Category: समाचार

काठमाडौं । मिर्गौला प्रत्यारोपणका लागि अस्पताल भर्ना भएको १० दिनपछि प्रधानमन्त्री केपी शर्मा ओली वालुवाटार फिर्ता भएका छन् । उनलाई त्रिवि शिक्षण अस्पतालले शुक्रबार डिस्चार्ज गरेको हो ।

अब उनले बालुवाटारमै आराम गर्दा हुने भएको छ । शुक्रबार उनी डिस्चार्ज हुँदा सहयोगीले साथ दिएर उभिएका थिए भने संचारमाध्यमलाई हात हल्लाएर अभिवादन गरेका थिए ।

अस्पतालबाट बाहिरिने क्रममा उनलाई चिकित्सकहरुले समाएर गाडीसम्म ल्याएका थिए । उनी मुस्कुराएका थिए । चिकित्सकहरुका अनुसार बालुवाटार फर्किए पनि प्रधानमन्त्री चिकित्सकको प्रत्यक्ष निगरानीमा रहनु पर्ने भएको छ ।

एक महिनासम्म उनको परीक्षण जारी रहने छ । नियमित भेटघाट र बाहिर हिँडडुल गर्न भने अझै केही समय पाउने छैनन् ।

संक्रमणको डरले चिकित्सकले यस्तो सुझाव दिएका हुन् । चिकित्सकहरुका अनुसार मिर्गौला प्रत्यारोपण गरेको व्यक्तिलाई तीन महिनासम्म संक्रमणको जोखिम रहन्छ । प्रधानमन्त्री १९ फागुनमा अस्पताल भर्ना भएका हुन् ।

काठमाडौं । सरकारले बिहीबार कोरोनाविरुद्ध भइरहेको तयारी सार्वजनिक गरेको छ । यसअनुसार मुलुक भित्र जुन स्थानमा कोरोना देखिन्छ, त्यो क्षेत्रलाई तत्काल बन्द गर्ने योजना रहेको छ ।

स्वास्थ्य तथा जनसंख्या मन्त्रालयमा प्रवक्ता डा. विकास देवकोटाले सार्वजनिक गरेको योजना अनुसार देशको कुनै क्षेत्रमा कोरोना भाइरस को संक्रमण देखिएमा निश्चित क्षेत्र तोकेर ‘लक डाउन’ गरिने भएको छ ।

सो क्षेत्रमा अत्यावश्यकबाहेक सबै गतिविधि बन्द गरिने भएको छ । अत्यावश्यकबाहेक अरु बन्द गर्ने तथा पकेट एरिया लक डाउन गर्ने योजना बनाइएको उनले जानकारी दिए ।

कोरोना देखिएमा उपकरण र जनशक्ति एकत्रित गरेर परिचालन गरिने भएको छ ।

आवश्यकता अनुसार फिल्ड र मोबाइल अस्पताल परिचालनको समेत तयारी गरिएको छ । विश्व स्वास्थ्य संगठनको मापदण्ड अनुसार नेपालले समेत कोरोनाविरुद्ध तयारी गरिरहेको मन्त्रालयको भनाई छ ।

चीनको वुहानबाट सुरु भएको कोरोना भाइरस अहिले संसारका १ सय २० भन्दा धेरै देशमा फैलिसकेको छ ।

नेपालमा एक जनामा पोजेटिभ पाइएन पनि उनी निको भएर घर फर्किसकेका छन् । त्यसबाहेक अहिलेसम्म पोजिटिभ रिजल्ट देखिएको छैन ।

तर,  संक्रमण जुनसुकै बेला देखिन सक्ने भन्दै सचेतना भने बढाइएको छ ।

नेपालले पनि पर्यटकको भिसा बन्द गर्नेदेखि संक्रमित देशबाट आएका नागरिकले क्वारेन्टाइनमा बस्नु पर्ने सम्मका निर्णय गरेको छ । नेपालले भारत र चीनका ४३ वटा सीमा नाकामा सम्बन्धित स्थानीय तहले स्वास्थ्यकर्मी परिचालन गरेका छन् ।

नेपालमा अहिलेसम्म साढे ४ सयको परीक्षण भएके छ ।

अहिले टेकुस्थित शुक्रराज ट्रपिकल तथा सरुवा रोथग अस्पतालमा ४ र पाटन अस्पतालमा २ जना गरी ६ जना आइसोलेसनमा रहेका छन् । एक जनालाई बुटवलमा आइसोलेसनमा राखिएको छ ।

काठमाडौं । बुधबार विश्व स्वास्थ्य संगठनले कोरोना भाइरसलाई महामारी घोषणा गर्यो । यस दौरान संगठनले केवल आतंकित हुनुमात्र नपर्ने भन्दै यो रोग नियन्त्रण समेत गर्न सम्भव रहेको उल्लेख गरेको छ ।

तर, यसका लागि हरेक मुलुकले उत्तिकै सचेतना र जागरुकता अपनाउनु पर्ने संगठनको भनाई छ । यो भाइरस चीनमा करीव नियन्त्रण उन्मुख छ । तर, अमेरिका र यूरोपमा  यो भाइरसको संक्रमण डरलाग्दो गरी फैलिएको छ ।

संगठनका अनुसार कोरोना भाइरसको संक्रमण १ सय २३ मुलुकमा फैलिएको छ । यसले बुुधबारसम्म ४ हजार ६ सय २७ जनाको ज्यान समेत लिइसकेको छ ।

विश्वभर संक्रमितको संख्या १ लाख २६ हजार रहेकोमा ६८ हजार भन्दा बढि निको भएर घर फर्किएका कारण यो भाइरसको नियन्त्रण सम्भव रहेको संगठनको भनाई छ ।

यसका लागि हरेक सरकारको प्रतिवद्धताको आवश्यकता संगठनले उल्लेख गरेको छ । ५३ हजार २ सय २७ जनाको उपचार भइरहेको छ ।

संगठनका अनुसार ५ हजार ९ सय ४४ जनाको अवस्था गम्भीर रहेको पाइएको छ । चीनमा ३१ सय ६९ जनाको मृत्यु भइसकेको छ । इटालीमा ८ सय २७ जनाको ज्यान गएको छ ।

इरानमा ३ सय ५४, दक्षिण कोरियामा ६०, स्पेनमा ५५, फ्रान्समा ४८, अमेरिकामा ३८, जापानमा १५, बेलायतमा ८, नेदरल्याण्डमा ५, स्विटजरल्याण्डमा ४, जर्मनी र बेल्जियममा ३\३ जनाको मृत्यु भएको तथ्यांक छ ।

काठमाडौं । नेपालमा कोरोना भाइरस फैलन नदिन सबै राजनीतिक दलले प्रतिवद्धता व्यक्त गरेका छन् । दलका नेता तथा प्रतिनिधिले सरकारलाई सबै प्रकारको सहयोग गर्ने प्रतिवद्धता व्यक्त गरेका हुन् ।

बुधबार उपप्रधानमन्त्री ईश्वर पोखरेलको संयोजकत्वमा रहेको सरकारी संयन्त्रले सर्वदलीय बैठक आयोजना गरेको थियो ।

सर्वदलीय बैठकमा पूर्वप्रधानमन्त्री तथा नेकपा अध्यक्ष पुष्पकमल दाहाल प्रचण्ड, मन्त्रिपरिषदका पूर्वअध्यक्ष खिलराज रेग्मीलगायतले कोरोनाविरुद्ध सरकारी तवरबाट भएको तयारीको प्रशंसा गरेका छन् ।

उनीहरुले अझै पनि सूचना प्रवाह र भविष्यमा आइपर्ने संकट समाधानमा सरकारको पहल चुस्त हुनुपर्नेमा भने जोड दिएका छन् । दलका नेतारुले तयारीको काममा ढिलासुस्ती नगर्न सरकारको ध्यानाकर्षण गराएका हुन् ।

बैठकमा प्रमुख विपक्षी नेपाली कांग्रेसका नेताहरुले भने सरकारको तयारीप्रति असन्तुष्टी व्यक्त गरे । बैठकमा पूर्वप्रधानमन्त्रीहरु झलनाथ खनाल र माधवकुमार नेपालको समेत उपस्थिति थियो । उद्दपी उनीहरुले भने धारणा राखेनन् ।

कांग्रेसको तर्फबाट पूर्वस्वास्थ्यमन्त्री गगन थापा उपस्थित थिए । उनले अहिलेसम्म भएका काम ठिकै रहेको भएपनि भोली संक्रमण आइहाल्यो भने त्यसबाट जुध्न के तयारी छ भन्नेबारे प्रश्न गरेका थिए । बैठकमा नेताहरुले कोरोनाबाट मुलुकको अर्थतन्त्रमा हुने क्षतिको समेत अध्ययन गर्न सुझाव दिएका थिए ।

उपप्रधानमन्त्री पोखरेलले सरकारले कोरोना विरुद्ध लड्न कुनै कसुर बाँकि नराख्ने बताएका छन् । उक्त अवसरमा विभागीय मन्त्रीहरुले आफ्नो मन्त्तालयबाट भइरहेका तयारीबारे ब्रिफ्रिंग गरेका थिए ।

सरकारले कोरोनाविरुद्धको लडाइमा सबै राजनीतिक दल र जनताबाट समर्थन लिन सर्वदलीय बैठक आयोजना गरेको पोखरेलको भनाई थियो ।

काठमाडौं । डिसेम्बर २०१९ बाट चीनको वुहानमा उत्पत्ति भएको कोरोना भाइरसले संसारभर ३ हजार ६ सयको ज्यान गएको छ । यसमध्ये ठूलो संख्या चीनमा रहेको छ ।

तर, पछिल्ला दिनहरुमा कोरोना विरुद्ध चीनले उल्लेख्य सफलता हात पार्दा नयाँ संक्रमित र मृत्युको संख्यामा कमी आएको छ ।

दुई महिना कै अवधिमा कोरोना भाइरसको संक्रमण १ सय ३ देशमा फैलिएको छ। विश्व स्वास्थ्य संगठनले शनिबार यस्तो जानकारी दिएको छ ।

संगठनका अनुसार अहिले चीनमा संक्रमण क्रमशः घटिरहेको छ । तर, इरान र इटाली भने सबैभन्दा बण्ी प्रभावित भइरहेका छन् ।

चीनमा मात्र मृत्यु हुनेको संख्या ३ हजार ९७ जना रहेको छ । चीनमा ८० हजार ६ सय ९६ जना मानिसमा यसको संक्रमण फैलिएको थियो ।

५७ हजार ८३ जना संक्रमित भने उपचार पछि घर फर्किएका छन् । चीनपछि इटालीमा इटालीमा ५ हजार ८ सय ८३ जनामा सक्रमण देखिएको छ ।

यस मुलुकमा शनिबार मात्रै थप ३६ जनाको मृत्यु भएको छ । यहाँ मृत्यु हुनेको कूल संख्या २ सय ३३ पुगेको छ। इरानमा ५ हजार ८ सय २३ जनामा संक्रमण हुँदा १४५ जनाले ज्यान गुमाएका छन् ।

त्यहाँ ५ हजार ८ सय २३ जना संक्रमित भेटिएको जनाइएको छ। दक्षिण कोरियामा ५० जनाको ज्यान गएको छ । यहाँ सात हजार १ सय २४ जनामा संक्रमण पुष्टी भएको विश्व स्वास्थ्य संगठनले जनाएको छ ।

चीनले करीव करीव नियन्त्रणमा ल्याइसकेको यो रोगको संक्रमणले अब युरोप र एसियाका अन्य मुलुकमा नराम्रोसँग प्रभाव जमाइरहेको छ ।

इटालीपछि पछिल्लो समय फ्रान्स जर्मनी, स्पेन, बेलायत बेल्जियममा केरोनाको फैलावट डरलाग्दो देखिएको छ । जापानमा ६ जनाको ज्यान गएको छ । अमेरिकामा कोरोनाकै कारण १९ जनाले ज्यान गुमाइसकेका छन् । पछिल्लो २४ घण्टामा १ सय ६ जनाको निधन भएको छ ।

काठमाडौं । मिर्गौला प्रत्यारोपण गरेका प्रधानमन्त्री प्रधानमन्त्री केपी ओलीले आज चौथो दिनबाट खाना खान थालेका छन् ।

त्रिभुवन विश्वविद्यालय शिक्षण अस्पतालका अनुसार प्रधानमन्त्रीको स्वास्थ्यमा उल्लेख्य सुधार भइरहेको छ ।

प्रधानमन्त्रीको २१ फागुनमा मिर्गौला प्रत्यारोपण भएको हो । शनिबार उनलाई पहिलो पटक नर्मल खाना दिइएको अस्पतालले जानकारी दिएको छ ।

त्रिभुवन विश्वविद्यालय शिक्षण अस्पतालका कार्यकारी निर्देशक प्रा.डा. प्रेमकृष्ण खड्गाका अनुसार प्रधानमन्त्रीको स्वास्थ्यस्थितिमा राम्रो सुधार भइरहेको छ ।

प्रधानमन्त्री ओलीलाई सामान्य हिँडडुल गराउने र फिजियोथेरापीको काम समेत भइरहेको उनले जानकारी दिएका छन् ।

प्रधानमन्त्रीका भाइटल तथा ल्याब सूचक सामान्य अवस्थामा रहेको अस्पतालको भनाई छ । उता, प्रधानमन्त्रीलाई मिर्गौला दिएकी भान्जी समीक्षा संग्रौलाको स्वास्थ्यमासमेत सुधार भइरहेको अस्पतालले जनाएको छ । उनको पनि सबै भाइटल र ल्याब सूचक सामान्य अवस्थामा छन्।

काठमाडौं । विश्वभर त्रास फैलाइरहेको कोरोना भाइरसबारे नेपालमा भ्रम छरिएको भन्दै सरकारले त्यसका पछाडी नलाग्ने नागरिकलाई आग्रह गरेको छ । तर, गृहले सचेत भने रहने आग्रह गरेको छ ।

विश्व स्वास्थ्य संगठनले नेपाललाई उच्च जोखिम भएको मुलुकका रुपमा राखेको छ । गृह मन्त्रालयले शनिबार विज्ञप्ती जारी गर्दै कोरोनाभाइरसबारे उत्पन्न हल्ला र प्रचारबाजीमा भने विश्वास नगर्न नागरिकलाई आग्रह गरेको हो ।

कोरोनाबारे भ्रमपूर्ण समाचार आइरहेको गृहको भनाई छ । हालसम्म नेपालमा कोभिड १९ संक्रमण भएका व्यक्तिहरू पत्ता नलागेको र यसको प्रसार समुदायमा भएको अवस्था समेत नरहेको गृहले जनाएको छ ।

यस सम्बन्धमा उत्पन्न गरिएका विभिन्न प्रकारका हल्ला र प्रचारबाजीका पछाडि नलाग्न मन्त्रालयले अनुरोध गरेको छ ।

कोरोनाबारे अनावश्यक भ्रम फैलाएर उपभोग्य वस्तु कालो बजारी नगर्न समेत गृहले सचेत बनाएको छ ।

कहीँकतै त्यस्तो भेटिए सम्बन्धित निकायमा खबर गर्न समेत गृहले अनुरोध गरेको छ । बढी भीडभाड हुने स्थानमा नजान र स्वास्थ्यको आफै सचेतना अपनाउन मन्त्रालयले आग्रह गरेको छ ।