Category: विश्व

लण्डन । बेलायती महारानी एलिजाबेथ द्वितीयाका पति राजकुमार फिलिपको अन्तिम संस्कार सम्पन्न भएको छ । बीबीसीका अनुसार उनको विन्ड्सर कासल परिसरमा रहेको सेन्ट जोर्जेज् च्यापलमा अन्तिम संस्कार गरिएको हो । राजकुमार फिलिपको शवलाई त्यहाँस्थित रोयल भल्टमा समाधिस्थ गरिएको छ।

राजपरिवारका सदस्यको उपस्थितिमा उनको अन्तिम संस्कारको कार्यक्रम सम्पन्न भएको हो । अन्तिम संस्कारको विधि गरिएको बेला सेन्ट जोर्जेज् च्यापलको क्वाईरको अग्रभागमा महारानी एलिजाबेथ एक्लै बसेकी थिइन्। राजकुमार फिलिपको गत शुक्रवार एप्रिल ९ का दिन ९९ वर्षको उमेरमा विन्ड्सर कासलमा निधन भएको हो ।

उनको शव प्राइभेट च्यापलबाट सेन्ट जोर्जेज् च्यापलसम्म लगिँदा राजपरिवारका प्रमुख सदस्यहरू शवपेटिका राखिएको ल्यान्ड रोभर कारको पछाडी हिँडेको बीबीसीले जनाएको छ । अन्तिम संस्कारका क्रममा बेलायतभर एक मिनेट मौनधारण गरिएको छ । राजकुमार फिलिपको निधन घोषणा भएयता महारानी एलिजाबेथ द्वितीया पहिलो पटक सार्वजनिक रूपमा देखा परेकी छन् ।

लण्डन । अघिल्लो शुक्रवार ९९ वर्षको उमेरमा निधन भएका महारानी एलिजाबेथ द्वितीयाका पति राजकुमार फिलिपको अन्तिम संस्कार आज हुँदैछ । नेपाली समय अनुसार साँझ पौने ८ बजेको साइतमा उनको अन्तिम संस्कार हुने बीबीसीले जनाएको छ । त्यसका लागि आवश्यक तयारीको काम पुरा भएको छ । अन्तिम संस्कारमा सर्वसाधारण सहभागी हुन सक्ने छैनन् । तर, यो कार्यक्रमको टेलिभिजनबाट प्रत्यक्ष प्रसारण हुनेछ ।

अन्तिम संस्कारको औपचारिक शाही समारोह विन्डसर कासल परिसरमा रहेको सेन्ट जोर्जेज् च्यापलमा हुने भएको छ । राजकुमार फिलिपको शव यतिखेर विन्डसर कासलस्थित प्राइभेट च्यापलमा राखिएको छ। राजकुमार फिलिपले आफ्नो अन्तिम संस्कारका बेला धेरै कोलाहल नगर्न र आफ्नो शवपेटिकालाई सर्वसाधारणले हेर्नेगरी समेत नराख्न अनुरोध गरे अनुसार नै अन्तिम संस्कारको योजना बनाएको बीबीसीले लेखेको छ ।

कोरोना भाइरससम्बन्धी प्रतिबन्धका कारण बेलायतमा सामाजिक दूरी कायम गर्दै ३० जना मानिस मात्र एक ठाउँमा भेला हुन पाउने नियम छ । आमन्त्रितको सूचीमा महारानी र ड्यूक अफ एडिन्बराका परिवारका सदस्यहरूसहित उनका तीन जर्मन नातेदार रहेका छन्। उनका नाति ड्यूक अफ ससिक्स राजकुमार ह्यारी उक्त समारोहमा सहभागी हुँदैछन् ।

तोकिएको सङ्ख्यामा शवपेटिका बोक्ने मानिस र पादरी समावेश छैनन् । शनिवार राजकुमार फिलिपको शवपेटिकालाई निजी च्यापलबाट विन्ड्सर कासलको राजकीय प्रवेशद्वारमा सारिनेछ। आफ्नो विशेष कार स्टेट बेन्टलीमा सवार महारानी शवयात्राको पछिल्तिर रहने बताइएको छ । ड्यूकको सम्मानमा देशभरि एक मिनेट मौनधारण गरिनेछ। मौनधारण अवधिको आरम्भ र अन्त्यको सङ्केत द किङ्स ट्रूप रोयल होर्स आर्टिलरीले तोप पड्काएर दिने बीबीसीमा उल्लेख छ ।

झापा । पश्चिम बंगालमा ४ वैशाखमा हुने आम निर्वाचनलाई ध्यानमा राख्दै आजबाट नेपाल र भारतका दुई पूर्वी नाका बन्द गरिएको छ । बिहीबार बिहानदेखि ७२ घण्टा सम्म लागु हुने गरी नाका सिल गर्न लागिएको राससले जनाएको छ । राज्य सभाको निर्वाचनको तयारीमा पश्चिम बंगाल रहेको छ ।

झापाका प्रमुख जिल्ला अधिकारी श्रवणकुमार तिम्सिनाका अनुसार वैशाख ४ गते बेलुका ६ बजेसम्म नाका बन्द हुने छ । यस अवधिमा यातायात र मानिसहरुको आवतजावत रोकिदैछ । दुबै मुलुकमा हुने निर्वाचनका बेला यसरी नाका बन्द गर्ने प्रचलन रहेको छ । पश्चिम बंगालमा हुने आम निर्वाचनले सीम क्षेत्रका नेपाली र भारतमा रहेका नेपाली भाषी नेपालीलाई समेत ठूलो प्रभाव पर्छ ।

लण्डन । बेलायती महारानी एलिजाबेथ द्वितीयका पति प्रिन्स फिलिपको अन्त्येष्टिमा प्रधानमन्त्री बोरिस जोन्सनले नजाने निर्णय लिएका छन् । आफु नजाँदा राजपरिवारका थप एक सदस्य अन्तिम संस्कारमा सहभागी हुन सक्ने भन्दै उनले यस्तो निर्णय लिएको बीबीसीले लेखेको छ ।

बेलायतमा कोरोना भाइरसको महामारीका कारण कडा प्रतिवन्ध छ । यहाँ सार्वजनिक स्थलमा ३० जना भन्दा बढी मानिस सहभागी हुन नपाउने नियम छ । सोहीकारण अन्त्येष्टी समारोहमा राजपरिवारका सदस्यलाई सहभागी हुन सजिलो होस भनी आफु नजाने निर्णयमा प्रधानमन्त्री पुगेका हुन् । उनी राजसंस्थालाई हित हुने गरी निर्णय लिने नेता हुन् ।

प्रिन्स फिलिपको गत शुक्रबार ९९ वर्षको उमेरको निधन भएको हो । अप्रिल १७ मा विन्डसर कासलको सेन्ट जर्ज चापेलमा उनको अन्त्येष्टिको तयारी गरिएको छ । प्रिन्स फिलिपका नाति–नातिना, पनाति–पनातिनाका साथै अन्य नजिकका व्यक्ति मात्र सहभागी हुनेछन् ।

उनको अन्तिम बिदाईमा आम मानिसहरु सहभागी हुन चाहन्छन् । तर, कोराना महामारीका कारण उनीहरुलाई टाढा नै रहन भनिएको छ । दरवारले आफ्नो भवना अनलाइनबाटै व्यक्त गर्न र च्यारिटीमा सहभागी हुन समेत नागरिकमा आह्वान गरेको छ ।

काठमाडौं\एजेन्सी । म्यानमारमा सेनाको सैन्य कु विरुद्धको आन्दोलनमा त्यहाँको सुरक्षाकर्मीले प्रदर्शनकारीमाथि हिंसा जारी राखेको सोही क्रममा शुक्रबार र शनिबार दुई दिनको अवधिमा करीव १ सय मानिसको ज्यान गएको छ । त्यसमध्ये कम्तीमा एक दर्जन प्रहरी रहेको अन्तर्राष्ट्रिय संचारमाध्यमले जनाएका छन् ।

शुक्रबार यंगुन सहरनजिकै भएको प्रदर्शनमा सुरक्षाकर्मीले अन्धाधुन्ध गोली चलाएको थियो । त्यस घटनामा कम्तिमा ८० जना प्रदर्शनकारी मारिएको आंकडा आएको छ । केही मानिस घाइते भएका कारण मृतकको संख्या बढ्न सक्ने बताइएको छ ।

बागो शहरको यो घटनामा मारिएका मानिसको लास एकै थुप्रो बनाएर राखिएका कारण एकिन तथ्यांक समेत नआएको एएफपीले लेखेको छ । उक्त क्षेत्रमा सर्वसाधारणलाई जान समेत दिइएको छैन ।

उता, आदिवासी विद्रोहीको एक सशस्त्र समुहले सान प्रान्तको एउटा प्रहरी चौकीमा आक्रमण गर्दा कम्तिमा १० प्रहरी मारिएका छन् । घटना शनिबार बिहान भएको हो ।

१ फेब्रुअरीमा भएको सैनिक कू यता म्यानमारमा ६ सय १८ जना नागरिकको ज्यान गइसकेको छ । त्यसमा १६ जना सुरक्षाकर्मी रहेको बताइएको छ । तर, सेनाले भने सर्वसाधारणको आंकडा कम भएको दावि गरिरहेको छ ।

काठमाडौं । नेपालले भारतबाट खरीद गरेको गरेको कोरोना विरुद्धको खोप छिटो दिन भारत सरकारसँग आग्रह गरेको छ । भारतीय कम्पनी सेरम इन्ष्टिच्यूटसँग नेपालले कुल २० लाख डोज खोप किनेको थियो । तर, १० लाख डोज मात्र प्राप्त भएको छ ।

आज परराष्ट्रमन्त्री प्रदीपकुमार ज्ञवालीले भारतीय समकक्षी एस जयशंकरसँग टेलिफोन वार्ता गगर्दै यस्तो आग्रह गरेका हुन् । ज्ञवालीले भारतीय समकक्षीसमक्ष खोप नेपाल पठाउने वातावरण मनाउन आग्रह गरेको परराष्ट मन्त्रालय स्रोतलाई उदृत गर्दै नेपाली संचारमाध्यमले जनाएका छन् ।

दुई पराराष्ट्रमन्त्रीबीच भारत र नेपालमा पछिल्लो समय बढेको कोरोना भाइरस संक्रमण नियन्त्रणको विषयमा समेत छलफल भएको छ । अहिले भारतमा कोरोना संक्रमण उच्च रहेको छ । यसले नेपालमा पनि जोखिम बढाउने देखिएको छ ।

लण्डन । बेलायतका लागि म्यानमारका राजदूत क्यए वार मिनलाई बेलायतमा दूतावासमै अवरोध गरिएको छ । उनी म्यानमारमा भएको सैन्य कूको विरोधमा थिए । सोहीकारण उनले दूतावासका सैनिक सहचारीको नेतृत्वमा आफूलाई दूतावासबाहिरै राखिएको बताएको अन्तराष्ट्रिय संचारमाध्यमले लेखेका छन् । गत १ फेब्रुअरीमा म्यानमारमा सेनाले सत्ता आफ्नो हातमा लिएको छ ।

उसले नागरिकमाथि निरन्तर दमन गरिरहेको छ । यो कदमको राजदूत मिनले विरोध गर्दै आएका थिए । उनले यो कदमलाई समेत सैनिक कूकै निरन्तरता भएको उल्लेख गरे । दूतावासका अन्य कर्मचारी भित्रै रहेका बेला आफूलाई घन्टौंसम्म प्रवेश रोकिएको उनको भनाई छ ।

बेलायती संचारमाध्यमले भने उनलाई सैनिक सहचारीले नियन्त्रणमै लिएको बताएका छन् । यो घटनापछि बुधबार राजदूत मिनको समर्थनमा दूतावासबाहिर प्रदर्शन पनि भएको छ । उता, बेलायती विदेश मन्त्रालयले समेत म्यानमारी दूतावासमा भएको घटनाको विवरण संकलनको काम गरेको जनाएको छ ।

नयाँ दिल्ली । नेपालको छिमेकी मुलुक भारतमा कोरोना भाइरसको रेकर्ड ब्रेक संक्रमण पुष्टी भएको छ । भारतीय संचारमाध्यमहरुका अनुसार मंगलबार १ लाख १५ हजार भन्दा बढी मानिसमा कोरोना भाइरसको संक्रमण पुष्टी भएको छ । आजतकका अनुसार यो संख्या भारतमा एक दिनमा संक्रमण पुष्टी भएको सबैभन्दा बढी आंकडा हो ।

दैनिक एक लाख भन्दा बढी संक्रमण भेटिएको समेत पछिल्लो एक वर्षयतामा मात्र यो दुई पटक हो । कोरोना भाइरसको नयाँ भेरियन्ट देखा परेसँगै फैलावट समेत तिब्र रहेको छ । मंगलबार भारतपछि ब्राजिल र अमेरिकामा धेरै मानिसमा संक्रमण भएको छ । भारतमा पछिल्लो २४ घण्टामा ६ सय भन्दा बढी मानिसको ज्यान सोही संक्रमणका कारण भएको छ ।

यो सन् २०२१ यताकै बढी हो । भारतमा १ करोड २८ लाख भन्दा बढी मानिसमा कोरोना संक्रमण भएको छ । १ लाख ६६ हजारको मृत्यु भइसकेको बताइएको छ । भारतबाट नेपालमा निर्वाध मानिसहरु आइरहेको सन्दर्भमा कोरोनाको उच्च जोखिममा नेपाल समेत परेको छ ।

जाकार्ता । इन्डोनेसियामा बाढी र पहिरोले वितण्ड मच्याएको छ । यहाँ विभिन्न घटनामा परी कम्तिमा ४४ जनाको मृत्यु भएको खबर आएको छ । इन्डोनेसिया विपत् व्यवस्थापन निकाय, (रादिति अ जाती)लाई उदृत गर्दै अन्तर्राष्ट्रिय संचारमाध्यमले जनाए अनुसार देशको पूर्वी क्षेत्रस्थित नुसा टेङ्गरा प्रान्तमा भीषण वर्षा भएको छ ।

यसले निम्त्याएको बाढी र पहिरोमा परी कम्तिमा ४४ जनाको मृत्यु भएको छ । विभिन्न स्थानमा खोज तथा उद्धारको काम जारी रहेका कारण मानवीय क्षति अझ बढ्न सक्ने समेत जनाइएको छ । बाढी पहिरोले दर्जनौं घर बगेका छन् । ठूलो भौतिक क्षति पुगेको समाचारमा उल्लेख छ ।

घाइतेहरुको स्थानीय अस्पतालमा उपचार जारी छ । उता, इन्डोनेसियामै पश्चिम जाभाको समुद्री क्षेत्रमा शनिबार साँझ एउटा माछा मार्ने डुङ्गा ठूलो पानीजहाजमा ठोक्किएर भएको दुर्घटनामा कम्तिमा १७ जना वेपत्ता भएका छन् । बान्डुङ उद्धार एजेन्सीका प्रवक्ता सेनी उलानडारीले १५ जनालाई उद्धार गरिएको र हराइरहेका अरु १७ जनाको खोजीकार्य जारी रहेको बताएका छन् ।

काठमाडौं\एजेन्सी । ताइवानमा भएको एक रेल दुर्घटनामा कम्तिमा ५० जनाको मृत्यु भएको छ । ताइवानको पूर्वी क्षेत्रमा सुरुङ भित्र यात्रुबाहक रेल दुर्घटनामा परेको हो । ताइवानमा शुरु भएको लामो बिदा मनाउन हिँडेका यात्रुले रेल खचाखच भरिएको बताइएको छ ।

उद्धारकर्ताले सुरुङभित्र च्यापिएका मानिसको उद्धार गरेका छन् । प्रहरीले कम्तीमा ५० जनाको मृत्यु भएको पुष्टी गरेको छ । अरु ७० जना रेलका डब्बाभित्र च्यापिएको बताइएको छ । उद्धारपछि ६० जनालाई अस्पताल लगिएको छ ।

अधिकारीहरुले तटीय शहर हुलियान नजिकको सुरुङ नजिक एउटा मर्मत कार्यमा प्रयोग गरिएको सवारी साधनले तिब्र गतिमा दौडिरहेको रेललाई ठक्कर दिएको अनुमान गरेका छन् ।

हुलियान शहरका प्रहरी प्रमुख चाई डिङ–हेसियानले निर्माण कार्यमा प्रयोग भइरहेको एउटा सवारी साधन रेलको लिकमा खसेका कारण रेल दुर्घटनामा परेको बताएका छन् । स्थानीय संचार माध्यमले रेलको नजिकै एउटा ट्रक क्षतविक्षत अवस्थामा रहेको तस्वीर छापेका छन् । उक्त दुर्घटना स्थानीय समय अनुसार बिहान साढे ९ बजे भएको हो । रेलमा ४ सय ९० यात्रु चढेका थिए ।

काठमाडौं\एजेन्सी । कोरोना भाइरसको उच्च संक्रमण दर र व्यापक मानवीय क्षति भोगेको ब्राजिल राजनीतिक संकटमा समेत फसेको हो । राष्ट्रपति जइर बोल्सोनारुमाथि एक पछि अर्को राजनीतिक सङ्कट थपिएका छन् । सोमवार विदेश तथा रक्षामन्त्री दुवैले राजीनामा दिएका थिए ।

मंगलबार ब्राजिलका तीन वटै तहका सेनाका प्रमुखले सामुहिक राजिनामा दिएका छन् । सेना, नौसैनिक तथा हवाई सेनाका प्रमुखले सामुहिक राजिनामा बुझाएको बीबीसीले लेखेको छ । राष्ट्रपतिले सेनामाथि अनावश्यक दबाव दिने प्रयास गरेको उनीहरुको आरोप छ ।

कोरोनाभाइरसले गरेको क्षति र यसको नियन्त्रणमा सरकारको उदासिनतालाई लिएर यहाँ राष्ट्रपतिमाथि आलोचना बढेको छ । राष्ट्रिपति बोल्सोनारुले कोरोना भाइरसलाई मामुली बताउने गर्थे । उनी दुई वर्षअघि सत्तामा आएका हुन् । कोरोना महामारीमा क्वारेन्टीनसम्बन्धी नियमको आलोचना गरेका उनकै कारण ब्राजिलमा मानिसहरुले अकालमा ज्यान गुमाउन परेको धेरैको धारणा छ।

उनी भने जनस्वास्थ्य सम्बन्धी नियमले अर्थतन्त्रमा नकारात्मक प्रभाव पर्ने बताउँदै आएका छन् । कोरोनाभाइरसका कारण उत्पन्न स्थितिबारे धेरै हल्ला भएको उनको तर्क छ । ब्राजिलमा कोरोना भाइरसको संक्रमणबाट ३ लाख १४ हजार व्यक्तिको ज्यान गइसकेको छ । यो अमेरिका भन्दा दोस्रो बढी मानवीय क्षति हो । यहाँ १ करोड २५ लाखमा सङ्क्रमण पुष्टि भइसकेको छ ।

काठमाडौं\एजेन्सी । म्यानमारमा शनिबार प्रदर्शनकारीमाथि सेनाले अन्धाधुन्ध गोली चलाएको छ । यस क्रममा कम्तिमा ६० जना मारिएको बीबीसीले जनाएको छ । शनिवार यहाँ आर्म फोर्स डे मनाइएको थियो । त्यस क्रममा सेनाले प्रदर्शनकारीमाथि गोली चलाएको हो ।

समाचार सुत्रहरुले जनाए अनुसार ६० जनाको मृत्यु भइसकेको र यस्तो संख्या ९० भन्दा बढी रहेको आंशका गरिएको छ । अमेरिकी दूतावासले म्यानमारमा सुरक्षाबलले निहथ्था मानिसको ज्यान लिएको प्रतिक्रिया दिएको छ ।

आजै सैन्य प्रमुख मिन आंग लाइंगले त्यहाको राष्ट्रिय टेलिभिजनबाट सम्बोधन गर्दै आफु लोकतन्त्रको रक्षाको पक्षमा रहेको र देशमा निर्वाचन हुने बताएका थिए । तर, उनले निर्वाचन कहिले हुन्छ, त्यसबारे भने कुनै बोलेनन् ।

सेनाले फेब्रुअरीमा सत्ता हत्याएसँगै यहाँ हिंसा भड्किएको छ । अहिलेसम्म प्रदर्शनका दौरान ४ सय जना भन्दा बढीको ज्यान गइसकेको छ ।