Category: विश्व

काठमाडौं (बीबीसी) । मस्कोले दिएको समयसीमाभन्दा अगावै युक्रेनी सरकारले निरन्तर आक्रमणमा परिरहेको मारिओपोल सहरमा आत्मसमर्पण नगर्ने जबाफ दिएको छ। आत्मसमर्पण गरेर हतियार त्यागे लडाकु र गैरसैनिकलाई सुरक्षित मार्ग दिने रुसले भनेको थियो। युक्रेनकी उपप्रधानमन्त्री इरिना भेरेस्चुकले आफ्ना सैनिकले हतियार त्याग्ने प्रश्नै नउठ्ने बताएकी छन्। रुसले आत्मसमर्पण गर्न दिएको समयसीमा सकिनु घण्टौँ अगाडि नै उनले त्यसो भनेकी हुन्। मस्कोले सोमवारबाट त्यहाँ सुरक्षित मार्ग खोलिदिने बताएको छ। कोही बाँकी रहे उनीहरूले सैन्य अदालतको सामना गर्नुपर्ने पनि उसले चेतावनी दिएको छ।

तर मारिओपोल सहरका मेयरका एकजना सल्लाहकारले बीबीसीसँग कुरा गर्दै मस्कोको प्रस्ताव विश्वास गर्न नसकिने भन्दै अन्तिमसम्म लडिरहने बताएका हुन् । दक्षिणी बन्दरगाह सहर मारिओपोलमा रुसले हप्तौँदेखि घेराबन्दी तथा निरन्तर आक्रमण गरिरहेको छ। राजधानी किएभस्थित सम्वाददाता लीज डुसेटले त्यसलाई पूरै सहरलाई भोकभोकै पारेर आत्मसमर्पणका निम्ति बाध्य पार्ने सैन्य रणनीति भनेकी छन्।

यसबीच मस्कोस्थित रक्षा मन्त्रालयले मारिओपोलमा डरलाग्दो मानवीय सङ्कट उत्पन्न भइरहेको स्वीकारेको छ। रुसी बमबारीका कारण मारिओपोल सहर लगभग ध्वस्त भइसकेको बताइएको छ। आइतबार राजधानी किएभमा पनि ठूल्ठूला विस्फोटहरू भएका छन्। त्यहाँका मेयरका अनुसार कैयन् घरहरू तथा एक किनमेल केन्द्र समेत निसानामा परेका छन्।

काठमाडौं । रुसले युक्रेनमा गरेको हमलायता त्यहाँ कम्तिमा ६४ जना बालबालिकासहित ८४७ जनाको मृत्यु भएको पुष्टी गरिएको छ । संयुक्त राष्ट्रसङ्घको मानवअधिकारसम्बन्धी निकायले युक्रेनमा आक्रमण सुरु भएदेखि हालसम्म उक्त मानवीय क्षतिको पुष्टी भएको जनाएको छ । अन्तर्राष्ट्रिंय संचारमाध्यमहरुका अनुसार यो संख्या अझ ठूलो पनि हुन सक्छ । किनकी युद्ध जारी रहेका कारण सबै स्थानमा स्वतन्त्रपूर्वक खोजी हुन सकेको छैन ।

ज्यान गुमाएका गैरसैनिकमध्ये अधिकांश गोलाबारी र हवाई आक्रमणबाट मारिएको जनाइएको छ । युक्रेनकी उपप्रधानमन्त्री इरिना भेरेश्चुकले ३३ लाखभन्दा बढी शरणार्थी युक्रेनको पश्चिमी सीमा पार गरेर अन्यत्र भागेको बताएकी छिन् । उनका अनुसार करिब २० लाखभन्दा बढी मानिस देशभित्रै विस्थापित भएका छन्। उता, रुसले विभिन्न सहरमा आक्रमण जारी राख्दा युक्रेनी राष्ट्रपति जेलेन्स्कीले भने पुटिनसँग अविलम्ब वार्ताका लागि अघि सर्न आह्वान गरेका छन्।

काठमाडौं । अफगानिस्तान र सिरिया युद्धभन्दा पनि क्षतिको हिसाबले रुसलाई यूक्रेन युद्ध महँगो बनेको छ । बिबिसीको रिपोर्टअनुसार यूक्रेनमा मानवीय र आर्थिक हिसाबले रुसले धेरै मूल्य चुकाइरहेको छ । रुस–यूक्रेनबीचको युद्ध तत्कालै अन्त्य नहुने देखिएको बेला रुसलाई थप क्षति हुने सम्भावना छ ।

युक्रेनका राष्ट्रपति भोलोडिमिर जेलेन्स्कीले आफ्नो सम्बोधनमा पनि रुस फिर्ता हुने अवस्थामा रहेको बताए । “रुसी सेनाले युक्रेनमा जति क्षति बेहोर्नु परेको छ, त्यो न सिरियामा न चेचन्यामा।

सोभियत सेनाले अफगानिस्तानमा पनि यति क्षति बेहोरेको थिएन”, रूसी भाषामा सम्बोधन गर्दै जेलेन्स्कीले भने, “रुस सेना यूक्रेनबाट फिर्ता हुनुको विकल्प छैन, उनीहरु ज्यान जोगाउन पनि फिर्ता हुनुपर्छ ।”

युक्रेनी राष्ट्रपतिको विश्लेषण रुस सबै हिसाबले हारिसकेको छ । चौतर्फी प्रतिबन्धको सामना गरिरहेको रुस बाध्यतात्मक रुपमा फिर्ता हुन्छ ।

यूक्रेन युद्धमा कुन पक्षलाई कति क्षति भयो भन्ने त स्पष्ट छैन तथापि दुवै पक्षका थुप्रै सैनिक मारिएका छन् । सञ्चार माध्यमका अनुसार यूक्रेन युद्धमा रुसी पक्षका झण्डै ७ हजारभन्दा बढी सैनिक मारिएका छन् ।

अन्य तथ्यांकका अनुसार अफगान युद्ध ९१९७९–८९० मा करिब १५,००० सोभियत सैनिक मारिएका थिए र चेचन्या युद्धमा कम्तिमा १३,००० रुसी सैनिक मारिएका थिए। सिरियामा यो संख्या सयौंमा छ ।

काठमाडौं । अमेरिका र युरोपेली देशहरुको प्रतिबन्ध सामना गरिरहेको रुसले सयौं व्यवसायिक विमान कब्जा गरेको छ । रुसले आफ्नो देशका वायु सेवा कम्पनीहरुले भाडामा ल्याएका अमेरिका र युरोपेली कम्पनीका सयौं व्यावसायिक विमान कब्जामा लिएको हो ।

युक्रेनमा आक्रमण गरेपछि लागेको प्रतिबन्धका कारण रुसी एयरलाइन्स कम्पनीले भोगेका चुनौती सामना गर्ने उपाय खोज्ने क्रममा रुसले कानून नै बनाएर अमेरिका र युरोपबाट भाडामा ल्याएका विमानहरु कब्जा गरेको हो ।

रुसी राष्ट्रपति भ्लादिमिर पुटिनले सरकारको प्रतिबन्ध विरोधी उपाय सम्बन्धी कानूनमा हस्ताक्षर गरेका छन् । यो कानून अनुसार अब रुसी एयरलाइन्स कम्पनीले विदेशी कम्पनीबाट भाडामा लिएका विमान रुसमा दर्ता गर्न अनुमति दिएको छ । ती विमान रुसी एयरलाइन्सले आन्तरिक रुटमा उडाउन पाउने छन् ।

अमेरिका र युरोपका अधिकांश देशहरुले रुसमाथि प्रतिबन्ध लगाएका छन् । जुन प्रतिबन्ध अनुसार रुसी वायु सेवा कम्पनीलाई भाडामा विमान दिने अमेरिकी र युरोपेली कम्पनीले एक महिना भित्रमा फिर्ता गर्नु पर्ने छ ।

तर रुसले बनाएको नयाँ कानून अनुसार अब विदेशी कम्पनीहरूलाई रुसी सरकारको स्वीकृति बिना आफ्ना विमान पुनः दाबी गर्न कठिन भएको छ ।-एजेन्सी

टोकियो (एपी) । उत्तरी जापानको फुकुशिमाको तटमा बुधबार साँझ आएको शक्तिशाली ७.३ म्याग्निच्युडको भूकम्पपछि सुनामीको सूचना जारी भएको छ । भुकम्पका कारण विद्युत आपूर्ति बन्द हुँदा टोकियो क्षेत्रमा रहेका २० लाखभन्दा बढी घरमा अन्धकार छाएको छ । भुकम्प गएको यो क्षेत्र उत्तरी जापानको भाग हो जुन ११ वर्षअघि ९.० रेक्टर स्केलको भूकम्प र सुनामीले क्षतिग्रस्त भएको थियो ।

भूकम्पले फुकुशिमा प्रीफेक्चरलाई असर गरेको एसोसिएटस् प्रेसको लागि मारी यामागुचीले जनाएका छन । प्रीफेक्चर एउटा ठूलो आणविक उर्जा केन्द्र हो जहाँ २०११ को भूकम्पले ठूलो विपत्ति ल्याएको थियो । बुधबार गएको शक्तिशाली भूकम्पले भवनहरू हल्लाएको थियो । यहाँ रेल सेवा समेत अवरुद्ध भएको छ ।

काठमाडौं । रुस र युक्रेनबीचको युद्धपछि निरन्तर रुससँग लडिरहेका युक्रेनका राष्ट्रपति भोलोदिमिर जेलेन्सकीसँग पहिलो पटक अन्तर्राष्ट्रिय नेताले औपचारिक रुपमा भेट गर्न सफल भएका छन् । बीबीसीका अनुसार रुसी आक्रमण चर्किएसँगै युक्रेनको साथमा उभिनका लागि पोल्याण्डदेखि किएभसम्म लामो खतरनाक रेल यात्रा गरेर पुगेका तीन जना युरोपेली नेताहरूको युक्रेनले प्रशंसा गरेको छ।

मङ्गलवार साँझ किएभमा कर्फ्यु लागु रहेकै बेला पोल्याण्ड, स्लोभेनिया र चेक गणतन्त्रका प्रधानमन्त्रीहरूले युक्रेनी राष्ट्रपति भोलोदिमिर जेलेन्सकीसँग भेट गरेका थिए। ‘हामी तपाईँहरूको साहसी लडाइँको प्रशंसा गर्छौँ,’ भेटपछि सामाजिक सञ्जाल ट्विटरमा पेत्र फियालाले लेखेका छन्, ‘हामीलाई थाहा छ तपाईँहरूको हाम्रो जीवनका लागि पनि लडिरहनु भएको छ। तपाईँहरू एक्लो हुनुहुन्न। हाम्रा देशहरू तपाईँका साथमा छन्।’

पोल्याण्डका प्रधानमन्त्री मातेउस मोराभिएत्सकीले आफूहरूले युक्रेन गुमाए युरोप अहिलेको जस्तै नहुने टिप्पणी गरेका छन्। मोराभिएत्सकी, फियाला र स्लोभेनियाका यानेस यान्सा गत फेब्रुअरी २४ तारिखमा रुसले आक्रमण सुरु गरेयता युक्रेनका राष्ट्रपति भोलोदिमिर जेलेन्सकीलाई भेट्ने प्रथम अन्तर्राष्ट्रिय नेता हुन्।

किएभमा युरोपका तीन नेताहरूसँग छलफल भइरहेका बेला ठूलो विस्फोटनको आवाज सुनिएको थियो। युक्रेन पुगेका नेताहरूले आफूहरूसँग कुनै निश्चित म्यान्डेट नरहेको तर फ्रान्समा गत हप्ता भएको युरोपेली सङ्घको सम्मेलनका क्रममा उल्लेख गरिएका कारण ब्रसल्सका नेताहरूलाई भ्रमणको जानकारी रहेको बताए।

काठमाडौं । अमेरिकाले रुसलाई कुनै पनि किसिमको आर्थिक वा सैन्य सहायता उपलब्ध नगराउन चीनलाई चेतावनी दिएको छ। बीबीसीका अनुसार रुसले चीनसँग त्यस्तो सहायता मागेको अमेरिकी अधिकारीहरूले भिन्नाभिन्नै पत्रिकाहरूलाई बताएका छन्। तर चीनका एक अधिकारीले आफूहरू लडाइँ नचर्कोस् भन्ने पक्षमा रहेको बताए। अमेरिकाले रुसलाई थप आर्थिक मद्दत नगर्न चीनलाई चेतावनी दिएको हो।

अमेरिकी राष्ट्रिय सुरक्षा सल्लाहकार जेक सुलिभानले रुसलाई पश्चिमा प्रतिबन्धहरूबाट जोगाउने कुनै कोसिस बेइजिङले गर्न नहुने बताएका छन्। सोमवार उनले चीनका वरिष्ठ विदेश नीति अधिकारी याङ जेइचीसँग रोममा भेट्दैछन्। फाइनान्सियल टाइम्स र वाशिङ्टन पोस्ट पत्रिकामा आएका विवरणअनुसार युक्रेन अतिक्रमण सुरु भएदेखि नै रुसले बेइजिङसँग त्यस्तो मद्दत मागेको थियो।

तर विवरणमा रुसले कस्तो प्रकारका अस्त्र सहायता खोजेको हो भन्ने बताइएको छैन। ती विवरणमा चीनले मद्दतको तयारी गरिरहेको पनि उल्लेख गरिएको छ। वाशिङ्टनस्थित चिनियाँ दूतावासका प्रवक्ताले मस्कोले हतियार मागेको बारे आफूहरूलाई कुनै जानकारी नभएको बताए। उनले चीनको मुख्य प्राथमिकता लडाइँ चर्कन नदिनु नै रहेको बताए।

काठमाडौं । युक्रेनका राष्ट्रपति भोलोदिमिर जेलेन्स्कीले रुसले युक्रेनमाथि आक्रमण गरेपछि अहिलेसम्म १,३०० युक्रेनी सैनिक र झन्डै १२,००० रुसी सैनिकको मृत्यु भएको दाबी गरेका छन्। एउटा पत्रकार सम्मेलनमा बोल्दै उनले शुक्रवारसम्म झन्डै ५०० देखि ६०० रुसी सैनिकले युक्रेनमा आत्मसमर्पण गरेको बताएको बीबीसीले लेखेको छ । जेलेन्स्कीले युद्धमा ज्यान गुमाउने रुसी सैनिकको सङ्ख्या ठूलो भएको भए पनि आफू त्यसप्रति खुसी नभएको बताए। रुसले युक्रेनमा आक्रमण गरेको १७ दिन भइसकेको छ।

अठारौँ दिन बिहान विभिन्न सहरहरूमा विस्फोटन भइरहेको विवरण प्राप्त भएको छ। केही दिनअघि अमेरिकाले दुई साताको अवधिमा झन्डै ५,००० देखि ६,००० रुसी सैनिकको मृत्यु भएको अनुमान गरेको थियो। मृतकको अनुमानित सङ्ख्याका आधारमा घाइते हुने सैनिकको सङ्ख्या १५,००० देखि १८,००० भएको बताइएको थियो। प्रायः युद्धमा घाइते सैनिकको सङ्ख्या मृतकको सङ्ख्या भन्दा तीन गुना हुने गर्छ।

काठमाडौं । साउदी अरबमा एकैदिन ८१ जनालाई मृत्युदण्ड दिइएको समाचार एजेन्सीहरुले पुष्टी गरेका छन् । बिबिसीका अनुसार शनिबार उनीहरूलाई फाँसी दिइएको छ । मृत्युदण्ड पाउनेमा सात जना यमनका नागरिक र एक जना सिरियाली छन् । स्लामिक स्टेटमा आवद्ध भई आतंकवादी गतिविधि गरेको अभियोग उनीहरुमाथि लागेको थियो ।

मृत्युदण्ड पाउनेहरुले साउदी नागरिकमाथि महत्वपूर्ण आर्थिक क्षेत्रमा आक्रमणको योजना बनाएको, सुरक्षाकर्मीलाई हत्या गरेको, अपहरण, बलात्कार र हतियारको अवैध कारोबार गरेको आरोप समेत रहेको छ । साउदी संसारमै बढी मृत्युदण्ड दिने मुलुकमध्ये एक हो । खासगरी आलोचकहरुलाई साउदीले दवाउने गरेको आरोप लाग्छ ।

काठमाडौं । युक्रेनमाथि रुसी आक्रमणको १७औँ दिन शनिवार पनि आक्रमण जारी रह्यो । शनिबार निकोलेभ, निप्रो र क्रोपीभीन्टस्की शहरमा बम विस्फोट भएका खबर प्राप्त भएको बीबीसीले लेखेको छ । जर्मन चान्सलर ओलाफ सोल्ज र फ्रान्सका राष्ट्रपति एमानुएल माक्रोँले रुसी राष्ट्रपति भ्लादिमिर पुटिनलाई युक्रेन द्वन्द्वमा तत्काल युद्धविरामका लागि सहमति जनाउन आग्रह गरेका छन्।

युक्रेनमा जारी युद्ध रोक्ने अन्तर्राष्ट्रिय पहलको क्रममा उनीहरूबीच शनिवार ७५ मिनेट लामो टेलिफोन वार्ता भएको सोल्जका प्रवक्ताले बताएका छन्। युक्रेनका राष्ट्रपति भोलोदिमिर जेलेन्सकीले युद्धविराम नभएसम्म रुससँग कुनै पनि छलफल अघि बढ्न नसक्ने बताएका छन्। पत्रकार सम्मेलनमा उनले १,३०० युक्रेनी फौजको मृत्यु भएको जानकारी दिए। तर यसको स्वतन्त्र पुष्टि हुन सकेको छैन।

रुसी फौजले मेयरको अपहरण गरेको विरोधमा युक्रेनको दक्षिणपूर्वी सहर मेलिटोपोलमा सयौँले प्रदर्शन गरेको समेत बताएका छन् । राष्ट्रपति जेलेन्सकीले मेयरलाई तत्काल रिहा गर्न माग गर्दै रुस आतङ्क नयाँ चरणमा अघि बढेको आरोप लगाए ।

काठमाडौं । रुस युक्रेन युद्धका कारण युक्रेनबाट विस्थापित हुनेको संख्या २५ लाख नाघेको छ । संयुक्त राष्ट्रसङ्घका शरणार्थीसम्बन्धी उच्चायुक्त फिलिपो ग्रान्डीले यस्तो जानकारी गराएका हुन् । बीबीसीका अनुसार तीमध्ये झण्डै १,१६,००० तेस्रो देशका नागरिक हुन् । समाचार संस्था एएफपीका अनुसार झण्डै २० लाख मानिसहरू युक्रेन भित्रै विस्थापित बनेका छन् । रुसले युक्रेनेका लुट्स र नीप्रो सहरमा पहिलो पटक आक्रमण गरेको छ ।

शुक्रवार रुसी सेनाले युक्रेनको दुई फरक दिशामा रहेका सहरमा आक्रमण गरेको विवरणहरू आएका छन्। युक्रेनी टीभी र सञ्चारमाध्यमहरूले उत्तर(पश्चिममा रहेको लुट्स र मध्य(पूर्वमा रहेको नीप्रो सहरमा विस्फोटहरू भएको बताएका छन्। लुट्सका नगरप्रमुखले विस्फोट भएको पुष्टि गर्दै सबैलाई सुरक्षित स्थानमा बस्न फेसबुकमा लेखेका छन्। उनले नागरिकलाई आफ्नो तस्बिर, ठेगाना र अन्य विवरण प्रकाशन नगर्न अनुरोध गरेका छन्।

नीप्रोमा तीन स्थानमा विस्फोट भएको बताइएको छ। नीप्रोमा विस्फोटका तस्बिरहरू युक्रेनले सार्वजनिक गरेको छ। रुसी रक्षा मन्त्रालयले लुट्स र अर्को पश्चिमी सहर इभानोफ्रान्किभिस्कमाथि आक्रमण गरेको पुष्टि गरेको रुसी समाचार माध्यमले जनाएका छन्।

काठमाडौं । रुसी राष्ट्रपति भ्लादिमिर पुटिनले पश्चिमा मुलुकले रुस माथि लगाएको प्रतिवन्धले रुसलाई सकारात्मक प्रभाव नै पार्ने बताएका छन् । पुटिनले रुसको एक मुख्य साझेदार बेलारुसका नेता अलेक्जेन्डर लुकासेन्कोसँग मस्कोमा भेट्दै यस्तो बताएका हुन् । उनले रुसविरुद्ध लगाइएका प्रतिबन्धले आफ्नो देशमा सकारात्मक प्रभाव पार्ने बताएका हुन् । अर्थतन्त्र र प्रविधिको सम्प्रभुतालाई बलियो बनाउन यस्तो प्रतिवन्धको समय अवसरका रुपमा रहेको उनको दावि छ ।

रुसी र युक्रेनी अधिकारीहरूबिच जारी वार्तामा ‘सकारात्मक’ विकासक्रम देखिएको समेत उनले बताएको अतर्राष्ट्रिय संचारमाध्यमले लेखेका छन् । केही सकारात्मक संकेत आफुले पाएको भन्दै उनले आशा व्यक्त गरेको समेत समाचार छ । युक्रेन(बेलारुस सीमामा दुई पक्षका टोलीबिच तीन चरणमा वार्ता भएका छन् । उता, बिहीबार युक्रेन र रुसका विदेशमन्त्रीबीच टर्कीमा भेट वार्ता भएको छ । यी वार्ता निष्कर्षमा भने पुगेको छैन ।

काठमाडौं । युक्रेन र रुसबीचको युद्ध केही दिनयता मथ्थर भएजस्तै देखिएको छ । यद्दपी पश्चिमा मुलुकहरुले भने रुसी फौज अब युक्रेनको राजधानी किएभ कब्जा गर्न त्यसतर्फ लागिरहेको बताउँछन् । राजधानी नजिकै पुनः तैनाथ भइरहेको भूउपग्रह तस्वीरबाट देखिएको बीबीसीले लेखेको छ । त्यसलाई युक्रेनी राजधानीतर्फ बढ्ने रुसी फौजको ताजा प्रयासको रूपमा हेरिएको छ। म्याक्सआर टेक्नोलोजिजका अनुसार आसपास नगरका तैनाथी क्षेत्रतर्फ रुसी लस्कर बढेको छ।

त्यो लस्कर यसअघि एन्टोनोभ विमानस्थलनजिक पश्चिमोत्तर क्षेत्रमा देखिएको छ । रुसले युक्रेनमा सोचेभन्दा ठूलो सैन्य क्षति बेहोरेको छ । सोहीकारण उसले केही दिन युद्ध कम गरि आफ्नो शक्ति बढाउन चाहन्थ्यो । त्यो पुरा भएसँगै रुसी फौज राजधानी कब्जाका लागि अगाडी बढेको अनुमान गरिएको छ ।