Category: समाचार

सिन्धुपाल्चोक । सिन्धुपाल्चोस्थित सुनकोशी गाउँपालिका–७ छ किलो भन्ने स्थानमा भएको बस दुर्घटनामा ज्यान गुमाउनेको संख्या १५ पुगेको छ ।

दोलखा कालिन्चोक मन्दिर दर्शन गरी काठमाडौं फर्किरहेको यात्रुबाहक बस लामोसाँघु(जिरी सडक खण्डको छ किलोमा दूर्घटनाग्रस्त भएको थियो ।

सडकबाट ५ सय मिटर तल खसेको बसमा १५ जनाको मृत्यु भएको र १९ जना घाइतेको विभिन्न अस्पतालमा उपचार जारी रहेको प्रहरीले उल्लेख गरेको छ ।

बा ४ ख ४४६८ नम्बरको रिजर्भ बसका चालक भने फरार रहेका छन् । घाइते यात्रुहरुका अनुसार बस पल्टन थालेपछि चालक झ्यालबाट हाम फालेका थिए ।

प्रहरीका अनुसार उनको खोजी कार्य जारी रहेको छ । दुर्घटनामा ९ महिला, ३ पुरुष, एक बालिका र दुई जना बालकको ज्यान गएको छ ।

प्रहरीका अनुसार ज्यान गुमाउनेमा सिन्धुपाल्चोक जुगल गाउँपालिका ७ का २८ वर्षका सुकबहादुर तामाङ, ७ वर्षकी सविना तामाङ र १५ वर्षकी रोशनी तामाङ छन ।

२८ वर्षकी मञ्जु तामाङ, ३० वर्षकी रेशमा तामाङ, सिन्धुपाल्चोक लिसंखुपाखर गाउँपालिका ४ कि ५५ वर्षकी गंगामाया लामा, बलेफी गाउँपालिका ७ कि ३५ वर्षकी फूलमाया तामाङको समेत दूर्घटनामा ज्यान गएको छ ।

दोलखाको सैलुङ गाउँपालिका ६ का १० वर्षका रजित बस्नेत र ३२ वर्षकी चिनु बस्नेतको पनि मृत्यु भएको छ ।

भीमेश्वर नगरपालिका ९ की ४२ वर्षकी लक्ष्मी श्रेष्ठ, रामेछापको उमाकुण्ड गाउँपालिका ४ का २४ वर्षका महेश तामाङ, काभ्रेको बेथान गाउँपालिका ५ का ३६ वर्षका रामशरण खत्री र ३५ वर्षकी मैयाँ केसीको पनि ज्यान गएको छ ।

दुई जनाको सनाखत हुन बाँकि छ । घाइतेमध्ये १४ जनाको काठमाडौंको ह्याम्स अस्पताल, २ जनाको काठमाडौं मेडिकल कलेज, ३ जनाको धुलिखेल अस्पताल र एक जनाको सिन्धुपाल्चोक खाडीचौरको सिन्धु सदावहार अस्पतालमा उपचार भइरहेको प्रहरीले जनाएको छ ।

सिन्धुपाल्चोक । दोलखाको कालिन्चोकबाट काठमाडौं आउदै गरेको बस सिन्धुपाल्चोकको सुनकोसी गाउँपालिका–७ , स्थित ६ किलोमा भन्ने स्थानमा दूर्घटनामा परेको छ ।

बा ४ ख ४४६८ नम्बरको बस दुर्घटना परेको सिन्धुपाल्चोक प्रहरीले पुष्टी गरेको छ । दूर्घटनामा अहिलेसम्म ४ जनाको शव निकालिएको र कैयौं घाइते भएको प्रहरीले उल्लेख गरेको छ ।

सडकबाट करीव ५ सय मिटर तल खसेका कारण कैयौं हताहती भएको हुन सक्ने बताइएको छ । क्षतिको यकिन विवरण आइसकेको छैन । अहिले प्रहरी र स्थानीयले दूर्घटनास्थलमा उद्दार गरिरहेका छन् ।

काठमाडौं । सत्तारूढ नेपाल कम्यूनिष्ट पार्टी (नेकपा)को स्थायी समिति बैठक आज बस्दैछ ।

खासगरी बामदेव गौतमलाई पार्टी उपाध्यक्ष बनाउने प्रस्ताव एजेण्डाका रुपमा अध्यक्षबाट बैठकमा प्रस्तुत हुने भएकाले यस बैठकलाई महत्वपूर्ण रुपमा लिइएको छ ।

विधानअनुसार यस्तो बैठक हरेक तीन महिनामा बस्नुपर्छ । तर, अहिले पनि करीव १ वर्षपछि बस्न लागेको हो ।

सचिवालयले एक वर्षको अवधिमा गरेको संगठनात्मक निर्णयलाई समेत स्थायी समिति बैठकले अनुमोदन गर्ने भएको छ ।

राजनीतिक प्रतिवेदनअनुसार विधानको प्रस्तावना संशोधन गर्ने प्रस्ताव पारित गर्ने तयारी समेत रहेको नेकपा सचिवालयले जनाएको छ ।

स्थायी समिति बैठक बस्नु अगाडी नै आइतबार सचिवालय बैठक समेत राखिएको छ ।

सोही बैठकले स्थायी समिति बैठकमा लाने एजेन्डा तय गर्ने बताइएको छ ।

२३ मंसिरको सचिवालय बैठकले २९ मंसिरमा स्थायी समिति बैठक राखेको हो ।

नेकपा अध्यक्ष प्रचण्डले स्थायी समिति बैठकका तयार प्रस्तुत गर्ने राजनीतिक प्रतिवेदनसमेत तयार पारिसकेका छन् ।

काठमाडौं । नेपाली कांग्रेसका सभापति शेरबहादुर देउवाले केन्द्रिय समिति बैठक बहिष्कार गरेका वरिष्ठ नेता रामचन्द्र पौडेललाई फकाउन थालेका छन् ।

सोही क्रममा देउवा शनिबार पौडेल निवास बोहराटार पुगेर वरिष्ठ नेता रामचन्द्र पौडेलसँग छलफल गरेका छन् । तर, उनको सो प्रयास सफल नभएको पौडेल स्रोतले जानकारी दिएको छ ।

दुई दिनअघि बसेको केन्द्रीय समिति बैठक पौडेल समूहले वहिष्कार गरेको थियो । पौडेललाई सहमतिमा ल्याउन उपसभापति विमलेन्द्र निधिसहित देउवा शनिबार पौडेल निवास पुगेका हुन ।

देउवाले विभाग गठन गर्न सहयोगको अपेक्षा गरेको पौडेलसमक्ष राखेका थिए । तर पौडेलले भने १४ औं महाधिवेशनको कार्यतालिका सार्वजनिक भए मात्र केन्द्रीय समिति बैठकमा उपस्थित हुने अडान राखेका छन् ।

देउवा पौडेललाई फकाउन बोहराटार पुगेको घटनाले भने शनिबार दिनभर सामाजिक संजालमा चर्चा कमाएको छ ।

जनकपुर । धनुषाको क्षिरेश्वरनाथ ५ स्थित महेन्द्रनगरमा भएको बम विस्फोटमा संलग्न रहेको आरोपमा प्रहरीले तीन जना पक्राउ गरेको छ ।

विस्फोटमा परी एक प्रहरी अधिकृतसहित तीन जनाको ज्यान गएको थियो । जिल्ला प्रहरी कार्यालय धनुषाका अनुसार घटनामा संलग्न रहेको आरोपमा तीन जनालाई पक्राउ गरेको छ ।

प्रहरीका अनुसार घटनामा संलग्न भएको आरोपमा हंसपुर नगरपालिका वडा नम्बर २ की ललिता देवी महरा र सीतादेवी महरा तथा मिथिला बिहारी नगरपालिका १ भुतहीका रामशोभित धानुक पक्राउ परेका छन् ।

उनीहरु विप्लव समूहका नेता भएको बताइएको छ । ५१ वर्षिय सीतादेवी विप्लव समूहका प्रदेश २ का संयोजक हुन् । ४१ वर्षीया ललिता केन्द्रीय सदस्य हुन् । रामशोभित कार्यकर्ता भएको प्रहरीले बताएको छ ।

प्रहरीले घटनाको छानविन गर्न प्रहरी निरीक्षक उमाशंकर प्रसाद साहको संयोजकत्वमा सात सदस्यीय समिति गठन गरेको छ ।

महेन्द्रनगरस्थित राजेश साहको घरको गेटमा राखिएको बम पड्किँदा साह, उनका छोरा आनन्द र प्रहरी निरीक्षक अमिर दाहालको निधन भएको थियो ।

विस्फोटमा राजेशका बावु भिखारी, छोरा प्रकाश, छोरी अञ्जली र प्रहरी जवान रिजनाथ महतो घाइते भएको प्रहरीले बताएको छ ।

जनकपुर । धनुषामा भएको बम विस्फोटमा तीन जनाको ज्यान गएको छ । धनुषाको छिरेश्वरनाथ नगरपालिका, ५ महेन्द्रनगर बजार नजिकै बम विष्फोट हुँदा एक प्रहरी अधिकृतसहित तीन जनाको निधन भएको हो ।

घटनामा ती जना गम्भीर घाइते छन् । स्थानिय कुचाइ टोलस्थित राजेश साहको घर बाहिर राखिएको बम विस्फोट भएको थियो ।

विस्फोटमा राजेश साह र उनका छोरा आनन्दको घटनास्थलमा मृत्यु भएको छ । प्रहरी निरीक्षक (इन्स्पेक्टर)अमिर कुमार दाहालको उपचारका क्रममा शनिबार बिहान मृत्यु भएको हो ।

घटना राती १२ बजेतिर भएको थियो । घाइतको धरानस्थित बीपी कोइराला स्वास्थ्य विज्ञान प्रतिष्ठानमा उपचार जारी छ । घरमा बम राखिएको खबर पछि प्रहरी पुगेको थियो ।

त्यहाँ रहेको स्थानीयको बाक्लो भीड हटाउटा हटाउँदै भएको विस्फोटमा प्रहरीसहितको मृत्यु भएको हो । बम कसले राखेको थियो भन्ने बारे स्पष्ट भइसकेको छैन ।

काठमाडौं । पश्चिमी वायुको प्रभावले बदली भएको मौसमले देशभर चिसो बढाएको छ । यसको प्रभाव अझै एक दुई दिनसम्म जारी रहने मौसम पूर्वानुमान महाशाखाले जनाएको छ ।

शुक्रबार दिनभर जसो काठमाडौंमा वर्षा जारी रहेको छ । काठमाडौंको चन्द्रागिरिमा शुक्रबार हिमपात भएको छ । त्यसो त हिमाली भेगका सबै जिल्लामा बाक्लो हिमपात जारी रहेको छ ।

मौसम चिसिएसँगै त्यसले आफ्नो प्रभाव देखाउन थालेको छ । मौसमविद्हरुका अनुसार शुक्रबार परेको पानीले अब देशभर चिसो ह्वात्तै बढाउने छ ।

खासगरी बिहानमा तुसारो पर्ने र तराईमा शितलहरको जोखिम निम्त्याउन सक्ने खतरा रहेको छ ।

हिमापातका कारण हिमाली भेगमा ताल जम्ने क्रम शुरु भएको छ । हिमाली भेगको हवाई सेवा समेत अवरुद्ध भएको विमानस्थल कार्यालयले जनाएको छ ।

काठमाडौं । शक्तिशाली मानिने पश्चिमी वायु नेपाल प्रवेश गरेको छ। यो वायुको प्रभाव अब कम्तिमा ३ दिनसम्म देखिने छ ।

मौसम अदलबदल भई केही स्थानमा वर्षा तथा उच्च पहाडी र हिमाली भेगमा भारी हिमपात हुने सम्भावना रहेको मौसम पूर्वानुमान महाशाखाले उल्लेख गरेको छ ।

जल तथा मौसम विज्ञान विभागअन्तर्गत मौसम पूर्वानुमान महाशाखाका अनुसार बुधबार साँझ नेपालको पश्चिमी क्षेत्रबाट पश्चिमी वायुबाट विकसित न्यून चापीय प्रणाली प्रवेश गरिसकेको छ ।

यसले नेपालको पश्चिमी उच्च पहाडी र हिमाली भूभागमा भारी हिमपात बनाउन सक्ने सम्भावना रहेको छ ।

बिहीबार यो प्रणाली अझै सशक्त हुनेछ । जसले गर्दा देशका मध्य र पूर्वका उच्च पहाडी र हिमाली भूभागमा समेत हल्कादेखि मध्यमसम्म हिमपातको सम्भावना रहेको छ ।

उक्त प्रणालीका कारण देशैभरी मौसम बदली हुनेछ । अधिकतम र न्यूनतम तापक्रममा गिरावट आउनेछ । यसले देशभर चिसो बढाउने भएको छ ।

यस वायुले पश्चिमी भूभागका धेरै स्थानहरूमा र मध्य र पूर्वी भूभागका केही स्थानहरूमा हल्का वर्षाको समेत सम्भावना छ ।

त्यसपछि देशभैभर चिसो ह्वात्तै बढ्नेछ ।

उच्च पहाडी र हिमाली भूभागमा भारी हिमपात हुन सक्ने र पहाडी भेगमा वर्षा हुने र साथसाथै तापक्रममा गिरावट पनि हुने सम्भावना रहेको हुनाले सतर्कता अपनाउन महाशाखाले सर्वसाधारणमा अनुरोध समेत गरेको छ ।

बिहीबार बिहानैदेखि राजधानीको आकास समेत हुस्सले ढाकिसकेको छ ।

चितवन । चितवनमा शनिबार साँझ भएको अटो दूर्घटनामा पाँच जनाको मृत्यु भएको छ। राप्ती नगरपालिका, ४ चेपाङ मार्गको भित्री सडकमा चौकी डाँडातर्फ गइरहेको अटो दूर्घटनामा परेको जिल्ला प्रहरी कार्यालय चितवनले पुष्टी गरेको छ ।

ना. १ ह ६४०९ नम्बरको अटो अनियन्त्रित भएर पल्टीको हो । अटोमा ६ जना सवार रहेको र पाँचजनाको मृत्यु भएको प्रहरीले जनाएको छ ।

मृत्यु भएकामध्ये पर्वत कुस्मा नगरपालिका पिपलटारीका ३५ वर्षीय श्यामप्रसाद तिवारीको परिचय खुलेको र अन्यको सनाखत हुन बाँकि रहेको प्रहरीले जनाएको छ ।

दूर्घटनामा दुई पुरुष र तीन महिलाको निधन भएको हो । दुर्घटनामा अटोका चालकसहित ६ जना गम्भीर घाईते भएका थिए।

तीनजनाको पुरानो मेडिकल कलेजमा र दुईजनाको भरतपुर अस्पतालमा उपचारका क्रममा मृत्यु भएको हो ।

एक जनाको भने अहिले पनि उपचार जारी छ । घटनाबारे अनुसन्धान भइरहेका प्रहरीले जनाएको छ ।