Category: खेलकुद

काठमाडौं । नवौं राष्ट्रिय खेलकुद अन्तर्गतको पुरूष क्रिकेट प्रतियोगिता आजबाट सुरू हुने भएको छ । नवौं राष्ट्रिय खेलकुद आगामी असोज २८ देखि कात्तिक ३ सम्म गण्डकी प्रदेशमा आयोजना हुनेछ। तर, पुरूष क्रिकेट भने अगाडि नै चल्नेछ । प्रतियोगिताको पहिलो दिन बिहीबार चार खेल हुदैछन् । दुई खेल कीर्तिपुरस्थित टियु क्रिकेट मैदानमा र दुई खेल मुलपानी मैदानमा हुनेछन्। टियु क्रिकेट मैदानमा हुने उद्घाटन खेलमा एनआरएनए नेपाल टिमले सुदूरपश्चिम प्रदेशसँग प्रतिस्पर्धा गर्नेछ।

खेल बिहान ९ः१५ बजे सुरू हुनेछ। टियुमै दोस्रो खेलमा बागमती प्रदेशले प्रदेश १ को सामना गर्नेछ। मुलपानी मैदानमा आजै हुने पहिलो खेलमा मधेस प्रदेशले गण्डकी प्रदेशको सामना गर्नेछ। सो मैदानमा दोस्रो खेलमा लुम्बिनी प्रदेशले कर्णाली प्रदेशको सामना गर्नेछ। प्रतियोगितामा तीन विभागीय, सात प्रदेश तथा एनआरएन नेपालको टोली गरी ११ टिमको सहभागिता रहेको छ। सहभागी ११ टोलीलाई दुई समूहमा विभाजन गरिएको छ।

काठमाडौं । नेपाली क्रिकेट टिमका कप्तान सन्दीप लामिछानेविरुद्ध प्रहरीमा जबरजस्ती करणीको कसूरमा उजुरी परेको छ । उनीमाथि १७ वर्षकी नाबालिगमाथि बलत्कार गरेको संघीन आरोप लागेको हो । सन्दीप अहिले क्यारेवियन लीग खेलिरहेका छन् । प्रहरीका अनुसार लामिछानेले १७ वर्षकी नाबालिगलाई बलात्कार गरेको भन्दै प्रहरी वृत्त गौशालामा किटानी जाहेरी आएको हो । घटना ५ भदौको हो । उनले निजी कारमा पीडित बालिकालाई लिन उनको होस्टल छेउ पुगेका थिए ।

अपरान्ह उनलाई लिन पुगेका सन्दिपले घुम्न भन्दै नगरकोट लगेका थिए । त्यहाँ खाजा खाएर फर्किँदा राति १० बजेको बताइएको छ । उनले होस्टल राति ८ बजे बन्द हुन्छ भनेकी थिइन् । तर लामिछानेले वेवास्ता गर्दै रातिसम्म राखेको उजुरीमा उल्लेख छ । फर्किँएर आउँदा काठमाडौंको एक होटलमा बसेको र राति दुई पटक बलात्कार गरेको पीडितको भनाइ छ । प्रहरीले मंगलबार नै पीडितको स्वास्थ्य परीक्षण गराएको छ ।

काठमाडौं । घरेलु टोली केन्याविरुद्ध तीन खेलको एकदिवसीय सिरिज नेपालले जितेको छ । नैरोवीस्थित जिमखाना क्रिकेट मैदानमा शनिबार भएको दोस्रो खेलमा नेपालले केन्यालाई १७ रनले हरायो । यससँगै नेपालले एक खेल अगावै सिरिज २–० ले जितेको हो । पहिलो खेलमा नेपाल सात विकेटले पराजित भएको थियो । दुई टोली बीचको अन्तिम खेल सोमबार हुनेछ । नेपालले यसअघि केन्याविरुद्ध पाँच खेलको टी–२० सिरिज पनि ३–२ ले जितेको थियो ।

जितका लागि नेपालले दिएको २३१ रनको लक्ष्य पछ्याएको केन्या ४६।३ ओभरमा सवै विकेटको क्षतिमा २१३ रनमा समेटिएको थियो । केन्याका लागि रकिप पटेलले ८१ रन बनाए । कोलिन्स ओबुयाले ३७, नेल्सन ओधियाम्बोले २८ र गेरार्ड मुथुईले २० रन जोडे । बलिङमा नेपालका दीपेन्द्रसिंह ऐरीले चार विकेट लिए । सोमपाल कामीले तीन तथा करण केसी, आदिल अन्सारी र पवन सर्राफले एक एक विकेट विकेट लिए ।

यसअघि टस जितेर पहिले ब्याटिङ गरेको नेपालले ४९.२ ओभरमा सबै विकेटको क्षतिमा २३० रन बनाएको थियो । नेपालका लागि कप्तान रोहित पौडेलले अर्धशतकीय इनिङ्स खेले । ६७ रन बनाएका उनले ९५ बलमा सात चौका प्रहार गरेका थिए । देव खनालले ३७, सोमपाल कामीले २६, ज्ञानेन्द्र मल्लले २५, वसिर अहमदले १७, आदिल अन्सारीले १४ र करण केसी ११ रन बनाए ।

काठमाडौं । केन्याविरुद्ध पहिलो एकदिवशीय क्रिकेटमा नेपालले जित निकालेको छ । यससँगै नेपालले तीन खेलको सिरिजमा अग्रता समेत लिएको छ । आजको खेलमा ओपनर आशिफ शेखको शतक प्रहार गरे । उनले अर्जुन साउदसँग बलियो साझेदारी गरेसँगै नेपालले पहिलो एकदिवसीयमा केन्यामाथि ७ विकेटको सहज जित निकालेको हो । २१९ रनको लक्ष्य नेपालले ३ विकेट क्षतिमा ४७.३ ओभरमा भेट्टायो ।

ओपनरद्वय आशिफ र अर्जुनले पहिलो विकेटका लागि १४१ रनको साझेदारी गरे । एकदिवसीय क्रिकेटमा नेपालको यो अहिलेसम्मकै उच्च साझेदारी हो । चैतमा पपुवा न्युगिनीविरुद्ध देव खनाल र दीपेन्द्रसिंह ऐरीले तेस्रो विकेटका लागि १२९ रनको साझेदारी गरेका थिए । यद्यपि केन्याको एकदिवसीय मान्यता नभएका कारण यो खेलको एकदिवसीय अन्तर्राष्ट्रिय मान्यता हुँदैन ।

नेपालका लागि सिनियर टिमबाट पहिलो एकदिवसीय खेल खेलेका अर्जुनले ९७ बलमा ५ चौका र १ छक्कासहित ६१ रनको अर्धशतकीय पारी खेले । आशिफले दोस्रो विकेटका लागि ज्ञानेन्द्र मल्लसँग मिलेर थप ५७ रनको साझेदारी गरे । ४३.५ ओभरमा केन्याका डेब्युटेन्ट विशाल पटेलको बलमा बोल्ड हुनुअघि आशिफले १२० बलमा १२ चौका र २ छक्कासहित ११० रनको लामो पारी खेले ।

ज्ञानेन्द्र २४ रनको व्यक्तिगत स्कोरमा आउट भए । दीपेन्द्र सिंह ऐरीले अविजित १९ र कप्तान रोहितकुमार पौडेलले ३ रन बनाए । यसअघि नैरोवीस्थित जिमखाना मैदानमा टस जितेर पहिले ब्याटिङ गरेको घरेलु टोलीले ४८.१ ओभरमा अलआउट हुँदै २१८ रनको योगफल खडा गरेको थियो । बलिङमा सोमपाल कामी र करण केसीले ३–३ विकेट लिए ।

काठमाडौं । पाल र केन्याबीचको आजबाट एकदिवसीय क्रिकेट श्रृंखला सुरु हुँदैछ । नेपाल र केन्याबीच तीन खेलको एकदिवसीय सिरिज हुन लागेको छ । पहिलो खेल दिउँसो पौने एक बजे नैरोबीमा सुरु हुँदैछ । दोस्रो खेल भोलि र तेस्रो तथा अन्तिम खेल २० गते हुनेछ ।

केन्यासँगको एकदिवसीय श्रृंखलामा नेपालको कप्तानी रोहित पौडेलले गर्दैछन् । नेपालका कप्तान सन्दीप लामिछाने क्यारेबियन प्रिमियर लिग खेल्न वेस्ट इन्डिज पुगेसँगै रोहितको काँधमा महत्वपूर्ण जिम्मेवारी आएको हो । केन्यासँग यसअघि भएको पाँच खेलको टि–२० श्रृंखला नेपालले ३–२ ले जितेको छ ।

काठमाडौं । केन्याविरूद्धको निर्णायक तथा पाँचौ टी-२० खेलमा जितेको नेपालले सिरिज ३–२ ले आफ्नो कब्जामा पारेको छ। नेपालले मंगलबार भएको पाँचौ टी-२० मा केन्यालाई ३१ रनले हरायो । यसअघि नेपालले पहिलो टी-२० मा ५ विकेट र तेस्रो टी-२० मा ४ विकेटको जित निकालेको थियो। दोस्रो टी-२० मो केन्या १८ रनले विजयी हुँदा हिजो भएको चौथो टी-२० मा उसले ७ रनको जित निकालेको थियो। मंगलबार नेपालले दिएको १७६ रनको लक्ष्य पछ्याएको केन्याले ७ विकेटको क्षतिमा १४४ रन मात्र जोड्न सक्यो। केन्याका ओपनर कोलिन ओबुया २३ रन र सुखदिप सिंह ४ रनमा आउट भए। इर्फान करिमले २८ रन जोडे भने राखेप पटेल १ रन र सचिन भुडिया शून्यमा आउट भए।

ओडियाम्बोले सबैभन्दा बढी ३७ रन जोडे। २२ बलमा ४ चौका र १ छक्का हिर्काएका उनलाई बसिर अहमेदले आउट गरे। बसिरले लुकासको पनि विकेट लिने क्रममा ४ रनमा आउट गरे। यस्तै एनगोचे ३३ रनमा नटआउट रहदा नेल्शन ओडियाम्बोले नटआउट १३ रन जोडे। बलिङमा नेपालका कप्तान सन्दीप लामिछाने र बसिर अहमेदले २-२ विकेट लिए। करण केसी, आदिल अन्सारी र दीपेन्द्रसिंह ऐरीले १-१ विकेट हात पारे। त्यसअघि केन्याको नैरोबीस्थित जिमखाना मैदानमा टस जितेर ब्याटिङ गरेको नेपालले ७ विकेटको क्षतिमा १७५ रन जोड्यो।

नेपालका लागि ज्ञानेन्द्र मल्लले अर्धशतक प्रहार गरे। ओपनिङमा आएका ज्ञानेन्द्रले ५९ रन जोडे। उनले ४४ बलमा ५ चौका र २ छक्का हिर्काए। रोहितकुमार पौडेल अन्तिम ओभरको चौथो बलमा आउट हुनुअघि ४७ रन जोडे। उनले २५ बलमा ७ चौका प्रहार गरे। अर्का ओपनर अर्जुन साउदले २१ बलमा २९ रनको योगदान गरे। दीपेन्द्रसिंह ऐरीले १८ बलमा २२ रन बनाए। अब नेपाल र केन्याले तीन खेलको एकदिवसीय सिरिज खेल्नेछन्। नेपालले पहिलो खेल भदौ १७ गते खेल्नेछ भने दोस्रो खेल भदौ १८ गते तथा तेस्रो तथा सिरिजको अन्तिम खेल भदौ २० गते हुनेछ।

काठमाडौं । केन्याविरुद्ध चौथो टी–२० खेलमा नेपाल पराजित भएको छ । जितमा लागि सामान्य १०२ रनको लक्ष्य पछ्याएको नेपाल २० ओभरमा नौ विकेटको क्षतिमा ९४ रनमा समेटियो । कमजोर ब्याटिङ गरेको नेपालका लागि रोहित पौडेलले ४७ रन जोड्नु बाहेक अन्या ब्याट्सम्यानले दोहोरो अंकको रन बनाउन सकेनन् । नेपाललाई सस्तैमा समेट्न केन्याका रकिप पटेलले तीन विकेट लिए । भिराज पटेल, शेम एन्गोचे र एलिज्ह ओटिनोले दुई दुई विकेट लिए ।

यसअघि नैरोवीस्थित जिमखाना क्रिकेट मैदानमा टस जितेर पहिले ब्याटिङ गरेको घरेलु टोली केन्याले निर्धारित २० ओभरमा सबै विकेटको क्षतिमा १०१ रन बनाएको थियो । केन्याका लागि लुकास ओलुओचले सर्वाधिक ३३ रन बनाए । बलिङमा नेपालका कप्तान सन्दीप लामिछाने एक्लैले पाँच ५ विकेट लिए ।

नेपालको यस हारसँगै पाँच खेलको सिरिज २–२ को बराबरी भएको छ । अब टी–२० सिरिजको अन्तिम तथा निर्णायक खेल मंगलबार हुनेछ । त्यसपछि दुई टोलीबीच भदौ १७, १८ र २० गते एकदिवसीय सिरिज हुनेछ ।

काठमाडौं । नेपाल र केन्याबीचको तेस्रो टी–२० अन्तर्राष्ट्रिय खेल आज हुँदैछ । खेल नैरोबीस्थित जिमखाना क्रिकेट मैदान नेपाली समय अनुसार दिउँसो पौने ४ बजे सुरु हुनेछ ।

दुवै टोली आजको खेल जित्दै शृङ्खलामा अग्रता लिने योजनामा हुनेछ । पहिलो खेलमा नेपाल ५ विकेटले विजय भएको थियो भने दोस्रो खेलमा केन्याले पुनरागमन गर्दै १८ रनले जितेको थियो ।

काठमाडौं । केन्या विरुद्धको दोस्रो टी–२० अन्तर्राष्ट्रिय खेलमा नेपाल हारेको छ । मध्यम योगफल पच्छ्याएको नेपाल ब्याटिङमा पुनः एक पटक चुकेको छ । जसले गर्दा १८ रनले नेपाल हारेको छ । शुक्रबार साँझ सम्पन्न खेलमा घरेलु टोली केन्याले दिएको १३३ रनको लक्ष्य पछ्याएको नेपाल १९ ओभरमा ११४ रनमा अलआउट भयो । पहिलो खेल हारेको केन्याले दोस्रो खेलमा जित निकाल्दै पाँच खेलको शृंखला १–१ को बराबरी ग¥यो । नेपालका लागि आरिफ शेखले सर्वाधिक २५ रन बनाए । रोहित पौडेल र आदिल आलमले २०÷२० र पवन सर्राफले १९ रन बनाए ।

अन्य खेलाडीले दोहोरो अंकमा रन बनाउन सकेनन् । केन्याका एमाननुएल बुण्डी, लुकास ओलुच र भिराज पटेलले २–२ विकेट लिए । नैरोवीस्थित जिमखान क्रिकेट मैदान नेपालले टस जितेर फिल्डिङ रोजेपछि पहिले ब्याटिङ गरेको केन्याले ९ विकेट गुमाएर १३२ रन बनायो । केन्याका लागि राकेप पटेलले सर्वाधिक ३५ रन बनाए । सन्दीप लामिछाने र दीपेन्द्र सिंह ऐरीले ३÷३ विकेट लिए ।

काठमाडौं । नेपाल र केन्याबीचको दोस्रो टी–२० खेल आज हुँदैछ । खेल नैरोबीमा पौने चार बजे सुरु हुनेछ । केन्यासँगको पाँच खेलको टी–२० शृङ्खलामा नेपालले १–० को अग्रता बनाएको छ । हिजो भएको पहिलो खेलमा घरेलु टोली केन्यालाई नेपालले ५ विकेटले हराउँदै विजयी सुरुवात गरेको हो ।

नैरोबीमा जितका लागि पाएको १ सय ३१ रनको लक्ष्य नेपालले १९ ओभर २ बलमा ५ विकेट गुमाउँदै भेट्टायो । त्यसअघि टस हारेर पहिला ब्याटिङ गरेको केन्याले निर्धारित २० ओभरमा ८ विकेट गुमाउँदै १ सय ३० रन बनाएको थियो । दुई देशबीचको तेस्रो खेल आइतवार, चौथो खेल भदौ १३ मा र पाँचौँ खेल भदौ १४ गते हुनेछ । त्यस्तै नेपालले केन्यासँग तीन एकदिवसीय अभ्यास खेल पनि खेल्ने तालिका छ । तीन एकदिवसीय अभ्यास खेल भदौ १७, १८ र २० गते हुनेछ ।

काठमाडौं । युरोपियन फुटबल एसोसियशन (यूईएफए) ले च्याम्पियन्स लिग फुटबलको समूह चरणको ‘ड्र’ सार्वजनिक गरेको छ । यूईएफएले नयाँ सिजनको लागि समूह चरणको ‘ड्र’ सार्वजनिक गरेको हो । ‘ड्र’ अनुसार बार्सिलोना र बायर्न म्युनिख एकै समूहमा परेका छन् । बार्सिलोना र बायर्न समूह ‘सी’ मा परेका छन् । साविक विजेता रियल मड्रिड भने समूह ‘एफ’ मा परेको छ । समूह चरणको ‘ड्र’ अनुसार समूह ‘ए’ मा आयाक्स, लिभरपुल, नापोली र रेन्जर्स रहेका छन् ।

समूह ‘बी’ मा पोर्टो, एट्लेटिको मड्रिड, बायर लिभरकुसेन र क्लब ब्रुग, समूह ‘सी’ मा बायर्न म्युनिख, बार्सिलोना, इन्टर मिलान र भिक्टोरिया प्लेजन रहेका छन् । समूह ‘डी’ मा फ्रान्कफर्ट, टोटनहम, स्पोर्टिङ सीपी र मार्से, समूह ‘ई’ मा एसी मिलान, चेल्सी, साल्जवर्ग र डिनामो जाग्रेब रहेको छ । समूह ‘एफ’ मा साविक विजेता रियल मड्रिडसँगै लाइपजिङ्ग, शाख्तर डोनेक्स्ट र सेल्टिक रहेका छन् । समूह ‘जी’ मा म्यानचेस्टर सिटी, सेभिया, बोरुसिया डर्टमण्ड र कोपेनहेगन तथा समूह ‘एच’ मा पेरिस सेन्ट जर्मेन (पीएसजी), युभेन्ट्स, बेन्फिका र हाइफा रहेका छन् ।

काठमाडौं । नेपाल र केन्याबीच अन्तर्राष्ट्रिय क्रिकेट सिरिज आजबाट शुरु हुँदैछ । केन्यासँगको पाँच टी–२० अन्तर्राष्ट्रिय शृंखला र तीन वटा एक दिवसीय ऋङ्खला खेल्न नेपाल केन्या पुगेको हो । पहिलो टी२० खेल आज हुँदैछ ।

नेपाल र केन्याबीच पहिलो पटक टी–२० अन्तर्राष्ट्रिय मान्यता प्राप्त खेल हुदैछ । नेपालका नवनियुक्त मुख्य प्रशिक्षक मनोज प्रभाकरको लागि पनि नेपाली टिमबाट यो पहिलो शृंखला हुनेछ ।

काठमाडौं । विश्व फुटबलको सर्वोच्च निकाय फिफाले भारतमाथि प्रतिबन्ध लगाएको भारतीय सञ्चारमाध्यमले जनाएका छन् । अल इन्डिया फुटबल फेडेरेसन (एआईएफएफ) मा फुटबलभन्दा बाहिरी शक्ति हावी भएको निष्कर्षमा फिफा पुगेको छ । उसले अनिश्चितकालीन प्रतिबन्ध लगाएको समाचारमा उल्लेख छ । प्रशासनिक समस्या समाधान गर्न भएको सहमतिको ‘रोडम्याप’बाट अखिल भारतीय फुटबल महासंघ विचलित भएपछि फिफाले मंगलबार प्रतिबन्ध लगाउने निर्णय गरेको समाचारमा जनाइएको छ ।

रोडम्याप अनुसार एआईएफएफले फिफा, एएफसी र भारतीय फुटबल समुदायसँग छलफल गरी बनाएको नयाँ विधानलाई अनुमोदन गर्न अगस्ट २०२२ को पहिलो साता विशेष साधारणसभा बोलाउने निर्णय भएको थियो । त्यसबीचमा सर्वोच्च अदालतको सुनुवाइले माथि उल्लिखित रोडम्यापमा विचलन हुने सूचित भएपछि फिफाले प्रतिवन्धको निर्णय लिएको जनाएको छ । भारतको सर्वोच्च अदालतले गत मेमा भारतीय फुटबल संघ (एआईएफएफ) लाई विघटन गरेर तीन सदस्यीय तदर्थ समिति बनाई खेलको व्यवस्थापन, विधान संशोधन र १८ महिनादेखि हुन नसकेको निर्वाचन गराउने जिम्मेवारी दिएको थियो ।

फिफाले भने यस्तो कदम नचाल्न भनेको थियो । एआईएफएफका अध्यक्षको कार्यकाल डिसेम्बर २०२० मा सकिएको छ । भारतमा खेलकुद संघमा तीन कार्यकालभन्दा बढी अध्यक्ष हुन नपाउने नियम छ । १२ वर्ष एआईएफएफको अध्यक्ष एउटै व्यक्ति बनेपछि विवाद चुलिएको हो । फिफाको यस निर्णयसँगै भारतले अब अन्तर्राष्ट्रिय रुपमा क्लब तथा राष्ट्रिय टोलीको प्रतियोगिता खेल्न पाउँदैन ।

काठमाडौं । विवादित क्षवि बनाएपनि पशिक्षणमा हेविवेट व्यक्तित्व मानिने नेपाली राष्ट्रिय क्रिकेट टिमका नवनियुक्त मुख्य प्रशिक्षक मनोज प्रभाकर काठमाडौं आईपुगेका छन्। मुख्य प्रशिक्षक प्रभाकर शनिबार साँझ काठमाडौँ अवतरण गरे । उनलाई क्रिकेट संघ नेपालका पदाधिकारीले त्रिभुवन विमानस्थलमा स्वागत गरे । सो अवसरमा मुख्य प्रशिक्षक प्रभाकरले नेपाली क्रिकेट र खेलाडीका बारे आफू जानकार रहेको बताए । टीममा छिट्टै परिवर्तन देखिने उनको भनाई छ ।

मुख्य प्रशिक्षक प्रभाकरले आफ्नो क्रिकेटको अनुभवले नेपाली क्रिकेट खेलाडीलाई अरूभन्दा फरक तरिकाले प्रशिक्षण दिन सक्ने समेत बताए । मुख्य प्रशिक्षक पुबुदु दासानायकेको अकस्मात आएको राजीनामा पछि क्यानले प्रभाकरलाई नियुक्त गरेको हो। मुख्य प्रशिक्षक प्रभाकरको करार एक वर्षको हो । भारतका पूर्व अलराउण्डर प्रभाकर रणजी ट्रफी विजेता प्रशिक्षक हुन्। मुख्य प्रशिक्षकका रुपमा प्रभाकरको पहिलो प्रतियोगिता केन्याविरुद्ध हुने भएको छ।

नेपाली क्रिकेट पछिल्लो समय एकता नभएको आरोपसँगै विवादमा छ । पछिल्लो पटक नेपालले स्कटल्याण्ड भ्रमण गर्दा नेपाली राष्ट्रिय टिमले अपेक्षा अनुसारको नतिजा निकाल्न सकेन। चार खेलमध्ये एक खेलमा जित नतिजा निकालेको नेपालले बाँकी तीन खेल गुमाएको थियो । जसबाट माथि उठेर टीममा एकता ल्याउनु प्रशिक्षकको पहिलो दायित्व हुने छ । नेपालको समस्या ब्याटिङमा देखिएको छ ।

काठमाडौं । आगामी नोभेम्बर–डिसेम्बरमा कतारले आयोजना गर्ने फिफा विश्वकप फुटबलको मिति एक दिन अगाडी सरेको छ । यसअघि नोभेम्बर २१ देखि विश्वकप सुरु हुने तालिका थियो । तर अब एक दिन अघि अर्थात नोभेम्बर २० मै विश्वकप सुरु हुनेछ । जसमा आयोजक कतारले इक्वेडरसँग उद्घाटन खेल खेल्नेछ । यसअघिको तालिका अनुसार कतार र इक्वेडरबीचको खेल नोभेम्बर २१ मा तेस्रो खेलको रुपमा थियो । जसले गर्दा नेदरल्याण्ड्स र सेनेगलबीचको खेल विश्वकपको पहिलो खेल हुने तय थियो ।

तर आयोजकले विश्वकपको पहिलो खेल खेल्दै आएको चलनलाई निरन्तरता दिन विश्वकप एक दिन अगाडि सारिएको हो । आयोजक देश कतार र विश्व फुटबलको सर्वोच्च निकाय फिफाबीचको छलफलपछि खेल एक दिन अघि सारिएको हो । कतार र इक्वेडरबीचको खेल अघिल्लो दिन सारेपछि अब नोभेम्बर २१ मा तीन खेल मात्र हुनेछ । जसमा समूह ‘ए’ का नेदरल्याण्ड्स र सेनेगल तथा समूह ‘बी’ का इंग्ल्याण्ड र इरान तथा वेल्स र अमेरिकाबीच खेल हुनेछ । उद्घाटन खेलकै दिन नेपालमा मतदान हुँदैछ ।

काठमाडौं । नेपाली राष्ट्रिय क्रिकेट टोलीले केन्यासँग खेल्ने टी–२० अन्तर्राष्ट्रिय तथा एकदविसीय सिरिजको खेल तालिका सार्वजनिक भएको छ ।

नेपाल क्रिकेट संघ (क्यान)ले मंगलबार सिरिजको तालिका सार्वजनिक गरेको हो ।

सार्वजनिक गरेको खेल तालिकाअनुसार नेपालले पाँच खेलको टी–२० अन्तर्राष्ट्रिय तथा तीन खेलको एकदिवसीय सिरिज खेल्नेछ ।

टी–२० अन्तर्राष्ट्रिय सिरिज अगस्ट २५ देखि ३० सम्म हुनेछ ।

नेपाललले केन्यासँग २५, २६, २८, २९ र ३० अगस्टमा टी–२० अन्तर्राष्ट्रिय खेल खेल्नेछ । त्यस्तै, एकदिवसीय सिरिज सेप्टेम्बर २ देखि ५ सम्म हुनेछ । नेपालले २, ३ र ५ सेप्टेम्बरमा एकदिवसीय खेल खेल्नेछ ।

त्यस्तै क्यानले सन्दीप लामिछानेको कप्तानीमा १६ सदस्यीय टोलीको समेत घोषणा गरेको छ । क्यानले घोषणा गरेको टोलीमा पूर्व कप्तान ज्ञानेन्द्र मल्लले पुनरागमन गरेका छन् ।

नियमित रहँदै आएका कुशल भुर्तेल र विनोद भण्डारी टोलीबाट बाहिरिएका छन् । यस्तै ४ खेलाडीलाई वैकल्पिक खेलाडीको रुपमा राखिएको छ ।

नेपाली टोली नवनियुक्त मुख्य प्रशिक्षक मनोज प्रभाकरको नेतृत्वमा केन्या भ्रमणमा जानेछ ।

काठमाडौं । नेपाल क्रिकेट संघ क्यानले राष्ट्रिय टिमको मुख्य प्रशिक्षकमा भारतीय पूर्व अलराउण्डर मनोज प्रभाकरलाई नियुक्त गरेको छ । विवादित छवि बनाएका प्रभाकरलाई क्यानले प्रशिक्षक बनाएको हो । उनीमाथि खेल मिलेमतोको आरोप लागेको थियो । सन् १९९९ मा भारतीय सञ्चार संस्था तेहल्काले स्टिङ अप्रेसन गर्दै उनीमाथि खेल मिलेमतोको आरोप लगाएको थियो । त्यसपछि भारतीय क्रिकेट कन्ट्रोल बोर्ड बीसीसीआईले उनलाई भारतीय टिमबाट खेल्न प्रतिबन्ध लगाएको थियो । प्रतिबन्ध लाग्नुअघि उनले भारतका लागि ३९ टेष्ट र १३० ओडीआई क्रिकेट खेलेका थिए ।

सन् २०११ मा रणजी ट्रफीका लागि दिल्लीको प्रशिक्षक रहेका उनले खेलाडी र छनोटकर्ताको आलोचना गरेका थिए । त्यसपछि उनी रणाजी ट्रफी सुरु हुनु दुई दिनअघि बर्खास्तीमा परेका थिए । उनी २००८ बलिङ कोच रहेका बेला दिल्लीले रणजी ट्रफी जितेको थियो । सन् २०१५ मा अफगानिस्तानको बलिङ कोच रहेका उनले २०१६ को टी २० विश्वकपमा पनि प्रशिक्षण दिए । अफगानिस्तानको प्रशिक्षकबाट हटेको ७ वर्षपछि उनले नेपाली टिमलाई प्रशिक्षण दिने मौका पाएका हुन् । प्रभाकरलाई करिब १५ हजार डलरमा अनुबन्ध गरिएको हो ।

काठमाडौं । साफ यू-२० च्याम्पियनसिप प्रतियोगितामा नेपालले भारतसँग लज्जास्पद हार बेहोरेको छ । सुरुवाती दुई खेलमा शानदार जित निकालेको नेपाल भारतसँग भने निरिह सावित भएको छ । नेपालको पोष्टमा भारतले ८ गोल छिरायो । माल्दिभ्स र श्रीलंकालाई भने नेपालले पराजित गरेको थियो । भारत विरुद्ध भने एक गोल पनि फर्काउन सकेन । पहिलो हाफमा एक गोल गरेको भारतले दोस्रो हाफमा गोलको वर्षा गर्दै ७ गोल थप्यो । या हारसँगै नेपालको फाइनलको यात्रा समेत कठिन बनेको छ ।

तीन खेलबाट नेपालको ६ अंक छ । उति नै खेलबाट ६ अंक जोडेको भारत हेड टु हेड र गोल अन्तर दुवैमा नेपाल भन्दा अगाडी बढेको छ । बंगलादेश तीन खेल जितेर ९ अंकसहित शीर्ष स्थानमा छ । अब नेपालले फाइनल पुग्न अन्तिम खेलमा बंगलादेशलाई हराउनु पर्नेछ । अर्को खेलमा भारत माल्दिभ्ससँग पराजित वा बराबरीमा रोकिएको अवस्थामा मात्र नेपाल फाइनल पुग्नेछ ।