Category: विश्व

काठमाडौं । भारतीय विदेश सचिव हर्षबर्धन शृंगला दुई दिने भ्रमणका सिलसिलामा आज नेपाल आइपुगेका छन् । काठमाडौं आएसँगै उनी द्धिपक्षीय भेटघाटमा व्यस्त रहे । बिहीबार बिहान काठमाडौंस्थित त्रिभुवन विमानस्थलमा उनले नेपाली भाषामा आफ्नो प्रतिक्रिया दिएका थिए । त्यसक्रममा उनले नेपालमा आउँदा आफु खुसीको भएको बताएका थिए ।

विदेश सचिवका रुपमा पहिलो भ्रमणका लागि नेपाल आएपछि आफु यसअघि काठमाडौं आइसकेको जानकारी गराए । उनले बिहीबार दिउँसो समकक्षी परराष्ट्र सचिव डा. भरतराज पौड्यालसँग औपचारिक भेटवार्ता गरे । उनीहरुबीच सिंहदरबारस्थित परराष्ट्र मन्त्रालयमा भेटवार्ता भएको छ ।

परराष्ट्र सचिवस्तरीय बैठक द्धिपक्षीय सम्बन्ध सुधारमा उपलब्धी मुलक भएको भारतीय दूतावासले उल्लेख गरेको छ । उनले बिहीबार नै परराष्ट्र मन्त्री प्रदीपकुमार ज्ञवालीसँग भेटेका छन् । यस भेटमा कोरोना भाइरसको खोपको ठूलो प्रयोगकर्ता भारतले खोप बजारमा आउनासाथ नेपाललाई समेत उपलब्ध गराउने प्रतिवद्धता व्यक्त गरेको छ ।

उनले आज नै राष्ट्रपति र प्रधानमन्त्रीसँग समेत द्धिपक्षीय सम्बन्धका विषयमा भेटवार्ता गरेका छन् । विदेश सचिव शुक्रबार गोरखा पुगेर विद्यालय भवनको उद्घाटन गर्नेछन् । त्यसपछि उनी शुक्रबार नै स्वदेश फर्कने कार्यक्रम तय भएको छ ।

तमिलनाडु । दक्षिण भारतमा शक्तिशाली तुफान निवारका कारण जनजीवन प्रभावित भएको छ । दक्षिण भारतको तमिलनाडु र पोन्डीचेरीका विभिन्न स्थानमा भारी वर्षा र तीव्र गतिको हावासहित ‘निवार तुफान’ आएको छ ।

समुन्द्री तटका १ हजार घरपरिवारबाट हजारौं मानिसलाई सुरक्षित स्थानमा सारिएको र जलसेनाका ४० भन्दा बढी उद्धार समुह तयारी अवस्थामा रहेको भारतीय संचारमाध्यमले जनाएका छन् । तुफानका कारण सडक अवरुद्ध भएके छ ।

हवाई यातायात ठप्प छ । रुख ढल्दा भौतिक संरचनाहरुमा क्षति पुगेको छ । पछिल्लो केही घण्टायता भने तुफानको प्रभाव क्रमशः कमजोर बन्दै गएको बताइएको छ ।

तुफानको प्रभाव चेन्नई र महाबलीपुरमसम्म देखिएको छ । तुफान प्रतिघण्टा १ सय २० देखि १ सय ४५ किलोमिटरको दरले अघि बढिरहेको भारतीय संचारमाध्यमले लेखेका छन् ।

प्रतापगढ । भारतकोे उत्तर प्रदेशस्थित प्रतापगढ जिल्लामा भयानक सडक दुर्घटना भएको छ । जन्ती बोकेको जीप दुर्घटनामा परी कम्तिमा १४ जनाको ज्यान गएको भारतीय संचारमाध्यमले जनाएका छन् । त्यसमध्ये ६ जना भने ७ देखि १५ वर्षसम्मका बालबालिका छन् ।

तिब्र गतिमा रहेको जीप रोकिराखेको ट्रकमा ठक्कर खाएको थियो । जीप कच्याककुचुक भएको र शवहरु ढोका काटेर निकाल्नु परेको बताइएको छ ।

कुन्डा कोतवाली भन्ने स्थानको चौंसा जिरगापुर गाउँका उनीहरु नवाबगंज थाना इलाकाको शेहपुरा गाउँमा जन्त हिँडेको बताइएको छ । दुर्घटनाप्रति मुख्यमन्त्री योगी आदित्यनाथले दुःख व्यक्त गरेका छन् । उनले पिडित परिवारलाई उचित सहयोग दिइने बताएका छन् ।

काठमाडौं । युगाण्डामा राजनीतिक द्धन्द्ध उत्कर्षमा पुगेको छ । प्रहरीले राष्ट्रपति पदका उम्मेदबार बोबी वाइनलाई पक्राउ गरेसँगै सडकमा हिंसात्मक झडप भएको छ । यस घटनामा कम्तिमा १६ जनाको ज्यान गएको अन्तर्राष्ट्रिय संचारमाध्यमले जनाएका छन् । घटना युगान्डाको राजधानी कम्पालामा भएको हो ।

बिहीबार प्रदर्शनकारी आगजनी र तोडफोडमा उत्रिएका थिए । त्यसक्रममा झडप भएको र कम्तिमा १६ जनाको मृत्युको पुष्टी भएको छ । अन्य कैयौं मानिस घाइते भएका छन् ।

कोरोना भाइरसको महामारीका बीचमा भएको प्रदर्शनपछि प्रहरीले दर्जनौं मानिसलाई महामारी विरुद्धको अभियोगमा पक्राउ समेत गरेको छ ।

युगान्डामा राष्ट्रपति निर्वाचन नजिकिएको छ । वाइन एक उमेदवार हुन् । उनी विपक्षी राजनीतिक दलबाट प्रतिनिधित्व गर्छन् । उनी युगान्डाका वर्तमान राष्ट्रपति युओरी मुसेभेनीसँग भिड्दैछन् । एजेन्सी

नयाँ दिल्ली । भारतमा वायुप्रदुषण ह्वात्तै बढेको छ । धान भित्राएपछि पराललाई खेतमा छाडी कृषकले आगो लगाउने गर्छन् । सोहीकारण राजधानी दिल्ली लगायत यस आसपासका क्षेत्रमा हरेक वर्ष वायु प्रदुषण उच्च स्तरमा पुग्ने गर्छ ।

वायु प्रदुषण रोक्न सरकारले गाडीबाट हुने प्रदुषण नियन्त्रण गर्ने योजना ल्याएको छ । जसअनुसार अब रेडलाइट बलेर गाडी रोकिने अवस्था आएमा अब बन्द गर्नुपर्ने भएको छ ।

यो अभियानलाई सरकारले ‘रेड लाईट अन, गाडी अफ नाम दिएको छ । अर्कोतर्फ दिवालीका अवसरमा पटका पड्काउँदा पनि भारतमा प्रदुषण उच्च विन्दुमा पुग्छ । त्यसो त यो वर्ष पटकामा समेत नियन्त्रण गरिएको छ ।

दिल्ली वरपर हरियाणा र पंजाबमा पराल जलाउने काम बढी हुने गर्छ । दिल्ली सरकारले ट्राफिक सिग्नलमा रातो बत्ती भएका बेला गाडी बन्द गराउनका लागि नगर प्रहरी खटाएको जानकारी दिएको छ ।

दिल्लीमा प्रदुषणका कारण पुरै दिन तुवालो लागेकाले घाम लाग्न छाडेको छ । केन्द्रीय प्रदूषण नियन्त्रण बोर्ड (सीपीसीबी) का अनुसार ४ नोभेम्बरदेखि ९ नोभेम्बरसम्म दिल्लीमा निरन्तर ६ दिनसम्म प्रदूषण स्तर ’गंभीर’ श्रेणीमा छ ।

राजधानी दिल्लीसहित एनसीआर फरीदाबाद, नोएडा, ग्रेटरनोएडा र गुडगाँवमा पनि वायु गुणस्तर अति खराब श्रेणीमा पुगेको छ ।

केन्द्रीय प्रदूषण नियन्त्रण बोर्डका अनुसार शनिबार वायु गुणस्तर सूचकांक ४५१ एक्यूआई रहेको थियो। एक्यूआई शून्यदेखि ५० सम्मलाई राम्रो मानिन्छ भने ५१ देखि १०० सम्मलाई सन्तोषजनक , १०१ देखि २०० सम्मलाई मध्यम, २०१ देखि ३०० खराब र ३०१ देखि माथिको एक्यूआइलाई अति खराब मानिन्छ।

पटना । नेपालसँग सीमाना जोडिएको बिहारमा भारतीय प्रधानमन्त्री नरेन्द्र मोदीको जादु चलेको छ । सन् २०१५ मा ५३ सीटमा खुम्चिएको भारतीय जनता पार्टीलाई उनले यस पटक ७० सीटमा विजयी बनाउन सफल भएका छन् ।

बिहार विधानसभा निर्वाचनमा नितिशकुमार र भारतीय जनता पार्टीको एनडिए गठबन्धनले १ सय २५ सिट जित्दै पूर्ण बहुमत समेत प्राप्त गरेको छ। यससँगै अब एनडीएले नितिश कुमारको नेतृत्वमा पुनः एक पटक सरकार बनाउने बाटो खुलेको छ ।

यो गठबन्धनलाई लालुप्रसाद यादवका छोरा तेजस्वी यादव नेतृत्वको गठबन्धनले कडा टक्कर भने दियो । तेजस्वी नेतृत्वको गठबन्धन १ सय १० सिटमा विजयी भयो । उनलाई कांग्रेसले साथ दिएको थियो । जितपछि प्रधानमन्त्री नरेन्द्र मोदीले अबको दशक बिहारको आत्मविश्वासको दशक हुने बताएका छन् । उनले बिहारका जनतालाई धन्यवाद समेत दिएका छन् ।

बिहार विधान सभा निर्वाचनमा भारतीय जनता पार्टीले ७०, राष्ट्रिय जनता दलले ७५ सीटमा जित निकाल्न सफल भए । जेदयूले ४३ सिट जितेको छ । कांग्रेसले १९, लोक जनशक्ती पार्टीले १ तथा हिन्दूस्तान अवाम मोर्चाले ४ सिटमा जित हासिल गरेका छन् ।

काठमाडौं । न्यूजिल्याण्डमा नवगठित सरकारले आफ्ना मतदाता तथा नागरिकका लागि आकर्षक सहुलियत प्याकेज ल्याएको छ । खासगरी साना व्यवसायीलाई बचाई राख्न विषेश राहत कार्यक्रम ल्याइएको हो ।

लेबर पार्टीबाट नवगठिन सरकारको पहिलो मन्त्रीपरिषद् बैठकले यस्तो निर्णय गरेको हो । कोरोना भाइरसको महामारीका कारण साना तथा मझौला उद्योगमा ठूलो प्रभाव परेको छ ।

प्रधानमन्त्री जसिन्दा अर्डेर्नले साना व्यवसायी अर्थतन्त्रको महत्वपूर्ण अंश भएको बताउँदै अर्थतन्त्र बचाउन प्याकेज ल्याइएको बताएकी छिन् । उनका अनुसार यस अगाडी नै ल्याएका सहुलियत प्याकेजको अवधि समेत थप भएको छ ।

मन्त्रिपरिषद् बैठकपछि उनले देशबासीका नाममा सम्बोधन गरेकी थिइन । यसवर्ष म्याद सकिन लागेका राहत तथा सहुलियत कार्यक्रम सन् २०२३ को डिसेम्बर ३१ सम्म जारी रहने उनको भनाई छ ।

सरकारको घोषणा अनुसार अब साना व्यवसायीले एक बर्षदेखि दुई बर्षसम्म व्याज मिनाहा सहुलियत पाउने छन् । न्यूजिल्याण्डमा नवगठिन सरकारका मन्त्रीले शुक्रवार सपथग्रहण गरेका थिए ।

सोमवार पहिलो बैठक बसेको छ । अर्डेर्नले लगातार दोस्रो कार्यकाल सम्हालेकी हुन् । कोरोना भाइरसको महामारी व्यवस्थापन प्राप्त सफलताका लागि उनी दोस्रो पटक समेत लोकप्रिय मतसहित विजयी भएकी छिन् । एजेन्सी

काठमाडौं । अजरबैजानले विवादित नागोर्नो काराबाखको एक सहर कब्जा गरेको घोषणा गरेको छ । उसको यो दावीलाई अर्मेनियाले भने अस्विकार गरिदिएको छ । बीबीसीका अनुसार अजरबैजानका राष्ट्रपति इलहाम अलीयेवले नागोर्नो काराबाखको शुशी सहर आफ्नो कब्जामा लिएको घोषणा गरेका छन् ।

अर्मेनियाले भने यस भेगमा भिडन्त जारी रहेको र अजरबैजानको दावि झुट भएको बताएको छ । दुई मुलुकबीच सीमानामा विवादित अवस्थाको नागोर्नो काराबाख क्षेत्र ४ हजार ४ सय वर्ग किलोमिटर क्षेत्रफलमा फैलिएको छ । यो पहाडी क्षेत्र हो ।

यो सोभियत सङ्घ विघटन हुनुभन्दा पहिला स्वायत्त क्षेत्र बनेको थियो । प्रारम्भमा यसलाई अजरबैजानकै हिस्सा मानिएको थियो । पछि अर्मेनियाले समेत यो क्षेत्रमा आफ्नो दावि बढाएपछि यहाँ सशस्त्र द्धन्द्ध भइरहेको छ । यहाँ इसाई अर्मेनीयाली र तुर्क मुसलमानको बाहुल्य छ ।

भेरापाज । ग्वाटेमालामा अविरल परेको वर्षाका कारण आएको भिषण पहिरोमा परी कम्तिमा ५० जनाको मृत्यु भएको छ । बीबीसीका अनुसार राष्ट्रपति एलेजान्डे गिएमाट्टीले थप १ सय जनाभन्दा धेरै पुरिएको र मानवीय क्षति अझै बढी हुन सक्ने जानकारी गराएका छन् ।

आँधीको कारण परेको ठूलो वर्षाका कारण अल्टा भेरापाज क्षेत्रको क्वीजा गाउँका घरहरु पुरिएका छन् । अहिले सेनाले प्रभावित क्षेत्रमा उद्धार र राहतको काम थालेको बताइएको छ ।

विहार । नेपालसँग जोडिएको भारतको रणनीतिक राज्य विहारमा अहिले आम निर्वाचन जारी छ । दोस्रो चरणको निर्वाचन सम्पन्न भइसकेको छ । अब तेस्रो तथा अन्तिम चरणका निर्वाचनपछि विहानमा आगामी ५ वर्षका लागि बन्ने सरकारको टुंगो लाग्ने छ ।

यसै राज्यका वर्तमान मुख्यमन्त्री नितिश कुमारले यो आफ्नो अन्तिम चुनाव भएको भन्दै अर्को पटकबाट आफु विधान सभामा उम्मेदबार नबन्ने घोषणा गरेका छन्।

बिहीबार चुनाव अभियानको समेत अन्तिम दिन हो । यस दिन आयोजित र्यालीलाई सम्बोधन गर्दै यो चुनाव अन्तिम रहेको भन्दै भोट मागेका हुन् ।

उनले भने, ‘आज निर्वाचन प्रचारप्रसारको अन्तिम दिन हो, एक दिनपछि मतदान हुँदैछ, मलाई तपाईहरूले विधान सभाका लागि मतदान गर्ने यो अन्तिम पटक हो, अन्तिमको मौका राम्रो भयो भने सधैँ राम्रो हुन्छ।’

काठमाडौं । भारतीय सेनाध्यक्ष मनोज मुकुन्द नरवणेलाई नेपाली सेनाको मानार्थ महारथीको उपाधि प्रदान गरिएको छ । राष्ट्रपति विद्यादेवी भण्डारीले बिहीबार शितल निवासमा आयोजित एक विशेष समारोहणमा भारतीय सेनाध्यक्षलाई उक्त उपाधी प्रदान गरेकी हुन् ।

नेपाल र भारतबीच एक देशका सेनापति अर्को देशको मानार्थ सेनापति हुने प्रचलन लामो समयदेखि रहीआएको छ । भारतीय सेनाध्यक्ष नरवणे तीन दिने नेपाल भ्रमणका सिलसिलामा बुधबार काठमाडौं अवतरण गरेका थिए । उनी बुधबार व्यक्तिगत भ्रमणमा व्यस्त रहे ।

आज दोस्रो दिन भने उनी व्यस्त रहे । आज उनले प्रधानसेनापतीसँग द्धिपक्षीय सैन्य सम्बन्धका विषयमा छलफल गरेका छन् । आजै नेपाल र भारतीय सेनाबीच सहयोग आदान प्रदान समेत भएको छ । उनले शुक्रबार प्रधानमन्त्री केपी शर्मा ओलीसँग भेटवार्ता गर्ने कार्यक्रम तय भएको छ ।