काठमाडौं । पछिल्लो २४ घण्टामा काठमाडौं उपत्यकामा थप १६८४ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार काठमाडौंमा १२९६, भक्तपुरमा ९५ र ललितपुरमा २९३ जनालाई संक्रमण पुष्टि भएको हो।
जसअनुसार काठमाडौंमा ५१८ महिला र ७७८ पुरुष, ललितपुरमा १३० महिला र १६३ पुरुष र भक्तपुरमा ४३ महिला र ५२ पुरुष रहेका छन् । यो सँगै उपत्यकामा संक्रमित हुनेको संख्या ३३ हजार ७४९ पुगेको छ।
काठमाडौं । नेपालमा पछिल्लो २४ घण्टामा थप ३४३९ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार २४ घण्टामा गरिएको १४ हजार २ सय ९ जनाको पीसीआर परीक्षणमा थप ३४३९ जनामा कोरोना संक्रमण पुष्टि भएको हो ।
यो सँगैकूल संक्रमितको संख्या ९४ हजार २३५ पुगेको छ।
पछिल्लो २४ घन्टामा थप ११२६ जना कोरोना संक्रमणमुक्त भएका छन्। डिस्चार्ज हुनेको संख्या ६८ हजार६६८ पुगेको छ। देशभर २५ हजार ७ जना सक्रिय संक्रमित छन्।
काठमाडौं । राष्ट्रिय सहकारी विकास बोर्डले राष्ट्रिय सहकारी नीति २०६९ को पुनरावलोकन मस्यौदा भूमि व्यवस्था सहकारी तथा गरिबी निवारण मन्त्री पद्माकुमारी अर्याललाई बुझाएको छ।
बोर्डले बुधबार भूमि व्यवस्था सहकारी तथा गरिबी निवारण मन्त्रालयलाई सहकारी क्षेत्रको विकासका लागि तयार गरेको २५ वर्षे दीर्घकालीन रणनीतिक योजना पेस गरेको हो ।
योजनाको मस्यौदा बुझ्दै मन्त्री अर्यालले सहकारी आन्दोलनको बिस्तार, विकास र सुदृढिकरणका निम्ती रणनीतिक दस्तावेज निर्माण गरेको बताइन्। ‘सहकारी क्षेत्रको विकासको अवस्था, त्यसका सबल पक्षहरु के छन्? अहिलेसम्म प्राप्त उपलब्धीहरु के छन् भन्ने कुराको चर्चा गर्दै समग्र सहकारी क्षेत्रको विश्लेषण यो डकुमेन्टमा गरिएका छन’, मन्त्री अर्यालले भनिन् ।
अन्तर्राष्ट्रिय अभ्यास, राष्ट्रिय अवस्थालाई समेत ध्यानमा राख्दै सहकारी क्षेत्रको समग्र विकासका निम्ति स्पष्ट भिजनका साथ रणनीति तयार गरिएको मन्त्री अर्यालले उल्लेख गरिन्।
सहकारी क्षेत्र उद्यमशीलतातर्फ लाग्नुपर्ने भन्दै मन्त्री अर्यालले उद्यमशीलताको विकास र रोजगारीलाई महत्वका साथ जोड दिइएको जानकारी दिइन्। ‘हामीसँग सहकारीका संख्याहरु धेरै छन्। सहकारी आर्थिक रुपमा सबल छ ।
उक्त नीतिको मस्यौदाअनुसार अब फरक प्रकृतिका सहकारी संस्था पनि अस्तित्वमा आउनेछन्। सहकारीले शिशु स्याहार केन्द्रदेखि, सहकारी विद्यालय, सहकारी अस्पताल, बिमा, श्रमिक बैंक, स्टार्टअप बिजनेस र ज्येष्ठ नागरिक हेरचाह केन्द्र बनाउनेसम्मका काम गर्ने नीति सरकारले लिन लागेको छ।
काठमाडौं । सेयर पछिल्लो ७ महिना यताकै उच्च विन्दुमा पुगेको छ ।
आज नेप्से सूचक दोहोरो अंकले बढेर १६०० विन्दू पार गरेको छ । यो २०७६ फागुन यताकै उच्च विन्दु हो । गत फागुन १७ गते नेप्से सूचक साढे दुई वर्ष यताकै उच्च १६३२ विन्दुमा पुगेको थियो ।
पछिल्लो समय बजार क्रमशः उकालो लाग्दै गएपछि लगानीकर्ताको मनोबल बलियो हुँदा बजारले निरन्तर गति लिएको छ । असार यता निरन्तर उकालो लागेको सेयर बजार पछिल्लो ३ महिनामै करिब ४०० अंकले बढेको छ ।
पछिल्लो समय बजारमैत्री वातावरण सृजना भएपछि बजारले छलाङ मारेको हो । कोरोनाका कारण अन्य क्षेत्रमा लगानीको वातावरण नहुँदा बैंकिङ प्रणालीमा अधिक तरलता हुनु, बैंकको ब्याजदर सस्तो हुनु, सेयर धितो कर्जाको सीमा बढाएर ७० प्रतिशत पुर्याउनु, बजारमा ठूला लगानीकर्ता प्रवेश गर्नु लगायत कारणले बजारले गति लिँदै गएको हो ।
साथै, पछिल्लो समय पूर्ण अनलाइन प्रणालीबाट कारोबार हुन थालेपछि बजारमा लगानीकर्ताको सहभागिता बढेको छ । यसले गर्दा बजारमा नयाँ लगानीकर्ता र थप पूँजी भित्रिन सहयोग पुगेको छ । जसले बजारलाई चलायमान बनाउँदै लगेको अनुमान गर्न सकिन्छ ।
सेयर बजार मापक सूचक नेप्से आज १४.६८ विन्दुले बढेर १६००.९८ विन्दुमा पुगेको छ । यसदिन १९५ कम्पनीको ३ अर्ब ३५ करोड ८५ लाख ६ हजार २९६ रुपैयाँ बराबरको कारोबार भएको छ । १ करोड २६ लाख ९९ हजार ५३५ कित्ता सेयर किनबेच भएका छन् ।
कारोबारमा आएका १२ वटा समूहमध्ये ९ वटा समूहको परिसूचक उकालो लागेका छन् भने ३ वटा समूहको परिसूचक ओरालो लागेका छन् । आज विकास बैंक समूहको परिसूचक सबैभन्दा धेरै ७७.९८अंकले बढेको छ भने व्यापार समूहको परिसूचक ३.१४ अंकले घटेको छ ।
बढ्दो बजारमा आज पनि लगानीकर्ताको हाइड्रोपावर र विकास बैंकको सेयरमा झुम्मिएका छन् । पछिल्ला केही दिन यता हाइड्रोमा झुम्मिएका लगानीकर्ता आजपनि त्यसलाई निरन्तार दिएका हुन् ।
तुलनात्मक रूपमा अन्य क्षेत्रका कम्पनीभन्दा हाइड्रोको सेयर मूल्य सस्तो, कोरोनाबाट कम प्रभावित क्षेत्र भएकाले लगानीकर्ता हाइड्रोको सेयरप्रति आकर्षित भएका हुन् ।अहिले पनि केही कम्पनीको मूल्य आइपीओको भन्दा केही मात्र बढी रहेको छ ।
आज लगानीकर्ताको रोजाइमा अरुण काबेली हाइड्रोपावर कम्पनी परेको छ । यसको सबैभन्दा धेरै १५ करोड २९ लाख रुपैयाँभन्दा बढीको सेयर किनबेच भएको छ । कारोबारकै आधरमा अरुण भ्याली र सानिमा माइ हाइड्रोपावरको सेयर क्रमशः दोस्रो र तेस्रो स्थानमा रहे ।
आज २ दर्जनबढी कम्पनीको सेयर मूल्यमा पोजेटिभ सर्किट लागेको छ । आज कर्णाली डेभलपमेन्ट बैंक, नेशनल, ङादी पावर, वरुण, साञ्जेन हाइड्रोपावर लगायत २५ कम्पनीका सेयरधनीले करिब १० प्रतिशत कमाएका छन् ।आज लक्ष्मी इक्वीटी म्युचुअल फण्डका सेयरधनीले सबैभन्दा धेरै ३.११ प्रतिशतले गुमाएका छन् ।
काठमाडौं । सरकारले कोरोना भाइरसका कारण रोकिएका सबै तहका परीक्षा सञ्चालन गर्न दिने निर्णय गरेको छ ।
मन्त्रिपरिषद्को सोमबार बसेको बैठकले सुरक्षासम्बन्धी मापदण्ड अपनाएर सबै तह र विषयका परीक्षा सञ्चालन गर्न सैद्धान्तिक सहमति दिने निर्णय गरेको सरकारका प्रवक्ता एवं परराष्ट्रमन्त्री प्रदीपकुमार ज्ञवालीले बताए ।
सरकारले यसअघि भर्चुचल बाहेकका परीक्षा सञ्चालनमा रोक लगाएको थियो ।
परीक्षासम्वद्ध आयोग, विश्वविद्यालय, प्रतिष्ठान, बोर्ड, विद्यालय तथा शिक्षण संस्थाहरुलाई सबै तह, विषय र प्रकृतिका परीक्षाहरु सैद्धातिक स्वीकृति दिने निर्णय भएको छ ज्ञावलीले भने।
उनका अनुसार सरकारले २५ जनासम्म सहभागी भएर दिइने व्यावसायिक तालिम पनि खुला गर्ने निर्णय गरेको छ।
बुटवल । बुटवलमा कोरोना भाइरसको संक्रमणपछि थप दुई जनाको मृत्यु भएको छ । बुटवलस्थित कोरोना विशेष अस्पतालमा उपचार गराइरहेका दुई संक्रमितको ज्यान गएको हो । नवलपरासीको सुनवल नगरपालिका–५ का ७६ वर्षीया वृद्ध र बुटवल उपमहानगरपालिका–९ का ५५ वर्षीया महिलाको बुधबार बिहान ज्यान गएको अस्पतालले जानकारी दिएको छ ।
गत शुक्रबार पीसीआर परीक्षण गरेपछि कोरोना संक्रमण पुष्टी भएका नवलपरासीका वृद्धमा दम र उच्च रक्तचापबाट पिडित थिए । उनको बुधबार बिहान १ बजे ज्यान गएको हो । बुटवल–९ की ५५ वर्षीया महिलाको भने बुधबार बिहान साढे ५ बजे ज्यान गएको छ ।
सुख्खा खोकी र उच्च ज्वरोको समस्या देखिएपछि उनी अस्पताल भर्ना भएकी थिइन् । उनमा दीर्घरोगको कुनै संकेत थिएन । उनमा शनिबार कोरोना पुष्टी भएको हो ।
चरिकोट । देशभर निजी स्कुलले अविभावकबाट अनाधिकृत शुल्क असुल गरिरहेको खबर आइरहँदा निजी तथा आवासीय विद्यालय सङ्गठन (प्याब्सन)ले उदाहरणीय निर्णय गरेको छ । अब दोलखा भित्र संचालित निजी स्कुलले ५ महिनाको शुल्क नलिने भएका छन् । जिल्लाभर कुल ३३ वटा बोर्डिङ स्कुल छन् ।
उनीहरुले वैशाखदेखि भदौ महिना सम्मको कुनै पनि शुल्क नलिने भएका हुन् । यो समयमा लकडाउनका कारण विद्यालय संचालनमा आउन सकेका थिएनन् । सरकारको निर्देशन विपरित देशभरका निजी स्कुुलले शुल्क असुल्न थालेपछि पछिल्लो समय अविभावक र स्कुलबीच द्धन्द्ध बढिरहेको समयमा प्याप्सन दोलखाले यस्तो निर्णय गरेको हो ।
सरकारको निर्देशन विपरित देशभरका निजी स्कुुलले शुल्क असुल्न थालेपछि पछिल्लो समय अविभावक र स्कुलबीच द्धन्द्ध बढिरहेको समयमा प्याप्सन दोलखाले यस्तो निर्णय गरेको हो ।
दोलखामा असोज ७ बाट भने विद्यालय सञ्चालनमा आएका छन् । यो अवधिमा विद्यार्थीले कुनै पनि माध्यमबाट कक्षा लिन नपाएकाले मासिक शुल्कसहितका शुल्क नलिने निर्णय भएको प्याप्सनले बताएको छ । अनलाइन कक्षा संचालन समेत असोजपछि मात्र शुरु भएको हो । त्यसपछि भने विद्यालयले आफ्नो शूल्क नीतिअनुसार शुल्क लिन सक्ने भएका छन् ।
काठमाडौं । सरकारले उचित निर्णय लिन नसक्दा यो वर्ष दशैंमा शहरबाट गाउँ फर्कने मानिसमा अन्यौल छाएको छ । कोरोना महामारीका बीच सरकारले हरेक दिन जसो जो जहाँ छ, त्यही बसेर दशैं मनाउन आह्वान गर्छ । तर, वर्षमा एक पटक आउने चाडबाड र महामारीमा अर्को वर्षको अनिश्चितताका बीच धेरैजना भने आफ्नो परिवारकै साथमा बडादशैं मनाउन चाहन्छन् ।
यो अवस्थामा दशैंमा निर्वाध घर जान सक्ने वा नसक्ने अन्यौल भने आम यात्रुमा छ । यता, दशैंको मुख पारेर आफ्नो गाउँघर फर्कन हवाईजहाजमा धमाधम अग्रिम टिकट बुक भइरहेका छन् । यो सामान्य प्रक्रिया पनि हो । किनकी हवाईजहाज कम्पनीहरुले अहिले दशैं भनेर घोषणा नगरे पनि अग्रिम टिकट लिन्छन् । तर, बसमा त्यस्तो हुँदैन ।
दशैंको मुख पारेर आफ्नो गाउँघर फर्कन हवाईजहाजमा धमाधम अग्रिम टिकट बुक भइरहेका छन् ।
सरकारले मिति नै तोकेर अग्रिम टिकट बुक गराउनु पर्छ । तर, दशैं भित्रन ९ दिन मात्र बाँकि रहेको अवस्थामा समेत सरकारले अझै के गर्ने भन्ने टुंगो भने लगाउन सकेको छैन । व्यवसायीहरुले दशैंमा पूर्ण क्षमतामा यात्रु बोक्न पाउनु पर्ने माग गरिरहेका छन् । सरकारले जनस्वास्थ्यमा चूनौति हुने भन्दै त्यसको पक्षमा छैन ।
सोहीकारण सहमति हुन नसकेकै कारण अग्रिम टिकट बुक हुन नसकेको यातायात व्यवस्था विभागका अधिकारीहरु बताउँछन् । यात्रु कति राख्न दिने वा नदिने भन्ने निर्णय समेत विभाग एक्लैले भने गर्न सक्दैन । यसका लागि कोभिड १९ संकट व्यवस्थापन केन्द्र (सीसीएसी)ले गर्नुपर्छ । तर, सीसीएमसी नै यो विषयमा गम्भीर हुन सकेको छैन । यसको नेतृत्व उपप्रधान तथा रक्षामन्त्री इश्वर पोखरेलले गर्छन् ।
अबुधावी, २१ असोज । जारी आईपीएल क्रिकेटमा मुम्बई इन्डियन पुनः अंक तालीकोको शिर्ष स्थानमा उक्लिएको छ । मंगलबार अबुधाबीमा भएको खेलमा साविक विजेता मुम्बई इन्डियन्सले राजस्थान रोयल्सलाई ५७ रनले हरायो ।
मुम्बईले ब्याट, बल र फिल्ड तीन वटै क्षेत्रमा उत्कृष्ट खेल देखाएको थियो । पहिले ब्याटिङ गरेको मुम्बईले निर्धारित २० ओभरमा मात्र चार विकेट गुमाएर १९३ रन जोड्यो । १९४ रनको लक्ष्य पछ्याएको राजस्थान १८.१ ओभरमा १३६ रनै अलआउट भएको छ ।
मुम्बईका लागि सूर्यकुमार यादवले सर्वाधिक नटआउट ७९ रन जोडे । बलमा मुम्बईका लागि जसप्रित बुमराह, ट्रेन्ट बोल्ट र जेम्स प्याटिन्सले उत्कृष्ट खेल पस्किए । बुमराहले २० रन खर्चेर ४ विकेट लिए । बोल्टले २६ रन खर्चेर २ विकेट हात पारे । जेम्स प्याटिन्सनको नाममा २ विकेट रह्यो
काठमाडौं, २१ असोज । मंगलबार धेरै पछि नेकपा सचिवालय बैठक बस्यो । यो बैठकले मन्त्रिपरिषद्का सदस्य परिवर्तनको विषय टुंगो लगाउने अपेक्षा गरिएको थियो । तर, बैठकमा नेताहरुले डा. गोविन्द केसी अनसन बसेको २३ दिन पुग्दासमेत किन वार्ता नगरेको भन्दै प्रधानमन्त्रीसँग प्रश्न राखेका थिए ।
त्यसपछि छलफल केसीको मागकै सम्बन्धमा केन्द्रित भएको नेकपा स्रोतले बताएको छ । प्रधानमन्त्री केपी शर्मा ओली केसीका माग सम्वोधन गर्न सरकारले वार्ता सुरु गरेको समेत बैठकलाई जानकारी गराएका थिए ।
बैठक अगाडी प्रधानमन्त्रीको सन्देश लिएर केसीलाई भेट्न शिक्षासचिवसहितको एक टोली शिक्षण अस्पताल समेत पुगेको थियो । सचिवालय बैठकमा नेताहरुले डा. केसीको जीवन बचाउन सरकारले ठोस् कदम चाल्नुपर्ने सुझाव दिएका छन् ।
यसअघि वरिष्ठ नेता माधवकुमार नेपालले केसीको जीवन बचाउन सरकार गम्भीर हुनुपर्ने धारणा सार्वजनिक गरेका थिए । यसरी पार्टी भित्रैबाट दवाव आएपछि अन्ततः सरकार केसीसँग वार्ता गर्ने मुडमा पुगेको हो । यसअघि सरकारले केसीका मागलाई पुरै वेवास्ता गरेको थियो ।
भालुबाङ, २१ असोज । एकसाता अगाडी सम्म बुटवलको पहिचान प्रदेश ५ को अस्थायी राजधानीको थियो । प्रदेशका महत्वपूर्ण गतिविधि बुटवललाई केन्द्रित हुने गरी भइरहेका थिए । तर, मंगलबारबाट बुटवलको पहिचान पुरानै अवस्थामा फर्किएको छ ।
यो अब लुम्बिनी क्षेत्रको एक पुराना शहर मात्र बनेको छ । उता, दाङले भने अब नयाँ पहिचान पाएको छ । दाङको देउखुरी उपत्यका र यसमा पर्ने भालुबाङ क्षेत्रमा हर्षोलास छाएको छ । प्रदेशको राजधानी दाङ बनेको खुसियालीमा दंगालीले बाजागाजासहित र्याली निकालेर खुसियाली मनाए ।
उनीहरुले बरु कोरोना भाइरसको भने त्यति प्रवाह गरेनन् । प्रदेशसभाको निर्णयको स्वागतमा मंगलबार साँझ जिल्लाभर दीपावली भएको छ । यसमा नेताहरुले समेत साथ दिएका छन् । नागरिकस्तरबाट भालुबाङ, लमही, घोराही, तुलसीपुर, नारायणपुर, बिजौरी, पुरन्धारा, गढवा, गोबरडिहा लगायतका स्थानमा दीप प्रज्ज्वलन गरियो ।
घोराहीमा दाङ प्रादेशिक राजधानी सरोकार समितिको ब्यानरमा धन्यवाद तथा स्वागत र्याली आयोजना भएको छ । उद्योग वाणिज्य संघ, राजनीतिक दलका युवा तथा विद्यार्थी संगठनहरुले पनि स्वागत र्याली निकाले ।
प्रदेशसभा बैठकबाट दाङ राजधानी र प्रदेशको नाम लुम्बिनी पारित भएलगत्तै दंगालीले ठाउँ–ठाउँमा राष्ट्रिय झण्डा, नेपालको अद्यावधिक नक्सा र ब्यानर बनाएर खुसियाली मनाए भने बेलुकीपख चोक–चोकमा दीपावलीसमेत गरेका हुन् ।
देउखुरी उपत्यकामा पर्ने राप्ती गाउँपालिका, गढवा गाउँपालिकाका वडा नं. १, २ र ३ तथा अर्घाखाँचीको शीतगंगा नगरपालिकाका वडा नं. ८ र ९ ले चर्चेको भूभाग अब प्रदेश ५ को राजधानी बनेको छ ।
काठमाडौं । नेपाल कम्युनिष्ट पार्टीका प्रवक्ता नारायणकाजी श्रेष्ठले मंगलबार एक ट्वीट गर्दै कम्युनिस्ट पार्टीका सदस्यलाई नागरिकता वा स्थायी आवासीय प्रमाणपत्र नदिने गरी ल्याइएको हालैको अमेरिकी नीतिले कुनै पार्टीको सदस्य बन्न पाउने अधिकार र लोकतन्त्रको खिल्ली उडाएको उल्लेख गरे ।
उनको यो ट्वीट गत शुक्रबार अमेरिकाको यूएस सिटिजन एण्ड इमिग्रेसन सर्भिस (यूएससीआईएस)ले जारी गरेको घोषणामा आधारित थियो । सोही घोषणलाई आधार मान्दै अन्तराष्ट्रिय समाचार सस्थाहरुले समाचार बनाएका छन् । जसमा भनिएको छ, ‘कुनै पनि कम्युनिष्ट पार्टी वा आतंकवादी समुहमा संलग्न रहेको सदस्यले अमेरिकाको नागरिकता वा स्थायी आवासीय अनुमति पाउँदैन ।’
यसैलाई आधार बनाएर अन्तर्राष्ट्रिय स्तरमा समाचार बनेको हो । नेपाल कम्युनिष्ट पार्टीका प्रवक्ताबाट स्वेच्छाले कुनै पार्टीको सदस्य बन्न पाउने अधिकार र लोकतन्त्रको खिल्ली उडाइएको भन्दै ट्वीट आएपछि नेपालस्थित दूतावासले भने स्पष्टिकरण सार्वजनिक गरेको छ ।
उसले भनेको छ, ‘कम्युनिष्ट पार्टीका सदस्यका सम्बन्धमा दशकौं देखिको नीतिमा अमेरिकी सरकारले कुनै परिवर्तन गरेको छैन ।’
काठमाडौंस्थित अमेरिकी दूतावासले मंगलबार एक विज्ञप्ती जारी गर्दै नेपाल कम्युनिष्ट पार्टीका सदस्यलाई अमेरिका बसाइसराइमा कुनै प्रतिबन्ध नलगाएको र कुनै पनि भिसाको विषय व्यक्तिगत विषय भएको स्पष्ट पारेको हो ।
हालै आएको नीतिले नेपालसम्बन्धी नीतिमा कुनै परिवर्तन नहुने भन्दै निश्चिन्त हुन समेत अमेरिकाले आग्रह गरेको छ । भिसासम्बन्धी आएका केही समाचार गलत अर्थ लाग्ने भएको समेत अमेरिकाको भनाई छ ।
काठमाडौं । नेपालबाट नेपाल एयरलाइन्स चढेर हङकङ पुगेका ६ यात्रुमा कोरोना पुष्टी भएपछि नेपाल एयरलाइन्सलाई हङकङले कारवाही गरेको छ । कारवाहीस्वरुप काठमाडौं हङकङ रुटको उडान दुई साताका लागि रद्द भएको छ ।
नेपाल एयरलाइन्सको उडान अनुमति दुई साताका लागि रद्द भ्एको नेपाल एयरलाइन्सका अधिकारीले जानकारी दिएका छन् । नेपाल एयरलाइन्सका अनुसार नेपालबाट कोरोना परीक्षण पीसीआर रिर्पोट नेगेटिभ आएका यात्रुमा नै हङकङमा कोरोना देखिएको हो ।
नेपालबाट अधिकतम ७२ घण्टा अगाडिसम्मको पीसीआर रिपोर्ट देखाएमा हङकङ जान पाइन्छ । तर, हङकङ पुगेका यात्रुमा कोरोना देखिएपछि नेपाल एयरलाइन्स कारवाहीमा परेको हो । नेपाल एयरलाइन्सलाई ४ अक्टोबरबाट लागेको प्रतिवन्ध अब १७ अक्टोवरमा मात्र फुकुवा हुनेछ ।
अक्टोवर ३ मा नेपाल एयरलाइन्सको ‘आरए ४०९९’ उडानबाट हङकङ पुगेका यात्रुमा सोमबार कोरोना पुष्टी भएको हो । सोमबार हङकङमा कुल ११ जनामा कोरोना देखियो, त्यसमध्ये ६ जना नेपाल एयरलाइन्सका यात्रु र एक जना भारतीय नागरिक हुन् ।
काठमाडौं । चर्चित हास्य कलाकार हरिवंश आचार्य र पत्नी रमिलामा कोरोना भाइरसको संक्रमण पुष्टि भएको छ । आचार्यले मंगलबार फेसबुकबाट यसको पुष्टी गरेका हुन् । आफूहरुमा कोरोना संक्रमण पुष्टि भएको सार्वजनिक गर्दै आचार्यले स्वास्थ्य अवस्था भने सामान्य रहेको बताएका छन् ।
‘यहाँहरुको माया, आशिर्वाद र शुभेच्छाको कारण हामीले छिट्टै कोरोना संक्रमणलाई जित्नेछौं । कोरोना संक्रमण ब्यापक रुपमा फैलिएको हुँदा यहाँहरु सबैले जनस्वास्थ्यका मापदण्ड अनिवार्य रुपमा अवलम्बन गर्नुहुन अनुरोध छ’ हरिवंशको पोष्टमा उल्लेख छ ।
उनले आफूहरुको सम्पर्कमा रहेकाहरुलाई होम आइसोलेसनमा बस्न र परीक्षण गराउन आग्रह गरेका छन् । पछिल्लो समय काठमाडौं उपत्यकामा कोरोनाको संक्रमण तिब्र रुपमा फैलिरहेको छ ।
काठमाडौं । नेपालमा कोरोना भाइरसको संक्रमणबाट थप नौजनाको मृत्यु भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोरोना संक्रमणबाट देशभर ४ महिला र पाँच पुरुष गरि थप नौ जनाको मृत्यु भएको हो ।
मृत्यु हुनेमा काठमाडौंमा ५९, ६० वर्षीय महिला, ललितपुरमा ६७ र नवलपरासीपूर्वमा ७७ वर्षीय महिला रहेका छन् ।
त्यस्तै तेह्रथुमा ३१, सुनसरीमा ६४ ललितपुरमा ६१ र ७७ वर्षीय पुरुषको मृत्यु भएको छ । यो सहित नेपालमा कोरोना संक्रमणबाट मृत्यु हुनेको संख्या ५६३ पुगेको छ ।
काठमाडौं । काठमाडौं उपत्यकामा थप १०१७ जनामा कोरोना भाइरसको संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार पछिल्लो २४ घन्टामा काठमाडौंमा ७८३ जना, भक्तपुरमा ११६ र ललितपुरमा ११८ जनामा कोरोना संक्रमण पुष्टि भएको हो ।
जसअनुसार काठमाडौंमा २५८ महिला र ५२५ पुरुष, ललितपुरमा ४९ महिला र ६९ पुरुष र भक्तपुरमा ४३ महिला र ७३ पुरुष रहेका छन् ।
यो सहित उपत्यकामा कोराना संक्रमितको संख्या ३२ हजार ६५ पुगेको छ।
काठमाडौं । नेपालमा पछिल्लो २४ घण्टामा थप १५५१ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार २४ घण्टामा गरिएको ११ हजार ४७ जनाको पीसीआर परीक्षणमा थप १५५१ जनामा कोरोना संक्रमण पुष्टि भएको हो ।
यो सँगैकूल संक्रमितको संख्या ९० हजार ८१४ पुगेको छ।
पछिल्लो २४ घन्टामा थप २३४० जना कोरोना संक्रमणमुक्त भएका छन्। डिस्चार्ज हुनेको संख्या ६७ हजार ५४२ पुगेको छ। देशभर २२ हजार ७०९ जना सक्रिय संक्रमित छन्।
काठमाडौं। प्रदेश ५ को प्रदेश सभाले प्रदेशको नाम लुम्बिनी र स्थायी राजधानी देउखुरी कायम भएको छ।
प्रदेश सभाको मंगलबारको बैठकमा भएको मतदानमा सरकारले सभामा प्रस्तुत गरेको प्रस्ताव पारित भएको हो।
बैठकले दुईतिहाइ बढी मतले प्रदेशको नाम लुम्बिनी राख्ने निर्णय गरेको हो। ८३ जनाले भोट हालेका छन्।
लुम्बिनी नाम राख्ने पक्षमा ७९ मत खसेको छ भने विपक्षमा जम्मा ४ मत खसेको सभामुख पूर्ण घर्तीले जानकारी दिए।
अब प्रदेशको ५ को राजधानी देउखुरी हुनेछ। दाङको राप्ती गाउँपालिका र गढवा गाउँपालिका तथा अर्घाखाँचीको सितगंगा नगरपालिकाले ओगटेको राप्ती नदीले चर्चेको किनारको भाग राप्ती उपत्यका देउखुरीलाई प्रदेशको स्थायी राजधानी बनाउन प्रस्ताव गरिएको थियो।
शान्तिका अग्रदूत गौतमबुद्ध जन्मस्थल लुम्बिनीको महत्त्वलाई हृदयंगम गर्दै साझा चिनारीका रुपमा प्रदेशको नाम लुम्बिनी प्रदेश नामकरण गरियोस् भन्ने प्रस्ताव सदनसमक्ष प्रस्तुत गरिएको थियो।
प्रदेश ५ को राजधानी देउखुरी राख्ने प्रस्तावमा ६९ मत परेको थियो। विपक्षमा १३ मत परेको थियो।
प्रदेश ५ का ८७ सांसदमध्ये ८२ जना मतदानमा सहभागी थिए।
काठमाडौं । प्रदेश ५ को र स्थायी राजधानी भालुवाङ रहने प्रस्ताव प्रदेशसभाबाट दुई तिहाईले पास भएको छ ।
प्रदेशसभामा मंगलबार भएको मतदानमा प्रस्तावको पक्षमा ६९ मत परेको थियो । यो प्रदेशसभाको दुई तिहाई बहुमत हो । प्रस्तावको विपक्षमा १३ परेको छ ।
विपक्षी दल नेपाली कांग्रेसले विपक्षमा मतदान गरेका छन्। कांग्रेसका १९ मध्ये ६ जनाले भने दाङको पक्षमा मतदान गरेका छन्। प्रदेश सभामा नेकपाका ६१ सांसद छन्। प्रदेश सभा ८७ जनामध्ये ८२ जनाले मतदान गरेका थिए।
प्रदेश राजधानी दाङ कि बुटवल भन्नेमा तीव्र विवाद रहेको थियो भने विवादकै कारण सोमबारको बैठकमा काँग्रेस सांसदहरुले कुर्सी तोडफोड समेत गरेका थिए ।
काठमाडौं । रुपन्देही जिल्लाका नेपाल कम्युनिस्ट पार्टी नजिकका करिब दुई हजार उद्योगी व्यवसायीले पार्टीको सदस्यता परित्यागको घोषणा गरेका छन् ।
बुटवलमा पत्रकार सम्मेलन गर्दै २३ सय व्यवसायीहरूले नेकपाको पार्टी सदस्यबाट राजीनामा बुझाएका हुन् ।
प्रदेश ५ को राजधानी दाङको भालुवाङ बनाउने प्रदेश सरकारको तयारीविरुद्ध आन्दोलन घोषणा गर्दै राजीनामा बुझाएका हुन् । कार्यक्रममा बोल्दै रुपन्देही उद्योग संघका अध्यक्ष बाबुराम बोहोराले चुनावमा दिएको बाचा पुरा नगरेको हुँदा पाटीमा बसिरहनुको उपयुक्त नरहेको बताए ।
रुपन्देही व्यापार संघका अध्यक्ष यमलाल लोहनी, पूर्व अध्यक्ष मोतिलाल पाण्डे, व्यवशायी नारायण घिमिरे, एजाज आलम, माधव नेपाल, होटल तथा रेष्टुरेन्ण्ट व्यवशायी संघका अध्यक्ष समुन्द्र जिसी लगायतले बोलेका थिए ।
जिसीले नामै लिएर नेकपा संसदीय दलका प्रमुख सचेतकलाई स्वार्थमा लागेर जनताको चाहनालाई कुल्चेको आरोप लगाए ।
उनिहरुले रुपन्देहीमा रहेको ३५ वटा सामाजिक संघसंस्थाका २२४९ जना पाटी सदस्यले राजीनामा दिएको जानकारी गराएको छ ।
त्यसमध्ये कतिपय सदस्यहरु पाटीको जिम्मेवार पदमा समेत रहेका छन् ।
रुपन्देहीका सामाजिक संघ संस्थाको सञ्जालले विगत तीन देखि राजधानी रुपन्देहीमा हुनुपर्ने माग राख्ने आन्दालन गरिरहेको छ ।
मंगलबार पनि उनिहरुले प्रदेश सभा भवन अगाडी धर्नाका कार्यक्रम गरिरहेका छन् ।
काठमाडौं । बहराइनका राजकुमार नासिर बीन हमदसहित बहराइन रोयल फोर्सको टोली हिमाल आरोहणका सिलसिलामा नेपालमा रहेको छ । सोलुखुम्बुस्थिति लोबुचे हिमाल आरोहण गरि काठमाडौं फर्किएको यो टोलीले मंगलबारबाट मनास्लु आरोहण अभियान थाल्नेछ । मनास्लु आरोहणमा लामो समय लाग्नेछ ।
रोयल फोर्सको टोली २ महिना लामो नेपाल बसाईका क्रममा आएको हो । यो कोरोना भाइरसपछिको पहिलो विदेशी टोली हो । पर्यटन विभागका अनुसार ८१६३ मिटर अग्लो मनास्लु हिमाल आरोहण गर्न गोरखातर्फ लाग्ने कार्यक्रम रहेको छ । टोलीमा १८ जना छन् ।
उनीहरुलाई नेपाली गाइड तथा सहयोगीले व्यवस्थापन गरिरहेका छन् । अहिले मनास्लुमा अनुभवी शेर्पा टोलीले बाटो बनाइरहेको छ ।
विराटनगर । आज मोरङको विराटनगरस्थित नोबेल मेडिकल कलेजमा उपचार गराइरहेका थप दुई जनाको कोरोना भाइरसको संक्रमणबाट मृत्यु भएको छ । उनीहरु दुबै जना मोरङका बिरामी हुन् । अस्पतालका अनुसार रतुवामाई नगरपालिका –८ का ४५ वर्षीय पुरूषको बिहान साढे २ बजे र कानेपोखरी गाउँपालिका–६ का ५० वर्षीय पुरुषको बिहान ३ बजेतिर मृत्यु भएको
हो ।
दुबै पुरूष दीर्घरोगको समस्याबाट समेत ग्रसित थिए । कानेपोखरीका पुरूष ब्लड क्यान्सर र रतुवामाईका पुरूष सुगरको समस्यासँग जुधिरहेको बताइएको छ । नेपालमा अब कोरोना संक्रमणबाट ज्यान गुमाउनेको संख्या साढे ५ सय नाघेको छ । सोमबार साँझसम्म ५५४ जनाको ज्यान गएको छ ।
जनकपुरधाम । कुनै बेला कोरोना भाइरसको हटस्पट थियो तराई-मधेष । एकै दिन ठूलो संख्यामा भाइरसको संक्रमण र मृत्यु भइरहेको तराई भेग अब सामान्यतर्फ उन्मुख भइरहेको छ । यसै अवस्थाका बीच धनुषाको जनकपुरमा आजबाट स्कुल संचालनमा आउने भएका छन् ।
जनकपुरधाम उपमहानगरपालिकाले कोरोनाबाट चैतयता बन्द शैक्षिक संस्था सञ्चालनको निर्णय गरेको हो । उपमहानगरपालिकाको सोमबार बसेको बैठकले स्वास्थ्य सुरक्षा मापदण्ड पूरा गरी नगरक्षेत्रमा रहेको स्कुल सञ्चालन गर्न दिने निर्णय गरेको हो ।
स्कुलहरुले स्वास्थ्य सुरक्षा र सतकर्ताका मापदण्ड भने पालना गर्नुपर्छ । पहिलो चरणमा कक्षा ६ देखि १२ कक्षासम्मका विद्यालयमा पठनपाठन हुनेछ । शिशु कक्षा र बाल विकासका कक्षा विद्यार्थीको घरघरबाटै हुने भएको छ । सो प्रयोजनका लागि शिक्षक घरमै पुगेर ‘होम स्कूलिङ’ सेवा दिनेछन् ।
रामेछाप । रामेछापमा ट्याक्टर दुर्घटनामा परी दुई जनाको ज्यान गएको छ । रामेछापको दोरम्बा गाउँपालिकामा ट्याक्टर दुर्घटनामा परेको हो । जिल्ला प्रहरी कार्यालय रामेछापले दिएको जानकारी अनुसार सोमबार राति ९ बजेतिर दोरम्बा गाउँपालिका–४ सानो शैलुङ स्थित कच्ची सडकमा ट्याक्टर दुर्घटनामा परेको हो ।
काभ्रेपलाञ्चोक जिल्लाको जिरोकिलोबाट डिजेल बोकेर रामेछापको सानो शैलुङ तर्फ जाँदै गरेको ना ७ त ८७३ नं को ट्याक्टर सडकबाट २ सय मिटर तल खसेको थियो। दुर्घटनामा ट्याक्टर चालक दोरम्बा गाउँपालिका–७ पुडिटारका २७ वर्षीय चालक पेमा लामा र ट्याक्टरमा चढेका सोही स्थानका ५५ वर्षीया फुर्वा दोर्जेको घटनास्थलमै ज्यान गएको छ ।
दुबई । नेपाली स्टार सन्दीप लामिछानेलाई पाँचौं खेलमा समेत दिल्ली क्यापिटल्सले खेलाएन । यद्दपी दिल्ली सोमबारको खेलमा भने विजयी भयो । इन्डियन प्रिमियर लिग (आईपीएल) क्रिकेटअन्तर्गत गएराति भएको खेलमा दिल्ली क्यापिटल्सले रोयल च्यालेन्जर्स बैंगलोरलाई ५९ रनले हराएको हो । जितसँगै दिल्ली अंक तालिकाको शीर्ष स्थानमा उक्लिएको छ ।
दुबईमा सम्पन्न खेलमा दिल्लीले बैंगलोरलाई १९७ रनको लक्ष्य दिएको थियो । जवाफी ब्याटिङमा आएको बैंगलोरले निर्धारित २० ओभरमा ९ विकेटको क्षतिमा मात्र १३७ रन बनायो । टोलीका लागि कप्तान विराट कोहलीले सबैभन्दा धेरै ४३ रन जोडेका थिए ।
दिल्लीका कागिसो रबाडाले चार विकेट लिए । यसअघि टस हारेर पहिले ब्याटिङ गरेको दिल्लीले निर्धारित २० ओभरमा ४ विकेटको क्षतिमा १९६ रन बनाएको थियो । मार्कस स्टोइनिसले नटआउट ५३ रन बनाउँदै सर्वाधिक रन हानेका थिए । पृथ्वी शा ४२, शिखर धवन ३२ र रिसभ पन्त ३७ रनमा आउट भएमा थिए ।
वासिंगटन डिसी । कोरोना भाइरसको संक्रमण बोकेरै अमेरिकी राष्ट्रपति डोनाल्ड ट्रम्प डिस्चार्ज भएका छन् । उनी तीन दिनसम्म अस्पतालमा बसे । तर, जीउमा सक्रिय भाइरस नभएको भन्दै उनी निवास फर्किएका हुन् । अब उनको विशेष निगरानीमा ह्वाइटहाउस मै उपचार हुने भएको छ ।
ट्रम्पले डिस्चार्ज हुनुअघि ट्वीट गर्दै आफु छिट्टै चुनावी अभियानमा फर्कन बताएका थिए । कोरोना संक्रमणपछि उनी वाल्टर रिड नेशनल मिलिट्री मेडिकल सेन्टरमा भर्ना भएका थिए । ट्रम्पको उपचारमा संलग्न चिकित्सकका अनुसार उनी पूर्णरुपमा ठीक भने भइसकेका इसकेका छैनन् । यद्यपि उनको स्वास्थ्य सुधारोन्मुख छ ।
बीबीसीले ह्वाइट हाउसका चिकित्सक डा. सिन कोनललाई उदृत गर्दै लेखे अनुसार भाइरस जिउँदो नरहेकाले उनीबाट अरुलाई कोरोना सर्ने सम्भावना भने छैन । डिस्चार्ज हुनुअघि ट्वीट गर्दै ट्रम्पले छिट्टै चुनाव प्रचार सुरु गर्ने र गलत समाचारले केबल गलत मत सर्भेक्षण मात्र देखाउने टिप्पणी गरेका छन् ।
काठमाडौं । एक आमाको कोखबाट जुम्ल्याहा शिशु जन्मनु समेत ठूलै कुरा मानिन्छ । कँही कतै तीन या चार जना शिशुु सम्म जन्मेको सुनिन्छ । तर, आज नेपालमा एक आमाले ५ शिशुलाई एकै पटक जन्म दिएकी छिन् । यी भाग्यमानी आमा हुन, नुवाकेटकी २८ वर्षिया सोमिका तामाङ । उनले थापाथलीस्थित प्रसुती गृहमा एकै पटक पाँच शिशुुलाई धर्तीमा आगमन दिइन् ।
त्यसमध्ये एक जनाको भने आमाको कोखमै ज्यान गएको थियो । चार शिशु भने स्वस्थ अवस्थामा छन् । नेपालको सरकारी समाचार समिति राससले सोमबार अस्पतालमा शल्यक्रियामार्फत पाँच शिशुलाई जन्म दिएको अस्पतालका निर्देशक डा. सङ्गीता कौशल मिश्रलाई उदृत गर्दै लेखेको छ ।
डा. मिश्रका अनुसार अहिले आमा र शिशुको अवस्था सामान्य छ । अक्सिजन पनि दिनुपरेको छैन । अहिले बच्चाहरुलाई भने शिशु उपचार सघन कक्षमा राखिएको छ । रासससँग डा. मिश्रले बताए अनुसार एक महिलाबाट पाँच शीशुको जन्म विरलै हुने परिघटना हो ।
जीवित शिशु सबै छोरी हुन् । ती शिशुमध्ये क्रमशः पहिलाको तौल १.८ किलोग्राम, दोस्राको आठ सय ग्राम, तेस्राको १.९ किलोग्राम र चौथाको १.६ ग्राम छ । तामाङको यसअघि दुई पटकसम्म शिशु नजन्मेर खेर गएको बताइएको छ ।
काठमाडौं । नेपाली कांग्रेसले प्रदेश नं ५ को प्रदेश सभामा आज पार्टीका सांसदले देखाएको अराजक गतिविधि पार्टीको नीति विपरित भएको स्पष्ट पारेको छ । पार्टी प्रवक्ता विश्व प्रकाश शर्माले सोमबार साँझ ट्वीट गर्दै यो घटना पार्टीको नीति विपरित भएको बताएका हुन् ।
उनले भनेका छन्, ‘प्रदेश ५ को संसदमा ३ सांसदले गरेको कुर्सी तोडफोड नेपाली कांग्रेसको नीति र संस्कृति विपरीत छ, रोस्ट्रम भांच्नेदेखि संसदीय पद्धतिनै नास्छौं भन्ने कम्युनिस्ट पार्टीहरुलाई समेत रुपान्तरण गर्ने प्रशिक्षक रहेकोे दलका सांसदलाई पार्टीको संस्कृति उलंघनको स्वायत्तता विल्कुलै दिइएको छैन ।’
प्रदेशको स्थायी राजधानीका विषयमा भएको विवादका बीच आज बसेको प्रदेश सभा बैठकमा कांग्रेस सांसदहरुले प्रदेश सभाका कुर्सी तोडफोड गरेका थिए । पार्टीले भने उनीहरुलाई कारवाही गर्ने संकेत गरेको छ ।
संसदीय ब्यवस्था कम्युनिस्टका लागि बाध्यता र कांग्रेसका लागि रोजाईको पद्धति भएको भन्दै प्रवक्ता शर्माले परिमार्जित र सुसंस्कृत बनाउंदै अघि बढ्ने कर्तव्य समेत कांगेसकै भएको उल्लेख गरे । अरुका गल्तीमा सच्याउंदै बढ्न प्रेरित गर्ने कांग्रेस आफ्नाको छिटपुट भनेर नछोप्ने र कठोरतापुर्वक सच्याएर बढ्ने सामर्थ्य राख्ने समेत उनको भनाई छ ।
प्रदेश ५ को स्थायी राजधानी दाङको भालुवाङमा बनाउने प्रस्ताव प्रदेशसभामा पेस भएपछि प्रदेश ५ मा कांग्रेस सांसदले हंगामा गरेका थिए । सोमबारको प्रदेश सभा बैठकमा प्रदेश ५ का कांग्रेस प्रदेशसभा सदस्यले कुर्सी तोडफोड गर्दै बुटवलबाट राजधानी सारेको विषयमा आपत्ति जनाएका थिए।
काठमाडौं । डा. गोविन्द केसी पछिल्लो २२ दिनदेखि आमरण अनसनमा छन् । उनी गलिसकेका छन् । बोल्न नसक्ने अवस्थामा पुगेका छन् । तर, सरकार भने उनको मागमा कानमा तेल हालेर बसिरहेको छ । सोहीकारण उनीसँग वार्ता गर्ने र समस्या समाधान गर्नेतर्फ सरकारले कुनै चासो दिएको छैन ।
डा. गोविन्द केसीका सहयोगीहरुका अनुसार उनको स्वास्थ्य अवस्था नाजुक बन्दै गएको छ। केसीमा छाती, मांसपेशी दुख्ने समस्या देखिन थालेको छ । भोक र कमजोरीले रिँगटा लाग्ने समस्या भएको छ । उनी बोल्न छाडेका छन् ।
शरीरमा सोडियम, पोटासियम, म्याग्नेसिय, क्याल्सियम फस्फोरसको मात्रा कमी भएको समेत चिकित्सक सहयोगीहरुले जनाएका छन् । उनको मुटुको चाल घटबढ हुन थालेको छ । डा. केसीलाई अक्सिजनको साहारामा राखिएको छ । उनी शिक्षण अस्पतालमा आमरण अनसनमा छन् । स्वास्थ्य क्षेत्रमा सुधारको माग राख्दै केसी १९ औं आमरण अनसनमा छन् ।
सरकारले भने अनसन फिर्ता लिन माग गर्दै कोरोना रोकथाममा ध्यान दिन आग्रह गर्दै आएको छ । उनी भदौ २९ मा जुम्ला चन्दनाथ नगरपालिका ६ को बाबिरा मष्ट मन्दिरबाट १९ औं अनशन बसेका थिए ।
त्यहाँ स्वास्थ्यमा समस्या देखिने र सरकारले समेत वेवास्ता गरेपछि ८ औं दिनमा उनी जुम्लाबाट काठमाडौं आएका थिए । आज डा केसीको मागमा गम्भीर हुन र उनको ज्यानमा कुनै पनि प्रकारको क्षति भए त्यसको जिम्मेवारी प्रधानमन्त्री केपी शर्मा हुने चेतावनी कांग्रेस नेता गगन थापाले दिएका छन् ।
काठमाडौं । नेपालमा कोरोना भाइरसको संक्रमणबाट थप १९ जनाको मृत्यु भएको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा कोरोना संक्रमणबाट देशभर ५ महिला र १४ पुरुष गरी १९ जनाको मृत्यु भएको हो ।
मृत्यु हुनेमा काठमाडौंमा २६ वर्षीय पुरुषसहित ९ जना रहेका छन् । जसमा ७६, ८१ र ८३ वर्षीया महिला, २६, ६५, ६७, ७८, ८१ र ९१ जना पुरुषको मृत्यु भएको छ ।
त्यस्तै ललितपुरमा ३ वर्षीय बालक, ५५ र ७१ वर्षीय पुरुष, चितवनमा ६२ वर्षीय पुरुष, गोरखामा ४५ वर्षीया महिला र नवलपरासी पूर्वमा ३६ वर्षीय पुरुषको मृत्यु भएको छ ।
सुनसरीमा ५५ वर्षीय पुरुष, पर्सामा ६५ वर्षीया महिला, सर्लाहीमा ४२ र ६९ वर्षीय पुरुषको कोरोना संक्रमणबाट मृत्यु भएको छ । यो सँगै नेपालमा कोरोना संक्रमित मृतकको संख्या ५ सय ५४ पुगेको छ । नेपालमा कुल संक्रमितमध्ये मृत्यु हुने दर शून्य दशमलव ६२ प्रतिशत छ ।