Category: विश्व

जाम्फारा\नाइजेरिया । नाइजेरियामा अपहरणमा परेका सयौं विद्यार्थी किशोरी रिहा भएका छन् । उनीहरुलाई गत शुक्रबार एक हतियारधारी समुहले विद्यालयबाटै अपहरण गरेको थियो । यसअघि प्रहरीले ३ सय १७ जना किशोरी अपहरणमा परेको बताएको थियो । बीबीसीका अनुसार त्यसमध्ये केही किशोरी भाग्न सफल भएका थिए ।

सोहीकारण कुल अपहरणमा परेका २७९ जना छात्रा रिहा भएका हुन् । त्यहाँको प्रहरीका अनुसार शुक्रबार एक बन्दुकधारीको समूहले जाम्फारा राज्यमा रहेको एक विद्यालयबाट छात्राको अपहरण गर्दै नजिकको जङ्गलमा लगेको थियो । उनीहरु र सरकारी अधिकारीबीच वार्ताका माध्यमबाट शान्तीपूर्ण रुपमा छात्रालाई छाड्ने वातावरण बनेको हो ।

जाम्फारा राज्यका गभर्नर बेले मटावाले ट्वीट गर्दै अपहरणमा परेका छात्राहरूलाई रिहा गरिएको घोषणा गर्न पाउँदा आmुलाई निकै खुसी लागेको उल्लेख गरेका छन् । नाइजेरियामा हतियारधारी समूहले फिरौती माग्न बालबालिका र किशोर किशोरीको अपहरण गर्ने गर्छन् । गत डिसेम्बरमा नाइजेरियाको कत्सिना राज्यमा समेत हतियारधारी समुहले तीन सयभन्दा बढी किशोरहरुको अपहरण गरेका थिए । उनीहरुलाई पनि छाडिएको थियो ।

लण्डन । बेलायती महारानी एलिजावेथ द्वितीयाका ९९ बर्षीय श्रीमान् फिलिप बिरामी परेका छन् । बेलायती राजसंस्थाका ज्यूदो इतिहास मानिने राजदम्पत्ति वृद्ध अवस्थामा पनि बिरामी परेको खबर खासै सार्वजनिक भएको थिएन । तर, राजकुमार फिलिपको स्वास्थ्य अवस्थाबारे भने दरवारले नियमित जानकारी सार्वजनिक गरिरहेको छ । बेलायती संचारमाध्यमहरुक अनुसार उनको झण्डै दुई हप्तादेखि लण्डनस्थित अस्पतालमा उपचार जारी छ ।

उनमा मुटुसम्वन्धी समस्या देखिएको छ । मुटुको परीक्षण भइसकेको छ । यद्दपी स्वास्थ्य अवस्थामा सुधार आएको छैन । हालै उनलाई शुरुमा भर्ना गरेको अस्पतालबाट स्थानान्तरण समेत गरिएको छ । लण्डनस्थित ‘किङ एडवार्ड सेभेन’ अस्पतालबाट उनलाई सरकारी अस्पताल सेन्ट बर्थोलोमेज अस्पतालमा सारिएको हो ।

मुटुको अवस्थाका बारेमा निगरानी गर्दै चिकित्सकले थप उपचार अगाडि बढाएको दरवारले जनाएको छ । राजकुमार फिलिप आगामी जुन १० एक सय वर्षमा पाइला टेक्दैछन् । महारानी एलिजावेथ द्वितीया ९४ वर्षकी भइन् ।

काठमाडौं । म्यानमारमा सैन्य ‘कू’ को विरोधमा ठूल्ठूला प्रदर्शन जारी छन् । पछिल्लो समय प्रदर्शन उग्र बनेको छ । त्यस क्रममा दमन गर्न प्रहरीले गोली चलाएको छ । अहिलेसम्म कम्तिमा १८ जनाको मृत्यु भइसकेको अन्तर्राष्ट्रिय संचारमाध्यमले जनाएका छन् । संयुक्त राष्ट्र संघको मानवाधिकार कार्यालयका अनुसार सबैभन्दा ठूलो हताहती शनिबारयता भएका प्रदर्शनमा भएको छ ।

कार्यालयका अनुसार सैन्य शासनको विरोधमा भइरहेको प्रदर्शनका दिनमध्ये सबैभन्दा घातक दिन बनेको छ । आइतबार म्यानमारका यंगुन, दवेई र मन्डाले शहरमा प्रदर्शन भएको थियो ।

बीबीसीका अनुसार ती शहरमा प्रदर्शनकारी धेरै मारिएका छन् । फेब्रुअरी १ मा सेनाले सत्ता हातमा लिएको थियो । त्यसपछि प्रदर्शन शुरु भएको हो । सरकारले प्रदर्शन रोक्न भनेको छ । तर, प्रदर्शनकारी उग्र बनेका छन् । संयुक्त राष्ट्रसंघको मानवअधिकार कार्यालयले प्रदर्शनकारीविरुद्ध भएको हिंसाको निन्दा गरेको छ।

नयाँ दिल्ली । भारतमा आजबाट कोरोना भाइरसको खोप अभियानको दोस्रो चरण प्रारम्भ हुँदैछ । पहिलो चरणमा प्राथमिकतामा रहेकाहरुलाई खोप लगाएर भ्याएको भारतले दोस्रो चरणमा ६० वर्ष भन्दा माथिका नागरिकलाई खोप लगाउँदैछ । यो उमेर समुहमा प्रधानमन्त्री नरेन्द्र मोदी समेत पर्छन् । उनले सोमबार बिहान दिल्लीको एम्स अस्पतालमा खोपको पहिलो डोज लगाएका छन् ।

मोदी स्वयमःले सामाजिक सञ्जाल ट्वीटरबाट यस्तो जानकारी गराएका हुन् । आफूले खोप लगाएपछि मोदी खोप लगाउन मिल्ने सबैलाई खोप लगाउन आह्वान समेत गरेका छन् । भारतमा अक्सफोर्ड विश्वविद्यालय र अष्ट्राजेनेकाले विकास गरेको खोप उत्पादन भएको छ ।

सोही खोप वितरण भएको हो । यहाँ सेरम इन्स्टिच्युट अफ इन्डियाले खोप उत्पादन गरिरहेको छ । भारतमा लगाइरहेको खोप नेपालमा समेत लगाइएको छ । भारतले आज शुरु भएको खोप अभियानलाई इतिहासकै सबैभन्दा ठूलो खोप अभियान भनेको छ ।

जम्फारा\नाइजेरिया । एक साता अगाडी दर्जनौं विद्यार्थी अपहरणमा परी अवस्था अज्ञात रहेको नाइजिरियामा पुनः सयौं छात्रालाई हतियारधारीले अपहरण गरेका छन् । बीबीसीका अनुसार नाइजेरियाको उत्तर पश्चिमी जम्फारा राज्यबाट सयौँ स्कुले बालिका अपहरणमा परेको आशंका छ । रातको एक बजेको समयमा हतियारधारीले ति छात्रालाई अपहरण गरेको एकजना शिक्षकले पुष्टी गरेका छन् । यो घटना शुक्रबार बिहानको हो ।

उक्त राज्यका गभर्नरका प्रवक्ताले समेत हमलाको पुष्टि गरेको बीबीसीले लेखेको छ । यद्दपी अवस्था भने अज्ञात छ । यो हालकै हप्ताहरूमा भएको सामूहिक अपहरणको सबैभन्दा ठूलो घटना मानिएको छ । यहाँ सशस्त्र समूहहरूले बालबच्चा अपरहण गरी तिनका अभिभावकबाट फिरौती माग्ने गरिन्छ । नाइजेरिया विश्वकै एक असुरक्षित मुलुक हो ।

गत हप्ता छिमेकको नाइजर राज्यस्थित कगारा भन्ने स्थानबाट २७ जना विद्यार्थी सहित अपहरणमा परेका ४२ जना अझै हराइरहेको बताइएको छ । गत डिसेम्बरमा ३ सय भन्दा छात्रलाई काट्सिना राज्यको कन्काराबाट बन्दूकधारीले अपहरण गरेका थिए । उनीहरुलाई भने छाडिएको थियो ।

काठमाडौं । प्रधानमन्त्री केपी शर्मा ओलीले संसद विघटन गरी मध्यावधी निर्वाचनको मिति तोक्दा धेरैले यसमा भारतले साथ दिएको आशंका गरेका थिए । सोहीकारण प्रधानमन्त्री अतिआत्मविश्वासका साथ प्रस्तुत भएको र यसमा अदालतले समेत प्रधानमन्त्रीकै साथ दिने अनुमान धेरैको थियो । त्यसविपरित सर्वोच्च अदालतले नेपालको संविधानको स्पष्ट व्याख्यासहित प्रधानमन्त्रीको कदमको विपरित फैसला सुनायो ।

यो प्रकरणबारे भारतले पनि मुख खोलेको छ । भारतले यसलाई नेपालको आन्तरिक मामला भएको बताएको हो । भारतीय विदेश मन्त्रालयका प्रवक्ता अनुराग श्रीवास्तवले नियमित पत्रकार सम्मेलनका दौरान यस्तो प्रतिक्रिया दिएका हुन् । अदालतको फैसलाबारे उनलाई पत्रकारले सोधेका थिए । उनले २३ फेब्रुअरीमा आएको सर्वोच्च अदालतको फैसला बारे भारत जानकार रहेको भन्दै नेपालको राजनीतिलाई नजिकबाट नियालिरहेको प्रतिक्रिया दिए ।

यद्दपी यो नेपालको आन्तरिक मामला भएको समेत उनको भनाई थियो । नेपालले आफ्नो प्रजातान्त्रिक प्रक्रिया र संस्थाद्धारा टुंगो लगाउने विषय भएको उनले उल्लेख छ । सर्वोच्च अदालतको फैसला आउनु अगाडी नेकपा अध्यक्ष प्रचण्डले नेपालमा प्रजातन्त्रको रक्षार्थ भारतको समेत समर्थन हुनुपर्ने प्रतिक्रिया दिएका थिए ।

रोम । कङ्गोका लागि इटलीका राजदूत लुका अट्टानासिओसहित तीन जनाको कङ्गोमा हत्या भएको छ। इटलीयन संचारमाध्यमहरुका अनुसार कंगोको पूर्वी क्षेत्रमा पर्ने भिरुङ्गा नेशनल पार्कमा विश्व खाद्य कार्यक्रम (डब्लुएफपी)का सुरक्षा दलमाथि आक्रमण भएको थियो । सोही समयमा राजदूतमाथि समेत आक्रमण भयो ।

आक्रमण राजदूत, उनका अङ्ग रक्षक र चालक मारिएको पुष्टी भएको छ । अन्य केही मानिसको समेत मृत्यु भए पनि पुष्टी हुन बाँकि रहेको छ । घटनामा कैयौं मानिस घाइते रहेको बताइएको छ । कंगोमा आफ्ना कुटनीतिज्ञ मारिएको सम्बन्धमा थप अनुसन्धान भइरहेको इटलीयन अधिकारीहरुले जनाएका छन् ।

लण्डन । बेलायती राजकुमार ह्यारी अब मान पदविमुक्त भएका छन् । यसअघि उनी स्वयमले मानपदवी त्याग गरेको घोषणा गरेका थिए । यद्दपी राजदरवारले यसको औपचारिक निर्णय गरेको थिएन । बेलायती संचारमाध्यमहरुका अनुसार अब महारानीबाट यस बारे निर्णय आएको छ । ह्यारी र मेघन मर्केल अहिले दोस्रो सन्तानलाई जन्मदिने तयारी छन् । उनीहरुले राजदरबार फर्कन अस्विकार गरेका छन् । उनीहरु अमेरिकामा रहने छन् ।

सोहीकारण दरवारले समेत औपचारिक रुपमा मानपदवी फिर्ता लिएको हो । शुक्रबार महारानी एलिजावेथ द्वितीयले उनीहरुको मान पदवी खारेज भएको घोषणा गरेको बताइएको छ । बेलायती राजसंस्थाको इतिहासमा यस्तो घटना पहिलो पटक भएको हो ।

राजकुमार ह्यारीले आफु सर्वसाधारण जस्तै जिन्दगी बिताउने भन्दै दरवार छाड्ने निष्कर्षमा पुगेका हुन् । महारानी एलिजावेथ द्वितीयले ह्यारी दम्पत्तिसँग बेलायती राजपरिवारको अब राजनीतिक तथा सार्वजनिक सम्वन्ध नरहेको उल्लेख गरेकी छिन् । राजपरिवारको सदस्यका रूपमा उनीहरूसँग अब कुनै जिम्मेवारी, दायित्व र अधिकार तथा भूमिका नरहने दरबारको स्पष्टोक्ति छ ।

पश्चिम बंगाल । भारतको पश्चिम बंगालका श्रम मन्त्री जाकिर हुसेनमाथि पेट्रोल बम प्रहार हुँदा गम्भीर घाइते भएका छन् । मन्त्री हुसेनलाई मुर्सिदावाद मेडिकल कलेजमा भर्ना गरिएको भारतीय संचारमाध्यमले जनाएका छन् । मुर्सिदावाद जिल्लाको निमटिटा स्टेशनबाट कोलकाता जान उनी रेल चढ्ने तयारीमा थिए ।

सोही समयमा अज्ञात व्यक्तिले उनीमाथि बम प्रहार गरेको थियो । बम किन र कुन उद्देश्यले हानियो भन्ने खुलेको छैन । अपराधीको खोजी भइरहेको प्रहरीले बताएको छ । बम प्रहारको भारतभर आलोचना भएको छ ।

नयाँ दिल्ली । शनिबार चीन र ताजकिस्तानमा छुट्टाछुट्टै भूकम्प गएको छ । १० मिनेटको अन्तरमा दुई ठूला भूकम्प गएको हो । त्यसमध्ये एउटा ताजकिस्तान र अर्को चीनको सिचुवान प्रान्त केन्द्र बनाएर गएको छ ।

नेश्नल सेन्टर अफ सिस्मोलोजीका अनुसार ताजकिस्तानमा ६.३ म्याग्निच्युटको भूकम्प गएको छ । ताजकिस्तानबाट मानवीय क्षतिको विवरण आइसकेको छैन । यो भूकम्पको धक्का भारतको कश्मीरदेखि दिल्लीसम्म महसुस गरिएको छ ।

अफगानिस्तान र पाकिस्तानका पेशावर, इस्लामावाद लाहोरमासमेत भूकम्प गएको छ । भूकम्पका कारण भारतको कश्मीरमा भौतिक क्षति भएको बिबिसीले लेखेको छ ।

काठमाडौं । मोरक्कोमा बाढी र पहिराले ठूलो मानवीय क्षति भएको छ । स्थानीय संचारमाध्यमहरुका अनुसार त्यहाँ कम्तिमा २४ जनाको मृत्यु भएको खबर छ । देशको उत्तरी भेगमा पर्ने तान्गीर भन्ने स्थानमा सोमबार अविरल वर्षापछि बाढी आएको थियो ।

घटनास्थलबाट उद्धारकर्मीले १० जनाको सकुसल उद्धार गरेका छन् । उनीहरुलाई स्थानीय अस्पतालमा भर्ना गरिएको छ । अहिले त्यहाँ उद्धार र राहतको काम जारी रहेको छ । बाढीमा अझै केही मानिसहरु हराइरहेको बताइएको छ । यद्दपी यसको पुष्टी भने नभएको संचारमाध्यमले जनाएका छन् ।

बाढी पसेको स्थानमा एक टेक्सटाइल उद्योग रहेको बताइएको छ । त्यो उद्योग समेत गैरकानूनी रुपमा संचालनमा थियो । सोहीकारण उद्योगमा कति कामदार थिए भन्ने खुलेको छैन । एजेन्सी