Author: Vishwanews.com

काठमाडौं । सरकारले २० सह–सचिवको दरबन्दी थप गरेको छ । गृह मन्त्रालयका अनुसार मन्त्रिपरिषदले हालै २० सहसचिवको दरवन्दी थप्ने निर्णय गरेको हो ।

पहाडका १९ जिल्लाका प्रमुख जिल्ला अधिकारी र गौतमबुद्ध अन्तराष्ट्रिय विमानस्थलको प्रमुखका लागि उक्त दरवन्दी थप गरिएको मन्त्रालयले जनाएको छ । अहिले पहाडी जिल्लामा उपसचिव प्रमुख जिल्ला अधिकारीका रुपमा रहने प्रावधान रहेको छ ।

अब पाँचथर, भोजपुर, खोटाङ, संखुवासभा, ओखलढुंगा, रामेछाप, दोलखा, लमजुङ, पर्वत, अर्घाखाँची, प्युठान, सल्यान, डोल्पा, बैतडी, जुम्ला, दैलेख, अछाम र डडेल्धुरामा सह–सचिव तहका कर्मचारीले प्रमुख जिल्ला अधिकारीको भूमिका निर्वाह गर्ने भएका छन् ।

दुई निर्वाचन क्षेत्र भएका जिल्लामा सह–सचिव खटाउने प्रस्ताव अघि बढेको हो ।

हङ्‌कङ । आन्दोलनमा होमिएको विपक्षी दलले ठूलो सफलता पाएपछि हङ्‌कङमा बेइजिङ समर्थक दलले पराजय भोगेको छ ।

शनिबार सम्पन्न जिल्ला तहको चुनावमा विपक्षी दललाई जनताले भारती मतले जिताएको अन्तराष्ट्रिय सञ्चारमाध्यमले लेखेका छन् ।

कूल २४१ स्थानमा मतदान भएको थियो । त्यसमध्ये विपक्षी आन्दोलनका सदस्यले २०१ स्थानमा विजय प्राप्त गरेका छन् । बेइजिङसमर्थक उम्मेदवारले २८ स्थानमा मात्र जित हात पारेको उल्लेख छ ।

मतदानमा समेत अहिलेसम्मकै बढी मानिसले भाग लिएका छन् । यस पटक २९ लाख मतदाता सहभागी हुँदा कूल ७१ प्रतिशत मत खसेको छ ।

सन् २०१५ मा मात्र ४७ प्रतिशत मत खसेको थियो । बेइजिङ पक्षधर उम्मेदवारले यस चुनावलाई प्रतिष्ठाका रुपमा लिएका थिए । तर, जनताले हराइदिएका छन् ।

धादिङ । जन्ती बोकेको बस दूर्घटना हुँदा धादिङमा एक जनाको ज्यान गएको छ । ४० जना घाइते भएको छ ।

त्यसमध्ये पनि एक दर्जन यात्रुको अवस्था गम्भीर भएको र उनीहरुलाई उपचारका लागि काठमाडौं पठाइएको प्रहरीले जाएको छ ।

आइतबार बिहान पृथ्वीराजमार्गस्थित धादिङको गल्छी गाउँपालिका–६ बैरेनीबजारमा बस दूर्घटनामा परेको हो । नुवाकोटको बाँसगडीबाट जन्ती बोकेर बस अमलेखगञ्जतर्फ जाँदै गरेको थियो ।

बा २ ख ६२६८ नम्बरको जन्ती दूर्घटनामा परेको हो । दुर्घटनामा नुवाकोट जिल्ला बेलकोटगढी नगरपालिका–५ की १४ वर्षीया डोल्मा तामाङको घटनास्थलमै मृत्यु भएको जिल्ला प्रहरी कार्यालयले जनाएको छ । अन्य घाइतको भने स्थानीय स्वास्थ्य चौकिमा उपचार जारी रहेको छ ।

पोखरा । पूर्वप्रधानमन्त्री तथा नेपाली कांग्रेसका सभापति शेरबहादुर देउवाले भारतले नयाँ राजनीतिक नक्सा सार्वजनिक गर्दा प्रधानमन्त्री केपी शर्मा ओलीसँग सहमति लिएको आरोप लगाएका छन् ।

शनिबार उपनिर्वाचनका दौरान प्रचार प्रसारमा पोखरा पुगेका उनले चुनावी सभालाई सम्बोधनका क्रममा उक्त आरोप लगाएका हुन् ।

भारतले ओलीसँग कुनै सम्झौता गरेरै नयाँ नक्सा सार्वजनिक गरेको हुन सक्ने भन्दै उनले नेपाली भूभाग मिचिएको प्रष्ट हुँदाहुँदै सरकारले उच्चस्तरको कुटनीतिक पहल नगर्नुको पछाडी केही कारण भएको बताए ।

यसबाट प्रधानमन्त्रीकै सहमतिमा भारतले नक्सा जारी गरेको पुष्टि हुने उनले उल्लेख गरे । भारतले नयाँ नक्सा सार्वजनिक भएपछि त्यसको नेपालमा व्यापक विरोध भइरहेको छ ।

भारतले भने इन्कार गरिरहेको छ । सभापति देउवाले वर्तमान सरकारले जनताको ढाड सेक्ने गरी कर लगाएर जनताको दुख बिर्सेको समेत आरोप लगाए ।

चितवन । प्रहरीले चितवन मेडिकल कलेजको होस्टेलबाट हतियार फेला पारेको छ । चितवन प्रहरीका अनुसार शनिबार दिउसो कलेजको होस्टेलमा गोलीसहितको हतियार भेटिएको हो ।

मेड इन युएसए लेखिएको हतियार होस्टेलमा फेला परेको र यसबारे थप अनुसन्धान भइरहेको प्रहरीले उल्लेख गरेको छ । होस्टेललका गार्डले हतियार भएको जानकारी प्रहरीलाई गराएका थिए ।

प्रहरीले हतियार र गोलीसमेत फेला पारेको पुष्टी गरेको छ । हतियार भेटिएपनि कसले त्यहासम्म् ल्याएको थियो भन्ने बारे भने खुलेको छैन ।

अहिले चितवन मेडिकल कलेजमा आन्दोलन भइरहेको छ । चिकित्सा शिक्षा संघर्ष समितिले आन्दोलन गरिरहेको छ ।

गैरकानूनि शूल्क लिएको भन्द्यै विद्यार्थीले आन्दोलन गरिरहेका छन् । यसै आन्दोलनका बीच हतियार भेटिनुले विषय गम्भीर बन्न पुगेको छ ।