काठमाडौं । काठमाडौं उपत्यकामा आज भूकम्पको धक्का महसुस गरिएको छ । काठमाडौं नजिक धादिङको छत्रेदेउराली आसपास केन्द्रविन्दु बनाएर मंगलबार दिउँसो भूकम्प गएको हो ।
मंगलबार दिउँसो ४ बजेर २९ मिनेट जाँदा ३.८ रेक्टर स्केलको भूकम्प गएको राष्ट्रिय भूकम्प मापन तथा अनुसन्धान केन्द्रले पुष्टी गरेको छ । यसले काठमाडौं र यस आसपासका जिल्लामा धक्का महसुस गरिएको हो ।
काठमाडौं । आज काठमाडौं उपत्यकामा थप १४२० जना मानिसमा कोरोना भाइरसको संक्रमण पुष्टी भएको छ । स्वास्थ्य तथा जनसंख्या मन्त्रालयले उपलब्ध गराएको तथ्यांक अनुसार उपत्यकाका तीन जिल्लामध्ये काठमाडौंमा १ हजार १ सय ४१, भक्तपुरमा ८६ र ललितपुरमा १ सय ९३ जना कोरोना संक्रमित थपिएका हुन् ।
आज महिला ६ सय ३ र पुरुष ८ सय १७ मा कोरोना पुष्टी भएको छ । अहिले काठमाडौं जिल्लामा १६ हजार ६ सय ८६ सक्रिय संक्रमित छन्। २ सय ८० संक्रमितको मृत्यु, ५७ हजार ३ सय ७८ कोरोना संक्रमणबाट मुक्त भएका र कुल संक्रमित ७४ हजार ३ सय ४४ रहेको तथ्यांक छ ।
होम आइसोलेसनमा ११ हजार ३ सय ९३ संक्रमित उपचाररत रहेको समेत मन्त्रालयले जनाएको छ । भक्तपुरमा सक्रिय संक्रमित १ हजार २ सय ४२४ छन्। ५ हजार ३ सय ८७ कोरोना संक्रमणबाट मुक्त भएका, ७३ संक्रमितको मृत्यु र कुल संक्रमित ६ हजार ६ सय ८४ रहेका छन्। होम आइसोलेसनमा बसी उपचार गर्नेको संख्या १ हजार ८ सय १४ पुगेको छ।
ललितपुरमा २ हजार ३ सय ५० सक्रिय संक्रमित रहेको मन्त्रालयको तथ्यांक छ । ८ हजार १ सय २५ कोरोना संक्रमणबाट मुक्त भएका छन्। ७२ संक्रमितको मृत्यु र कुल संक्रमित १० हजार ५ सय ४७ छन्। होम आइसोलेसनमा १ हजार ८ सय ३१ छन्।
काठमाडौं । सरकारले कोरोनाविरुद्धको खोप निर्माण सफल भई सार्वजनिक प्रयोगमा आउनासाथ नेपाल आपूर्तिको व्यवस्था मिलाउन तयारी थालेको छ । सोहीक्रममा सरकारले सचिवस्तरको एक उच्चस्तरीय समिति गठन गरेको छ। सोमबार साँझ बसेको मन्त्रीपरिषद् बैठकले अर्थ, स्वास्थ्य तथा जनसंख्या र परराष्ट्र सचिव रहेको तीन सदस्यीय समिति गठन गरेको हो ।
समितिले कोरोनाविरूद्धका खोपबारे अध्ययन गरी नेपाल ल्याउने प्रक्रिया थाल्ने छ । समितिले अहिले बनिरहेका खोपको अध्ययन, उक्त खोप नेपाल छिटो र छरितो माध्यमबाट कसरी ल्याउन सकिन्छ भन्नेबारे समेत अध्ययन गर्नेछ । मूल्यका विषयमा समेत समितिले काम गर्ने भएको छ । अहिले संसारका विकसित मुलुकहरु खोप आविष्कार र परिक्षणमा छन् ।
अमेरिका, चीन, रुस, भारत, बेलायतमा यसको धमाधम काम भइरहेको छ । खोप समयमै ल्याउने प्रयोजनका लागि आर्थिक स्रोतको जोहो अर्थ मन्त्रालयले मिलाउने भएको छ । यसअघि अमेरिकी औषधि उत्पादक कम्पनी पिफिजर र जर्मन बायोटेक कम्पनी बायोएनटेकले कोरोना भाईरस बिरुद्धको भ्याक्सिनले ९० प्रतिशत काम गरेको बताउँदै नयाँ उत्साह थपेका छन् ।
ति दुई कम्पनीले कोभिड १९ बिरुद्ध उनिहरुले उत्पादन गरेको भ्याक्सिनले संक्रमणको लक्षण नदेखिएका मानिसहरुलाई भाईरसबाट जोगाउन ९० प्रतिशत सफल भएको दावि गरेका छन् । अमेरिकाबाट उक्त समाचार आएकै दिन सरकारले नेपालमा खोप आपूर्तिका लागि समिति गठन गरेको हो ।
एजेन्सी
अमेरिकी औषधि उत्पादनमा नाम कमाएको पिफिजर र जर्मन बायोटेक कम्पनी बायोएनटेकले उनिहरुले उत्पादन गरेको कोरोना भाईरस बिरुद्धको भ्याक्सिनले ९० प्रतिशत काम गरेको बताएका छन् । ति दुई कम्पनीले कोभिड -१९ बिरुद्ध उनिहरुले उत्पादन गरेको भ्याक्सिनले संक्रमणको लक्षण नदेखिएका मानिसहरुलाई भाईरसबाट जोगाउन ९० प्रतिशत सफल भएको बताएका छन् ।
सोमबार पिफिजर र बायोएनटेकले आफुले उत्पादन गरेको भ्याक्सिन सफल भएपछि “मानवियता र विज्ञानको लागि ठुलो दिन” भनेका छन् ।
पिफिजर कम्पनीका अध्यक्ष तथा सिइयो अल्बर्ट बौरलाले भ्याक्सिनको सफलतालाई सुरुङको अन्त्यमा देखिएको उज्यालो भनेका छँन् । यस अगाडि बैज्ञानिकहरुले कोरोना बिरुद्धको भ्याक्सिन कमसेकम ७५ प्रतिशत सफल हुने अनुमान गर्दै आएका थिए भने ह्वाईट हाऊस कोरोना भाईरस एड्भाईज डा. एन्थोनि फाउसीले कोरोना बिरुद्धको भ्याक्सिनले ५० देखि ६० प्रतिशतसम्म काम गर्यो भने स्विकार गरिने बताएका थिए ।
श्रोत : सि एन बि सि
सिमकोट । नेपालमा अधिक चिसोका कारण हिमाली भेगको जनजीवन प्रभावित हुने छ । यसै सिलसिलामा हुम्लाको उत्तरी नाम्खा गाउँपालिकास्थित हिल्सामा चिसोले पानीको धारामा बरफ जम्न थालेको छ।
राष्ट्रिय समाचार समिति (रासस)का अनुसार कात्तिक महिनाको दोस्रो सातादेखि हुम्लामा चिसो बढ्न थालेपछि हिल्सामा जम्मा गरेर राखेको पानी बरफ हुन थालेको हो।
रातको समयमा अत्यधिक चिसो हुने भएकाले धारामा बिहानको समयमा बरफ जम्न थालेको छ। यहाँको तापक्रम समेत माइनसमा झरिसकेको छ ।
दिउँसो घाम लागेपछि मात्रै जमेको पानी बिलाउँछ । कोरोना भाइरसका कारण हिल्सामा होटल बन्द छन् । यहाँ प्रहरी मात्र रहेका छन् ।
चिसो बढ्दै गएपछि हिल्सा प्रहरी चौकीले समेत मङ्सिर पहिलो साता आफ्नो बसाई सिमकोट सार्ने गर्छ । नेपाल प्रहरीको टोली जिल्ला फिर्ता भइसकेको छ । अहिले यहाँ सशस्त्र प्रहरी मात्र रहेको छ ।
काठमाडौं । कोरोना भाइरसको संक्रमणका कारण एकै दिनमा सर्वाधिक मानवीय क्षतिको रेकर्ड बनेको छ । विश्वभर पछिल्लो २४ घण्टामा सर्वाधिक ९ हजारभन्दा बढीको मृत्यु भएको छ । पछिल्लो २४ घण्टामा ९ हजार ५४ जनाको मृत्यु भएको छ ।
अब विश्वभर कोरोना भाइरसको संक्रमणछि ज्यान गुमाउनेको संख्या १२ लाख ३० हजार १०१ पुगेको छ । त्यसो त नेपालमा समेत पछिल्लो २४ घण्टामा सबैभन्दा बढी अर्थातः ३० जनाको मृत्यु भयो । यही ट्रेण्ड विश्वभर देखिएको छ ।
युरोपेली मुलुकमा पछिल्लो २४ घण्टामा ३ हजार ९२८ जनाको मृत्यु भएको छ । यी मुलुकहरुमा कोरोनाको दोस्रो लहरले समेत ठूलो मानवीय क्षति निम्याउन थालेको हो । अब युरोपेली मुलुकमा कोरोनाका कारण मृत्यु हुनेको संख्या २ लाख ८९ हजार ७४८ पुगेको छ ।
विश्वभर एकै दिन ५ लाखभन्दा बढीमा कोरोना भाइरसको संक्रमण पुष्टि भएको छ । अहिले विश्वभर संक्रमितको संख्या ४ करोड ८४ लाख पुगेको छ ।
संक्रमितमध्ये ३ करोड ४६ लाख ६५ हजारभन्दा बढी निको भएका छन् । १ करोड २५ लाख १६ हजार ७३१ को उपचार जारी छ । त्यसमध्ये ८९ हजार २१६ जना गम्भीर अवस्थामा छन् ।
काठमाडौं । नेपालमा ७२ घण्टा यताको पिसिआर परीक्षण रिर्पोट नेगेटिभ आएका यात्रुमा समेत धमाधम कोरोना संक्रमण देखिन थालेको छ । जसले गर्दा यात्रुलाई बोकेर लैजाने एयरलाइन्स कम्पनीमाथि दवाव बढेको छ । एकातर्फ कोरोना बोकेर आएको भन्दै एयरलाइन्समाथि लाग्ने प्रतिष्ठाको प्रश्न र अर्कोतर्फ एयरलाइन्सलाई हुने कारवाहीका कारण पुग्ने आर्थिक क्षतिले उनीहरुलाई समस्यामा पार्न थालेको छ ।
बुधबार नेपाल एयरलाइन्सले यस्तै गुनासो गरेको छ । नेपाली ल्यावमा गरिएको परीक्षणमा नेगेटिभ आएका यात्रुमा समेत विदेश पुगेपछि पुनः परीक्षण गर्दा कोरोना संक्रमित देखाउन थालेको कम्पनीले जनाएका छन् । यसले ल्यावको विश्वसनीयतामा प्रश्न उठ्न थालेको नेपाल एयरलाइन्सले जनाएको छ ।
अर्कोतर्फ स्वयमः यात्रु पनि पिसिआर परीक्षण गरेपछि आइसोलेसनमा बस्नु पर्छ । तर, नेपालमा भने यात्रुले स्वास्थ्य निर्देशिकाको पूर्ण पालना गरेका छैनन् । ल्यावमा परीक्षण गरेर आएपछि भिडभाडमा जान पाइदैन । तर, नेपालमा त्यसको पूर्ण पालना भएको छैन । यसले स्वाव दिएपछि पनि संक्रमण भएको हुन सक्छ ।
सोहीकारण अब कुनै पनि यात्रुमा विदेश पुगेपछि कोरोना भाइरसको संक्रमण देखिएमा नेपाल एयरलाइन्स जिम्मेवार नहुने कम्पनीले स्पष्ट पारेको छ । आफ्नोतर्फबाट प्रोटोकल पालनामा कुनै कमजोरी नभएको भन्दै सबै सरोकारवालाई गम्भीर हुन समेत नेपाल एयरलाइन्सले आग्रह गरेको छ ।
काठमाडौं । कोरोना भाइरसको संक्रमणबाट सबैभन्दा बढी प्रभावित काठमाडौं उपत्यकामा पछिल्लो २४ घण्टामा थप १३ सय ५७ जना मानिसमा कोरोना भाइरसको संक्रमण पुष्टी भएको छ । स्वास्थ्य तथा जनसंख्या मन्त्रालयका अनुसार काठमाडौंमा १ हजार १ सय १३, भक्तपुरमा ४९ र ललितपुरमा १ सय ९५ जना कोरोना संक्रमित थपिए ।
यसमध्ये महिला ५ सय ६९ र पुरुष ७ सय ८८ रहेको मन्त्रालयको तथ्यांक छ । अहिले काठमाडौं जिल्लामा १६ हजार ८ सय ९० सक्रिय संक्रमित रहेका छन् । काठमाडौं जिल्लामा मात्र कुल २ सय १९ संक्रमितको ज्यान गइसकेको छ । यहाँ ४४ हजार ७ सय ४६ जनाले भने कोरोना जित्न सफल भएका छन् ।
काठमाडौं । यो वर्षको विश्वका सर्वाधिक मूल्यवान ब्राण्डको सूची सार्वजनिक भएको छ ।
इन्टरब्राण्ड कम्पनीले सार्वजनिक गरेको सूची अनुसार यस वर्ष पनि टेक्नोलोजी जाएन्ट्स एप्पलले आफ्नो ब्राण्ड भ्यालुलाई कायम राख्दै विश्वका सबैभन्दा मूल्यवान ब्राण्ड बन्न सफल भएको छ ।
एप्पलले आफ्नो ब्रान्ड भ्यालू ३८ प्रतिशले बढाउँदै ३ खर्ब २२ अर्ब डलर पु्याएको छ ।
अमेरिकी धनाढ्य जेफ बेजोसको अनलाइन व्यापार कम्पनी अमेजन विश्वको दोस्रो ठूलो ब्रान्ड भ्यालू भएको कम्पनी बनेको छ ।
कोरोनाकालमा आक्रमक व्यापार विस्तार गरेको अमेजनले सन् २०२० मा ब्रान्ड भ्यालू ६० प्रतिशले वृद्धि गरी २ खर्ब ६ अर्ब डलर पुर्याएको छ ।
विश्वका चर्चित सार्वजनिक सामाजिक सञ्जाल फेसबुक भने टपटेन वाट नै बाहिरिएको छ । फेसबुक १४ औं स्थानमा पुगेको छ । गत वर्ष पनि १४ औं स्थानमा फेसबुक नै रहेको थियो ।
यो वर्ष विश्वका सर्वाधिक मूल्यवान १ सय ब्राण्डको सूचिमा प्रविधिका ब्राण्डको प्रभुत्व देखिएको छ । इन्टरब्राण्डका अनुसार टेक्नोलोजी ब्राण्डले बढि हिस्सा ओगटेका छन् ।
ब्राण्डेड प्रडक्ट तथा सेवाको वित्तिय अवस्था, उपभोक्ताको छनोटमा ब्राण्डले खेल्ने भूमिका तथा मूल्य र कम्पनीको मुनाफा लगायतका तत्वहरुको आधारमा इन्टरब्राण्डले विश्वका सर्वाधिक मूल्यवान ब्राण्डहरुको सूचि निकाल्ने गर्दछ ।
सूचना प्रविधि कम्पनी माइक्रोसफ्ट तेस्रो स्थानमा रहेको छ । विश्वको चौथो ठूलो मूल्यवान कम्पनी बनेको गुगलको ब्रान्ड भ्यालू १ खर्ब ६५ अर्ब डलर रहेको छ ।
विश्वका मूल्यवान कम्पनीहरुको सूचीमा सामसङ पाचौं स्थानमा रहेको छ । यसको ब्रान्ड भ्यालू गत आवको भन्दा २ प्रतिशतले बढेर ६२ अर्ब २८ करोड पुगेको छ ।
ब्रान्ड भ्यालूका आधारमा पेयपदार्थ उत्पादक कम्पनी कोकाकोला छैटौं स्थानमा रहेको छ ।
ब्रान्ड भ्यालूकै आधारमा गाडी उत्पादक कम्पनी टोयोटा सातौं, मर्सिडिज बेन्ज आठौं, फास्टफूड कम्पनी म्याक डोनाल्ड नवौं र डिज्नी दशौं स्थानमा रहेको छ ।
विश्वको सर्वाधिक लोकपिय भिडियो स्ट्रिमिङ्ग प्लाटर्फम युट्युब विश्वको ३० औं लोकप्रिय ब्राण्ड बनेको छ । सूचीको १९ औँ स्थानमा फेसबुक मातहतको इन्स्टाग्राम रहेको छ ।
काठमाडौं । अब दैनिक कोरोना सम्बन्धी प्रेस ब्रिफिङ नहुने भएको छ । सरकारले साताको दुई दिनमात्रै कोरोनाभाइरसको संक्रमणबारे प्रेस ब्रिफिङ गर्ने गरी निर्णय गरेको स्वास्थ्य मन्त्रालयका प्रवक्ता डा. जागेश्वर गौतमले जानकारी दिए ।
उनका अनुसार अब आइतबार र बुधबार दिउँसो सवा ४ बजे कोरोनाबारे लाइभ ब्रिफिङ हुनेछ । यसअघि दशैं बिदाको असर पारी ब्रिफिङ ५ दिनसम्म रोकिएको थियो। अन्य दिन भने वेवसाइट र अरू विभिन्न माध्यमबाट संक्रमणको अवस्थाबारे जानकारी सार्वजनिक गरिने भएको छ ।
सरकारले २०७६ चैत ११ गतेबाट दैनिक सवा ४ बजे नेपाल टेलिभिजनबाट कोरोना ब्रिफिङ गर्दै आएको थियो।
काठमाडौं । बडादशैंको बिदाको अवसर पारी काठमाडौं उपत्यकामा चहलपहल घट्यो । यसको प्रभाव कोरोना भाइरसको परीक्षणमा समेत देखिएको छ । पछिल्लो २४ घण्टामा मात्र २ हजार ७२५ नमुना परीक्षण भएको छ । यो संख्याबाट ५७० जनामा मात्र कोरोना भाइरसको संक्रमण पुष्टी भएको छ । देशभरका ल्याबमा यो संख्यामा परीक्षण भएको हो ।
अब देशभर संक्रमितको संख्या १ लाख ६० हजार ४०० पुगेको छ । यसमध्ये १ लाख १८ हजार ८४३ जना संक्रमणमुक्त भएका छन् । पछिल्लो २४ घण्टामा मात्र ३ हजार १६८ जना संक्रमणमुक्त भएको स्वास्थ्य तथा जनसंख्या मन्त्रालयले जनाएको छ ।
२४ घण्टामा १४ जनाको ज्यान गएको छ । नेपालमा कोरोना संक्रमणबाट मृत्यु हुनेहरुको संख्या ८७६ पुगेको छ ।
जेनेभा । विश्व स्वास्थ्य संगठन (डब्लुएचओ)ले कोरोना भाइरसको संक्रमण रोक्ने उपाय लकडाउन नभएको बताएको छ । पछिल्ला दिनमा यूरोपमा कोरोना संक्रमणको दोस्रो चरणको लहर चलेको छ । यसले यूरोपमा लकडाउन र प्रतिवन्ध शुरु भएको छ ।
सोही सन्दर्भमा डब्लूएचओले कोरोना भाइरस रोकथामका उपाय पूर्ण रूपमा पालना गर्ने हो भने भाइरसको संक्रमण रोक्न लकडाउन र प्रतिवन्ध आवश्यक नपर्ने उल्लेख गरेको छ । पछिल्ला दिनमा स्पेन, इटली, फ्रान्ससहित विभिन्न मुलुकमा संक्रमितको संख्यामा गुणात्मक वृद्धि देखिएको छ ।
कोभिड–१९ सम्बन्धी डब्लुएचओकी प्राविधिक प्रमुख मरिया भान केरकोभेले प्रतिबन्धभन्दा सम्बन्धित मुलुकले अनुगमन, परीक्षण र कन्ट्याक ट्रेसिङलाई बढाउनु पर्ने सुझाव दिएकी छिन् । अघिल्लो साता विश्वभर देखिएकामध्ये ४६ प्रतिशत नयाँ संक्रमितहरू यूरोपेली मुलुकबाट आएका छन् । यसले पुनः एक पटक यूरोप कोरोनाबाट प्रभावित हुने देखिएको छ ।
काठमाडौं । काठमाडौं उपत्यकामा आइतबार १५३५ जनामा कोरोना भाइरसको संक्रमण पुष्टी भएको छ । स्वास्थ्य तथा जनसंख्या मन्त्रालयले सार्वजनिक गरेको विवरण अनुसार काठमाडौं जिल्लामा १२२५, भक्तपुरमा १६३ र ललितपुरमा १४७ जनामा संक्रमण पुष्टि भएको हो । उपत्यकामा नयाँ पुष्टि भएका १५३५ संक्रमितमध्ये ९०६ जना पुरुष र ६२९ जना महिला हुन् ।
काठमाडौं जिल्लामा हालसम्म ५६ हजार ३०२ जना संक्रमित भइसकेका छन् । तीमध्ये ३६ हजार २८३ जना निको भएका छन् । यो जिल्लामा १९३ जनाको मृत्यु भएको छ । यहाँ अहिले १९ हजार ८२६ सक्रिय संक्रमित छन् ।
काठमाडौंमा होम आइसोलेसनमा १० हजार ५०१ जना रहेको तथ्यांक मन्त्रालयले सार्वजनिक गरेको छ । ललितपुर जिल्लामा हालसम्म ७८८३ जना संक्रमित भएका छन् । तीमध्ये ५३९९ जना निको भएका छन् भने ५४ जनाको मृत्यु भएको छ । हाल सक्रिय संक्रमितको संख्या २४३० रहेको छ । ललितपुरमा २६४३ जना होम आइसोलेसनमा छन् ।
भक्तपुर जिल्लामा हालसम्म ५३१३ जना संक्रमित भएका छन् । तीमध्ये ३७६३ जना निको भएका छन् भने ५६ जनाको मृत्यु भएको छ । हाल सक्रिय संक्रमितको संख्या १४९४ रहेको छ । भक्तपुरमा १७१९ जना होम आइसोलेसनमा छन् ।
काठमाडौं । यो वर्ष सञ्चालित ‘ग्लोबल इ–कम्पिटिसन अन एस्ट्रोनोमी एण्ड एस्ट्रोफिजिक्स्’ मा नेपालले दुइ अवार्ड जितेको छ । नेपालले ‘अनरेबल मेन्सन अवार्ड’ जितेको हो । नेपालका लागि सेन्ट जेभियर्स कलेज, माइतीघरका राहुलरञ्जन साह तथा क्यापिटल कलेज एण्ड रिसर्च सेन्टर, कोटेश्वरका अंशुराज सेढाईले ‘अनरेबल मेन्सन अवार्ड’ जितेका हुन् ।
नेपाल एष्ट्रोनोमिकल सोसाइटीले यसको पुष्टी गरेको छ । असोज ९ गतेदेखि सुरू भएको अन्तर्राष्ट्रिय प्रतियोगिता कात्तिक ७ मा सकिएको हो । व्यक्तिगत तथा सामूहिक विधामा सञ्चालित प्रतियोगितामा नेपालले व्यक्तिगततर्फ दुई अवार्ड जितेको हो ।
प्रतियोगितामा नेपाल लगायत ४० देशका व्यक्तिगततर्फ २७९ तथा सामूहिकतर्फ १५४ बढी प्रतिस्पर्धी थिए । सातौं राष्ट्रिय एस्ट्रोनोमी ओलम्पियाडबाट छनोट भएका १४ विद्यार्थीलाई नेपालबाट प्रतियोगितामा भाग लिन पठाइएको थियो ।
राष्ट्रिय एस्ट्रोनोमी ओलम्पियाड नेपालमा कक्षा ८ देखि १२ सम्म अध्ययनरत् २० वर्षभन्दा मुनिका विद्यार्थीका लागि सञ्चालित प्रतिभा पहिचान गर्ने सम्बन्धी कार्यक्रम हो।
नयाँ दिल्ली । रुसमा निर्माण भइरहेको कोभिड १९ विरुद्धको खोप ‘स्पुतनिक भी’ को परीक्षण भारतमा समेत हुने भएको छ । भारतको औषधिसम्बन्धी केन्द्रीय निकाय सेन्ट्रल ड्रग्स् स्टान्डर्ड कन्ट्रोल अर्गनाइजेसन्स्ले यसका लागि अनुमति दिएको भारतीय सञ्चारमाध्यमले लेखेका छन् । भारतमा एक सय जना स्वयंसेवकमा खोप परीक्षण गरिने भएको अधिकारीहरुले पुष्टी गरेका छन् ।
खोप भारतमा परीक्षणका लागि अनुरोध भएको र अनुमति पनि दिइएको उनीहरुको भनाई छ । यो परीक्षण दोस्रो चरणको हो । स्पुतनिक भी नामको खोपको परीक्षणका लागि भारतले अनुमति दिएको र तेस्रो चरणको परीक्षण समेत भारतमा हुने अधिकारीहरुको भनाई छ ।
भारतमा डा रेड्डीज ल्याबरेटोरिजले खोपको परीक्षण गर्न पाउने गरी अनुमति पाएको छ । यो भारतको ठूलो औषधी उत्पादक कम्पनी हो । भारतमा यहाँका एक सय जना स्वयंसेवीमा यो खोपको परीक्षण गरेपछि यसको तेस्रो क्लिनिकल ट्रायल अर्थात् तेस्रो पटकको परीक्षण हुने छ । तेस्रो चरणको परीक्षण चाँही एक हजार ४ सय जनामा गरिने भएको छ ।
काठमाडौं । काठमाडौं उपत्यकामा थप २७२० जना मानिसमा कोरोना भाइरसको संक्रमण पुष्टी भएको छ । पछिल्लो २४ घण्टामा काठमाडौं, ललितपुर र भक्तपुरमा उक्त संख्यामा कोरोना पुष्टी भएको स्वास्थ्य तथा जनसंख्या मन्त्रालयले जनाएको छ ।
मन्त्रालयका अनुसार काठमाडौं जिल्लामा २३५७, ललितपुरमा २३६ र भक्तपुरमा १२७ जनामा संक्रमण पुष्टि भएको छ ।
पछिल्लो २४ घण्टामा देशभर ४४९९ जनामा कोरोना भाइरस संक्रमण पुष्टी भएको छ । अब सक्रिय संक्रमितको संख्या काठमाडौं जिल्लामा २० हजार १९६, ललितपुरमा २५ सय ७४ र भक्तपुरमा १३ सय ६५ जना पुगेको छ ।
तेह्रथुम । दशैं बिदामा घर पुगेका एक जना सैनिकको करेन्ट लागेर ज्यान गएको छ । तेह्रथुमको आठराई गाउँपालिकामा करेन्ट लागेर सैनिक जवानको ज्यान गएको हो । नेपालको राष्ट्रिय समाचार समितिका अनुसार नेपाली सेनाको सिरहास्थित शेर गणमा कार्यरत तेह्रथुमको आठराई गाउँपालिका–५ होडाका २६ वर्षीय राजन बराइलीको बिहीबार साँझ करेन्ट लागेर ज्यान गएको हो।
आफ्नै घरअगाडि रहेको बिजुलीको ट्रान्समिटरबाट आफूखुशी कालो तार जोड्ने क्रममा करेन्ट लागेर बराइली जमिनमा पछारिएका थिए। गम्भीर घाइते भएका उनलाई उपचारका लागि पाँचथरको फिदिमस्थित जिल्ला अस्पताल ल्याउने क्रममा साँझ मृत्यु भएको हो ।
काठमाडौं । नेपालमा आज राती १२ बजेबाट क्लिनफिड लागु हुँदैछ । यसले करीव २ सय विदेशी च्यानलको प्रसारण बन्द हुनेछ । खासगरी विज्ञापनरहित प्रसारणमा जानु पर्ने प्रावधानका कारण च्यानलहरुले अब विज्ञापनसहित प्रसारण गर्न पाउने छैनन् । यसले ठूलो संख्यामा विदेशी च्यानलको प्रसारण नेपालमा हुने छैन ।
सूचना तथा सञ्चार प्रविधि मन्त्रालयले बिहीबार सूचना जारी गर्दै ८ कात्तिकदेखि विदेशी च्यानल क्लिन फिड (विज्ञापनमुक्त) हुनुपर्ने प्रावधान लागु गरेको जानकारी गराएको छ । विज्ञापन नियमन गर्ने सम्बन्धमा व्यवस्था गर्न बनेको ऐन २०७६ अनुसार विदेशी टेलिभिजन च्यानल कार्तिक ७ गतेसम्म क्लिन फिड भइसक्नुपर्छ ।
सूचना तथा सञ्चार प्रविधि मन्त्रालयले बिहीबार सूचना जारी गर्दै ८ कात्तिकदेखि विदेशी च्यानल क्लिन फिड (विज्ञापनमुक्त) हुनुपर्ने प्रावधान लागु गरेको जानकारी गराएको छ ।
यसअघि सरकारलाई भारतीय ब्रोडकाष्टर्स फोरम, डिस्कभरी नेटवर्क्स, बीबीसी न्युज, नेपाल केबल टेलिभिजन महासंघ लगायतले क्लिन फिड प्रसारणको म्याद थप्न माग गरेका थिए । सरकार भने प्रावधान कार्यान्वयन गरेरै छाड्ने निष्कर्षमा पुगेको हो ।
कात्तिक ८ देखि विज्ञापन बजाएमा विदेशी च्यानल च्यानल बन्द हुनेछन् । यसअघि २०७५ कात्तिक ८ गते राजपत्रमा प्रकाशित ऐनले क्लिन फिडमा जान सेवा प्रदायकहरूलाई एक वर्षको अवधि दिएको हो ।
नेपाल केबल टेलिभिजन महासंघका अनुसार शुक्रबार रातीबाट करीव तीन दर्जन विदेशी च्यानल मात्र नेपालमा देखिनेछन् । अन्य बन्द हुनेछन् । किनकी उनीहरुले क्लिन फिड लागु गर्ने गरी तयारी गरेका छैनन् ।
काठमाडौं । सरकारले कात्तिक ७ गते भित्र विज्ञापनरहित प्रसारण गर्न नेपाल केवल टेलिभिजन महासंघ लगायतका संघ संस्थाहरुलाई निर्देशन दिएको छ । सञ्चार तथा सुचना प्रविधि मन्त्रालयले बुधबार एक विज्ञप्ति जारी गर्दै २०७७ कार्तिक ७ गतेभित्र विज्ञापनरहित(क्लिन फिड) प्रसारण गर्न निर्देशन दिएको हो ।
निर्देशनलाई बेवास्ता गरेमा कानुन बमोजिम कारवाही हुने चेतावनी समेत मन्त्रालयले दिएको छ । इन्डियन ब्रोडकास्टर्स फोरम, डिस्कवरी नेटवर्कस, बीबीसी न्युज, नेपाल केवल टेलिभिजन महासंघ लगायतका संघ संस्थाहरुले विज्ञापनरहित प्रसारणका लागि क्याद थप गर्न माग गरेकोमा ध्यानाकर्षण भएको उल्लेख गर्दै मन्त्रालयले विज्ञप्तिमा कात्तिक ७ गतेभित्र वित्रापनरहित प्रसारण गर्नु पर्ने व्यवस्था ऐनद्वारा नै गरिएको जनाएको छ ।
उसले ऐनद्वारा नै एक वर्षको तयारी अविधि समेतको व्यवसथ भएकाले तोकिएको मिति देखि विज्ञापनरहित प्रसारण गर्न गराउन सबै संघ संस्थाहरुलाई निर्देशन दिएको जनाएको छ ।
काठमाडौं । एप्पलले आइफोन-१२ सिरिजका ४ वटा फोन सार्वजनिक गरेको छ ।
भर्चुअल माध्यमवाट आइफोन-१२, आइफोन-१२ मिनी फाइफोन–१२ प्रो , आइफोन–१२ प्रो म्याक्स सार्वजनिक गरेको हो । उक्त फोनहरुमा फाइभजी नेटवर्क चल्ने कम्पनीले जनाएको छ ।
एप्पलका नयाँ आइफोन आइफोन-१२(६४, १२८ र २५६ जिबी स्टोरेज), आइफोन-१२ मिनी (६४, १२८ र २५६ जिबी स्टोरेज)का अलावा आइफोन-१२ प्रो (१२८, २५६ र ५१२ जिबी स्टोरेज), आइफोन १२ प्रो म्याक्स (१२८, २५६ र ५१२ जिबी स्टोरे) स्टोरेज क्षमता छ ।
आइफोन–१२ सिरिजका फोनहरुको मूल्य एक लाख १२ हजारदेखि दुई लाख ८ हजार रुपैयाँसम्म रहेको छ । नयाँ फोनको अर्डर नोभेम्बर छ देखि सुरु हुने बताइएको छ ।
कम्पनीले सार्वजनिक गरेको मूल्य अनुसार आइफोन–१२ मिनीको मूल्य ६ सय ४९ डलर छ भने आइफोन–१२ को मूल्य ७ सय ९९ अमेरिकी डलरबाट सुरु हुन्छ ।
यसरी नै आइफोन–१२ प्रो र आइफोन–१२ प्रोम्याक्सको मूल्य क्रमश ९ सय ९९ डलर तथा ११ सय ९९ डलर सुरु हुने कम्पनीले जनाएको छ ।
मोवाइलमा उपलब्ध विभिन्न सुविधा तथा स्टोरेज अनुसार मूल्यमा फरक पर्छ ।
विश्व बजारमा आइफोन-१२ मिनिको प्रि-अडर ६ नोभेम्बरबाट सिरू हुनेछ भने १३ नोभेम्बरदेखि ग्राहकको हातमा पर्नेछ।
यस्तै आइफोन-१२ आइफोन-१२ प्रोको प्रिअडर १६ अक्टुबरबाट सुरू हुनेछ भने २३ अक्टोबरबाट ग्राहकले पाउनेछन्। आइफोनको स्क्रिन परिवर्तन गरिएको छ । आगामी दिनमा ग्राहकहरुले मोवाइल फोन बोक्दा आइफोनको स्क्रिनमा परिवर्तन भएको पाउँन सक्नेछन् ।
यी आइफोनमो स्क्रीन केही ठूलो (६.१ इन्च) रहेको छ । पर्यावरणमा प्रभाव कम पार्न भन्दै कम्पनीले मोबाइलको साथमा चार्जर र एयरफोन भने नदिने भएको छ ।
यस्तै, लन्च भएको उक्त आइफोनमा फ्ल्यास बिना नै रातमा सेल्फी लिन सकिने विषेशता छ ।
आइफोन-१२ प्रो म्याक्सका लागि ग्राहकहरूले १३ अक्टुबरबाट प्रिअडर गर्नसक्नेछन् भने २० नोभेम्बरबाट बिक्री सुरू हुनेछ।
काठमाडौं । नेपालमा विद्युतको भाउ घटाउने तयारी गरिएको छ । ऊर्जा क्षेत्रको विस्तृत अध्यन गरी नीतिगत सुझाव पेश गर्न मन्त्रिपरिषदद्वारा गठित कार्यदलको बैठकमा उर्जा मन्त्री वर्षमान पुनले यस्तो जानकारी गराएका हुन् । मन्त्रिपरिषद्ले ऊर्जा, जलश्रोत तथा सिँचाइ, उद्योग वाणिज्य तथा आपूर्ति, अर्थ मन्त्री र राष्ट्रिय योजना आयोगका उपाध्यक्षलाई समेटेर चार सदस्यीय समिति गठन गरेको थियो ।
समितिको पहिलो बैठकमा उर्जा मन्त्री पुनले विद्युत महसुल घटाउने तयारी भएको जानकारी गराएका छन् । मुलुक भित्रै विद्युतको पर्याप्त बजार रहेको भन्दै उनले त्यसका लागि विद्युतको अधिकत खपतमा प्रोत्साहन गर्ने नीति लिइएको उनले बताए ।
कार्यदललाई जलविद्युत उत्पादन, प्रसारण र वितरण, प्रसारण लाइन, आन्तरिक र बाह्य बजारको अवस्था, उपभोग तथा खपतको प्रवृत्ति, औद्योगिक विकास र आर्थिक क्रियाकलापको विस्तारले माग गर्ने विद्युतको परिणाम, हाल उपलब्ध विद्युत र निर्माणाधीन विद्युत आयोजनाहरुको समेत समग्र अध्ययन विश्लेषण गरी नीतिगत सुझाव पेश गर्न जिम्मेवारी तोकिएको छ।
बैठकमा तीन वटै मन्त्रालयका सचिव समेत सहभागी भएका छन् । बैठकले ऊर्जा सचिव दिनेशकुमार घिमिरेलाई कार्यदलको सदस्यसचिव तोकेको छ। ऊर्जा क्षेत्र हेर्ने राष्ट्रिय योजना आयोगका सदस्य, अर्थ, उद्योग, बाणिज्य र आपूर्ति र वन तथा वातावरण मन्त्रालयका सचिवलाई कार्यदलको स्थायी आमन्त्रित सदस्यको जिम्मेवारी समेत तोकिएको छ ।
काठमाडौं । अन्तरिक्षसम्बन्धी अध्येताहरुका लागि आज विशेष दिन हो । आज मंगल ग्रह र पृथ्वी आमने सामने हुनेछन् । यसले पृथ्वीबाट मंगलग्रह निकै ठूलो र चम्किलो समेत देखिनेछ । आज जीएमटी २३ः२० मा मंगल, पृथ्वी र सूर्य तीनवटै ग्रह १८० डिग्रीको कोण अर्थात् सीधा लाइनमा रहने अमेरिकी अन्तरीक्ष निकाय नासाले उल्लेख गरेको छ । यस्तो संयोग हरेक २६ महिनामा एक पटक जुट्ने गर्छ ।
पृथ्वी र मंगल ग्रह नजिक हुँदा चन्द्रमाकै आधारमा यो ग्रह देखिने छैन । तर, राती आकासमा हेर्दा अन्य ताराहरुको तुलनामा मंगल ग्रह बली बढि चम्किलो र ठूलो देखिने छ । आज सुर्यास्त हुनासाथ आकाशमा मंगल ग्रह रातो र चम्किलो स्पष्टसँग देखिने खगोलशास्त्रीहरुले बताएका छन् ।
वैज्ञानिकहरुले यो अवसरलाई अध्ययन अनुसन्धानका रुपमा पनि प्रयोग गर्छन । हरेक दुई वर्षमा मंगल ग्रह र पृथ्वी नजिक हुने मौका पारेरै मंगल ग्रहमा जाने मिसन यही मौका पारेर पठाउने गरिन्छ । यसबाट कम समयमै मंगलग्रहसम्म एक्सेस प्राप्त हुनेछ ।
काठमाडौं । अब काठमार्डां उपत्यकामा अत्यावश्यक बिरामी बाहेक अन्य बिरामीको अपरेशन नहुने भएको छ । स्वास्थ्य तथा जनसंख्या मन्त्रालयले काठमाडौं उपत्यकाका अस्पतालहरुलाई यस्तो निर्देशन दिएको हो । लक्षण भएका कोरोना संक्रमितहरुको संख्या बढेर अस्पताल तथा बेडको अभाव भएपछि सरकारले यस्तो निर्णय गरेको हो ।
यो निर्णयपछि अब काठमाडौंमा बेडको चरम अभाव कम हुने अपेक्षा गरिएको छ । आईसीयू र भेन्टिलेटर वेडको अभावमा अहिले बिरामीले अकालमा ज्यान गुमाउने अवस्था आएको छ । देशभर औसतः ४ हजार दैनिक संक्रमित देखिएका छन् । उपत्यकामा २५ सय भन्दा माथि छन् । ६० प्रतिशत संक्रमित काठमाडौंमा देखिएपछि काठमाडौंमा चरम स्वास्थ्य संकट देखा परेको हो ।
काठमाडौं । नेपालमा पछिल्लो २४ घण्टामा थप ५००८ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार २४ घण्टामा गरिएको १९ हजार ३२० जनाको पीसीआर परीक्षणमा थप ५००८ जनामा कोरोना संक्रमण पुष्टि भएको हो ।
यो सँगै संक्रमितको कुल संख्या १ लाख ५ हजार ६ सय ८४ पुगेको छ।
पछिल्लो २४ घन्टामा थप १२२९ जना कोरोना संक्रमणमुक्त भएका छन्। योसँगै देशभर डिस्चार्ज हुनेको संख्या ७४ हजार २५२ पुगेको छ। देशभर ३० हजार ८ सय १८ जना सक्रिय संक्रमित छन्।
काठमाडौं । यस वर्षको नोबेल पुरस्कार संयुक्त राष्ट्रसंघीय विश्व खाद्य कार्यक्रम (डब्ल्यूएफपी) लाई प्रदान गरिने घोषणा गरिएको छ।
शुक्रबार द नर्वेजियन नोबेल कमिटीले डब्ल्यूएफपीलाई यो पुरस्कार दिने घोषणा गरेको हो ।
भोकमरीविरुद्ध लडाईको प्रयासका लागि विश्व खाद्य कार्यक्रमलाई नोबेल पुरस्कार २०२० बाट पुरस्कृत गर्ने निर्णय भएको नोबेल कमिटीले ट्वीट मार्फत जनाएको छ ।
‘डब्लूएफपीले भोकलाई युद्ध र द्दवन्द्वको हतियारको रुपमा प्रयोग गरिने कार्य रोक्नका लागि योगदान पुर्याएको छ’, नर्बेजियन नोबेल कमिटीले ट्वीट गरेको छ।
काठमाडौं । बंगालको खाडीमा विकसित हुँदै गएको चक्रवातले नेपालमा समेत प्रभाव पार्ने भएको छ । चक्रवातको प्रभावले नेपालमा पनि ठूलो वर्षाको सम्भावना रहेको जल तथा मौसम विज्ञान विभागले जनाएको छ ।
विभागका अनुसार चक्रवात उत्तरतर्फ सरेमा नेपालमा ठूलो वर्षाको सम्भावना रहनेछ । उक्त चक्रवात उत्तर आएमा प्रदेश १ देखि प्रदेश ४ सम्म ठूलो वर्षा हुनेछ । शनिबारसम्म चक्रवातको रुप पत्ता लागिसक्ने भएको छ ।
बंगालको खाडीमा बनेको न्यून चापीय क्षेत्रको प्रभावका कारण अहिले पनि नेपालमा मनसुन सक्रिय छ ।
उत्तरपश्चिम बंगालको खाडीमा रहेको न्यून चापीय क्षेत्रको प्रभाव कमजोर भए पनि नेपालको पूर्वी भागमा पर्दा आज प्रदेश १ का केही स्थानमा हल्का वर्षाको सम्भावना रहेको मौसम पूर्वानुमान महाशाखाले उल्लेख गरेको छ । प्रदेश १ बाहेकका क्षेत्रमा भने शुक्रबार मौसम सफा रहने छ ।
काठमाडौं । भिडियो सेयर गर्ने युट्युब प्लेटफर्मले नयाँ सुविधा परीक्षण गर्ने नीति ल्याएको जनाएको छ ।
एक्सडीए–डेभलपर्सका अनुसार परीक्षणका रुपमा यो सुविधा विशिष्ट (प्रिमियम) ग्राहकलाई मात्र उपलब्ध हुनेछ ।
केही छानिएका गूगल प्रयोगकर्ताले यी सुविधाहरु परीक्षण गरिसकेको दी भर्जले जनाएको छ । प्रिमियम ग्राहकले युट्युब प्रयोग गर्दा भिडियो, आवाज, आवाज मार्फत खोजी र अन्य भाषासम्बन्धी फिल्टरहरु प्रयोग गर्न पाउने छन् ।
प्रिमियम सेवा लिन ग्राहकले प्रति महिना करिब १२ अमेरिकी डलर तिर्नु पर्नेछ । ग्राहकले विज्ञापन रहित, पृष्ठभूमिका अन्य सामग्री हटाएर पनि भिडियो हेर्न सक्नेछन् भने युट्युब म्युजिक च्यानलमा समेत अलग पहुँचको सुविधा लिन सक्नेछन् ।
काठमाडौं । चिकित्साशास्त्रतर्फ यस वर्षको नोबेल पुरस्कार हेपाटाइटिस सी भाइरस पत्ता लगाउने तीनजना वैज्ञानिकहरूलाई दिने घोषणा सोमवार गरिएको छ ।
हार्भे जे अल्टर, माइकल हफ्टन र चार्ल्स एम राइसलाई पुरस्कार दिने घोषणा नोबेल पुरस्कार समितिले गरेको हो ।
यी वैज्ञानिकहरूको आविष्कारका कारण हेपाटाइटिस सी भाइरसको उपचार सम्भव भएको छ । उनीहरूले हेपाटाइटिस दीर्घरोगका केसहरूको कारण पत्ता लगाएका थिए । त्यसलगत्तै रगतको परीक्षण तथा नयाँ औषधिहरू सम्भव बने र लाखौं जीवन जोगिए ।
रगतमा हुने हेपाटाइटिस संसारकै प्रमुख स्वास्थ्य समस्या हो जसले गर्दा सिरोसिस अर्थात् आन्तरिक रक्तस्राव र कलेजोको क्यान्सर हुन्छ ।
नयाँ दिल्ली । संसारभर कोरोना भाइरसका सन्दर्भमा विभिन्न अध्ययन अनुसन्धान जारी छ । यस दौडमा भारतले परीक्षणमा छिटो हुने गरी प्रविधि विकास गरेको छ । भारतीय वैज्ञानिकहरुका अनुसार भारतमा अब परीक्षणको नतिजा एक घण्टा भित्रै प्राप्त हुनेछ ।
यसको मूल्य समेत सस्तो हुने बताइएको सस्तो र छिटो परीणाम आउने कोरोना भाइरसको परीक्षण गर्ने प्रविधिको विकास भएको भारतीय संचारमाध्यमले जनाएका छन् । यो प्रविधि गर्भ रहे नरहेको परीक्षण गर्ने प्रेग्नेन्सी टेस्ट किटसँग मिल्दोजुल्दो छ ।
जसले परिणाम समेत तीव्र गतिमा दिनेछ । प्रविधिको विकास अनुवांशिक सम्पादन प्रविधि सम्बन्धी वैज्ञानिकहरुको संस्था किस्परले यसको आविश्कार गरेको हो । यस प्रविधिलाई फिलुदा नाम दिइएको छ ।
एक घन्टाभित्र नतिजा आउने र शुल्क पनि मात्र ५ सय पर्र्ने हुँदा कोरोनाको फैलावट रोक्न सहयोग पुग्ने वैज्ञानिकहरुको दावि छ । हालसम्म ६६ लाखभन्दा बढी मानिसमा कोरोना पुष्टी भइसकेको छ । १ लाख २ हजार मानिसको ज्यान गएको छ ।
काठमाडौं । दशैं नजिकिएसँगै बजारमा प्रशासनको सक्रियतासमेत बढेको छ । बजार अनुगमन तीव्र भएको छ । यसै सन्दर्भमा उत्पादनपछि प्रयोग गर्ने अवधि सकिएका खाद्य पदार्थको प्याकेटमा नयाँ मिति राखेर बजारमा पठाउने धन्दा नै चलेको पाइएको छ ।
यसले काठमाडौंको बजारमा म्याद गुज्रेका सामानको विगविगी रहेको खुलेको छ । आइतबार केक र बेकरीका कच्चा पदार्थको म्याद सकिएपछि पुनः नयाँ लेबल (नयाँ उत्पादन तथा उपभोग्य मिति) राखेर बजार पठाउने एक ठूलो गोदाममा प्रहरीले छापा हानेको छ ।
यस्तो धन्दामा संलग्न काठमाडौंको कलंकीस्थित एक गोदामबाट चार जना पक्राउसमेत परेका छन् । यस्तो धन्दा पाँच तले घर नै भाडामा लिएर हुने गरेको पाइएको हो । एएसटी प्रालिले १४ सय प्रकारका त्यस्ता कच्चा पदार्थमा पुनः नयाँ मिति राख्ने गरेको महानगरीय प्रहरी वृत्त कालिमाटीले जनाएको छ ।
गोदाममा कार्यरत अनिलकुमार बंका, आनन्दकुमार अवस्थी, रस्मिता श्रेष्ठ र विनोद ओझा पक्राउ परेका छन् । घटनाको अनुसन्धान भइरहेको बताइएको छ । पक्राउ परेका अवस्थी लेखापाल, श्रेष्ठ क्वालिटी म्यानेजर र ओझा स्टोर किपर हुन् ।
तर, कम्पनीका संचालक भने पक्राउ परिसकेका छैनन् । प्रविन बंका र किरणदेवी अग्रवाल कम्पनीका सञ्चालक हुन् । उनीहरुको खोजी भइरहेको छ ।
पाँच तले घरको तीनवटा फ्ल्याटमा केक र यसका कच्चा पदार्थको पुनः मिति लेख्न व्यवस्थित रुपमा काम हुने गरेको तथ्य फेला परेको हो । बेकरी बनाउन तथा यसको सौन्दर्यका लागि प्रयोग हुने तेल, केकको पिठो, चेरी तथा चकलेट गोदामबाट प्रहरीले बरामद गरेको छ ।