Author: Vishwanews.com

काठमाडौं । प्रहरीको गोलीबाट धमाधम नागरिक मारिन थालेसँगै संसदमा प्रतिपक्षी दलले गृहमन्त्री समक्ष स्पष्टिकरण माग गरेका छन् ।

प्रतिनिधिसभाको मंगलबारको बैठकमा सांसदहरुले गृहमन्त्री रामबहादुर थापाको चर्को आलोचना गरे ।

सर्लाहीमा बालक अमित रायको क्रसर उद्योगले खनेको खाल्डोमा परी मृत्यु भएपछि उठेको स्थानीयको आन्दोलनमाथि प्रहरीले गोली चलाउदा सरोजनारायण महतोको निधन भएको थियो ।

यो गैरन्यायिक हत्यामार्फत सरकारले मानवाधिकारको गम्भीर उल्लंघन गरेको सांसदहरुको आरोप थियो ।

अर्कोतर्फ विप्लव कार्यक्रता विप्लव पौडेललाई पक्राउ गरेपछि प्रहरीले गोली हानी हत्या गरेको भन्दै सांसदहरुले गृहमन्त्रीको चर्को आलोचना गरेका हुन् ।

खासगरी प्रमुख प्रतिपक्षी नेपाली कांग्रेस र प्रतिपक्षी राष्ट्रिय जनता पार्टीका सांसदले गृहमन्त्रीको आलोचना गरेका हुन् । कांग्रेस संसदीय दलकी सचेतक पुष्पा भुसालले सर्लाहीका दुई घटनामा गृहमन्त्रालयबाट मानवअधिकारको गम्भीर उल्लंघन भएको उल्लेख गरिन् ।

सरकारी निकायको  संरक्षणमा क्रसर उद्योगीले अनधिकृत खाल्डा खनेर जोखिम निम्त्याउने र बालकको ज्यान गएपछि त्यसको विरोधमा उत्रिएका सर्वसाधारणमाथि प्रहरीले अनावश्यक बल प्रयोग गरेको उनको आरोप थियो ।

राजपा सांसद राजकिशोर यादवले पनि सरकारले तराई क्षेत्रमा मान्छे मारेको भन्दै आलोचना गरेका हुन् । मंगलबारको बैठकमा गृहमन्त्री थापाले कुमार पौडेलको मृत्यु दोहोरो भिडन्तमा भएको बताए ।

गृह मन्त्रीको जवाफमा कांग्रेस र राजपाका सांसदले चित्त बुझाएनन् र निरन्तर विरोध गरिरहे । सांसद भरतकुमार शाहले गृहमन्त्रीको जवाफ सत्य नभएको भन्दै संसदीय समिति गठन गर्न गृहमन्त्री तयार हुनुपर्ने बताए ।

सांसदहरुले गृहमन्त्रीले कर्मचारीको बनिबनाउ उत्तर ल्याएर पढेको भन्दै वास्तविकता लुकाउने षडयन्त्र सरकारले गरिरहेको बताए ।

गृहमन्त्रको जवाफमा चित्त नबुझेपछि मंगलबार कांग्रेस र राजपाका सांसदले रोष्ट्रम घेर्दै संसद अवरुद्ध पारे ।

काठमाडौं । प्रधानमन्त्री केपी शर्मा ओलीलाई ‘बायोम्याट्रिक’ सूचनासहितको राष्ट्रिय परिचयपत्र प्रदान गरिएको छ ।

मंगलबार प्रधानमन्त्री निवास बालुवाटारमा एक कार्यक्रम आयोजना गरि राष्ट्रिय परिचयपत्र तथा पञ्जीकरण विभागले प्रधानमन्त्रीलाई परिचय पत्र हस्तान्तरण गरेको हो । विभाग गृहमन्त्रालय मातहतको निकाय हो ।

विभागका महानिर्देशक दीपक काफ्लेले प्रधानमन्त्रीलाई परिचयपत्र हस्तान्तरण गरेका थिए । उक्त अवसरमा प्रधानमन्त्री पत्नी राधिका शाक्यलाई पनि परिचयपत्र हस्तान्तरण गरिएको विभागले जानकारी दिएको छ ।

सरकारले नीति तथा कार्यक्रममै विशिष्ट व्यक्ति, सिंहदरबारस्थित कर्मचारी र पाँचथर जिल्लाका ८० प्रतिशत नागरिकलाई चालु आव भित्रै परिचयपत्र बाड्ने घोषणा गरेको थियो ।

विभाग अनुसार सोमबार उपराष्ट्रपति नन्दबहादुर पुनलाई राष्ट्रिय परिचयपत्र प्रदान गरिएको थिया
।

काठमाडौं । संसदीय सुनुवाई समितिले चार देशका लागि प्रस्तावित भएको राजदूतको नाम अनुमोदन गरेको छ । समितिको सोमबारको बैठकमा संसदीय सुनुवाई लगत्तै चारै जना राजदूतको नाम अनुमोदन गरिएको थियो ।

अनुमोदन हुनेमा बंगलादेशका बंशिधर मिश्र, कतारमा नारदनाथ भारद्वाज, अष्ट्रेलियामा महेशराज दाहाल र स्पेनमा दाबा फुटी शेर्पाको नाम रहेको छ ।

सोमबार नै भएको संसदीय सुनुवाईमा राजदूतहरुका विषयमा परेको उजुरीका सम्बन्धमा प्रस्तावित राजदूतहरुले जवाफ दिएका थिए ।

अष्ट्रेलियाका लागि अनुमोदित नेपाली राजदूत महेशराज दाहालले आफू र आफ्नो परिवारको नाममा विदेशमा स्थायी आवासीय अनुमतिपत्र नभएको बताए । समितिमा उनकी पत्नीले अमेरिकामा स्थायी बसोबास अनुमतिपत्र (पीआर) लिएको उजुरी परेको थियो ।

दाहालले भने आफ्नी पत्नीले वर्क परमिट मात्र लिएको र त्यसको म्याद दुई महिनामा सकिने स्पष्टिकरण दिए ।

कतारका लागि अनुमोदित राजदूत नारदनाथ भारद्वाजले नेपालको पानी कतारको बजारमा बेच्न सकिने सम्भावना रहेको बताए ।

बंगलादेशका लागि अनुमोदित वंशिधर मिश्रले नेपाल र बंगलादेशबीच विद्युत व्यापार र पर्यटनलाई प्राथमिकतामा दिने बताए ।

काठमाडौं । नेकपा नेतृ पम्फा भुसालले सैनिक र प्रहरीको बजेटबाट श्रीमती संघ संचालन हुन नहुने बताएकी छिन् ।

प्रतिनिधिसभाको आइतबारको बैठकमा बोल्दै भुसालले सेना र पुलिसमा रहेका श्रीमती संघहरु खारेज गर्नुपर्ने माग गरिन् ।

गणतन्त्रमा पनि राजतन्त्रकालिन अवशेष रहेको भन्दै उनले संविधानको प्रतिकूल हुने गरी अस्तित्वमा रहेका संस्थाहरु खारेज गर्नुपर्ने तर्क गरेकी छिन् ।

यस्ता निकायहरु राजतन्त्र कालिन समयमा सामन्ती पितृसत्तावादी सोचका आधारमा स्थापना भएको उनको भनाई छ ।

प्रधानसेनापतिबाट आफ्नी श्रीमतीलाई महारानी नभन्‍‍न निर्देशन दिएको प्रसंग उठाउँदै भुसालले सेना पुलिसको बजेटबाट श्रीमती संघ चल्नु ठीक नभएको बताइन ।

हिजोको शाही नेपाली सेना अहिले नेपाली सेनामा परिणत भइसकेको अवस्थामा परिवार र वंशवादमा आधारित पितृ सत्तावादी सोचसहित खडा भएका संरचना खारेज गर्नु उनले माग गरिन् । उनी पूर्वमन्त्री समेत हुन् ।

काठमाडौं । फरार अभियुक्त नसिम खान अन्ततः प्रहरीको पञ्जामा परेका छन् । एक बालकसहित आठ जनाको जघन्य हत्या गरेको अभियोगमा उनलाई प्रहरीले खोजिरहेको थियो ।

कपिलवस्तुका स्थानीय उनी शनिबार राजधानीबाट पक्राउ परेको प्रहरीले पुष्टी गरेको छ । ३ फागुन २०७४ मा बालक मोहम्मद आयमान मुसलमानको अपहरणपछि हत्या गरेको अभियोग उनीमाथि छ ।

त्यसपछि खान फरार भएका थिए । उनलाई कपिलबस्तु प्रहरीको सहयोगमा केन्द्रीय अनुसन्धान ब्युरोको टोलीले पक्राउ गरेको हो ।

मायादेवी नगरपालिका वडा नम्बर ४ का अध्यक्ष फत्ते मोहम्मदका छोरा आयमनको बुबा फत्ते मोहम्मदसँग ठेक्का विवादमा कुरा नमिलेपछि बदला लिन हत्या गरेको आरोप उनीमाथि छ ।

घटनापछि बालकका परिवारले नसिम र उनकी श्रीमती फौजिया नसिमबिरूद्व किटानी जाहेरी दिएका थिए। त्यसपछि उनीहरु फरार थिए ।

त्यसो त नसिमविरूद्व अन्य सात जघन्य हत्याको मुद्दा पनि दर्ता छ ।

तत्कालीन माओवादीका जिल्लास्तरीय नेता राजेन्द्र तिवारी, प्रेम परियार, अकाली धोबी, ज्ञानबहादुर सुनार, शिवपूजन कुर्मीलगायतको हत्यामा उनको संलग्नताको आरोप रहेको छ ।

कपिलवस्तु प्रहरीको मोस्ट वान्टेड सूचिमा रहेका उनीविरुद्ध हत्याबाहेक अपहरण र डकैतीका समेत मुद्दा जाहेरी रहेका छन् ।