरेका थिए । रिजवुड नेपाली समाजका संस्थापक अध्यक्ष मोहन ज्ञवालीले ५० हजार, बरिष्ठ अधिवक्ता खगेन्द्र श्रेत्रीले ३५ हजार, केशब शेढाइले ३५ हजार, जनक पराजुलीले २२ हजार २ सय २२, अधिबक्ता रमेश श्रेष्ठले २० हजार दान कबुल गरेका थिए ।
कबुल गरेको रकम भुक्तानी गराउनका लागि बारम्बार फलो अप गरिरहेको सोसाइटिका महासचिब दिपक राज काफ्लेले बताए । ‘हामीले फोन गरेर, घरमा चिठ्ठी पठाएर ताकेता गरिरहेका छौं’ उनले भने, ‘केही रकम उठिरहेको पनि छ ।’

प्रभात भट्टराई/अमेरिका
अमेरिका लगायत क्रिश्चियन बहुल पश्चिमा मुलुकहरुमा चाडको माहोल छ । क्रिसमस मनाउन राज्य चलाउने नेता, विजनेश दुनियाँका बादशाह अर्बपति देखि आम नागरिकसम्म ‘छुट्टि’को मुडमा छन् । गाउँ शहर सबैतिरका घर झिलिमिली सजाइएको छ । ठाउँ ठाउँमा क्रिसमस ट्रि ठड्याइएका छन् । कुनै चोकमा शान्ताक्लर्कहरु उभिएर चकलेट बाँड्दैछन् । हरेक स्टोरमा कामगर्नेहरु क्रिसमसको प्रतिनिधी मानिने रातो टोपी लगाएर उभिएका छन् ।
क्रिसमस मनाउनेहरुकै सूचीमा अमेरिकी राष्ट्रपति डोनाल्ड ट्रम्प । ट्रम्प अहिले छुट्टिमा फ्लोरिडा स्थित रिसोर्टमा पुगेका छन् । तर, आम अमेरिकी एवं क्रिश्चियन जस्तो उनी छुट्टिको मुडमा भने छैनन् । अमेरिकी संसदको तल्लो सदन हाउस अफ रिप्रिजेन्टेटिभबाट हालै महाभियोग खेपेका ट्रम्प बेचैन छन् । त्यसैले परिवार र साथीसँगीका माझ चाड मनाउन वासिंटनबाट हजार माइल टाढाको फ्लोरिडा पुगेपनि बिन्दास हुन सकेका छैनन् । उनी छिन छिनमा ट्विट गर्छन् । जुनसुकै प्रसंगमा ट्विट गरेको घुमाइ फिराइ महाभियोगमै लगेर जोड्छन् ।
कहिले सिनेटले महाभियोग माथि थप अनुसन्धान गरेमा रिपब्लिकन र डेमोक्र्याटबीच फरक नहुने बताउँछन् त कहिले अर्थतन्त्रका सारा सूचक उत्साहजनक रहेको बेला कसैले अमेरिकी राष्ट्रपतिलाई हटाउन नसक्ने भन्दै आफ्नो बचाउ गर्छन् । सोमबार दिनभरमा उनले दुई दर्जन बढि ट्विट एवं रिट्विट गरेका छन् । जसमा अधिकांश महाभियोगसँगै जोडिएका छन् । सभामुख न्यान्सी पेलोसी एवं डेमोक्र्याटहरुलाई गाली गर्दै केही ट्विट आफैँ लेखेका छन् ।
ट्रम्पले हाउसमा महाभियोग चल्दै गर्दा आफुले कुनै मतलव नगरेको बयान दिँदै आएका थिए । तर, जब जब महाभियोगको मिति नजिकियो, उनको बेचैनीको सियो उकालो लाग्यो । त्यसबेला पनि उनले मतलव नभएको दावी गर्न भने छोडेनन् । तर, महाभियोगको प्रतिरोध गर्दै ट्विटकै बर्षा गर्न थाले । हाउसमा महाभियोगबारे अन्तिम बहस चल्दै गर्दा उनले तीन दिनमा २०० हाराहारी ट्विट गरे । संसदमा उनको महाभियोग माथि मतदान हुँदै गर्दा उनी मिचिगनमा चुनावी सभा गर्दै थिए । त्यहाँ उनले अहिलेसम्मकै लामो चुनावी भाषण दिए– दुई घण्टा बढि । अधिकांश समय डेमोक्र्याट र महाभियोगकै बिरुद्धमा बोलेका थिए । यी सबै भइ सकेपछि पनि उनको सार भने एउटै हुन्छ– मैले यो महाभियोगलाई मतलव गरेको छैन ।
जस्तो सुकै अवस्था होस्, ट्रम्प आफ्नो गल्ती स्विकार्दैनन् । कमजोरी लुकाएर र भ्रम छरेरै जित्न सकिन्छ भन्ने उनको सधैंको मान्यता हो । त्यसैले महाभियोगको डर डेमोक्र्याट माथि गाली गर्दै लुकाउँदै आएका छन् । सँगै कतै रिपब्लिकन सिनेटरले थप प्रमाण खोजेर अफ्ठ्यारोमा पार्ने हुन् कि भन्ने पिर पनि उनी भित्र छ । त्यसैले कहिले महाभियोग आफुमाथि नभइ आफ्ना सारा समर्थक र रिपब्लिकन पार्टीप्रति लगाइएको दावी गर्छन् भने कहिले महाभियोग माथि थप अनुसन्धान गरे डेमोक्र्याट र रिपब्लिकनमा फरक नहुने भन्दै आफ्ना सिनेटरहरुलाई अग्रिम चेतावनी दिन्छन् । ट्रम्पको रिपब्लिकन पार्टीभित्र अचाक्ली बलियो होड छ । अहिलेका प्रायः सबै सर्भेक्षणहरुले रिपब्लिकन पार्टी भित्र उनको ‘एप्रुभल रेटिङ’ ९० प्रतिशत हाराहारी देखाएका छन् । तर, यति हुँदा पनि ट्रम्पको औषत एप्रुभल रेटिङले अहिलेसम्म ५० प्रतिशत छुन सकेको छैन । अर्थात डेमोक्र्याट भित्र ट्रम्प अत्यधिक अलोकप्रिय छन् । बहुमत स्वतन्त्र अमेरिकी पनि उनको समर्थनमा छैनन् । सोही कारण रिपब्लिकन पार्टी भित्रको आफ्नो पकड कायम राख्न उनी जे बोल्न पनि तयार छन् जसो गर्न पनि तयार छन् ।
रिपब्लिकनमाझको यही लोकप्रियताले नै आफुलाई अर्को बर्ष चुनाव जिताउला भन्ने उनको आशा गरेको छ । डेमोक्र्याटबाट टिकट पाउने व्यक्तिलाई सकेसम्म विवादमा धकेल्दिने ताकी उनलाई भोट हाल्न स्वतन्त्र मतदाताहरुलाई उत्साह नहोस् र रिपब्लिकन अहिलेजस्तै एकजुट भएर बुथसम्म पुगे आफुले चुनाव जित्ने ट्रम्पको आँकलन छ । सोही ध्येयले उनले डेमोक्र्याटबाट सम्भावित प्रत्याशीको अग्रसूचीमा रहेका जो बाइडेनलाई विवादको भूमरीमा धकेल्न युक्रेन काण्ड गराएका थिए । युक्रेनी राष्ट्रपति भोलोडिमिर जेलेन्स्कीसँग बाइडेन माथि अनुसन्धानको माग राख्दै युक्रेनका लागि अमेरिकी संसदले पारित गरेको झन्डै ४०० मिलियन डलरको सैन्य सहायत रोकेको तथ्य बाहिरिएसँगै उनले महाभियोग सामना गर्नु पर्यो ।
तर, यो घटनाबाट शिक्षा लिने छनक ट्रम्पले दिएका छैनन् । बिपक्षिलाई विवादमा पार्नुनै जितको मुख्य सुत्र हो भन्ने उनको मान्यता नबदलिने विश्लेषकहरुको राय छ । किनभने आम अमेरिकीबीच लोकप्रिय हुनसक्ने उनको प्रकृति नै होइन । अहिले अमेरिकी अर्थतन्त्रका अधिकांश सूचकले रेकर्ड बनाएका छन् । जनतामा सिधा असर हुने बेरोजगारी दर ५० बर्षको न्यून विन्दुमा झरेको छ भने उपभोक्ताको आत्मविश्वास उस्तै उच्च छ । त्यती हुँदा पनि राष्ट्रपतिको एप्रुभल रेटिङ ‘अण्डरवाटर’ हुनु अर्को रेकर्ड रहेको विश्लेषकहरुको राय छ ।
सन् १९९८ मा विल क्लिन्टन माथि महाभियोग चल्दा अमेरिकी अर्थतन्त्र उस्तै सन्तोषजनक अवस्थामा थियो । त्यसैले महाभियोग सुरु भएसँगै क्लिन्टनको एप्रुभल रेटिङले ६५ प्रतिशत नाघेको थियो । तर, त्यो सौभाग्य र क्षमता ट्रम्पसँग छैन । अर्कोतिर उनलाई जसरी पनि २०२० को चुनाव जित्नुछ । सिनेटमा आफुलाई पदमुक्त गर्ने गरि दुई तिहाई बहुमत पुग्दैन भन्नेमा त उनी ढुक्क नै छन् तर कथंकदाचित आफ्ना हर हर्कतसँग सहमत नहुने रिपब्लिकन सिनेटरहरुले नै थप प्रमाण र अनुसन्धानका लागि दबाब देलान् कि भन्ने डर भने उनको मनमा नराम्रोसँग गढेको छ । किनभने हाउसमा अनुसन्धान हुन्जेल धेरैजसो प्रमाण लुकाउन रिपब्लिकनहरुले एकमत भएर साथ दिए । सिनेटमा त्यो अवस्था नरहे ह्वाइट हाउसले बलपुर्वक थामि रहेको पर्दा उघारिन सक्छ । ट्रम्पको बेचैनीको मुख्य गुह्य यसैमा अड्किएको राजनीतिक पण्डितहरुको तर्क छ ।