Category: समाचार

काठमाडौं । कोरोना भाइरसको संक्रमण बढ्ने डर नेपालमा छ । यसले बजारमा अनावश्यक त्रास पनि फैलिएको छ । यसैसन्दर्भमा भारतले अत्यावश्यक औषधिको निर्यात रोकेको समाचार सार्वजनिक भयो ।

त्यसपछि बजारमा उपभोक्ताले औषधिसमेत अतिरिक्त किन्न थाले । त्यसपछि औषधि व्यवसायीले पत्रकार सम्मेलन नै गरेर त्यसो नगर्न सुझाव दिन परेको छ ।

नेपाल औषधि उत्पादक संघका अनुसार कोरोना भाइरस विश्‍वव्यापी बनिरहेका बेला आउन सक्ने सम्भावित संकटका क्रममा नेपालमा औषधि अभाव हुन दिइने छैन ।

नेपालमा जस्तो सुकै परिस्थिति आएपनि तीन महिनासम्म पुग्ने औषधि स्टकमा रहेको छ ।

त्यसपछी पनि औषधि उत्पादन गर्ने कक्चा पदार्थ पर्याप्त रहेको संघले उल्लेख गरेको छ ।

संघका महासचिव विप्लव अधिकारीका अनुसार भूकम्प र नाकाबन्दीका समयमा समेत अभाव नभएको औषधि अहिले होला की भनेर चिन्ता नलिन आग्रह गरे ।

नेपालमा एलोपेथिक औषधिका ६२ उद्योग सञ्‍चालनमा छन् । ४२ वटा उद्योग निर्माणाधीन अवस्थामा छन् ।

भारतले समेत नेपालमा निर्यात नरोक्ने बताइसकेको छ । यसअघि भारतले २६ प्रकारका औषधि र कच्चा पदार्थको निर्यातमा रोक लगाउने निर्णय गरेको थियो ।

तर, ती औषधि नेपालमा समेत उत्पादन सम्भव भएका औषधि हुन् ।

अहिले तीन महिनासम्मको सामान्य बजारका लागि आवश्यक औषधि, कच्चा पदार्थ, सहायक कच्चा पदार्थ र प्याकिङ म्याटेरिलय मौज्दात रहेको संघले उल्लेख गरेको छ ।

सरकारले भने बिपदमा मात्र औषधिको महत्व बुझ्ने गरेको भन्दै संघले गुनासो समेत गरेको छ।

रोम । चीनबाट शुरु भएको कोरोना भाइरसको संक्रमण थप तीन मुलुकमा फैलिएको छ । विश्व स्वास्थ्य संगठनका अनुसार बोस्निया हर्जगोभिना, स्लोभानिया र दक्षिण अफ्रिकामामा यसको पुष्टी भएको छ ।

यससँगै विश्वका ९० भन्दा बढी मुलुकमा कोरोना भाइरसको संक्रमण फैलिएको छ ।

बिहीबार इटालीमा मात्र एकै दिन ४१ जनाको मृत्यु भएको पुष्टी इटाली सरकारले गरेको छ । इटालीमा कोरोनाले ज्यान लिनेको संख्या अब १४८ पुगेको छ।

कोरोना भाइरसबाट चीनबाहिर सबैभन्दा ठूलो क्षति इटालीमा भएको छ ।

संसारभर हालसम्म ३ हजार २ सय जनाको कोरोना भाइरसको संक्रमणबाट मृत्यु भइसकेको छ ।

९५ हजार मानिसमा यसको संक्रमण पुष्टी भएको छ । इटालीका सम्पूर्ण राज्यमा संक्रमण फैलिसकेको छ । इटालीले विद्यालय र कलेजहरु बन्द गरिसकेको छ ।

बिहीबार बेलायतमा पनि एक जनाको ज्यान गएको संचारमाध्यमले लेखेका छन् ।

पछिल्लो समय चीनमा यस रोगको संक्रमणबाट मर्नेको संख्यामा उल्लेख्य कमी आउँदा यूरोपमा भने तिब्र रुपमा फैलिएको छ ।

काठमाडौं । अब नेपाल र भारतको सीमामा समेत कोरोनाको चेकजाँच हुने भएको छ । कोरोना भाइरसको संक्रमण भारतमा देखिएको छ ।

भारतमा बिहीबारसम्म ३० जनामा संक्रमण पुष्टी भइसकेको छ ।

यसै सन्दर्भमा सरकारको उच्चस्तरीय संयन्त्रले नेपाल-भारतका ३७ सीमा नाकामा कोरोना चेकजाँच कडा गर्ने निर्णय गरेको हो ।

यसअघि चीनसँगको नाकामा मात्र यस्तो चेकजाँच हुने गरेको थियो । रक्षामन्त्री ईश्वर पोखरेलको नेतृत्वमा रहेको उच्चस्तरीय समितिको बैठक बिहीबार बसेको थियो ।

बैठकले त्रिभुवन विमानस्थलमा भइरहेको चेकजाँचलाई व्यवस्थित बनाउने निर्णय समेत गरेको छ ।

बढी मानिस आवत जावत हुने नेपाल र भारतका ३७ वटा नाकामा समेत स्वास्थ्य टोली पठाएर चेकजाँच गर्ने निर्णय यस संयन्त्रले गरेको हो । प्रदेशहरुमा समेत स्वास्थ्य टोली खटाउने निर्ण भएको छ ।

गोरखा । गोरखाको धार्चे गाउँपालिकामा जनप्रतिनिधि र कर्मचारी सवार जीप दुर्घटनामा परी वडा सचिवको मृत्यु भएको छ । दुर्घटनामा परी गाउँपालिका उपाध्यक्षसहित ७ जना घाइते भएको प्रहरीले जनाएको छ ।

यो टोली अपांगता परिचयपत्र वितरण गर्न आरूघाटबाट काशीगाउँतर्फ जाँदै गरेको थियो ।

जीपमा जनप्रतिनिधि र कर्मचारी चढेका थिए । बा १ च ५५०५ नम्बरको जीप बुधबार राति दुर्घटनामा परेको प्रहरीले जानकारी दिएको छ ।

दुर्घटनामा धार्चे गाउँपालिका–६ का सचिव किरण रिमालको ज्यान गएको हो ।

गाउँपालिकाकी उपाध्यक्ष फूलमाया गुरुङ, धार्चे गाउँपालिका–५ का शर्मिला गुरुङ, निशा गुरुङ, केरौजाका बालचन्द्र गुरुङ, लाप्राकका धनबहादुर गुरुङ, माछाखोलाका केयरसि‌ंह गुरुङ र काठमाडौंका सुरज नेपाल घाइते छन् ।

जीप सडकबाट २ सय मिटर तल झरेको छ ।

हेटौडा । मकवानपुरमा बुधबार साँझ भएको बस दुर्घटनामा चार जनाको ज्यान गएको छ । मकवानपुरको गढी गाउँपालिका–२, गौरी भञ्ज्याङमा बुधबार बेलुका जन्ती बोकेको बस दुर्घटनामा परेको हो ।

दुर्घटनामा ४ जनाको ज्यान गएको थियो । त्यसमध्ये ३ जनाको सनाखत भएको प्रहरीले जनाएको छ ।

जिल्ला प्रहरी कार्यालय, मकवानपुरका अनुसार, घटनामा गढी गाउँपालिका–२, गौरीभञ्ज्याङका ३५ वर्षीय सोमबहादुर रुम्बा, २८ वर्षीय सोम बहादुर मोक्तान र गढी गाउँपालिका–७ का २४ वर्षीय सुरज लोको मृत्यु भएको छ ।

अर्का एक युवकको भने सनाखत भएको छैन । जीतपुर भञ्ज्याङबाट सुकौरातर्फ जन्ती लिएर जाँदै गरेको ना ३ ख ३५५६ नम्बरको बस दुर्घटनामा परेको थियो ।

३ जनाको घटनास्थलमा र एक जनाको भने उपचारका क्रममा कलेज अफ मेडिकल साइन्स अस्पतालमा मृत्यु भएको हो । दुर्घटनामा २६ जना घाइते भएका छन् ।

काठमाडौं । बुधबार देशभर सडक दुर्घटनाका खबर आए । दुर्घटनामा परी आधा दर्जनको ज्यान गएको छ भने दर्जनौं मानिस घाइते भएका छन् । सुर्खेतको गल्छेनामा बुधबार जीप दुर्घटना भयो ।

यस दुर्घटनामा तीन जनाको मृत्यु भएको छ । चार जना घाइते भएका छन् । प्रहरीका अनुसार बाँकेको वैजनाथ गाउँपालिका–३ का ४२ वर्षीय खड्गबहादुर बीसी, उनकी ३९ वर्षीया श्रीमती गोमा बीसी र सुर्खेत घर भएका ५० वर्षीय देबबहादुर खड्काको ज्यान गएको हो ।

दैलेखको धरमपोखराबाट सुर्खेततर्फ आउँदै गरेको कर्णाली प्रदेश ०२–००१ ज ०००७ नम्बरको जीप वीरेनद्रनगर नगरपालिका–१५ राउटे गल्छेनामा दुर्घटनामा परेको थियो ।

जीप सडकबाट ४ सय मिटर तल खसेको थियो ।

सिराहामा दुई वटा मोटरसाइकल ठक्कर खादा सडक दुर्घटना भएको छ । सडकमा पछारिएका युवकलाई बसले किचेको थियो । यस घटनामा एक जनाको ज्यान गएको छ ।

पूर्वपश्चिम् राजमार्ग अन्तर्गत गोलबजार,४ स्थित सडक खण्डमा दुर्घटना भएको हो ।

पूर्वबाट पश्चिम तर्फ आउँदै गरेको को.३३ प. २०९८ नम्बरको मोटरसाइकल र पश्चिमबाट पूर्वतर्फ जाँदै गरेको बा ३१ प ५८८३ नम्बरको मोटरसाईकल एक आपसमा ठोक्किएका थिए ।

दुईवटा मोटरसाइकल ठक्कर खाएपछि सडकमा पछारिएका युवाई पूर्वबाट पश्चिम तर्फ आउँदै गरेको ना ४ ख ४२६५ नम्बरको यात्रुबाहक बसले ठक्कर दिएको थियो ।

दुर्घटनामा को ३३ प २०९८ नम्बरको मोटरसाइकल चालक सिरहा, लहान नगरपालिका १९ का २६ वर्षिय मोहमद लुतफुर रहमानको मृत्यु भएको प्रहरीले जनाएको छ ।

उदयपुरको त्रियुगा नगरपालिका, १४ का २६ वर्षिय आरजु राई घाइते भएकी छन् ।

विराटनगर– १९ मिलनचोकमा मंगलबार राती टिपरको ठक्करबाट एकै परिवारका दुई जनाको ज्यान गएको छ ।

मंगलबार राति विराटनगर– १९ मिलनचोकमा आफन्तको विवाहमा सहभागी भएर घर फर्कदै गरेका बाबुराम सरदार र उनकी ६ वर्षकी नातिनी आरोही सरदार रहेको अटोमा टिपरले ठक्कर दिएको थियो ।

विराटनगरको घिनाघाट– विराटचोक सडक खण्डको मिलनचोकमा को १ ख २९१७ नम्बरको टिपरले मिलचोकबाट झोराहाट तर्फ जाँदै गरेको प्रदेश १–००२ ह ८६०६ नम्बरको अटोलाई ठक्कर दिँदा चालक बाबुराम र नातिनी आरोहीको ज्यान गएको हो ।

उनीहरुको ज्यान गएपछि आक्रोशित स्थानीयले मंगलबार राति टिपरमा आगजनी गरी सडक अवरुद्ध गरेका थिए ।

काठमाडौं । प्रधानमन्त्री केपी शर्मा ओलीको दोस्रो पटकको मिगौला प्रत्यारोपण सफल भएको छ । प्रत्यारोपणपछि मिर्गौलाले काम गर्न थोलेको उपचारमा स्वास्थ्य स्थिर रहेको चिकित्सकहरुले बताएका छन् ।

उनको त्रिवि शिक्षण अस्पताल, महाराजगञ्जमा सफल मिर्गौला प्रत्यारोपण भएको हो । प्रधानमन्त्रीकी भान्जी समीक्षा संग्रौलाको एउटा मिर्गौला प्रधानमन्त्रीको शरीरमा राखिएको हो ।

अब प्रधानमन्त्रीको शरीरमा अब चार वटा मिगौैला भएका छन् । सामान्यतया प्रत्यारोपणपछि पनि पुरानो मिर्गौला शरीरबाट निकाल्ने गरिदैन । त्यसले अझ जोखिम निम्तने चिकित्सकहरु बताउँछन् ।

अस्पतालका कार्यकारी निर्देशक डा. प्रेमकृष्ण खड्काका अनुसार प्रत्यारोपण गरिएको मिर्गौलाले काम गर्न थालिसकेको छ ।

प्रधानमन्त्रीको शरीरका मुख्य सूचकांक ठिक छन् । प्रधानमन्त्री ओलीलाई प्रत्यारोपण उपचार कक्षबाट आइसीयूमा सारिएको छ । यता मिर्गौला दिने समीक्षाको अवस्था पनि सामान्य रहेको चिकित्सकले बताएका छन् ।

प्रधानमन्त्रीको यो दोस्रो पटक मिर्गौला प्रत्यारोपण गरिएको हो ।

खासगरी सरकार प्रमुखबाट स्वदेशी चिकित्सक र अस्पताललाई विश्वास गर्दै स्वदेशमा गराएको उपचारको भने सामाजिक संजालमा खुलेर प्रशंशा भएको छ ।

प्रा. डा. अनन्तकुमार, डा. दिव्या सिंह साह, डा. महेश सिग्देल, डा. मुकुन्द काफ्ले, डा. रविन नेपालीलगायत टोली उपचारमा खटिएका छन् । डा अनिल श्रेष्ठ, प्रा. डा. सुवास आचार्यलगायतसमेत प्रधानमन्त्रीको उपचारमा खटिएका छन् ।

काठमाडौं । प्रधानमन्त्री केपी शर्मा ओलीको आज मिर्गौला प्रत्यारोपण हुँदैछ । उनको मिर्गौला प्रत्यारोपणको प्रक्रिया विहान ९ बजेबाट शुरु भएको छ । यो प्रक्रिया पाँच घण्टामा सकिने बताइएको छ ।

त्रिवि शिक्षण अस्पतालमा उनको उपचार भइरहेको छ । वरिष्ठ चिकित्सक डाक्टर अरुण सायमीलगायतको टीम उपचारमा खटिएको छ । मिर्गौला प्रत्यारोपण गर्न प्रधानमन्त्री सोमबार त्रिवि शिक्षण अस्पताल भर्ना भएका हुन् ।

उनको मंगलबार प्रि ट्रान्सप्लान्ट डायलासिस र अन्य स्वास्थ्य परीक्षण सम्पन्न भइसकेको छ । मिर्गौला प्रत्यारोपणपछि बिरामी ५ देखि ६ दिनसम्म अस्पतालमै रहनुपर्छ ।

प्रधानमन्त्री अस्पतालको एनेक्स वार्डको भिभिआइपी क्याबिनको ६०१ नम्बरमा उपचारार्थ भर्ना भएका छन् ।

यस अस्पतालमा भिभिआइपीका लागि ६०१ र ६०२ गरी दुईवटा क्याबिन छन् । प्रधानमन्त्री ओलीलाई भान्जी समीक्षा संग्रौला ज्ञवालीले मिर्गौला दान गरेकी छिन् ।

उनको १२ वर्ष अघि पहिलो पटक मिर्गौला प्रत्यारोपण गरिएको थियो । प्रधानमन्त्री केपी शर्मा ओलीलाई विभिन्न देशका समकक्षीहरूले सफल शल्यक्रियाको शुभेच्छा व्यक्त गरेका छन् ।

भुटानका प्रधानमन्त्री डा. लोट्टी छिरिङ, पाकिस्तानका प्रधानमन्त्री इमरान खान, जापानी समकक्षी सिन्जे आवेले पत्र पठाएका छन् । भारतीय प्रधानमन्त्री नरेन्द्र मोदीले यसअघि नै स्वास्थ्य लाभको कामना गरेका थिए ।

काठमाडौं । प्रधानमन्त्री केपी शर्मा ओलीको बुधबार मृगौलाको दोस्रो पटक प्रत्यारोपण हुँदैछ ।

यसअघि १२ वर्ष अगाडी प्रत्यारोपण भएको मृगौलाले काम गर्न छाडेपछि दोस्रो पटक मृगौला प्रत्यारोपण हुन लागेको हो । त्रिवि शिक्षण अस्पतालमा मंगलबार भर्ना भएका प्रधानमन्त्रीलाई भेट्न नेकपा अध्यक्ष प्रचण्ड मंगलबार अस्पताल पुगेका छन् ।

यसअघि उपराष्ट्रपति नन्दकिशोर पुनले सोमबार नै प्रधानमन्त्रीलाई उनकै निवासमा पुगेर स्वास्थ्य लाभको कामना गरेका थिए ।

यसअघि सोमबार प्रधानमन्त्रीले आफू पूण रुपमा ठिक भएर आउने र थाती रहेका सपना पुरा गर्ने प्रतिवद्धता व्यक्त गरेका थिए ।

काठमाडौं । प्रधानमन्त्री अस्पताल भर्ना भएका छन् । १२ वर्षपछि दोस्रो पटक मृगौला प्रत्यारोपण गर्न उनी अस्पताल भर्ना भएका हुन् । प्रधानमन्त्री सोमबार बेलुका अस्पताल भनाई भएका हुन् ।

उनको त्रिवि शिक्षण अस्पतालमा मृगौलाको प्रत्यारोपण हुने भएको छ । १२ वर्ष अगाडी एपालो अस्पताल भारतमा उनको मृगौलाको प्रत्यारोपण गरिएको थियो ।

प्रधानमन्त्रीको बुधबार मृगौला प्रत्यारोपण गर्ने तयारी रहेको छ । प्रधानमन्न्त्री ओलीलाई भान्जीले मृगौला दिने भएकी छिन् ।

उनीसमेत सोमबार नै अस्पताल भर्ना भएको अस्पतालले जानकारी दिएको छ । अस्पताल भर्ना हुनुअघि प्रधानमन्त्रीले भिडियो सन्देश जारी गरेका छन् ।

उक्त भिडियो सन्देशमा प्रधानमन्त्री ओलीले मृगौला प्रत्यारोपणपछि थप उर्जा र आत्मविश्वास लिएर काममा फर्किने उल्लेख गरेका छन् ।

मानिस अजम्मरी नहुने भन्दै उनले आफूले अगाडी सारेको योजनालाई मूर्तरुप दिने प्रतिवद्धता समेत व्यक्त गरेका छन् ।

काठमाडौं । सामान्यतया चिसो मौसम भएको क्षेत्रबाट फैलिएको कोरोना भाइरस पछिल्लो समय तातो मौसम भएका मुलुकमा समेत फैलिएको छ ।

पछिल्लो पटक कतारमा एक बिरामीमा कोरोनाको संक्रमण पुष्टी भएको छ । इरानबाट फर्किएका २६ वर्षिय एक पुरुषमा कोरोना भाइरस संक्रमण भेटिएको कतारी अधिकारीले पुष्टी गरेका छन् ।

यो रोग चीनको वुहानमा पहिलो पटक देखिएको हो । पछिल्लो समय यसको संक्रमण युरोप र मध्यपूर्वमा तिब्र रुपमा फैलिदो क्रममा रहेको छ ।

यसको संक्रमणबाट चीनमा मात्र करीव ३ हजारको ज्यान गइसकेको छ ।

चीनपछि सबैभन्दा धेरै इरानमा ३४ जनाको ज्यान गइसकेको छ । पछिल्ला दिनमा कोरिया र इटालीमा कोरोनाले ठूलो जनसंख्यालाई प्रभावित बनाएको छ ।

खाडी मुलुकमा कुवेत, बहराइन, मलेसिया, यूएईमा समेत यसको बिरामी भेटिएका छन् ।

ती मुलुकमा कोरोनाको संक्रमण फैलँदा त्रास भने नेपालमा बढ्छ । किनकी यी मुलुकमा लाखौं नेपाली कामदार रहेका छन् ।

एक त उनीहरुनै असुरक्षित हुने र अर्कोतर्फ त्यहाबाट फर्कनेबाट नेपालमा रोग भित्रने हो की भन्ने चिन्ता नेपालमा बढ्दो क्रममा रहेको छ ।

विश्व स्वास्थ्य संगठनले नेपाललाई समेत उच्च जोखिमयुक्त मुलुकको सूचिमा राखिसकेको छ । किनकी चीन नेपालको सीमाना जोडिएको देश हो ।

काठमाडौं । चीनबाट नेपाल फर्काइएका १७५ जना विद्यार्थी र १७ जना चालक दलका सदस्य तथा चिकित्सकले आज १४ औं दिन क्वारेन्टाइनमा सफलतापूर्वक पार गरेका छन् ।

उनीहरुमध्ये कसैमा पनि कोरोनाको संक्रमण भेटिएन । तर, उनीहरु आजै घर फर्कने भने नपाउने भएका छन् ।

फाइनल चरणको रिपोर्ट आउने क्रममा रहेका कारण त्यसपछि मात्र उनीहरु घर फर्कन पाउने स्वास्थ्य तथा जनसंख्या मन्त्रालयले जानकारी दिएको छ ।

मन्त्रालयका अनुसार उनीहरुलाई अब १७ औं दिनमा घर फर्काउने तयारी छ ।

खरिपाटीस्थित नेपाल विद्युत् प्राधिकरणको क्वारेन्टाइनमा राखिएका १७५ र नगरकोटको खानेपानी तालीम केन्द्रको क्वारेन्टाइनमा राखिएका १७ जनाको ४ फागुनमा नाक र घाँटीको स्वाब (सास) नमूना सङ्कलन गरी परीक्षणका लागि पठाइएको थियो ।

पहिलो चरणको रिपोर्टमा कसैमा पनि कोरोना सङ्क्रमण भेटिएन । अन्तिम पटक शनिबार फेरि सबैको नाक र घाँटीको स्वाब नमूना सङ्कलन गरि परीक्षण गरिने स्वास्थ्य तथा जनसङ्ख्या मन्त्रालयले उल्लेख गरेको छ ।

शुरुको दिन गरेको स्वाब परीक्षणदेखि हालसम्म दैनिक दुईपटक भएको ज्वरो नापिएको छ । तर, कसैमा पनि कोरोनाको लक्षण देखिएको छैन ।

शनिबार सङ्कलन गरिने र्‍याल नमूना परीक्षणको रिपोर्ट सत्रौँ दिनसम्म आउने सम्भावना रहेको बताइएको छ । ढिलोमा अठारौँ दिनमा उनीहरूलाई घर फर्काउने मन्त्रालयको तयारी छ ।