Category: समाचार

सुर्खेत । नेपालमा कोरोना भाइरसको संक्रमणका कारण थप एक जनाको मृत्यु भएको छ । पश्चिम सुर्खेतमा आरडीटी नेगेटिभ आएका एक युवालाई क्वारेन्टाइनबाट घर पठाइएको थियो । तर, उनको घरमा बिहीबार बिहान मृत्यु भएको थियो । मृत्युपछि गरिएको पिसीआर परिक्षणको नतिजा भने पोजेटिभ पाइएको छ । पञ्चपुरी नगरपालिका-१ हाँसेका २० वर्षीय युवकलाई आरटीडी विधिको परीक्षणले भने नेगेटिभ देखाएको थियो ।

उनको स्वाबको रिपोर्ट शुक्रबार बिहान २ बजे आएको कर्णाली प्रदेश स्वास्थ्य निर्देशनालयले जनाएको छ । जेठ ७ मा उनी भारतबाट आएका थिए । त्यसपछि उनीसहितको टोलीलाई जनता क्वारेन्टाइनमा राखिएको थियो । मृतक युवकसँगै जनता माविको क्वारेन्टाइनमा ५४ जना रहेको प्रहरीले बताएको छ ।

उनीहरुको कोरोना परीक्षण गर्दा तीन जनालाई पोजेटिभ देखिएको थियो । अब नेपालमा कोरोनाका कारण मृत्यु हुने व्यक्तिको संख्या ११ पुगेको छ । पछिल्लो दिनमा भारतबाट आएका अधिकांश व्यक्तिमा कारोना पुष्टी भइरहेको छ ।

काठमाडौं । पछिल्लो २४ घण्टामा नेपालमा थप ३३४ जनामा कोरोना संक्रमणको पुष्टि भएको छ ।

देशका विभिन्न प्रयोगशालामा गरिएको परीक्षणका क्रममा ३३४ जनामा कोरोना भाइरसको संक्रमण पोजेटिभ देखिएको हो। योसँगै नेपालमा कोरोना संक्रमितको संख्या २६३४ पुगेको मन्त्रालयले बताएको छ ।

नेपालमा हालसम्म संक्रमितमध्ये २९० जना उपचारपछि निको भएका छन्। नेपालमा हालसम्म संक्रमण देखिएकामध्ये १० जनाको मृत्यु भएको छ।

काठमाडौं । नेपालमा कोरोना भाइरसको संक्रमणका कारण ९ औं व्यक्तिको ज्यान गएको छ । दोलखाका एक व्यक्तिको कोरोना संक्रमणका कारण ज्यान गएको स्वास्थ्य तथा जनसंख्या मन्त्रालयले पुष्टी गरेको हो ।

दोलखा भिमेश्वर नगरपालिका-२ का ७६ वर्षीय वृद्धको महाराजगन्जस्थित टिचिङ अस्पतालको गणेशमान भवनको आइसियूमा उपचार भइरहेको थियो। उनलाई काठमाडौंको सिनामंगलको केएमसी अस्पतालबाट जेठ १४ गते राति टिचिङ ल्याइएको थियो। उनको न्यूरो सर्जरी समेत गरिएको थियो।

दोलखामा ७६ वर्षिय पुरुषको कोरोनाले मृत्यु भएको हो । यसअघि, सिन्धुपाल्चोक, गुल्मी, बाँके, दैलेख, ललितपुरमा कोरोनाका कारण मानिसहरुको ज्यान गएको थियो ।

काठमाडौं । नेपालमा थप २०१ जनामा कोरोना संक्रमण पुष्टि भएको छ । देशका विभिन्न प्रयोगशालामा गरिएको परीक्षणमा थप २०१ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जानकारी दिएको छ ।

योसँगै नेपालमा कोरोना संक्रमितको संख्या २३०० पुगेको मन्त्रालयले बताएको छ ।

काठमाडौं। स्वास्थ्य तथा जनसङख्यामन्त्री भानुभक्त ढकालले कोरोना सङ्क्रमितको सङ्ख्या दुई हजार नाघेकाले अब अक्सिजन र भेन्टिलेटर आवश्यक पर्नेलाई मात्र अस्पतालमा भर्ना गरिने बताएका छन् ।

अन्तर्राष्ट्रिय बौद्ध संस्था चु जी फाउण्डेशनको पहलमा हेल्थ इन्भ्याइरोन्मेन्ट एण्ड क्याइमेट एक्सन फाउण्डेशन हेकाफले आज उपलब्ध गराएको स्वास्थ्य सामग्री ग्रहण गर्दै मन्त्री ढकालले सामान्यावस्थाका बिरामीलाई उपचारका लागि आइसोलेसनकक्ष स्थापना गरी त्यहाँ राखिने बताए ।

उनले अन्तर्राष्ट्रिय अभ्यास र अध्ययनमा सङ्क्रमित भएकामध्ये ८० प्रतिशत बिरामी सामान्यावस्थाका हुने भएकाले गम्भीर अवस्थाका बिरामीलाई अस्पताल र उपचारको अभाव नहोस् भन्नाका लागि अब नयाँ नीतिमा जाने स्पष्ट गरे ।

उनले मुलुकमा १५ हजारसम्म सङ्क्रमित हुन सक्ने आकलनका आधारमा त्यसको पाँच प्रतिशतका लागि भेन्टिलेटरसहितको अस्पतालमा राख्न सकिने प्रबन्धमा सरकार लागेको जानकारी दिँदै स्वास्थ्य सामग्रीको अभाव भएका बेला प्राप्त सहयोगलाई अतिआवश्यक ठाउँ हेरेर पारदर्शीरूपमा वितरण गरिने बताए ।
Dish_Home

फाउण्डेशनका अध्यक्ष महेश नकर्मीले ३० थान भेन्टिलेटरसहित एक करोड ७० लाख मूल्य बराबरको सामान उपब्ध गराइएको जानकारी दिँदै कोरोना उपचार र रोकथामका क्रममा सरकारसँग मिलेर आगामी दिनमा पनि निरन्तर सहयोग गरिने विश्वास दिलाए । सन् १९६६ मा बौद्ध गुरुमा चेङ येनको सक्रियतामा स्थापित फाउण्डेशनको संयुक्त राज्य अमेरिका, चीन, क्यानडासहित ६३ मुलुकमा शाखा स्थापित छन् ।

काठमाडौं । काठमाडौं मेडिकल कलेजमा कार्यरत ४ जना स्वास्थ्यकर्मीमा कोरोना संक्रमण पुष्टि भएको छ ।

स्वास्थ्य तथा जनसंख्या मन्त्रालयका प्रवक्ता डा विकास देवकोटाले मंगलबारको नियमित प्रेस ब्रिफिङमा सो जानकारी दिएका हुन् ।

संक्रमितहरूमा तीन जना महिला र एकजना पुरुष छन्।

महिलाहरू २४ देखि ३२ वर्ष उमेर समूहका छन् भने एक जना २८ वर्षका पुरूष हुन्।

यसैगरी भक्तपुरमा पनि एक जना कोरोना संक्रमित थपिएका छन्। भक्तपुरको चाँगुनारायण नगरपालिकामा संक्रमित थपिएका हुन्।

काठमाडौं । पछिल्लो २४ घण्टामा नेपालमा मंगलबार थप २ सय ८८ जनामा कोरोना संक्रमणको पुष्टि भएको छ ।

देशका विभिन्न प्रयोगशालामा गरिएको परीक्षणका क्रममा थप २ सय ८८ जनामा कोरोना भाइरसको संक्रमण पोजेटिभ देखिएको हो। यो एकै दिन थपिएका संक्रमितको अहिलेसम्मकै उच्च संख्या हो।

यससँगै नेपालमा कोरोना संक्रमितको संख्या २०९९ पुगेको छ। स्वास्थ्य मन्त्रालयका अनुसार २६६ जना निको भएर घर फर्किएका छन् भने ८ जनाको कोरोनाका कारण मृत्यु भएको छ।

काठमाडौं । नेपालमा कोरोना संक्रमण तीव्र गतिमा फैलिएपछि सरकारले अब बिरामीलाई मात्रै अस्पताल भर्ना गराउने भएको छ।

लक्षण नै नदेखिए कोरोना संक्रमितलाई अस्पताल नलगी क्वारेन्टाइनमै राख्ने तयारी सरकारले गरेको हो। केही दिनयता संक्रमितको दर २ सयभन्दा माथिले उकालो लाग्न थालेपछि सरकारले अब नयाँ विकल्प सोच्न थालेको हो।

अहिलेसम्म कोरोनाको लक्षण देखिएको भनेको स्वासप्रस्वासमा समस्या आउने, ज्वरो आउने, छाती दुख्ने, शरीर थकित महशुस हुने, स्वाद र गन्ध थाहा नपाउने आदि हो।

तर नेपालमा केही संक्रमितमा वान्ता गर्ने समस्या पनि देखिएको छ। अब यस्ता लक्षण नभएका र सामान्य अवस्थामा रहेका संक्रमितलाई घरमै आइसोलेसनमा राख्ने सरकारले तयारी गरेको हो।

देशभरका अस्पतालमा १६ सय संक्रमित मात्रै अट्ने पूर्वाधार तयार पारिएको छ। तर सोमबार कोरोना संक्रमितको संख्या २३९ ले बढेर १८११ पुगिसकेको छ।

यस्तो अवस्थामा व्यवस्थापनमा चुनौती देखेपछि सरकारले लक्षण नै नदेखिएका संक्रमितलाई क्वारेन्टाइनमै राख्ने निर्णय लिन लागेको हो।

स्वास्थ्य मन्त्रालयले एक महिनाअघि नै संक्रमित संख्यालाई मध्यनजर गर्दै संक्रमितको उपचार कसरी गर्ने भनेर कार्यदिशा तय गरेको थियो।

सो कार्यदिशामा संक्रमित संख्यालाई चार वटा समूहमा वर्गीकरण गरी कसरी उपचार गर्ने भन्ने उल्लेख छ।

जसअनुसार सुरूका २ हजार संक्रमित सबैलाई अस्पतालमै भर्ना गरेर उपचार गर्ने भन्ने उल्लेख छ।

नेपालगन्ज । बाँकेको राप्ती सोनारी गाउँपालिका–२ ठुरिया जंगलमा भएको सवारी दुर्घटनामा ज्यान गुमाएका सबै नेपाली नागरिकको पहिचान भएको छ । गतराती १२ बजेतिर सडक किनारमा रोकिराखेको ट्रकमा यात्रुबाहक हायस गाडी ठोक्किदा भयानक दूर्घटना भएको थियो । सवारी दुर्घटनामा ज्यान गुमाएका १२ जनाकै सनाखत भएको प्रहरीले जानकारी दिएको छ ।

प्रहरीका अनुसार मृत्यु हुनेमा तिमबहादुर ओली, देउविर विक, बुद्धिराम विक, भिबहादुर विक, नरेन्द्र विक, मोहनचन्द्र विक, रामकुमार पुन, पूर्णबहादुर पुन, सीता पुन, दानबहादुर खड्का र पवन भण्डारी छन् । उनीहरु अधिकांश रोल्पा र दाङका बासिन्दा हुन् । पूर्वपश्चिम राजमार्ग अन्तरगत बाँकेको राप्ती सोनारी गाउँपालिका–२, ठुरिया जंगलमा फोर्स गाडी दुर्घटना भएको थियो ।

भारतको रुपैडिया नाकाबाट घर जान नेपाल छिरेका उनीहरु नेपालगन्ज हुँदै सल्यानतर्फ लागेका थिए । ना ५ ख ५९९५ नम्बरको गाडी रोकिराखेको बा ४ ख ९०६४ नम्बरको ट्रकमा ठोकिएको हो । घटनामा २० जना घाइते भएका छन् । यसैबीच, गृहमन्त्री रामबहादुर थापाले दुर्घटनाको छानविन गर्न स्थानीय प्रशासनलाई निर्देशन दिएका छन् । उनले दुर्घटना प्रति दुख समेत व्यक्त गरेका छन् ।

काठमाडौं । १९ जेठ, रातको ९ बजे, जनताका प्यारा राजालाई संसारबाट चुडाउने दिनको रुपमा धेरै नेपालीले कालो दिनका रुपमा आजको दिनलाई सम्झना गर्छन् । २०५८ सालमा भएको यो त्रासदीपूर्ण घटना भएको आज १९ वर्ष पुरा भएको छ । राजदरवारमा भएको यो हत्याकाण्ड नेपालमा राजतन्त्र अन्त्यको पहिलो घुटकिला भएको धेरैको धारणा छ । त्यसपछि राज ज्ञानेन्द्रले सत्ता आफ्नो हातमा लिएको भएपनि आफ्नो महत्वकांक्षी व्यवहारका कारणले उनले गद्दी मात्र गुमाएनन्, पुर्खाको विरासतमा समेत पूर्णबिन्दु लगाइदिए ।

राजा वीरेन्द्रको वंशनाश भएको यस दिन आफ्ना प्यारा शासकलाई सम्झेर धेरैले सामाजिक संजालसहित विभिन्न माध्यमबाट घटनाबारे सत्यतथ्य बाहिर ल्याउन माग गरेका छन् । तत्कालिन उच्चस्तरीय छानविन समितिले तत्कालिन यूवराज दीपेन्द्रको सनकमा घटना भएको प्रतिवेदन दिएको थियो ।

दीपेन्द्रसमेत यही घटनामा मारिएका थिए । उनलाई दुई दिनका लागि राजा घोषणा गरिएको थियो । तर, यो घटना दीपेन्द्रबाट घटिएको भने आम मानिस पत्याउन तयार छैनन् । सोहीकारण हरेक पुण्य तिथिमा राजाको वंशनास गर्ने गरी भएको घटनाको यथार्थता पत्ता लगाउन माग हुने गरेको छ ।