Category: विश्व

काठमाडौं । संयुक्त राष्ट्रसङ्घका महासचिव एन्टोनियो गुटेर्रेसले इजरायल र हमासबिच जारी युद्धमा विगत ७५ दिनमा संयुक्त राष्ट्रसङ्घका १३६ जना कामदारको ज्यान गइसकेको र कैयौँ कर्मचारीलाई घरछोड्न बाध्य पारिएको बताएका छन् । राष्ट्र सङ्घको इतिहासमा यति धेरै सङ्ख्यामा आफ्ना कर्मचारीको हताहत भएको अहिलेसम्मको दुर्लभ घटना हो ।

“गाजामा हाम्रा १३६ सहकर्मी ७५ दिनमा मारिएका छन्, जुन हामीले राष्ट्रसङ्घको इतिहासमा कहिल्यै देखेका छैनौँ । हाम्रा अधिकांश कर्मचारीलाई घरबाट निकालिएको छ,” संयुक्त राष्ट्रसङ्घका प्रमुखले एक्स (ट्विटर) पोस्टमा लेखेका छन् । उनले भने, “म गाजामा सर्वसाधारणलाई सहयोग गर्ने हजारौँ सहायताकर्मीप्रति आधार प्रकट गर्दछु ।” अक्टोबर ७ मा इस्लामिक कट्टरपन्थी समूह ९हमास० ले गरेको आक्रमणपछि गाजामा द्वन्द्व चर्किएको थियो ।

करिब दुई हजार ५०० को सङ्ख्यामा हवाई, जल र स्थल मार्गबाट आक्रमणकारी लडाकु प्रवेश गरी इजरायली क्षेत्रमा आक्रमण गरेका थिए जसका कारण करिब एक हजार १४० जनाको हत्या गरेको थियो भने करिब २५० जनालाई बन्धक बनाएको इजरायली तथ्याङ्कमा उल्लेख गरिएको छ । त्यसपछि इजरायलले निरन्तर हवाई र जमीनी अभियानको साथ आक्रमणको बदलामा जवाफ दिइरहेको छ । गाजा पट्टीस्थित हमास सरकारको सञ्चार कार्यालयले बुधबार दिएको जानकारीअनुसार कम्तीमा २० हजार व्यक्तिको मृत्यु भएको छ, जसमध्ये आठ हजार बालबालिका र छ हजार २०० महिला रहेका छन् ।

इजरायलले गाजा आक्रमणलाई हमासको सम्पूर्ण आतङ्ककारी समूहलाई समाप्त गर्नका लागि पूर्वाधारलाई लक्षित गरेको र नागरिक हताहती लाई कम गर्ने प्रयासको रूपमा चित्रण गरेको छ । इजरायलको प्रतिरषा बलले गाजा सहरको शेजैया छिमेकमा पूर्ण ‘अपरेशनल कन्ट्रोल’ स्थापित गरेको बताएको छ । राससएएफपी

काठमाडौं । संयुक्त अरब एमिरेट्स (यूएई)बाट ३०३ जना भारतीय यात्रुहरूलाई लिएर उडेको एउटा विमानलाई शुक्रवार फ्रान्समा अवतरण गराइएको छ। सो विमान निकारागुआतर्फ गइरहेको थियो। फ्रान्सका सञ्चारमाध्यमहरूले उक्त विमानको प्रयोग मानव तस्करीका लागि भएको हुनसक्ने भन्दै त्यही कारणले त्यसलाई रोकिएको जनाएका छन्। फ्रान्समा एक जना वकिलले उक्त एअरबस ए३४० दुबईबाट निकारागुआको राजधानी मानागुआगा गइरहेको थियो।

तर गोप्य सूचना पाएपछि त्यसलाई फ्रान्सको राजधानी प्यारिसबाट १५० किलोमिटर पर रहेको भ्याट्खी विमानस्थलमा अवतरण गराइएको जनाएका छन्। सुरक्षा अधिकारीहरूले विमानमा सवार केही व्यक्तिहरूलाई नियन्त्रणमा लिएका छन्। त्यसपछि विमानस्थललाई बन्द गरिएको छ । उक्त विषयमा अनुसन्धान थालिएको छ र उक्त विमानलाई सो मध्य अमेरिकी देश किन लैजान खोजिएको थियो भन्नेबारे पत्ता लगाउने प्रयास भइरहेको छ।

फ्रान्सस्थित भारतीय राजदूतावासले यस मामिलालाई पुष्टि गर्दै फ्रान्सका अधिकारीहरूले आफूलाई त्यसबारे जानकारी दिएको जनाएका छन्।
दूतावासले भनेको छ, “दुबईबाट निकारागुआ गइरहेको विमानमा अधिकांश भारतीय मूलका नागरिक थिए। त्यसलाई मार्न क्षेत्रको भ्याट्खी विमानस्थलमा ‘टेकनिक्ल हल्ट’ भन्दै रोकिएको छ। दूतावासको टोली त्यहाँ पुगेको छ र उनीहरूलाई कन्सुलरसँगको पहुँच उपलब्ध गराइएको छ। दूतावासले पनि यस मामिलाको जाँच गरिरहेको छ।”

उक्त विमान रुमेनियाको चार्टर कम्पनी लिजेन्ड एअरलाइन्सको स्वामित्वमा थियो। कम्पनीका वकिल लिलियाना बाकायोकोले फ्रान्सेली समाचार च्यानल बीएफएमटीभीलाई फ्रान्सका अधिकारीहरूलाई अनुसन्धानमा सघाउन तयार रहेको जनाएकी छन्। उनले उक्त विमान केही दिनभित्रै आफ्नो गन्तव्यतर्फ प्रस्थान गर्ने अपेक्षा पनि गरेकी छन्। उक्त यात्राको उद्देश्य र सर्तहरूबारे अनुसन्धान थालिएको स्थानीय अधिकारीहरूले जनाएका छन्। उनीहरूले कतिपय यात्रुहरू गैरकानुनी आप्रवासी भएको हुनसक्ने जनाएका छन्।

फ्रान्सको अखबार ‘लु मोन्ड’ का अनुसार देशको सङ्गठित अपराधविरोधी राष्ट्रिय निकाय जुनालले अनुसन्धानमा आफ्नो अग्रसरता लिएको छ। विशेष जाँच दलका अधिकारीहरूले विमानमा सवार सबै यात्रुहरूलाई सोधपुछ गर्ने काम थालेका छन्। दुई जना यात्रुलाई हिरासतमा लिइएको छ। अहिलेसम्म जाँच पूरा भइसकेको छैन।

फ्रान्सका अधिकारीहरूले विमान अवतरण भएपछि सुरुमा यात्रुहरूलाई विमानमा नै बसिरहन भनिएको जनाएका छन्। तर पछि शुक्रवार रात त्यहाँ बस्ने प्रबन्ध मिलाउन भ्याट्खी विमानस्थलको आगमन कक्षलाई सुत्ने स्थानका रूपमा परिणत गरिएको थियो। प्रहरीले पुरै विमानस्थललाई घेराबन्दी गरेको छ।

फ्रान्सका अभियोजनकर्ताको कार्यालयले उक्त विमानमा सवार केही व्यक्तिहरू मानव तस्करीको सिकार हुनसक्ने गुप्तचरी जानकारी प्राप्त भएको जनाएको थियो। हालैका महिनाहरूमा युरोप र अमेरिकाले आफ्नो आप्रवासन सम्बन्धी नियमहरूमा कडाइ गरेका छन्। युक्रेनमाथि रुसको आक्रमण, इजरेल र हमासबीचको युद्ध र कैयौँ अफ्रिकी देशहरूमा जारी गृहयुद्धका कारण गैरकानुनी माध्यमबाट अमेरिका र युरोप जाने मानिसहरूको सङ्ख्या बढ्दै गएको छ।
बीबीसी

काठमाडौं । युक्रेनको सेनाले शुक्रवार देशको दक्षिणमा तीन वटा रुसी लडाकु जेट खसालेको दावि गरेको छ । बमवर्षक सु २५ जेट विमानहरू खेअर्सन क्षेत्रमाथिबाट खसालिएको युक्रेनको एअर फोर्सले घोषणा गरेको छ। राष्ट्रपति भोलोदिमिर जेलेन्स्कीले ती विमान खसाल्ने सैनिकहरूलाई धन्यवाद दिँदै उक्त घटना युद्धग्रस्त खेअर्सन क्षेत्रमा भएको बताएका छन्।

यी दाबीहरूबारे मस्कोले कुनै प्रतिक्रिया जनाएको छैन तर प्रभावशाली रुसी ब्लगरहरूले क्षतिबारे उल्लेख गरेका छन्। शुक्रवार आफ्नो रात्रिकालीन सम्बोधनका क्रममा जेलेन्स्कीले विमान खसालिएको घटनाले युक्रेनमा निशाना बनाइरहेका रुसी पाइलटहरूलाई कोही पनि सजाय नपाईकन नजाने भनेर सजग गराएको बताए।

उनले नेदरल्याण्ड्सका प्रधानमन्त्री मार्क रुटेसँग कुरा गरेर भविष्यमा एफ १६ जेट पठाउनेबारे र नयाँ ईयू सहायता प्याकेजबारे छलफल गरेको बताए। मस्कोले जेटहरूको क्षतिका बारेमा प्रतिक्रिया जनाएको छैन तर फाइटरबमर भनेर परिचित युद्धसम्बन्धी एकजना प्रभावशाली रुसी ब्लगरले सङ्ख्या नखुलेका विमानहरूको क्षति भएको जनाउँदै ती सम्भवतः अमेरिकामा बनेका प्याट्रोइट क्षेप्यास्त्रहरूले खसालेको हुनसक्ने भनेका छन्।

ती ब्लगरले बच्न सफल भएका पाइलट र मृतकहरूको शव फेला पारिएको जनाएका छन्। अर्का ब्लगर भोइनी ओस्भेदोमितेलले ती विमानहरू सम्भवतः रुस नियन्त्रित ड्निप्रो नदितर्फ रहेका युक्रेनी आधारहरूमा बम खसाल्न प्रयोग भएको हुनसक्ने बताएका छन्। सन् २०२२ को फेब्रुअरीयता पूर्ण आकारको अतिक्रमण सुरु गरेको रुसी फौजसँग लडिरहँदा युक्रेनले गोला बारुदको अभाव सामना गरिरहेको छ।
बीबीसी

काठमाडौं । चेक गणराज्यको राजधानी प्रागस्थित चार्ल्स युनिभर्सिटीमा गोली काण्ड भएको छ । एक व्यक्तिले गोली प्रहार गरी १४ जनाको ज्यान लिएको समाचा एजेन्सीहरुले जनाएका छन् । गोली चलाउने व्यक्ति पनि सुरक्षाकर्मीको कारबाहीमा मारिएका छन् । कुल १५ जना मारिएको यो घटनामा अन्य २४ जना घाइते भएका छन् ।

समाचार एजेन्सी रोयटर्सका अनुसार बिहीबार मानविकी संकाय (आर्टस् फ्याकल्टी)को एक २४ वर्षीय विद्यार्थीले अन्धाधुन्द गोली चलाएका थिए । गोली चलेपछि मानिसहरुको भागदौड मच्चिएको थियो । कतिपय छतबाट पनि हामफालेका थिए ।

चार्ल्स विश्वविद्यालय चेक रिपब्लिकको सबैभन्दा पुरानो र सबैभन्दा ठूलो विश्वविद्यालय हो । यो युरोपकै पुराना संस्थाहरुमध्ये एक हो । विश्वविद्यालय रहेको क्षेत्र विख्यात पर्यटकीय क्षेत्र पनि हो । यहाँ हरेक वर्ष नयाँ वर्ष मनाउन मानिसहरुको ठूलो भिड जम्मा हुन्छ ।

राष्ट्रपति पिटर पावेलले विश्वविद्यालय क्षेत्रमा गोली चलेको घटनाबाट आफू स्तब्ध भएको बताएका छन् । साथै मृतक परिवारजनप्रति समवेदना प्रकट गरेका छन् । यो घटना कुनै अन्तर्राष्ट्रिय आतंकवादीसँग सम्बन्धित नभएको चेक प्रहरीले जनाएको छ ।

चेक रिपब्लिकमा बन्दुकधारीको आक्रमणबाट मानिस मारिनु सामान्यजस्तै भइसकेको छ । यद्यपि चेक रिपब्लिकको स्वतन्त्रतापछि यो हालसम्मकै घातक आक्रमण भएको बीबीसीले जनाएको छ । यसअघि सन् २०१५ मा एक रेष्टुरेन्टमा गोली चल्दा आठ जनाको ज्यान गएको थियो ।

काठमाडौं । हमास सञ्चालित स्वास्थ्य मन्त्रालयले अक्टोबर ७ तारिखमा युद्ध सुरु भएयता १९,६६७ जना मारिएका जनाएको छ। मारिनेको पछिल्लो सङ्ख्या सामाजिक सञ्जालमा खुलाउँदै मन्त्रालयले थप ५२,५८६ व्यक्ति घाइते भएका जनाएको छ। उक्त क्षेत्रमा लडाइँ रोक्न अन्तर्राष्ट्रिय रूपमा तीव्र दबाव परिरहेका बेला मृत्यु हुने र घाइते हुने मानिसको ताजा सङ्ख्या सार्वजनिक भएको हो। अक्टोबरमा हमासका बन्दुकधारीले दक्षिणी इजरेलमा गरेको हमलायता भएको युद्धको १० साता बितिसकेको छ।

दक्षिणी गाजास्थित रफाहमा बस्ने सर्वसाधारणले इजरेलको भारी बमबारीका कारण त्यहाँको जीवन कस्तो छ भन्नेबारे सुनाएका छन्। प्यालेस्टिनी जिहाद जुरोबले सञ्चारसंस्था एएफपीसँग बोल्दै भने, “ठूलो विस्फोटनको आवाज सुन्दा हामी सुतिरहेका थियौँ।” गाजा सहरबाट आन्तरिक रूपमा विस्थापित भएका उनले आफूले चमत्कारले मृत्यु छलेको र लुगा राख्ने ठाउँबाट आफूहरूको उद्धार भएको बताए।

उनले सुरक्षाका लागि दक्षिणी क्षेत्र छोडेको भए पनि गाजामा जताततै बमबारी भएका कारण कतै पनि सुरक्षित ठाउँ नरहेको बताए। गाजा सहरबाट विस्थापित भएका अर्का व्यक्ति मोहम्मद जुरोबले हमलापछि इँटाहरू आफूमाथि खसेपछि ब्युँझिएको बताए। मेरो शरीरमा जताततै चोटहरू छन्, मेरो खुट्टा यस्ता चोटहरूले भरिएका छन्। हमलामा ज्यान गुमाउनेमा काका, काकाका सन्तानलगायत रहेको उनले बताए। मैले यहाँ आफ्नो परिवारका नौजना गुमाए,” उनले भने।

गाजामा युद्धविराम गर्नेबारे संयुक्त राष्ट्रसङ्घको सुरक्षा परिषद्‌मा मतदान हुनुअघि जिनिभामा सहायता निकायहरूले बालबालिकासहित सर्वसाधारणले भोगिरहेको पीडाप्रति एक पटक फेरि आफ्नो आक्रोश र निराशा व्यक्त गरेका छन्। राष्ट्रसङ्घको सुरक्षा परिषद्‌मा गाजामा युद्धविरामबारे दोस्रो पटक मतदानको तयारी भइरहेको छ। यसअघि भएको मतदानमा अमेरिकाले भिटो प्रयोग गरेको थियो। विश्व स्वास्थ्य सङ्गठनकी मार्गरेट ह्यारिसले भनिन्, “विश्वले यस्तो काम हुन दिइरहेको छ भन्ने नै विश्वास गर्नै नसकिने कुरा हो, यो अनुचित हो।

विश्व स्वास्थ्य सङ्गठनले गाजामा मुस्किलले एक तिहाइ अस्पतालहरू अझै सञ्चालनमा रहेको र तिनीहरूले एकदमै कम सेवा दिन सकिरहेको बताएको छ। ह्यारिसले गाजामा रहेका आफ्ना सहकर्मीहरूसँग त्यहाँ आफूले देखेको भयावह अवस्था व्याख्या गर्न शब्द नै नभएको बताइन्। सहायता निकायहरूको अस्पष्टताले अन्तर्राष्ट्रिय समुदाय र राष्ट्रसङ्घको सुरक्षा परिषद्को यो र अन्य द्वन्द्व सल्टाउन नसकेकोप्रति बढ्दो आक्रोश देखाउँछ जुन द्वन्द्वमा बालबालिका, वृद्धवृद्धा र अपाङ्गता भएका मानिसहरूले सबैभन्दा बढी मूल्य चुकाउनुपरेको छ।
बीबीसी

काठमाडौं । विभिन्न विपक्षी दलका ७८ जना संघीय सांसदलाई ‘पटक–पटक संसद्को कार्यवाही अवरुद्ध गरेको’ भन्दै जारी हिउँदे अधिवेशनको बाँकी अवधिका लागि सोमबार निलम्बित गरिएको छ । भारतीय संसदको तल्लो सदन लोकसभाका ३३ र माथिल्लो सदन राज्यसभाका ४५ जना सांसदको संलग्नता रहेको यो निलम्बनलाई भारतको संसदीय इतिहासमा सांसदहरूको सबैभन्दा ठूलो निलम्बनको रूपमा वर्णन गरिएको छ । गत साता लोकसभाका १३ र राज्यसभाका एक गरी १४ सांसदलाई सदनको कार्यवाहीका क्रममा ‘अमर्यादित आचरण’ गरेको भन्दै निलम्बित गरिएको थियो ।

त्यसैगरी, गत डिसेम्बर १३ मा दुईजना युवाले भिजिटर्स ग्यालरीबाट लोकसभा प्रवेश गरी सङ्घीय सरकारविरुद्ध नाराबाजी गर्दै रङ फ्याँकेपछि संसदभित्र सुरक्षा उल्लङ्घनको विषय उठाउँदै पटक–पटक स्थगन भएपछि सांसदहरूलाई निलम्बन गरिएको थियो । भारतीय प्रधानमन्त्री नरेन्द्र मोदीले सुरक्षा उल्लङ्घनको घटना ‘अत्यन्त गम्भीर’ भएको बताएका छन् ।

सोमबार निलम्बित विपक्षी सांसदहरूले सांसदहरूको निलम्बन फुकुवा गर्न र संघीय गृहमन्त्री अमित शाहले गत हप्ता संसद सुरक्षा उल्लङ्घनको घटनालाई लिएर वक्तव्य जारी गर्न माग गरेका थिए । निलम्बनपछि लोकसभाको नियमित कारबाही दिनभरका लागि स्थगित गरिएको थियो । सिह्न्वा, रासस

काठमाडौं । उत्तरी चीनमा भूकम्प जाँदा एक सयभन्दा बढीको मृत्यु भएको छ । दुई सय भन्दा बढी घाइते छन् । नेपाली समयअनुसार आज बिहान २ बजे कान्सु प्रान्तलाई केन्द्रविन्दु बनाएर ६.२ म्याग्निच्युडको भूकम्प गएको हो । भूकम्पले कान्सु र छिङ्हाइ प्रान्तमा क्षति पुगेको छ । चिनियाँ समाचार एजेन्सी सिन्ह्वाका अनुसार कान्सुमा १०० जनाको मृत्यु र ९६ जना घाइते भएका छन् । यसैगरी छिङ्हाइमा ११ जनाको मृत्यु र १२४ जना घाइते भएका छन् ।

भूकम्पले यातायात, सञ्चार, विद्युत आपूर्ति बन्द भएको छ । कतिपय स्थानमा पानीको आपूर्ति पनि रोकिएको छ । भूकम्प प्रभावित क्षेत्रमा अत्यधिक जाडो रहेकाले स्थानीय समस्यामा परेका छन् । बिहानैदेखि खोज तथा उद्धारलाई तीव्रता दिइएको छ । चिनियाँ राष्ट्रपति सी जिनपिङले एक वक्तव्य जारी गर्दै भूकम्प प्रभावितहरुको उद्धार, राहत र घाइतेहरुको उपचारमा पूरै शक्ति परिचालन गरिएको जानकारी दिएका छन् । गत सेप्टेम्बरमा सिचुवान प्रान्तमा ६.६ म्याग्निच्युडको भूकम्प जाँदा ६० जनाको मृत्यु भएको थियो ।

काठमाडौं । लिबियाको तटमा डुबेर ६० जनाभन्दा बढी आप्रवासीको मृत्यु भएको हुनसक्ने अन्तर्राष्ट्रिय आप्रवासी सङ्गठन (आईओएम)ले जनाएको छ। घटनामा बच्न सफल भएका आप्रवासीलाई उद्धृत गर्दै उक्त संयुक्त राष्ट्रसङ्घीय निकायले “एउटा समुद्री डुङ्गा जुवारा सहरबाट हिँड्दा त्यसमा करिब ८६ जना चढेका थिए” भनेको छ।

उसले उच्च छालहरूले डुङ्गालाई बगाएको र बालबालिकासहित ६१ जना आप्रवासी बेपत्ता भएको तथा सम्भवतः उनीहरूको ज्यान गएको हुनसक्ने अनुमान गरेको छ। भूमध्यसागर पार गरेर युरोप प्रवेश गर्न खोज्ने आप्रवासीहरूको लागि लिबिया मुख्य प्रस्थानबिन्दु हो। आईओएमको अनुमान अनुसार यो वर्ष मात्र उक्त क्षेत्रलाई पार गर्ने प्रयास गर्दा दुई हजार दुई सयभन्दा बढी मानिस भूमध्यसागरमा डुबेका छन्।

त्यसले गर्दा उक्त समुद्री बाटो विश्वको सबैभन्दा खतरनाक आप्रवासी मार्गमध्ये एक बन्न पुगेको छ। आईओएमले पछिल्लो घटनामा पर्ने अधिकांश मानिसहरू नाइजिरिया, गाम्बिया र अन्य अफ्रिकी देशका रहेको बताएको समाचार एजेन्सी एएफपीले जनाएको छ। उक्त निकायले बचेका २५ जनालाई लिबियाको हिरासतमा स्थानान्तरण गरिएको र उनीहरूलाई चिकित्सा सहायता दिइएको बताएको छ।

पहिले ट्विटर भनिने एक्समा लेख्दै आईओएमका एकजना प्रवक्ताले यस वर्षको मृत्युको सङ्ख्यालाई एकदमै उच्च भनेका छन्। उनले त्यो सङ्ख्याले आप्रवासीहरूको जीवन बचाउन पर्याप्त काम भइरहेको छैन भन्ने देखाउने उनले उल्लेख गरेका छन्। गत जुनमा दक्षिणी ग्रीसमा माछा मार्ने डुङ्गामा चढेका आप्रवासीहरू डुब्दा कम्तीमा ७८ जनाको मृत्यु भएको थियो। उक्त घटनामा अन्य १०० जनाको उद्धार गरिएको थियो।

भूमध्यसागर पार गरेर युरोप जानका लागि प्रायः धेरै आप्रवासीहरूलाई उक्त मार्गबाट असुरक्षित रूपमा डुङ्गाहरूमा राखेर लगिएको देखिन्छ। त्यसरी असुरक्षित रूपमा यात्रा गर्नेहरूमध्ये अधिकांशले इटली पुग्ने आशा राखेका हुन्छन्। त्यहाँबाट उनीहरू अन्य युरोपेली देश जान चाहन्छन्। कतिपय आप्रवासीहरू द्वन्द्वका कारण देश छाडेका हुन्छन् भने कतिपयले चाहिँ कामका लागि युरोप जाने सपना देखेका हुन्छन्।

आईओएमका अनुसार आप्रवासीका लागि मध्य भूमध्यसागर संसारकै सबैभन्दा घातक मार्ग हो। प्रायः केही परिष्कृत रबर डिङ्गीजस्ता डुङ्गामार्फत् धेरै मानिसहरूले सागर पार गर्ने प्रयास गर्छन्। त्यसले गर्दा यात्रा झनै जोखिमपूर्ण हुन्छ र घातक हुने सम्भावना बढ्छ। त्यस्ता डुङ्गाहरू धेरैजसो आपराधिक गिरोह र मानवतस्करहरूले सञ्चालन गर्छन्। मध्य भूमध्यसागरको मार्ग हुँदै युरोप पुग्न खोज्ने आप्रवासीहरूका लागि लिबियाको छेउमा अवस्थित ट्यूनिशिया पनि मुख्य प्रस्थानबिन्दु हो।

त्यहाँ समुद्रमा डुबेर ज्यान गुमाउने मानिसका लाग आरक्षित चिहान पनि छ। तर त्यसले पनि आप्रवासीहरूलाई उक्त बाटो प्रयोग गर्नबाट रोकेको छैन। आईओएमजस्ता संस्थालाई भने अन्य आप्रवासीहरूलाई यी कुराले निरुत्साहित नगर्ने डर छ। उसले सधैँ त्यसबारे चिन्ता व्यक्त गर्दै आएको छ। युरोपेली सीमा र तटरक्षक निकाय फ्रन्टेक्सको विवरणअनुसार सन् २०१५ देखि २०२२ बीचमा झन्डै तीन लाख मानिसहरूलाई त्यहाँबाट उद्धार गरिएको थियो।

संयुक्त राष्ट्रसङ्घीय शरणार्थी नियोगका अनुसार यो वर्ष ट्युनिशिया र लिबियाबाट एक लाख ५३ हजार भन्दा बढी आप्रवासीहरू इटली पुगेका छन्। शनिवार यूकेका प्रधानमन्त्री ऋषि सुनकले आफ्ना इटली र अल्बेनियाका समकक्षीहरूसँग युरोपमा गैरकानुनी आप्रवासी रोक्ने विषयमा रोममा छलफल गरेका थिए। यसै वर्षको सुरुमा सुनकले इङ्ग्लिस च्यानलमा साना डुङ्गा पार गर्ने कामलाई रोक्ने विषयलाई आफ्नो सरकारको प्रमुख पाँच प्राथमिकताको क्षेत्रका रूपमा घोषणा गरेका थिए।

काठमाडौं । १० वर्ष वर्षपछि सोमवार हुने प्रान्तीय निर्वाचनअघि इराकी सुरक्षाकर्मीले शनिवार देशका १८ प्रान्तमध्ये १५ प्रान्तमा मतदान गरेका छन् । स्थानीय समयानुसार बिहान ७ बजेपछि मतदान सुरु भएको हो । इराकी राजधानी बगदाद र सेमीका तीन प्रान्तहरू बाहेक देशका १५ प्रान्तका अन्य धेरै सहरका मतदान केन्द्रहरूमा सैनिक र प्रहरीहरू मतदान गरेका छन् ।

इराकको स्वतन्त्र उच्च निर्वाचन आयोगको तथ्याङ्क अनुसार १५ प्रान्तका ५६५ मतदान केन्द्रहरूमा सुरक्षाकर्मीहरूबाट १० लाखभन्दा बढी मतदाताहरूले मतदान गर्ने अपेक्षा गरिएको छ । इराकमा पछिल्लो प्रान्तीय निर्वाचन अप्रिल २०१३ मा भएको थियो । सिन्ह्वा

काठमाडौं । इजरायलको सेनाले गाजामा लडाइँका क्रममा भुलवश तीनजना बन्धकहरू मारिएको जनाएको छ। उनीहरूलाई जोखिमका रूपमा गलत पहिचान हुँदा त्यसो हुन पुगेको इजरेली डिफेन्स फोर्स आइडिएफले जनाएको छ। ती २८ वर्षीय योतम हइम, २२ वर्षीय समीर तलल्का र र २६ वर्षीय एलोन सम्रिज रहेको जनाइएको छ।

इजरायली सेनाले आत्मग्लानि महसुस गरेको जनाउँदै उनीहरूको उत्तरी गाजामा तैनाथ फौजहरूको गोली प्रहारबाट मृत्यु भएको जनाएको छ। इजरायमा ७ अक्टोबरमा भएको हमलापछि नियन्त्रणमा लिइएकामध्ये १०० भन्दा धेरै अझै गाजामा बन्धक अवस्थामा छन्।

आइडिएफले शुक्रवारको घटना अनुसन्धानका क्रममा रहेको बताउँदै त्यस दुखद घटनालाई लिएर गहिरो आत्मग्लानि व्यक्त गरेको र उनीहरूका परिवारलाई समवेदना जनाइएको उल्लेख गरेको छ। जसमा थप भनिएको छ हाम्रो राष्ट्रिय उद्देश्य हराइरहेकालाई खोज्ने र सबै बन्धकहरूलाई घर फिर्ता ल्याउने छ।

गलत पहिचान कसरी भयो भन्ने विषयमा आइडिएफका एकजना प्रवक्ता जोनाथन कनरिकसले दुई सम्भावित कारण बताए। “एक, उनीहरू सर्वसाधारणले लगाउने पोसाकमा थिए, जुन सम्भवतः हामीले हमास लडाकुहरूलाई जस्तो स्वरूपमा देख्छौँ त्यस्तै थियो,” उनले भने। तर उनले ती बन्धकहरूसँग हतियार थियो कि थिएन भन्नेबारे प्रस्ट पारेनन्। “दोस्रो चाहिँ यस दुस्खद् गल्ती हुनुअघि र पछि उक्त क्षेत्रमा इजरेली फौज र हमासका लडाकुबीच लडाइँ भएको थियो।”

उक्त घोषणापछि मध्य तेलअभिभमा सयौँ मानिसहरू जम्मा भएर उक्त सहरमा रहेको आइडिएफको सैन्य शिविरतर्फ गएका थिए। उनीहरूले सरकारसँग बाँकी बन्धकहरूलाई छुटाउनेगरी सम्झौता गर्न माग गरेका छन्। प्रदर्शनकारीहरूले मैनबत्ती एवं उनीहरूलाईे घर ल्याउन र अब बन्धक साटासाट गरौँ लेखिएका प्लेकार्ड बोकेका थिए। मारिएका तीनजना पुरुषहरूका शवलाई इजरायल ल्याएर उनीहरूको पहिचान पुष्टि गरिसकिएको छ। इजरायली प्रधानमन्त्री बेन्जमिन नेतन्याहूले उनीहरूको मृत्युलाई असह्य दुःख भनेका छन्।

ूयस दुःखद् साँझमा समेत हामी आफ्नो घाउमा पट्टि लगाउँदै, पाठहरू सिक्दै र हाम्रा सबै बन्धक बनाइएकाहरूलाई सुरक्षित घर फर्काउने उच्चतम प्रयास जारी राख्नेछौँ, उनले भने। ह्वाइटहाउसका प्रवक्ता जोन किर्बीले ती हत्या एउटा दुस्खद् भूल भएको र अमेरिकासँग त्यस कारबाही ठ्याक्कै कसरी भयो भन्ने जानकारी नरहेको बताए। अक्टोबर ७ मा हमासले गरेको आक्रमणमा १,२०० जनाको ज्यान गएको थियो भने २४० जनालाई बन्धक बनाएर लगेको थियो जसमध्ये केही एउटा अस्थायी युद्धविरामका क्रममा छाडिएका थिए।

त्यसयता इजरेलले गरेको हमलामा १८,८०० जनाभन्दा बढी मारिएको र ५०,००० भन्दा धेरै घाइते हुन पुगेको गाजामा हमासद्वारा सञ्चालित स्वास्थ्य मन्त्रालयले जनाएको छ। अल जजिराले आफ्ना एकजना पत्रकार समिर अबु दका गाजाको खान यूनिसमा भएको क्षेप्यास्त्र प्रहारमा परेर मारिएको जनाएको छ। इजरायलले हमासले बन्धक बनाएका थप तीन मानिसहरूको शव गाजाबाट बरामद गरेको जनाएको छ। जसमध्ये दुई इजरेली सैनिक र एक सर्वसाधारण छन्।

काठमाडौं । प्रमुख विपक्षी दलका पाँच सदस्यको पछिल्लो दुई सातामा कारागारमा मृत्यु भएको अधिकारी र आफन्तहरूले आइतबार बताएका छन् । 

बङ्गलादेश नेसनलिस्ट पार्टी (बिएनपी)ले आगामी जनवरी ७ मा हुन गइरहेको आम निर्वाचनलाई बहिष्कार गरेको छ । उक्त निर्वाचनबाट वर्तमान प्रधानमन्त्री शेख हसिना पुनः निर्वाचित हुने तय भएको छ । 

बिएनपीका अनुसार अक्टोबर २८ मा राजधानी ढाकामा विपक्षीहरूको एउटा विशाल प्रदर्शनपछि भएको ‘अभूतपूर्व कारबाही’ मा पछिल्ला पाँच सातामा उसको सम्पूर्ण नेतृत्व र २० हजारभन्दा बढी राजनीतिज्ञलाई पक्राउ गरिएको छ । प्रहरीले बिएनपीको गिरफ्तारीको आँकडालाई अस्वीकार गरेको छ तर कति विपक्षी कार्यकर्तालाई हिरासतमा लिइएको हो भन्नेबारे कुनै विवरण सार्वजनिक गरेको छैन । 

कैदी परिवारका केही सदस्यसहित बिएनपीका केही हजार समर्थक कार्यकर्ताहरूको रिहाइको माग गर्न आइतबार मध्य ढाकामा जम्मा भएका थिए । गत महिना न्युयोर्कस्थित ह्युमन राइट्स वाचले अक्टोबर २८ को प्रदर्शनपछि कम्तीमा १० हजार विपक्षी समर्थकलाई गिरफ्तार गरिएको अनुमान गरेको थियो । 

प्रहरीका अनुसार सो प्रदर्शनपछि भएको हिंसामा एक प्रहरी अधिकारी र पाँच सर्वसाधारणको ज्यान गएको तथा करिब तीन सय बसमा आगजनी भएको थियो । यद्यपि बिएनपी र सबैभन्दा ठूलो इस्लामी दल जमात–ए–इस्लामीले कम्तीमा २० मानिसको ज्यान गएको बताएका छन् । जमात–ए–इस्लामीमाथि गत महिना प्रतिबन्ध लगाइएको थियो । 

बिएनपीले पछिल्ला दुई सातामा हिरासतमा आफ्ना पाँच कार्यकर्ताको मृत्यु भएको पार्टीका कानून प्रमुख कैसर कमालले एएफपीलाई बताउनुभयो । “हामी मृत्युको पूर्ण न्यायिक र निष्पक्ष अनुसन्धान चाहन्छौँ, यो गम्भीर छ”, उहाँले भन्नुभयो, “राष्ट्रव्यापी कारवाहीमा गिरफ्तार गरिएपछि धेरै बिएनपी कार्यकर्तालाई प्रहरी हिरासतमा प्रताडित गरिएको थियो भन्ने हामीलाई थाहा भएको छ ।” रासस, एएफपी 

काठमाडौं ।  रणनीतिकरूपमा अवस्थित टापु समूह राष्ट्र माल्दिभ्सका राष्ट्रपतिले आफ्नो मुलुकबाट सेना फिर्ता गर्न भारत सहमत भएको बताएका छन् । राष्ट्रपति निर्वाचनअघि उनले भारतीय सेना फिर्ता गराउने वाचा गरेका थिए ।

यद्यपि राष्ट्रपति मोहम्मद मुइज्जुले भारतीय सेनाको स्थानमा चिनियाँ सैनिक तैनाथ गरेर क्षेत्रीय सन्तुलनलाई बिगार्ने आफ्नो मनसाय नरहेको बताए । भ्रष्टाचारको आरोपमा कारागारमा रहेका चीन समर्थक पूर्वराष्ट्रपतिको अप्रत्यक्ष सहयोगमा मुइज्जु गत सेप्टेम्बरमा राष्ट्रपतिमा निर्वाचित भएका थिए ।

“भारत सरकारसँगको शृङ्खलाबद्ध रचनात्मक बैठक र संवादपछि भारतीय सैनिक फिर्ता गर्ने सहमति भएको छ”, आइतबार राति राष्ट्रपतिको कार्यालयले एक विज्ञप्ति जारी गर्दै भनेको छ । समुद्री क्षेत्रमा गस्ती गर्ने तीनवटा उपहारप्राप्त विमान सञ्चालन गर्नका लागि भारतीय सैनिकहरू माल्दिभ्समा तैनाथ छन् ।

प्राचीन सेतो समुद्री तट र एकान्त रिसोर्टहरूका साथ मुख्यरूपमा दक्षिण एसियाको सबैभन्दा महँगो बिदा मनाउने स्थलहरूमध्येको एकका रूपमा चिनिने माल्दिभ्स भूराजनीतिक ‘हटस्पट’ बनेको छ । विश्वव्यापी पूर्व–पश्चिम ढुवानी लेनहरूले भूमध्य रेखा पार गरी आठ सय किलोमिटर (पाँच सय माइल) फैलिएको माल्दिभ्सको एक हजार एक सय ९२ साना कोरल टापुहरूको शृङ्खलालाई पार गर्दछ ।

राष्ट्रपति मुइज्जुको कार्यालयले भारतीय सैनिकहरूको फिर्तीको सम्झौता ‘प्राविधिस्तरमा प्रगतिमा रहेको’ जनाएको छ । आफ्नो माटोमा विदेशी सैन्य उपस्थितिको अनुपस्थिति सुनिश्चित गर्नका लागि प्राथमिकरूपमा कूटनीतिक च्यानलहरू प्रयोग गर्ने आफ्नो प्रतिबद्धतामाथि जोड दिइएको विज्ञप्तिमा उल्लेख छ ।

माल्दिभ्सले सेना फिर्ताका लागि कुनै समयसीमा दिएको छैन र सोमबार नयाँदिल्लीबाट पनि तत्काल कुनै प्रतिक्रिया आएको छैन । दुबईमा संयुक्त राष्ट्रसङ्घीय कोप२८ सम्मेलनका अवसरमा राष्ट्रपति मुइज्जु र भारतीय प्रधानमन्त्री नरेन्द्र मोदीबिच भएको एक बैठकपछि यस्तो सहमति भएको हो ।

माल्दिभ्सले भनेको छ, “दुवै नेता माल्दिभ्समा जारी विकास परियोजनाहरूसँग सम्बन्धित चुनौतीहरूलाई सम्बोधन गर्न समन्वय गर्ने प्रयासका लागि उच्चस्तरीय समिति गठन गर्न सहमत हुनुभएको छ ।” रासस/एएफपी

काठमाडौं । गाजा क्षेत्रमा निरन्तर खाद्यान्न आपूर्ति जारी राख्न नसके विशेषगरी महिला तथा बालबालिका भोकमरीको जोखिममा रहने संयुक्त राष्ट्रसङ्घको विश्व खाद्य कार्यक्रम (डब्लुएफपी) ले चेतावनी दिएको छ । डब्लुएफपीले इजरायल र हमासबिच चार दिने युद्धविराम सुरु भएपछि शुक्रबारदेखि गाजामा एक लाख २१ हजार एक सय ६१ मानिसलाई खाना उपलब्ध गराएको बताएको छ ।

पछिल्लो समय मङ्गलबार दुई दिनका लागि युद्धविराम थपिएको छ । युद्धविरामका लागि धन्यवाद दिँदै डब्लुएफपी मध्यपूर्वका निर्देशक कोरिन फ्लेसरले भने, “हाम्रा टोली सम्बन्धित क्षेत्रमै छन्, हामी लामो समयदेखि पुग्न नपाएका ठाउँमा जाँदैछौँ, हामीले जे देखिरहेका छौँ, त्यो विनाशकारी छ ।”

डब्लुएफपीले अनुमान गर्दै भनेको छ, “यदि डब्लुएफपीले निरन्तररूपमा खाना पुर्‍याउन सकेन भने गाजाको जनसङ्ख्या र विशेषगरी महिला तथा बालबालिका भोकमरीको उच्च जोखिममा पर्नेछन् ।” खाद्यान्नको निर्बाध र नियमित आपूर्तिका लागि आह्वान गर्दै उसले युद्धविरामका लागि छ दिन कुनै सार्थक प्रभाव पार्न पर्याप्त नभएको बताएको छ । गाजामा सङ्कट सुरु भएपछि डब्लुएफपीले सात लाख ५९ हजार ८२ मानिसलाई खाद्यान्न उपलब्ध गराइसकेको छ । रासस-एएफपी

काठमाडौं । उत्तराखण्डको उत्तरकाशीमा एक निर्माणाधीन सुरुङमा फसेका ४१ जना मजदुरमध्ये आधाभन्दा धेरैलाई व्यक्तिलाई बाहिर निकालिएको छ। उत्तराखण्ड राज्यका मुख्यमन्त्री पुष्कर सिंह धामीले उद्धार गरिएका ती व्यक्तिहरूलाई भेटेका छन् । सुरुङको प्रवेशद्वारमा एउटा अस्थायी क्लिनिक बनाइएको छ र उद्धारलगत्तै उनीहरूलाई नजिकैको अस्पताल लैजानका लागि एम्बुलेन्सहरूलाई तयार अवस्थामा राखिएको छ।

उद्धारकर्ताहरूले ती मजदुरलाई ९० सेन्टिमिटर व्यासको पाइपबाट एक–एक गर्दै निकाल्ने बताएका छन्। नजिकै गएको एउटा पहिरोका कारण ढुङ्गा र माटो थुप्रिएपछि ती मजदुरहरू सुरुङभित्र थुनिएका थिए। उनीहरू सबै जना सकुशल भएको ठानिएको छ। गत नोभेम्बर १३ देखि भारतको उक्त निर्माणाधीन सुरुङमा फसेका मजदुरहरूलाई बाहिर निकाल्नका लागि सुरुङमा पाइप जडान गर्ने काम केही घण्टाअघि सकिएको अधिकारीहरूले जनाएका छन्र । नोभेम्बर १३ मा स्थानीय समयानुसार बिहान ५ बजे निर्माणाधीन सुरुङमा दुर्घटना भएको थियो।

उत्तरकाशी जिल्लामा निर्माणाधीन उक्त सुरुङ उत्तराखण्डका प्रसिद्ध तीर्थस्थलहरूलाई जोड्न यातायात व्यवस्थामा सुधार ल्याउने सङ्घीय सरकारको महत्वाकाङ्क्षी राजमार्ग परियोजनाको अङ्ग हो। कतिपय हिमाल र हिमनदीहरू रहेको उक्त क्षेत्रमा हिन्दू धर्मावलम्बीहरूका केही प्रसिद्ध तीर्थस्थलहरू छन्। बीबीसी