काठमाडौं । नेपाल क्रिकेट संघ (क्यान)ले लिग टूको त्रिकोणात्मक सिरिजका लागि २८ खेलाडीलाई बन्द प्रशिक्षणमा बोलाएको छ ।
२८ जना खेलाडी बन्द प्रशिक्षणका लागि छनोट भएपनि बलात्कारको अभियोगमा जेल परेर धरौटीमा छुटेका सन्दीप लामिछाने सोही प्रकरणमा नाम जोडिएका खेलाडी देव खनाल समेत उक्त सूचीमा छैनन्।
केही दिनअघि सम्पन्न टी २० लिगमा स्पट फिक्सिङको आरोप लागेका मोहम्मद आदिल आलमलाई क्यानले समेटेको छैन।
नेपाल(नामिबिया(स्कटल्यान्डको त्रिदेशीय सिरिज फागुन २ गते सुरु हुनेछ।
काठमाडौं । नेपाली राष्ट्रिय क्रिकेट टोलीका ओपनर आसिफ शेखले अन्तर्राष्ट्रिय क्रिकेट परिषद् (आईसीसी) को प्रतिष्ठित ‘आईसीसी स्पिरिट अफ क्रिकेट अवार्ड’ (खेल भावना अवार्ड) जित्न सफल भएका छन् । यो कुनै पनि नेपालीले जितेको आइसीसी स्तरको पहिलो अवार्ड हो । नेपाली क्रिकेट खेलाडी आसिफलाई यस अवार्ड प्रदान गरिएको आईसीसीले जनाएको छ ।
आईसीसीका अनुसार गतवर्ष फागनुमा ओमानमा भएको चार देश सम्मिलित टी–२० सिरिजमा आयरल्यान्डविरुद्ध आसिफले देखाएको खेल भावनाको कदर गदैै उनलाई अवार्ड प्रदान गरिएको हो । आसिफले आयरल्यान्डका एन्डी म्याकबर्नी रन लिनेक्रममा लड्न पुगेपछि रन आउट गरेनन् । आसिफको उक्त निर्णयलाई त्यतिवेलै सन्सारभरका क्रिकेट प्रेमीले प्रशंसा गरेका थिए । सोही आधारमा उहाँले ‘आईसीसीस्पिरिट अफ क्रिकेट अवार्ड’ दिइएको हो ।
काठमाडौं । बक्सिङ खेलाडी सुष्मा तामाङले यू–२२ बक्सिङ च्याम्पियनशिपमा रजत पदक जितेकी छन् ।
थाइल्यान्डको बैङ्ककमा महिला ४८ किलो तौल समूहको फाइनल खेलमा सुष्माले उज्वेकिस्तानकी खेलाडी फोजिलोभा फार्जोनासँग पराजित हुँदै रजत पदक जितेकी हुन् ।
एसियालीस्तरको कुनै पनि उमेर समूहमा नेपाली खेलाडीले रजत पदक जितेको पनि यो पहिलो पटक हो । यसअघि, एसियन गेम्समा नेपाली खेलाडीले कास्यपदक जितेका थिए ।
त्यस्तै यसअघि सेमिफाइनलमा सुष्मा मङ्गोलियाकी जनारगुली बाइस्येनबाइलाई पराजित गर्दै फाइनल पुगेकी थिइन् । प्रतियोगितामा नेपालबाट तीन महिला र समान तीन पुरुष खेलाडीको सहभागिता रहेको छ ।
काठमाडौं । नेपाल टी–२० क्रिकेट लीगका कारण नेपाली क्रिकेट इतिहासकै सबैभन्दा बढी बदनाम भएको छ । खासगरी प्रतियोगिता आयोजना गर्ने र त्यसका माध्यमबाट फिक्सिङ गराउने काममा ेलाडीहरुलाई सहभागी गराएको खुलासा भएसँगै नेपाली क्रिकेट बदनाम हुन पुगेको छ । यसले नेपाल क्रिकेट संघको विश्वसनीयतामा समेत प्रश्न उठेको छ ।
स्पट फिक्सिङ, म्याच फिक्सिङ र ुबेटिङ जस्ता क्रिकेटलाई बदनाम गराउने विषय यस प्रतियोगितामा भएका छन्.। क्रिकेट टोलीले पुरस्कार नपाउने, खेलाडीहरूले तलब नपाउने, मालिकहरूको परिचय नखुल्ने, आयोजक बीचमै हराउने जस्ता गम्भीर घटना समेत यस प्रतियोगितामा भए । घटनामा संलग्न रहेके अभियोगमा सम्मानित भूतपूर्व राष्ट्रिय खेलाडी मेहबुब आलम र प्रतियोगिता खेलेका खेलाडी आदिल आलमलाई पक्राउ गरी अनुसन्धान अगाडि बढाइएको छ।
म्याच फिक्सिङ र बेटिङ नेपालमा अपराध करार भएको छ । राष्ट्रिय खेलकुद विकास ऐन २०७७ को दफा ३३ मा खेल फिक्सिङ गरेको ठहरिएमा तीन वर्षसम्म कैद र ५०,००० रुपैयाँसम्म जरिवाना गरी सो कसुर गर्दा कुनै रकम लेनदेन गरेको भए त्यस्तो लेनदेन गरेको रकम समेत जफत गर्नुपर्छ । अख्तियार दुरुपयोग अनुसन्धान आयोगले नेपाल टी–२० को विषयमा अनुसन्धान थालेको बताएको छ ।
ग्लोबल टेन्डरबिनै एउटा कम्पनीलाई आयोजनाको अधिकार दिनु र श्रम स्वीकृति नलिईकन विदेशी खेलाडीहरूलाई प्रतियोगितामा खेल्न दिएको विषयमा आयोगको अनुसन्धान गर्दैछ । राष्ट्रिय खेलकुद परिषद्ले पाँच–सदस्यीय छानबिन कार्यदल गठन गरेको छ।
नेपाल प्रहरीको केन्द्रीय अनुसन्धान ब्यूरो (सीआईबी) ले नेपाल टी–२० क्रिकेटमा ‘स्पट फिक्सिङ’ मा संलग्न भएको आरोपमा पक्राउ परेका दुई क्रिकेटरबारे औपचारिक जानकारी मंगलबार गराएको छ । नेपाली राष्ट्रिय क्रिकेट टोलीका अलराउण्डर मोहम्मद आदिल आलम र पूर्वराष्ट्रिय क्रिकेटर महबुब आलमलाई प्रहरीले सोमबार मात्र पक्राउ गरेको थियो । सीआईबीका अनुसार फिक्सिङमा कम्तीमा १० जना संलग्न छन् ।
नेपाल टी–२० मा ५ जनालाई स्पट फिक्सिङका लागि एप्रोच गरिएको थियो । ब्यूरोका प्रहरी उपरीक्षक सञ्जयसिंह थापाका अनुसार उनीहरुमध्ये दुई जना खेलाडीले एप्रोच गरिए अनुसार खेलका गतिविधिलाई प्रभाव पारेर खेलेको देखिएको छ । अरुले अन्तर्राष्ट्रिय क्रिकेट परिषद (आईसीसी) लाई एप्रोच आएको भन्दै जानकारी गराएको पाइएको छ ।
एसपी थापाका अनुसार स्पट फिक्सिङको प्रस्ताव स्वीकार गर्नेमध्ये एक मोहम्मद आदिल आलम हुन् भने अर्का बिराटनगर सुपर किंग्सका कप्तान आन्द्रे म्याक्कर्थी हुन् । आदिललाई एउटा नो बल र अर्को वाइड बल फाल्नका लागि एप्रोच आएको थियो, कम्तीमा दुई वटा खेलमा उनले सोही प्रकृतिको खेल खेलेको पाइएको छ ।
सहमतिअनुसार जनकपुर रोयल्सबाट खेलेका आदिलले १२ पुसमा काठमाडौं नाइट्सविरुद्धको खेलमा स्पट फिक्सिङ गराएका प्रहरीको दावी छ । उनले ११.१ ओभरमा ‘नो बल’ फालेका थिए भने अर्को बल वाइड फालेका थिए । त्यो खेलमा आदिलले ४ ओभर बलिङ गरी ३८ रन खर्चेर १ विकेट लिएका थिए । जहाँ दुई वाइड र एक ‘नो बल’ सामेल थियो ।
१४ पुसमा फारवेष्ट युनाइटेडविरुद्ध भएको खेलमा पनि उनले स्पट फिक्सिङ गरेको आरोप छ । त्यो खेलमा आदिलले एक ओभर मात्र बलिङ गर्न पाए । पावर प्लेको अन्तिम ओभरको पहिलो बल उनले नो बल फाले । लगत्तै वाइड बल पनि फाले । यो ओभरमा उनले त्यही गरेका थिए, जुन दुई दिनअघि काठमाडौं नाइट्सविरुद्धको खेलमा १२ औं ओभरमा गरेका थिए ।
फिक्सिङमा संलग्न भएको आरोप लागेका विदेशी खेलाडी विराटनगर सुपर किंग्सका कप्तान आन्द्र म्याक्कर्थी हुन्, जसको कप्तान नियुक्तिमा नै प्रश्न उठेको थियो । विराटनगरको कप्तानमा नेपाली राष्ट्रिय टोलीको कप्तान रोहितकुमार पौडेललाई भनिएको थियो । तर प्रतियोगिता सुरु हुनु अघिल्लो दिन एकाएक म्याक्कर्थीलाई कप्तान तोकियो । स्पट फिक्सिङका लागि अनुकुल हुने गरी म्याक्कर्थीलाई कप्तान बनाएको आशंका त्यही बेला भएको हो ।
काठमाडौं । नेशनल फिजिक कमिटि युएसए नेशनल च्याम्पियनसिप (एनपीसी युएसए नेसनल च्याम्पीएनसिप)मा नेपाली युवा च्याम्पियन बनेका छन् । नेपाली युवा शिशिर राना इन्टरनेशनल फेडेरेशन अफ बडीविल्डिङ एण्ड फिटनेश (आईएफबीबी) प्रोकार्ड प्राप्त गर्ने पुरुषतर्फ पहिलो नेपाली बनेका छन्। डिसेम्बर पहिलो साता अमेरिकाको फ्लोरिडा राज्यमा सम्पन्न प्रतिस्पर्धाका लागि उनले विभिन्न क्षेत्रिय प्रतियोगिताहरु जितेर सोप्रतियोगितामा छानिएका थिए ।
नेशनल च्याम्पियनसिपका लागि भएको कडा प्रतिस्पर्धामा रानाले आफ्नो वजन समूह, १४३.५पाउण्डका लागि १३ जनालाई उछिन्दै उपाधी जितेका हुन् । २५ वर्षीय रानाले सातवर्ष अघि शारीरिक सुगठनको यात्रा प्रारम्भ गरेका थिए। सामन्यतया प्रोकार्ड प्राप्त गर्न कम्तिमा १० देखि १५ वर्षको नियमित अभ्यास जरुरी हुने भएपनि रानाले छोटो समयमा यो सफलता प्राप्त गरेका हुन् । उनी कम उमेरमा प्रोकार्ड लिने केही सिमित विदेशी च्याम्पियनमा पनि परेका छन्।
सात वर्षसम्मको निरन्तर अनुशासित खानपान र व्यायमले आफुलाई यो स्थानमा पुर्याएको राना बताउँछन्। ‘मैले यो सात वर्षसम्म कुनै पनि पारिवारीक भेटघाट र चाडपर्वमा सामेल हुन सकिन’उनले भने, ‘मैले पहिलो नेपाली पुरुष प्रोकार्ड होल्डर हुने सपना बोकेर अभ्यासमा होमिएको थिए।‘
सन् २०१४ देखि आफ्नो परिवारसँग अमेरिकाको न्युयोर्कमा बसोबास गर्दै आएका रानाले कक्षा १०सम्मको अध्ययन काठमाडौंबाटै गरेका थिए। उनी अहिले सिटी युनिभर्सिटी अफ न्युयोर्कमा मेकानिकल इन्जिनियरिङका विद्यार्थी हुन्। उनले यी दुवैलाई संगै लैजान आफुले कडा मेहनत गरिरहेको बताए।
आइबीबी प्रोकार्ड प्राप्त गरेपछि राना समान कार्ड होल्डरसँग प्रतिस्पर्धाका लागि योग्य भएका छन् । त्यसमा छानिएमा उनले बडिबिल्डिङको उच्च स्थान मिस्टर ओलम्पियाका लागि प्रतिस्पर्धा गर्ने छन्।आफ्नो अबको सपना मिस्टर ओलम्पियामा नेपालको झण्डा फहराउनु रहेको रानाले बताए। नेपालमा बाग्लुङ स्थायी घर भएका राना सिंहबहादुर राना र चन्द्रिका देवी जिरेलका जेष्ठ छोरा हुन। उनका पिता सिंहबहादुर पनि नेपालमा करातेका राष्ट्रियस्तरका पुर्वखेलाडी हुन।
पेरिस । पेरिस सेन्ट जर्मेन (पिएसजी)का लागि केलियन एमबाप्पे एक्लैले ५ गोल गरेका छन् । फ्रेन्च कप फुटबलमा पाएस डी कासेलाई फराकिलो अन्तरले हराउने क्रममा उनले गोल गरेका हुन् । पीएसजी अन्तिम १६ मा प्रवेश गरेको छ। सोमबार राति भएको खेलमा छैटौँ श्रेणीको पाएस डी कासेललाई ७–० गोल अन्तरले हराउँदै पिएसजी अन्तिम १६ मा प्रवेश गरेको छ । पिएसजीको जितमा केलियन एमबाप्पे एक्लैले ५ गोल गर्दा नेइमार र कार्लोस सोलेरले थप १–१ गोल गरे ।
खेलको २९ औं मिनेटमा एम्बाप्पेले गोल गर्दै खेलमा अग्रता दिलाएका थिए। ३३ औं मिनेटमा नेइमारले अग्रता दोब्बर पारे। त्यसको १ मिनेटपछि एम्बाप्पेले अग्रता तेब्बर पारे। ४० औं मिनेटमा गोल गर्दै एम्बाप्पेले ह्याट्रिक पुरा गर्दा पिएसजी ४–० ले अघि रह्यो। एम्बाप्पेले दोस्रो हाफमा थप २ गोल गरे । ५६ र ७९ औँ मिनेटमा थप दुई गोल गर्दै उनले ५ गोल पूरा गरे । एम्बाप्पे एकै खेलमा ५ गोल गर्ने पिएसजीको पहिलो खेलाडी समेत बनेका छन् । अर्को गोल कार्लोस सोलेरले ६४ औँ मिनेटमा गरे ।
काठमाडौं । नेपाल टी-२० लिगमा स्पट फिक्सिङ गरेको आरोपमा दुई क्रिकेटर पक्राउ परेका छन् ।
पक्राउ पर्नेमा पूर्वराष्ट्रिय क्रिकेटर मेहबुब आलम र राष्ट्रिय क्रिकेट टोलीका सदस्य आदिल अन्सारी रहेका छन् ।
केन्द्रीय अनुसन्धान ब्यूरो (सीआईबी) को टोलीले उनीहरुलाई पक्राउ गरेको हो ।
नेपाल टी-२० लिगमा फिक्सिङ भएको आशंका पछि सीआईबीले अनुसन्धान गरेको थियो । सीआईबीले लिगमा स्पट फिक्सिङ भएको प्रारम्भिक निष्कर्ष निकालिसकेको छ ।
सीआइबीले डीएसपी सुन्दर तिवारीको नेतृत्वमा अनुसन्धान तथा छानबिन समिति बनाएको थियो। जसमा ५ जना अधिकृत प्रहरी रहेका छन्। समितिले अनुसन्धान फाइल बुझाउने तयारी गरेको छ।
नेपाल टी २० लिगको मुख्य आयोजक सेभेनथ्री स्पोर्ट्स हो। आयोजनाको लागि नेपाल क्रिकेट संघ क्यानको साझेदार सेभेनथ्री स्पोर्ट्सका प्रमुख जतिन अलुवालिया हुन्। अहिले अलुवालिया सम्पर्कविहीन भएको प्रहरीले जनाएको छ।
काठमाडौं । नेपालकी पुष्पा भण्डारीले बंगबन्धु शेख मुजिब ढाका म्याराथनमा स्वर्ण पदक जितेकी छिन् । बंगलादेशको ढाकामा आज भएको म्याराथन अन्तर्गत साफ एलिटको महिलातर्फ पुष्पाले स्वर्ण पदक जितेकी हुन् ।
पुष्पाले ४२ दशमलब १९५ किलोमिटर निर्धारित दुरी २ घन्टा ४८ मिनेट २ सेकेन्डमा पूरा गरेर उपाधि जितेकी हुन् ।
श्रीलंकाकी सुजनी परेरा पुष्पा भन्दा २० सेकेन्डले पछि रहदै दोस्रो बनिन् । नेपालकी वृन्दा श्रेष्ठ धानुके तेस्रो भएकी छिन् । वृन्दाले २ घण्टा ५२ मिनेट २२ सेकेन्डमा दूरी पूरा गरेकी हुन् ।
पुष्पाले यस प्रतियोगितामा दोस्रो पटक स्वर्ण पटक जितेकी हुन् । पुष्पाले यस अघि २०२१ मा स्वर्ण पदक जितेकी थिइन् । यस्तै उनले २०२२ मा भने पुप्षाले कास्य पदक जितेकी थिइन् ।
पुरुषतर्फको हाफ म्याराथनमा नेपालका गोपीचन्द्र पार्कीले कास्य पदक जितेका छन् । प्रतियोगितामा नेपालका १० खेलाडी सहभागी थिए ।
रियाद । विश्वका दुई स्टार लियोनल मेसी र क्रिस्टियानो रोनाल्डो सामने सामने भएको खेलमा पेरिस सेन्ट जर्मेन (पिएसजी) ले जित निकालेको छ। बिहीबार राति साउदी अरेबियाको राजधानी रियादमा भएको रियाद सिजन टोली र पेरिस सेन्ट जर्मेन (पिएसजी) बीचको खेल रोमाञ्चक बन्यो । खेलमा ९ गोल र एक रातो कार्ड सम्भव भयो । अधिकांश समय १० खेलाडीमा खेलेको फ्रान्सेली टीम पिएसजीले ५–४ को जित निकाल्यो ।
पिएसजीको लागि लियोनल मेसी, मार्किन्होस, सर्जियो रामोस, केलियन एम्बाप्पे र हुगो एकिटिकेले एक–एक गोल गरे । साउदी अरेबयन अल नासर र अल हिलालसम्मिलिति अल स्टार्सका लागि कप्तान क्रिस्टियानो रोनाल्डोले दुई तथा ह्युन सु जाङ र एन्डर्सन टालिस्काले समान एक–एक गोल गरे । खेलको तेस्रो मिनेटमै लिओनेल मेसीले गोल गर्दै पिएसजीलाई अग्रता दिलाएका थिए ।
नेयमारको पासमा मेसीले गोल गरे । खेलको ३४ औं मिनेटमा रोनाल्डोले गोल गर्दै खेललाई बराबरीमा ल्याए। रोनाल्डोले पेनाल्टीमा गोल फर्काएका हुन् । त्यसपछि पीएसजी १० खेलाडीमा सिमित भयो । जुआनलाई कतारी रेफ्री अब्दुल्रहमान अल जासिमले सिधै रातो कार्ड देखाए । कप्तान मार्किन्हसले खेलको ४३ औं मिनेटमा गोल गर्दै पिएसजीलाई पुनः अग्रता दिलाए। नेयमारले पेनाल्टीमा गोल गर्न चुके । पहिलो हाफ २–२ गोलको बराबरीमा सकियो।
दोस्रो हाफको सुरूवातमा नै पिएसजीले सर्जियो रामोसको गोलमा अग्रता लियो। खेलको ५३औं मिनेटमा पिएसजीले तेस्रो पटक अग्रता बनायो। केलियन एम्बाप्पेले बक्स भित्रबाट मिलाएको पासलाई रामोसले गोलमा परिणत गरे । त्यसको तीन मिनेटमै जाङ ह्युन सुले हेडरमार्फत गोल गर्दै खेललाई बराबरीमा ल्याए। बराबरी भएको केही समयमै पिएसजीका लागि एमबाप्पेले पेनाल्टीमार्फत गोल गरे ।
मेसीको प्रहार अली अल बुलायहीले हातले रोकेपछि पिएसजीले पेनाल्टी पाएको हो । एम्बाप्पेको स्थानमा मैदान छिरेका युवा फरवार्ड ह्युगो एकिटिकेले ७८ औं मिनेटमा गोल गर्दै पिएसजीलाई ३–५ को अग्रतामा पुर्याए।
तर इन्ज्युरी समयको अन्त्यमा रियादका एन्डरसन टालिस्काले गोल गर्दै खेललाई ४–५ को स्थितिमा पुर्याए र खेल सकियो ।
एजेन्सी । फ्रेन्च क्लब पेरिस सेन्ट जर्मेन (पीएसजी) विरुद्धको मैत्रीपूर्ण खेलमा क्रिस्टियानो रोनाल्डोले ‘साउदी अलस्टार ११’ को कप्तानी गर्ने भएका छन्।
अलनासर र अलहिलालको खेलाडीले बनेको साउदी अलस्टार ११ को कप्तानको जिम्मेवारी रोनाल्डोले पाएका हुन्। बिहीबार पीएसजीसँग अलस्टारले मैत्रीपूर्ण खेल खेल्ने तालिका रहेको छ ।
अलनासरसँग जोडिएपश्चात् यो रोनाल्डोको पहिलो खेल हुनेछ । यससँगै फुटबलका दुई महान् खेलाडी रोनाल्डो र लिओनल मेस्सी आमने-सामने हुनेछन्। सन् २०२० मा नाउ क्याम्पको दौरान रोनाल्डो र मेस्सी आमने-सामने भएका थिए।
खेल रियादस्थित किङ फाहद अन्तर्राष्ट्रिय स्टेडियममा हुनेछ।
एक साउदी अरेबियन व्यवसायीले मेसी र रोनाल्डोको विशेष खेल हेर्नका लागि लिलामीमार्फत २.६६ मिलियन डलरमा एक टिकट किनेका छन् ।
साउदी सरकारको मनोरञ्जन विभागले ट्विटरमा जनाएअनुसार मेसी र रोनाल्डोको खेल हेर्न लिलामीमा सबैभन्दा ठूलो बोली लगाएका साउदीको रियल स्टेट समूह अकरवानका महाप्रबन्धक अल–घाम्डीले ‘कल्पना बाहिरको’ टिकट जितेका हुन् ।
अब उनले भिआइपी टिकट किनेसँगै विशेष ठाउबाट खेल हेर्न दिने, खेलाडीसँग भेट गर्न, र खेलाडीसँग फोटो खिचाउन पाउने लगायतका सुबिधा पाउने भएको साउदी जनरल इन्टरटेनमेन्ट अथरिटीले जनाएको छ । साउदीले यो रकम एहसान नामक च्यारिटीमा जाने समेत बताएको छ ।
यस खेलको टिकट खुलेको एक घण्टामै २० लाख भन्दा बढी अनलाइन टिकटको अनुरोध समेत आएको आयोजकले जनाएका छन् । यता पिएसजीले यस मैत्रीपूर्ण खेलबाट १० मिलियन युरो कमाई गर्ने भएको छ ।
काठमाडौं । वर्तमान समयमा दुई महान खेलाडी लिओनल मेस्सी र क्रिस्टियानो रोनाल्डो सम्मिलित क्लबबीच आज मैत्रीपूर्ण खेल हुँदैछ । फ्रान्सेली क्लब पेरिस सेन्ट जर्मेइन (पीएसजी) र साउदी अल स्टार–११ बीच नेपाली समय अनुसार आज राति पौने ११ बजे खेल हुनेछ ।
यो खेल रियादको किंग फाहद रंगशालामा हुनेछ । मेस्सी र रोनाल्डो २ वर्षपछि एक अर्कासँग खेल्दैछन् । रोनाल्डो अहिले साउदी क्लब अल नासरमा अनुबन्धित भएका छन् । मेस्सीको कप्तानीमा अर्जेन्टिनाले कतारमा भएको विश्वकप जितेको थियो ।
एजेन्सी । आइतबार नेपालमा भएको विमान दुर्घटनाप्रति स्पेनिस फुटबल क्लब रियल मड्रिडले दु:ख व्यक्त गरेको छ।
सोमबार क्लबको आधिकारिक फेसबुक पेजमा एक सन्देश जारी गर्दै रियलले दुर्घटनामा ज्यान गुमाउनेप्रति श्रद्धाञ्जली व्यक्त गरेको हो। साथै, दुर्घटनामा ज्यान गुमाउनेका आफन्तहरूलाई समवेदना प्रकट गरेको छ।
‘नेपालमा भएको जहाज दुर्घटनामा आफ्ना प्रिय आफन्त गुमाउने सबै परिवारलाई हामी समवेदना प्रकट गर्दछौं’, रियलले भनेको छ, ‘हामी हाम्रो सम्पूर्ण शक्ति र साहस पीडित परिवारप्रति समर्पित गर्न चाहन्छौं।’
काठमाडौं । रियल म्याड्रिडलाई हराउँदै क्याटलान क्लब बार्सिलोना स्पेनिस सुपर कपको उपाधि उचालेको छ । साउदी अरबको रियादमा आइतबार राति भएको फाइनलमा डिफेन्डिङ च्याम्पियन रियललाई ३–१ गोल अन्तरमा हराउँदै बार्सिलोना च्याम्पियन बनेको हो। किङ फाद इन्टरनेसनल स्टेडियममा बार्सिलोनालाई च्याम्पियन बनाउन गाभी, रोबर्ट लेवान्डोस्की र पेड्रीले गोल गरेका थिए। रियलका कप्तान करिम बेन्जेमाले एक गोल फर्काएका थिए।
खेलको ३३ औं मिनेटमा १८ वर्षीय गाभिले रोबर्ट लेवान्डोस्कीको पासबाट गोल गर्दै बार्सिलोनालाई सुरूआती अग्रता दिलाएका थिए। हाफ टाइमभन्दा ठीक अगाडि गाभिकै पासमा लेवान्डोस्कीले गोल गर्दै बार्सिलोनालाई पहिलो हाफमा २–० ले अग्रता दिलाए। यस्तै दोस्रो हाफको ६९ औं मिनेटमा गाभीको पासमा पेड्रीले गोल गर्दै खेलमा बार्सिलोनाले ३–० को अग्रता बनायो। तर करिम बेन्जेमाले खेलको इन्जुरी समयमा गोल गर्दै अन्तर घटाए पनि हार जोगाउन सकेनन्। बार्सिलोनाले सन् २०१८ पछि पहिलो पटक सुपर कपको उपाधि उचाल्यो।
काठमाडौं ।राष्ट्रिय क्रिकेट टोलीका पूर्वकप्तान सन्दीप लामिछाने २० लाख धरौटी बुझाएर थुनामुक्त भएका छन् ।
जिल्ला अदालत काठमाडौंमा धरौटी रकम दाखिला गरेपछि केन्द्रीय कारागारबाट उनी छुटेका हुन् । उच्च अदालत, पाटनले तोकेको पाँच बुँदे सर्त पालन गर्ने प्रतिबद्धतासहित उनि छुटेका छन् ।
सन्दीपलाई धरौटीमा छाड्ने आदेश गर्दा अदालतले उनलाई विदेश जान रोक लगाएको छ भने पीडित र मुद्दाबारे कुनै सामग्री प्रकाशन गर्न वा विद्युतीय, सार्वजनिक सञ्चारमाध्यम, सामाजिक सञ्जालमा कुनै टिकाटिप्पणी गर्न पनि निषेध गरेको छ ।
काठमाडौं । विश्वकपपछि पहिलो पटक लियोनल मेसी मैदानमा उत्रिएका छन् । उनले विश्वकप पछिको पहिलो खेलमा पनि गोल गर्न सफल भए । उनको क्लव पिएसजीले फ्रेन्च लिग वानमा सहज जित निकालेको छ। गतराति एन्जर्सविरूद्ध घरेलु मैदानमा पिएसजीले २–० को जित निकाल्ने क्रममा मेसीले गोल गरेका हुन् । पिएसजीको जितमा मेसी र ह्यूगो इकिटिकेले गोल गरे।
पाँचौ मिनेटमा इकिटिकेले गोल गर्दै पिएसजीलाई सुरूआती अग्रता दिलाए । पहिलो हाफसम्म १–० ले अघि रहेको पिएसजीले दोस्रो हाफमा अग्रता दोब्बर पारेको हो । ७२ औं मिनेटमा मेसीले गोल गरेका हुन् । एम्बाप्पे बिदामा रहेका कारण खेलमा उपस्थित थिएनन् ।
काठमाडौं । नेपाल टी–२० क्रिकेट लिगको उपाधि लुम्बिनी अल स्टार्सले जितेको छ ।
काठमाडौंको कीर्तिपुरस्थित त्रिवि क्रिकेट मैदानमा बुधबार भएको फाइनल खेलमा विराटनगर सुपर किङ्सलाई २४ रनले हराउँदै लुम्बिनी च्याम्पियन बनेको हो।
लुम्बिनीले दिएको १३४ रनको लक्ष्य पछ्याउने क्रममा विराटनगर आठ विकेटको क्षतिमा १०९ रनमै समेटियो। विराटनगरका लागि अर्जुन साउँदले ३४, पृथु बास्कोटाले ३१ र हुसैन तलतले १३ रन बनाए। अन्य खेलाडीले दोहोरो अंक पनि जोड्न सकेनन्।
काठमाडौं । वेल्सका कप्तान ग्यारेथ बेलले सबै प्रकारको फुटबलबाट सन्यास लिएको घोषणा गरेका छन् । उनी अहिले मात्र ३३ वर्षका भए । उनले क्लब र अन्तर्राष्ट्रिय फुटबलबाट सन्यास लिने घोषणा गरेका हुन् । उनले ट्वीट गरेर सन्यास लिएको जानकारी गराएका हुन् । उनले भनेका छन्, ‘अन्तर्राष्ट्रिय फुटबलबाट सन्यास लिने यो निर्णय मेरो करियरकै अहिलेसम्मकै सबैभन्दा कठिन निर्णय हो ।’ उनले अगाडि भनेका छन्, ‘अन्तर्राष्ट्रिय मञ्चमा केवल मेरो जीवन बदलिएको छैन, बरु म को हुँ भन्ने पनि स्थापित भएको छ । म यो अविश्वसनीय इतिहासमा देशका लागि एक भूमिका निर्वाह गर्दा आफूलाई सम्मानित महसुस गर्दछु ।’
बेल वेल्सको सबैभन्दा महान खेलाडीको रुपमा चिनिन्छन् । उनले अन्तर्राष्ट्रिय फुटबलमा ४१ गोल गरेका छन् । दुई युरोपियन च्याम्पिनसिप जिताएका छन् । यसका साथै उनले आफ्नो टिमलाई युरो २०१६ को सेमिफाइनलसम्म पुर्याए । १९५८ पछि पहिलो पटक विश्वकपमा पनि पुर्याए । लस एन्जलसका फरवार्ड रहेका उनी त्यसअघि साउथह्याम्पटन, टोटनहम र रियल मड्रिडका लागि खेलिसकेका छन् । उनले अन्तिम खेल विश्वकपमा इंग्ल्याण्डविरुद्ध खेलेका थिए । यो बेलको १११ औं अन्तर्राष्ट्रिय खेल थियो ।
काठमाडौं । राष्ट्रपति विद्यादेवी भण्डारीले रियल म्याड्रिडका अध्यक्ष एमिलियो बुट्रागुनोलाई उपहार पठाएकी छिन् । उनले पठाएको उपहार स्पेनका लागि नेपाली राजदूत सर्मिला पराजुली ढकालले हस्तान्तरण गरेकी छिन् । स्पेनिस कोडा डेल रेको अन्तिम ३२ अन्तर्गत मंगलबार रियल म्याड्रिड र कासेरेन्योबीचको खेल अगाडि राजदूत पराजुलीले राष्ट्रपति भण्डारीले पठाएको गौतम बुद्धको मूर्ति हस्तान्तरण गरिन्।
नेपालमा दुई मैत्रीपूर्ण खेल खेलेर फर्किएको स्पेनिस फुटबल टिम कासेरेन्यो सिपीले रियल म्याड्रिडसँग खेलेको हो। पोखरा र काठमाडौंमा स्थानीय टिमसँग एकरएक मैत्रीपूर्ण खेल खेलेर स्पेनिस टोली स्वदेश फर्किएको हो। राजदूत पराजुलीले लालिगाका उपाध्यक्ष, रियल म्याड्रिडका मार्केटिङ हेड रोबर्ट कार्लोस र दुवै फुटबल क्लबका अन्य प्रतिष्ठित व्यक्तित्व तथा प्रतिनिधि सभाका सभामुख र अन्य सरकारी उच्चपदस्थ व्यक्तिसँग पनि भेट गरेकी थिइन्।
राजदूत भण्डारीले युनेस्को विश्व सम्पदास्थल (ओल्ड टाउन अफ कासेरेस) प्लासेन्सिया क्याथेड्रल लगायत कासेरेसको भ्रमण गर्नुका साथै लुम्बिनी गार्डेन फाउन्डेसनले बुद्धको मूर्ति उपलब्ध गराएको संग्रहालयकोसमेत भ्रमण गरेकी थिइन् ।
काठमाडौं । भुटानी शरणार्थीहरुको क्लब भुटानी युथ स्पोर्टस् क्लब, अमेरिका (बीवाईएसी) आहा रारा गोल्डकपको फाइनलमा प्रवेश गरेको छ ।
पोखरा रंगशालामा बिहीबार भएको दोस्रो सेमिफाइनलमा चर्च ब्वाइज क्लबलाई १–० ले हराउँदै फाइनलमा पुगेको हो ।
भुटानी युथको लागि खेलको ४६ औं मिनेटमा रोजिन प्रजापतिले गरेको गोल नै निर्णायक बन्यो । भुटानी युथ स्पोर्टस् बीवाईएसीको प्रतियोगितामा यो दोस्रो सहभागिता हो । बीवाईएसी अघिल्लो संस्करणको क्वार्टरफाइनलबाटै बाहिरिएको थियो ।
उपाधिका लागि अब संकटासँग सामना गर्नेछ ।
प्रतियोगिताको विजेताले १२ लाख र उपविजेताले ६ लाख रूपैयाँ पाउने छन् ।
काठमाडौं । विश्व विजेता अर्जेन्टिनाका कप्तान लियोनल मेसीलाई फ्रेन्च क्लब पेरिस सेन्ट जर्मेन (पीएसजी) विशिष्ट सम्मान प्रकट गरेको छ । उसले मैदानमा मेसीलाई गार्ड अफ अनर प्रदान गरेको हो । विश्वकपपछि प्रशिक्षणमा फर्किएका मेसीलाई क्लबले यस्तो सम्मान दिएको हो । गार्ड अफ अनर सम्मानलाई खेलकुदमा विशिष्ट सम्मानमा रूपमा लिइन्छ। घरेलु मैदान सेन्ट जर्मेन ओँ लेनमा नेइमारसहित सहकर्मी खेलाडीहरुले उभिएर मेसीलाई सम्मान गरेका गरेका थिए भने खेल स्टाफ लुइस कम्पोसले उनलाई गार्ड अफ अनरको ट्रफी हस्तान्तरण गरेका थिए।
पीएसजीकै सहकर्मी खेलाडी तथा फ्रेन्च फर्वाड किलियन एम्बाप्पे भने समारोहमा अनुपस्थित भए । प्रशिक्षणमा फर्किएपछि मेसीले आफूलाई गरेको स्वागतका लागि क्लबलाई धन्यवाद दिए। कीर्तिमानी ७ पटकका बालोन डिुओर विजेता मेसीको कप्तानीमा अर्जेन्टिनाले हालै कतारमा सम्पन्न विश्वकप फाइनलमा फ्रान्सलाई हराउँदै ३६ वर्षपछि विश्वकप जितेको हो। मेसीले विश्वकपमा उत्कृष्ट खेलाडी हुँदै गोल्डेन बलसमेत जितेका थिए। मेसीले २०२३–२४ सिजन समेत पीएसजीबाटै खेल्ने भएका छन् ।
काठमाडौं । कीर्तिमानी रकममा साउदी क्लब अल नासरमा आवद्ध भएका पोर्चुगिज स्टार क्रिस्टियानो रोनाल्डो अब एसिया महादेशमा व्यवसायिक फुटबल खेल्नेछन् । उनलाई साउदीमा भब्य स्वागत गरियो । क्लबले मंगलबार राति रोनाल्डोको स्वागतमा भब्य स्वागत समारोह आयोजना गरेको हो । कार्यक्रम मार्सूल पार्कमा दुई घण्टासम्म चलेको थियो ।
अल नासरको पहेँलो र नीलो जर्सी लगाएका रोनाल्डो रंगशालामा प्रवेश गर्दा आतिसवाजी र झकिझकाउ लाइटहरूले स्वागत गरियो । २५ हजार दर्शक क्षमताको खचाखच भरिएको रंगशालामा उनले दर्शकहरूलाई अभिवादन गर्दै मैदान प्रवेश गरेका बेला दर्शकहरूले हुटिङ गरे । उनकी प्रेमिका जर्जिना रोड्रिग्वेजले साउदी महिलाहरूले लगाउने परम्परागत कालो अबाया लुगा लगाएर बच्चाहरूसँगै पछि पछि मैदान प्रवेश गरिन् ।
त्यसअघि आयोजित एक कार्यक्रममा उनले सम्झौता पत्रमा हस्ताक्षरसमेत गरेका छन्। यस्तै उनले प्रशंसकलाई सम्बोधनसमेत गरेका छन्। आफूलाई युरोप, अमेरिका, अष्ट्रेलिया र पोर्चुगलका धेरै क्लबले बोलाए पनि साउदी क्लबलाई आफूले बचन दिएकाले रियाद आएको बताए। ‘युरोप, ब्राजिल, अष्ट्रेलिया, अमेरिका र पोर्चुगलका धेरै क्लबहरूले मलाई अनुबन्धको प्रयास गरेका थिए। तर मैले यो क्लबलाई मेरो वचन दिएको भएर यता आएँ,’ रोनाल्डोले भने।
उनले साउदी आउनु आफ्नो अन्त्य नभएको बताए । सन् २०२५ सम्मका लागि साउदी अरेबियाको अल नासरसँग अनुबन्ध भएका रोनाल्डो सोमबार साँझ रियाद पुगेका हुन्। रोनाल्डोले वार्षिक १७७ मिलियन पाउण्डमा ३ वर्षका लागि क्लबमा आवद्ध भएका हुन्। उनले सन् २०२५ सम्म साउदी अरेबियाको टोली अल नासरबाट फुटबल खेल्नेछन्। यो विश्व फुटबल इतिहासमै हालसम्मको सबैभन्दा बढी पारिश्रमिक हो।
काठमाडौं । काठमाडौं । मनाङ मर्स्याङ्दीलाई हराउँदै भुटानी शरणार्थीहरुको क्लब भुटानी युथ स्पोर्टस् क्लब आहा रारा पोखरा गोल्डकपमा सेमिफाइनलमा प्रवेश गरेको छ ।
मनाङ मर्स्याङ्दीलाई १–० ले हराउँदै भुटानी क्लब सेमिफाइनल पुगेको हो । भुटानी क्लबका लागि एकमात्र गोल प्रविण बस्नेतले गरे ।
भुटानी क्लबले फाइनल प्रवेशका लागि चर्च ब्वाइज युनाइटेडसँग खेल्नेछ । बाई पाएर सिधै क्वाटरफाइनमा पुगेको साविक उपविजेता मनाङ पहिलो खेलबाटै बाहिरिएको छ ।
काठमाडौं । विश्व फुटबलका महान खेलाडी ब्राजिलियन पेलेको आज अन्तिम संस्कार हुने भएको छ । उनलाई हजारौ समर्थकले अन्तिम श्रद्धाञ्जली दिएका छन्। साओ पाउलोस्थित सान्तोस क्लबको रंगशालामा राखिएको पेलेको पार्थिव शरीरलाई श्रद्धाञ्जली दिन समर्थकहरू हजारौंको भिड लागेको छ ।
अल्बर्ट आईन्सटाइन अस्पतालबाट आतिशबाजीसहित पेलेको पार्थिव शरीरलाई श्रद्धाञ्जलिका लागि सान्तोस क्लबको भिला बिलमिरो रंगशाला पुर्याइएको थियो। रोयटर्सका अनुसार ३० डिग्रीभन्दा माथिको तापक्रमको वास्ता नगरी उनीहरूले दुई घन्टाभन्दा बढी समय लाइन बसेर पेलेलाई श्रद्धाञ्जली दिएका थिए। पेलेले दुई दशकभन्दा बढी समयसम्म सान्तोस क्लबबाटै व्यवसायिक फुटबल खेलेका थिए। सन् १९४० मा ट्रेस काराकोएसमा जन्मिएका पेले सन् १९५६ मा परिवारसहित सान्तोस बसाई सरेका थिए। उनले आफ्नो जीवनको अधिकांश समय सान्तोसमै बिताएका थिए।
यसैबीच पेलेलाई श्रद्धाञ्जलि दिन पुगेका फिफा अध्यक्ष जियानी इन्फान्टिनोले कम्तीमा एउटा रंगशालाको नाम पेले राख्न आफ्ना दुई सय एघार सदस्य राष्ट्रलाई आग्रहसमेत गरेका छन्। उनले फिफाले पनि पेलेप्रति उच्च सम्मान गर्ने जानकारी दिए। नेइमार, भिनिसियस जुनियर लगायत खेलाडी, समर्थकले पेलेलाई अन्तिम श्रद्धाञ्जली दिएका थिए। विश्वभरका ५० हजार पत्रकारले पेलेको अन्तिम संस्कारको समाचार संकलनका लागि अनुमति मागेको सान्तोसको प्रेस कार्यालयलाई उदृत गर्दै रोयटर्सले बताएको छ ।
२४ घन्टाको श्रद्धाञ्जलि सभापछि पेलेको आज निजी समारोहमा राष्ट्रपति लुइस इनासियो लुला डा सिल्भाको उपस्थितिमा अन्तिम संस्कार हुनेछ। तीन पटक फिफा विश्वकप जितेका पेलेको गत बिहीबार राति ८२ वर्षको उमेरमा निधन भएको थियो । पेलेको निधनपछि ब्राजिल सरकारले तीन दिने राष्ट्रिय शोकको घोषणा गरेको थियो।
काठमाडौं । बलात्कारको मुद्दा खेपिरहेका क्रिकेटर सन्दीप लामिछानेमा मानसिक समस्या देखिएको छ।
लामिछाने पछिल्लो समय मानसिक रूपमा निकै शिथिल र कमजोर देखिएपछि जेलरसँगको सल्लाहमा आवश्यक मानसिक परामर्श थालिएको स्रोतले बताएको छ ।
उनी मुद्दा पुर्पक्षको निम्ति काठमाडौं जिल्ला अदालतको आदेशपछि दुई महिनादेखि केन्द्रीय कारागार सुन्धारामा छन् । सन्दीप लामिछानेलाई प्रहरीले असोज २० गते त्रिभुवन अन्तर्राष्ट्रिय विमानस्थलबाट पक्राउ गरेको थियो।
काठमाडौं । पोर्चुगलका स्टार फरवार्ड क्रिस्टियानो रोनाल्डो साउदी क्लब अल नासरमा आवद्ध भएका छन्। उनी कीर्तिमानी वार्षिक १७७ मिलियन पाउण्डमा ३ वर्षका लागि आवद्ध भएका हुन्। उनले सन् २०२५ सम्म साउदी अरेबियाको टोली अल नासरबाट फुटबल खेल्ने भएका छन् । साउदी अल(नासर क्लबका अध्यक्ष मुस्ली अल मुअम्मरले स्पेनको राजधानी म्याड्रिडमा क्रिस्टियानो रोनाल्डोसँग ऐतिहासिक सम्झौतामा हस्ताक्षर गरेका हुन्।
अध्यक्ष मुअम्मरले रोनाल्डोलाई क्लबको ७ नम्बरको जर्सीसमेत हस्तान्तरण गरेका छन्। ३७ वर्षीय रोनाल्डोले फुटबल इतिहासकै सबैभन्दा ठूलो पारिश्रमिक लिएर एसियाली मुलुक साउदी गएका हुन्। उनले साउदी क्लबसँग सम्झौता गर्दै आफू अर्को देशमा नयाँ फुटबल लिगको अनुभव गर्न उत्सुक रहेको बताएका छन् ।
काठमाडौं । ब्राजिलका महान फुटबल खेलाडी पेलेको निधन भएको छ । मिर्गौला र प्रोस्टेटको समस्याबाट पीडित पेलेको ८२ वर्षको उमेरमा निधन भएको हो ।
२१ वर्ष लामो फुटबल करियरमा उनले १३६३ खेलमा प्रतिस्पर्धा गर्दा १ हजार २८१ गोल गरेर विश्व रेकर्ड कायम गरेका छन् । उनी एकमात्र फुटबल खेलाडी हुन् जसले तीन पटक विश्वकप जितेका छन् । १९५८, १९६२ र १९७० मा विश्वकप उपाधि जितेको ब्राजिलको टोलीमा पेले सहभागी थिए ।
उनी सन् २००० मा फिफा प्लेयर अफ द सेन्चुरीको उपाधिबाट सम्मानितसमेत भएका थिए । पेलेको वास्तविक नाम एडसरन एरेन्टस डो नासिमेन्टो हो । उनी १७ वर्षको उमेरमै फुटबल स्टार बनेका थिए । उनले १९५८ मा ब्राजिललाई वर्ल्डकपको उपाधि दिलाउन अहम् भूमिका निर्वाह गरेका थिए । क्वाटर फाइनलमा वेल्सविरुद्ध जितका लागि एकमात्र निर्णायक गोल उनैले गरेका थिए ।
सेमिफाइनलमा फ्रान्सविरुद्ध पेलेले ह्याट्रिक गरे र फाइनलमा स्वीडेनविरुद्ध उनले दुई गोल जितेर विश्वकपको उपाधि दिलाए । उनले फुटबल खेल्न भने १५ वर्षको उमेरमा सेन्टोस क्लबबाट सुरु गरेका थिए । डेब्यू खेलमा उनले पहिलो गोल गरेका थिए । त्यसपछि १९ वर्षसम्म उनले त्यसै क्लबबाट खेले र कूल ६४३ गोल गरे । यद्यपि सेन्टोस क्लबले भने क्लबका लागि पेलेले एक हजार भन्दा बढी गोल गरेको दाबी गर्दछ ।
यसमा मैत्रीपूर्ण खेलको गोल पनि समावेश छ । उनको निधनमा विश्वभरबाट शोक व्यक्त भइरहेको छ । कतार वर्ल्ड कपको विजेता अर्जेन्टिनी फुटबलर मेसी, क्रिष्टियानो रोनाल्डो, नेयमार लगायतले पनि उनको निधनमा शोक व्यक्त गरेका छन् ।
काठमाडौं । बलात्कारको मुद्दामा पुर्पक्षको लागि थुनामा रहेका नेपली क्रिकेट टीमका पूर्वकप्तान सन्दीप लामिछानेकोको पेशीको सुनुवाई हेर्न नभ्याइनेमा राखिएको छ। उच्च अदालत पाटनमा पुनरावेदनको आज पेशी चढेको थियो।
न्यायधीश सुभाष पौडेल र किरणकुमार पोखरेलको इजलासमा पेशी चढेको थियो। बिहीबार दिउँसो खाजा समयअघि तीन वटा निवेदनमाथि सुनुवाइ भएको थियो।
त्यसपछि एउटा निवेदनमाथि सुनुवाइ भएको छ। पाँचौं नम्बरमा रहेको लामिछानेको निवेदन ‘हेर्न नभ्याइने’ सूचीमा परेको छ। जसले गर्दा आज सुनुवाइ हुने सकेन।
भदौ ५ गते राति नाबालिकालाई लामिछानेले गौशालास्थित एक होटलमा पुर्याएर जबर्जस्ती करणी गरेको आरोप छ। १७ वर्षीया किशोरीलाई बलात्कार गरेको आरोपमा उनी पुर्पक्षका लागि जेलमा छन्।
काठमाडौं । स्पेनका दुई पूर्व अन्तर्राष्ट्रिय फुटबल खेलाडीसहितको टीम नेपाल आइपुगेको छ । स्पेन र नेपालका नागरिक मिलेर चलाएको संस्था लुम्बिनी गार्डेन फाउन्डेसनले स्पेनको क्याकेरेनो फुटबल क्लबलाई नेपाल भित्र्याएको हो । मंगलबार नेपाल आइपुगेको ५५ जनाको टोली सिधैं पोखरा पुगेको छ । क्लबले गण्डकी–११ सँग बुधबार पोखरा रंगशालामा मैत्रीपूर्ण खेल खेल्दैछ । स्पेनिस महारथी बार्सिलोना र रियल मड्रिडका पूर्व खेलाडी रुबेन डे ला रेड र युलियो सालिनास समेत उक्त टिममा छन् ।
उनीहरुले दुई मैत्रीपूर्ण खेल नेपालमा खेल्ने छन् । बुधबार पोखरामा खेले पछि शुक्रबार काठमाडौं ११ सँग मैत्रीपूर्ण खेल खेल्ने तालिका रहेको छ । टिममा स्पेनकै पूर्व राष्ट्रिय खेलाडी मिचेल सहित स्पेनको ‘ए’ डिभिजन क्लबबाट खेलिसकेका खेलाडी समेत छन् । क्रिसमस मनाइसकेपछि नयाँ वर्षभन्दा अगाडिको समय उपयोग गर्ने उद्देश्यसहित स्पेनिस टोलीले नेपाल भ्रमण गरेको हो । क्याकेरेनो टोलीलाई स्पेनस्थित नेपाली राजदूत डा. शर्मिला पराजुली ढकालले सोमबार बिदाइ गरेकी थिइन् ।
‘शान्तिका लागि फुटबल’ नाराका साथ लुम्बिनी गार्डेन फाउन्डेसनले आयोजना गर्न लागेको दुई मैत्रीपूर्ण खेलका लागि काठमाडौं र गण्डकीका दुवै टोली निर्माण भइसकेको छ । स्पेनिस टिमसँग खेल्ने गण्डकी ११ को टोली नेपाली राष्ट्रिय फुटबल टोलीका पूर्वकप्तान अनिल गुरुङको नेतृत्वमा मैदान उत्रिनेछ । गण्डकीको टोली राजेन्द्र तामाङको प्रशिक्षणमा रहनेछ ।
टोलीमा गण्डकी प्रदेशका अन्य राष्ट्रिय खेलाडीहरूको सहभागिता रहनेछ । यसैगरी राष्ट्रिय टिमका अर्का पूर्वकप्तान विराज महर्जनले काठमाडौं ११ को कप्तानी सम्हाल्नेछन् । मेघराज केसीको प्रशिक्षणमा रहने टोलीबाट काठमाडौंमा रहेका अन्य राष्ट्रिय खेलाडीले खेल्ने आयोजकले जनाएको छ ।
काठमाडौं । नेपालकै प्रतिष्ठित प्रतियोगितामा ‘झापा गोल्डकप’ यस वर्ष नहुने भएको छ।
‘झापा गोल्डकप’ लाई यस वर्ष रोकेर मेची रंगशालामा ‘भद्रपुर झापा गोल्डकप’ आयोजना गर्न लागिएको छ। १० टिमको सहभागिता रहने प्रतियोगिता फागुन अन्तिम साताबाट गर्ने आयोजकको तयारी छ।
प्रतियोगिताका विजेताले नगद १३ लाख, ट्रफी, मेडल र प्रमाणपत्र पाउनेछ भने उपविजेता टिमले नगद ७ लाख, ट्रफी, मेडल र प्रमाणपत्र प्राप्त गर्नेछ।
प्रतियोगिताका उत्कृष्ट गोलरक्षक, उत्कृष्ट डिफेन्डर, उत्कृष्ट मिडफिल्डर, उत्कृष्ट फरवार्ड र उत्कृष्ट प्रशिक्षकलाई २५ हजार तथा प्रत्येक खेलको म्यान अफ द म्याच खेलाडीलाई नगद १० हजार पुरस्कारको प्रदान गरिनेछ।
काठमाडौं । विश्वकप विजेता अर्जेन्टिना विश्व फुटबल महासंघ (फिफा) को विश्व वरीयतामा दोस्रो स्थानमा उक्लिएको छ ।
यसअघि तेस्रो स्थानमा रहेको अर्जेन्टिना एक स्थानमाथि उक्लिँदै दोस्रोमा पुगेको हो ।
क्वाटरफाइनलमा पराजित रहेको ब्राजिल वरीयताको शीर्ष स्थानमा यथावत छ । यसअघि शीर्ष स्थानमा रहेको बेल्जियम चौथो विश्वकपको उपविजेता फ्रान्स तेस्रो स्थानमा रहेको छ ।
आश्चर्यजनक नतिजा निकाल्दै विश्वकपको सेमिफाइनलमा पुगेको मोरक्को वरीयताको ११औं स्थानमा पुगेको छ । विश्वकपमा बेल्जियम, स्पेन र पोर्चुगलजस्ता टिमलाई पराजित गरेको मोरक्कोले वरीयतामा ११ स्थान सुधार गरेको हो ।
पाँचौं स्थानमा इंग्ल्याण्ड, नेदरल्याड्स छैटौं, क्रोएसिया सातौं स्थानमा पुगेको छ । इटली दुई स्थान खस्केर आठौं नम्बरमा पुगेको छ ।
नवौं स्थानको पोचुर्गल यथावत रहँदा तीन स्थान तल झरेको स्पेन वरीयताको दशौं नम्बरमा छ । त्यसपछि स्वीटजरल्याण्ड, अमेरिका, जर्मनी, मेक्सिको,उरुग्वे,कोलम्बिया, डेनमार्क,सेनेगल र जापान २० औं स्थानमा रहेको छ ।
यसैगरी नेपाल फिफा वरीयताको १७५औं स्थानमा यथावत छ । दक्षिण एसियाली टिममध्ये भारत सबैभन्दा माथि १०६ स्थानमा छ ।