Author: Vishwanews.com

काठमाडौं । नेपाली कांग्रेसका नेता नवीन्द्रराज जोशीलाई मस्तिष्कघात भएको छ । मस्तिष्कघातका कारण उनको स्वास्थ्य अवस्था समेत गम्भीर रहेको चिकित्सकले जानकारी गराएका छन् । बिहीबार राती मस्तिष्कघात भएपछि जोशीलाई वीर अस्पताल लगिएको थियो । त्यहाबाट उनलाई नर्भिक अस्पतालमा रिफर गरिएको थियो ।

चिकित्सकहरुका अनुसार अस्पताल पुगेर सिटी स्क्यान गर्दा उनको टाउकोमा रगत जमेको पाइएको हो । त्यसपछि वीरले नर्भिक रिफर गरेको थियो । उनको उपचारमा संलग्न नर्भिकका न्यूरो सर्जन डा. राजीव झाका अनुसार जोशीलाई कोमामा राखिएको थियो । सास फेर्न गाह्रो हुने र बान्ता फोक्सोमा पुगिसकेको अवस्था रहेको उनले जानकारी दिए ।

चिकित्सकले सास फेर्न सहज होस् भनेर पाइप राखेको र फोक्सोमा पुगेको वान्तासमेत निकालेको उनले बताए । सिटी स्क्यानबाट दिमागको बीचमा पानी जम्मा हुने ठाउँमा रगत पुगेका कारण ब्लक भएको पाइएको उनले बताए । सुगर, प्रेसरजस्ता समस्याबाट उनी यसअघि नै ग्रसित रहेको पाइएको छ । जोशीले रगत पातलो बनाउने औषधि खाइरहेको बताइएको छ । जोशीको अवस्था निकै जटिल रहेको चिकित्सकले बताएका छन् ।

काठमाडौं । सरकारले प्रतिनिधिसभाको अधिवेशन २३ फागुनमा आह्वान गर्न राष्ट्रपति विद्यादेवी भण्डारीसमक्ष सिफारिस गर्ने निर्णय गरेको छ । आज बसेको मन्त्रिपरिषद्को बैठकले यस्तो निर्णय गरेको हो । सर्वोच्च अदालतले १३ दिन भित्र बैठक बोलाउन आदेश गरेके थियो ।

आदेश कार्यान्वयन गर्दै संसद अधिवेशन बोलाउन सिफारिस गर्ने निर्णय सरकारले गरेको छ । ११ फागुनमा सर्वोच्च अदालतले संसद विघटन गर्ने निर्णय बदर गर्दै १३ दिनभित्र संसद अधिवेशन बोलाउन परामादेश जारी गरेको थियो । राष्ट्रपतिले संसद अधिवेशन आह्वान गरेपछि बैठक बस्ने छ ।

काठमाडौं । उपप्रधानमन्त्री ईश्वर पोखरेलले नेकपा प्रचण्ड-माधव पक्षलाई हिम्मत भए अविश्वासको प्रस्ताव लिएर आउन चेतावनी दिएका छन्।

अनेरास्ववियुले काठमाडाैंमा आयोजना गरेको कार्यकर्ता भेलालाई सम्बोधन गर्दै उनले भने, ‘हिम्मत भए अविश्वासको प्रस्ताव ल्याउ, प्रधानमन्त्री केपी ओली त्यसको संसदमा डटेर सामना गर्त तयार हुनुहुन्छ। हामी संसद् बोलाउँछौँ, कसको हिम्मत छ? अविश्वासको सामना गर्दा के परिणाम आउँछ त्यसलाई स्वीकार गछौँ।’

उनले प्रधानमन्त्रीले राजीनामा नदिने पनि दाबी गरे। सर्वोच्च अदालतको निर्णयले मुलुकको राजनीतिलाई पुरानै फोहोरी खेलमा धकेलेको उनले बताए। ‘अदालतको निर्णय हामी कार्यान्वयन गछौँ। तर, सर्वोच्च अदालतको निर्णय सबैभन्दा ठूलो होइन’ उनले भने, ‘सबैभन्दा ठूलो अदालत भनेको जनता नै हो।’

ओली नेतृत्वको नेकपा सग्लो भएकाले जस्तोसुकै परिस्थिती आएपनि लड्न सक्ने बताए। ‘केपी ओली लोकतन्त्रमाथि विश्वास राख्नुहुन्छ। सडकमा भुस्याहा कुकुरझैँ कराउँदैमा ओलीले राजीनामा दिनुहुन्छ भन्ने नसोचे हुन्छ’ उनले भने।

अब पार्टीले चुनौतीका बीचमा नयाँ ढंगबाट अगाडि जाने उनले बताए। ‘पार्टी र सत्ता कब्जा गरेर आएका अब हुँदैनन्। अब नयाँ पुस्ताबाट कम्युनिस्ट पार्टी बन्छ’ उनले भने।

काठमाडौं । पछिल्लो २४ घण्टामा नेपालमा थप ११२ जनामा कोरोना भाइरसको संक्रमण पुष्टि भएको छ ।

स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ११२ जनामा कोरोना संक्रमण पुष्टि भएको हो ।

यो सँगै कोरोना संक्रमितको संख्या २ लाख ७३ हजार ९८४ जना पुगेको छ । स्वास्थ्य मन्त्रालयका अनुसार ५४ जना कोरोनालाई जितेर अस्पतालबाट डिस्चार्ज भएका छन् ।

यो सँगै नेपालमा निको हुनेको संख्या २ लाख ७० हजार २७७ जना पुगेको मन्त्रालयले जनाएको छ । पछिल्लो २४ घण्टामा ४ जनाको कोरोना संक्रमणबाट मृत्यु भएको छ । यो सहित मृतको संख्या २७७१ पुगेको छ ।

काठमाडौं । ओली समूहले सत्तारुढ नेपाल कम्युनिष्ट पार्टी (नेकपा) संसदीय दलको प्रमुख सचेतकबाट देव गुरुङलाई हटाइएको छ ।

गुरुङलाई हटाएर खोटाङका सांसद विशाल भट्टराईलाई प्रमुख सचेतकको जिम्मेवारी दिएको हो । गुरुङ, प्रचण्ड–माधव समूहमा थिए ।

काठमाडौं । बदलिँदो परिस्थितिमा नेपाली कांग्रेस केन्द्रमा छ । किनकी भावनात्मक रुपमा नेकपा विभाजित भइसकेको अवस्थामा नयाँ सरकारको बनाउने कसरतको केन्द्रमा कांग्रेस आइपुगेको छ । यसै सन्दर्भमा सभापति शेरबहादुर देउवाको सक्रियता समेत बढेको छ । उनलाई नेकपाका नेताहरुले भेटिसकेका छन् ।

बिहिबार नेपालका लागि चिनियाँ र भारतीय राजदूतले समेत उनलाई भेटेका छन्। नेपाली संचारमाध्यमहरुका अनुसार बिहीबार छुट्टाछुट्टै समयमा चिनियाँ राजदूत होउ यान्छी र भारतीय राजदूत विनयमोहन क्वात्राले देउवासँग भेटेका छन् । दुबै राजदूत देउवा निवास बुढानिलकण्ठ पुगेका थिए । उनीहरुबीचमा कुराकानी के भयो भन्ने बारेमा भने कुनै पनि पक्षबाट सार्वजनिक गरिएको छैन ।

देउवा निवासमा बिहीबार नै कांग्रेसको पदाधिकारी बैठक राखिएको थियो । सो बैठक सकिएपछि राजदूतहरूले भेटेका हुन् । नेकपाका प्रचण्ड र माधव कुमार नेपाल तथा ओली समुहले देउवासँग छुट्टाछुट्टै सहकार्यको प्रस्ताव गरिसकेका छन् । यसमा भारत र चीनले देउवालाई दिएको सन्देश नै निर्णायक हुने देखिएको छ ।

काठमाडौं । नेपाल कम्युनिष्ट पार्टी भित्रको विवादको टुंगो नलागेसम्म प्रमुख विपक्षी नेपाली कांग्रेसले कुनै पनि समुहसँग सहकार्य नगर्ने निर्णय लिएको छ । बिहीबार पार्टी सभापति शेरबहादुर देउवा निवास बुढानीलकण्ठमा बसेको पदाधिकारी र पूर्व पदाधिकारीहरुको बैठकले यस्तो निर्णय गरेको हो ।

आजको बैठकमा संसद पुनर्स्थापना भएपछि उत्पन्न राजनीतिक परिस्थितिबारे समीक्षा भएको नेताहरुले बताएका छन् । बैठकमा सभापति देउवाले नेकपाको दुबै पक्षबाट सहकार्यको प्रस्ताव आएको जानकारी गराएका थिए । त्यसपछि उनले नेताहरुको राय माग गरे ।

बैठकले नेकपा विवादको अन्तिम टुंगो नलागेसम्म कांग्रेस कसैको पक्ष वा विपक्षमा उभिन नहुने निष्कर्षमा पुगेको छ । जनताले प्रतिपक्षमा बस्ने म्याण्डेट दिएको भन्दै नेताहरुले सरकारमा जान हतार नगर्न नेतृत्वलाई सुझाव दिएका थिए ।

काठमाडौं । नेपालमा थप ११२ जनामा कोरोना भाइरसको संक्रमण पुष्टि भएको छ ।

स्वास्थ्य तथा जनसंख्या मन्त्रालयको अनुसार विभिन्न प्रयोगशालामा गरिएको परीक्षणमा थप ११२ जनामा कोरोना संक्रमण पुष्टि भएको हो ।

यो सँगै कोरोना संक्रमितको संख्या २ लाख ७३ हजार ८७२ जना पुगेको छ । स्वास्थ्य मन्त्रालयका अनुसार ८४ जना कोरोनालाई जितेर अस्पतालबाट डिस्चार्ज भएका छन् ।

यो सँगै नेपालमा निको हुनेको संख्या २ लाख ७० हजार २२३ जना पुगेको मन्त्रालयले जनाएको छ ।

काठमाडौं । सर्वोच्च अदालतले संसद पुनर्स्थापना गरेसँगै प्रतिनिधिसभाका संसादहरुले पुस यताको एकमुष्ट तलब पाउने भएका छन् ।

प्रधानमन्त्री केपी शर्मा ओली नेतृत्वको सरकारले गरेको प्रतिनिधिसभा विघटनलाई सर्वोच्च अदालतले बदर गरिदिएपछि प्रतिनिधिसभाका सांसदहरुको जागिर पनि पुनःस्थापना भएको छ ।

योसँगै २७५ जना सांसदहरुले संसद नचलेको अवधिको पनि तलब पाउने भएका संसद सचिवालयका प्रवक्ता रोजनाथ पाण्डेले बताए । पुस ५ गते प्रतिनिधि सभा विघटन भएपछि सांसदहरुले पुसको ५ दिनको मात्र तलब पाएका थिए ।

सांसदहरूको मासिक करिव ६५ हजार रूपैयाँ वुझ्ने गरेका छन् । यो हिसावले मासिक झण्डै एक करोड ८० लाख रूपैयाँ प्रतिनिधिसभाका सांसदको तलबभत्तामा खर्च हुन्छ । प्रमुख प्रतिपक्षी दलका नेता, समितिका सभापति र दलका सचेतकलगायतको केही बढी छ ।

सर्वोच्चको आदेशपछि प्रधानमन्त्री ओली प्रतिनिधिसभाको बैठक बोलाउन तयार भएका छन् । अब प्रधानमन्त्री ओलीको सिफारिसमा राष्ट्रपति विद्यादेवी भण्डारीले १३ दिनभित्र बैठक आव्हवान गर्ने छिन् ।

सर्वोच्च अदालतले प्रतिनिधि सभा विघटन असंवैधानकि भएकाले त्यतिबेलादेखि नै कानुनी प्रभाव शून्य रहने गरी बदर गरिदिएको थियो ।

पुस ५ गते प्रधानमन्त्री ओलीले प्रतिनिधिसभा भंग गरिदिएपछि सांसदहरुको तलब रोक्का भएको थियो ।

काठमाडौं । सत्ता सहकार्यका लागि प्रचण्ड–माधव समूहको नेकपासँग छलफलका लागि पार्टी कार्यालय पेरिसडाँडा पुगेका जनता समाजवादी पार्टी (जसपा) नेताहरूले प्रचण्ड–माधव समूहलाई तपाईंहरूको कुन पार्टीको हो भनेर प्रश्न गरेका छन्।

नेकपाको प्रचण्ड–माधव समूहसँग छलफल गर्न पेरिसडाँडामा जसपाका अध्यक्ष महन्थ ठाकुर, वरिष्ठ नेता राजेन्द्र महतो र राजेन्द्र श्रेष्ठ पुगेका थिए।

बैठकमा अध्यक्षद्वय प्रचण्ड र माधवले राजनीतिक परिस्थितिअनुसार सहकार्य गरेर अघि बढ्न प्रस्ताव गरेका थिए। जवाफमा जसपाका नेताहरूले ‘तपाईंहरूको पार्टी कुन हो?’ भनेर सोधेको थियो।

नेकपा राजनीतिक रूपमा विभाजित भएपनि कानूनी रूपमा नछुट्टिएको, तर सत्ता समीकरणका लागि छलफल तीव्र बनाएsf कारण जसपाले आधिकारिक पार्टीको प्रश्न राखेको जनाएको छ।

सहकार्यको लागि आधिकारीक पार्टी चाहिएको नेता महतोले बताए। बैठकमा प्रचण्डले आफूहरू नै आधिकारिक नेकपा भएको पुष्पकमल दाहाल ‘प्रचण्ड’ र माधवकुमार नेपालले जवाफ दिएको महतोको भनाइ छ।

बैठकमा विगतमा संविधान संशोधनका सवालमा कांग्रेस, एमाले, माओवादीसित भएका सम्झौता कार्यान्वयन, आफ्ना नेता/कार्यकर्ताको रिहाइ लगायत विषयमा पार्टीको तर्फबाट भनाई राखिएको नेता महतोले जानकारी दिए।

काठमाडौं । नेपाली कांग्रेस पदाधिकारीको बैठक आज बस्ने भएको छ । पछिल्लो राजनीतिक अवस्थाबारे छलफल गर्न नेपाली कांग्रेसको पदाधिकारी बैठक बोलाएको हो । बैठक देउवा निवास बुढानीलकण्ठमा दिउँसो तीन बजे बस्ने भएको छ । बैठकमा पार्टीका पूर्वपदाधिकारीहरुसमेत सहभागी हुनेछन् ।

बैठकमा विकसित राजनीतिक घटनाक्रम, संसद् पुनःस्थापनापछि कांग्रेसको रणनीति, नेकपा प्रचण्ड,माधव समूहको प्रस्तावलगायत विषयमा छलफल हुने छ । संसद विघटन गर्ने प्रधानमन्त्री केपी शर्मा ओलीको कदमलाई सर्वोच्च अदालतले असंवैधानिक ठहर गरेपछि पुनःस्थापित संसदमा नयाँ सरकार गठनको तयारी शुरु भएको छ ।

यसमा कांग्रेसको भूमिका प्रमुख हुन्छ । यसअघि बुधबार नेकपा अध्यक्ष पुष्पकमल दाहाल ‘प्रचण्ड’ र माधव नेपालले बुधबार देउवालाई भेटेर सत्ता साझेदारीको प्रस्ताव गरिसकेका छन् । देउवाले भने पार्टीमा छलफल गरेर मात्र जवाफ दिने बताएका छन् । सोही अनुसार देउवाले आज पदाधिकारी र पूर्वपदाधिकारीलाई डाकेका हुन् ।