काठमाडौं । काठमाडौंको चाबहिलमा मोटरसाइकल पुलबाट खस्दा एक जनाको मृत्यु भएको छ । चाबहिलको गोपिकृष्णहल नजिकै पुलबाट मोटरसाइकल धोवीखोलामा खसेको हो । प्रहरीका अनुसार बा २६ प ४०२१ नम्बरको मोटरसाइकल खोलमा खस्दा चालक सिन्धुली घर भएका २७ वर्षिय लोकनारायण श्रेष्ठको ज्यान गएको हो ।
उनी पुलबाट खसेर गम्भीर घाइते भएका थिए । राती भएको यो घटनालगत्तै उनलाई उपचारका लागि नेपाल–भारत अस्पताल लगिएको थियो । त्यहाँ उपचारका क्रममा उनको ज्यान गएको छ । दुर्घटनाको कारण खुलेको छैन ।
विराटनगर । प्रदेश १ का मुख्यमन्त्री शेरधन राईले शनिबार प्रदेश मन्त्रिपरिषद्का आर्थिक मामिला तथा योजनामन्त्री इन्द्रबहादुर आङ्बोलाई बर्खास्त गरे । अन्ततः यो कदम उनकै मन्त्रीपरिषद्का लागि घातक हुने देखिएको छ । आफुविरुद्ध अविश्वासको प्रस्ताव आउने डरले उनले मन्त्रीलाई बर्खास्त गरेका हुन् ।
तर, अब भने वास्तवमै अविश्वासको प्रस्ताव ल्याउन बाटो खुलेको प्रतिक्रिया नेताहरुले दिएका छन् । मन्त्री आङ्बो प्रचण्ड–नेपाल समुहका हुन् । मूख्यमन्त्री राई भने ओली समुहका हुन् । मूख्यमन्त्री राईले आर्थिक मामिला तथा योजनामन्त्री इन्द्रबहादुर आङ्बोलाई मुख्यमन्त्री राईले पदमुक्त गरेसँगै सम्भवतः आजै उनीविरुद्ध अविश्वास प्रस्ताव दर्ता हुने भएको छ ।
यसको तयारीमा जुटेको नेताहरुले जनाएका छन् ।प्रचण्ड–नेपाल समुह नेकपा भित्र बहुमत रहेका कारण अविश्वासको प्रस्ताव आउनासाथ मूख्यमन्त्री राई स्वतः अल्पमतमा पर्नेछन् ।
यसअघि बागमती प्रदेशका मूख्यमन्त्री डोरमणी पौडेलविरुद्ध अविश्वासको प्रस्ताव दर्ता भइसकेको छ । प्रदेश १ मा भने नयाँ सरकार बनाउन अब निकै कसरत गर्नपर्नेछ ।
किनकी नेकपामा फूट आएसँगै अब कांग्रसलाई सरकारमा सहभागी गराउनै पर्छ । केन्द्रमा पार्टीमा आएको फूटको प्रभाव अब प्रदेश सरकारहरुमा पर्न लागेको हो ।
काठमाडौं । नवनियुक्त तथा मन्त्रालय हेरफेर भई आएका मन्त्रीहरुले आज पदभार सम्हाल्ने कार्यक्रम छ । शुक्रबार राती अबेर मात्र सपथ खाएका कारण उनीहरु सो दिन कार्यालय जान पाएनन । शनिबार सार्वजनिक बिदा थियो ।
सोहीकारण आज उनीहरुले आज आआफ्नो मन्त्रालय सम्हाल्ने भएका हुन् । आइतबार उर्जा मन्त्रीले बिहानै मन्त्रालय पुगी कार्यभार ग्रहण गरिसकेका छन् । अन्य मन्त्रीले समेत छुट्टाछुट्टै समयमा कार्यभार सम्हाल्नेछन् ।
शुक्रबार प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीबाट ९ जना नयाँ मन्त्रीलाई नियुक्त गरेकी थिइन् । वर्तमान मन्त्रीपरिषद्का केही सदस्यको भने जिम्मेवारी हेरफेर भएको थियो ।
शुक्रबार उर्जा, जलस्रोत तथा सिँचाई मन्त्रालयमा टोपबहादुर रायमाझी, सहरी विकास मन्त्रालयमा प्रभु साह, खानेपानीमा मणिचन्द्र थापा, तथा श्रम रोजगार तथा सामाजिक सुरक्षा मन्त्रालयमा गौरीशंकर चौधरी नियुक्त भएका छन् ।
संघीय मामिला तथा सामान्य प्रशासन मन्त्रीमा गणेश सिंह ठगुन्ना, वन तथा वातावरणमा प्रेमबहादुर आले, युवा तथा खेलकुदमा दावा लामा र महिला, बालबालिका तथा ज्येष्ठ नागरिक मन्त्रीमा जुलीकुमारी महतोलाई नियुक्त भई जिम्मेवारी सम्हाल्दैछन् । उद्योग, वाणिज्य तथा आपूर्ति राज्य मन्त्रीमा विमला विकलाई नियुक्ति दिइएको छ ।
काठमाडौं । छिमेकी मुलुक चीनले नेपालमा भइरहेको राजनीतिक उथलपुथललाई गम्भिरतापूर्वक लिएको छ । पछिल्लो केही दिनयता नेपालस्थित चिनियाँ राजदूतको सक्रियता बढेको थियो । यद्दपी यो घटनाक्रमबारे चीन भने मौन छ । यसै सन्दर्भमा आज चीनका केही उच्च अधिकारीसहितको टोली काठमाडौं आउँदैछ ।
चिनियाँ कम्युनिष्ट पार्टीको अन्तर्राष्ट्रिय विभागका उपमन्त्री गुओ येचौकोको नेतृत्वमा एक टोली काठमाडौं आउन लागेको हो । नेपालमा नेकपाको फूट र यसमा आइरहेको उतारचढावबारे उक्त टोलीले चासो लिेन भएको छ । उनको आगमनसँगै नेपालको राजनीतिमा नयाँ धार देखिने अनुमान समेत गरिन्छ ।
किनकी शनिबार नेकपा अध्यक्ष प्रचण्डले नेता बामदेव गौतमसँग भेटेका थिए । उक्त भेटमा गौतमले जे सुकै भएपनि पार्टी एक हुने वातावरण भने बनाइराख्न आह्वान गरेका थिए । आफु संसद विघटनको विरुद्धमा रहेको समेत उनको भनाई थियो ।
उपमन्त्री येचौकोले नेकपाका शीर्ष नेताहरुलाई भेट्ने छन् । यद्दपी भ्रमणबारे नेकपा र काठमाडौंस्थित चिनियाँ दूताबासले कुनै योजना सार्वजनिक नगरेको नेपाली संचारमाध्यमहरुले लेखेका छन् । स्रोतका अनुसार चीनले नेकपा एक भएको हेर्न चाहन्छ । त्यसकारण यो पार्टीमा आएको फूटबाट ऊ संतुष्ट छैन ।
गुल्मी । गुल्मीमा ट्रकको ठक्करबाट २ जना पैदलयात्रीको ज्यान गएको छ । ट्रकको ठक्करबाट जिल्लाको रेसुङ्गा नगरपालिका वडानम्बर–१३ भगारी बस्ने २६ वर्षीय टोप बहादुर रजाली र २३ वर्षीय बालकृष्ण भुजेलको मृत्यु भएको जिल्ला प्रहरी कार्यालय गुल्मीले जनाएको छ ।
ट्रक बुटवलबाट खाद्यान्न बोकेर सदरमुकाम तम्घास तर्फ जाँदै थियो । ना ५ ख ३२०४ नम्बरको ट्रकले रेसुङ्गा नगरपालिका वडानम्बर–१३ भगारीस्थित मसिने खोलामा आइतबार विहान साढे २ बजेतिर उनीहरुलाई ठक्कर दिएको थियो ।
प्रहरीका अनुसार दुबै जनाको घटनास्थलमै मृत्यु भएको हो । प्रहरीले ट्रक र चालकलाई नियन्त्रणमा लिएको छ ।
लण्डन । बेलायतमा देखा परेको कोरोना भाइरसको नयाँ भाइरस यूरोपका ८ मुलुकसम्म बिस्तार भएको पाइएको छ । नयाँ प्रकारको कोरोना भाइरसको सङ्क्रमण अहिलेसम्म ८ वटा युरोपेली मुलुकमा फैलिएको अन्तराष्ट्रिय संचारमाध्यमले जनाएका छन् ।
युरोपेली संघ अन्तर्गतका आठ देशमा नयाँ प्रकारको कोरोना भाइरस देखिन थालेको पुष्टि भएको विश्व स्वास्थ्य संगठन (डब्ल्यूएचओ)ले उल्लेख गरेको छ । डब्ल्यूएचओका युरोपेली क्षेत्रका क्षेत्रीय निर्देशक हन्स क्युगले आफ्नो कार्यालयले अवस्थालाई गम्भीरतापूर्वक हेरिरहेको बताएका छन् ।
उनले नयाँ प्रकारको भाइरसका लागि रक्षात्मक र नियन्त्रणात्मक व्यवस्था कडाइकासाथ पालना गर्नु पर्ने बताए । कोरोनाको पुरानो भाइरसकोभन्दा फरक नतिजा देखाउँदै नयाँ प्रकारको भाइरसले युवाहरुलाई बढी प्रभावित पारेको देखिएको बताइएको छ ।
नयाँ प्रकारको कोरोना देखिएका आठ देशको पहिचान भएको बताए डब्लूएचओले मुलुकको नाम भने सार्वजनिक गरेको छैन । उनले सामाजिक दूरी कायम गर्ने, मास्क लगाउने र साबुन पानीले हात हुने वा स्यानिटाइजरको प्रयोग गर्ने जस्ता उपायलाई कडाइकासाथ अवलम्बन गर्न समेत आह्वान गरेका छन् ।
यसको गुण, लक्षण, असरलगायतमा अध्ययन अनुसन्धान भइरहेको र नतिजा आएमा धेरै कुरा प्रष्ट भइसकेपछि मात्र नयाँ रणनीति तय गर्न सकिने समेत डब्ल्यूएचओले उल्लेख गरेको छ । बेलायतमा पहिलो पटक देखिएको यो भाइरसले विश्वभर चिन्ता भने बढाएको छ ।
यससँगै विश्वभरबाट बेलायतमा भ्रमण रद्द गरिसकेका छन् । बेलायतबाट आउने मानिसहरुलाई समेत प्रतिवन्ध लागिसकेको छ ।
हेटौंडा । हेटौंडामा भएको बस दुर्घटनामा एक जनाको मृत्यु भएको छ । अन्य ८ जना घाइते भएका छन् । प्रहरीका अनुसार हेटौँडा नारायणगढ सडकखण्ड अन्तर्गत हेटौँडा उपमहानगरपालिका १९ बस्तीपुरमा शनिबार दिउँसो यात्रुवाहक बस दुर्घटनामा परेको हो ।
हेटौँडाबाट नारायणगढतर्फ जाँदै गरेको ना ५ ख ४६०९ नम्बरको यात्रुवाहक बस अनियन्त्रित भई पल्टिएको हो । दुर्घटनामा लमजुङ सुन्दरबजार नगरपालिका–८ बस्ने ३२ वर्षीय हरि गौलीको ज्यान गएको जिल्ला प्रहरी कार्यालय मकवानपुरले जानकारी दिएको छ ।
दुर्घटना गम्भीर घाइते भएका उनको उपचारका क्रममा हेटौँडा अस्पतालमा ज्यान गएको हो । दुर्घटनामा घाइते भएका ८ जनाको चुरेहिल अस्पतालमा उपचार जारी छ । बस चालकलाई भने प्रहरीले नियन्त्रणमा लिई अनुसन्धान थालेको बताइएको छ ।
काठमाडौं । नेपाली कांग्रेसका सभापति शेरबहादुर देउवाले चर्को आलोचनाका बीच आफु संसद विघटनको विरुद्धमा रहेको स्पष्टिकरण दिएका छन् । शनिबार एक विज्ञप्ती निकाल्दै उनले आफुले यस कदमलाई असंवैधानिक र अलोकतान्त्रिक ठहर गरिसकेको स्पष्ट पारेका छन् ।
साथै उनले आगामी सोमबार १ सय ६५ वटै निर्वाचन क्षेत्रमा संसद विघटन गरेको विरोधमा प्रदर्शन गरिने भन्दै त्यसमा सहभागी हुन समेत आह्वान गरेका छन् । उनले भनेका छन्, ‘विघटनकै दिन मैले पार्टीका वर्तमान र पूर्व पदाधिकारीहरूसँगको बसेको बैठक मार्फत संसद विघटनलाई असंवैधानिक र अलोकतान्त्रिक ठहर गरिसकेको छु, संविधानमा भएको व्यवस्था प्रतिकुल, जनभावना विपरीतको कार्य विरूद्ध नेपाली कांग्रेस सम्पूर्ण रुपले एकमत साथ उभिएको छ।’
यसअघि कांग्रेसको केन्द्रिय समिति बैठकमा उनले सरकारलाई मौन समर्थन गरिरहेको भन्दै चर्को आलोचना भएको थियो । कांग्रेसले संसद विघटनको असंवैधानिक कदमविरूद्ध एक सय ६५ वटै निर्वाचन क्षेत्रमा विरोध प्रदर्शनको आयोजना गरिएको विज्ञप्तिमा उल्लेख छ।
काठमाडौं । नेपालमा पछिल्लो २४ घण्टामा थप ५०० जनामा कोरोना भाइरसको संक्रमण पुष्टि भएको छ । यसअवधिमा कुल ५४३४ नमुना परीक्षण भएको स्वास्थ्य तथा जनसंख्या मन्त्रालयले जानकारी गराएको छ । यसअवधिमा २१३ महिला र २८७ पुरुषमा संक्रमण पुष्टि भएको छ । अब नेपालमा कुल संक्रमितको संख्या २ लाख ५७ हजार ७०० पुगेको छ ।
यसमध्ये २ लाख ४९ हजार १३२ जनाले कोरोना जित्न सफल भएका छन् । १८१९ जनाको भने निधन भएको छ । मन्त्रालयका अनुसार अहिले देशभर मात्र ६७४९ सक्रिय संक्रमित रहेका छन् । यसमध्ये ३३४९ होम आइसोलेसनमा छन् । जसले गर्दा अस्पतालहरुको उच्च चाप घटेको छ । २८८ जनाको आईसीयू र ५० जनाको भेन्टिलेटरमा उपचार जारी रहेको छ ।
ओमान । ओमानले आइतबारबाट कोरोना विरुद्धको खोप वितरण थाल्ने भएको छ । फाइजर र बायोएनटेक कम्पनीले निर्माण गरेको कोरोनाविरूद्धको खोप ओमान पुगेको छ । यस्तो खोप ओमानी नागरिकसहित आप्रवासी कामदारले समेत पाउने भएका छन् । यसबाट नेपाली नागरिक समेत लाभान्वित हुनेछन् ।
पहिलो ब्याच भ्याक्सिन डीएचल कार्गो विमानमार्फत ओमान लगिएको ओमानी स्वास्थ्य मन्त्रालयले जनाएको छ । पहिलो व्याचमा १५ हजार ६ सय डोज खोप ओमान पुगेको छ । ओमानी स्वास्थ्य मन्त्रालयका अनुसार ओमानले भाइरसविरूद्ध फाइजर र बायोएनटेकले निर्माण गरेको खोप खरिद गरेको हो ।
खोप वितरण अभियानको नेतृत्व स्वास्थ्य मन्त्री डा. अहमद बिन मोहम्मद अल सईदीले गर्ने कार्यक्रम रहेको छ । पहिलो चरणमा स्वास्थ्यकर्मी, दीर्घ रोगी, वृद्ध वृद्धाले खोप पाउने भएका छन् । ओमानले यहाँ रहेको कुल जनसंख्याको ६० प्रतिशतलाई खोप दिने तयारी गरेको छ ।
काठमाडौं । ११ चैत २०७६ यता बन्द भएको सवारी चालक अनुमतिपत्र (लाइसेन्स)को अनलाइन आवेदन आगामी मंगलबारबाट सूचारु हुने भएको छ । यातायात व्यवस्था विभागले यस्तो जानकारी गराएको हो । लाइसेन्स वितरणका लागि आवेदन, लिखित परीक्षा र ट्रायल मंगलबारदेखि सूचारु हुने विभागको भनाई छ ।
कोरोना भाइरसविरुद्ध स्वास्थ्य मन्त्रालयले तयार पारेको मापदण्ड पालना गर्ने गरी नयाँ लाइसेन्सको परीक्षा र वर्ग थपको प्रक्रिया खुला गर्न लागिएको छ । अब प्रदेश यातायात कार्यालयमार्फत पनि नयाँ लाइसेन्स वितरण खुला हुने भएको छ । लामो समयदेखि लाइसेन्स वितरण बन्द हुँदा लाखौं सेवाग्राही प्रभावित बनेका थिए ।
दाङ । प्रधानमन्त्री कप राष्ट्रिय महिला क्रिकेट प्रतियोगिता आजबाट दाङमा सुरु हुँदैछ। यो प्रतियोगितालाई लुम्बिनी प्रदेशले आयोजनाको मौका पाएको हो । दाङको लमहीस्थित देउखुरी अन्तर्राष्ट्रिय क्रिकेट मैदानमा प्रतियोगिता संचालन हुनेछ ।
लुम्बिनी प्रदेश क्रिकेट संघका अनुसार प्रतियोगिताको सबै तयारी पुरा भइसकेको छ । प्रतियोगितामा सात प्रादेशिक टोली र विभागीय टोली एपिएफले भाग लिएको छ । प्रतियोगिता दुई समूहमा विभाजन भएको छ ।
समूह ‘ए’मा एपिएफ, प्रदेश २, कर्णाली र लुम्बिनी प्रदेश छन् भने समूह ‘बी’मा सुदूरपश्चिम, बागमती, गण्डकी र प्रदेश १ भिड्ने भएका छन् । उदघाटन खेलमा लुम्बिनीले प्रदेश २ सँग प्रतिष्पर्धा गर्ने भएको छ ।
समूहका शीर्ष दुई टोली सेमिफाइनल पुग्नेछन्। सेमिफाइनलका दुवै खेल पुस १७ र फाइनल खेल १९ गते हुने गरी तालिका तय भएको छ ।
काठमाडौं । आज यस हिउँदकै सबैभन्दा चिसो दिनका रुपमा तापमान मापन भएको छ । काठमाडौं उपत्यकाको तापक्रम आज १.३ डिग्री मापन भएको छ । मौसम पूर्वानुमान महाशाखाका अनुसार शुक्रबार भने काठमाडौंको तापक्रम २ दशमलव ५ डिग्री रहेको थियो।
यसअघि ३ पुसमा काठमाडौं उपत्यकाको न्यूनतम तापक्रम १ दशमलव ६ डिग्रीसम्म झरेको थियो । त्यसपछि केही बढेको तापक्रम आज भने ह्वात्तै घटेको छ । काठमाडौंको तापक्रम अझै कम हुने अनुमान गरिएको छ । आज अधिकतम तापक्रम १८ देखि २० डिग्रीसम्म पुग्ने अनुमान छ ।
सोहीकारण दिउँसो चर्को घाम लाग्दा काठमाडौंबासीलाई राहत भने पुगेो छ । महाशाखाका अनुसार तराईमा हुस्सु र कुहिरोको प्रभाव रहनेछ । यसले तराई क्षेत्रमा भने जनजीवन प्रभावित बनेको छ ।
देशका अन्य भूभागको मौसम भने सामान्य रहने भएको छ । काठमाडौं उपत्यकासहित प्रदेश नम्बर १ र सुदूरपश्चिम प्रदेशमा दिउँसो बादल लाग्ने गरिएको छ ।
काठमाडौं । प्रतिनिधिसभा विघटन गरेको सरकारले राष्ट्रिय सभाको हिउँदे अधिवेशन भने बोलाउने निर्णय गरेको छ । मन्त्रिपरिषद् बैठकले राष्ट्रियसभाको हिउँदे अधिवेशन पुस १७ गतेका लागि आह्वान गर्न राष्ट्रपतिलाई सिफारिस गर्ने निर्णय गरेको नेपाली संचारमाध्यमले जनाएका छन् ।
शुक्रबार मन्त्रीपरिषद् हेरफेरपछि प्रधानमन्त्री केपी शर्मा ओलीले वालुवाटारमा मन्त्रिपरिषद् बैठक राखेका थिए । उक्त बैठकले राष्ट्रिय सभा बोलाउने निर्णय लिएको बताइएको छ ।
यसअघि १८ असारमा राष्ट्रपतिबाट वर्षे अधिवेशन अन्त्य भएको थियो । त्यसपछि प्रतिनिधिसभा भने नेकपा भित्रको आन्तरिक कलहको शिकार बनी विघटनमा परेको छ । यसविरुद्ध अदालतमा मुद्दा विचाराधिन अवस्थामा रहेको छ ।
काठमाडौं । शुक्रबार जब नेपाली कांग्रेसका सभापति शेर बहादुर देउवाले आफ्ना नेताहरुलाई संसद पुनस्र्थापना बारे नबोल्ने निर्देशन दिए, त्यसपछि सामाजिक संजालमा उनिविरुद्ध कांग्रेस पंक्तिबाट तिब्र आलोचना शुरु भयो । कतिपयले लोकतन्त्रलाई सबैभन्दा बढी खतरा यदी कोहीबाट छ भने त्यो नेपाली कांग्रेसका सभापति शेरबहादुर देउवाबाट सम्म भन्न भ्याए ।
किनकी उनी पदका लागि असंवैधानिक कदम चालेका प्रधानमन्त्री केपी ओलीलाई मौन समर्थन गरिरहेका रहेका छन् । सरकारले संसद विघटन गरेकै दिन पदाधिकारी बैठक बोलाएर कांग्रेसले एक धारणा बनाएको थियो ।
जसमा भनिएको थियो, ‘प्रतिनिधिसभा विघटनलाई संविधान भत्काउने र मुलुकलाई अस्थिरता, अनिश्चितता, अराजकता र असफलतातर्फ लैजाने गम्भीर षडयन्त्र हो ।’ यसबारे औपचारिक निर्णय गर्न कांग्रेसले केन्द्रीय कार्यसमितिको आकस्मिक बैठक बोलायो ।
पुस ७, ८, ९ र १० गते गरी चार दिनसम्म चलेको बैठकमा १७ केन्द्रीय सदस्यले आफ्नो धारणा राखेका छन् । संसद विघटनको विरोधमा १३ पुसमा १६५ वटै निर्वाचन क्षेत्रमा प्रदर्शन राखिएको छ । तर, कांग्रेसले केन्द्रिय कमिटी भने १९ पुससम्मका लागि स्थगित गरेको छ ।
यसमा नेता तथा कार्यक्रता पार्टी सभापति शेरबहादुर देउवाको नियतः देख्छन् । संसद विघटनविरुद्ध कडारुपमा प्रस्तुत हुन नचाहेकै कारण उनले बैठक अनेक बाहनामा लम्याएको आरोप नेता तथा कार्यक्रताको रहेको छ ।
शेर बहादुर देउवा भने संसद भंग भएपनि चुनावमा जाने मनसायमा छन् । तर, वरिष्ठ नेता रामचन्द्र पौडेल, गगन थापा लगायतका नेताहरु संसद भंग गर्नु असंवैधानिक भन्ने निष्कर्षमा पार्टी पुगिसकेकाले सडक आन्दोलनको विकल्प नभएको निष्कर्षमा छन् ।
बैठकमा संसद पुनस्र्थापनाको माग राख्नासाथ देउवाले आफ्नै केन्द्रिय सदस्यहरुमाथि प्रतिवाद गर्न थालेसँगै पार्टी भित्रै उनको नियतबारे संका शुरु भएको हो ।
त्यसो त, प्रधानमन्त्रीले राज्यका तीन वटै अंग र निर्वाचन आयोगलाई समेत आफ्नो पडकमा लिई चालेको कदम भएकाले तत्कालका लागि प्रधानमन्त्रीविरुद्ध कुनै पनि निकायले निर्णय नगर्ने भएको बुझेका देउवा यो निर्णयबाट लिन सकिने लाभप्रति पनि जानकार रहेको आंशका गरिएको छ ।
पछिल्ला दिनमा प्रधानमन्त्रीले संविधानका प्रावधान कुल्चदै धमाधम निर्णय गरिरहेका छन् । त्यसकै एक पाइला उनले शुक्रबार चुनाव हारेका र चुनाव नै नलडेका नेतालाई मन्त्री उपहार दिए । जुन संविधानमा कतै परिकल्पना गरेको विषय होइन ।
काठमाडौं । प्रधानमन्त्री केपी शर्मा ओली यतिबेला शक्ति केन्द्रित गर्न अनेक उपाय लगाइरहेका छन् । संसद भंग गरी संविधानलाई समेत कुल्चेर अगाडी बढेका उनले आज मन्त्रिपरिषद् बिस्तार र मन्त्रीहरु थप गरेका छन् । रमाइलो पक्ष त उनले प्रदेशसभा निर्वाचनमा हारेका पूर्वमाओवादीका नेतालाई संघीय मन्त्रालय सुम्पिदिएका छन् ।
उनले सिन्धुपाल्चोकका दावा लामालाई युवा तथा खेलकुद मन्त्रालयको जिम्मेवारी दिए । उनी प्रदेश सभामा सिन्धुपाल्चोकमा हारेका नेता हुन् । प्रचण्ड समुहका उनलाई ओलीले मन्त्री पद दिएर आकर्षित गरेका छन् ।
सिन्धुपाल्चोककै पूर्वएमाले नेता शेरबहादुर तामांगले प्रचण्डलाई साथ दिएपछि ओलीले लामालाई लाभको पद दिएका हुन् । प्रधानमन्त्री केपी शर्मा ओलीले आज ९ जना नयाँ नेतालाई मन्त्री पद दिए ।
दुई जनाको मन्त्री पद भने गुमेको छ । युवा तथा खेलकुद मन्त्री जगत विश्वकर्मा र उद्योग राज्य मन्त्री मोती दुगडको पद गएको हो । शुक्रबार हतार हतारमा भएको मन्त्रिपरिषद बिस्तारमा ८ जना मन्त्री र एक राज्यमन्त्री थपिए ।
शुक्रबार टोपबहादुर रायमाझी, मणि थापा, प्रभु शाह, प्रेमबहादुर आले, गणेश ठगुन्ना, गौरीशंकर चौधरी दावा लामा र जुलीकुमारी महतो मन्त्री बने । विमला विश्वकर्मालाई राज्य मन्त्रीको जिम्मेवारी दिइएको छ ।
आज थप र जिम्मेवारी हेरफेर भएका मन्त्री
टोपबहादुर रायमाझी : उर्जा
मणि थापा : खानेपानी
प्रभु साह : शहरी विकास
प्रेम आले : वन
गणेश ठगुन्ना : सामान्य प्रशासन
गौरी शंकर चौधरी : श्रम
दावा लामा : युवा तथा खेलकुद
जुली कुमारी महतो : महिला बालबालिका
विमला विश्वकर्मा : उद्योग राज्यमन्त्री
भानुभक्त ढकाल : पर्यटन (मन्त्रालय हेरफेर)
हृदयेश त्रिपाठी : स्वास्थ्य (मन्त्रालय हेरफेर)
लीलानाथ श्रेष्ठ : कानून
शिवमाया तुम्बाहाङ्फे : भूमिसुधार (मन्त्रालय हेरफेर)
पद्मा अर्याल : कृषि (मन्त्रालय हेरफेर)
कृष्ण गोपाल श्रेष्ठ : शिक्षा
काठमाडौं । काठमाडौं उपत्यकामा २७९जनामा कोरोना संक्रमित थपिएका छन् ।
स्वास्थ्य तथा जनसंख्या मन्त्रालयको अनुसार पछिल्लो २४ घण्टामा काठमाडौंमा २१२, भक्तपुरमा २० र ललितपुरमा ४७ जना नयाँ संक्रमित थपिएका हुन् । संक्रमित पुष्टि हुनेमा ११५ जना महिला र १६४ पुरुष रहेका छन् ।
काठमाडौं । नेपालमा कोरोना भाइरसको संक्रमणबाट थप ९ जनाको मृत्यु भएको छ।
स्वास्थ्य तथा जनसंख्या मन्त्रालयको अनुसार पछिल्लो २४ घण्टाको अवधीमा देशभर ९ जना संक्रमितको मृत्यु भएको हो ।
यो सहित कोरोनाका कारण मृत्यु हुनेको संख्या १८१६ पुगेको छ ।
काठमाडौं । नेपालमा थप ६०८ जनामा कोरोना भाइरसको संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार विभिन्न प्रयोगशालामा ४ हजार १४२ जनाको परीक्षणमा थप ६०८ जनामा कोरोना संक्रमण पुष्टि भएको हो ।
योसँगै कोरोना संक्रमितको संख्या २ लाख ५७ हजार ३ सय पुगेको छ ।
यस्तै, पछिल्लो २४ घण्टामा कोरोना संक्रमणबाट ९ जनाको मृत्यु भएको छ। योसँगै कोरोना संक्रमणबाट अहिलेसम्म मृत्यु हुनेको संख्या १८१६ पुगेको छ।
स्वास्थ्य मन्त्रालयका अनुसार शुक्रबार ८९२ जना कोरोनालाई जितेर अस्पतालबाट डिस्चार्ज भएका छन्। यो सँगै अहिलेसम्म २ लाख ४८ हजार २ सय ९२ जना संक्रमणमुक्त भएका छन्। भने संक्रिय संक्रमितको संख्या ७ हजार ९२ पुगेको छ ।
काठमाडौं । सर्वोच्च अदालतले संसद विघटन गर्ने सरकारको निर्णयमा कारण देखाउ आदेश जारी गरेको छ ।
संसद विघटनविरुद्ध परेको एक दर्जनभन्दा बढी निवेदनमाथि संवैधानिक इजालाशमा सुनुवाईपछि सर्वोच्चले कारण देखाऊ आदेश जारी गरेको हो ।
प्रधानन्यायाधीश चोलेन्द्र शमशेर राणा नेतृत्वको संवधानिक इजलाशले संसद विघटनसम्बन्धी मन्त्रिपरिषबाट भएको निर्णयको सक्कल प्रति, राष्ट्रपतिको निर्णयको सक्कल प्रतिका साथै संसदसँग सम्बन्धित आवश्यक कागजात पेश गर्ने आदेश दिइएको छ ।
यी निवेदनहरुमाथि प्रधानन्यायाधीश चोलेन्द्र शमशेर राणाको नेतृत्वमा संवैधानिक इजलाश गठन भएको थियो । जसमा न्यायाधीशहरु हरिकृष्ण कार्की, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी छन् ।
प्रधानमन्त्री केपी शर्मा ओलीले यही पुस ५ गते प्रतिनिधिसभा विघटन गरी आगामी वैशाख १७ र २७ गते मध्यावधि निर्वाचन गर्न सिफारिस गरेका थिए ।
राष्ट्रपति विद्यादेवी भण्डारीले सोही दिन उक्त सिफारिसलाई सदर गर्दै संसद् विघटन भएको घोषणा गरेकी थिइन् ।
सो मुद्दामा बुधबार प्रधानन्यायाधीश जबराको एकल इजलासले प्रतिनिधि सभा विघटनविरुद्ध परेका रिटहरू संविधानको धारा ७६ को व्याख्यासँग सम्बन्धित रहेकाले संवैधानिक इजलासमा पेश गर्न आदेश दिएका थिए ।
काठमाडौं । बागमती प्रदेशका मुख्यमन्त्री डोरमणि पौडेलविरुद्ध अविश्वासको प्रस्ताव दर्ता भएको छ ।
नेकपा प्रदेश संसदीय दलका उपनेता शालिकराम जमरकट्टेलको अगुवाइ अविश्वासको प्रस्ताव दर्ता भएको हो । नेकपा प्रचण्ड–माधव समूहका ४६ जना सांसदको हस्ताक्षरसहित मुख्यमन्त्रीविरुद्ध अविश्वासको प्रस्ताव दर्ता गराइएको छ ।
त्यसअघि सरकारमा रहेका तीन मन्त्रीले राजीनामा दिएका थिए । आन्तरिक मामिलामन्त्री शालिकराम जम्मरकट्टेल, उद्योगमन्त्री अरुण नेपालले र सामाजिक विकासमन्त्री युवराज दुलालले राजीनामा दिएका हुन् ।
काठमाडौं । प्रभु लाइफ इन्स्योरेन्सको प्राथमिक साधरण सेयर (आइपीओ) बाँडफाँट भएको छ ।
विक्री प्रबन्धक सिद्धार्थ क्यापिटलमा भएको बाँडफाँट अनुसार भाग्यशाली ५ लाख ४० हजार जनाले गोलप्रथाबाट १० कित्ताका दरले सेयर पाएका छन् भने ५ लाख ९ हजार ४७ जनाको हात रित्तो भएको छ ।
क्यापिटलका अनुसार प्रभुको आइपीओमा कुल १० लाख ५१ हजार २१६ जनाले आवेदन दिएका थिए । सोमध्ये २ हजार १६९ आवेदन रद्द भएका थिए ।
कम्पनीले पुस २९ गतेदेखि ६० करोड रुपैयाँ बराबरको ६० लाख कित्ता आइपीओ निष्काशन गरेको थियो । जसमध्ये ३ लाख कित्ता कम्पनीको कर्मचारी र ३ लाख कित्ता सामूहिक लगानीकोषका लागि छुट्याइएको थियो भने ५४ लाख कित्ताका लागि सर्वसाधरणका लागि छुट्याइएको थियो ।
कम्पनीको आइपीओमा १० लाख ५१ हजार २१६ आवेदकले २ करोड ७८ लाख २१ हजार १६० कित्ताका लागि आवेदन दिएका थिए । यो मागको करिब साढे ५ गुणा बढी हो।
हाल कम्पनीमा चुक्ता पूँजी १ अर्ब ४० करोड रुपैयाँ रहेको छ भने आइपीओपछि २ अर्ब पुग्नेछ ।
काठमाडौं । संसद विघटनविरुद्ध नेकपाको प्रचण्ड–माधव नेपाल समूहले आन्दोलन शुरु गरेको छ ।
माइतीघरबाट शुरु भएको प्रदर्शनमा ‘हामी जिउँदै छौं, हामी यहाँ छौं’ लेखिएको प्लेकार्डसहित प्रचण्ड, माधव नेपाल, झलनाथ खनाल, नारायणकाजी श्रेष्ठलगायतका नेता–कार्यकर्ताहरु सहभागी भएका छन् ।
उनीहरुले संसद विघटन असंवैधानिक भएको भन्दै चर्का नाराबाजी गरेका छन् ।
बिहीबार बसेको केन्द्रीय कमिटी बैठकले दैनिक रूपमा कुनै न कुनै प्रकारको विरोध गर्ने र १४ गते देशभर विरोध प्रदर्शन गर्ने निर्णय गरेको थियो ।
। माइतीघर मण्डलामा जम्मा भएर संयुक्त पत्रसहित निर्वाचन आयोगमा जाने र २ बजे पत्रकार सम्मेलन गर्ने प्रचण्ड–नेपाल समूहको योजना छ ।
नेकपाको प्रदर्शनलाई मध्यनजर गर्दै बानेश्वर माइतीघर सडकखण्ड खाली गराइएको छ भने सुरक्षा व्यवस्था पनि कडा पारिएको छ । पुष ५ गते आइतबार प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले संसद सदर गरेपछि प्रचण्ड–नेपाल समूहले विरोध गर्दै आइरहेको छ ।
काठमाडौं । नेपाली शान्ति सैनिकले सेन्ट्रल अफ्रिकन रिपब्लिकमा विद्रोहीको आक्रमण असफल बनाएको छ । सेन्ट्रल अफ्रिकन रिपब्लिकको प्रमुख सहर बमवारीलाई विद्रोहीको कब्जा हुनबाट नेपाली शान्ती सेनाले जोगाएको जनसम्पर्क तथा सूचना निर्देशनालयले जानकारी दिएको छ ।
यो सहरलाई विद्रोहीले नियन्त्रणमा लिएपछि त्यसको प्रतिकार स्वरुप नेपाली शान्ति सैनिकको एक गुल्म उक्त शहरमा परिचालन भएको थियो । त्यसपछि विद्रोही समुह पछि हट्न बाध्य भएको निर्देशनालयले उल्लेख गरेको छ ।
नेपाली शान्ति सैनिकको मद्दत पाएपछि त्यहाँको सरकारी सेनाले पुनः उक्त सहर नियन्त्रणमा लिएको बताइएको छ ।
नेपाली सेनाको रणशेर गणका गणपति प्रमुख सेनानी मिनराज तिवारीको कमाण्डमा गएको गुल्मले सरकारी सेना तथा सशस्त्र प्रहरीको क्याम्पमा भएको विद्रोहीको आक्रमणको प्रयासलाई विफल पारिदिएको हो ।
यो घटनामा विद्रोही समूहबाट ठूलो सङ्ख्यामा हातहतियार र विष्फोटक पदार्थ नियन्त्रणमा लिएको सेनाको भनाई छ । नेपाली शान्ति सैनिकतर्फ सबै जना सकुशल रहेको सेनाले उल्लेख गरेको छ । उक्त मुलुकमा आगामी आइतबार आम निर्वाचन समेत हुँदैछ ।
काठमाडौं । नेपालमा सरकारले ११ चैत २०७६ मा देशव्यापी लकडाउन शुरु गरेयता बन्द रहेका सिनेमा हल आजबाट खुलेका छन् । १० महिनापछि खुलेका हलमा दर्शक तान्न भने अझै केही समय लाग्नेछ । किनकी समुहमा बसेर हेर्नु पर्ने भएकाले सिनेमा हलसम्म मानिस जान हिच्किच्याउने छन् ।
सरकारले सिनेमा हल खोल्ने कुनै निर्णय नगरेपपछि हल संचालक आफैले आजबाट हल संचालनमा ल्याएका हुन् । आज लकडाउन अघि सिनेमा हलमा प्रदर्शनमा आएको चलचित्र ‘आमा’ र ‘सेन्टी भाइरस’ गरी दुई चलचित्र पुनः प्रदर्शनमा राखिएको छ ।
हल सञ्चालकहरुका अनुसार पहिलो चरणमा ५० प्रतिशत मात्र दर्शक राखेर सिनेमा हल चलाइने भएको छ । हल चल्ने भएपछि कलाकार र सिनेकर्मीहरुमा भने खुसी छाएको छ ।
काठमाडौं । सरकारले प्रतिनिधिसभा विघटन गरेपछि यसविरुद्ध परेका सबै रिटको सुनुवाइ आज संवैधानिक इजलासमा हुँदै छ। यसअघि बुधबार प्रधानन्यायाधीश चोलेन्द्र शमसेर जबराको एकल इजलासले सबै रिट संवैधानिक इजलासमा पठाउने आदेश गरेको थियो ।
सरकारको सिफारिसमा राष्ट्रपति विद्यादेवी भण्डारीबाट ५ पुसमा संसद विघटन गरिएको थियो । राष्ट्रपतिले आगामी वैशाख १७ र २७ गते दुई चरणमा आमनिर्वाचन समेत घोषणा गरेकी छन् । तर, यो प्रावधान संविधानमै नभएको भन्दै सर्वोच्चमा मुद्दा परेका छन् ।
सरकार र राष्ट्रपतिको यो कदमविरुद्ध १३ वटा रिट परेका छन् । जसमा संविधानको व्यवस्थाविपरीत संसद विघटन गरिएको दावि गरिएको छ । सरकारले संसद विघटन गर्दा संविधानको धारा ७६ र ८५ लाई आधार मानेको छ ।
प्रधानन्यायाधीश जबराले भने सो धाराको थप संवैधानिक व्याख्या आवश्यक रहेको भन्दै रिटहरु संवैधानिक इजलासमा पठाउने आदेश गरेका हुन् । सरकारको यो कदमविरुद्ध नेकपाको प्रचण्ड समूहले समेत रिट दायर गरेको छ ।
काठमाडौं । आज संसारभर क्रिसमस डे मनाइदैछ । यस दिनको उपलक्ष्यमा नेपालमा समेत क्रिश्चियन धर्मावलम्बीका लागि सार्वजनिक बिदा दिने प्रचलन रहेको छ । हरेक वर्ष २५ डिसेम्बरमा येशु ख्रिष्टको जन्मदिनको खुसियाली मनाउने परम्पराअनुसार छ ।
यसलाई क्रिश्चियन धर्मालम्बीले क्रिसमसका रुपमा धुमधाम साथ मनाउने गर्छन् । दुई हजार वर्षअघि जेरुसेलमको बेथलेहममा कन्या मारियमको कोखबाट येशुको जन्म भएको मान्यता छ । येशुलाई जिसस क्राइस्ट समेत भनिन्छ ।
उनले मानव समुदायका लागि पुर्याएको योगदानको सम्झनामा इस्वी संवत् चलाइएको विश्वास रहेको छ ।
क्रिसमसको अवसरमा राष्ट्रपति विद्यादेवी भण्डारीले यस प्रकारका धार्मिक उत्सव एवं चाडपर्वले विविध सांस्कृतिक पहिचान बोकेका समुदायबीच आपसी सदभाव, सहिष्णुता र ऐक्यबद्धताको भावना अभिवृद्धि गर्दै राष्ट्रिय एकतालाई थप सुदृढ बनाउन महत्वपूर्ण भूमिका खेल्ने विश्वास व्यक्त गरेकी छन् ।
सरकारले आज क्रिश्चियन समुदायका लागि बिदा दिएको छ । आज देशभरका चर्चमा प्रार्थनालगायत कार्यक्रम गरी येशु ख्रीष्टको सम्झना गरिँदैछ । क्रिसमस डेमा येशुको शिक्षा एवं उपदेशको मनन गर्नुका साथै प्रेम प्रकट गर्दै, शुभकामना तथा उपहार आदानप्रदान गर्ने प्रचलन रहेको छ ।
काठमाडौं । काठमाडौंको सुन्धारामा निर्माण भइरहेको धरहराको २० औं तलाको निर्माण सम्पन्न भएको छ । यो २० औं तला बार्दली हो । यही तलाबा सर्वसाधारणले अवलोकन गर्न सक्ने भएका छन् । राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीका अनुसार २० औं तलामा बारदली बन्ने छ ।
यस स्थानलाई अवलोकन स्थानका रुपमा उपयोग गरिनेछ । धरहरा कुल २३ तलाको हुनेछ । यसअघि भूकम्पले भत्काएको धरहरालाई नचलाई नयाँ धरहरा बनाइएको हो । धरहरा अब अत्याधुनिक टावरका रुपमा विकास भएको छ ।
यसको परिसरभित्रै एक हजार भन्दा बढी सवारीसाधन पार्किङ गर्न मिल्ने तीन तलाको पार्किङ स्थल बनेको छ । यस परिसर भित्रै टक्सार संग्राहलय र भूकम्प संग्राहलय समेत रहने छ । त्यसको काम समेत जारी रहेको छ ।
धरहरा चढ्न अब भर्यांग उक्लन पर्ने छैन । यहाँ जमिनमुनिको दुई तलाबाट लिफ्ट प्रयोग गरी २० औं तलासम्म जान मिल्ने गरी डिजाइन गरिएको छ । यो संसारका अन्य मुलुकमा हुने जस्तै टावरको संरचना हो ।
प्राधिकरणका अनुसार चालु आर्थिक वर्ष भित्रै धराहराको काम सकाएर हस्तान्तरण गर्ने योजना रहेको छ । धरहरा निर्माणको कुल लागत ३ अर्ब ४५ करोड रुपैयाँ छ । यो ४२.२ रोपनी क्षेत्रफलमा बनिरहेको छ ।
काठमाडौं । सरकारले चालेको संसद विघटनको कदमविरुद्ध नेपाली कांग्रेस र नेकपा (प्रचण्ड -नेपाल) समूहले आन्दोलन घोषणा गरेका छन् । नेपाली कांग्रेसले मंसिर १३ गते संसद विघटनविरुद्ध देशव्यापी आन्दोलन गर्ने निर्णय गरेको छ ।
बिहीबार दिउँसो पार्टी केन्द्रीय कार्यालय सानेपामा बसेको केन्द्रीय कार्यसमितिको बैठकले सरकारको निर्णय खारेजीको माग गर्दै आन्दोलन गर्ने निर्णय गरेको हो ।
प्रधानमन्त्रीको संसद विघटन गर्ने कदम असंवैधानिक एवंम अलोकतान्त्रिक भएको निष्कर्षसहित कांग्रेसले यहीँ पुस १३ गते देशभरका १६५ वटै निर्वाचन क्षेत्रमा विरोध कार्यक्रम गर्ने निर्णय गरेको छ ।
उता, नेकपा केन्द्रिय कमिटि बैठकले समेत सरकारको कदम असंवैधानिक भएको भन्दै फिर्ता लिनुपर्ने माग गरी सडक आन्दोलन घोषणा गरेको छ । १४ पुसमा देशैभर आन्दोलन गर्ने घोषणा नेकपाले गरेको छ । नेकपाले वडास्तरसम्म संगठनात्मक भेला गर्ने निर्णय समेत गरेको छ ।
काठमाडौं । प्रहरीले चर्को आवाज निकाल्ने गरी मोडिफाइ गरेका मोटरसाइकलविरुद्ध कारवाही अभियान चलाएको छ । एक महिना चलाएको यो अभियानका दौरान कुल ३ सय ४२ मोटरसाइकल कारबाहीमा परेको महानगरीय ट्राफिक प्रहरी महाशाखाले जनाएको छ ।
महाशाखाका अनुसार एक महिनामा ठूलो आवाज निकाल्ने र स्वरूप परिवर्तन गरी चलाउनेलाई कारबाही गर्न विशेष अभियान चलाइएको थियो । सो अभियानका दौरान ३ सय ४२ वटा मोटरसाइकल प्रहरीको फन्दामा परेका हुन् ।
महाशाखाका प्रमुख प्रहरी वरिष्ठ उपरीक्षक (एसएसपी) जनक भट्टराईका अनुसार यस प्रकारका मोटरसाइकलका कारण दुर्घटना निम्तिने खतरा हुन्छ । त्यसले सर्वसाधारणलाई अनावश्यक आवाजका कारण आतंकित तुल्याउने र ध्वनि प्रदूषण समेत गर्छ ।
साइलेन्सरलाई मोडिफाई गरी, फिल्टर निकालेर वा कम्पनीबाटै ठूलो आवाज निस्कने बनाइएका मोटरसाइकलको संचालनमा प्रहरीले कडाई गरिरहेको छ । महाशाखाका अनुसार यस प्रकारका मोटरसाइकलको नम्बर संकलन गरी निरन्तर निगरानी गरिदै आएको छ ।