Category: विश्व

काठमाडौं । यमनमा नयाँ मन्त्रीपरिषद्का सदस्यसहित प्रधानमन्त्रीसमेतलाई लक्षित गरी विमानस्थलमै भयानक आक्रमण भएको छ । आक्रमणमा २२ जनाको मृत्यु भ्एको छ । यद्दपी मन्त्रीपरिषद्का सबै सदस्य सकुसल रहेको बीबीसीेले उल्लेख गरेको छ ।

यमनको दक्षिणी शहर अदनको विमानस्थलमा मन्त्रिपरिषदका नयाँ सदस्यहरुलाई लक्षित गरी आक्रमण भएको हो । घटनामा कम्तिमा २२ को मृत्यु भएको र ५० जनाभन्दा बढी घाइते रहेको समाचारमा जनाइएको छ ।

सुरक्षा अधिकारीका अनुसार नयाँ सरकारका सदस्यहरुलाई लिएर छिमेकी देश साउदी अरबबाट एक विमान एयरपोर्टमा झर्नासाथ भयानक विष्फोट भएको हो । मारिनेमा विमानस्थलका कर्मचारी र अधिकारी रहेको बताइएको छ । प्रधानमन्त्री र उनको मन्त्रिपरिषदका सबै सदस्य सुरक्षित छन् ।

विष्फोटपछि प्रधानमन्त्री मइन अब्दुलमलिक सइद र उनको मन्त्रिपरिषदका सदस्यहरुलाई सुरक्षा घेरामा राखेर सुरक्षित स्थानमा लगिएको बीबीसीले जनाएको छ ।

यमनका संचारमन्त्री इरियानीले हुथी विद्रोहीबाट कायरतापूर्ण हमला भएको बताएका छन् । कम्तिमा दुई पटक विष्फोट भएको आवाज सुनिएको स्थानीयले जनाएका छन् । हुथी विद्रोहीहरुले देशको पश्चिमी क्षेत्रका अधिकांश भाग नियन्त्रणमा लिएका छन् ।

लण्डन । बेलायतमा देखा परेको कोरोना भाइरसको नयाँ भाइरस यूरोपका ८ मुलुकसम्म बिस्तार भएको पाइएको छ । नयाँ प्रकारको कोरोना भाइरसको सङ्क्रमण अहिलेसम्म ८ वटा युरोपेली मुलुकमा फैलिएको अन्तराष्ट्रिय संचारमाध्यमले जनाएका छन् ।

युरोपेली संघ अन्तर्गतका आठ देशमा नयाँ प्रकारको कोरोना भाइरस देखिन थालेको पुष्टि भएको विश्व स्वास्थ्य संगठन (डब्ल्यूएचओ)ले उल्लेख गरेको छ । डब्ल्यूएचओका युरोपेली क्षेत्रका क्षेत्रीय निर्देशक हन्स क्युगले आफ्नो कार्यालयले अवस्थालाई गम्भीरतापूर्वक हेरिरहेको बताएका छन् ।

उनले नयाँ प्रकारको भाइरसका लागि रक्षात्मक र नियन्त्रणात्मक व्यवस्था कडाइकासाथ पालना गर्नु पर्ने बताए । कोरोनाको पुरानो भाइरसकोभन्दा फरक नतिजा देखाउँदै नयाँ प्रकारको भाइरसले युवाहरुलाई बढी प्रभावित पारेको देखिएको बताइएको छ ।

नयाँ प्रकारको कोरोना देखिएका आठ देशको पहिचान भएको बताए डब्लूएचओले मुलुकको नाम भने सार्वजनिक गरेको छैन । उनले सामाजिक दूरी कायम गर्ने, मास्क लगाउने र साबुन पानीले हात हुने वा स्यानिटाइजरको प्रयोग गर्ने जस्ता उपायलाई कडाइकासाथ अवलम्बन गर्न समेत आह्वान गरेका छन् ।

यसको गुण, लक्षण, असरलगायतमा अध्ययन अनुसन्धान भइरहेको र नतिजा आएमा धेरै कुरा प्रष्ट भइसकेपछि मात्र नयाँ रणनीति तय गर्न सकिने समेत डब्ल्यूएचओले उल्लेख गरेको छ । बेलायतमा पहिलो पटक देखिएको यो भाइरसले विश्वभर चिन्ता भने बढाएको छ ।

यससँगै विश्वभरबाट बेलायतमा भ्रमण रद्द गरिसकेका छन् । बेलायतबाट आउने मानिसहरुलाई समेत प्रतिवन्ध लागिसकेको छ ।

काठमाडौं । कुवेतमा आजदेखि कोरोना भाइरस विरुद्धको खोप लगाउन शुरु गरिने भएको छ । यो मुलुक नेपाली नागरिक बढी रहेको मध्ये एक हो । कुवेत सरकारले वृद्धवृद्धा र अग्रपङ्तिमा खटिएका स्वास्थ्यकर्मीलाई प्राथमिकतामा राखेर खोप वितरण गर्ने भएको छ । खोप देशव्यापी रुपमा सबै नागरिकलाई लगाउने योजना रहेको कुवेती संचारमाध्यमले जनाएका छन् ।

बुधबार मात्र खोपको पहिलो डोज आएको र अब लगाउन थालिने बताइएको छ । मुलुकमा खोप लगाउने अभियान नै चलाउन लागिएको स्वास्थ्य मन्त्री बसेल अल सबाहले बताएका छन् । उनका अनुसार एक, एक महिनाको अवधि वर्षभरि नै खोप भित्राइने भएको छ ।

खोप लगाएसँगै थप मानवीय क्षति नहुने र सङ्क्रमित समेत घट्ने विश्वास स्वास्थ्य मन्त्रीको छ । कुवेतले अन्तर्राष्ट्रिय उडान रोक्दै कोरोना विरुद्धको अभियानलाई समेत कडाई गरिरहेको छ ।

काठमाडौं । बेलायतले संसारमै पहिलो पटक कोरोना भाइरसको खोप लगाउन थालेको हो । तर, यस मुलुकमा कोरोना भाइरसको नयाँ प्रकृतिको भाइरस देखा परेको छ । सोहीकारण संसारभर बेलायतबाट हुने आगमनलाई प्रतिवन्ध लगाउन शुरु भएको छ । नेपालको छिमेकी मुलुक भारतले समेत बेलायत उडान रद्द गरेको छ ।

अहिलेसम्म ४० भन्दा धेरै मुलुकले बेलायतबाट सम्बन्धित मुलुकमा हुने आगमन रोकेका छन् । बेलायत र त्यहाँबाट हुने यात्रामा प्रतिबन्ध लगाउने देशको लामो सूचि बनिसकेको छ । कोरोना खोप लगाइरहेको मुलुकमा अब महामारी सामान्य हुने अपेक्षा थियो । तर, नयाँ प्रकृतिको भाइरस देखा परेपछि यसले चूनौति थपिदिएको छ ।

विश्व स्वास्थ्य सङ्गठन डब्ल्यूएचओले त्यसको जोखिमको सन्दर्भबारे ध्यान दिन आह्वान गरेको छ । डब्ल्यूएचओका आपत्कालीन मामिला प्रमुख माइक रायनले भाइरसको नयाँ प्रकार महामारीमा हुने विकासको एउटा सामान्य हिस्सा भएको भन्दै त्यो नियन्त्रण बाहिर नरहेको समेत बताएका छन् ।

युरोपेली सङ्घले संकट समाधानमा साझा नीति बनाउन छलफल गरिरहेको जनाएको छ । बेलायतसँगै डेनमार्क, अस्ट्रेलिया, इटाली र नेदरल्यान्ड्समा पनि नयाँ प्रकारको कोरोना भाइरसको सङ्क्रमण देखिएको छ ।

काठमाडौं । विकसित मुलुकहरुले कोरोना भाइरसको खोप प्रयोग थालिसकेका छन् । अमेरिका र बेलायतमा औपचारिक रुपमा खोप वितरण शुरु भएको छ । चीन र रुसले अनौपचारिक रुपमा लाखौं नागरिकलाई कोरोना खोप लगाइसकेका छन् । भारतसहित अन्य मुलुकहरुसमेत अब खोप वितरणको तयारीमा छन् ।

यस्तो अवस्थामा आफै खोप निर्माण गर्न नसक्ने र कमजोर आउस्रोत भएका मुलुकहरु भने अहिले पनि अन्यौलमा छन् । तत्काल खोप उपलब्ध नहुने अवस्थामा कतै गरिब मुलुकका नागरिकले मात्र ज्यान गुमाउन पर्ने हो की भन्ने चिन्ता समेत छ ।

तर, गरिब राष्ट्रले समेत सन् २०२१ को सुरूदेखि नै कोरोनाविरूद्धको खोप प्राप्त गर्ने आश्वासन विश्व स्वास्थ्य संगठन (डब्लुएचओ) ले दिएको छ । डब्लुएचओ र त्यसका साझेदारहरूले कोभ्याक्सलगायतका खोप शीघ्र उपलब्ध हुन सक्ने जानकारी शुक्रबार दिएका हुन् ।

विश्वभरका नागरिकलाई सुरक्षित राख्ने उद्देश्यसहित काम भइरहेको उनीहरुको भनाई छ । विश्व समुदायका लागि झण्डै दुई अर्ब मात्रा खोप सुरक्षित गर्न लागिएको स्वास्थ्य निकायका अधिकारीहरूको भनाई छ ।

शुक्रबार जारी एक विज्ञप्तीमा जनाइए अनुसार सबै देशले कोरोनाविरूद्धको खोप किनेर लैजान नसक्ने भएकाले ती देशमा सन् २०२१ को सुरू देखि नै खोप पठाउने तयारी भइरहेको छ ।

अध्यारो सुरुंगपछि उज्यालो आउने आशा गर्दै महामारीका बीच गरिब मुलुकलाई कोरोनाविरूद्धको खोप उपलब्ध गराउने प्रयास भइरहेको डब्लुएचओका प्रमुख टेड्रोस अधानोम गेब्रेयससले उल्लेख गरेका छन् ।

लण्डन । बेलायतले विदेशबाट आउने यात्रु र कोभिड–१९ सङ्क्रमित व्यक्तिको आइसोलेसन तथा क्वारेन्टिनब बसाई अवधि घटाएको छ । बेलायती संचारमाध्यमका अनुसार अब बेलायत जाने विदेशीले १४ दिनको साटो १० दिन मात्र क्वारेन्टिन बसे पुग्ने छ । यस्तो नियम शुक्रबार घोषणा गरिएको छ । जुन सोमबारबाट कार्यान्वयनमा आउने छ ।

वेल्समा भने यसअघि नै सोही नियम जारी छ । इङ्ल्याण्ड, स्कटल्याण्ड, उत्तरी आयरल्याण्डमा भने नयाँ नियम लागु गरिएको छ । कोभिड–१९ का विरामीहरूको समस्यालाई चिकित्सकीय विधिबाट अनुसन्धानपछि १० दिन मात्र क्वारेन्टिन बस्नुपर्ने नियम लागु भएको समेत जनाइएको छ ।

कार्डिफ, एडिनबर्ग र बेलफास्टको सरकारहरूले भने आफ्नै स्वास्थ्य नीति तय गरेका छन् र भाइरसको फैलावट रोक्न विभिन्न प्रतिबन्धहरू लागू भएका छन् । सङ्क्रमितले पनि १० दिनसम्म सामाजिक दूरी कायम गरी अलग बसेमा उसलाई घर वा काममा फर्किन अनुमति दिने गरी नियम बनेको छ ।

बेलायतले खोप सर्वसाधारणमा लगाउन शुरु गरेसँगै नियमहरु केही खुकुलो बनाएको हो । यद्दपी महामारी नियन्त्रण गर्न क्वारेन्टिन र सेल्फ आइसोलेसन महत्वपूर्ण भएकोमा भने अधिकारीहरु सहमत छन् । बेलायतमा पछिल्लो २८ दिनमा ५१६ जनाको ज्यान गइसकेको छ ।

नयाँ दिल्ली । भारतमा कृषि विधेयकविरुद्ध किसानको आन्दोलन देशव्यापी बनेको छ । त्यसक्रममा कृषकहरुले आज भारत बन्दको आयोजना गरेका छन् । प्रमुख प्रतिपक्षी भारतीय कंग्रेसहित कैयौं संगठनको स्वतस्फुर्त साथ पाएका किसानहरुले उठाएको विशाल आन्दोलनका कारण मोदी सरकार भने संकटमा पर्दै गएको छ ।

यसले आसन्न निर्वाचनहरु भारतीय जनता पार्टी (भाजपा)का लागि कठिन हुने संकेत गरेको छ । सरकारले आफ्ना मागमा बेवास्ता गरेको आरोप लगाउँदै किसानहरुले आज उनीहरूले देशव्यापी बन्द आह्वान गरेका हुन्‌। किसानको या बन्दको कार्यक्रमलाई भारतमा २४ वटा विपक्षी दलले समर्थन गरेका छन् ।

​किसान युनियन (क्रान्तिकारी) का अध्यक्ष दर्शनपाल सिंहले भने किसानको आन्दोलनलाई राजनीतिक रोटी सेकाउने माध्यम नबनाउन चेतावती समेत दिएका छन् । उनले समर्थन गर्ने सबै राजनीतिक दलहरूलाई धन्यवाद दिँदै भारत बन्दका बेला आफ्ना झण्डा र ब्यानरलाई घरमै छाडेर आउन र किसानलाई मात्रै समर्थन गर्न आग्रह गरेका छन्‌।

किसानहरुको स्वतस्फूर्त आन्दोलनमा कृषिसम्बन्धी कानुनहरु रद्ध गर्नुपर्ने माग रहेको छ । सरकारले ल्याएको कानुन लागु भएमा किसान थप मर्कामा पर्ने, कृषिजन्य उत्पादनले पर्याप्त मुल्य नपाउने उनीहरुको चिन्ता छ । प्रदेश सरकारहरुले किसानका माग सम्बोधन गर्न नसकेपछि अब यो मुद्दा भारतको राष्ट्रिय मुद्दा बनिसकेको छ ।

काठमाडौं । युरोपियन युनियनले नेपाली नागरिक उडड्न क्षेत्रमा व्यापक सुधार भएको भन्दै प्रशंसा गरेको छ । अन्तर्राष्ट्रिय नागरिक उड्डयन दिवसको अवसर पारी आज जारी गरेको वक्तब्यमा इयूले नेपालको हवाई क्षेत्रलाई कालो सूचीबाट हटाउने समेत संकेत गरेको छ। अन्तर्राष्ट्रिय नेपालले पछिल्लो समय सुरक्षामा महत्वपूर्ण सुधार गरेको भन्दै यस्तो संकेत गरेको हो ।

नेपाल सन् २०१३ यता इयूको कालोसूचीमा रहेको छ । जसले गर्दा नेपाली जहाज यूरोपमा गएर उड्न सक्दैनन् । सुरक्षित हवाइ उडानका लागि नेपाल सरकार र युनियनका सदस्य राष्ट्रहरूको संयुक्त प्रयास भइरहेको इयूको भनाई छ ।

नेपाल सरकारले हवाई सुरक्षा अभिवृद्धिमा गरेका प्रया प्रशंसनीय रहेको भन्दै इयूले हवाई सुरक्षाका चुनौतीसँग जुध्न बनाइएका संयन्त्रले सकारात्मक भूमिका खेल्ने उल्लेख छ । सरकारले नेपालमा नियामक र सेवा प्रदायक गरी नेपाल नागरिक उड्डयन प्राधिकरणको संस्थागत संरचना बदल्न लागेको छ । यस सम्बन्धी विधेयक अहिले संसदमा विचाराधीन छ ।

काठमाडौं । नाइजेरियामा बोको हराम समूहले बर्बर आतंक फैलाएको छ । यहाँ एकै पटक १ सय १० मजदुरको हत्या भएको अन्तर्राष्ट्रिय संचारमाध्यममा उल्लेख छ । बोको हरामका लडाकुले मजदुरको हत्या गरेका हुन् ।

नाइजेरियाको कोशोबे गाउँ तथा अन्य क्षेत्रमा खेतमा काम गरिरहेका १ सय १० जना किसानलाई बाँधेर घाँटी रेटेर बर्बर हत्या भएको हो । मृत्यु हुने महिला र पुरुष दुबै छन् । आंतककारी मोटरसाइकलमा आएका थिए ।

उनीहरुले खेतमा काम गरिरहेका किसानमाथि सांघातिक आक्रमण समेत गरेका थिए । घटनापछि स्थानीयको उद्धारमा मिलिसिया पठाइएको थियो । घटना स्थलमा १ सय १० जनाको शव घाँटी काटिएको अवस्थामा फेला परेको र ६ जना घाइते अवस्थामा भेटिएको बताइएको छ ।

८ जना भने अहिले पनि बेपत्ता छन् । उनीहरुलाई लडाकूले अपहरण गरेको हुनसक्ने आशंका गरिएको छ। नाइजेरियाका राष्ट्रपति मोहम्मद बुहारीले घटनाको निन्दा गरेका छन्। बोको हरामले नाइजेरियामा लामो समयदेखि आंतक मच्चाइरहेको छ ।

काठमाडौं । चिनियाँ रक्षामन्त्री वेइ फेङहे नेपालको एक दिने औपचारिक भ्रमण पुरा गरी बंगलादेश प्रस्थान गरेका छन् । आज बिहान साढे १० बजे काठमाडौं ओर्लिएका उनी आज दिनभर निकै व्यस्त रहे ।

उनलाई बिहान त्रिभुवन विमानस्थलमा गृहमन्त्री रामबहादुर थापा बादलले स्वागत गरेका थिए । त्यसपछि उनलाई नेपाली सेनाले आफ्नो मूख्यालयमा विशेष सम्मान गरेको थियो ।

जंगीअड्डामा सम्मान गारद प्रदान गरेपछि प्रधानसेनापति पूर्णचन्द्र थापासँग दुईपक्षीय हित र सैन्य सहयोगका विषयमा छलफल भएको छ । त्यसपछि चिनियाँ रक्षामन्त्री प्रधानमन्त्री केपी शर्मा ओलीसँगको भेटघाटका लागि वालुवाटार पुगेका थिए ।

प्रधानमन्त्रीसँगको छलफलपछि उनी राष्ट्रपति कार्यालय, शितल निवास पुगी राष्ट्रपति विद्यादेवी भण्डारीसँग भेटघाट गरेका छन् । शितल निवासबाट भने रक्षामन्त्री सिधै विमानस्थल लागेका हुन् । रक्षामन्त्रीको भ्रमण चीनबाट भएको पछिल्लो उच्चस्तरीय भ्रमण हो ।

काठमाडौं । पछिल्लो समय चीन र भारतबाट निरन्तर नेपालमा उच्चस्तरीय भ्रमण भइरहेको छ । सोही सन्दर्भमा आज चीनका रक्षामन्त्री नेपाल आउँदैछन् । जनगणतन्त्र चीनका राज्यपरिषद् सदस्य एवं रक्षामन्त्री वेइ फेङ्हो एकदिने औपचारिक भ्रमणका सिलसिलामा काठमाडौं आउँदैछन् ।

नेपालमा रहँदा उनले राष्ट्रपति विद्यादेवी भण्डारी र प्रधानमन्त्री तथा रक्षामन्त्री केपी शर्मा ओलीसँग औपचारिक भेट गर्नेछन् । प्रधानसेनापति पूर्णचन्द्र थापासँग पनि भेटघाट र सैन्य सहयोगका विषयमा छलफल गर्ने कार्यतालिका रहेको छ ।

नेपाल भ्रमण सकेर उनी आइतबार साँझ बंगलादेश प्रस्थान गर्नेछन् । चिनियाँ राष्ट्रपतिबाट गत वर्ष भएको भ्रमणपछि यो सबैभन्दा उच्च तहको भ्रमण हो ।

काठमाडौं । चिनियाँ रक्षामन्त्री आइतबार नेपाल भ्रमणमा आउने निश्चित भएको छ । सरकारले चीनका रक्षामन्त्री तथा स्टेट काउन्सिलर वेई फेङहीको नेपाल भ्रमणको औपचारिक घोषणा गरेको हो । नेपाल भ्रमणमा उनले राष्ट्रपति विद्यादेवी भण्डारी र प्रधानमन्त्री केपी शर्मा ओलीसँग औपचारिक भेटघाटको कार्यक्रम राखिएको छ ।

प्रधान सेनापति पूर्णचन्द्र थापासँग समेत उनको औपचारिक भेटघाटको कार्यक्रम छ । उनी आइतबार नै बंगलादेश जाने छन् । भारतीय विदेश सचिव हर्षवर्द्धन श्रृगंलाले दुई दिने नेपाल भ्रमण गरी शुक्रबार नै फर्केका हुन् । यससँगै चिनियाँ रक्षामन्त्री नेपाल भ्रमणमा आउने भएका हुन् ।

मस्को । रुसी कोरोना भ्याक्सिन स्पुतनिक भी भारतमा समेत उत्पादन हुने भएको छ । स्पुतनिक भी उत्पादक कम्पनीले स्थानीय साझेदारमार्फत भारतमै भ्याक्सिन उत्पादनको घोषणा गरेको हो । भारतमा भने हेटेरो नामक औषधि उत्पादक कम्पनीले उत्पादन गर्ने भएको छ । भारतमा वार्षिक १० करोड डोज खोप उत्पादनको सम्झौता भएको छ ।

हेटेरो भारतको अग्रणी औषधि उत्पादक कम्पनी मानिन्छ । हेटेरोसँग बर्सेनि १० करोड डोज भ्याक्सिन उत्पादन गर्ने सम्झौता भएको रुसी डाइरेक्ट इन्भेस्टमेन्ट फण्डले शुक्रबार वक्तव्यमार्फत जानकारी गराएको छ ।

आरडिआइएफका अनुसार सन् २०२१ को प्रारम्भबाटै भारतमा भ्याक्सिनको उत्पादन शुरु हुने भएको छ । रुसले यो खोप ९५ प्रतिशत प्रभावकारी ठहरिएको दाबी गरेको छ । पाँच महिना लामो पटकपटकको परीक्षणपछि रुसले यस्तो निष्कर्ष निकालेको हो ।

भ्याक्सिन उत्पादक कम्पनीले स्पुतनिक भी अन्यभन्दा सस्तो हुनेछ । कम्पनीका अनुसार‚ अन्तर्राष्ट्रिय बजारमा स्पुतनिक भी प्रतिडोज १० अमेरिकी डलरमा उपलब्ध हुने भएको छ ।
भारतबाहेक चीन‚ दक्षिण कोरिया‚ ब्राजिल लगायतका देशमा पनि स्पुतनिक भीको उत्पादन हुने गरी सम्झौता भइसकेको छ ।