काठमाडौं । नेपालमा कोरोना भाइरसको संक्रमित संख्या पछिल्लो २४ घण्टामा १९४६ जना थप भएका छन् । यससँगै अब नेपालमा कुल संक्रमितको संख्या २ लाख ८ हजार २ सय ९९ पुगेको छ । स्वास्थ्य तथा जनसङ्ख्या मन्त्रालयका अनुसार २४ घण्टामा २ हजार ५ सय ३ जनाले भने कोरोना जित्न सफल भएका छन् ।
अब नेपालमा कोरोना जित्नेको संख्या भने १ लाख ७० हजार ६ सय ३२ पुगेको छ । मन्त्रालयका अनुसार नेपालमा ३६ हजार चार सय ५३ जना सक्रिय सङ्क्रमित आइसोलेशनमा छन् । १ हजार ५७ जना भने क्वरेण्टीनमा छन् ।
काठमाडौं । स्वास्थ्य अभियन्ता डा. गोविन्द केसी अहिले कोरोना भाइरसको संक्रमणसँग लडिरहेका छन् । उनलाई प्रधानमन्त्री केपी शर्मा ओलीले शुक्रबार टुइटमार्फत निःशुल्क उपचार गर्ने बताएका थिए । प्रधानमन्त्रीले सामाजिक चर्चाका लागि गरेको उक्त टुइटको डा. केसीले प्रतिवाद गरेका छन् ।
आफ्नो उपचार आफै गर्न सक्ने नागरिकको व्यक्ति विशेषको उपचारको जिम्मा लिनु भन्दा आम नागरिकलाई निःशुल्क उपचारको व्यवस्था मिलाउन डा. केसीले प्रधानमन्त्रीको ध्यानाकर्षण गराएका छन् । डा. केसीले आफ्नो स्वास्थ्य लाभको कामनाका लागि भने डा. केसीलाई धन्यवाद समेत दिएका थिए ।
‘कोरोना संक्रमित विपन्न र दूरदराजका नागरिक, जसलाई निःशुल्क उपचार आवश्यक छ । उनीहरुले अहिलेसम्म उपचार पाउन सकेका छैनन्’ डा. केसीले भनेका छन्, ‘सरकारको ध्यान व्यक्ति विशेषको उपचार खर्च बेहोर्नु भन्दा सबै विपन्न नागरिकको उपचार खर्च बेहोर्नेमा हुनुपर्दछ ।’
उनले आफ्नो १९ औँ सत्याग्रहमा भएका सम्झौता यथाशीघ्र कार्यान्वयन गर्न समते अग्रह गरेका छन् । ‘पटकपटक भएको सम्झौता कार्यन्वयन भएको भए दूरदराजदेखि सबै भेगमा ठूला सरकारी अस्पताल, मेडिकल कलेज बन्ने थिए र त्यहाँका नागरिकले कोरोना साथसाथै सम्पूर्ण रोगको गुणस्तरीय, निःशुल्क, सर्वसुलभ स्वास्थ सेवा पाउने थिए’ उनले भनेका छन् ।
काठमाडौं । फिफा विश्वकप फुटबलको छनोटमा ब्राजिलले भेनेजुएलालाई पराजित गरेको छ । दक्षिण अमेरिकी छनोट अन्तर्गत आज बिहान सम्पन्न खेलमा ब्राजिलले भेनेजुएलालाई १ ० गोलले हराएको हो । घरेलु मैदानमा ब्राजिललाई जित दिलाउन रोबर्टो फिर्मिन्होले गरेको गोल नै निर्णायक बन्यो ।
पहिलो हाफ गोलरहित बराबरीमा सकिएको थियो । खेलको ६७ औं मिनेटमा फिर्मिन्होले गोल गरे । जितपछि ब्राजिल दक्षिण अमेरिकी छनोटको शीर्ष स्थानमा उक्लिएको छ । ब्राजिलले ३ खेलबाट ९ अंक जोडेको छ । यसअघि शुक्रबार भएको खेलमा अर्जेटिना र पाराग्वेले एक एक गोलको बराबरी खेलेका थिए ।
काठमाडौं । तिहारको बिदाको अवसर पारी आजबाट तीन दिनसम्म बैंक तथा त्यसका शाखा बन्द भएका छन् । तिहारको बिदा अवधि शनिबार, आइतबार र सोमबार सबै बैंक र शाखा बन्द हुने नेपाल बैंकर्स संघले जानकारी दिएको छ । यसअघिका वर्षहरुमा बैंक तथा वित्तीय संस्थामा कुनै न कुनै माध्यमबाट सेवा प्रवाह जारी रहन्थ्यो ।
यो वर्ष कोरोना भाइरसको संक्रमणका कारण सिमित कर्मचारीको भरमा बैंकहरु चलिरहेका छन् । सोहीकारण सबै बैंक तथा वित्तीय संस्था बन्द हुन लागेको हो । सबै बैंकका शाखा बन्द भए पनि डिजिटल बैंकिङ्ग र एटीएम सेवा सूचारु रहने छन् ।
संघले कोरोना भाइरस सङ्क्रमणबाट बच्न तथा जोखिम न्यूनीकरणका लागि डिजिटल बैंकिङ्ग, मोबाइल बैंकिङ्ग, इन्टरनेट बैंकिङ्ग र एटीएम सेवाको अधिकतम प्रयोग गर्न आग्रह समेत गरेको छ । बैंक तथा वित्तीय संस्थाका करीव ६ हजार भन्दा बढी कर्मचारीलाई कोरोना संक्रमण भइसकेको छ ।
काठमाडौं । नेपाली कांग्रेसले सुनिलबहादुर थापालाई सहमहामन्त्री बनाएको छ। शुक्रबार बसेको केन्द्रीय समिति बैठकले थापालाई सहमहामन्त्री बनाउने निर्णय गरेको हो । बैठकले थापासँगै कांग्रेसमा प्रवेश गरेका ६ जना नेतालाई समेत केन्द्रीय सदस्य बनाउने निर्णय समेत गरेको पार्टी कार्यालयले जनाएको छ ।
अब रामप्रसाद भट्टराई, विष्णुविक्रम थापा, बाबुराम बस्नेत, वृजलाल यादव, किरण गिरी र टि.एन. योगीलाई कांग्रेसका केन्द्रीय सदस्य बनेका छन् । दिलिप राई आशाराम चौधरी र राजेशबहादुर सिंहलाई आमन्त्रित केन्द्रीय सदस्य बनाउने निर्णय समेत पार्टीले गरेको छ । थापा राप्रपा संस्थापक अध्यक्ष सूर्यबहादुर थापाका पुत्र हुन् ।
काठमाडौं । आज महाकवि लक्ष्मीप्रसाद देवकोटाको ११२ औं जन्मजयन्ती मनाइदैछ । देवकोटाको जन्म विसं १९६६ मा कार्तिक कृष्ण औंसी अर्थात् लक्ष्मीपूजाका दिन काठमाडौंको डिल्लीबजारमा भएको हो । दश वर्षका उमेरमा कविता लेख्न शुरु गरेका उनी नेपाली साहित्य क्षेत्रका कहिल्यै नअस्ताउने श्रष्टाका रुपमा रहेका छन् ।
देवकोटाले नेपाली साहित्यलाई महाकाव्य, खण्डकाव्य, निबन्ध, कथा, नाटक, उपन्यास, गीत, समालोचना र फुटकर कवितामार्फत अतुलनीय योगदान गरेका छन् । देवकोटाको ‘मुनामदन’ खण्डकाव्य नेपाली भाषामा प्रकाशित हालसम्म सबैभन्दा बढी बिक्री भएको पुस्तक हो ।
नाट्यसम्राट बालकृष्ण समले देवकोटाको सम्मानमा भनेका थिए, उनी ‘मुनामदन’, ‘शाकुन्तल’ महाकाव्य र ‘पागल’ कवितासँगै तीन पटक जन्मिएका थिए ।
विदेशी भाषामा नेपाली कृतिको अनुवाद र विदेशमा भएका विभिन्न सम्मेलनमा नेपालको प्रतिनिधित्व गरी महाकविले नेपाली साहित्यको विश्वव्यापी प्रचारप्रसारमा समेत उनले महत्वपूर्ण योगदान गरेका छन् ।
उनी विसं २०१६ मा उनी शिक्षा तथा स्वायत्त शासनमन्त्री भएका थिए । त्यसमय उनले नेपालभर नेपाली भाषालाई अनिवार्य विषयका रूपमा लागू गराएका थिए ।
काठमाडौं । नेपालीको दोस्रो ठूलो चाड तिहार अन्तर्गत आज कुकुर तिहार र लक्ष्मी पूजा एकैदिन मनाइदैछ । यमपञ्चकको दोस्रो दिन कुकुर तिहार र तेस्रो दिन लक्ष्मी पूजा मनाइने गरेकोमा यो वर्ष तीथिमा भएको परिवर्तनले यी दुबै पर्व एकै दिन मनाउनु पर्ने भएको हो ।
नेपाल पञ्चांग निर्णायक समितिका अनुसार आजै बिहान नदी, तलाउ वा धारामा गई स्नान गरेर सालका पातमा यमदीप दक्षिण दिशामा फर्काई बालेर नरक बगाउने गरिन्छ । आज घरको पहरेदार मानिने कुकुरको पूजा गरी मिठा परिकार खुवाइन्छ ।
लक्ष्मीपूजा समेत आजै परेका कारण साँझ ऐश्वर्य, धन धान्य र सम्पन्नताकी देवी लक्ष्मीको पूजाआराधना गरिन्छ । सफासुग्घर र लिपपोत नगरिएको घरमा लक्ष्मीले बास गर्दिनन् भन्ने मान्यता छ ।
सोहीकारण आज घर सफासुग्घर र गाईको गोबर एवं रातोमाटोले लिपपोत गरी दीपावली गरिन्छ । दीपावली गरिसकेपछि पूजा कोठामा दियो, कलश र गणेशसहित लक्ष्मी स्थापना गरेर गरगहना, पैसा, धान, चामल, फलफूल, सेलरोटी र फूलमाला चढाई विधिपूर्वक लक्ष्मीको पूजाआरधना गर्ने प्रचलन रहेको छ ।
काठमाडौं । नेपालबाट हङकङ जाने यात्रुले निजी ल्यावमा कोरोना परीक्षण गरेमा उडान अनुमति नपाउने भएका छन् । नेपाल वायुसेवा निगमले अब सरकारी ल्याबमा मात्र कोरोना परीक्षण गर्नुपर्ने शर्त राखेको छ ।
नेपालबाट पीसीआर नेगेटिभ रिर्पोट लिएर हङकङ पुगेका यात्रुमा परीक्षण गर्दा संक्रमण पुष्टि भएपछि हङकङले तेस्रो पटक नेपाल एयरलाइन्सलाई उडानमा दुई साता प्रतिवन्ध लगाएको छ । सोहीकारण अब नेपाल एयरलाइन्सले पनि निजी ल्यावको परीक्षणलाई मान्यता नदिने निर्णय लिएको हो ।
उक्त मुलुकमा लागेको प्रतिवन्धका कारण कम्पनीले करोडौं घाटा बेहोर्नु परेको भन्दै आज नेपाल वायुसेवा निगम सञ्चालक समितिले सरकारी ल्यावको आरटी पीसीआर रिर्पोटलाई मात्र मान्यता दिने निर्णय गरेको हो । यो शर्त हङकङका लागि मात्र लागु हुनेछ । अन्य गन्तब्यमा भने निजी ल्याबको रिर्पोट समेत मान्य हुनेछ ।
काठमाडौं । बंगलादेश र नेपालबीचको अन्तर्राष्ट्रिय मैत्रीपूर्ण फुटबलमा नेपाल पराजित भएको छ । शुक्रबार ढाकास्थित बंगबन्धु नेशनल स्टेडियममा भएको खेलमा घरेलु टोली बंगलादेशले नेपाललाई २-० गोल अन्तरमा हरायो ।
बंगलादेशले खेलको दुवै हाफमा एक एक गोल गर्दै खेल आफ्नो पक्षमा पार्यो । खेलको दशौँ मिनेटमै मोहम्मद नविन नेवाज जीवनले गोल गर्दै बंगलादेशलाई अग्रता दिलाए । नेपालले खेलमा सुधार गरेको भएपनि अवसरहरुलाई गोलमा परिणत गर्न सकेन ।
८०औं मिनेटमा महबुबुर रहमानले एकल प्रयासमा गोल गरे । नेपाल एक साताको तयारीमा बंगलादेश पुगेको हो । मैत्रीपूर्ण खेलको सिरिज अन्तर्गत दोस्रो खेल नेपालले बंगलादेशसंग यही नोभेम्बर १७ तारिखमा खेल्ने कार्यक्रम रहेको छ ।
सन् २०१८ मा बंगलादेशमै भएको साफ च्याम्पियनसिपछि नेपाल र बंगलादेश एक आपसमा भिडेका हुन् । त्यो बेला नेपालले बंगलादेशलाई २-० ले हराएको थियो । आजको खेलमा तीन युवा खेलाडीले डेब्यु गरे । युवा डिफेण्डर विकास खवास, मिडफिल्डर एरिक विष्ट र दर्शन गुरुङले आज देशका लागि खेल्ने मौका पाए ।
काठमाडौं । नेपालमा पछिल्लो २४ घण्टामा थप २१११ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार २४ घण्टामा देशभरका प्रयोगशालामा गरिएको परीक्षणमा २१११ जनामा कोरोना संक्रमण पुष्टि भएको हो ।
यससँगै कुल संक्रमितको संख्या २ लाख ६ हजार हजार ३३५ पुगेको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ३५३७ जना निको भइ घर फर्केका छन्। यो सँगै नेपालमा एक लाख ६८ हजार १२९ जना संक्रमित उपचारपछि निको भएका छन्।
हालसम्म सक्रिय संक्रमितको संख्या ३७ हजार २२ जना रहेका छन् ।
पछिल्लो २४ घण्टामा प्रदेश १ को इलाम ४, उदयपुरमा ७, ओखलढुंगामा १, खोटाङमा ३, झापामा ५६, ताप्लेजुङमा १, तेह्रथुममा ५, धनकुटामा ३, पाँचथरमा ४, भोजपुरमा ४, मोरङमा १०८, सोलुखुम्बुमा ३ र सुनसरीमा १०८ जनामा कोरोना भेटिएको छ।
प्रदेश २ को धुनषामा १५, पर्सामा ७, बारामा २, महोत्तरीमा ७, रौतहटमा ३, सप्तरीमा १६, सर्लाहीमा ६ र सिरहामा १९ जनामा कोरोना पाइएको छ।
बागमती प्रदेशको काठमाडौंमा मात्र ९ सय १९ जनामा कोरोना पुष्टि भएको छ। काभ्रेमा ४०, चितवनमा १४, दोलखामा ७, धादिङमा १७, नुवाकोटमा १७, भक्तपुरमा १०८, मकवानपुरमा २५, रसुवामा १, रामेछापमा ३, ललितपुरमा १८०, सिन्धुलीमा ६ र सिन्धुपाल्चोकमा ९ जनामा कोरोना भेटिएको मन्त्रालयले जनाएको छ।
गत २४ घण्टामा गरिएको परीक्षणमा गण्डकी प्रदेशको कास्कीमा ७६, गोरखामा ५, तनहुँमा ४, नवलपरासी पूर्वमा ४७, पर्वतमा ३, माग्दीमा २, लमजुङमा २, वागलुङमा ६ र स्याङजामा १० जनामा कोरोना पुष्टि भएको छ।
लुम्बिनी प्रदेशको कपिलवस्तुमा ५, गुल्मीमा ६, दाङमा ८, नलवपरासीमा ७, पाल्पामा १९, प्यूठानमा ४, बर्दियामा २५, बाँकेमा ३३, रोल्पामा ७ र रुपन्देहीमा ४० जनामा कोरोना पाइएको छ।
यस्तै, कर्णाली प्रदेशको दैलेखमा १, रुकुम पश्चिममा १, सल्यानमा २ र सुर्खेतमा ३ जनामा कोरोना पुष्टि भएको छ।
सुदूरपश्चिमको हुम्लामा १, अछाममा १, कञ्चनपुरमा ११, कैलालीमा ४१, डोटी ९, दार्चुलामा ३, बझाङमा ४ जनामा कोरोना भेटिएको मन्त्रालयले जनाएको छ।
काठमाडौं । स्वास्थ्य तथा जनसंख्या मन्त्रालयलाई अमेरिकी सरकारले १ सय थान भेन्टिलेटर सहयोग गरेको छ। शुक्रबार स्वास्थ्य तथा जनसंख्यामन्त्री भानुभक्त ढकाललाई अमेरिकी राजदूत र्यान्डी बेरीले शुक्रबार मन्त्रालयमा १ सय थान भेन्टिलेटर हस्तान्तरण गरेका हुन्।
कोरोना संक्रमणबाट गम्भीर भएका बिरामीलाई उपचार गर्न भेन्टिलेटर आवश्यक हुन्छ। नेपालमा पर्याप्त भेन्टिलेटर नहुँदा सबै गम्भीर बिरामीले उपचार पाउन सकेका छैनन्। यही समस्यालाई दृष्टिगत गरी अमेरिकी सरकारले नेपाललाई भेन्टिलेटर सहयोग गरेको हो।
मन्त्री ढकालले भेन्टिलेटर सहयोगका लागि अमेरिकी सरकार र राजदूत बेरीलाई धन्यवाद दिँदै अति आवश्यक स्वास्थ्य संस्थामा भेन्टिलेटर प्रयोग गर्ने बताए। नेपालमा पछिल्लो समय कोरोना संक्रमितको संख्या बढेसँगै भेन्टिलेटर र आइसियूमा उपचार गराउने गम्भीर संक्रमितको संख्या पनि बढ्दै गएको छ।
स्वास्थ्य मन्त्रालयको बिहीबारको तथ्यांकअनुसार ८७ जना भेन्टिलेटरमा र ३ सय ७३ जना संक्रमित आइसियूमा उपचाररत छन्।
नेपालमा बिहीबारसम्म १ हजार १८९ जना संक्रमितको मृत्यु भएको छ। तीमध्ये अधिकांश भेन्टिलेटरमा उपचार गराइरहेका गम्भीर बिरामी रहेको चिकित्सकको भनाइ छ।
काठमाडौं । नेपालमा कोरोना भाइरसको संक्रमणबाट थप १३ जनाको मृत्यु भएको छ।
स्वास्थ्य तथा जनसंख्या मन्त्रालयको अनुसार पछिल्लो २४ घण्टामा देशभर कोरोना संक्रमणबाट थप १३ जनाको मृत्यु भएको हो ।
यो सँगै कोरोना संक्रमित मृतकको संख्या १ हजार २ सय २ पुगेको स्वास्थ्य तथा जनसंख्या मन्त्रालयले जनाएको छ। यसअघि विहिबार १५ जनाको मृत्यु भएको थियो।
काठमाडौं । काठमाडौं उपत्यकामा थप १२०७ जनामा कोरोना भाइरसको संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार पछिल्लो २४ घण्टामा थप १२०७ जनामा कोरोना संक्रमण पुष्टि भएको हो ।
मन्त्रालयका अनुसार काठमाडौंमा ९१९, भक्तपुरमा १०८ र ललितपुरमा १८० जना नयाँ कोरोना संक्रमित थपिएका छन्।
काठमाडौं । नेपालमा पछिल्लो २४ घण्टामा थप २१११ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार २४ घण्टामा देशभरका प्रयोगशालामा गरिएको परीक्षणमा २१११ जनामा कोरोना संक्रमण पुष्टि भएको हो ।
यससँगै कुल संक्रमितको संख्या २ लाख ६ हजार हजार ३३५ पुगेको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ३५३७ जना निको भइ घर फर्केका छन्। यो सँगै नेपालमा एक लाख ६८ हजार १२९ जना संक्रमित उपचारपछि निको भएका छन्।
हालसम्म सक्रिय संक्रमितको संख्या ३७ हजार २२ जना रहेका छन् ।
काठमाडौं । आज सत्तारुढ नेपाल कम्युनिस्ट पार्टी (नेकपा) सचिवालय बैठक बस्दैछ । प्रधानमन्त्री केपी शर्मा ओलीले लामो समयदेखि आनाकानी गर्दै आएको बैठक कार्यकारी अध्यक्ष प्रचण्डले आफै डाकेर एक्सन लिने चेतावनीपछि बस्न तयार भएको हो ।
सचिवालय बैठक अघि अध्यक्ष पुष्पकमल दाहाल प्रचण्डले बिहीबार सचिवालय सदस्यसँग अनौपचारिक छलफल गरेका छन् । प्रचण्डले नेताद्वय झलनाथ खनाल र माधवकुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठसँग छलफल गरेका हुन् ।
पाँच नेताबीच आजको बैठकमा एकमतका साथ प्रस्तुत हुने सहमति जुटेको छ । सरकार संचालनका दौरान पार्टीको निर्देशन नमानेको, पार्टीमा विभाजन ल्याउन खालका अभिव्यक्ति र गतिविधि गरेको दिएको आरोप नेताहरुले प्रधानमन्त्रीलाई लगाएका छन् ।
बैठक शुक्रबार अपरान्ह ४ बजे बोलाइएको छ । यसअघि यी पाँच सदस्यले बैठक बोलाउन प्रधानमन्त्रीलाई निकै पटक अल्टीमेटम दिएका थिए । प्रधानमन्त्रीले भने आनाकानी गरेका थिए ।
काठमाडौं । अन्तर्राष्ट्रिय मैत्रीपूर्ण फुटबल खेलमा आज नेपाल र बंगलादेश भिड्दैछन् । एक साता अगाडी बंगलादेश पुगेको नेपाली राष्ट्रिय फुटबल टिमले आज नेपाली समय अनुसार पौने ५ बजे बंगलादेशको सामना गर्नेछ । नेपाल र बंगलादेशबीच ढाकास्थित बंगबन्धु रङ्गशालामा प्रतिस्पर्धा हुनेछ ।
मुजिब वर्ष फिफा अन्तर्राष्ट्रिय फुटबल सिरिज नाम दिइएको यस सिरिजमा नेपाल र बंगलादेशबीच दुई खेल हुनेछन् । पहिलो खेल आज हुनेछ । दोस्रो खेल भने मङ्सिर २ मा रहेको छ । कोरोना भाइरसको महामारीपछि नेपाल पहिलो पटक अन्तर्राट्रिय प्रतियोगितामा खेल्न लागेको हो ।
बंगलादेशसँग खेल्दा नेपालले २०२१ मा हुने फिफा विश्वकप छनोट र फिफा वरीयतालाई महत्व दिएको छ । नेपाल र बंगलादेशबीच कुल १९ पटक प्रतिस्पर्धा भएको छ ।
यसमा १२ पटक बंगलादेश विजयी भएको छ । नेपालले ६ खेल आफ्नो पक्षमा पारेको छ । १ खेल बराबरी भएको छ । पछिल्लो पटक सन् २०१८ मा बंगलादेशमा साफ च्याम्पियनसिप अन्तर्गतको भिडन्तमा नेपालले बंगलादेशलाई हराएको थियो ।
काठमाडौं । प्रमुख प्रतिपक्षी दल नेपाली कांग्रेसको केन्द्रिय समिति बैठक आजका लागि बोलाइएको छ । पार्टी केन्द्रिय कार्यालय सानेपामा दिउँसो एक बजे बोलाइएको बैठकमा पार्टीको आसन्न १४ औं महाधिवेशनको मिति तय गर्ने सम्भावना रहेको छ ।
पार्टी कार्यालयका अनुसार यसबाहेक पार्टीको आन्तरिक विवादका विषयमा समेत छलफल हुनेछ । महाधिवेशन नजिकिएको सन्दर्भमा सभापति शेरबहादुर देउवा र वरिष्ठ नेता रामचन्द्र पौडेल समूहबीच असन्तुष्टि समेत बढिरहेको छ ।
देउवाको कार्यशैलीप्रति पौडेलले चित्त बुझाउन सकेका छैनन् । खासगरी विभागहरुको गठन र मनोनयनमा सभापतिले एकलौटी गरेको उनको आरोप छ ।
कांग्रेस महाधिवेशन फागुनमा गर्ने तयारी छ । यद्दपी कोरोना भाइरसको संक्रमण र जोखिमका कारण मिति पर सार्न सक्ने सम्भावना समेत रहेको छ ।
काठमाडौं । नेपालीहरुको दोस्रो ठूलो चाड तिहारअन्तर्गत आज काग तिहार परेको छ । यमदूतका रुपमा आज कागलाई पूजा गर्ने प्रचलन रहेको छ । कागलाई मनपर्ने खाना खान दिने र पूजा गर्ने प्रचलन रहेको छ ।
कागले यमराजसम्म राम्रो सन्देश पुर्याइदिने धार्मिक विश्वास लिइन्छ । त्यसो त सूचना प्रविधिको जमाना शुरु नभएको बेला कागलाई सन्देशबाहक पंक्षीका रुपमा लिने गरिन्थ्यो । घरमा आएर काग कराएमा कुनै न कुनै सन्देश प्राप्त हुने विश्वास नेपाली समाजमा अहिले पनि रहेको छ ।
यस वर्ष यमपञ्चक बिहीबारबाटै शुरु भएको हो । तर, काग तिहार भने आज मनाउन लागिएको हो । धनवन्तरि जयन्ती, धन त्रयोदशी र धनतेरस पर्व समेत आजै मनाइने भएको हो । भोली बिहान नरक स्नानसहित कुकुर तिहार र बेलुकी लक्ष्मीपूजा मनाइने भएको छ । गाई, गोरु र आत्म (म्ह) पूजा कात्तिक ३० मा परेको छ ।
डडेलधुरा । बैतडीमा भएको बस दुर्घटनामा ९ जनाको ज्यान गएको छ । प्रहरीका अनुसार पाटन नगरपालिका–८ खोड्पेमा बस दुर्घटना भएको हो । ८ जनाको घटनास्थलमै र एक जनाको उपचारका क्रममा ज्यान गएको प्रहरीले जनाएको छ । दुर्घटना बिहीबार राती साढे १० बजे भएको हो ।
जिल्ला प्रहरी कार्यालय बैतडीका अनुसार दार्चुलाको गन्नाबाट बस महेन्द्रनगर आइरहेको थियो । ना ५ ख ५१४१ नम्बरको बस खोड्पे बजार नजिक दुर्घटनामा परेको छ । मृतकमध्ये एकको मात्र सनाखत भएको छ । प्रहरीका अनुसार प्रहरी जवान रणबहादुर चन्दको सनाखत भएको छ ।
बैतडीका उनी दाङको हापुरे इलाका प्रहरी कार्यालयमा पोष्टिंगमा थिए । दुर्घटनामा ३४ जना घाइते छन् । केही व्यक्ति गम्भीर घाइते रहेको बताइएको छ ।
उनीहरुको डडेलधुरा अस्पतालमा उपचार जारी छ । बस बिहीबार साँझ पाँच बजेतिर दार्चुलाको गन्नाबाट महेन्द्रनगरतर्फ लागेको बस घुम्टी सडकमा दुर्घटनामा परेको छ । सडकबाट बस ५ सय मिटर तल खसेको हो ।
काठमाडौं । सरकारले गैरआवासीय नेपालीलाई नेपाल आउन अनुमति दिएको छ । नेपाली मुलका गैरआवासीय विदेशी नागरिक र उनीहरुको परिवारका सदस्यलाई यात्रा सुरु गर्नुभन्दा अघि बढीमा ७२ घण्टा भित्रको पीसीआर नेगेटिभ रिर्पोटका आधारमा नेपाल प्रवेश अनुमति दिने निर्णय मन्त्रिपरिषद्ले गरेको हो ।
सरकारका प्रवक्ता पार्वत गुरुङका अनुसार नेपालस्थित कुटनीतिक नियोग, अन्तर्राष्ट्रिय संघसंस्था र अन्तर्राष्ट्रिय गैरसरकारी संस्थामा कार्यरत विदेशी नागरिक र उनीहरुका परिवारलाई समेत पीसीआर रिर्पोटका आधारमा नेपाल प्रवेशको अनुमति दिने निर्णय सरकारले गरेको छ ।
पीसीआर रिर्पोट भएका अभिभावकका ५ वर्ष मुनीका बालबालिकाको हकमा भने पीसीआर आवश्यक पर्ने छैन । पीसीआर अन्तर्गत आरटी पिसिआर, जीन एक्पर्ट, ट्रु नाट वा सो सरहका परीक्षणलाई समेत सरकारले मान्यता दिने निर्णय गरेको छ । सरकारले अब नियमित उडान सूचारु भएका कारण विदेशबाट नेपालीका लागि भने उद्धार उडान नगर्ने भएको छ ।
लकडाउनयता २२ कात्तिकसम्म कुल ९११ वटा अन्तर्राष्ट्रिय उडानबाट १ लाख ३६ हजार २ सय १६ जना नेपाली घर आएका छन् । कुल ८६ मुलुकबाट नेपाली घर फर्किएको तथ्यांक छ । यसबीचमा ४२७ जना नेपालीको शवसमेत नेपाल ल्याइएको छ ।
काठमाडौं । अमेरिकासहित तीन मुलुकका लागि प्रस्तावित राजदूतको नाम संसदीय सुनुवाई समितिबाट अनुमोदन भएको छ । यससँगै अब निवर्तमान अर्थमन्त्री डा युवराज खतिवडा अमेरिकाका लागि नेपाली राजदूत बन्ने निश्चित भएको छ । बिहीबार समितिले तीन जना राजदूतको नाम अनुमोदन गरेको हो ।
१६ असोजमा मन्त्रिपरिषदको बैठकले पूर्वअर्थमन्त्री डा. युवराज खतिवडालाई अमेरिका, पूर्वमुख्यसचिव लोकदर्शन रेग्मीलाई बेलायत र डा. निर्मलकुमार विश्वकर्मालाई दक्षिण अफ्रिकाका लागि नेपाली राजदूत नियुक्त गर्न सिफारिस गरेको थियो ।
संसदीय सुनुवाइ समितिले दिएको जानकारी अनुसार खतिवडाविरुद्ध ३ वटा र रेग्मीविरुद्ध एउटा उजुरी परेका थिए । तर, उजुरीकर्ता भने सम्पर्कमा आएनन् । राजदूत नियुक्ति सरकारको सिफारिस र संसदीय सुनुवाइ समितिको अनुमोदनपछि राष्ट्रपतिबाट हुने संवैधानिक व्यवस्था छ ।
यसअघि बिहीबारको बैठकमा सांसदहरुले भने खतिवडासहित तीन जना राजदूतसँग विभिन्न प्रश्न राखेका थिए ।
काठमाडौं । नेपालमा कोराना संक्रमणबाट थप १५ जनाको मृत्यु भएको छ । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा थप १५ जनाको मृत्यु भएको हो ।
यो सँगै कोरोना संक्रमित मृतकको संख्या १ हजार १ सय ८९ पुगेको स्वास्थ्य तथा जनसंख्या मन्त्रालयले जनाएको छ। यसअघि बुधबार २६ जनाको मृत्यु भएको थियो।
काठमाडौं । काठमाडौं उपत्यकामा ९७३ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयका अनुसार पछिल्लो २४ घण्टामा ४२८ महिला र ५४५ पुरुष संक्रमितहरु थप भएका हुन् ।
काठमाडौंमा मात्र हालसम्म १७ हजार ४५ सक्रिय कोरोना भाइरस सक्रमित रहेका छन् भने २९३ जनाको मृत्यु भएको छ । त्यसैगरी भक्तपुरमा हालसम्म एक हजार २९२ जना सक्रिय संक्रमित रहेका छन् भने ७५ जनाको मृत्यु भएको छ । ललितपुरमा दुई हजार ५१२ सक्रिय संक्रमित रहेका छन् भने हालसम्म ७९ जनाको संक्रमणबाट मृत्यु भएको छ ।
काठमाडौं। सरकारले कोरोना महामारी रोकथामका लागि भन्दै सीमा नाकामा लगाएको प्रतिबन्ध एक महिना थप गरेको छ ।
मन्त्रिपरिषद्को पछिल्लो बैठकले उक्त निर्णय गरेको सञ्चार तथा सूचना प्रविधिमन्त्रीसमेत रहेका सरकारका प्रवक्ता पार्वत गुरुङले जानकारी दिए।
सरकारले यसअघि कात्तिक ३० गतेसम्म सीमा नाकामा प्रतिबन्ध लगाएको थियो । कोरोना महामारीका कारण चैत ११ यता नेपालका सबै स्थल नाकाबाट नेपालीबाहेकलाई प्रवेशमा रोक लगाइएको थियो ।
काठमाडौं । प्रधानमन्त्री केपी शर्मा ओलीले कात्तिकदेखि चैतसम्मको तलब कोरोना कोषमा जम्मा गर्ने भएका छन् ।
बिहीवार मन्त्रिपरिषद् बैठकका निर्णयहरू सार्वजनिक गर्दै सरकारका प्रवक्ता पार्वत गुरुङले प्रधानमन्त्रीको तलब कोरोना कोषमा जम्मा गर्ने निर्णय भएको जानकारी दिएका हुन् ।
त्यस्तै, अन्य मन्त्री र राज्यमन्त्रीहरुले पनि सोही अवधिको आधा तलब कोषमा जम्मा गर्ने भएका छन् ।
अर्थ मन्त्रालयको सिफारिसमा सो निर्णय भएको गुरुङले बताए ।
काठमाडौं । नेपालमा पछिल्लो २४ घण्टामा थप १९१३ जनामा कोरोना संक्रमण पुष्टि भएको छ।
स्वास्थ्य तथा जनसंख्या मन्त्रालयको अनुसार २४ घण्टामा देशभरका प्रयोगशालामा गरिएको परीक्षणमा १९१३ जनामा कोरोना संक्रमण पुष्टि भएको हो ।
यससँगै कुल संक्रमितको संख्या २ लाख ४ हजार हजार २४२ पुगेको छ ।
स्वास्थ्य तथा जनसंख्या मन्त्रालयका अनुसार पछिल्लो २४ घण्टामा २३४९जना निको भइ घर फर्केका छन्। यो सँगै नेपालमा एक लाख ६२ हजार ५९३ जना संक्रमित उपचारपछि निको भएका छन्।
हालसम्म सक्रिय संक्रमितको संख्या ३८ हजार ४६१ जना रहेका छन् ।
काठमाडौं । पछिल्लो समय निरन्तर उकालो लागेको सेयर बजार साढे ३ वर्ष वर्ष यताकै उच्च विन्दुमा पुगेको छ ।
सूचकसँगै कारोबार रकम पनि निरन्तर बढ्दै गएको छ । आज नेपाली सेयर बजारको इतिहासमै तेस्रो धेरै ४ अर्ब २५ करोड रुपैयाँ बढीको कारोबार भएको छ । यससाता लगातार ४ अर्ब बढीको कारोबार भएको आज तेस्रो दिन हो ।
यसअघि गत फागुन १८ गते इतिहासकै धेरै ४ अर्ब ८४ करोड ७४ लाख ३७ हजार ५०५ रुपैयाँको कारोबार भएको थियो भने फागुन १५ गते दोस्रो धेरै ४ अर्ब ४६ करोड बराबरको सेयर किनबेच भएको थियो ।
यसा साताका ५ दिनमा मात्रै नेप्से परिसूचक करिब ८० अंकले बढेको छ भने असार यता करिब ५०० अंकले बढेको छ ।
बढ्दो बजारमा लगानीकर्ता ठूला कम्पनीको सेयरमा आकर्षित भएका छन् । बजारका ठूला नेपाल टेलिकम, पुनर्बीमा कम्पनी, नेपाल लाइफ इन्स्योरेन्स, नागरिक लगानी कोष लगायत ठूला कम्पनीको सेयर कारोबार बढ्दै गएको छ ।
सेयर बजार मापक सूचक नेप्से १०.८२ अंकले बढेर १७१८.५० विन्दुमा पुगेको छ । यसदिन १९८ कम्पनीको १ करोड २३ लाख ३५ हजार ५५६ कित्ता सेयर ४ अर्ब २५ करोड ६४ लाख ७५ हजार ८९० रुपैयाँमा कारोबार भएको छ ।
कारोबारमा आएका १२ वटा समूहमध्ये ५ समूहको परिसूचक उकालो लागेका छन् भने ७ समूहको परिसूचक घटेको छ । व्यापार समूहको परिसूचकमा पोजेटिभ सर्किट लागेको छ । यस समूहको परिसूचक १६४.७१ अंकले बढेको छ । आज उत्पादनमूलक समूहको परिसूचक सबैभन्दा धेरै ३०.४६ अंकले घटेको छ ।
आज लगानीकर्ता नेपाल पुनर्बीमा कम्पनीको सेयरमा झुम्मिएका छन् । यस साता उच्च कारोबार हुँदै आएको पुनर्बीमाको आज सबैभन्दा धेरै २८ करोड ५५ लाख रुपैयाँभन्दा बढीको सेयर किनबेच भएको छ । कारोबारकै नेपाल टेलिकम र प्रभु बैंकको सेयर क्रमशः दोस्रो र तेस्रो स्थानमा रहे ।
बढ्दो बजारमा आज २ कम्पनीको सेयर मूल्यमा पोजेटिभ सर्किट लागेको छ । साल्ट्र ट्रेडिङ र विशाल बजार कम्पनीका सेयरधनीले १० प्रतिशत कमाएका छन् ।यस्तै, नाडेप लघुवित्त, नेपाल टेलिकम र सबैको लघुवित्तको पनि सेयर मूल्य ५ प्रतिशभन्दा धेरैले बढेको छ ।
दोहोरो अंकले बढेको बजारमा गणपति माइक्रो फाइनान्सका लगानीकर्ताले भने सबैभन्दा धेरै ५.२३प्रतिशतले गुमाएका छन् ।
काठमाडौं । जापान विश्वकै प्रभूत्वशाली देश बनेको छ । फ्युचर ब्रान्डले कोरोना भाइरस महामारीका दौरान ६ महिनासम्म गरिएको अध्ययनले प्रमुख कार्यकारी, कर्मचारी र अन्य माथिल्लो तहका विश्वभरका २५ सयभन्दा धेरै मानिसहरुको रायलाई समेटेर यो रिपोर्ट सार्वजनिक गरेको हो ।
प्रकाशित अध्ययन अनुसार शक्तिशाली देश अमेरिका, चीन, बेलायत र रुस शीर्ष १० भित्रमा पनि परेका छैनन् ।
सूचीअनुसार जापान पहिलो, स्विचरल्यान्ड दोस्रो, नर्वे तेस्रो, जर्मनी चौथो, क्यानेडा पाँचौ, डेनमार्क छैटौं, फिनल्यान्ड सातौं, स्विडेन आठौं, युुएई नवौं र न्युजिल्यान्ड दशौं स्थानमा रहेका छन् ।
प्रभूत्वशाली शहरमा अमेरिकाको न्युर्योक पहिलो स्थानमा छ । त्यस्तै चीनको बेइजिङ दोस्रो, अमेरिकाकै वासिङटन तेस्रो, बेलायतको लण्डन चौथो, जापानको टोकियो पाँचौ, फ्रान्सको पेरिस छैटौं, रुसको मस्को सातौ, चीनको साङ्घाई आठौं, युुएईको दुुबई नवौ र जर्मनीको बर्लिन दशौं स्थानमा छन् ।
काठमाडौं । मेलम्ची खानेपानी आयोजनाको सुरुङ परीक्षण आगामी महिना भित्रमा गरिने भएको छ । गत असार महिनामा भएको परीक्षणका क्रममा दुर्घटना भएपछि सुरुङमा रहेका त्रुटि सच्याएर पुनः परीक्षण गर्न लागिएको छ ।
सुरुङमा रहेको त्रुटि सच्याउने काम सकिन लागेकाले पुनः सुरुङमा पानी पठाएर परीक्षण गर्ने योजना बनाइएको खानेपानी मन्त्रालयका प्रवक्ता रितेशकुमार शाक्यले बताए । उनका अनुसार त्रुटि सच्याउने काम मङ्सिरको दोस्रो सातासम्म सकिने भारतीय कम्पनीले बताएको छ ।
केही महिना यता सुरुङमा पुनरावलोकनको काम भइरहेको उनले बताए । उनले भने, ‘सम्भावित सबै ठाउँमा पुनरावलोकन भइरहेको छ ।’
मङ्सिरसम्ममा त्रुटि सच्याए पनि काठमाडौँमै पानी झार्न भने माघ मसान्तसम्म लाग्ने देखिएको छ । सुरुङमा पानी पठाउन थालिएको दुई महिनासम्म परीक्षण गर्न समय लाग्ने प्रवक्ता शाक्यले जानकारी दिए । मन्त्रालयले बनाएको कार्यविधिअनुसार थोरै परिमाणमा गरेर पानी पठाइनेछ ।
सुरुङमा पानी भरिएपछि पनि केही दिन ‘होल्ड’ गरेर राखिने उनले जानकारी दिए । उनले भने, ‘पानी भित्र भरिएर केही दिन राख्दा बल्ल कतै समस्या छ छैन थाहा हुन्छ, समस्या छैन भन्ने भएपछि मात्रै पानी झारिनेछ ।’
सुरुङको अवस्था ठीक भएर सुन्दरीजलमा रहेको प्रशोधन केन्द्रमा आएपछि भने उपत्यकामा वितरण शुरु हुने उनले जानकारी दिए ।सुन्दरीजलमा दुई पानी प्रशोधन केन्द्र रहेका छन् । यहाँबाट पानी प्रशोधन भए पनि उपत्यकाका विभिन्न स्थानमा रहेका ट्याङ्कीमार्फत पाइपमा पानी पुग्छ । उपत्यकामा खानेपानी वितरणका लागि आवश्यक संरचना बनिसकेकाले पानी आउनासाथ तत्काल वितरण थालिने उनले जानकारी दिए । अहिले वाग्मतीको पानीमार्फत परीक्षण भइसकेको छ । उनले भने, ‘पानी झरेपछि पुरानो संरचनाबाट पानी पठाउने र नयाँ विच्छाइएका पाइपको परीक्षण एउटै समयमा हुनेछ ।’
यसअघि सिन्धुपाल्चोक, हेलम्बु गाउँपालिका–१ स्थित आयोजनास्थलमा असार २१ मा पानी पथान्तरण गरिएकामा ३० असारमा दुर्घटना भएको थियो । सुरुङ परीक्षणका लागि पानी भर्न थालिएकामा एक सातामा पानी बाहिर निस्केको हो । दुर्घटनाका बारेमा बुझ्का लागि खानेपानी मन्त्रालयका सहसचिव रमाकान्त दवाडीको संयोजकत्वमा भएको दुर्घटनासम्बन्धी अध्ययन गर्न गठित समितिले गेट भित्रबाट हुनुपर्नेमा बाहिरबाट राखिएकाले दुर्घटना भएको निष्कर्ष निकालेको थियो । समितिकै सुझावका आधारमा गेटको फ्रेम नयाँ राखिएको छ ।
सो दुर्घनाका कारण कन्सलट्यान्ट दोर्जे पेम्बा र इञ्जिनीयर शेखर खनाल घाइते भएका थिए । दुर्घटनाका कारण इञ्जिनीयर सतीश गोहित र सवारीचालक राधाकृष्ण थापामगर बेपत्ता भएका थिए । तीमध्ये इञ्जिनीयर गोहित घटनाको भोलिपल्ट मृत फेला परेका थिए भने चालक थापामगर अझै बेपत्ता छन् ।
सो दुर्घटनाको जिम्मेवारी परामर्शदाता कम्पनी र गेट निर्माण गर्ने कम्पनी दुवैको भएकाले उनीहरुले जिम्मेवारी लिएका थिए । इटास कम्पनी परामर्शदाताका रुपमा रहेको थियो भने भारतीय कम्पनी पीआईएलले गेट निर्माण गरेको हो । आयोजनामा यस पहिले काम गरेको इटालियन कम्पनी सीएमसीले नै गेट निर्माण गर्न सो कम्पनीलाई लगाएको थियो । नेपाल सरकारसँग सीएमसीको ठेक्का रद्द भए पनि सोही कम्पनीले गेट निर्माणको बाँकी काम सम्पन्न गरेको थियो ।
आयोजनाको बाँकी काम सम्पन्न गर्नै गरी जिम्मेवारी लिएको चिनियाँ निर्माण कम्पनी सिनो हाइड्रोले अहिले ‘हेडबक्स’ निर्माण गरिरहेको छ । ‘हेडबक्स’ सकिन अझै छ महिना लाग्ने हुँदा अस्थायी बाँधबाट पानी पथान्तरण गरिनेछ । मेलम्चीको सुरुङमा दुर्घटना भएपछि पनि अरू निर्माणका काम रोकिएको थिएन । बन्दाबन्दीको अवधिमा पनि निर्माणस्थलमा काम भइरहेको थियो ।
आयोजनाअन्तर्गत सुरुङ, हेडबक्स र दुई पानी प्रशोधन केन्द्र निर्माण भएको हो । दैनिक १७ करोड लिटर पानी प्रशोधन गर्ने गरी सुन्दरीजलमा दुई वटा ट्याङ्की निर्माण भइसकेको छ । यहाँको प्रशोधन केन्द्र दुवैको क्षमता साढे आठ करोड लिटर रहेको छ । तीमध्ये एउटाको निर्माण जापानी अन्तरराष्ट्रिय सहयोग नियोग (जाइका) र अर्को एशियन विकास बैंक (एडीबी) को आर्थिक सहयोगमा निर्माण भएको थियो ।
बन्दाबन्दीका कारण घर फर्किएका कतिपय कामदार आउन नसकेको र निर्माण सामग्री ल्याउन कठिनाइका कारण सामान्य अवस्था जसरी काम हुन सकेको थिएन । निर्माण कम्पनीले उपलब्ध जनशक्ति र सामग्रीबाट निर्माण गरिरहेको थियो ।
स्थानीयवासी र स्थानीय तहले आयोजनाका कारण कोभिड–१९ को जोखिम भएको भन्दै बन्द गर्न भनिरहँदा पनि आयोजना सुचारु थियो । लामो समयसम्म पनि सम्पन्न नभएको राष्ट्रिय गौरवका आयोजनामा यो आयोजना पर्छ । काठमाडौँ उपत्यकामा रहेको खानेपानीको समस्या समाधान गर्न मेलम्चीको पानी काठमाडौँ ल्याउन संस्थागत पहल शुरु भएको दुई दशक भयो ।
विसं २०५६ मा मेलम्ची खानेपानी विकास समितिको गठन भएको थियो । आयोजना निर्माणका लागि एशियाली विकास बैंकले सन् २००१ मा सम्झौता भएको थियो । पछिल्लोपटक काम गरेको इटालियन कम्पनीले गतिका साथ काम अघि बढाए पनि आर्थिकरुपमा टाट पल्टेर कम्पनी फिर्ता भयो । केही महिनाको अन्योलपछि चिनियाँ निर्माण कम्पनीसँग बाँकी निर्माणको काम सम्पन्न गर्ने गरी ठेक्का सम्झौता भएको थियो । खानेपानी मन्त्रालयले पटकपटक काठमाडौँ उपत्यकामा मेलम्चीको पानी झारिने लक्ष्य राख्दै आएको थियो । पछिल्लो पटक असार मसान्तसम्ममा पानी झार्ने लक्ष्य राखिए पनि दुर्घटनाले त्यो समय धकेलिएको छ ।
वासिङटन । संयुक्तराज्य अमेरिकाले अरब मुलुक संयुक्त अरब इमिरेट्स (यूएई) का लागि करिब २३ अर्ब ३७ करोड अमेरिकी डलर (करिब २८ खर्ब रुपैयाँ) बराबरको अत्याधुनिक प्रतिरक्षा सामग्री विक्री गर्न स्वीकृति दिएको छ ।
अमेरिकी विदेशी मन्त्रालयका अनुसार यूएईलाई विक्री गरिने सामग्रीहरुमा एफ–३५ लडाकू विमान, एमक्यू–नाइन–बी मानवरहीत ड्रोन तथा आकाशबाट आकाशमा तथा आकाशबाट जमिनमा मार हान्न प्रयोग गरिने क्षेप्यास्त्रहरु रहेका छन् ।
डोनाल्ड ट्रम्प प्रशासनले उक्त सामग्री विक्री गर्नेसम्बन्धी सम्झौताका बारेमा कंग्रेसलाई जानकारी दिएको छ । अमेरिकी विदेश मन्त्री माइक पोम्पेओले जारी गरेको विज्ञप्तिमा यूएईसँग प्रगाढ बन्दै गएको सम्बन्धका कारण आधुनिक हातहतियार विक्री गर्न लागिएको उल्लेख छ ।
पछिल्ला केही वर्षदेखि इरानबाट बढ्दो सुरक्षा चुनौती थपिएको अवस्थामा त्यसलाई निस्तेज बनाउन पनि यूएईलाई अत्याधुनिक हातहतियार र लडाकू विमान उपलब्ध गराउनु परेको विदेश मन्त्री पोम्पेओले बताए ।
इजरायलसँग सम्बन्धी सामान्यीकरण गर्नेगरी यूएईले इजरायलसँग कुटनीतिक सम्बन्ध स्थापना गर्ने सम्झौता गरेलगत्तै यूएईलाई अमेरिकाले आधुनिक हातहतियार र युद्धक विमान विक्री गर्न लागेको हो ।
यसअघि इजरायल र जोर्डनबीच सन् १९९४ मा तथा इजरायल–इजिप्टबीच सन् १९७९ मा दौत्य सम्बन्ध स्थापना गर्नेगरी सम्झौताहरु भएका थिए । सुडान, बहराइन र यूएईसँग भने हालै दौत्य सम्बन्ध स्थापना गर्न सहमति भएको हो । एएनआइ