Category: विश्व

काठमाडौं । लैङ्गिक समानताको सूचीमा फिनल्यान्ड प्रायः माथि पर्छ। तर प्रधानमन्त्री सन्ना मरिनले लैङ्गिक भिन्नता अन्त्यको निम्ति लड्न थप कदम उठाउँदै १६ वर्षीया किशोरीलाई आफ्नो कुर्सी बुधवार एक दिनको निम्ति हस्तान्तरण गरिन्।

कुनै नयाँ कानून नबनाए पनि एभा मुर्तोले दिनभरि राजनीतिकर्मीहरूसँग बैठकको कार्यतालिका थियो। जसको उद्देश्य हो प्रविधिमा महिला अधिकारको विषयमा जोड दिनु।

संयुक्त राष्ट्रसङ्घको अन्तर्राष्ट्रिय युवती दिवसभन्दा अघि किशोरीलाई उक्त जिम्मेवारी दिइएको हो जुन विश्वव्यापी एउटा अभियानको भाग थियो।

फिनल्यान्डले प्लान इन्टर्न्याश्नलको ‘गर्ल्स टेकओभर’ अर्थात् युवतीको सत्तारोहणमा सहभागी भएको यो चौथो वर्ष हो।

यस अभियानमा संसारभरिका देशहरूका किशोरीहरूलाई एक दिनको निम्ति राजनीति र अन्य क्षेत्रका नेताहरूको जिम्मेवारी सम्हाल्ने अवसर दिइन्छ।यो वर्ष युवतीहरूको निम्ति प्रविधिमा अवसर र डिजिटल क्षमता बढाउने कुरालाई प्राथमिकता दिइएको छ।

बुधवार गरेको सम्बोधनमा सुश्री मुर्तोले भनिन्, ‘तपाईँहरूको अगाडि आज बोल्ने अवसर पाउनु मेरो निम्ति खुसीको कुरा हो, तर म यहाँ उभिनु नपरेको भए हुन्थ्यो भन्ने मेरो चाहना छ। गर्ल्स टेकओभर जस्ता अभियानहरूको खाँचो पर्नु हुँदैन ।’

तर यो पृथ्वीको कुनै भागमा पनि लैङ्गिक समानता अहिलेसम्म प्राप्त नभएको कुरा यथार्थ भएको उनको ठम्याइ छ। उनले भनिन्, ‘तर हामीले यस क्षेत्रमा धेरै राम्रो काम गरेका छौँ र अझै पनि धेरै पूरा गर्नुपर्ने काम बाँकी छन्।’

मानवअधिकार र जलवायुसम्बन्धी अभियानमा सक्रिय किशोरीले यस्तो अभियानमा भाग लिन आवदेन दिएका थिए। दिनभरि बैठकमा व्यस्त भएपछि ती प्रधानमन्त्रीले साँझ प्रविधिमा लैङ्गिक समानताबारे छलफल गर्दैछिन्।

कार्यक्रमभन्दा अघि बोल्दै फिनल्यान्डकी प्रधानमन्त्री मरिनले प्रविधि सबैको पहुँचको निम्ति बनाइएको कुरा सुनिश्चित गरिनुपर्ने महत्त्वमाथि जोड दिइन्।उनले भनिन्, ‘त्यसले समाजभित्र र देशहरूबीच डिजिटल विभेद गहिरो बनाउनु हुँदैन।’

गत वर्ष विश्व आर्थिक मञ्चको विश्वव्यापी लैङ्गिक असमानतासम्बन्धी प्रतिवेदनमा फिनल्यान्ड तेस्रो भएको थियो। तथापि प्रविधिको क्षेत्रमा प्रतिनिधित्वको हिसाबले महिला अझै तल छन्।

गत वर्ष ३४ वर्षको उमेरमा शपथ ग्रहण गरेकी मरिया विश्वकै कम उमेरकी प्रधानमन्त्री बनेकी थिइन्। उनी फिनल्यान्डकी तेस्रो महिला प्रधानमन्त्री हुन्।

उनले नेतृत्व गरेको मध्य–वामपन्थी गठबन्धनमा चारवटा दल छन्। ती सबै दलको नेतृत्व महिलाले गरेका छन् र तीमध्ये तीन जना ३५ वर्षभन्दा कम उमेरका छन्। बीबीसी

जुबा\सुडान । सुडानमा शान्ती सम्झौता भएको छ । वर्षौ लामो युद्ध अन्त्य गर्दै शान्ती स्थापना गर्ने सहमतिमा सरकार तथा विद्रोही समूहबीच शनिबार हस्ताक्षर भएको हो । सुडानमा लामो समयदेखिको युद्धले लाखौं निर्दोष मानिसको ज्यान गएको छ ।

तर, शनिबारको ऐतिहासिक शान्ती सम्झौताले अफ्रिकी मुलुक सुडानमा शान्ती स्थापना हुने अनुमान गरिएको छ । सरकार र विद्रोहीबीच करिब एक वर्षदेखि शान्तिका लागि विभिन्न चरणमा वार्ता भएका थिए ।

यो बीचमा हिंसा केही मत्थर भएपनि रोकिएको भने थिएन । सम्झौताका लागि विद्रोही र सरकारी प्रतिनिधि दक्षिणी सुडानको राजधानी जुबामा भेला भई सम्झौतामा हस्ताक्षर गरेको अन्तर्राष्ट्रिय संचारमाध्यमले जनाएका छन् ।

सुडानमा लामो समयदेखि शासन गर्दै आएका आमार अल–बसीरलाई पदबाट हटाएपछि विगत एक वर्षदेखि संक्रमणकालीन सरकार चलिरहेको छ । उक्त सरकारको प्रमुख कार्य विद्रोहीलाई राजनीतिको मुख्य धारमा ल्याई द्वन्द्वको अन्त्यका लागि सम्झौता गर्नु थियो ।

जसमा सरकार सफल भएको छ । सुडानको तर्फबाट अर्धसैनिक लडाकू मोहम्मद हमदान डाग्लो र सुडानी क्रान्तिकारी मोर्चा (एसआरएफ) का वार्ता प्रमुखले सम्झौतामा हस्ताक्षर गरेका छन् । चाड, कतार, इजिप्ट, अफ्रिकी संघ, यूरोपेली संघ, तथा संयुक्त राष्ट्रसंघलाई सम्झौताको साक्षी बनाइएको छ ।

कश्मीर । भारत प्रशासित कश्मीरको सीमा क्षेत्रमा पाकिस्तानी र भारतीय सैनिकबीच भुडभेड भएको छ । घटनामा पाकिस्तानी सैनिकको गोली लागेर तीन जना भारतीय सैनिक मारिएको भारतीय संचारमाध्यमले जनाएका छन् ।

भारतीय सेनाका प्रवक्ता राजेश कालियाले नोगाम क्षेत्र र पूच क्षेत्रमा पाकिस्तानी सैनिकले गोली प्रहार गर्दा बिहीबार ३ भारतीय सैनिक मारिएको पुष्टी गरेका छन् । घटनामा थप ४ सैनिक घाइते भएको र उनीहरुको उपचार जारी रहेको छ ।

भारतीय सेनाका तर्फबाट पनि कडा प्रतिकार भएको बताए पनि पाकिस्तानतर्फको क्षति भने यकिन भएको छैन । पाकिस्तानका तर्फबाट जारी बयानमा भने भारतीय सैनिकले युद्धविराम उल्लंघन गरेका कारण घटना घटेको बताएको छ । यो क्षेत्रमा भारत र पाकिस्तानबीच निरन्तर तनाव उत्पन्न भइरहेको छ ।

काठमाडौं । कोरोना भाइरसबाट भएको मानवीय क्षतिको आंकडा १० लाख नाघेको छ । संसारभर सोमबार बिहानसम्म १० लाख ३ सय ५० जनाको ज्यान गइसकेको तथ्यांक छ । अमेरिकामा मात्र कोरोनाबाट ज्यान गुमाउने मानिस २ लाख पुगेका छन् । पछिल्लो २४ घण्टामा २ हजारभन्दा बढी मानिसले ज्यान गुमाएसँगै विश्वभर कोरोनाले ज्यान गुमाउनेहरुको संख्या १० लाख पुगेको छ ।

विश्वमा दोस्रो धेरै संक्रमण भारतमा देखिएको छ । यहाँ मानवीय क्षति भने ९४ हजार रहेको छ । भारतमा ६ लाख मानिसमा संक्रमण देखिएको छ । अमेरिकामा भने कुल संक्रमित ७ लाख भन्दा माथि छन् ।

तथ्यांक अनुसार विश्वभर ३ करोड ३१ लाख मानिसमा कोरोना पुष्टी भइसकेको छ । २४ घण्टा भित्र अमेरिकामा ८ हजार मानिसमा संक्रमण देखियो । ब्राजिलमा बढी मानिसको ज्यान जाने सूचिको दोस्रो र बढी संक्रमित हुनेको तेस्रो स्थानमा छ ।

यहाँ कोरोनाबाट ज्यान गुमाउनेको संख्या १ लाख ४१ हजार नाघेको छ। रुसमा १ लाख ५१ हजार संक्रमित छन् । यहाँ २० हजारभन्दा बढी मानिसको ज्यान गइसकेको छ । नेपालमा अहिलेसम्म ४ सय ७७ जनाको मृत्यु भएको छ ।

काठमाडौं । संसारभर कोरोना भाइरसको महामारीबाट ज्यान गुमाउने संक्रमितको संख्या १० लाख नजिक पुगेको छ । शुक्रबार बिहानसम्मको तथ्यांक अनुसार ९ लाख ८७ हजार १५६ जनाको ज्यान गइसकेको छ । पछिल्लो २४ घण्टामा ५ हजार ८७२ जनाले ज्यान गुमाएको तथ्यांक छ । यो अवधिमा नेपालमा मात्र १८ जनाको ज्यान गएको छ । जुन सर्वाधिक संख्या हो ।

२४ घण्टामा विश्वमा ३ लाख १४ हजार ७८८ संक्रमित थप भए । कोरोनालाई जित्नेको संख्या भने विश्वभर २ करोड ३९ लाख १६ हजार ९४० जना रहेको छ । संसारभर अहिले संक्रिय संक्रमितमध्ये ६३ हजार ३६६ जनाको स्वास्थ्य अवस्था गम्भीर रहेको छ । ७४ लाख ९७ हजार ५६० जनाको अवस्था भने अहिले पनि सामान्य रहेको तथ्यांक छ ।

उनीहरु होम आइसुलेसन वा अस्पतालमा छन् । सबैभन्दा बढी संक्रमित अमेरिकामा छन् । यहाँ २४ घण्टामा ४५ हजार ३२८ जनामा कोरोना देखियो । अमेरिकामा कोरोना संक्रमितको संख्या ७१ लाख ८५ हजार ४४४ पुगेसकेको छ । यहाँ २४ घण्टामा ९४२ को ज्यान गएको छ । अमेरिकामा मृतक संख्या २ लाख ७ हजार ५३८ पुगेको छ ।

दोस्रो स्थानमा भारत छ । यहाँ एकैदिन ८५ हजार ९१९ संक्रमित थपिए । भारतमा कोरोना संक्रमितको संख्या ५८ लाख १६ हजार १०३ पुगेको छ । भारतमा ९२ हजार ३१७ जनाको मृत्यु भइसकेको छ ।

काठमाडौं । शुक्रबार सार्क राष्ट्रका विदेशमन्त्रीहरूको भर्चुअल बैठक आयोजना हुने निश्चित भएको छ । भारतीय विदेशीमन्त्री एस जयशंकरले सहभागिता निश्चित गरेसँगै बैठक समेत संचालन हुने भएको हो । बैठकको नेपालका परराष्ट्रमन्त्री प्रदीप कुमार ज्ञवालीले अध्यक्षता गर्ने छन् ।

भारत र पाकिस्तान विवादका कारण यी दुबै मुलुकका विदेश मन्त्री सहभागी हुने वा नहुने निश्चित थिएन । तर, भारतीय विदेश मन्त्रालयका प्रवक्ता अनुराग श्रीवास्तवले सार्कमा विदेशमन्त्रीहरूको भर्चुअल बैठकमा विदेशमन्त्री जयशंकर सहभागी हुने पुष्टि गरेका छन्।

पछिल्लो समय भारतले सार्कलाई प्राथमिकतामा राख्न लागेको छ । यसअघि भारतको प्राथमिकतामा सार्क थिएन ।

सार्क अध्यक्ष राष्ट्र नेपाल भएकाले सो बैठकको अध्यक्षता नेपालका परराष्ट्रमन्त्री ज्ञवालीले गर्ने भएका हुन् । बैठकमा सार्कका आठवटै सदस्य राष्ट्रको सहभागी हुने निश्चित भएको हो ।

काठमाडौं । हुम्लामा नेपाली भूमि मिचिएको समाचारको नेपाल सरकार स्वयमले समेत खण्डन गरेको छ । हुम्लाको लिमी उपत्यकामा चीनले नेपाली भूमि अतिक्रमण नगरेको सरकारका प्रवक्ता प्रदीप ज्ञवालीले जानकारी दिए । यसअघि चिनियाँ दूतावासले समेत यो समाचारको खण्डन गरेको थियो ।

पछिल्लो समय चीनले नेपाली भूमिमा भवन बनाएको खबर सञ्चारमाध्यममा सार्वजनिक भएको थियो । बुधबार मन्त्रिपरिषद् बैठकका निर्णय सार्वजनिक गर्न आयोजना भएको भएको पत्रकार सम्मेलनका दौरान उनले यस्तो स्पष्टिकरण दिएका हुन् । उनका अनुसार यस्तै खबर २०७३ मा पनि आएको थियो।

त्यसबेला सरकारले गृह र परराष्ट्र मन्त्रालय, नापी विभागलगायतको संलग्नतामा टोली बनाएको र त्यसले स्थलगत गरेको उनले जानकारी दिए । चीनले बनाएका भनेका घरहरु नेपाल–चीन सीमाबाट एक किलोमिटरभित्र चिनियाँ भूभाग मै रहेको उनले बताए ।

नेपाल चीनबीच सीमा समस्या नभएको समेत उनको भनाई छ । यो विषयमा मन्त्रालयको आधिकारिक धारणा बीनै मिडिया रिपोर्ट आएको उनले उल्लेख गरे ।

काठमाडौं । प्रधानमन्त्री केपी शर्मा ओलीले संयुक्त राष्ट्रसंघको उच्चस्तरीय बैठकलाई सम्बोधन गर्दै यो संस्था विश्वमा शान्ती स्थापनार्थ महत्वपूर्ण रहेको बताएका छन् । राष्ट्रसङ्घ स्थापनाको ७५औँ वार्षिकोत्सवका अवसरमा सोमबार राति न्यूयोर्कमा आयोजित उच्चस्तरीय बैठकलाई पूर्वअभिलेखित ‘भिडियो’मार्फत सम्बोधन गर्दै प्रधानमन्त्रीले खासगरी कम विकसित मुलुकको हितमा अझ बढी राष्ट्रसंघबाट अपेक्षा रहने उल्लेख गरे ।

उनले राष्ट्र संघ यतिबेला निरन्तरता र रूपान्तरणको दोसाँधमा रहेको समेत उल्लेख गरेका छन् । विश्वले झेल्नुपरेका जटिल चुनौतीहरुको सामना गर्न संयुक्त राष्ट्रसङ्घलाई सुदृढ र सशक्त बहुपक्षीयताको केन्द्र बनाउनु सबै सदस्य राष्ट्रहरुको सामूहिक दायित्व भएको समेत उनको भनाई छ ।

राष्ट्रसङ्घ स्थापनाको ७५औँ वार्षिकोत्सव शान्ति, समृद्धि र न्यायका निम्ति सामूहिक प्रतिबद्ध व्यक्त गर्ने अवसर भएको प्रधानमन्त्री ओलीले उल्लेख गरेका छन् । शान्ति–सुरक्षा, विकास र मानवअधिकारका क्षेत्रमा नेपाल र राष्ट्रसङ्घबीच बढ्दो साझेदारीप्रति सन्तुष्टि व्यक्त गर्दै प्रधानमन्त्री ओलीले उक्त संस्थाको शान्ति स्थापनाका कार्यमा छ दशकभन्दा बढी समयदेखि नेपालले व्यावसायिक एवं समर्पित सेवा उपलब्ध गराउँदै आएको बताए।

कमजोर देश र तिनका जनताको रक्षा, सार्वभौम समानता र सबैको मानमर्यादाको प्रवद्र्धन, महामारी, जलवायु परिवर्तनका कारण उत्पन्न सङ्कट, आतङ्कवादको अन्त्य, आणविक, रासायनिक, जैविकलगायत आम विनाशका सबै हातहतियारको उन्मूलनमा राष्ट्रसङ्घको विशेष भूमिकाको अपेक्षा विश्वले गरेको प्रधानमन्त्रीको भनाई छ ।

‘हामीले खोजेको भविष्य र हाम्रो अपेक्षाको संयुक्त राष्ट्रसङ्घ : बहुपक्षीयताप्रति हाम्रो सामूहिक प्रतिबद्धताको पुनर्पुष्टि’ विषयमा आयोजित उक्त बैठकको प्रारम्भमा राष्ट्रसङ्घको ७५औँ वार्षिकोत्सवसम्बन्धी घोषणापत्र अनुमोदन गरिएको न्यूयोर्कस्थित संयुक्त राष्ट्रसङ्घका लागि नेपालको स्थायी नियोगले जानकारी गराएको छ ।

वार्षिकोत्सवको उक्त कार्यक्रमलाई ८८ देशका राष्ट्राध्यक्ष र ४४ मुलुकका सरकार प्रमुखसहित १८२ वक्ताले सम्बोधन गर्नेछन् ।

काठमाडौं । संयुक्त राष्ट्र संघीय खाद्य कार्यक्रम (डब्लुएफपी)ले संसारभर ३० करोड मानिस भोकमरीमा रहेको भन्दै सहयोगको अपिल गरेको छ । कार्यक्रमका प्रमुख प्रमुख डेभिड बेस्लेले संसारभर अर्बपतिसँग यस्तो सहयोगको अपिल गरेका हुन् । उनले अर्बपतिहरुसँग सहयोगको याचना गर्दै भोका व्यक्तिहरुका लागि सहयोग आवश्यक रहेको बताए ।

संयुक्त राष्ट्र सुरक्षा परिषदमा उनले भोका व्यक्तिलाई समयमै सहयोग गर्न नसके उनीहरुलाई बचाउन समेत मुस्किल पर्ने चेतावनी उनले दिएका छन् । उनका अनुसार कोरोना भाइरसको संक्रमण र यसको विश्वव्यापी महामारीले पुनः संसारभर भोकमरीको समस्या बढेको छ । यसअघि विश्वभर झण्डै २७ करोड मानिस भोकै रहने गरेको तथ्यांक थियो ।

यसमा महामारीयता १३ दशमलब ८ प्रतिशतको वृद्धि देखिएको उनले उल्लेख गरेका छन् । उनले भोकमरीसँग जुधिरहेका व्यक्तिलाई एक वर्षका लागि खाद्यान्नको व्यवस्था गर्न करीव ५ बिलियन डलर आवश्यक रहने आंकडासमेत प्रस्तुत गरेका छन् ।

काठमाडौं । संसारमा सर्वाधिक संख्यामा कोरोना भाइरसको संक्रमण हुने मुलुकमा भारत दोस्रो स्थानमा उक्लिएको छ । यसअघि तेस्रो स्थानमा रहेको भारत सोमबारबाट दोस्रो बनेको हो । सोमबार बिहान भारतले ब्राजिललाई उछिनेको हो । यो सूचिमा सबैभन्दा अगाडी अमेरिका छ ।

अमेरिका र भारतमा नयाँ संक्रमणको दर समेत उत्तिकै तिब्र गतिमा रहेको छ । वर्ल्डओमिटरले अध्यावधिक गर्ने तथ्यांकअनुसार अमेरिकामा संसारमै सबैभन्दा बढी ६४ लाख ६० हजार २ सय ५० जनामा कोरोना संक्रमण पुष्टी भइसकेको छ ।

दोस्रो स्थानमा उक्लिएको भारतमा संक्रमितको संख्या ४२ लाख २ हजार ५ सय ६२ पुगेको छ । तेस्रो स्थानमा झरेको ब्राजिलमा ४१ लाख ३७ हजार ६ सय ६ जनामा कोरोना देखिएको तथ्यांक रहेको छ । कोरोना संक्रमित बढेको तुलनामा भारतमा मृत्युदर भने कम छ ।

वर्ल्डओमिटरका अनुसार ब्राजिलमा अहिलेसम्म कोरोनाबाट १ लाख २६ हजार ६ सय ८६ जनाको मृत्यु भइसकेको छ । भारतमा मात्र ७१ हजार ६ सय ८७ ले ज्यान गुमाएका छन् । यो सूचिमा पनि सबैभन्दा माथि अमेरिका छ । यहाँ १ लाख ९३ हजार २ सय ५० जनाको ज्यान गइसकेको छ ।