काठमाडौं । चार पूर्वप्रधानन्यायाधीशले न्यायालयमा विद्यमान विवादका कारण प्रधानन्यायाधीश चोलेन्द्र शमशेर राणाले राजिनामा दिनुपर्ने बताएका छन् । अहिलेको समस्या रााणाकै कारण सिर्जना गरेको भन्दै उनलाई बहिर्गमन गर्ने आँट देखाउन उनीहरुले आग्रह गरेका छन् । चार पूर्वप्रधानन्यायाधीशहरू मीनबहादुर रायमाझी, अनुपराज शर्मा, कल्याण श्रेष्ठ र सुशीला कार्कीले सोमबार संयुक्त विज्ञप्ति जारी गर्दै यस्तो भनेका हुन् । विज्ञप्तिमा प्रधानायायाधीश राणा र न्यायालयभित्र भएको विवादमा ध्यानाकर्षण भएको भन्दै उनीहरूले राणालाई बहिर्गमनको सुझाव दिएका छन् ।
न्यायपालिका समक्ष उपस्थित चुनौतीहरूको माझमा न्यायपालिकाको स्वार्थलाई आफ्नो स्वार्थभन्दा माथि राखेर बहिर्गमन गर्ने आँट देखाउन सम्बन्धित न्यायिक नेतृत्वलाई आह्वान गर्ने उनीहरुको भनाई छ । मन्त्रिपरिषद विवादमा भागवण्डा खोजेको बाहिरिएपछि प्रधानन्यायाधीश चोलेन्द्रशम्शेर जबरा विवादमा तानिएका हुन् । १४ न्यायाधीशले फुलकोर्ट बहिस्कारको निर्णय गरेका छन् । नेपाल बार एशोसिएसन र सर्वोच्च अदालत बार एशोसिएसनले समेत प्रधानन्यायाधीश जबराको राजीनामा मागेका छन् ।
