Category: कानुनी कुरा

काठमाडौं । गोंगबुमा आइतबार बिहान विभत्स अवस्थामा टाउको र खुट्टा काटिएको अवस्थामा फेला परेको शवको पहिचान भएको छ । उनी दाङका कृष्णबहादुर बोहरा भएको प्रहरीले पुष्टी गरेको छ । यसअघि शवको पहिचान हुन नसकेपछि सोमबार दिउँसो प्रहरीले उनको तस्वीर सार्वजनिक गरेको थियो । शवको सनाखत नहुँदा अनुसन्धानले गति लिन सकेको थिएन ।

तर, तस्वीर सार्वजनिक भएलगत्तै बोहरा काम गर्ने कम्पनीका मानिसले उनको पहिचान गरेका थिए । उनी नयाँ बजार क्षेत्रमा एक गार्भेन्ट उद्योगमा काम गर्ने कर्मचारी रहेको बुझिएको छ । मृतकको सनाखत भएसँगै काठमाडौं प्रहरी परिसर र अपराध अनुसन्धान महाशाखाको टोली गोंगबु पुगेको थियो । प्रहरीले उनको हत्या भएको घरसमेत पत्ता लगाइसकेको छ । तर यस घटनामा कुनै व्यक्ति गिरफ्तारीमा परे नपरेको भने प्रहरीले खुलाएको छैन ।

आइतबार गोंगबु चोकनजिकै सुटकेशभित्र टाउको र खुट्टाविनाको शव भेटिएको थियो । घटनास्थलबाट करीव ५० मिटरको फरकमा रहेको एक घरमा उनको हत्या भएको खुलेको छ । प्रहरीले कुकुरको सहायतामा उनको टाउको र खुट्टा फेला पारेको थियो । राजधानीमै भएको एक विभत्स हत्याले शान्ती सुरक्षामाथि समेत प्रश्न उठाएको छ ।

काठाडौं । पत्नी हत्या गरी अपराध लुकाउन जंगलमा लगी शव जलाएको प्रमाणित भएका सशस्त्र प्रहरीका पूर्व डीआईजी रञ्जन कोइरालालाई जेलबाट छुटाउने सर्वोच्च अदालतको फैसला उपर परेको पुनरावलोकन निवेदनमाथि आज सुनुवाई हुँदैछ । सर्वस्वसहित जन्मकैदको सजाय भोगिरहेका सशस्त्र प्रहरीका पूर्व डीआईजी कोइरालाको कैद छुट गरी फैसला भएको थियो । उनी कारागारबाट छूटिसकेका छन् । यस फैसलाविरुद्ध सरकारी वकिलको कार्यालयले सर्वोच्चा पुनरावेदनका लागि निवेदन दर्ता गरेको छ । उक्त निवेदनउपर आज सुनुवाइ हुन लागेको हो ।

श्रीमतीको हत्यामा दोषी ठहर कोइरालाको सजाय घटाउने गरी सर्वोच्चको अदालतको फैसलामा महान्यायाधिवक्ताको कार्यालयले शुक्रबार पुनरावलोकनको निवेदन दर्ता गरेको हो । महान्यायाधिवक्ताको कार्यालयले सर्वोच्च अदालतबाट स्थापित नजिर वा कानुनी सिद्धान्तको प्रतिकूल फैसला भएको भन्दै पुनरावलोकनको माग गरेको छ ।

फैसलामा गल्ती भएको ठानेमा सर्वोच्चको पूर्ण इजलासले पुनरावलोकनको अनुमति दिन सक्ने प्रावधान रहेको छ । तर, अनुमति नदिएको अवस्थामा भने फैसलाले वैधानिकता पाउनेछ भने मुद्दाको औचित्य समाप्त हुनेछ । पुनरावलोकन मुद्दा हेर्न छुट्टै इजलास गठन गरिन्छ । कुनै मुद्दाको पुनरावलोकन माग गरिए पहिले फैसला वा अन्तिम आदेश गर्ने न्यायाधीश बाहेक अन्य न्यायाधिषले इजलास हेर्ने प्रचलन रहेको छ ।

पुनरावलोकन आएको मुद्दामा यसअघि मुद्दा हेरिसकेका न्यायाधिश बाहेक अन्य न्यायाधीशले पुनरावलोकनको अनुमति दिने वा नदिने निर्णय गर्छन् । यो मुद्दा प्रधानन्यायाधीश चोलेन्द्र शमशेरसहित न्यायाधीश तेजबहादुर केसी, पुरुषोत्तम भण्डारी, सुष्मलता माथेमा, मनोजकुमार शर्मा, आनन्दमोहन भट्टराई र सपना प्रधान मल्लले हेरेका कारण उनीहरुले यस निवेदनमाथि सुनुवाइ र निर्णय गर्न पाउदैनन् ।

काठमाडौं । आज सर्वोच्चको एक फैसला कार्यान्वयनप्रति आम मानिस संतुष्ट छैनन् । सामाजिक संजालदेखि चिया पसलसम्म न्यायालयमाथि प्रश्न उठ्ने गरी सर्वोच्चबाट भएको एक फैसला कार्यान्वयनमा आएको छ । पत्नी हत्याको अभियोगमा ८ वर्ष जेल बसेका सशस्त्र प्रहरीका पूर्वडीआइजी रन्जन कोइरालालाई सर्वोच्चले सजाय छूट दिएको छ । उनी बिहीबार नै रिहा भएका छन् ।

किशोर अवस्था पार गरिसकेका छोराहरुको हेरविचार गर्नु पर्ने भन्दै रिहा गरिएको उनलाई लिन छोराहरु नभएर कोइरालाकी प्रेमिका कारागार परिसर पुगेपछि अझ यो फैसलाको नियतमाथि प्रश्न उठेको हो । प्रधानन्यायाधीश चालेन्द्र शमसेर जबरा र न्यायाधीश तेजबहादुर केसीको संयुक्त इजलासले पूर्वडीआईजी कोइरालालाई यसअघिको सर्वस्वसहित जन्मकैदको फैसला उल्ट्याई आठ वर्ष ६ महिना सजाय कायम गरेपछि उनी बिहीबार छुटेका छन् ।

उनीमाथिको सजाय माफीले समाजमा अपराध कर्मले प्रशय पाउने तथा न्यायालयप्रतिको जनताको विश्वास कम हुनु हो की भन्ने चिन्तासमेत समाजमा बढेको छ । आज दिनभर सामाजिक संजालमा न्यायमूर्तिको फैसलामा प्रश्न उठ्दै लाखौ मानिसले प्रश्न उठाएका छन् । सांसद रामकुमारी झाँक्रीले यस फैसलाउपर न्यायिक पुनरावलोकनको आवश्यकता औल्याएकी छिन् ।
यसैबीच बिहीबार रिहा भएका रञ्जन कोइरालाको सजाय छुट दिने सर्वोच्च अदालतको फैसला पुनरावलोकनको माग गर्दै सर्वोच्चमा निवेदन दर्ता भएको छ ।

महान्यायाधिवक्ताको कार्यालयले फैसला पुनरावलोकनका लागि निवेदन दिने निर्णय गरे अनुसार सरकारी वकिलले बिहीबार फैसला पुनरावलोकनको निवेदन दर्ता गराएको हो । कोइरालाको सजाय घटाउने सर्वोच्चको फैसला चित्त नबुझेपछि सरकारी वकिलले पुनरावलोकनको निवेदन दिएको छ । सर्वोच्च अदालतको फैसला चित्त नबुझे दुईवटा आधारमा पुनरावलोकनको निवेदन दिन सकिने प्रावधान रहेको छ ।

फैसला उल्ट्याउन सक्ने नयाँ प्रमाण आएमा वा सर्वोच्च अदालतले त्यस्तै प्रकृतिको मुद्दामा पहिलेको व्याख्या भन्दा फैसला फरक ढंगले गरेमा पुनरावलोकनको निवेदन दिन सकिन्छ । न्यायिक पुनरावलोकनबाट फैसला उल्ट्याउने वा यथावत राख्ने भन्ने अधिकार भने सर्वोच्चसँग नै रहेको छ । अब सर्वोच्चले जनताप्रतिको भरोसा कायम राख्न कस्तो फैसला गर्छ, त्यो भने हेर्न बाँकि छ ।

न्यायाधीशले फैसला गरे उनैले पुनरावलोकन निवेदनमाथि सुनुवाई गर्न भने पाउने छैनन् । कोइरालाले ८ वर्ष अगाडी पत्नी गीता ढकाल कोइरालालाई घरमै मारेर बोरामा राखी मकवानपुरको टिस्टुङमा लगेर जलाएका थिए । सोही हत्याकाण्डमा जोडिएकी प्रेमीका तारा रेग्मीले उनलाई कारागारबाट कारमा राखेर घर लगेकी छिन् । आफ्ना आमाका हत्यारा बाउलाई दिन छोराहरु भने कारागार पुगेनन् ।

हेटौडा । दुई साता अगाडी मकवानपुरस्थित आफ्नै घरको भान्सा कोठामा मृत भेटिएकी सुस्मिता थापाको घरकै परिवारबाट क्रुर हत्या भएको खुलेको छ । परिवारका सदस्यको मिलेमतोमा हत्या भएको प्रहरीले सोमबार जानकारी गराएको छ । प्रहरीले दुई साता लामो अनुसन्धानपछि मकवानपुरबाट सुस्मिताका सासू, ससुरा र दुई नन्दलाई घटनामा संलग्न रहेको आरोपमा सार्वजनिक गरेको छ ।

२२ वर्षिय सुस्मिताको परिवार मिलेर आफ्नै भान्सा कोठामा हत्या भएको खुलेको हो । प्रहरीले मृतकका ५८ वर्षीय ससुरा प्रकाश थापा, ५० वर्षीया सासू तुलसा, नन्दहरू २७ वर्षीया दूर्गा र २३ वर्षीया नन्द सीता थापालाई पक्राउपछि सार्वजनिक गरेको छ ।

प्रहरीका अनुसार सुस्मिताका श्रीमान रुपेन्द्र थापा कपिलवस्तु सशुराली पुगेर हेटौडा फर्कने क्रममा मोटरसाइकल दूर्घटनामा परेका थिए । यो २६ असोज २०७६ को दिन थियो । उनको मृत्युपछि बुहारीकै कारण छोराको मृत्यु भएको भन्दै हरेक दिन बुहारीमाथि परिवारले टोकसो गर्दै आएको प्रहरीको अनुसन्धानमा खुलेको छ ।

त्यसक्रममा ससुराले बुहारीमाथि यौन दूब्र्यब्वहारसमेत गर्ने गरेको घिनलाग्दो हर्कतसमेत प्रहरीले अनुसन्धानका दौरान फेला पारेको छ । प्रहरीका अनुसार एकातर्फ छोराको मृत्युमा बुहारीको कारण देखेका परिवारले अर्कोतर्फ छोराको मृत्युपछि आउने बीमा रकममा समेत विवाद भएको प्रहरीको भनाई छ ।

रुपेन्द्रको सवारी दुर्घटनामा मृत्युपछि क्षतिपूर्तिबापत दश लाख रुपैयाँ आएको थियो । यो रकम उनका बाबु प्रकाशले लिएको प्रहरीले जनाएको छ ।

उता, रुपेन्द्रले काम गर्ने क्लोजर सिस्टम इन्टरनेसनल नेपालबाट पाउने बिमा, बोनस र तलबवापतको ३८ लाख २८ हजार रुपैयाँमा समेत बुबा प्रकाशले एकलौटी दावी गरे । तर, यो रकमको हकदार भने बाबु प्रकाश, आमा तुलसा र पत्नी सुस्मिता समेत थिइन् । सुस्मितालाई रकम नदिने र सबै रकम हत्याउने नाममा परिवार नै मिलेर बुहारीको हत्याको योजना बनाएको निष्कर्षमा प्रहरी पुगेको छ ।

सो क्रममा ससुरा प्रकाशले सुस्मितामाथि पटकपटक जबरजस्ती करणीको समेत प्रयास गरेको प्रहरीले जानकारी गराएको छ ।

प्रहरीका अनुसार १ असारमा सुस्मितालाई खाना खाइरहेको समयमा ससुरा प्रकाशले लठ्ठीले टाउकोमा हिर्काएका थिए । त्यसपछि भुईमा लडेकी उनलाई नन्द सीता थापाले लोहोरो प्रहार गरी गम्भीर घाइते बनाएकी थिइन् । बाबुछोरीले बुहारीको हत्यागरेपछि आत्महत्या भएको देखाउन रगत पुछ्नेदेखि कपडामा लागेको रगत सफा गरेको प्रहरी अनुसन्धानले खुलेको छ । कोठामा भित्रबाट चुकुल लगाएर झ्यालबाट बाहिर निस्केका बाबुछोरीले सुमिस्ताले आत्महत्या गरेको दावी गरेका थिए ।

रुकुम । रुकुम पश्चिमस्थित चौरजहारी नगरपालिका, सोती गाउँमा भएको नरसंहारमा आरोपित २३ जना पुर्पक्षका लागि कारागार चलान भएका छन् । जिल्ला अदालत रुकुमले जेठ १० मा ६ जनाको ज्यान जाने गरी भएको घटनाका अभियुक्तमध्ये २३ जनालाई कारागार चलान गर्ने आदेश दिएको हो ।

वडाअध्यक्ष डम्बरबहादुर मल्लसहित २३ अभियुक्तलाई जिल्ला अदालतबाट पुर्पक्षका लागि कारागार चलान गर्ने आदेश भएको हो । शुक्रबारदेखि शुरु भएको थुनछेक बहस बुधबार सकिएको हा । जिल्ला अदालतका न्यायाधीश विद्याराज पौडेलले यस्तो आदेश गरेका छन् ।

२ जनालाई १ लाख धरौटी र ३ जना अभियुक्तलाई साधारण तारेखमा छाड्न आदेश दिइएको छ । साधारण तारेखमा छुट्ने प्रतिवादीहरुमा इन्द्रबहादुर मल्ल, तुल बहादुर मल्ल र दिपेन्द्र चन्द छन्।

यसअघिको दुई जना नाबालक भने पुर्पक्षका लागि सुधारगृहमा पठाउने आदेश आएको थियो ।

अन्तरजातीय प्रेममा रहेका एक युवकले युवतीलाई भगाउन गाउँ गएका बेला गाउँलेले युवाको जमातलाई लखेट्ने क्रममा यो घटना भएको हो । घटनामा जाजरकोटका नवराज विकसहित ६ जनाको ज्यान गएको थियो ।

काठमाडौं । नेपाली नागरिकसँग बिहे गरेर आउने विदेशी नागरिकलाई नेपालमा सात वर्ष लगातार बसेपछि मात्र अंगीकृत नागरिकता दिनेसम्बन्धी व्यवस्था संसदको राज्य व्यवस्था तथा सुशासन समितिले पास गरेको छ । यो व्यवस्था संसदीय समितिमा बहुमतले पारित भएको हो । आइतवार बसेको समितिको बैठकमा प्रमुख प्रतिपक्ष नेपाली कांग्रेस र समाजवादी जनता पार्टीले भने फरक मत राखे ।

तर, शनिबार नेकपाले यो प्रावधानको पक्षमा मतदान गर्ने निर्णय गरेको थियो । सोहीकारण बहुमतले विदेशी बुहारीलाई सात वर्षपछि मात्रै अंगीकृत नागरिकता दिने गरी नागरिकता ऐनमा संशोधन गर्ने प्रस्ताव पारित भएको हो । प्रस्तावको पक्षमा सत्तारुढ नेपाल कम्युनिष्ट पार्टीका सांसद देखिए । प्रमुख प्रतिपक्ष कांग्रेस र जनता समाजवादीका सांसद विपक्षमा रहे ।

उनीहरुले बिहे भएर नेपाल आउनासाथ वा महिलाले चाहेको समयमा नागरिकता पाउनु पर्ने अडान राखेका छन् । समितिबाट पारित भ्एको विधेयक प्रतिनिधिसभामा पेश हुन्छ । विपक्षीले भने विदेशी महिलालाई सात वर्ष पछिमात्रै अंगीकृत नागरिकता दिने विषय व्यवहारिक नहुने र संविधानको मर्म विपरीत हुने तर्क राखेका छन् ।

तराई मधेसमा अधिकांश व्यक्तिको विवाह भारतमा हुने भएकले यसले नेपाल र भारतबीचको भगिनी सम्बन्धमै असर पर्न सक्ने विपक्षी सांसदहरुको तर्क रहेको छ । यता, सत्तारुढ दलले बहुमतिको बलमा विधेयक पारित गरेपछि विपक्षी दल भने मोर्चाबन्दीमा उत्रिएका छन् । उनीहरुले एक स्वरमा यो प्रावधानको विरोध गरेका हुन् ।

रुकुम । ६ जनाको ज्यान जाने गरी रुकुम पश्चिमको चौरजहारी नगरपालिका ८ को सोतीमा भएको घटना नियोजित हत्या भएको निष्कर्षमा प्रहरी पुगेको छ । गाउँबाट भाग्दै गरेका युवालाई बाटो छेकेर नियोजित तरिकाले आक्रमण गरिएको र आक्रमणका क्रममा उनीहरुको ज्यान गएको प्रहरीको अनुसन्धानले देखाएको छ ।

जेठ १० मा रुकुम पश्चिमको चौरजहारी नगरपालिका ८ को सोतीमा जाजरकोटबाट गएका १८ जना युवाको टोलीमाथि गाउँलेले आक्रमण गरेका थिए । ती युवा गाउँकी मल्ल थरकी एक युवतीलाई भगाउन गएका थिए । घटनामा संलग्न भएको आरोपले प्रहरीले आइतबार ३४ जनाविरुद्ध जिल्ला अदालत रुकुम पश्चिममा मुद्दा दायर गरेको छ ।

मुद्दा दर्ता गरिएकामध्ये दुई जना बालबालिका हुन् । एक जना भने मतियारका रुपमा दर्ता भएको छ । ३१ जनाविरुद्ध ज्यान मार्ने उद्योग, कर्तव्य ज्यान र जातीय विभेद तथा छुवाछुत कसुरमा मुद्दा दर्ता गरिएको प्रहरीले जानकारी दिएको छ । जिल्ला अदालत रुकुम पश्चिमका श्रेस्तेदार कृतबहादुर बोहराले आइतबार मुद्दा दर्ता भएको जानकारी दिएका छन् । सोमबारबाट थुनछेक बहस सुरु हुने भएको छ ।

मुद्दा लागेकामध्ये पाँच जना फरार छन् । अरु सबैलाई प्रहरीले पक्राउ गरिसकेको छ । जाजरकोट भेरी नगरपालिकाका नवराज विककी प्रेमिकालाई भगाउन १८ जनाको टोली रुकुम गएको थियो । उनकी प्रेमिका र उनीबीच शुरुमा राम्रो सम्बन्ध भएपनि पछिल्लो समय सम्बन्ध बिग्रिएको र धेरै जना युवा जाँदा भगाउन सकिने उद्देश्यले नवराजले युवाहरुलाई रुकुम लगेको पाइएको छ ।

तर, सो क्रममा जातीय विषय समेत उठेपछि विवाद भएका कारण प्रहरीले जातीय विभेदको कसुरमा समेत मुद्दा दर्ता गरेको छ ।

यो घटनामा नवराजसहित गणेश बुढा मगर, सञ्जु विक, लोकेन्द्र सुनार, गोविन्द शाही र रुकुम पश्चिम चौरजहारी नगरपालिकाका टीकाराम नेपालीको ज्यान गएको छ । उनीहरुको शव भेरी नदीमा भेटिएको हो । प्रहरीका अनुसार गाउँलले लखेट्दै ढुंगा प्रहार गर्दा युवाको ज्यान गएको पाइएको छ ।

काठमाडौं । मन्त्रीपरिषद् बैठकले सोमबार सिफारिस गरेका दुई अध्यादेश राष्ट्रपति विद्यादेवी भण्डारीले आजै जारी गरिदिएकी छिन् ।

मन्त्रिपरिषद्ले सिफारिस गरेर शितल निवास पठाएको दुबै अध्यादेश राष्ट्रपतिबाट तत्काल जारी भएको हो ।

राजनीतिक दल सम्बन्धी (दोस्रो संशोधन) अध्यादेश २०७७ र संवैधानिक परिषद् (काम, कर्तव्य, अधिकार र कार्यविधि) सम्बन्धी पहिलो संशोधन अध्यादेश,२०७७ जारी भएको राष्ट्रपति कार्यालयले जनाएको छ ।

राष्ट्रपति कार्यालयका सहायक प्रवक्ता केशवप्रसाद घिमिरेका अनुसार नेपालको संविधानको धारा ११४ को उपधारा (१) बमोजिम मन्त्रिपरिषद्को सिफारिसमा राष्ट्रपति भण्डारीबाट अध्यादेश जारी भएको हो ।

सरकारले राजनीतिक दलसम्बन्धी ऐन संशोधन अध्यादेशमा पार्टी केन्द्रीय समिति वा संसदीय दलमध्ये एउटामा ४० प्रतिशत मत पुर्‍याएमा पार्टी विभाजन गर्न सकिने व्यवस्था सहित पठाएको थियो ।

संवैधानिक परिषद्सम्बन्धी अध्यादेशमा परिषद् बैठक बस्न प्रमुख प्रतिपक्षी दल नचाहिने गरी संशोधन भएको छ । अहिले विपक्षी दलका नेता कांग्रेस सभापति शेरबहादुर देउवा रहेका छन् ।

काठमाडौं । बलात्कार प्रयासको आरोप लागेका पूर्वसभामुख कृष्ण बहादुर महराले जेलबाट रिहा भएसँगै पहिलो वक्तब्य सार्वजनिक गरेका छन् ।

उनले सांसदको हैसियतमा वक्तब्य निकालेका हुन् । उनले वक्तब्यमा प्रहरी हिरासत र त्यसपछिको जेल बसाईका क्रममा आफूप्रति सदभाव राख्ने सबैलाई धन्यवाद भनेका छन् ।

उनले अब आफ्नो प्राथमिकता मुलुकको स्वाधिनता रक्षामा हुने समेत बताएका छन् । उनले आफुमाथि लागेको आरोपलई तथाकथित भन्दै यस अवस्थामा सदभाव राख्नेहरुलाई धन्यवाद भनेका हुन् ।

जिल्ला अदालत, काठमाडौंबाट सफाइ पाएसँगै उनी सोमबार नै निवास लागेका छन् ।

संसद सचिवालयकी कर्मचारी माथि बलात्कार प्रयास गरेको आरोप लागेपछि उनले १४ असोजमा सभामुखबाट राजीनामा दिएका थिए ।

१९ असोजमा उनी पक्राउ परेका हुन् । देशभक्त नेपालीका रुपमा मुलुकको स्वाधीनताको रक्षा आफनो पहिलो र उच्च प्राथमिकतामा सधैं रहेको, अहिले पनि भएको र सदैव रहिरहने उनले उल्लेख गरेका छन् ।

उनीमाथि एमसीसी पास नगरी संसदमा रोकेको आरोप लागेको थियो । सोहीकारण षडयन्त्र गरी उनलाई सभामुखबाट हटाउनै यो प्रपन्च रचिएको आशंका गर्नेको समेत कमी छैन ।

एमसीसीको विवादलाई लिएर सत्तारुढ नेपाल कम्युनिस्ट पार्टी (नेकपा) मा अहिले पनि विवाद कायम छ ।

प्रधानमन्त्री ओली एमसीसी तत्काल पास गर्नुपर्ने पक्षमा छन् । यस विषयमा भने उनी बोलेका छैनन् । महरा ३० दिन प्रहरी हिरासत र १०३ दिन डिल्लीबजार कारागारमा बसेका हुन् ।

काठमाडौं । जिल्ला अदालतबाट बलात्कार मुद्दामा सफाई पाएका पूर्वसभामुख कृष्ण बहादुर महरा आजै जेलबाट मुक्त भएका छन् ।

उनी डिल्लीबजार कारागारबाट बिदाई भई निजी निवासतर्फ लागे ।

उनको रिहाईका बेला सयौं कार्यक्रता तथा समर्थक जेल बाहिर पुगेका थिए ।

जेलबाट बिदाईका क्रममा महराले संक्षिप्त प्रतिक्रिया दिँदै जेलमा रहँदा सबैबाट राम्रो व्यवहार भएको भन्दै खुसी व्यक्त गरे ।

सबैको सहयोग प्रति उनले धन्यवाद समेत दिएका थिए ।

सोमबार नै जिल्ला अदालतले बलात्कार मुद्दामा उनलाई निर्दोष सावित गर्दै सफाई दिएको थियो ।

अदालतले उजुरीकर्ता रोशनी शाहीको बयानका आधारमा उनलाई सफाई दिएको हो ।

रोशनीले महरा आफ्नो कोठामा नआएको र सोहीकारण बलात्कार हुने कुनै सम्भावना नै नरहेको बयान अदालतमा दिएकी थिइन् ।

उनले यसअघि नै उजुरी फिर्ता लिएपनि प्रहरीले अनुसन्धान भने रोकेको थिएन ।

जिल्ला अदालतले यसअघि महरालाई पूर्पक्षका लाथि थुनामा राख्न आदेश गरेको थियो ।

सोही अनुसार उनी डिल्लीबजार कारागारमा रहेका थिए । उनले अदालतबाट सफाई पाएसँगै सांसद पद यथावत रहेको छ ।

उनले पुनः सरकारी सेवा सुविधा पाउने छन् । तर, उनको सभामुख पद भने खारेज भइसकेको छ ।

आफूमाथि बलात्कार प्रयासको आरोप लागेसँगै उनले नैतिकताका आधारमा राजिनामा गरेका थिए । उनलाई अदालतले सफाई दिएलगत्तै सोमबार नै नेकपा अध्यक्ष प्रचण्डले फोन गरेर बधाई दिएका छन् ।

काठमाडौं । संसद सचिवालयमा कार्यरत कर्मचारीलाई बलात्कार र शारीरिक हिंसा गरेको आरोप लागेका पूर्वसभामुख कृष्णबहादुर महराको मुद्दाबारे आज फैसला दिने तयारी अदालतले गरेको छ ।

काठमाडौं जिल्ला अदालतले आइतबार हेर्दाहेर्दैमा राखेको यो मुद्दामा आज अन्तिम फैसलाको संभावना रहेको छ ।

आइतबार बहस भए पनि फैसला आउन सकेन । जिल्ला अदालतका अनुसार समय अभावका कारण आइतबार फैसला हुन नसकेको हो ।

अदालतका श्रेस्तेदार आनन्द श्रेष्ठका अनुसार सोमबार फैसला आउने सम्भावना रहेको छ ।

संसद सचिवालयकी कर्मचारी रोशनी शाही माथि जबरजस्ती करणी प्रयास गरेको आरोप उनिमाथी लागेको छ । महरा पुर्पक्षका लागि जेलमा छन् ।

काठमाडौं जिल्ला अदालतका न्यायाधीश अम्मरराज पौडेलको इजलासमा आइतबार मुद्दामा बहस भएको छ ।

१२ असोजमा रोशनी कै कोठामा पुगेर रक्सी खाइ जबर्जस्ती प्रयास गरेको आरोप उनिमाथी रहेको छ ।

प्रतिकार गर्दा रोशनीमाथी उनले हातपात समेत गरेको सरकारी वकिलको कार्यालयले दावी गरेको छ ।

काठमाडौं । पूर्वप्रधानमन्त्रीद्धय डा. बाबुराम भट्टराई र माधव कुमार नेपालविरुद्ध बालुवाटारस्थित ललिता निवासको सरकारी जग्गा विवाद प्रकरणमा मुद्दा चलाउन माग गर्दै सर्वोच्च अदालतमा रिट परेको छ ।

सरकारी जग्गा व्यक्तिका नाममा पुर्‍याउने निर्णय भएका कारण पूर्वप्रधानमन्त्रीद्वय माधव कुमार नेपाल र बाबुराम भट्टराईलाई भ्रष्टाचार मुद्दा चलाउन माग गर्दै रिट दायर गरिएको हो ।

मन्त्रीपरिषद्को निर्णयमा अख्तियारले हेर्न नमिल्ने भन्दै अख्तियार दुरूपयोग अनुसन्धान आयोगले दुई पूर्वप्रधानमन्त्रीलाई भने यस काण्डमा मुद्दा दायर गरेको थिएन ।

तर, सोही मन्त्रिपरिषद्ले गरेको निर्णयमा मन्त्री र सचिवहरु भने फसिएका छन् ।

बुधवार वरिष्ठ अधिवक्ता बालकृष्ण न्यौपानेले अख्तियारले छुट दिएका दुवै पूर्वप्रधानमन्त्रीलाई मुद्दा चलाउने आदेश दिन माग गर्दै सर्वोच्चमा रिट हालेका छन् ।

अख्तियारले नीतिगत निर्णय गरेको भन्दै उनीहरूलाई उन्मुक्ति दिएको छ।

सर्वोच्चले उक्त रिटको पेशी शुक्रबारका लागि तोकिसकेको छ ।

ललिता निवासको जग्गा व्यक्तिका नाममा लैजान प्रस्ताव गर्ने तत्कालिन तीन मन्त्री र तीन सचिवलाई मुद्दा चलाइएको छ । तर, प्रधानमन्त्रीहरु भने उम्कन सफल भएका हुन् ।

काठमाडौं । तपस्वीका नाममा चिनिने रामबहादुर बमजन पुनः एक पटक विवादमा तानिएका छन् ।

आफ्नो आश्रममा गएका चार जना अनुयायी बेपत्ता पारेको आरोपमा उजुरी परेपछि प्रहरी उनलाई खोज्दै सिन्धुलीस्थित आश्रम पुगेको थियो ।

तर, शुक्रबार प्रहरीले बमजनलाई फेला पार्न भने सकेन । सिन्धुलीको सिन्धुलीमाडीमा बमजनको आश्रम रहेको छ ।

आश्रममा बिहानै प्रहरी पुगेको थियो । उनी सिन्धुलीमाडीमै रहेको बताइएको थियो । तर जिल्ला प्रहरी कार्यालयको टोली आश्रम गए पनि उनी नभेटिएको कार्यालयले जनाएको छ ।

बमजनमाथि आश्रमबाट अनुयायी बेपत्ता पारेको सम्बन्धमा ४ जनाको अभिभावकले उजुरी गरेका थिए ।

आफ्ना सन्तान बेपत्ता पारेको भन्दै उनीहरुले प्रहरीमा उजुरी दिएका हुन् । बमजन पटक पटक विवादमा आइरहने तपस्वी हुन् ।

अनुयायीमाथि बलत्कारको आरोपसहित वेपत्ता पारेको आरोप लाग्ने गरेको छ । आफूलाई भगवान बुद्धको अनुयायी बताउने उनी नेपालका विवादित तपस्वी हुन् ।