Author: Vishwanews.com

काठमाडौं । संवैधानिक परिषदको बैठक स्थगित भएको छ । प्रधानमन्त्री केपी शर्मा ओलीले साँझ ५ बजेका लागि बैठक बोलाएका थिए ।

नेपाल कम्युनिस्ट पार्टी नेकपाका कार्यकारी अध्यक्ष पुष्पकमल दाहाल ‘प्रचण्ड’ सहित नेकपा नेताहरुले आपत्ति जनाएपछि परिषदको बैठक स्थगित भएको बताइएको छ । प्रमुख प्रतिपक्षी दल नेपाली कांग्रेसका सभापति शेरबहादुर देउवाले भने आफु बैठकमा सहभागी नहुने बताएका थिए ।

यसअघि आजै प्रधानमन्त्री ओलीलाई भेट्न प्रचण्ड बालुवाटार बालुवाटार पुगेका थिए । यसअघि बुधबार बसेको नेकपाको स्थायी कमिटी बैठकले संवैधानिक परिषदसम्बन्धी सरकारले ल्याएको अध्यादेश फिर्ता लिने निर्णय गरेको थियो । तर ओलीले उक्त अध्यादेश फिर्ता नहुँदै संवैधानिक परिषदको बैठक बोलाएका थिए ।

काठमाडौं । नेपालमा पछिल्लो २४ घण्टामा ७ सय ३६ जनामा कोरोना भाइरस संक्रमण पुष्टि भएको छ । स्वास्थ्य तथा जनसंख्या मन्त्रालयकाअनुसार कुल संक्रमितको संख्या २ लाख ५० हजार ९ सय १६ पुगेका छन् ।

त्यस्तै पछिल्लो २४ घण्टामा ८ सय ४७ जना संक्रमित डिस्चार्ज भएका छन् । हालसम्म नेपालमा २ लाख ३८ हजार ५ सय ६९जना कोरोना संक्रमित निको भएका छन् ।

हालसम्म १८ लाख ४९ हजार १ सय ३६ जनाको पीसीआर परीक्षण गरिएको मन्त्रालयले जनाएको छ । पछिल्लो २४ घण्टामा १३ जनाको मृत्यु भएको छ भने हालसम्म नेपालमा कोरोना संक्रमणबाट मृत्यु हुनेको संख्या १७ सय ४३ जना पुगेका छन् ।

काठमाडौं । प्रधानमन्त्री केपी शर्मा ओली संवैधानिक परिषदसम्बन्धी आध्यादेश फिर्ता लिन सहमत भएका छन् ।

स्थायी कमिटीको बैठकअघि नै बालुवाटारमा प्रधानमन्त्री ओली र प्रचण्डसँगको दुई पटक छलफल ओली अध्यादेश फिर्ता लिन तयार भएका हुन् ।

यो सहमतिसँगै बालुवाटारमा स्थायी कमिटी बैठक सुरु भएको स्रोतले जनाएको छ । उक्त सहमतिसँगै बैठकमा प्रधानमन्त्री ओलीसमेत सहभागी बनेका छन् । राष्ट्रपति विद्यादेवी भण्डारीले नेपालको संविधानबमोजिम मन्त्रिपरिषद्को सिफारिसमा संवैधानिक परिषद् (काम, कर्तव्य, अधिकारी र कार्यविधि) सम्बन्धी (पहिलो संशोधन) अध्यादेश २०७७ जारी गरेकी थिइन् ।

संवैधानिक परिषद्मा ३ जना मात्रै उपस्थित भए पनि बैठक सञ्चालन गर्न मिल्ने व्यवस्था गरिएको छ । नयाँ अध्यादेशमा अध्यक्षसहित तत्काल बहालमध्ये बहुमत सदस्य उपस्थित भएमा बैठक बस्न सक्ने उल्लेख छ ।

बैठकमा पेस भएको प्रत्येक विषयमा सर्वसम्मत निर्णय हुने अध्यादेशमा उल्लेख छ । पहिलो बैठकमा निर्णय नभए तत्काल बहाल सदस्यको बहुमत सदस्यका आधारमा निर्णय हुने भन्ने उल्लेख छ । अब सभामुख र प्रमुख विपक्षी दलको नेता अनुपस्थित भए पनि बैठक बस्नेछ भने तीन जनाको सहमति भएमा निर्णय हुनेछ ।

तर त्यसअघि संसद् बैठक बोलाउन माग गर्दै निवेदन लिएर राष्ट्रपति पुगेका नेताहरुले आफ्नो प्रस्ताव फिर्ता लिनुपर्ने उनको अडान रहेको स्रोतले बताएको छ ।

काठमाडौं । नेपाल कम्युनिस्ट पार्टी (नेकपा)को स्थायी समिति बैठक सुरु भएको छ । अन्योलपूर्ण अवस्थाकाबीच दिउँसो १ बजेका लागि बोलाइएको बैठक ३ घण्टा ढिलो गरी प्रधानमन्त्री निवास बालुवाटारमा सुरु भएको हो ।

सुरु भएको हो । प्रधानमन्त्री केपी शर्मा ओली बैठकमा सहभागी नहुने भनेपछि बैठक सुरु हुन सकेको थिएन ।

अध्यक्ष पुष्पकमल दाहाल प्रचण्डको पटक–पटकको प्रयासपछि प्रधानमन्त्री बैठकमा बस्न राजी भएका हुन् । दुई चरणमा ओली र अर्का अध्यक्ष पुष्पकमल दाहाल प्रचण्डबीच छलफल भएपछि बैठक अघि बढेको हो।

मंसिर २१ गते देखि सुरु भएको स्थायी कमिटीको बैठकमा पार्टीका दुई अध्यक्षहरु केपी शर्मा ओली र पुष्पकमल दाहाल ‘प्रचण्ड’ले पार्टी सचिवालय बैठकमा पेश गरेको प्रस्ताव माथि छलफल हुने बताइए पनि ठोस रुपमा छलफलमा प्रवेश पाइसकेको छैन।

आज बस्ने बैठकमा सरकारले मंगलवार मात्र जारी गरेको संवैधानिक परिषद् सम्बन्धी अध्यादेश माथि छलफल हुने बताइएको छ। प्रचण्ड- नेपाल पक्षले सरकारले जारी गरेको अध्यादेशलाई असंवैधानिक भन्दै खारेजीको माग गरेका छन्।

काठमाडौ । संघीय संसदको विशेष अधिवेशनको माग गर्दै नेकपाका केही सांसदहरु राष्ट्रपति कार्यालय शीतलनिवास पुगेका छन । नेकपा सांसद भीम रावल, पम्फा भुसालसहितको टोलीले सांसदहरुको हस्ताक्षरसहित विशेष अधिवेशन माग गर्दै निवेदन लिएर शितल निवास गएका हुन ।

प्रधानमन्त्री केपी ओलीले संबैधानिक परिषद सम्वन्धि अध्यादेश ल्याएपछि असन्तुष्ट नेकपा सांसद राष्ट्रपति कार्यालय पुगेका हुन । निवेदन भने दर्ता भैसकेको छैन । सरकारको सिफारिसमा राष्ट्रपतिले संसद अधिवेशन बोलाउने कानुनी व्यवस्था छ ।

विशेष अधिवेशन माग गर्ने अधिकार संविधानले सांसदहरूलाई दिएको छ । विशेष अधिवेशन माग गर्न एक चौथाइ सांसद भए पुग्ने संवैधानिक व्यवस्था छ । संसद अधिवेशन माग गर्नका लागि चाहिने सांसदको संख्या नेकपाका अध्यक्ष पुष्पकमल दाहाल वरिष्ठ नेता माधब नेपाल पक्षभित्रैबाट जुटेको छ ।

प्रधानमन्त्रीको कदमप्रति असन्तुष्टि जनाउदै विभिन्न दलका नेता र सांसदले पनि संसद अधिवेशन बोलाउन माग गरेका छन् । केहीले प्रधानमन्त्री ओलीलाई महा अभियोग लगाउनुपर्ने पनि बताएका छन् ।

काठमाडौं । सत्तारुढ दल नेपाल कम्युनिष्ट पार्टी (नेकपा) का अध्यक्ष एवं प्रधानमन्त्री केपी शर्मा अ‍ोलीले राजनीतिक प्रस्तावबारे छलफल गर्ने भए आफू बैठकमा नआउने अर्का अध्यक्ष पुष्पकमल दाहाल प्रचण्डलाई जानकारी गराएका छन् ।

बुधबार मध्यान्ह अध्यक्ष प्रचण्डसँगको भेटवार्ताका क्रममा प्रधानमन्त्री अ‍ोलीले गत कात्तिक २८ गते सचिवालय बैठकमा पेश भएको राजनीतिक प्रतिवेदनबारे असन्तुष्टी जनाउँदै बैठकमा नआउने बताएका हुन् ।

भेटका क्रममा प्रधानमन्त्री ओलीले अध्यक्ष प्रचण्डलाई आजका बैठकका एजेन्डाबारे सोधेका थिए । उनले सचिवालयमा पेश भएका राजनीतिक प्रतिवेदन, अध्यादेशबारे छलफल गर्ने कार्यसूची रहेको भनेपछि प्रधानमन्त्री ओलीले बैठकमा नआउने बताएका थिए ।

‘यही पुराना एजेण्डाबारे छलफल गर्ने भए म आउँदिन भन्नुभएछ’, एक स्थाय कमिटी सदस्यले भने, ‘उहाँ नआएपछि हामी बाहिर बसिरहेका छौं । उहाँ नआएमा कसरी अगाडि बढ्ने भन्ने विषयमा प्रचण्डसहित अन्य साथीहरु छलफल गरिरहनु भएको छ ।’

बैठकमा प्रधानमन्त्री ओली नआएपछि स्थायी कमिटी सदस्य भीम रावल र पम्फा भुसाल शीतल निवास पुगेका छन् । संघीय संसदको विशेष अधिवेशनको माग गर्दै उनीहरु शीतल निवास पुगेका हुन्

काठमाडौं । सत्तारुढ नेपाल कम्युनिष्ट पार्टी (नेकपा) को स्थायी कमिटी बैठक आज १ बजेका लागि बोलाइएको छ । प्रधानमन्त्री निवास बालुवाटारमा बोलाइएको बैठकमा पार्टीका अध्यक्ष तथा प्रधानमन्त्री केपी शर्मा ओलीले मंगलबार ल्याएको संवैधानिक परिषदसम्बन्धी अध्यादेशबारे गम्भीर छलफलको तयारी छ ।

प्रधानमन्त्रीबाहेकका नेकपाका सबै शीर्ष नेता यो अध्यादेशको विरुद्धमा छन् । उनीहरुले संसद बोलाएर नियमित प्रक्रियाबाट कानून बनाउन माग गरिरहेका छन् । यो नेकपामा नयाँ विवाद हो । यसअघि दुई अध्यक्षका आरोप प्रत्यारोपसहितका पत्र र प्रतिवेदन समेत स्थायी समितिमा छलफलका क्रममा छन् ।

मंगलबारको अध्यादेशले पार्टीभित्रको सम्बन्धलाई अझ जटिल बनाइदिएको छ । आइतबार बसेको स्थायी कमिटी बैठक नेता कमानसिंह लामाको निधनमा शोक प्रस्ताव पारित गर्दै आजका लागि सरेको थियो ।

पार्टी र मन्त्रीपरिषदमा समेत छलफलै नगरी अध्यादेश ल्याएपछि यतिबेला अर्का अध्यक्ष प्रचण्डसहित पार्टीका नेता प्रधानमन्त्रीविरुद्ध आक्रोसित बनेका छन् ।

प्रधानमन्त्रीले यसअघि गत वैशाखमा समेत पार्टीसँग परामर्श नगरी राजनीतिक दल विभाजनसम्बन्धी र संवैधानिक परिषदसम्बन्धी अध्यादेश ल्याएका थिए। पार्टीको चर्को आलोचना र दवावपछि उनी अध्यादेश फिर्ता गर्न बाध्य भएका थिए ।

दाङ । डिभिजन वन कार्यालय रुकुम पूर्वका सहायक वन अधिकृत रामनारायण साहको गाडीमा ज्यान गएको छ । उनलाई उपचारका लागि दाङको तुलसीपुर ल्याउने क्रममा बाटोमा गाडीमै ज्यान गएको प्रहरीले जनाएको छ । ५२ वर्षका उनी केही दिनदेखि बिरामी भएको प्रहरीको भनाई छ । उनी जनकपुरका स्थानीय हुन् ।

साहको मंसिर २१ मा सरुवा भएको थियो । रुकुम पुगेको केही दिनपछि ज्वरो र खोकी आएपछि उनले चिसोका कारण भएको ठानी तातो पानी मात्र पिएर बसेको प्रहरीको भनाई छ । तर, ज्वरो बढेपछि उनी थप उपचारका लागि २९ मंसिरमा दाङको तुलसीपुर आउन लागेका थिए ।

गाडीमा स्वास प्रस्वासमा समस्या आइ उनको ज्यान गएको बताइएको छ । तुलसीपुरस्थित राप्ती प्रादेशिक अस्पतालमा ल्याउनासाथ उनलाई चिकित्सकले मृत घोषणा गरेका थिए ।

काठमाडौं । प्रधानमन्त्री केपी शर्मा ओलीको सिफारिसमा राष्ट्रपति विद्यादेवि भण्डारीले आज ल्याएको संवैधानिक परिषद् सम्बन्धि अध्यादेशबारे छलफल र आधिकारिक धारणा सार्वजनिक गर्न प्रमुख प्रतिपक्षी दल नेपाली कांग्रेसले आकस्मिक पदाधिकारी बैठक डाकेको छ ।

कांग्रेस स्रोतका अनुसार नेपाली काँग्रेसले पूर्व तथा वर्तमान पदाधिकारीको आकस्मिक बैठक बोलाएको हो । अध्यादेश राष्ट्रपति विद्यादेवी भण्डारीबाट मंगलबार जारी भएको हो । बैठक बुधबार दिउँसो १ बजे पार्टी सभापति शेरबहादुर देउवा निवास बुढानिलकण्ठमा बस्ने भएको छ ।

कांग्रेसले अध्यादेशबाट सरकार चलाउन खोज्ने प्रवृत्तिलाई सर्वसत्तावादी र अधिनायकवादी कदम भनी आलोचना गरिरहेको छ । अध्यादेश फिर्ता हुनुपर्ने अडानमा कांग्रेसका नेताहरु रहेका छन् । कांग्रेस पदाधिकारी बैठकले पछिल्लो अध्यादेशबारे संस्थागत निर्णय लिने भएको छ ।

संसद छलेर प्रधानमन्त्रीले आफुखुसी निर्णय गराइरहेको भन्दै कांग्रेस नेताहरुसमेत आक्रोसित बनेका छन् । अध्यादेशपछि आह्वान भएको संवैधानिक परिषद्को आज साँझको बैठक समेत सभापति शेरबहादुर देउवाले बहिष्कार गरेका छन् ।

काठमाडौं । अध्यादेश जारी गरी अध्यक्षसहित तीन जना मात्र उपस्थित भएपनि संवैधानिक परिषदको बैठक बस्न सक्ने प्रावधान ल्याएका प्रधानमन्त्री केपी शर्मा ओली बैठक सकिएलगत्तै राष्ट्रपति निवासतर्फ लागेका छन् । प्रधानमन्त्री, प्रधानन्यायाधिक र राष्ट्रिय सभाका अध्यक्ष मात्र साँझको बैठकमा सहभागी भए ।

यो बैठक कांग्रेस सभापति शेरबहादुर देउवाले समेत बहिष्कार गरेका छन् । साँझको बैठकले नियुक्ति सम्बन्धमा भने कुनै निर्णय नगरेको बताइएको छ । बैठक सकेर प्रधानमन्त्री शितल निवास पुगेका हुन् ।

अध्यादेश जारी भएपछि उत्पन्न राजनीतिक परिस्थिती, संत्तारुढ नेकपाले प्रधानमन्त्रीविरुद्ध लिन सक्ने सम्भावित एक्सन र त्यसको बचाउका सम्बन्धमा प्रधानमन्त्रीले राष्ट्रपतिसँग परामर्श लिन लागेको बताइएको छ ।

काठमाडौं । सत्तारुढ दल नेपाल कम्युनिष्ट पार्टी (नेकपा) का अध्यक्ष पुष्पकमल दाहाल प्रचण्डले सरकारले ल्याएको अध्यादेशबारे असन्तुष्टी जनाएका छन् ।

मंगलबार मन्त्रिपरिषद् बैठकको सिफारिसमा राष्ट्रपतिले जारी गरेको ‘ संवैधानिक परिषद (काम, कर्तव्य र कार्यविधि) सम्बन्धी पहिलो संशोधन अध्यादेश, २०७७’ तुरुन्त खारेज गर्न अध्यक्ष प्रचण्डले माग गरेका छन् ।

उनले बदनियतपूर्ण तरिकाले आएको अध्यादेश तत्काल फिर्ता हुनुको विकल्प नरहेको प्रतिक्रिया दिएका छन् । अध्यक्ष प्रचण्डले सबै राजनीतिक दलहरुले संसद अधिवेशन बोलाउन माग गरिरहेका बेला थाहै नदिई अध्यादेश ल्याउनु कुनियत भएको बताए ।

उनले राष्ट्रपति विद्यादेवी भण्डारी र प्रधानमन्त्री केपी शर्मा ओलीको कदम असंवैधानिक भएको बताएका छन् ।