Category: मनोरञ्जन

काठमाडौं । नेपाल एकिकरणको नेतृत्व गरेका राजा पृथ्वीनारायण शाहको जन्म जयन्ती आज विभिन्न कार्यक्रम गरी मनाइदैछ । गणतन्त्र आउनु अगाडी यस दिन सरकारले सार्वजनिक बिदा दिने गरेको थियो ।

२९९ औं पृथ्वी जयन्तीको अवसरमा गोरखाका विभिन्न स्थानीय तहले भने आज सार्वजनिक बिदा घोषणा गरेका छन् । गोरखा नगरपालिका, पालुङटार नगरपालिका, सिरानचोक गाउँपालिका, अजिरकोट गाउँपालिका, भीमसेन थापा गाउँपालिकाले सार्वजनिक बिदा घोषणा गरेका हुन ।

गोरखा नगरपालिकाले तीन दिने कार्यक्रम गरी पृथ्वी जयन्ती मनाइरहेको छ । राप्रपाले आज गोरखामा पृथ्वी जयन्ती मनाउने क्रममा अध्यक्ष कमल थापा गोरखा जाने कार्यक्रम तय भएको छ । यस दिनको उपलक्ष्यमा नेताहरुले शुभकामना दिँदै राष्ट्रिय एकतामा जोड दिएका छन् ।

काठमाडौं । वर्तमान पुस्ताका लागि सम्भवतः सबैभन्दा कठिन वर्ष सन् २०२० को बिदाई र २०२१ को स्वागतका लागि आज राती संसारका अधिकांश मानिस निदाएनन् । यससँगै इस्वी संवतको नयाँ वर्ष सन् २०२१ प्रारम्भ भएको छ । नेपालसहित विश्वभर नयाँ वर्ष उत्सव मनाइदैछ ।

कोरोना संक्रमणको त्रास अझै रहेका कारण मानिसले विगतमा जस्तै उत्सव मनाउन त पाएनन् । तर, शुभकामना साटासाट गरी नयाँ वर्ष उत्सव मनाइदैछ । इसाई धर्मका प्रवर्तक जिसस क्राइस्ट (प्रभु यशु) को सम्झनामा उनको मृत्युपछि अनुयायीले सो संवत् प्रचलनमा ल्याएका थिए ।

यशु ख्रीस्टको जन्म भएको वर्षदेखि पादरी ग्रेगोरियनले शुरु गरेकाले यसलाई ‘ग्रेगोरियन पात्रो’ समेत भन्ने गरिन्छ । नयाँ वर्षमा इसाई धर्मावलम्बीहरुले यशुको सम्झना गर्दै अंगुरको रस र रोटी खाने प्रचलन रहिआएको छ । यसदिनको उपलक्ष्यमा विश्भरका नेताले सुस्वास्थ्य तथा समृद्धिको कामना गर्दै शुभकामना दिएका छन् ।

काठमाडौं । नेपालमा पुसे १५ को विशेष महत्व छ । १५ पुुसका दिन नेपालमा सबैजसो समुदाय तथा जातिले छुट्टाछुट्टै महिमाका साथ यो पर्व मनाउँछ । आज मंसिर पूर्णिमा अर्थात् धान्य पूर्णिमा समेत हो । ब्रामण तथा क्षेत्रीहरुमा अधिकांशको आज कुल पूजा हुने गर्छ । आजको दिन नेवार समुदायले धान्य लक्ष्मीको प्रतिमा स्वरूप योमरीको पूजा गर्ने प्रचलन रहेको छ ।

प्रकृतिपूजक किरातहरूले यस दिलाई उधौली पर्वका रुपमा मान्ने गरेका छन् । त्यसो त हरेक वर्ष पुस १५ मा गुरुङ जातिको ल्होछार पर्व समेत आज नै परेको छ । आजको दिनबाट दिन लामो र रात छोटो हुन्छ ज्योतिषीय मान्यता रहेको छ । साथै आजबाट चिसो क्रमशः कम हुँदै जाने र तापक्रम बढ्ने विश्वास समेत लिइन्छ ।

नेपाल कृषिप्रधान मुलुकमा धान भित्र्याइसकेपछि फुर्सदिलो बनेका किसानहरुले पूर्णिमाको पवित्र दिन या रातमा विभिन्न नाच एवं पर्व मनाउने गर्छन् । पुस १५ भने गुरुङहरूको नयाँ वर्ष हो । सोहीकारण आज ल्होछार मनाइने गरेको छ । यता, धान्य पूर्णिमालाई गण्डकी प्रदेशमा समेत विभिन्न जातिहरुको साझा पर्वको रुपमा मान्ने प्रचलन छ ।

त्यहाँका मगर समुदायमा यो दिन जीवनसाथी रोज्ने पर्वको रूपमा प्रचलित छ । मगर समुदायमा भ्यालेन्टाइन डे जस्तै दिनका रुपमा यो दिनलाई चिनिन्छ । धान्य पूर्णिमाका दिन धान नाच गरिन्छ । धान्य पूर्णिमाको जुनेली रातमा कर्णालीको एउटा विशेष क्षेत्रमा मनाइने संस्कृतिका रुपमा धाननाच प्रख्यात छ । यसलाई दैलेखको दुल्लुस्थित कर्णाली नदीको फाँटमा नाच्ने गरिन्छ ।

काठमाडौं । पूर्व नेपालको चर्चित धार्मिक गन्तब्य ताप्लेजुङको पाथिभरा यतिबेला आगोलागीको उच्च जोखिममा परेको छ । एक सातायता शुरु भएको डेडलो नियन्त्रणमा आउन नसकेपछि मन्दिर र यस आसपासका संरचना जोगाउनै चूनौति थपिएको छ । प्रहरीका अनुसार सोमबार मन्दिरमै आगो पुग्ने जोखिमपछि सिम्रिक एयरको हेलिकप्टर मगाएर आकासबाट पानी खन्याइएको छ ।

आकासबाट पाँच पटकसम्म पानी खन्याइएको थियो । यसले आगो मूख्य मन्दिरतर्फ अगाडी बढ्न नपाएको बताइएको छ । अहिले ताप्लेजुङको पाथीभरा मन्दिर सुरक्षित रहेपनि जोखिममुक्त भने नभइसकेको बताइएको छ । मन्दिर आसपासको जङ्गलमा बिहीबारदेखि नै डडेलो शुरु भएको हो । हेलिकप्टरले जोरपोखरीबाट पानी लगेर मन्दिर परिसरमा खन्याएको थियो । यसले आगो मन्दिरसम्म पुग्न पाएन ।

हेलिकोप्टरबाट मङ्गलबार पनि पानी खन्याइने भएको छ । त्यसका लागि हेलिकोप्टरलाई सुकेटार विमानस्थल मै राखिएको छ । स्थानीयबासी, नेपाली सेना, नेपाल प्रहरी र सशस्त्र प्रहरीको टोलीले आगो निभाउने प्रयास गरिरहेको भए पनि सफलता प्राप्त हुन सकेको छैन । नजिकमा पानीको स्रोत नभएका कारण पनि समस्या बढेको बताइएको छ ।

काठमाडौं । काठमाडौंको सुन्धारामा निर्माण भइरहेको धरहराको २० औं तलाको निर्माण सम्पन्न भएको छ । यो २० औं तला बार्दली हो । यही तलाबा सर्वसाधारणले अवलोकन गर्न सक्ने भएका छन् । राष्ट्रिय पुनर्निर्माण प्राधिकरणका प्रमुख कार्यकारी अधिकृत सुशील ज्ञवालीका अनुसार २० औं तलामा बारदली बन्ने छ ।

यस स्थानलाई अवलोकन स्थानका रुपमा उपयोग गरिनेछ । धरहरा कुल २३ तलाको हुनेछ । यसअघि भूकम्पले भत्काएको धरहरालाई नचलाई नयाँ धरहरा बनाइएको हो । धरहरा अब अत्याधुनिक टावरका रुपमा विकास भएको छ ।

यसको परिसरभित्रै एक हजार भन्दा बढी सवारीसाधन पार्किङ गर्न मिल्ने तीन तलाको पार्किङ स्थल बनेको छ । यस परिसर भित्रै टक्सार संग्राहलय र भूकम्प संग्राहलय समेत रहने छ । त्यसको काम समेत जारी रहेको छ ।

धरहरा चढ्न अब भर्यांग उक्लन पर्ने छैन । यहाँ जमिनमुनिको दुई तलाबाट लिफ्ट प्रयोग गरी २० औं तलासम्म जान मिल्ने गरी डिजाइन गरिएको छ । यो संसारका अन्य मुलुकमा हुने जस्तै टावरको संरचना हो ।

प्राधिकरणका अनुसार चालु आर्थिक वर्ष भित्रै धराहराको काम सकाएर हस्तान्तरण गर्ने योजना रहेको छ । धरहरा निर्माणको कुल लागत ३ अर्ब ४५ करोड रुपैयाँ छ । यो ४२.२ रोपनी क्षेत्रफलमा बनिरहेको छ ।

काठमाडौं । बन्द भएको करीव ९ महिनापछि आजबाट पशुपतिनाथ दर्शन खुला भएको छ । मंगलबार राष्ट्रपति विद्यादेवि भण्डारीबाट क्षमापूजा सम्पन्न भएको थियो । त्यससँगै आजबाट भने पशुपतिनाथ मन्दिरमा दर्शन गर्न सकिने भएको छ । यसअघि १० चैत २०७६ पछि मन्दिरमा नित्यपूजाबाहेक अन्य सर्वसाधारणबाट हुने पूजा बन्द भएको थियो ।

कोरोना भाइरसको महामारी नियन्त्रणका लागि सरकारले देशव्यापी लकडाउन थालेसँगै धार्मिक गतिविधिसमेत प्रभावित भएका हुन् । पशुपतिनाथ मन्दिर हिन्दु धर्मावलम्बीका लागि सबैभन्दा ठूला आस्थाका केन्द्र हुन् ।

यहाँ दैनिक लाखौं भक्तजन पूजी भगवान शिवको पूजा तथा आराधना गर्छन् । मन्दिरमा सामाजिक दूरी कायम गर्ने, मास्क लगाएर प्रवेश गर्नेसहितका नियम भने पालना गर्नुपर्ने भएको छ ।

काठमाडौं । सातामा दुई दिन सार्वजनिक बिदा दिन बनेको सरकारी अध्ययन समितिले आफ्नो अध्ययन प्रतिवेदन सरकारलाई बुझाएको छ ।

संस्कृति, पर्यटन तथा नागरिक उड्डयन मन्त्रालयको नेतृत्वमा बनेको अध्ययन समितिले सातामा दुई दिन बिदा दिन सम्भव रहेको निष्कर्षसहितको प्रतिवेदन सरकारलाई बुझाएको हो।

सातामा २ दिन बिदा दिन मिल्ने वा नमिल्ने विषयमा संस्कृति, पर्यटन तथा नागरिक उड्डयन मन्त्रालय केही समय अगाडि अध्ययन कार्यदल बनाएको थियो।

मन्त्रालयले मन्त्रालयका सहसचिव कमलप्रसाद भट्टराईको संयोजकत्वमा अध्ययन समितिमा पर्यटन विभागका महानिर्देशक रुदसिंह तमाङ, नेपाल पर्यटन बोर्डका सिइओ डाक्टर धन्नजय रेग्मी, गृह मन्त्रालयका उपसचिव बासुदेब घिमिरेलगायत अर्थ र संघीय मामिला तथा सामान्य प्रसासन मन्त्रालयका प्रतिनिधि रहेका थिए।

उक्त समितिले विश्वका ८८ प्रतिशत देशमा २ दिन बिदा दिने प्रचलन रहेको र १२ प्रतिशत देशमा भने एक दिन सार्वजनिक बिदा दिने गरिएको विवरणसहित सातामा २ दिन बिदा दिने मिल्ने भन्दै रिपोर्ट बुझाएको छ।

समितिले विश्वका ८८ प्रतिशत देशमा २ दिन बिदा दिने प्रचलन रहेको र १२ प्रतिशत देशमा भने एक दिन सार्वजनिक बिदा दिने गरिएको विवरणसहित सातामा २ दिन बिदा दिने मिल्ने भन्दै रिपोर्ट बुझाएको छ। https://drive.google.com/file/d/1PdtbD20CNRQYS63NdeupeKiExAKu85un/preview

काठमाडौं । कोरोना भाइरसको महामारीसँगै बन्द भएका धार्मिक तथा पर्यटकीय क्षेत्र क्रमशः खुला हुँदैछन् । सोहीक्रममा आजबाट सदर चिडियाखाना खुला भएको छ । चिडियाखाना चैत ७ देखि बन्द थियो । स्वास्थ्य सुरक्षाका आवश्यक मापदण्ड पालना गरि चिडियाखाना खोलिएको हो । चिडियाखानामा प्रवेश गर्दा हरेक व्यक्तिले मास्क अनिवार्य लगाउनुपर्ने नियम छ । प्रवेश क्षेत्रमा स्यानिटाइजरको व्यवस्था गरिएको छ ।

भीडभाड व्यवस्थापन गर्न एकपटकमा बढीमा ७०० देखि ८०० व्यक्तिलाई मात्र प्रवेश अनुमति दिइने भएको छ । चिडियाखाना भित्र प्रवेश गरेको बढीमा डेढ घण्टाभित्र बाहिर निस्कनुपर्ने बताइएको छ । चिडियाखानाभित्र बसेर खान र वन्यजन्तुलाई खुवाउन तथा छुन पाइने छैन । बालबालिकालाई खेलाउन नपाइने समेत नियम छ । चिडियाखाना बिहान १० देखि बेलुका ५ बजेसम्म खुल्छ ।

उता, पशुपतिनाथ दर्शनको व्यवस्थापन समेत अहिले धमाधम भइरहेको छ । १ पुसबाट पशुपतिनाथ मन्दिरमा दर्शन गर्न सकिने भएको छ । हरेक वर्ष मार्गशीर्ष कृष्ण औँसीका दिन पशुपति मूल मन्दिर परिसरमा प्रदर्शनमा राखिने बहुमूल्य सामग्रीको प्रदर्शनी भने यो वर्ष नहुने भएको छ ।

बाला चतुर्दशीको भोलिपल्ट पशुपतिको पश्चिमढोकाअघि नागमणि, एकमुखे रुद्राक्ष, गोलोचन, दाहिने शङ्खलगायतका ऐतिहासिक, पुरातात्विक, धार्मिक र सांस्कृतिक दृष्टिले महत्वपूर्ण सामग्री प्रदर्शनमा राख्ने परम्परा छ ।

कोरोना महामारीका कारण मन्दिर भक्तजनका लागि बन्द रहेकाले नदेखाइने निर्णय भएको हो । मन्दिर खोल्ने अघिल्लो दिन मङ्सिर ३० गते पशुपतिमा क्षमापूजा गरिने भएको छ । त्यसपछि मन्दिर सर्वसाधारणका लागि खुल्नेछ ।

काठमाडौं । सदर चिडियाखाना सर्वसाधारणका लागि बिहिबारबाट खुला हुने भएको छ । कोरोना भाइरसको महामारी फैलिएसँगै चैत ७, २०७६ पछि चिडियाखाना बन्द रहेको छ । सरकारले लागू गरेको स्वास्थ्य मापदण्ड पूर्ण रुपमा पालना गर्दै चिडियाखाना खोल्न लागिएको चिडियाखानाले जनाएको छ ।

अनिवार्य मास्क लगाउने र भौतिक दूरी कायम गर्नुपर्ने नियम चिडियाखानामा बनाइएको छ । एक पटकमा ७ सयदेखि ८ सयजनासम्म मात्र दर्शकलाई चिडियाखाना भित्र प्रवेश दिने तयारी रहेको छ । भित्र प्रवेश गरेको दुईदेखि साढे दुई घण्टामा बाहिर निस्कि सक्नु पर्ने भएको छ ।

ई-सेवामार्फत बुधबार बेलुकाबाटै चिडियाखाना प्रवेशको अनलाइन टिकट लिन सकिने भएको छ । चिडियाखानामा १५० रुपैयाँको टिकट काट्नु पर्छ । विद्यार्थी र ज्येष्ठ नागरिकका लागि ९० रुपैयाँ तोकिएको छ ।४ देखि १२ वर्षसम्मका बालबालिकाको लागि भने टिकटको ५० रुपैयाँ छ ।

काठमाडौं । ११ चैत २०७६ पछि बन्द भएको पशुपतिनाथ मन्दिर अब दर्शनार्थीको दर्शनका लागि खुला हुने भएको छ । राष्ट्रिय समाचार समितिले पशुपति क्षेत्र विकास कोषलाई उदृत गर्दै जनाएअनुसार भौतिक दुरी कायम गरी स्वास्थ्य सुरक्षाका विधि अपनाएर मन्दिर खुला गर्ने निर्णय भएको हो ।

पुस १ गतेदेखि मन्दिर छिर्न चाहने भक्तजनले पालना गर्नुपर्ने नियमसम्बन्धी मापदण्डसमेत कोषले तयार पारेको कोषका सदस्यसचिव डा प्रदीप ढकालले जानकारी दिएका छन् । अब भक्तजनलाई एउटा ढोकाबाट प्रवेश गराई अर्कोबाट निकाल्ने गरी व्यवस्था मिलाइने भएको छ ।

विश्वभर फैलिएका वैदिक सनातन हिन्दू धर्मावलम्बीले ज्योतिर्लिङ्गको पनि ज्योतिर्लिङ्ग अर्थात् महाज्योतिर्लिङ्गका रुपमा आस्था राख्ने मन्दिर नौ महिनादेखि बन्द रहँदा भक्तजनले मन्दिरमा दर्शन गर्न पाएका छैनन् ।

कोरोना भाइरसको सङ्क्रमण बढ्न थालेपछि चैत ११ गते सरकारले बन्दाबन्दीको निर्णय गरेसँगै पशुपतिनाथ मन्दिर भक्तजनका लागि पूर्णरुपमा बन्द भएको हो । यस वर्ष साउनको सोमबारसमेत पशुपतिनाथ मन्दिरमा दर्शन गर्न नपाइएको भन्दै भक्तजनले गुनासो गर्दै आएका छन् । चैतपछि पशुपतिनाथको नित्यपूजा आरती भने जारी रहेको थियो ।

दोलखा । सुप्रसिद्ध भीमेश्वर मन्दिरका देवता भीमसेनलाई पसिना आएको छ । भीमसेनलाई पसिना आउँदा देशमा अनिष्ट वा शुभ नहुने धार्मिक मान्यता रहँदै आएको छ । भीमसेनलाई पसिना आएको यो १८ औं पटक हो ।

मंगलबार दिउँसो २ बजेदेखि भीमेश्वरको शिलामा निरन्तर पसिना आइरहेको छ । भीमेश्वर मन्दिर तथा पूजा व्यवस्थापन समितिका अध्यक्ष भरत श्रेष्ठले भीमेश्वरको शिलाको दायाँ बायाँ दुवै भागबाट पसिना आएको जानकारी दिनुभयो । दायाँ पट्टिबाट पसिना आउँदा राजापक्षलाई र बायाँपट्टिबाट पसिना आउँदा जनतालाई अनिष्ठ हुने धार्मिक मान्यता रहँदै आएको छ ।

यस अघि २०७६ फागुन ८ गते १७ औं पटक भीमसेनलाई पसिना आएको थियो । गत वर्ष सवा घण्टासम्म पसिना आउँदा देशमा कोरोना भाइरसको महामारी भित्रिएको जनविश्वास रहँदै आएको छ ।

गत चैत ११ गतेदेखि लकडाउन गरेर ११५ दिनपछि केही महिनाअघि नियमित पूजाको लागि खोलिएको मन्दिर एकहप्ता पछि पुन बन्द गरिए यता हालसम्म पनि सर्वसाधारणको लागि मन्दिर बन्द रहँदै आएको थियो ।

यसअघि शिलामा १७ औं पटक फागुन ८ मा आएको उहाँले जानकारी दिनुभयो । त्यसपछि लगत्तै कोरोना महामारीका कारण देशभरी लकडाउन भएको थियो । २०६२\०६३ को जनआन्दोलन अघि पनि शिलामा पसिना आउको थियो ।

त्यस्तै राजदरबार हत्याकाण्ड हुनुभन्दा डेढ महिनाअघि पनि पसिना आएको थियो । त्यस्तैगरि १९९० मा भूकम्प आउनुभन्दा अघि पनि शिलामा पसिना आएको बताइन्छ । मंगलबार पनि शिलाको दायाँ बायाँ दुवै भागबाट पसिना आइरहेको अध्यक्ष श्रेष्ठले बताउनुभयो ।

लकडाउन पछि नियमित पूजाको लागि खोलिएको मन्दीर एकहप्ता पछि पुन बन्द गरिएको थियो । अहिले सर्वसाधारणका लागि बन्द रहेको छ । तर पसिना आउन थालेपछि चलन अनुसार मन्दीर व्यवस्थापन तथा गुठियारहरुले र स्थानीयले पूजा गरिरहेका छन् ।

पसिना आएपछि क्षमा पूजाको लागि शिलामा आएको पसिना पुछ्ने चलन छ । त्यहाँ पसिना पुछिएको रुवा जिल्ला प्रशासन कार्यालयको रोहवरमा गृहमन्त्रालयमार्फत राष्ट्रपतिको कार्यालयमा पुर्‍याउने व्यवस्था गरिएको छ । यसअघि राजाका पालामा पसिना आउँदा राजदरबाट क्षमा पूजाको लागि पञ्चवली पठाउने प्रचलन थियो ।

काठमाडौं । आज तराईबासी नेपालीको ठूलो चाड छठको मूख्य दिन हो । प्रत्येक वर्ष कार्तिक शुक्ल षष्ठीका दिन मनाइने छठ पर्वको यस दिन साँझ अस्ताउँदो सूर्यको पूजा आराधना गरी अर्घ दिने प्रचलन रहेको छ । कार्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको यो पर्व बुधबारदेखि प्रारम्भ भएको हो ।

आज अस्ताउँदो सूर्य र भोलि उदाउँदो सूर्यलाई अर्घ दिएपछि छठ पर्व सकिन्छ । सूर्य पुराणअनुसार सर्वप्रथम अत्रिमुनिकी पत्नी अनुसूयाले छठ व्रत गरेकी थिइन् । फलस्वरूप उनले अटल सौभाग्य र पतिप्रेम प्राप्त गरिन् ।

त्यही बेलादेखि ‘छठ पर्व’ मनाउने परम्पराको शुरुआत भएको मान्यता छ ।
छठ पर्वमा व्रत गरे दुःख र दरिद्रताबाट मुक्ति पाइन्छ भन्ने जनविश्वास छ । यसमा झुप्पा–झुप्पा फलहरू चढाउँदा सूर्य देवता प्रसन्न भई व्रतालुका कुटुम्बसहित सबै सन्तानको भलो हुन्छ भन्ने मान्यता पाइन्छ ।

यस पर्वमा जो व्रत बस्न सक्दैन उसले अर्को व्रत गर्नेबाट व्रत गराउने गर्छन् । आर्थिक अभाव भएका मानिसहरु भिक्षा मागेरै भए पनि यो पर्व मनाउने प्रचलन छ ।

काठमाडौं । नेपालको तराईमा विशेष महत्वका साथ मनाईने पर्व छठको विधिवत शुरुवात भएको छ । घर तथा कुण्ड र पोखरीहरुको सरसफाइ गरि छठको शुरुवात गरिएको हो । यो वर्ष छठ अन्तर्गत आज नहायखाय मनाइन्छ । बिहिबार खरना, शुक्रबार सन्ध्या अर्घ्या र शनिबार छठको पारणा गर्ने गरी साइत जुराइएको छ ।

पञ्चमी तिथिका दिन बर्तालुले दिनभरि निराहार व्रत उपासना गरी राति सक्खर हालेर पकाइएको अरवा चामलको खिरमात्र इष्टदेवलाई चढाएर परिवारजनसहित खाने प्रचलन रहेको छ । यो विधि नै मिथिला भाषामा ‘खरना’ हो ।

छठको मूख्य दिन षष्टी तिथिमा निराहार व्रत बसेर साँझपख पवित्र जलाशयमा बनाइएको घाटमा स्नान गर्दै सूर्यदेवलाई अर्घ्य दिन्छन् । त्यस दिन ठकुवा, कसार, अन्य मिष्ठान्न परिकार, केरा, दहीसहित सूर्यलाई देखाउने प्रचलन छ ।

यो ‘सझुका अरख’ विधि हो । षष्ठीको रात सूर्यदेव र षष्ठीमाता (सूर्यदेवकी पत्नी)को आराधना गर्दै घाटमै रात बिताइन्छ । यो वर्ष भने तलाउ र पोखरीमा भन्दा घरमै छठ मनाउन सरकारले आह्वान गरेको छ । मूख्य तलाउ र पोखरी यो वर्ष बन्द रहनेछन् । मिथिलामा अन्तिम दिनको विधिलाई ‘भोरका अरख’ वा ‘पारन’ का रुपमा मनाइन्छ ।