Author: Vishwanews.com

ललितपुर । मुलुकको प्रमुख प्रशासनिक केन्द्र सिंहदरबारदेखि सबैभन्दा नजिक रहेको जिल्ला हो ललितपुर । तर यहाँका कतिपय क्षेत्र अझै दुर्गम र अविकसित छन् । चुनावमा विजयी गराएर पठाएका जनप्रतिनिधिले अविकसित क्षेत्रको विकासमा प्रभावकारी भूमिका नखेलेको भनेर मतदाता सदिऔंदेखि आक्रोश पोखिरहेका छन् ।
यसपाली पनि मंसिर ४ मा हुने प्रतिनिधि सभा र प्रदेश सभाको निर्वाचन नजिकिदै जाँदा उम्मेदवारहरु सबैभन्दा धेरै समय ति अविकसित साथै काँठ क्षेत्रमा घुमिरहेका छन् । मतदाता आशा र अपेक्षा मिश्रित आक्रोश पोखिरेका छन् ।
प्रतिनिधि सभातर्फ ललितपुरको क्षेत्र नम्बर १ मा मुख्य प्रतिस्पर्धीका रुपमा सत्तारुढ गठबन्धनका तर्फबाट नेपाली कांग्रेसका उदय शमसेर राणा र नेकपा एमालेका नवराज सिलवाल प्रतिनिधि सभा सदस्यका उम्मेदवार हुन । उनीहरुले बजारी क्षेत्र भन्दा ललितपुरका विकट साथै काँठ क्षेत्रमा चुनावी अभियानलाई तिब्रता दिएका छन् । राणाले ‘समुन्नत ललितपुर’को प्रष्ट खाका लिएर मैदानमा छन भने सिलवालले ‘समृद्ध ललितपुर’को मुद्दा अघि सारेका छन् ।
सत्तारुढ गठबन्धनको बलियो उपस्थितिसहित राणाले माओवादी केन्द्रका हरि दाहाललाई प्रदेश सभा(क)बाट र कांग्रेसका मीनकृष्ण महर्जनलाई प्रदेश सभा(ख)मा साथ लिएर चुनावी घरदैलोलाई तिब्रता दिएका छन् । ०७० सालको संविधान सभा निर्वाचनमा विजयी भएका राणा अर्थ राज्यमन्त्रीसम्म बनेका थिए । २०७४ सालको निर्वाचनमा वाम गठबन्धनका उम्मेदवार सिलवालसँग पराजित भएका राणाले उनै सिलवाललाई बदला लिने कसरतमा छन् । राणा चौथो पटक चुनाव भिड्दैछन भने सिलवाल दोस्रो पटक मैदानमा छन् ।
रोचक प्रतिस्पर्धा
ललितपुर १ मा २०७४ सालको चुनावी समीकरण र २०७९ को समीकरण ठ्याक्कै विपरित छ । अघिल्लो चुनावमा नेकपा माओवादीको साथ पाएका सिलवालले ६२२२ मतले राणालाई हराए । तर यसपटक कांग्रेसलाई माओवादी केन्द्रसहित नेकपा(एकीकृत समाजवादी), जनमोर्चालगायतका दलहरुको मोर्चाबन्दी छ । सो हिसाबले यसपाली राणा बलियो उम्मेदवारका रुपमा देखिएका छन् । मतदाताहरुले राणाको सोझै पल्लाभारी हुने अनुमान गरेका छन् । किनकी गत बैशाखमा सम्पन्न स्थानीय तहको निर्वाचनमा आएको परिणाम हेर्दा पनि गठबन्धनको बलियो मत छ । गोदावरी नगरपालिका,माहाङ्काल, बागमती र कोन्ज्योसोम गाउँपालिकाका समेटिएको उक्त निर्वाचन क्षेत्रमा पर्ने ३० वटा वडामध्ये कांग्रेसले २२, माओवादीले ५ र एमालेले तीन वटा वडामा वडाअध्यक्ष पदमा जितेको छ ।
३० वटा वडामा गठबन्धनमा आबद्ध दलहरुको पाएको मतान्तर हेर्ने हो भने राणाको विजयी निश्चित छ । किनकी सबै वडाको मत कांग्रेस अग्रस्थानमा छ । कांग्रेसका वडाध्यक्ष उम्मेदवारले २३ हजार ८५४ मत, एमाले वडाअध्यक्ष उम्मेदवारले १८ हजार ९९३ मत, माओवादी केन्द्रका उम्मेदवारले ६१ सय ३३, राप्रपाको १७ सय ५७ मत पाएको देखिन्छ । एकीकृत समाजवादी, स्वतन्त्र लगायत साना दलका वडाध्यक्ष उम्मेदवारले २५ सय मत कटाएका छन् ।
यस हिसाबले गठबन्धनको मात्र मत २९ हजार ९८७ हुँदा एमाले लगभग १० हजार मतले पछाडि देखिन्छ । राप्रपाले एमालेलाई सहयोग गर्दा र गठबन्धनको मत थोरै विभाजित हुँदा पनि प्रतिनिधि सभामा राणाको पल्लाभारी सोझो अनुमान लगाउन सकिन्छ ।
राणाको दाउ
२०७४ सालमा आफूलाई पराजित गरेका सिलवालले क्षेत्रमा केही काम नगरेको आरोप लागेपछि राणाले महत्वकांक्षी योजनाहरु अघि सारेका छन् । राणाले सडक निर्माणलाई पहिलो प्राथमिकतामा राखेका छन । उनले सबै वडामा खानेपानी सुविधा विस्तार गर्न दिगो योजना नै बनाएर अघि बढेको दाबी गरेका छन् । त्यस्तै पर्यटकीय क्षेत्रको विकास र आधुनिक कृषि उत्पादनलाई महत्वपूर्ण योजना ल्याउने बाचा गरेका छन् ।
‘मैंले चुनाव जित्दा वा हार्दा होस निरन्तर काम गरेको छु । जनताको माझ पुगिरहेको छु । मेरा योजनाहरु समुन्नत ललितपुर बनाउने हो । भ्रष्ट्राचार न्यूनिकरण गर्दै पारदर्शी ढंगले जनताका आकांक्षाहरुलाई पूरा गर्ने मेरो अन्तिम इच्छा हो’, उनले भने,‘अघिल्लो पटक केही बाहिरी असहयोग र प्रतिस्पर्धी उम्मेदवारलाई सेलिब्रेटीको हल्ला चलाएर मलाई हराइयो । म जित्ने उम्मेदवार हुँ । यस पटक सबै मतदाताले माया गर्नुहुनेछ ।’
‘मेरो क्षेत्रमा भौतिक पूर्वाधारको विकास चाहिएको छ । जनतालाई सुखदुःखमा साथ चाहिएको छ । कोरोनाको महामारीका बेला मैंले गरेको सहयोग अहिले मतदाताले सम्झिरहनु भएको छ । ०७० सालदेखि यता मेरो कार्यकालमा जति यो क्षेत्रको विकास कहिल्यै भएको छैन । मेरो एक पटकको पहलमा आएका विकास कार्यक्रमहरू एमालेको चार वटै कार्यकालको भन्दा धेरै छ । यी सबै पृष्ठभूमिहरु हेर्दा मेरो जित निश्चित छ’, राणाको दाबी छ । आफू अर्थराज्यमन्त्री हुँदा प्रशस्त योजनाहरु भित्र्याएको उनको भनाइ छ ।
सिलवालको सवाल
राणाका मुख्य प्रतिस्पर्धी मानिएका पूर्व प्रशासक सिलवालले आफूलाई स्थानीयबासी भएको बताउँदै राणालाई टुरिष्ट उम्मेदवारको आरोप लगाइरहेका छन् । स्थानीय तहमा खसेको मतलाई संघमा तुलना नहुने पनि उनको भनाइ छ । उनले सदनमा हुँदा आफ्नो क्षेत्रका लागि थुप्रै कामहरु गरेको पनि दाबी गरिरहेका छन् ।
तर पाँच बर्षको कार्यकालमा देखिनेगरी कुनै योजना नभित्रिएको स्थानीयको भनाइ छ । सिलवालले पाँचबर्षको अवधीमा सिक्ने मात्र गरेको, संसदमा चर्को बोलेर सेलिब्रेटी मात्र बन्न खोजेको पनि आम मतदाताको बुझाइ छ । एमाले अध्यक्ष केपी शर्मा ओलीले दुई दुई पटक संसद विघटन गर्दा साक्षी बसेर संविधानको निर्मम हत्या गर्न खोजेको पनि सिलवालमाथि आरोप छ । तर उनले आफूलाई बचाउ गर्दै आफ्नो क्षेत्रमा प्रशस्त योजनाहरु भित्र्याएको दाबी गर्दै घरदैलो गरिरहेका छन् । अघिल्लो कार्यकालमा तयार भएका आधारहरुलाई आगामी दिनमा पुरा गर्ने आश्वासन दिइरहेका छन् । तर नेपाल तरुण दलको केन्द्रीय अध्यक्ष, संविधान सभा सदस्य, अन्तर्राष्ट्रिय प्रजातान्त्रिक युवा संघको उपाध्यक्ष साथै विभिन्न महत्वपूर्ण तह र तप्कामा बसेर काम गरिसकेका राणा बौद्धिक नेता भएका कारण युवाहरुले उनलाई विजयी गराइछाड्न घरदैलो अभियानलाई चर्काइरहेका छन् ।

काठमाडौं । शेयर बजार झिनो अंकले घटेको छ ।

साताको कारोबारको तेस्रोदिन शेयर बजार मापक सूचक(नेप्से) २.५७ अंकले घटेर १९५६.३६ विन्दुमा झरेको हो ।

नेपाल स्टक एक्सचेन्जका अनुसार मंगलवार २२६ कम्पनीको १ अर्ब ५ करोड ३१ लाख ३७ हजार ४६६ रुपैयाँ बराबरको २७ लाख ७३ हजार ७७३ कित्ता शेयर किनबेच भएका छन् ।

अघिल्लो दिनको तुलनामा कारोबार रकममा भारी गिरावट आएको छ । मंगलवार २ अर्ब १० करोड ९१ लाख ६३ हजार ३३८ रुपैयाँ बराबरको कारोबार भएको थियो ।

आज कारोबारमा आएका १३ वटा उपसमूहमध्ये ४ वटा समूहको परिसूचकमा हरियाली छाएको छ भने ९ वटा घटेको छ । जीवन बीमा समूह सबैभन्दा धेरै १.०३ प्रतिशतले बढेको छ भने व्यापार समूह १.५६ प्रतिशतले घटेको छ ।

आज शिवम् सिमेन्टको सर्वाधिक कारोबार भएको छ । यसको साढे ८ करोड रुपैयाँ बढीकोे शेयर किनबेच भएको छ । त्यस्तै, सिटिजन्स बैंक झन्डै ७ करोड र जाल्पा लघुवित्त ४ करोड बढीको कारोबार हुँदै शीर्ष तीनमा रहे ।

झिनो अंकले घटेको बजारमा आज लाइफ इन्स्योरेन्स कर्पोरेसनका शेयरधनीले सबैभन्दा धेरै ४.२२ प्रतिशत कमाएका छन् ।

त्यस्तै, गुराँस लघुवित्त ४.०३, नेपाल पुनर्बीमा, बलेफी हाइड्रोपावर र श्वेतगंगा हाइड्रोपावरको शेयर मूल्य साढे ३ प्रतिशतले बढेको छ ।

काठमाडौं । प्रतिनिधिसभा निर्वाचनमा यसपटक नवलपरासी (बर्दघाट सुस्ता पश्चिम)-१ मा रोचक प्रतिस्पर्धा हुँदैछ। यो निर्वाचन क्षेत्रका खेलाडी मानिएका हृदयेश त्रिपाठीलाई टक्कर दिन कांग्रेसले केन्द्रीय सदस्य विनोद चौधरीलाई मैदानमा उतारेपछि प्रतिस्पर्धा रोचक हुन लागेको हो।

पहिलोपटक प्रत्यक्ष निर्वाचनका लागि उम्मेदवार भएका चौधरी ६ पटक चुनाव लडेका त्रिपाठीसँग भिड्दै गर्दा जित निकाल्ने आत्मविश्वासमा देखिन्छन्।

गत स्थानीय तहको निर्वाचनमा कांग्रेसका वडाध्यक्षका उम्मेदवारहरूले प्राप्त गरेको मतका आधारमा चौधरी बलिया देखिन्छन्।

यो निर्वाचन क्षेत्रमा पर्ने स्थानीय तहका वडामा कांग्रेसले ३० हजार ३४२ मत प्राप्त गरेको थियो। एमालेले २६ हजार ७७९ मत प्राप्त गर्दा राप्रपाले ६ हजार ६८७, माओवादीले ५ हजार ३४७, जनता प्रगतिशील पार्टीले ४ हजार ६९० मत पाएको थियो। जसपाले ३ हजार ५५९, नेकपा एकीकृत समाजवादीले १ हजार १४१ र लोसपाले १०० मत प्राप्त गरेको थियो।

यहाँ सत्ता गठबन्धनका दलको मत ३६ हजार ९३० छ। हृदयेशको पक्षमा एमालेको २६ हजार ७७९, जसपाको ३ हजार ५५९ र जनता प्रगतिशील पार्टीको गरी ३५ हजार ६८ मत छ।

२०७४ सालको निर्वाचनमा एमालेको सूर्य चुनाव चिह्न लिएर चुनावमा उत्रिएका त्रिपाठीसँग यसपटक आफ्नै चुनाव चिह्न छ।

यसअघि विभिन्न दलमा पुगिसकेका त्रिपाठी अहिले नयाँ दल लिएर चुनावी मैदानमा होमिएका हुन्। यसपटक त्रिपाठीले सूर्य चिह्नमा चुनाव लड्न नमानेपछि मनोनयन दर्ता गराउने दिनको अन्तिम समयमा एमालले प्रतिनिधिसभामा समानुपातिकतर्फबाट निर्वाचित सदस्य सिन्धु जलेसा बुढाथोकीलाई उम्मेदवार बनाएको थियो।

उम्मेदवारी फिर्ताको अन्तिम दिनसम्म त्रिपाठीले एमालेका शीर्ष नेतामार्फत बुढाथोकीको उम्मेदवारी फिर्ता गराउन सफल भएका छन्। तर अघिल्लो पटक सूर्य चिह्नमा मतदान गरेका एमाले मतदाताले यसपटक फेरि मत हाल्नेमा त्रिपाठी नै विश्वस्त छैनन्। अर्कोतर्फ सूर्य चुनाव चिह्न लिन नचाहेको चर्चाले पनि त्रिपाठीलाई ‘ब्याक फायर’ को त्रास छ।

त्यसैले एमालेको साथ पाउँदा पनि स्थिति जटिल बनिरहेको उनको विश्लेषण छ।

२०४८, २०५१ र २०५६ मा भएको संसदीय निर्वाचनमा नेपाल सद्भावना पार्टीको चुनाव चिह्नबाट विजयी भएका उनी २०६४ सालको पहिलो संविधानसभा र २०७० सालको दोस्रो संविधानसभा निर्वाचनमा भने तराई मधेस लोकतान्त्रिक पार्टीबाट लडेका थिए।

त्रिपाठी अहिलेसम्म ६ पटक मन्त्री भइसकेका छन्। उनी २०६४ सालमा वन मन्त्री, २०६३ सालमा उद्योग वाणिज्य तथा आपूर्ति, २०६८ मा भौतिक योजना तथा सडक यातायात, २०७६ मा संघीय मामिला तथा सामान्य प्रशासन र २०७७ मा संघीय मामिला तथा सामान्य प्रशासन र स्वास्थ्य तथा जनसंख्या मन्त्री बनेका बनिसकेका छन्।

यता दुईपटक समानुपातिक सांसद बनेका चौधरी तेस्रोपटक सांसद बन्ने प्रयासमा छन्। उनी निर्वाचन क्षेत्रको विकास आफ्ना लागि प्रतिष्ठाको विषय भएको बताउँछन्।

नाम र पैसाका लागि आफूले राजनीति नगरेको चौधरीको दाबी छ। राष्ट्रिय तथा अन्तर्राष्ट्रियस्तरमा परिचित भइसकेको व्यक्ति भएकाले आफू पैसाका लागि राजनीतिमा नआएको उनी बताउँछन्। क्षेत्र परिर्वतन भए पनि नवलपरासी पश्चिम-१ को समस्याबारेमा आफू जानकार रहेको र समधान गर्न सक्ने दाबी उनको छ।

भक्तपुर । भक्तपुर २ मा निवर्तमान सांसद एमालेका महेश बस्नेत र सत्ता गठबन्धनका तर्फबाट कांग्रेस उम्मेदवार दुर्लभ थापा चुनावी मैदानमा छन् । बस्नेत एमालेका विवादस्पद छवी भएका नेता हुन् भने कांग्रेसका थापा जिल्लामा लोकप्रिय छन् । जसका कारण ४ मंसिरको चुनावमा यहाँ यी दुई उम्मेदवारबीचको प्रतिस्पर्धा रोचक हुने देखिएको छ ।

निर्वाचन प्रचारप्रसार सुरु भएसँगै थापाको पक्षमा जनमत खुल्दै गएको छ । भक्तपुर २ यसअघि नेकपा एमालेका उम्मेद्वार महेश बस्नेत विजयी भएको क्षेत्र हो ।

बस्नेत २०७४ को निर्वाचनमा झण्डै दोब्बर मत ल्याएर विजयी भएका थिए । तर, यसपटक उनलाई सहज छैन । गत ३० वैशाखमा सम्पन्न स्थानीय तह निर्वाचनको मत परिणाम हेर्दा कांग्रेसकै पक्षमा जनमत छ ।
भक्तपुरमा नेमकिपाको राम्रो पकड भए पनि मुख्य प्रतिस्पर्धा सत्ता गठबन्धन र एमालेबीच हुने देखिएको छ ।
थापाको बलियो आधार स्थानीय तह निर्वाचनको मत परिणामले नै स्पष्ट पार्छ । भक्तपुर २ मा मध्यपुर ठिमी र सूर्यविनायक नगरपालिका पर्छन् । यहाँका नौ वडाका कांग्रेसका वडाध्यक्षले १४ हजार एक सय ९२ मत ल्याएका थिए भने एमालेका वडाध्यक्षहरूको नौ हजार सात सय ७२ मत मात्र पाएका थिए ।

पालिका प्रमुखतर्फ ठिमी नगरपालिकामा स्थानीय निर्वाचनमा सत्ता गठबन्धनबाट कांग्रेसका सुरेन्द्र श्रेष्ठले १५ हजार ९८ मत ल्याएका थिए भने एमालेका मदनसुन्दर जगुलु श्रेष्ठले ११ हजार ३५ मत ल्याएर पराजित बनेका थिए । सूर्यविनायकमा एमालेले झिनोे मतान्तरले मेयरमा जित हासिल गरेको थियो ।

थापा यस क्षेत्रमा हक्की नेताका र स्थानीयमाझ परिचित छन् । थापालाई सिंगो सत्ता गठबन्धनको साथ अर्को बलियो आधार हो । थापा यसअसघि दुईपटक कांग्रेसको भक्तपुर जिल्ला सभापति बनिसकेका छन् ।

थापा गठबन्धनको मात्रै नभई आफू भक्तपुरको साझा व्यक्तिका रुपमा सबैले चिन्ने र जित सुनिश्चित रहेको निर्धक्क सुनाँउछन्। त्यस्तै भक्तपुर कांग्रेसमा कुनै गुटबन्दी समेत छैन् । कांग्रेसमा गुटबन्दी नरहेकाले सिंगो जिल्लाका कार्यकर्ता साथमा रहनु अर्को बलियो आधारको रुपमा लिन्छन् उनी ।

उनी कांग्रेस घोषणापत्रकोे एजेण्डासहित स्थानीय मुद्दालाई बोकेर आफू निर्वाचनमा होमिएको बताँउछन् । ‘स्थायित्व र विकासको एजेण्डा सहित जनतामाँझ गएका छौँ ।

स्थानीय र प्रदेश सरकारसँग विकास निर्माणका काममा समन्वय गर्ने हाम्रो प्रतिबद्धता छ । संविधानमा रहेका त्रुटिहरू संशोधन गर्ने, संघीयता कार्यान्वयन लगायतका एजेन्डा प्रस्तुत गर्दै मत मागिरहेका छौँ,’ उनले भने,‘ गठबन्धनको साथ र सहयोगमा साझा उम्मेद्वारको रुपमा म मैदानमा छु ।

स्थानीय निर्वाचनको परिणामले पनि यसलाई कांग्रेसको पक्षमा मत रहेको स्पष्ट छ । भक्तपुरमा पार्टीभित्र पनि कुनै विवाद छैन ।’

एमाले उम्मेदवार बस्नेतले भने यस क्षेत्रमा विकास निर्माणका धेरै काम गरेको दाबी गर्दै त्यसैलाई मात्रै चुनावी एजेन्डाका रुपमा अगाडि सारेका छन् । यसपटक बस्नेतलाई अघिल्लोपटक काम गरेको दावी र सोही आधारमा यसपटक पनि जित्ने दाबी पर्याप्त देखिँदैन ।

कोरोना महामारीको समयमा चर्चित ‘सांसद अपहरण’ प्रकरण लगायतमा समेत उनको नाम मुछिएको थियो । यसबाहेक बिभिन्न बिषयमा अभिव्यक्तिका कारण पनि बस्नेत ववादित बन्दै आएका छन् ।

यस क्षेत्रमा थापा र बस्नेतसँगै २६ जना प्रतिस्पर्धामा छन् । २०७४ को निर्वाचनमा एमालेका बस्नेतले ३६,४१२ मत पाएका थिए भने निकटतम प्रतिस्पर्धी कांग्रेसका दमननाथ ढुंगानाले १८,६८७ मत प्राप्त गरेका थिए । तत्कालिन समयमा वाम गठबन्धनका कारण बस्नेतको जीत सहज थियो ।

तर, यसपटक माओवादीको साथ थापालाई छ । त्यस्तै एमालेबाटै विभाजित भएर बनेको नेकपा एकीकृत समाजवादी पनि गठबन्धनमा सामेल भएर एमालेलाई पराजित गर्न लागेको अबस्था छ ।
उसो त भक्तपुर २ कांग्रेसकै प्रभाव क्षेत्र मानिन्छ । यो क्षेत्रमा २०४८, २०५६ र २०७० मा कांग्रेसले नै जित हासिल गरेको थियो ।

गोरखा । प्रतिनिधिसभा सदस्यका लागि गोरखा क्षेत्र नम्बर १ मा सत्ता गठबन्धनबाट नेपाली कांग्रेसका नेता तथा पर्यटन व्यवसायी राजेन्द्र बजगाईं र नेकपा एमालेका नेता रामशरण बस्नेत चुनावी प्रतिस्पर्धामा छन् ।
गोरखा क्षेत्र नम्बर १ मा बजगाईं र बस्नेतंसहित ८ उम्मेदवार भए पनि मुख्य प्रतिस्पर्धा कांग्रेसका र एमालेबीच नै हुने देखिएको छ । उनीहरू २०७४ को चुनावमा गोरखा–१ (ख) को प्रदेशसभा सदस्यका लागि प्रतिस्पर्धा गरेका थिए । गोरखामा एमालेको तुलनामा कांग्रेसको संगठन निकै बलियो छ । तर माओवादी केन्द्रसँँग वाम गठबन्धन गरेका कारण एमालेका बस्नेत १६ हजार ६५६ मतसहित निर्वाचित हुँदा बजगाईंले १३ हजार १ मत पाएका थिए । तर यसपटक ठीक उल्टो माओवादीको समर्थन कांग्रेसका उम्मेदवार बजगाईंलाई रहेकोले चुनाव जित्नेमा ढुक्क जस्तै देखिएका छन् ।
गण्डकी प्रदेशमा भौतिक पूर्वाधार तथा यातायातमन्त्री भइसकेका रामशरण बस्नेत र लाभको पद अहिलेसम्म नलिएका बजगाईंबीचको चुनावी भिडन्त रोमाञ्चक बन्दै गएको छ । विगतका निर्वाचनहरू र ३० बैशाखको स्थानीय तहको चुनावमा पाएको मतका आधारमा गोरखामा माओवादी केन्द्र र कांग्रेस हाराहारीका दल हुन् भने एमालेको निकै मत कम छ । ३० बैशाखको स्थानीय तह निर्वाचनमा स्थानीय तहका वडाका उम्मेदवारले पाएको मतको आधारमा क्षेत्र नम्बर १ मा कांग्रेस पहिलो दल हो ।
कांग्रेस उम्मेदवारले २७ हजार ८४, माओवादी केन्द्रका उम्मेदवारले २५ हजार ४७२ मत पाएका छन् भने नेकपा एमालेका उम्मेदवारले १४ हजार ४६६ मत पाएका छन् । त्यस्तै जनता समाजवादी पार्टीले २७५४ मत पाएको छ र गोरखामा यो पार्टीको अधिकांश हिस्सा बाबुराम भट्टराई नेतृत्वको नेपाल समाजवादी पार्टीमा गएको छ । एकीकृत समाजवादी पार्टीले ७० मत पाएको छ ।
बजगाइँ कांग्रेसको १४ औं महाधिवेशनमा जिल्लाबाट महाधिवेशन प्रतिनिधि र महासमिति सदस्य निर्वाचित भएका थिए । क्षेत्र नम्बर १ को उत्तरी क्षेत्रमा आफू परिचित रहेको र गठबन्धनको उम्मेदवार भएकाले सहज जित्ने बजगाइँको दाबी छ । ‘गठबन्धनका कारण पनि म पहिलेभन्दा बलियो छु’, बजगाईंले भने । ‘पहिले देखिनै विकासका लागि राजनीति भन्ने नारा नै तय गरेको विकासलाई जनताको घरसम्म जोड्ने काममा लाग्ने दाबी बजगाइँको छ। रोजगारी, विकास र समृद्धिनै हो, बुढीगण्डकी आयोजना मेरो मुख्य प्राथमिकतामा रहेको छ,’ उनले भने।
एमाले सरकार गोरखाको समृद्धिसँग जोडिएको १२ सय मेगावाट क्षमताको बुढीगण्डकी आयोजना अलपत्र पार्ने काम गरेकोले अव सोही कार्यलाई अगाडि बढाउने आफ्नो प्रमुख काम भएको समेत बजगाइँले बताए । चीनको सिमानादेखि ठोरीसम्मको बाटो निर्माण गरेर व्यापरिक केन्द्र बनाउने र पर्यटन क्षेत्रको विकासमा मुख्य जोड दिने बजगाइँले बताए । गोरखा–१ मा १ लाख १५ हजार ३९७ मतदाता छन् ।
बजगाइँले बालुवाटारमा होटल वर्णवास निर्माण गरिरहेका छन् । १ अर्ब १६ करोड लगानीमा निर्माण भइरहेको होटल अबको केही महिनामै सञ्चालनको तयारी रहेको छ । बजगाईंले वर्णवास म्युजियम होटलको रुपमा निर्माण गरिरहेका छन् ।

२०७४ सालको प्रदेशसभा निर्वाचनमा निर्वाचित भएपछि एमालेका बस्नेत गण्डकी सरकारको भौतिक पूर्वाधार तथा यातायातमन्त्री भएका थिए । चुनाव जित्ने उनको पनि दाबी छ । गोरखामा केही विकास निर्माणका योजना पनि ल्याएको बताए पनि सडक नै नभएको ठाउँमा पुल बनाएको भनेर पछिल्लो समय उनी आलोचितसमेत भएका थिए ।
‘गठबन्धनको सरकार बनेको पनि ढेड वर्ष हुन लागिसक्यो तर जनताले नयाँपन र राहत अनुभूति गर्न पाएका छैनन्,’ बस्नेतले भने । मन्त्री हुँदा जिल्लाको भौतिक संरचनाको विकासमा कुनै कमी राखेका बताउँदै बस्नेत शिक्षा स्वास्थ्य लगायतका क्षेत्रमा पनि थुप्रै काम गरेको जनताले मूल्यांकन गरेर मत दिने बस्नेत बताउँछन् । बुढीगण्डकी आयोजना निर्माणलाई प्राथमिकता दिनेसमेत बस्नेतको दाबी छ ।

विगतमा पनि उत्तरी दुर्गम बस्तीमा तीन महिनामा एकपटक जसरी पनि पुग्ने, दुर्गम बिकट क्षेत्रको बिकासमा आफु लागि पर्ने बताए पनि मन्त्री हुँदा समेत विकास निर्माणको काममा भने लाग्न सकेनन् । जसका कारण पनि उत्तरी क्षेत्रका मतदाता समेत बस्नेतसँग रुष्ट छन् । यता दक्षिण क्षेत्रमा पनि एमालेकै कार्यकालमा राष्ट्रिय गौरवको बुढीगण्डकी आयोजना निर्माणलाई गती दिनुको सट्टा चिनियाँ कम्पनीलाई बुझुाएको आरोप लागेको छ । एमालेको मतदातासमेत कम भएको क्षेत्रमा जनतासमेत रुष्ट हुँदा फाइदा कांग्रेसका उम्मेदवार बजगाइँले लिने देखिएको छ ।
अहिलेकै अवस्थाको मतपरिणामको अंकगणित हेर्दा सत्तारुढ गठबन्धनका उम्मेदवारहरूको जित सुनिश्चित देखिन्छ । यद्यपी अंकगणितलाई भन्दा भूगोलका जनताको विकासप्रतिको चाहाना, गठबन्धनप्रतिको वितृष्णा जनताको मत पाएर आफूले जित्ने बस्नेत दाबी गर्छन् ।

काठमाडौं । सर्वोच्च अदालतले ‘नो नट अगेन’ पेज र ग्रुप सञ्चालन गर्नेहरुविरुद्ध कारबाही अघि नबढाउन अल्पकालीन अन्तरिम आदेश जारी गरेको छ ।

न्यायाधीश हरिप्रसाद फुयाँलको एकल इजलासले निर्वाचन आयोगका नाममा यस्तो आदेश जारी गरेको हो । वरिष्ठ अधिवक्ता दिनेश त्रिपाठीले दायर गरेको रिटमाथि सुनुवाइ भएको हो ।

त्यस्तै नेपाल प्रहरीको साइबर ब्यूरोलाई पत्राचार गरी नो नट अगेन पेजमार्फत दलका नेताविरुद्ध हुने अभिव्यक्ति र आक्रोशजन्य सामग्रीको अनुगमन गर्न आग्रह गरेको थियो । र नो नट अगेन पेजलाई विद्युतीय कारोबार ऐन अनुसार कारबाही गर्नसमेत आयोगले आग्रह गरेको थियो ।

सर्वोच्चले विपक्षीका नाममा कारण देखाऊ आदेश पनि जारी गरेको छ । साथै अन्तरिम आदेशका सम्बन्धमा छलफलका लागि दुवै पक्षलाई बोलाइएको छ ।

काठमाडौं । नेत्रविक्रम चन्द विप्लव नेतृत्वको नेपाल कम्युनिष्ट पार्टी लगाएत तीन साना कम्युनिष्ट पार्टीले आसन्न निर्वाचनको बिरोध गर्दै संघर्षका कार्यक्रम सार्वजनिक गरेको छ ।

आइतबार काठमाडौंमा पत्रकार सम्मेलन गर्दै नेकपा लगाएत ऋषि कट्टेल नेतृत्वको नेकपा, आहुति नेतृत्वको वैज्ञानिक समाजवादी कम्युनिष्ट पार्टी, नेपालले निर्वाचनको विरोधमा संयुक्त कार्यक्रम सार्वजनिक गरेको हो । आगामी मंसिर ४ गते हुने निर्वाचन खारेजी/बहिष्कारको निर्णय गर्दै उनीहरुले आफुहरुको आन्दोलनमा सक्रिय सहभागीता जनाउन आह्वान पनि गरेका छन् ।

उनीहरुले निर्वाचनको विरोधमा कार्तिक २४ देखि ३० गतेसम्म काठमाडौं लगाएत बुटवल, इटहरी, बर्दिवास, पोखरा, सुर्खेत र धनगढीमा राजनीतिक सभा गर्ने जनाएका छन् भने कार्तिक २६ देखि ३० गतेसम्म देशका बिभिन्न स्थानमा कोणसभा र विरोध प्रर्दशन गरिने वैज्ञानिक समाजवादी कम्युनिष्ट पार्टीका महासचिव आहुतिले जानकारी दिए । उनले अहिलको व्यवस्थाको बिरुद्धमा र नयाँ व्यवस्थाको सुरुवातका लागि आफुहरुको संघर्ष भएको बताए ।

त्यस्तै नेकपाका प्रवक्ता प्रकाण्डले क्रान्तिपछि उपलव्ध भएका जनताको अधिकारहरु एकपछि अर्को गरि कटौटी हुने गएकाले अहिलेको व्यवस्थाप्रति आफुहरुको आन्दोलन भएको बताए । मुलुकमा भ्रष्टाचार व्याप्त हुदै गएको, सामाजिक असुरक्षा हुदै गएको उनको भनाई छ ।

पत्रकार सम्मेलनमा नेकपाका अध्यक्ष ऋषि कट्टेलले चूनाव बहिष्कार र आन्दोलनमार्फत सत्ताको बिरुद्ध निरन्तर जनक्रान्तिको बाटोमा देशलाई अघि बढाएर जनताको राज्य सत्ता निर्माणमा लाग्ने धारणा राखे।

काठमाडौं । पछिल्लो २४ घन्टामा देशभर २८ जनामा कोरोना भाइरस संक्रमण पुष्टी भएको छ।

स्वास्थ्य तथा जनसंख्या मन्त्रालयका अनुसार आइतबार २८ जनामा संक्रमण पुष्टी भएको हो।

एक हजार ८७९ जनाको कोरोना परीक्षण गर्दा उक्त संख्यामा संक्रमित थपिएका हुन्।

एक हजार २१९ जनाको पिसिआर र ६६० जनाको एन्टिजेन परीक्षण गरिएको थियो। अहिले देशभर ५७० जना सक्रिय संक्रमित छन्।

१८ जना संक्रमित निको समेत भएका छन्। कोरोना संक्रमणबाट पछिल्लो २४ घण्टामा मृत्यु हुनेको संख्या शून्य छ।

काठमाडौं । नेकपा एमालेका सचिव गोकर्ण विष्टलाई चुनावी झड्का लागेको छ ।

नेकपा एमालेका एकजना असन्तुष्ट नेता शेषकान्त गौतमले नेकपा एकीकृत समाजवादीबाट गुल्मी क्षेत्र नम्बर २ की उम्मेदवार रामकुमारी झाँक्रीलाई साथ दिने घोषणा गरेसँगै विष्टलाई झड्का लागेको हो ।

आइतबार पार्टीका प्रदेश कमिटी सदस्य शेषकान्त गौतमले नेकपा एकीकृत समाजवादीकी नेतृ रामकुमारी झाँक्रीलाई चुनावमा सहयोग गर्न आह्वान गरेका छन् ।

उनले एमाले उम्मेदवार विष्टमाथि एमाले विभाजनमा भूमिका खेलेकाे लगायतका आराेप लगाउँदै झाँक्रीलाई मत मागेका छन् ।

कफी विकास बोर्डका अध्यक्ष पनि भइसकेका उनी एमाले लुम्बिनी प्रदेश कमिटी सदस्य छन्।

‘आन्दोलनबाट खारिएकी एक शसक्त र जुझारु युवा कमरेड रामकुमारी झाँक्रीलाई प्रतिनिधिसभामा गुल्मी २ का मतदाताले विजयी गराउनुपर्ने उचित ठानेको छु’, उनले आइतबार जारी गरेकाे प्रेस विज्ञप्तिमा उल्लेख छ ।

उनले झाक्रीलाई मत दिएर विजयी गराउन आह्वान गरेका हुन् । गौतमले विष्टप्रति लक्षित गर्दै विगतमा पार्टी फुटाउन भूमिका खेलेको र अहिले जिल्लामा काम गरेका नेता कार्यकर्तालाई अमर्यादित व्यवहार गरेको गुनासो गरेका छन् ।

यो पटक पनि चुनाव जितेमा उनी गुल्मी २ बाट ह्याट्रिक पूरा गर्नेछन् ।

२०५६ सालको निर्वाचनदेखि सोही क्षेत्रमा लगातार उम्मेदवार बन्दै आएका विष्ट २०६४ सालको निर्वाचन हारेका थिए भने त्यसपछि २०७० र २०७४ को निर्वाचन जितेका थिए ।

तर, यसपटक भने उनलाई चुनाव जित्न सजिलाे देखिएकाे छैन । एकातर्फ वाम लोकतान्त्रिक गठबन्धन बनेको अवस्थामा अर्काेतिर विष्टलाई पार्टी भित्रबाट नै असहयोग देखिएको छ ।