Category: समाचार

काठमाडौं । नेकपाको स्थायी कमिटी बैठकबाट संगठन विभाग प्रमुख वामदेव गौतमलाई उपाध्यक्ष बनाउने प्रस्ताव पारित भएको छ ।

यससँगै उनी उपाध्यक्ष हुने पक्का भएको छ । १९ मंसिरमा महासचिव विष्णु पौडेलले विधान संशोधन प्रस्ताव पेश गरेका थिए। बैठकले प्रस्ताव पारित गरेको छ ।

२१ साउनमा वामदेवलाई उपाध्यक्ष बनाउने निर्णय सचिवालय बैठकले गरेको थियो । किनकी नेकपाको विधानमा उपाध्यक्षको पद छैन ।

विधान संशोधनका लागि कम्तिमा तीन चरण पार गर्नुपर्ने हुन्छ । सचिवालय बैठकले स्थायी समितिमा प्रस्ताव गरेको थियो ।

स्थायी समितिले पारित गरेसँगै अब विधान संशोधनको निर्णय नेकपाको केन्द्रीय कमिटीबाट हुन्छ । नेकपाको केन्द्रिय कमिटि बैठक भने २३ पुसमा डाकिएको छ ।

काठमाडौं । नेपाली कांग्रेसमा महाधिवेशनको मितिलाई लिएर विवाद छ । सोही विवादका कारण केन्द्रिय समिति बैठकसमेत प्रभावित भइरहेको छ ।

तर, पछिल्ला चरणमा भइरहेको वार्ताले सकारात्मक रुप लिइरहेको नेताहरुले बताएका छन् । रामचन्द्र पौडेल समूहले कांग्रेसको १४ औं महाधिवेशन आगामी ५ मंसिरमा गर्न प्रस्ताव राखेको छ ।

आइतबार संस्थापन पक्षसँगको वार्तामा पौडेल समूहले २०७७ मंसिर ५, ६, ७ र ८ मा महाधिवेशनको प्रस्ताव राखेको छ । पौडेल पक्षले राखेको प्रस्तावमा सहमति भने भएको छैन ।

संस्थापन पक्षबाट भने मिति सार्वजनिक गर्ने विषयमा इच्छा देखाएको छैन । तर, आगामी वर्ष फागुनभित्र महाधिवेशन गर्ने गरी कार्यतालिका बनाउन सकिने संकेत संस्थापन पक्षले पौडेल पक्षलाई दिएको छ ।

वर्तमान कार्यसमितिको कार्यकाल आगामी फागुनमा सकिने भएको छ । त्यसपछि थप एक वर्ष कार्यकाल लम्ब्याउने तयारी रहेको छ । त्यसपछि भने जसरी पनि महाधिवेशन गर्नुपर्ने पौडेल पक्षको अडान रहेको छ ।

दैलेख । नेकपा विप्लव समूहले अपहरण गरेका दैलेखको ठाँटीकाँध गाउँपालिकाका धिरबहादुर शाहीलाई सशस्त्र प्रहरीले कालीकोटबाट उद्दार गरेको छ । उनको शकुशल उद्दार भएको प्रहरीले जानकारी दिएको छ ।

शनिबार राति घरमै सुतिरहेको समयमा अज्ञात समूहबाट उनको अपहरण भएको थियो ।

प्रहरीका अनुसार राती आएको १०\१२ जनाको समूहले सोधपुछ गर्नुछ भन्दै शाहीलाई लैजान खोजेपछि श्रीमतीले आफूलाई पनि लैजान आग्रह गरेपछि दुबैजनालाई लगिएको थियो ।

यस घटनाको नेकपा विप्लव समूहले जिम्मेवारी लिइसकेको छ । धिरबहादुर र उनकी श्रीमतीलाई करिव दुई घन्टा पैदल हिँडाएपछि श्रीमतीलाई छाडेको थियो ।

उनले छुटेपछि गाँऊ पालिका अन्तर्गतको वडा अध्यक्ष नर्तमबहादुर बुढालाई खबर गरेकी थिइन् । बुढाले प्रहरी र स्थानीय प्रशासनलाई जानकारी गराएपछि प्रहरी उद्दारमा जुटेको थियो ।

कालिकोट प्रहरीका अनुसार श्रीमतीको जानकारीका आधारमा प्रहरीले खोजी थालेको थियो । कालिकोट प्रहरीले शसस्त्र प्रहरीका एक टोली खटाएरै खोजी थालेको थियो ।

खोज गर्ने क्रममा एक स्थानीयले दिएको सुराकीका आधारमा उनलाई राखेको घर पत्ता लागेको थियो ।

त्यसपछि सशस्त्र प्रहरीले घर घेरा हाली हवाई फायरिङ गरेछि अध्यक्षलाई छाडेर समूहका व्यक्ति भागेका थिए ।

कालिकोट प्रहरीका अनुसार त्यसपछि प्रहरीले अध्यक्ष शाहीलाई आफ्नो साथमा ल्याएको छ । विप्लव समूहले आइतबार नै विज्ञप्ती जारी गर्दै शाहीको अपहरण आफूहरुले गरेको उल्लेख गरेको छ ।

विप्लव समूहका भेरी कर्णाली ब्युरो इञ्चार्ज रविका नामबाट विज्ञप्ति जारी गर्दै गाउँपालिकामा चरम भ्रष्टाचार गरेको, कमिशन खाएको र सीआईडी गरेको भन्दै पार्टीले छानविनका लागि नियन्त्रणमा लिएको उल्लेख गरिएको छ ।

काठमाडौं । संसदको पाँचौं अधिवेशन आजबाट सुरु हुने भएको छ । राष्ट्रपति विद्यादेवी भण्डारीको आह्वानमा संसद अधिवेशन शुरु हुन लागेको संसद सचिवालयले जनाएको छ ।

शुक्रबार अपराह्न ४ बजे दुवै सदन (प्रतिनिधिसभा र राष्ट्रियसभा) का बैठक आह्वान गरिएका छन् । यस पटक प्रतिनिधिसभा बैठकको अध्यक्षता भने उपसभामुख शिवमाया तुम्बाहाम्फेबाट हुने भएको छ ।

पूर्वसभामुख कृष्णबहादुर महरा बलत्कार गरेको आरोपमा पक्राउ परेका कारण उनले राजीनामा दिएका हुन् । सभामुख पद भने रिक्त छ ।

शुक्रबार राष्ट्रपतिले बैठक आह्वान गर्न पठाएको पत्र पढ्ने कार्यसूचि राखिएको छ । राष्ट्रिय सभामा शुक्रबार दलीय आधारमा संसदीय दलका नेताहरूले मन्तब्य राख्नेछन् ।

काठमाडौं । सत्तारुढ नेपाल कम्युनिस्ट पार्टी (नेकपा) र राष्ट्रिय जनता पार्टी नेपाल (राजपा)बीच सहमति भएको छ ।

राष्ट्रियसभा निर्वाचनमा तालमेल गर्नेसहित दुई बुँदे सहमतिमा बुधबार हस्ताक्षर भएको छ । प्रधानमन्त्री निवास बालुवाटारमा बुधबार दुबै दलका शीर्ष नेताबीच वार्तामा सहमति जुटेको हो ।

सहमति अनुसार राष्ट्रियसभामा प्रदेश २ तर्फका सीट दुबै दलले बाँड्ने भएका छन् । राष्ट्रियसभामा प्रदेश २ मा ८ मध्ये चार वटा खाली हुँदैछन् ।

रिक्त पदमा ९ माघमा निर्वाचन तोकिएको छ । खाली सीटमध्ये दुुई दुई सिट दुई दलले बाँडेर लिने भएका छन् । राजपाले अन्य पुरुष र अपाङ्गता भएका व्यक्ति वा अल्पसंख्यक समूहको सिट लिनेछ ।

नेकपाले महिला र दलित पुरुषको सीट लिने सहमति बनेको छ । यससँगै दुई दलबीच राष्ट्रिय राजनीतिका विषयमा नियमित छलफल गर्ने र सहकार्य गर्ने सहमति भएको छ ।

सहमतिपत्रमा प्रधानमन्त्री एवं नेकपा अध्यक्ष केपी शर्मा ओली, अर्का अध्यक्ष पुष्पकमल दाहाल प्रचण्ड र राजपा अध्यक्ष मण्डलका संयोजक राजेन्द्र महतोले हस्ताक्षर गरी सार्वजनिक गरेका छन् ।

यी दुई दलको सहमति भने धेरैका लागि सरप्राइज बनेको छ । किनकी मधेषबादी दल र नेकपाबीच सम्बन्ध चिसिएको आंशका थियो ।

अर्घाखाँची । अर्घाखाँचीमा ११ मंसिरमा भएको बस दूर्घटनाको कारण तीव्रगति भएको छानविन समितिले बताएको छ ।

१९ जनाको ज्यान जाने गरी अर्घाखाँचीको नरपानीमा बस दुर्घटना भएपछि स्थानीय तहमा छानबिन समिति गठन भएको थियो ।

अर्घाखाँचीको सदरमुकाम सन्धिखर्कबाट रुपन्देही आउँदै गरेको लु२ख २१४८ नंको बस सन्धिखर्क नगरपालिका–६ सल्लेरीमा दुर्घटनामा परेको थियो ।

दूर्घटनामा १९ जनाले ज्यान गुमाउनु परेको थियो । दुर्घटनापछि जिल्ला प्रशासन कायार्लय अर्घाखाँचीले सहायक प्रमुख जिल्ला अधिकारी विष्णुराज बेल्बासे संयोजकत्वमा नौ सदस्यीय छानबिन समिति गठन भएको थियो ।

घटनास्थलको स्केच, घटनास्थलको प्रकृति मुचुल्का, गाडीको मेकानिकल जाँच प्रतिवेदन, चालकले चिया नास्ता खाएको होटल साहुको बयानलगायत प्रमाणका आधारमा समितिले प्रतिवेदन तयार पारेको छ ।

स्थानीय प्रत्यक्षदर्शीको वयानलगायतले समेत बस तीव्र गतिमा रहेको र चालकले नियन्त्रण गर्न नसक्दा दूर्घटनामा परेको निष्कर्ष निकालेको छ ।

पछिल्लो समय सडक दूर्घटनामा डरलाग्दो रुप लिएको छ । पछिल्लो ५ महिनामा देशभर भएका सडक दूर्घटनामा परी १ हजार भन्दा बढीले ज्यान गुमाइसकेका छन् ।

काठमाडौं । काठमाडौं उपत्यकामा बुधबार यस सिजनकै चिसो दिन मापन भएको छ ।

न्यूनतम तापक्रम ३.७ डिग्री सेल्सियस मापन भएसँगै यो दिन अहिलेसम्मकै चिसो दिन बनेको हो । काठमाडौंमा झै चिसो बढ्ने क्रम जारी रहेको छ । मौसक राम्ररी खुलिसकेको छैन ।

आकासमा बादल यथावत छ । तर, तापक्रममा भने निरन्तर घटी आइरहेको छ । काठमाडौंसहित तराई–मधेस र हिमाली भेगको चिसो बढिसकेको छ ।

तराईमा भने हुस्सुले जनजीवन प्रभावित हुने गर्छ । पश्चिमी वायुको प्रभावले अघिल्लो साता वर्षा भएको थियो । सोही प्रभावले चिसो बढेको हो ।

काठमाडौं । माध्यमिक शिक्षा परीक्षा (एसईई) आगामी ६ चैतबाट संचालन हुने भएको छ । २०७६ सालको एसईई परीक्षाको तालिका राष्ट्रिय परीक्षा बोर्डले मंगलबार सार्वजनिक गरेको हो ।

एसइईको नियमित, ग्रेडवृद्धि तथा प्राविधिकको परीक्षा तालिका सार्वजनिक गर्दै आगामी चैत ६ देखि १७ गतेसम्म परीक्षा सञ्चालनको जानकारी गराएको छ ।

तालीका अनुसार ६ गते अनिवार्य अंग्रेजी, ७ गते अनिवार्य नेपाली, ९ गते अनिवार्य गणित, १० गते विज्ञान र ११ गते अनिवार्य सामाजिक अध्ययनको परीक्षा राखिएको छ ।

चैत १२ गते अनिवार्य स्वास्थ्य, जनसंख्या तथा वातावरण शिक्षा, १३ गते ऐच्छिक गणित र परीक्षाको अन्तिम दिन १७ गते विभिन्न प्राविधिक विषयको परीक्षा निर्धारण गरिएको छ ।

परीक्षा बिहान ८ बजेदेखि ११ बजेसम्म सञ्चालन हुने भएको छ । परीक्षामा यसअघि कम ग्रेड ल्याएकासमेत सहभागी हुनसक्ने बोर्डको सूचनामा उल्लेख गरिएको छ ।

कुनै आकस्मिक बिदा पर्न गएपनि परिक्षा नियन्त्रक कार्यालयको पूर्वसूचनाबीना परीक्षा स्थगित नहुने बोर्डले उल्लेख गरेको छ ।

काठमाडौं । नेपालमा सडक दूर्घटनामा अधिक वृद्धि भएपछि त्यसको जनस्तरबाट व्यापक आलोचना भएको छ ।

खासगरी विगतमा सडक दूर्घटना हुँदा वर्तमान प्रधानमन्त्री केपी शर्मा ओलीले सरकारविरुद्ध निकै आक्रामक अभिव्यक्ति दिने गर्थे ।

तर, पछिल्लो दिनमा उनकै नेतृत्वको सरकार भएपनि सडक दूर्घटनामा अकालमा मानिसले ज्यान गुमाउनु पर्ने बाध्यता झन बढ्दो छ ।

यसै परिस्थितिमा प्रधानमन्त्रीले गृह र भौतिक पूर्वाधार तथा यातायात मन्त्री र मन्त्रालय मातहतका निकायका प्रमुखहरुसँग सोमबार सामुहिक छलफल गरेका छन् ।

हरेक दिनको दूर्घटनाको खबरले आफू विच्छिप्द भएको भन्दै उनले सडक दुर्घटना न्यूनिकरण कार्ययोजना बनाई तत्काल कार्यान्वयनमा ल्याउन निर्देशन दिए ।

गृहमन्त्री रामबहादुर थापा, भौतिक पूर्वाधार तथा यातायात मन्त्री बसन्तकुमार नेम्वाङ, गृहसचिव, भौतिक पूर्वाधार तथा यातायात सचिव, प्रहरी प्रमुख, ट्राफिक प्रहरी प्रमुख, सडक विभाग र यातायात व्यवस्था विभागका महानिर्देशकसहित उच्च अधिकारीसँग प्रधानमन्त्रीले भेट्दै उक्त निर्देशन दिएका हुन् ।

सडक दुर्घटनामा हुने मानवीय क्षतिले आफूलाई निद्रासमेत नपर्ने भन्दै उनले सडक दूर्घटना तत्काल घटाउने उपाय खोज्न सरोकारवालालाई निर्देशन दिएका हुन् ।

सिन्धुपाल्चोकको सडक दुर्घटनामा आमाको निधन भएर दूधे बालक बेवारिस भएको खबर पढेको सन्दर्भ कोट्याउँदै प्रधानमन्त्रीले यस्ता खबरले खाना नरुच्ने र निद्रा नपर्ने उल्लेख गरे ।

उनी त्यस सन्दर्भका दौरान भावुक बनेका थिए । दुर्घटनाले एक साथ सक्षम जनशक्तिको क्षति हुने र वृद्धवृद्धा तथा बालबालिका बेसहारा हुने भन्दै दूर्घटना रोक्ने कार्यायोजना तत्काल ल्यान निर्देशन दिए ।

सार्वजनिक यातायातका चालकलाई तालिम, लाइसेन्स पुनर्परीक्षण, सडक पूर्वाधार प्रयोगको अनुमतिमा गम्भीर परीक्षणको आवश्यकता रहेको भन्दै प्रधानमन्त्रीले त्यसतर्फ गम्भीर भएर काम गर्न मातहतका निकायलाई निर्देशन दिएका छन् ।

हवाई दुर्घटनामा जस्तै हरेक सडक दुर्घटनाका कारण छानबिन गरी प्रतिवेदन तयार गर्न र त्यसको प्रभावकारी कार्यान्वयनको परिपाटी बसाल्नसमेत उनले निर्देशन दिए ।

काठमाडौं । कांग्रेसका वरिष्ठ नेता रामचन्द्र पौडेल पक्षले आफ्नो अडान यथावत राख्दै अनुपस्थित भएपछि नेपाली कांग्रेस केन्द्रीय कार्यसमिति बैठक स्थगित भएको छ ।

बैठक सोमबारका लागि डाकिएको थियो । तर, बैठक बस्दै नबसी स्थगित गरियो । बैठक बस्न संस्थापन पक्षका नेता भने पार्टी कार्यालय पुगेका थिए ।

पौडेललाई फकाउन देउवा आफै शनिबार पौडेल निवास पुगेका थिए । तर, सहमति हुन सकेन ।

सोमबार पनि उपसभापति विमलेन्द्र निधिले पौडेल समूहका नेतासँग भेटवार्ता गरेका थिए । तर, सहमति भने भएन ।

पौडेल समूहले १४ औं महाधिवेशनको कार्यतालिका नल्याएसम्म बैठकमा नबस्ने अडान लिएको छ । पौडेलको अडानले देउवा भने समस्यामा परेका छन् ।

काठमाडौं । प्रदेश गठन भई संचालनमा आएको दुई वर्ष पुगिसकेको छ । तर, नेपालका महत्वपूर्ण प्रदेशहरुले नै अझै राजधानी र नामको टुंगो लगाएका छैनन् ।

यता, प्रदेश ५ को स्थायी राजधानी र नाम सिफारिस गर्न गठन गरेको समितिले प्रदेशको नाम ‘लुम्बिनी’ राख्न प्रस्ताव गरेको छ ।

तर, स्थायी राजधानीमा समेत समिति समेत अन्यौलमा रहेको छ । समितिले रुपन्देहीको सैनामैना (बुटवल पश्चिम), कपिलवस्तुको बुद्धभूमि वा दाङको भालुबाङ (लमही)लाई स्थायी राजधानी बनाउन सकिने प्रस्ताव गरेको हो ।

यसले प्रदेशमा द्धन्द्ध निम्तने खतरा अझ बढेको छ । नाममा भने त्यति धेरै असहमति छैन । किनकी लुम्बिनीअन्तरर्राष्ट्रिय ब्राण्ड समेत हो ।

जसले गर्दा यस विषयमा कसैलाई आपत्ति छैन । तर, राजधानीका विषयमा भने यहाँ लामो समय देखि विवाद छ ।

खासगरी ठूला र प्रभावशाली नेताहरुबीच नै प्रदेश राजधानीको खिचातानी जारी रहेको छ ।

मूख्यमन्त्री शंकर पोखरेलको इच्चा दाङ र नेकपाका महासचिव विष्णु पौडेलको इच्छा बुटवल हुँदा यहाँ अझ विवाद बढ्ने निश्चित रहेको छ ।

प्रदेश ५ को अस्थायी राजधानी भने रुपन्देहीको बुटवल तोकिएर काम भइरहेको छ । विशेष समितिले बनाएको प्रतिवेदन पुसको दोस्रो साता शुरु हुने प्रदेश सभाको बैठकमा प्रस्तुत हुनेछ ।

त्यहाँबाट राजधानी र नामाकरण संसदको दुई तिहाइ बहुमतले निर्णय गर्ने संवैधानिक व्यवस्था अनुसार निर्णय हुनेछ ।

काठमाडौं । नेपाल कम्युनिष्ट पार्टी (नेकपा) स्थायी कमिटी बैठक शुरु भएको छ । संयोगवशः अघिल्लो वर्ष पनि २९ मंसिरमै स्थायी समिति बैठक बसेको थियो । त्यसपछि एक वर्षसम्म बैठक बसेन् ।

सामान्यतया हरेक तीन महिनामा बैठक बस्नुपर्छ । बैठकमा राजनीतिक प्रतिवेदन पेश गरेका पार्टी अध्यक्ष पुष्पकमल दाहालले गतवर्ष बैठक बसेकै दिन बैठक जुध्नु संयोग भएको बताएका थिए ।

एक वर्षसम्म बैठक नबस्दा सरकारले गरेका राम्रा कामको प्रचार हुन नसकेको धारणा प्रचण्डले राखेका थिए ।

यसमा गल्ती भएको स्वीकार गर्दै आगामी दिनमा निर्धारित समयमै स्थायी समिति बैठक बस्ने उनको प्रतिवद्धता थियो ।

बैठकमा भीम रावललगायत नेताहरुले बैठक बस्न ढिला गर्नुको कारण माग गरेका थिए । बैठकमा महासचिव विष्णु पौडेलले पार्टीको विधान संशोधन प्रस्ताव पेश गरेका थिए ।

पार्टीको विधानमा उपाध्यक्ष राख्ने गरी विधान तयार पारिएको छ। खासगरी बामदेव गौतमलाई उपाध्यक्षमा ल्याउने तयारी भएको छ ।

सचिवालय बैठकले गौतमलाई उपाध्यक्ष बनाउने प्रस्ताव गरेको थियो। सचिवालयको प्रस्तावलाई स्थायी समिति बैठकले अनुमोदन गरेमा उनी उपाध्यक्ष् हुने छन् ।

बैठकमा पार्टी अध्यक्ष तथा प्रधानमन्त्री केपी शर्मा ओली भने उपस्थित भएनन् । स्थायी समिति बैठक अगाडी बालुवाटारमा सचिवालय बैठक बसेको थियो।

त्यसमा भने प्रधानमन्त्री उपस्थित भएका थिए । प्रधानमन्त्री अहिले अस्वस्थताका कारण आराम गरिरहेका छन् ।

स्थायी समिति बैठकमा चुनावी समिक्षा समेत भएको छ । नेताहरुले अघिल्लो चुनावमा जितेका क्षेत्र गुमाउनु पार्टीका लागि ठूलो क्षति भएको उल्लेख गरेका थिए ।