Author: Vishwanews.com

बिष्णु सिंह (बैजु) ३ जुलाई,
ज्याक्सनहाईट्स न्युयोर्क।

नेपाली कांग्रेसका पुर्व सभापति एवं पुर्व प्रधानमन्त्री स्व.गिरिजाप्रसाद कोईरालाको शताब्दीऔं जन्मजयन्तीको पावन अवसरमा गिरीजाप्रसाद कोईराला फाउन्डेशनले न्युयोर्कको क्विन्सस्थित ज्याक्सनहाईट्समा निःशुल्क खाद्यान बितरण कार्यक्रम आयोजना गरेको छ ।

गिरीजाप्रसाद कोईराला फाउन्डेशन अमेरिका च्याप्टरको आयोजनामा क्विन्स टुगेदर, टेष्टअफ नेपाल रेष्टुरेन्ट, भेराईटी व्वाईज एण्ड गर्लस् क्लब अफ क्वीन्स् र मेट्रोपोलीटान पार्क नामक संस्थाहरुको संयुक्त सहप्रायोजनमा सो कार्यक्रम सम्पन्न भएको हो। स्थानीय समय अनुसार मध्याह्न करिब १२ः३० बाट करिव १ घन्टासम्म टेष्ट अफ नेपाल रेष्टुरेन्टको प्रांगणबाट सो वितरण कार्यक्रम गरिएको थियो।

लाममा पंक्तिबद्ध करीब २०० स्थानीय आगन्तुकहरूलाई पालैपालो ताजा सागसब्जी एवं तरकारी बितरण गरिएको थियो। सो वितरणबाट स्थानीय नेपाली अमेरीकी लगायत,बंगलादेश, भारत, पाकिस्तान, मेक्सीको सहित करीब १४ राष्ट्रवाट आई स्थानीय समुदायमा वसोवास गर्ने मानिसहरू प्रत्यक्ष लाभान्वित भएका थिए।

सो वितरण कार्यक्रममा फाउन्डेशन अमेरिका च्याप्टरका उपाध्यक्ष सुवर्ण लामा, प्रवक्ता रामचन्द्र अधिकारी, कार्यसमिति सदस्यहरू सुर्य सिंखडा र रेखा श्रेष्ठको सकृयता रहेको थियो भने क्विन्स टुगेदरका प्रमुख जोनाथन फोर्गोस्, न्युयोर्क मेयर अफिसबाट शुक्रानि दनपत, फाउन्डेशनकै केन्द्रीय सदस्य अम्बीरराज जोशी, नेका युवा नेताद्वय राजु रौनीयार र समाजसेवी लायन नवराज आचार्य र नेतृ कमला पन्त, पार्कर खेलाडी दिनेश सुनार, फाउन्डेशनका आजीबन सदस्य पुर्ण तामाङ लगायतले स्वयंसेवकको भुमीका निर्वाह गरेका थिए ।

स्मरण रहोस् स्व. गिरीजावावुको शताब्दीऔं जन्मजयन्तिको पावन अवसरमा नेपाल, अमेरिका लगायत विश्वभरबाट स्मरण स्वरूप यी र यस्तै पुण्य कार्यहरू निरन्तर भैरहेका समाचारहरू प्राप्त भएका छन्। यसै अवसरमा फाउन्डेशन अमेरीका च्याप्टर एवं आजको यस कार्यक्रमसँग आबद्ध संघसंस्थाहरूले स्व. कोईरालाप्रति भावपूर्ण श्रद्धासुमन अर्पण गरेका थिए ।

बिष्णु सिंह (बैजु )
१७ जुन २०२४, न्युयोर्क।

गिरीजाप्रसाद कोईराला फाउन्डेशन अमेरिका च्याप्टरको कार्यालयमा अमेरिकी हाउस कांग्रेस प्रतिनिधि कंग्रेसवुमन ग्रेस मेंग नेपालीहरुको ईमिग्रेसन समस्याबारे जानकारी लिन उपस्थित भएका छन् । कंग्रेसवुमन मेंगलाई फाउण्डेशनका अध्यक्ष सोमनाथ घिमिरेले खादा लगाई कार्यालयमा स्वागत गरेका थिए। कांग्रेसवुमनले करीब डेढ घण्टाको समय दिनु भएको यस ऐतिहासिक, विशेष भेटघाट एवं समसामयिक विषयहरूमा छलफल एवं ध्यानाकर्षण कार्यक्रममा समसामयिक विषयहरू एवं अमेरीकामा भएका आप्रवासीका विविध समस्याहरू तथा सोका समाधानका विषयमा छलफल भएको थियो । नेपाली समुदायका सदस्यहरुले कांग्रेसवुमन ग्रेस मेंगसॅंग प्रत्यक्ष आ-आफनो अध्यागमनका मुद्दाहरू कसरी प्राथमिकता पाउॅंछ भन्ने प्रश्न गरेका थिए।

कतिपय सदस्यहरुको अध्यागमनका मुद्दा ७ बर्ष देखि १५ बर्षसम्म पनि कुनै सुनुवाई नभएको जिकीर गरे। यसैक्रममा कांग्रेसवुमन मेगंले, तपाईहरुको समस्याका समाधानका लागि म आफै अध्यागमनका प्रतिनिधिहरूसॅंग प्रत्यक्ष संलग्नता हुदै तपाईहरुको मुद्दालाई छिटो र सजिलो बनाउॅंन कसरत गर्ने छु, भन्नु भयो र तपाईहरुको कुनै पनि कार्यका लागि मेरो कार्यालयमा फ्लसींग या फोरेस्ट हिल्सको कार्यालय समयमा स्वागत छ भन्नु भयो। उहाँलाई स्वागत गर्न फाउन्डेशनका उपाध्यक्ष सुवर्ण लामा, कार्यसमिति सदस्यहरू ध्रुव कुँवर क्षेत्री, रेखा श्रेष्ठ, सुर्य सिंमखडा, फाउन्डेशनका सदस्य बिकास कुवॅंर, पुर्ण तामागं, सुजल सिंमखडा, समाजसेवि ईन्द्र तामांग, कोरियोग्राफर गोविन्द राई, UKROAकी पुर्व अध्यक्ष एंव समाजसेवी मुना राई, एनआरएनए युएसए न्युयोर्ककी महिला सचिव एंव समाजसेवी गिता अधिकारी, हामी नेपाली ग्लोवल अमेरिकाका अध्यक्ष शोभाकान्त पाण्डे, कलाकार महादेव त्रिपाठी, गिनीज बुक विश्व रेकर्ड होल्डर दिनेश सुनार पार्कर, महिला उद्यमी सुष्मिता श्रेष्ठ लगायत ५७ जनाले कार्यालयका टोलीसॅंग भेटघाट एंव आ-आफ्ना समस्यावारे समाधानका लागि प्रत्यक्ष कुराकानी गरेका थिए।

कार्यक्रमको शुरूवात गर्दै अध्यक्ष घिमीरेले आफ्नो टीमका सदस्यहरूको परिचय गराई वहाँलाई फाउन्डेशनमा स्वागत गर्नुको उद्देश्यबारे प्रष्ट पार्नुभएको थियो। वहाँले फाउन्डेशनले विशुद्ध सामाजिक गतिविधि गर्दै आएको र स्थापनादेखि कोरोनाकहरको डरलाग्दो अवस्था व्यहोर्दै हालसम्म गर्दै आएका सामाजिक गतिविधिवारे प्रष्ट पारेका थिए । अध्यक्ष घिमिरेले अमेरिकामा रहेका लाखौं आप्रवासी कानुनत बस्न र काम गर्न योग्य भएता पनि स्थायी वसोवासको अनुमति पाउन अनेकौं सास्ति व्यहोरेको भन्दै कांग्रेसवुमन ग्रेस मेंगलाई ध्यानआकर्षण गराउॅंनु भयो।

परिचयका क्रममा वरिष्ठ समाजसेवी ईन्द्र तामांगले वर्षौंदेखि परिवारसँग छुट्टीएर वस्नुपरेको कारणले मानसिक यातना व्यहोरीरहेको हुँदा एक जिम्मेवार सांसदको हैसीयतले यथासक्य शिघ्र कानुनी रूपमा हल गरीदिन वहाँसमक्ष अपिल गर्नु भयो। सो अवसरमा फाउन्डेशनका उपाध्यक्ष सुवर्ण लामाले नेपाल अमेरिकाबीच आपसी सहयोग र सम्बन्ध प्रगाढ रहेको बताउँदै आगामी दिनहरूमा अझ सुमधुर रहोस भन्ने चाहना रहेको बताउनुभयो। सदस्य ध्रुव कुँवर क्षेत्रीले आफ्नो ज्यानको पर्वाह नगरी आफु यु एस ऐम्बेसी अफगानिस्तानमा सुरक्षाकर्मीको रूपमा तैनाथ हुंदा अमेरिकी सरकार प्रति वफादार भएर गरेको रोचक कार्यहरु सुनाएका थिए । त्यस्तै अर्का सदस्य रेखा श्रेष्ठले आफुले यसै फाउन्डेशन मार्फत विविध सामाजिक कार्यहरूमा समाजको सेवामा खटीँदै आएको र आवश्यक पर्दा भोलीका दिनहरूमा पनि खटीरहने प्रण गर्नुभयो र वॅंहाले आफ्नै रेस्टुरेन्ट टेस्ट अफ लाहोरबाट चिया र समोसा प्रायोजन गर्नु भएको थियो।

व्यक्तिगत एवं सामूहिक समस्याहरूका बारे प्रत्येकले आपसी अन्तर्कृया एवं छलफलगरि माननीय कांग्रेसवुमन आदरणीय ग्रेस मेंगसँग खुलेर छलफल गरीएको सो कार्यक्रममा आफ्नो धारणा राख्दै माननीय मेंगले आफु यहाँका जनताद्वारा चुनीएको एक जनप्रतीनीधिको हैसीयतले कुनैपनि पार्टी र व्यक्ति एवं समुदायप्रती निष्पक्ष भै कानुन अनुसार क्रमशः यथासक्य समस्याहरू समाधान गर्न लागिपरेको प्रष्ट पार्दै सरकार समक्ष यथेष्ट बजेटको मागगरी विशेषगरी जटील बन्दैगईरहेको आप्रवासी समस्या समाधान गर्न वर्तमान वाईडेन सरकारलाई घच्घच्याईरहेको प्रष्ट पार्नुभयो।
वहाँले आफुले नेपाल र नेपालीलाई असाध्यै माया गर्ने र मौका मिलेमा निकट भविष्यमा नेपालको भ्रमण गर्ने ईच्छासमेत जाहेर गर्नुभयो। कांग्रेसवुमन आदरणीय ग्रेस मेंगले अमेरीकामा जीपि फाउन्डेशनले गरेको सामाजिक सेवाको उच्च प्रशंसा गर्दै आफुले फाउन्डेशनको कार्यालय भ्रमण गर्न पाउॅंदा निकै हर्षित भएको र यति राम्रो कार्यालय रहेछ भन्दै प्रसंसा गर्नु भयो र अबदेखि प्रत्यक महिनामा एक पटक यसरी नै भलाकुसारी गर्दै प्रत्यक्ष संम्वाद, आवस्यकता अनुसार फाउन्डेशनकै कार्यालयमा आप्रवासीहरुको समस्या समाधान गर्न घुम्ति सिविर संचालन गरी नेपाली लगायत स्थानीय समुदायका सेवाग्राहीहरूका समस्या हलगर्न लागीपर्ने बचनबद्दता समेत व्यक्त गर्नुभयो।
अन्त्यमा फाउन्डेशनको तर्फवाट अध्यक्षले कांग्रेसवुमन ग्रेस मेंग र वॅंहाको ५ सदस्य टोलीलाई फाउण्डेशनको कार्यालयमा उपस्थित भई अमेरिकी संघीय एजेन्सीहरूसँग के कसरी सहायता प्राप्त गर्ने भन्ने बारे बृहत छलफल गर्न पाएकोमा फाउन्डेशले आभार व्यक्त गरेका थिए ।

म्यासाचुसेट्स

केप कड नेपाली समाजको आयोजनामा किरांतबर्ष ५०८४ को साकेला-उभौली पर्व अमेरिकाको म्यासाचुसेट्स राज्यको केप कडको साउथ डेनिस शहरमा अवस्थित जोन ए केली पार्कको मैदानमा मे १९, २०२४ (बि. स. २०८१ जेष्ठ ६ गते) आइतबारका दिन भब्यताका साथ सम्पन्न भयो ।

केप कड नेपाली समाजका अध्यक्ष केवी राईको सभापतित्व र United Kirat Rai Organization of America (UKROA) का भूतपूर्व अध्यक्ष,पासुंग बिष्णु राईको प्रमुख आतिथ्यमा सम्पन्न भएको साकेला उभौली कार्यक्रमको सञ्चालन समाजका महासचिव इच्छा खड्का र सचिव सरस्वती खनालले गर्नु भएको थियो। उक्त कार्यक्रममा केप कड नेपाली समाजको निमन्त्रणालाई स्वीकार गरि आफ्नो अमुल्य समय दिएर कार्यक्रममा सहभागी भैदिनुहुने अतिथिहरुको गरिमामय उपस्थितिले कार्यक्रमको रौनक र शोभा बढेको थियो।

केप कड नेपाली समाजका वरिष्ठ उपाध्यक्ष बिष्णु मान प्रधानले कार्यक्रममा बिभिन्न संघ- संस्था बाट प्रतिनिधित्व गर्नु भएका अतिथिहरु, समाजका सम्पूर्ण सदस्यज्यूहरु तथा केपकड बासी आमाबुवा, दाजुभाइ, दिदीबहिनी र साना नानीबावुहरूलाई साकेला उभौली पर्व हर्षोल्लासका साथ मनाउन आग्रह गर्दै कार्यक्रममा हार्दिक स्वागत गर्नुभएको थियो। उहॉंले सबैलाई साकेला उभौलीको शुभकामना पनि दिनु भएको थियो ।

कार्यक्रमका प्रमुख अतिथि तथा पासुंग बिष्णु राईले साकेला-उभौली पर्वको ऐतिहासिक, सामाजिक र सांस्कृतिक महत्वको बारेमा प्रष्ट पार्दै उपस्थित सबैलालाई उभौली को हार्दिक मंगलमय शुभकामना संदेश दिनुभयो। यसैक्रममा उहॉंले अमेरिका भरिमै नेपाली समाजले पहिलो पटक यसरी बृहत् रूपमा यहाँ बसोबास गर्नुहुने सबै नेपालीहरूलाई एकजुट गराएर साकेला उभौली कार्यक्रमको आयोजना गरेर एउटा नंया इतिहास रचेको छ भन्दै यसले आउने भावी पुस्तालाई राम्रो संदेश दिनेछ भन्दै आयोजकलाई धन्यवाद दिनुभयो। UKROA का केन्द्रीय महासचिव मुक्ति नारायण राई र पशुपति बुद्ध फाउन्डेशनकी बरिष्ठ उप सभापति एलिना श्रेष्ठ ले साकेला उभौली को बारेमा आ-आफ्नो मन्तव्य राख्नुको साथै सबैलाई शुभकामना दिनुभएको थियो।

उक्त कार्यक्रमका सांस्कृतिक संयोजक सिताराम राईले उभौली पर्वको बारेमा आफ्नो मन्तव्य राख्दै सबैलाई सक्रिय रूपमा सहभागी हुन आग्रह गर्नुभएको थियो। त्यसैगरी नयॉं पुस्ताका भाईबहिनी, छोराछोरी हरूलाई लक्षित गरि साकेला उभौली पर्वको बारेमा अंग्रेजी भाषामा लेखेर तयार पारिएको सामाग्री संस्थाका कार्य समिति सदस्य कुमुदा पोखरेलले वाचन गरेर सुनाउनु भएको थियो।

यस कार्यक्रमको प्रमुख आकर्षण र महत्वपूर्ण पक्ष “साकेला- उभौली पुजा” प्रमुख अतिथि तथा पासुंग बिष्णु राईज्यूबाट शुभारम्भ गरिएको थियो र यसमा केप कड नेपाली समाजका संस्थापक अध्यक्ष तथा सल्लाहाकार हरि राईले उभौली पुजामा गीत गाएर नाच्दै उपस्थित सबैलाई त्यो सांस्कृतिक नाचको माहौलमा सहभागी हुन उत्प्रेरित गर्नुभएको थियो।

उभौलीको पुजा सम्पन्न गरि खानपान गरि दोस्रो चरणको कार्यक्रमको बीचमा साना नानी बावुहरूले सामूहिक रूपमा नेपाली गीतमा नाचेर र मार्सल आर्ट प्रदर्शन गरेर आ-आफ्नो प्रतिभा प्रदर्शन गरेका थिए। सामूहिक नृत्यमा रिया चालिसे, दिप्ती अधिकारी, आशा आचार्य र विभूती सिटौला सहभागी हुनुभएको थियो भने मार्सल आर्ट कराते तर्फ बिष्लेक्स मान प्रधान, मिलन तामाङ, विधान खड्का र आर्य थापा सहभागी हुनुभएको थियो। त्यसैगरि बाल स्वयंसेवक आभाश्री खतिवडाले कार्यक्रम स्थल मैं लेमोनेड र स्न्याक्स को पसल राखी त्यसबाट आएको सबै रकम (नगद $ १२१.८२) केप कड नेपाली समाजलाई दान गरेर सबैको लागि प्रेरणादायी काम गरि एउटा राम्रो उदाहरण प्रस्तुत गरिन्।यस्ता नेपाली मौलिक परंपरागत र सांस्कृतिक कार्यक्रमहरूमा नंया पुस्ताका नानीबावुहरूको सक्रिय सहभागिता भए मात्र संस्थाले राखेको लक्ष्य (नेपाली भाषा, संस्कृति र संस्कारको पुस्तान्तरण (linguistics and cultural transformation to new generation) मा पुग्न मदत पुग्छ । यसै कुरालाई मध्यनजर राखी कार्यक्रममा प्रतिभा प्रदर्शन गर्नुहुने सबै नानी बावुहरूलाई प्रशंसा प्रमाणपत्र प्रदान गर्नुको साथै खादा लगायर उहॉंहरुको योगदानको कदर गरिएको थियो।

त्यसैगरी, केप कड नेपाली समाजको कार्य समितिको बोर्ड बैठकको निर्णय बाट कार्य समिति सदस्यमा मनोनित छेजी शेर्पा तथा सल्लाहाकारमा मनोनित संस्थापक अध्यक्ष हरि राई लाई संस्थाका अध्यक्ष केबी राईले प्रमाणपत्र प्रदान गर्नुको साथै खादा ओडाएर स्वागत गर्नु भएको थियो ।

यस बृहत् कार्यक्रम को लागि आवश्यक खानपान को सम्पूर्ण ब्यवस्था केप कडबासी नेपालीहरूले स्वयंसेवक को रूपमा जिम्मा लिएर घर घरमै तयार पारिएका स्वास्थ्यकर साथै स्वादिष्ट परिकारहरू उपलब्ध गराउनुभएको थियो।

समाजका कोषाध्यक्ष बिमल खड्काले कार्यक्रममा सहभागी सबैको उपस्थिति दर्ता गर्नुको साथै संस्थाको सदस्यता लिन इच्छुक ब्यक्ति हरूलाई सदस्यता वितरण समेत गर्नुभएको थियो। उक्त कार्यक्रममा १७५ जना जतिको सहभागिता थियो ।

कार्यक्रमको अन्त्यमा, समाजका अध्यक्ष केबी राईले नेपालको किरांत संस्कृतिले भरिभराउ नेपाली राष्ट्रीय चाड साकेला उभौली २०२४, केप कड नेपाली समाजले पहिलो पटक आयोजना गरेको जानकारी गराउंदै यस पर्वमा आमन्त्रित सबै पाहुनाहरू, समाजका सदस्यहरु र सम्पूर्ण केप कड बासीहरूलाई उहॉंहरुले दिनुभएको अमुल्य समय, साथ र सबै खाले सहयोगको लागि धन्यवाद ज्ञापन गर्दै, साकेला उभौलीको शुभकामना दिनु भएको थियो ।

केप कड नेपाली समाज, नेपाली कला र संस्कृतिको संरक्षण र प्रवर्द्धन गर्न सन् २०११ मा केप कड म्यासाचुसेट्स, अमेरिकामा स्थापना गरिएको एक गैर नाफामुलक सामाजिक संस्था हो । यो संस्थाले नेपाली समुदायको हितको लागि विभिन्न कार्यक्रमहरू गर्दै आएको छ ।

म्यासाचूसेट्स

अमेरिकाको बोस्टन सहरमा हुनगइरहेको नेपाल अमेरिका पत्रकार संघ(नेजा) को १७औं साधारण सभाको तयारी अन्तिम चरणमा पुगेको छ। साधारण सभालाई भव्यताकासाथ सफल बनाउन आवश्यक पर्ने सम्पूर्ण तयारीहरु अन्तिम चरणमा पुगेको नेजाका उत्तर-पूर्व क्षेत्रीय संयोजक एवम् १७औं साधारण सभा मूल आयोजक समितिका संयोजक सुपेन्द्र बस्नेतले जनाएका छन्।
उक्त साधारण सभा यही आउदो मे २५ र २६, २०२४ (शनिबार र आइतबार) मा 594 Washington Street, Braintree, MA- 02184 स्थित प्रवासी नेपालीहरुको संस्था ‘पशुपतिनाथ बुद्ध फाउण्डेशन अफ न्यू इङल्याण्ड(प्याब्फोन-PABFONE)को सामुदायिक भवनमा हुनगइरहेको छ। कार्यक्रम तालिका असार मे २५ तारिख शनिवार साँझ ५ बजे साधाण सभाको उदघाटन गर्ने गरी आवश्यक तयारी गरिएको छ।

तयारीका सम्बन्धमा जानकारी दिदै संयोजक बस्नेतले भने, ‘साधारण सभाको सम्पूर्ण तयारी अन्तिम चरणमा पुगेको छ। साधारण सभालाई सक्दो उपलब्धिमूलक बनाउनका लागि उपलब्ध साधान, श्रोत र क्षमताले भ्याएसम्म आवश्यक पर्ने तयारीमा कुनै कसर बाँकी राखिने छैन।’ उनले थपे, ‘यो संस्थाको महत्वपूर्ण उत्सवको क्षण हो। यसलाई हामीले सोही मुताबिक मनाउने गरी तयारी गरेका छौं। आशा छ कि हामी यसमा सफल हुनेछौं। र, साधारण सभाले भावि यात्राका लागि सही र ठोस मार्ग निर्देश गर्ने नै छ।’

साधारण सभा मूल आयोजक समितिका संयोजक बस्नेतका अनुसार बासस्थान, कार्यक्रम स्थल, भोजन र यातायातको व्यवस्थापकीय कार्य पुरा भैसकेको छ। कार्यक्रमका लागि चाहिने व्यानरहरु तयार भैसकेका छन् भने, आवश्यक मसलन्दहरुको पनि व्यवस्था गरिसकिएको छ। त्यसैगरी प्रमुख अतिथि, अतिथिहरू, संस्थाका सदस्य ज्यूहरुलगायत सरोकारवाहरुलाई आधिकारिक निमन्त्रणा गर्ने कार्य पनि सम्पन्न भैसकेको छ।

साधारण सभामा प्रस्तुत हुने प्रतिवेदनहरु तयार भैसकेको र संस्थाले हरेक साधारण सभाको अवसर पारेर प्रकाशित गर्ने स्मारिक ‘प्रयास’ पनि प्रकाशनको अन्तिम चरणमा रहेको संयोजक बस्नेतले जानकारी दिए। उनले नेजा सदस्यहरुलाई बोस्टनमा स्वागत गर्न आफू, नेजा परिवार र स्थानीय नेपाली समुदाय आतुर रहेको जनाउदै तयारीका क्रममा प्रत्यक्ष परोक्ष साथ सयोग गर्ने सबैलाई धन्यवादसमेत व्यक्त गरेका छन्।

बोष्टन ।

नेपाल अमेरिका पत्रकार संघ(नेजा)को १७औं साधारण सभा अमेरिकाको ऐतिहासिक सहर बोस्टनमा हुनगइरहेको छ। उक्त साधारण सभा 594 Washington Street, Braintree, MA- 02184 स्थित प्रवासी नेपालीहरुको संस्था ‘पशुपतिनाथ बुद्ध फाउण्डेशन अफ न्यू इङल्याण्ड(प्याब्फोन-PABFONE)को सामुदायिक भवनमा यही आउदो मे २५ र २६, २०२४ (शनिबार र आइतबार) गर्ने निधो गरिएको छ। नेजाले उक्त साधारण सभालाई व्यवस्थित गरी सफलतापूर्वक सम्पन्न गर्न आवश्यक तयारी गर्दै सहभागिताका लागि रजिष्ट्रेशन खुला गरिसकेको छ। नेजाले आफ्ना सदस्यहरुलाई साधारण सभामा सक्रिय सहभागी हुन आव्हान गर्दै रजिष्ट्रेशन खुला गरेको हो। संस्थाको विधानको धारा ९.३.२ मा व्यवस्था भए बमोजिम साधारण सभा वा अधिवेशनमा भाग लिन चाहने सदस्यहरुले तोकिएको साधारण सभाको मिति भन्दा ७ दिन अगाडि नै रजिष्ट्रेशन गरिसक्नु पर्दछ। सोही बमोजिम संस्थाले रजिष्ट्रेशन खुला गरिसकेको नेजाका उत्तर-पूर्व क्षेत्रीय संयोजक एवम् १७औं साधारण सभा मूल आयोजक समितिका संयोजक सुपेन्द्र बस्नेतले जानकारी दिए। रजिष्ट्रेशनका बारेमा जानकारी दिदै संयोजक बस्नेतले भने, ‘साधारण सभाको मिति निकै नजिकिसकेको छ। त्यसैले विधानले व्यवस्था गरे बमोजिम रजिष्ट्रेशन खुला गरिसकिएको छ। यथासिघ्र रजिष्ट्रेशन गरेर साधाण सभामा सहभागिताको सुनिश्चितता गर्न सबै सदस्य ज्यूहरुलाई विनम्र अनुरोध गर्दछु।’

संस्थाले जनाए अनुसार १७औं साधारण सभामा भाग लिनका लागि रजिष्ट्रेशन गर्ने अन्तिम म्याद यही आउदो मे १७ तारिख सुक्रबार रातको १२ बजे(अमेरिकाको पूर्वीय समय अनुसार) सम्म मात्र रहेको छ। रजिष्ट्रेशनका लागि सदस्यहरुले संस्थाले उपलब्ध गराएको विद्युतीय फारम भरी तोकिएको शुल्क तिरेर आफ्नो नाम दर्ता गर्नु पर्नेछ। संस्थाले रजिष्ट्रेशनका लागि एकल सदस्यलाई प्रति सदस्य १ सय पचास अमेरिकी डलर र परिवारसहितका लागि दुइ सय अमेरिकी डर रजिष्ट्रेशन शुल्क तोकेको छ। रजिष्ट्रेशनका लागि लिंक;

https://www.neajausa.org/registration-for-17th-general-meeting/

रजिष्ट्रेशन खुला भएसंगै सदस्यहरुले पनि साधारण सभामा सक्रिय सहभागिता जनाउन रजिष्ट्रेशन गर्दै आवश्यक तयारीमा जुट्न थालेका छन्। संयोजक बस्नेतले जानकारी दिए अनुसार साधारणसभाको मिति नजिकिदै गर्दा साधारण सभालाई सफलतापूर्वक सम्पन्न गर्न नेजा परिवार उत्साह, उर्जा र उमङ्गका साथ आवश्यक अन्य तयारीमा पनि जुटिरहेको छ।

बाबुराम दाहाल, न्युयोर्क।

विश्व प्रेस स्वतन्त्रता दिवसको अवसरमा नेपाल अमेरिका पत्रकार संघ (नेजा) ले ‘सामुदायिक पत्रकारिता र प्रेस स्वतन्त्रता’ विषयमा रहेर कार्यक्रमको आयोजना गरेको छ । मे ४, २०२४ मा न्युयोर्कमा आयोजित कार्यक्रममा वातावरणीय संकटको सामनामा पत्रकारिता रहेको सन्दर्भको सेरोफेरोमा कार्यक्रमलाई केन्द्रित गरिएको थियो । विश्व प्रेस स्वतन्त्रता दिवसको अवसरमा गरिएको कार्यक्रमको उद्घाटन वातावरणको जननी बिरुवामा पानी राखेर गरिएको थियो ।

कार्यक्रममा प्रमुख अतिथिको रुपमा बोल्दै संयुक्त राष्ट्रसंघका लागि नेपालका स्थायी प्रतिनिधि लोकबहादुर थापाले समुदायमा पत्रकारिताको भूमिका महत्त्वपूर्ण हुने उल्लेख गर्नुभयो । प्रमुख अतिथि थापाले समुदाय र प्रेसको सुमधुर सम्बन्धपश्चात् मात्र स्वतन्त्रतालाई पूर्ण रुपमा अगाडि बढाउन सक्ने बताउनुभयो । थापाले मिडियामा ठूलो चुतौती आएको बताउँदै हिजो जोसँग सूचना हुन्थ्यो त्यो शक्तिसाली हुने गरेको थियो भने आज सूचनाको स्पष्टता नहुँदा समाजमा कन्फ्युजनको वातावरण बढेको बताउनुभयो ।

‘विश्वमा बढ्दै गएको सोसल मिडियाले पनि समुदायमा सूचनासम्बन्धी विभिन्न कन्फ्युजन उत्पन्न गर्ने गरेको छ,’ प्रमुख अतिथि थापाले बताउनुभयो । थापाका अनुसार गलत समाचारले समाजमा गलत धारणा उत्पन्न गर्ने हुँदा समाज गलत बाटोतिर गएको पाइने गरेको छ । समाजमा व्याप्त गलत सूचनामार्फत चुनौती सिर्जना गरिरहेको हुँदा यसलाई चिर्नका लागि नेजालाई युएनको मिसनसँग मिलेर अगाडि बढ्नसमेत आग्रह गर्नुभयो । नेपालको विकास, राजनीति, जलवायु परिवर्तन, स्वास्थ्य क्षेत्र, शान्ति स्थापनालगायतका क्षेत्रमा मिडियाको ठूलो भूमिका रहेको हुँदा यूएनसँग मिलेर अगाडि बढ्न आग्रह गर्नुभयो । साथै, अहिले यूएनले नेपालमा जलवायु परिवर्तनबाट पर्न सक्ने असरका बारेमा विभिन्न कार्यक्रम गर्दै आएको छ बताउँदै यस्ता खाले कार्यक्रममा नेपालको मुद्दालाई अभिव्यक्त गर्नका लागिसमेत आग्रह गर्नुभएको थियो । प्रमुख अतिथि थापाले प्रवासमा रहेका पत्रकारहरूलाई समग्रमा नेपाल र डायस्पोरालाई जोड्ने कार्यमा सक्रिय रुपमा अगाडि बढ्नसमेत आग्रह गर्नुभयो ।

नेजा अध्यक्ष सुरज भण्डारी अध्यक्षता एवं महासचिव बाबुराम दाहालको सञ्चालन रहेको कार्यक्रममा विषयवक्ताको रुपमा अमेरिकाको ओहायो राज्यमा रही पत्रकारिता विषयमा विद्यावारिधि गरिरहनुभएका पत्रकार प्रकाश आचार्यले ‘सामुदायिक पत्रकारिता र प्रेस स्वतन्त्रता’ को बारेमा प्रकाश पार्नुभएको थियो । आचार्यले सञ्चारमाध्यम र सामाजिक सञ्जालबीच ठूलो भिन्नता रहेको बताउनुभयो । साथै, आचार्यले समाचार प्रकाशन गर्ने तरिका फरक-फरक हुने हुँदा समाजमा असर पर्ने खालका विषयवस्तुलाई समाचार बनाउनु उपयुक्त नहुने बताउनुभयो । साथै, विषयवक्ता आचार्यले समाजमा विकृति ल्याउने खालका समाचारलाई प्राथमिकता नदिनसमेत आग्रह गर्नुभयो ।

सो कार्यक्रममा सामुदायिक पत्रकारिताका चुनौतीका सन्दर्भमा बोल्दै नेजाका पूर्वमहासचिव किरण मरहट्ठाले प्रवासमा रहेका पत्रकार र नेजाले सामुदायिक पत्रकारिताको नमुना पेस गर्न सफल भएको बताउनुभयो । यस्तै, समुदायले पत्रकार र पत्रकारले समुदायलाई सम्मान गर्न सक्दा मात्रै दुवै पक्षलाई फाइदा पुग्ने बताउनुभयो ।

नेजाका अध्यक्ष सुरज भण्डारीले कार्यक्रमको उद्देश्य, नेजाका योजना एवं समुदाय र पत्रकारितालाई जोड्न नेजाको भूमिकाका सन्दर्भलाई जोडेर आफ्ना धारणा राख्नुभएको थियो । अध्यक्ष भण्डारीले नेजा उत्तर अमेरिमा रहेका पत्रकारहरूको संस्था नेजा भएकाले समुदायको आवश्यकतालाई मध्यनजर गर्दै नेजाले आफ्नो योजना तथा कार्यक्रम अगाडि बढाएको बताउनुभयो । यसैगरी, नेजाका महासचिव बाबुराम दाहालले नेजाले समुदायमा भएका कार्यक्रम एवं गतिविधिका बारेमा प्राप्त समाचार एवं समुदायलाई आवश्यक पर्ने सूचना नेजाले अमेरिकाबाट प्रकाशन हुने सबै सञ्चारमाध्यमलाई उपलब्ध गराउने गरेको बताउनुभयो । महासचिव दाहालले समुदायमा गरिने गतिविधिका बारेमा विस्तृत जानकारी समेटेर नेजालाई उपलब्ध गराउनसमेत आग्रह गर्नुभएको थियो ।

यसैगरी, कार्यक्रममा बोल्दै नेपाल सरकारका पर्यटन प्रवर्धक गोकुल श्रेष्ठले सन् २०२४ मा १२ लाख पर्यटक नेपाल भित्र्याउने लक्ष रहेको बताउनुभयो । साथै, अमेरिमा बसेर नेपाललाई नेपाली आँखाले होइन अमेरिकी आँखाले हेर्न आग्रह गर्दै आफू र आफ्ना सन्ततिलाई छुट्टीको समयमा नेपाल जाने वातावरण मिलाउनसमेत आग्रह गर्नुभयो ।

सो अवसरमा बोल्दै प्रवासी नेपाली मञ्च अन्तर्राष्ट्रिय समितिका अध्यक्ष सञ्जय थापाले निष्पक्ष पत्रकारिताका आवश्यकतामा जोड दिनुहुँदै प्रवासमा रहेका पत्रकारहरूले गैरआवासीय नेपालीलाई नेपाली नागरिकताको निरन्तरताका बुलन्द आवाज उठानुपर्ने बताउनुभयो । यस्तै, नेपाली जनसम्पर्क समिति, अमेरिकाका अध्यक्ष आनन्द विष्टले लोकतन्त्रमा लागि प्रेस स्वतन्त्रता अनिवार्य रहेको बताउँदै समुदायका गतिविधि मिडियामार्फत आमजनसमुदायमा पुर्याउन मिडियाले खेलेको भूमिकाको प्रशंसा गर्नुभयो । यसैगरी, अधिकारकी निर्देशक नर्बदा क्षेत्रीले व्यक्ति र संस्था हेरेर भन्दा कामका आधारमा रिपोर्टिङ गर्न र निष्पक्षता देखाउन पत्रकारसमक्ष आग्रह गर्नुभयो । यस्तै, एनआरएनए अमेरिका उत्तर-पूर्व क्षेत्रीय संयोजक आङछिरिङ शेर्पाले सकारात्मक प्रवाभ पार्ने समाचार सामग्री संप्रेषण गर्न विशेष जोड दिनुभयो । कार्यक्रममा बोल्नुहुँदै नेपाल पत्रकार महासंघका पूर्वकेन्द्रीय सदस्य तथा फोनिजका पूर्वअध्यक्ष मोहनसिंह लामाले वातावणीय संकट अहिलेको मुख्य समस्या भएको हुँदा पत्रकारले यस विषयलाई महत्त्व दिएर समाचार सामग्री प्रकाशन एवं प्रसारण गर्न अनुरोध गर्नुभयो ।

यसैगरी, नेजाका सदस्य कल्पना घिमिरेको स्वागत मन्तव्य रहेको कार्यक्रममा नेजाका उत्तर-पूर्व क्षेत्रीय संयोजक सुपेन्द्र बस्नेतले नेजाको म्यासाच्युसेट्स राज्यको बोस्टन सहरमा मे २५ र २६, २०२४ हुने १७औं साधारण सभाका बारेमा जानकारी दिँदै सबैलाई निमन्त्रणा गर्नुभएको थियो ।

नेजाका उपाध्यक्ष सुजन पण्डितको धन्यवाद मन्तव्य रहेको कार्यक्रममा नेजाका सल्लाहकार मच्छेदेवी गुरुङ, नेजाका पश्चिम क्षेत्रीय संयोजक रोशन अधिकारी, पत्रकारहरू लोकमणि राई, मोहनसिंह लामा, प्रेमिला गौचन, सुनिता कोइराला, सन्तोष शर्मा, किरण पाण्डे, बद्री गौतमलगायतले आफ्ना भनाइ राख्नुभएको थियो ।

बिक्की पुलामी, न्युयोर्क

बिगत बर्षहरुमा जस्तै यस बर्ष पनि न्युयोर्क सहर म्यानह्याटनमा नेपाल डे परेड २०२४ आयोजना गरिने भएको छ । सन् २०१६ देखि सुरुवात भएको “नेपाल डे परेड” २०२४ गैर आवासीय नेपाली संघ, राष्ट्रिय समन्वय समिति, न्युयोर्क च्याप्टरको आयोजनामा हुन लागेको हो ।

मे १९,२०२४ मा हुने “नेपाल डे परेड”का लागी गैर आवासीय नेपाली संघ, राष्ट्रिय समन्वय समिति न्युयोर्क च्याप्टरका अध्यक्ष हेमन ब. मल्ल अध्यक्ष र शेर्पा किदुग अमेरिकाका अध्यक्ष ई. तेम्बा शेर्पा कन्भेनर रहने भएको छ ।
कार्यसमितिमा को-कन्भेनरको जिम्मेबारी राजेश सापकोटा, तुलसी राम आचार्य, नबिन कुमार ओझा, सुवास साह, ओम बिश्वकर्मा, कुल (राजन) गौली, श्याम पौडेल, अजित शाह र कृष्ण गुरुंगले पाएका छन् । भने अन्य बिभागमा आर्थिक बिभागको संयोजकको लागी दिन दयाल (दिनेश) भण्डारी र सदस्यहरुमा बाबुराम शर्मा, टक ब. रुवाली, देबेन्द्र लामा र ध्रुबराज पौडेल रहकेा छन् ।

मिडिया संयोजकका लागी बिक्की पुलामी, प्रचार प्रसार संयोजकका लागी चमेली खाती परियार, सांस्कृतिक संयोजकका लागी बसन्ती राई, झाकी प्रदर्शन संयोजकका लागी शंकर पौडेल, स्वयंसेवक परिचालन संयोजकका लागी दावा शेर्पा, सह-संयोजकका लागी दान बहादुर मल्ल, र्याली ब्यवस्थापन संयोजकका लागी पुनम बसेल, कार्यक्रम ब्यवस्थापन संयोजकका लागी बासु लामीछाने, अतिथी सत्कार संयोजकका लागी नवराज केसी, सह-संयोजकका लागी रश्मी श्रेष्ठ, ट्रक ब्यवस्थापन संयोजनका लागी लंग आईल्याण्ड नेपाली समाज र स्टेज ब्यवस्थापन संयोजकका लागी छिरिंग शेर्पाले जिम्मेवारी पाएका छन् ।

त्यस्तै गरी प्रदेश संयोजकहरुमा कोशी प्रदेशकालागी टिका ढकाल, मधेश प्रदेशका लागी दिनेश यादव, बाग्मती प्रदेशका लागी पासांग नुर्बु शेर्पा, गण्डकी प्रदेशका लागी कृष्ण भट्ट, लुम्बिनी प्रदेशकाली आश बहादुर घर्ती, कर्णाली प्रदेशका लागी तिलक पुरी र सुदुर पश्चिम संयोजकका लागी दान सिंह बिष्टले जिम्मेबारी पाएका हुन् ।

अमेरिका ।

नेपाल अमेरिका पत्रकार संघ (नेजा) ले आफ्नो स्थापना दिवस विविध कार्यक्रम गरी मनाएको छ । संघले आफ्नो १७औं स्थापना दिवसको अवसरमा रक्तदान, अन्तरक्रिया तथा वृक्षरोपण कार्यक्रमको आयोजना गर्‍यो । सन् २००७, अप्रिल २१ र २२ गते भर्जिनिया राज्यको आर्लिङटनमा भएको प्रथम अधिवेशनको मितिलाई आधार मानी संघले यो वर्षदेखि अप्रिल २१ लाई नेजा स्थापना दिवस अर्थात् ‘नेजा डे’ को रुपमा मनाउन सुरु गरेको नेजाका महासचिव बाबुराम दाहालले जानकारी दिनुभयो ।

नेजाले स्थापना दिवसका अवसरमा नेपाल पत्रकार महासंघका पदाधिकारी, नेजाका संस्थापकहरू, संस्थापक अध्यक्ष तथा पूर्वअध्यक्ष, पूर्वकार्यसमितिका पदाधिकारी तथा सदस्यहरू, संस्थाका सदस्यहरू, गैरआवासीय नेपाली संघका अभियन्ताहरूको सहभागितामा अप्रिल २१ आइतबार विद्युतीय माध्यम जुममार्फत बृहत् अन्तरक्रिया कार्यक्रम सम्पन्न गरेको छ ।

सो अन्तरक्रियामा प्रवासको पत्रकारिताका विविध आयाममाथि सहभागिहरूले धारणा राख्नुभएको थियो । नेजाले क्षेत्रगत रुपमा समेत अमेरिकाको क्यालिफोर्निया राज्यको सानफ्रान्सिस्को, टेक्सास राज्यको युलेस र म्यासाच्युसेट्स राज्यको बोस्टनमा स्थापना दिवसको अवसरमा विभिन्न कार्यक्रम गरी मनाइयो ।

नेजा उत्तर अमेरिकामा रहेका नेपाली पत्रकारहरूको साझा संस्था हो । रचनात्मक ढंगका कार्यक्रम गरी संघको स्थापना दिवस मनाइएको बताउँदै नेजाका अध्यक्ष सुरज भण्डारीले आगामी दिनमा संघमार्फत अमेरिका र नेपालमा पत्रकारिताको गुणात्मक विकासका लागि विझिन्न कार्यक्रम सञ्चालन गर्न लागिएको र सक्रिय पत्रकारका लागि फेलोसिप कार्यक्रम सुरु हुन लागेको बताउनुभयो । अध्यक्ष भण्डारीले नेजा र नेपाल पत्रकार महासंघबीचको सम्झौता र सहकार्यबाट धेरै कुरा गर्न सकिने बताउनुभयो । नेपाल पत्रकार महासंघसँगको सहकार्यमा नेजाले ‘नेजा ग्रामीण उत्कृष्ट पत्रकारिता पुरस्कार’ प्रत्येक दुई वर्षमा प्रदान गर्दै आएको छ ।

नेजाले स्थापना दिवसको अवसरमा अप्रिल २० मा ब्लड डोनर्स अफ अमेरिकासँगको सहकार्यमा टेक्सासको युलेस सहरमा रहेको नेपाली सांस्कृतिक तथा आध्यामिक केन्द्रमा रक्तदान कार्यक्रमको आयोजना गरेको थियो । यसैगरी, अप्रिल २१ मा टेक्सासको डालसमा रहनुभएका पत्रकारसँग शुभकामना साटासाट गरेको थियो भने म्यासाच्युसेट्स राज्यको बोस्टनमा शुभकामना आदान-प्रदान कार्यक्रम गरेको थियो । यस्तै, अप्रिल २२ मा लायन्स इन्टरनेसनल डिस्ट्रिक्ट 2-x1, डालास एभरेस्ट लायन्स क्लबसहितका लायन्स क्लबहरूसँगको सहकार्यमा टेक्सासको अर्भिङ सहरमा रहेको जेफरसन पार्कमा वृक्षरोपण गरिएको थियो ।

केप कड, मासाच्युसेट्स

केप कड नेपाली समाजको साधारण सभा र तेस्रो अधिवेशन अप्रिल १३, २०२४ का दिन, मेरियट होटल, केप कड, मासाच्युसेट्स अमेरिकामा सम्पन्न भयो। समाजका अध्यक्ष केवी राईको सभापतित्वमा शुरु भएको साधारण सभाको सञ्चालन सचिव ईच्छा खड्काले गर्नु भएको थियो भने उपस्थित सबैलाई सदस्य कृष्ण तिमल्सिनाले स्वागत गर्नु भएको थियो। सभाको उद्घाटन साना वालिकाहरूले बत्ति वालेर गरेका थिए ।

सचिव ईच्छा खड्काले पेश गर्नु भएको संस्थाको प्रगति विवरण र भए गरेका गति-बिधिहरूको प्रतिवेदन तथा कोषाध्यक्ष विमल खड्काले पेश गर्नु भएको आर्थिक प्रतिवेदन सभाले सर्वसम्मत रुपमा पारित गरेको थियो।

सभामा, समाजका सल्लाहाकार तथा विधान समितिका अध्यक्ष विष्णु मान प्रधानले प्रस्तावका लागि पेस गर्नु भएको संस्थाको विधान, उपस्थित सदस्यहरूबाट सर्वसम्मत रूपमा ताली बजाएर पारित गरिएको थियो । प्रधानले विधान माथी उठेका केही प्रश्न तथा जिज्ञासाहरूका जवाफ दिएर प्रष्ट पार्नु भएको थियो। उहाँले हामी मानव जाति सामाजिक प्राणी हो, हामी जता गएपनि हामीलाई हाम्रो समाज चाहिन्छ भन्दै, समाजका सवै सदस्यहरू मिलेर बिधानले दिएको अधिकार प्रयोग गरेर संस्थालाई अझ राम्रोसंग अगाडि बढाउनु पर्ने कुरामा जोड दिदैं कार्यक्रम सफलताको शुभकामना सहित सबैलाई नेपाली नयॉं बर्षको २०८१ को शुभकामना व्यक्त गरेका थिए ।

बन्द सत्रमा, केप कड नेपाली समाजको नयाँ कार्य समितिको निर्वाचन प्रयोजनका लागी गठित निर्वाचन समितका अध्यक्ष हरी राई, सदस्य प्रदिप बज्राचार्य र सदस्य मनोज क्षत्रीले संस्थाको विधान बमोजिम विधिपूर्वक प्रकृया पुरा गरी अधिवेशनवाट नयाँ कार्य समितिको निर्विरोध निर्वाचित भएको घोषणा गर्नु भएको थियो। नयॉं कार्यसमितिको अध्यक्षमा केवी राई, बरिष्ठ उपाध्यक्षमा विष्णु मान प्रधान, उपाध्यक्षहरुमा कुवेर विन्दुकार र कृष्ण तिमल्सिना, महासचिवमा इच्छा खड्का, सचिवमा सरस्वती खनाल, सह- सचिवमा हर्कुलस कान्दंगवा, कोषाध्यक्षमा विमल खड्का, सह-कोषाध्याक्षमा सुशिला सिंह, महिला संयोजकमा प्रमिला धमला बन्जारा र युवा संयोजक कुमार तामाङ निर्विरोध निर्वाचित भएका छन् भने कार्यसमितिको सदस्यहरुमा, अजय खतिवडा, ध्रुव थापा, ज्योति केसी, खगेन्द्र राई, कुमुदा पोख्रेल, पार्वती चालिसे, समीर ओझा, सिताराम राई र टिका तामाङ निर्विरोध निर्वाचित भएका छन् ।

विधान अनुसार २१ जना रहने कार्यसमितिमा २० जना निर्वाचित भएका छन् । नव निर्वाचित कार्य समितिले बाँकी १ सदस्य पछि वोर्ड मिटिंगको निर्णयबाट मनोनित गर्ने छ।

संस्थापक अध्यक्ष तथा निर्वाचन समितिका अध्यक्ष हरी राई, सदस्य प्रदिप बज्राचार्य र सदस्य मनोज क्षत्रीले नयाँ कार्य समितिका पदाधिकारी तथा सदस्यहरुलाई खादा लगाई, प्रमाण पत्र प्रदान गरी पद तथा गोपनियताको सपथ गराउनु भएको थियो भने निर्वाचन समितिका अध्यक्ष राईले निर्वाचित कार्यसमिति सम्पूर्ण पदाधिकारी तथा सदस्यहरू लाई बधाई तथा शुभकामना ब्यक्त गर्नु भएको थियो।

साधारण सभामा केही सदस्यहरू मध्यबाट ठगबहादुर तिमल्सिना र हेम चालिसेले नव निर्वाचित कार्यसमितिलाई बधाई तथा शुभकामना व्यक्त गर्नु भएको थियो। सभामा उपस्थित सबैले एक आपसमा नयॉं बर्षको शुभकामना पनि आदान प्रदान गरेका थिए।

सभाले आयोजना गरेको रात्री भोजमा बिभिन्न परिकार बनाएर ल्याउनु हुने सम्पूर्ण सदस्य तथा स्वयंसेवीहरूलाई सम्मान गरेर प्रमाण पत्र पनि प्रदान गरिएको थियो। उक्त सभामा ४६ जनाले आजिवन सदस्यता पनि लिएका थिए ।

अन्तमा, नव निर्वाचित अध्यक्ष केवी राईले सभामा उपस्थित सबै सदस्यहरूलाई उहॉंहरूको सहयोग, समर्थन र गरिमामय उपस्थितिको लागि हार्दिक धन्यवाद ज्ञापन गरेका थिए । उहॉंले विधान समिति, निर्वाचन समिति, सल्लाहकारहरु, कार्यसमितिका पदाधिकारी तथा सदस्यहरू, स्वयंसेवकहरू र प्रत्यक्ष-अप्रत्यक्ष रुपमा साधारण सभा तथा अधिवेशन सफल बनाउन सहयोग गर्नुहुने सम्पूर्ण महानुभावहरूलाई विशेष धन्यवाद दिनुभएको थियो। अध्यक्ष राईले नब निर्वाचित कार्यसमितिका पदाधिकारी तथा सदस्यहरूलाई बधाई तथा सफल कार्यकालको लागी शुभकामना ब्यक्त गर्दै केप कडबासी हामी सबै नेपाली मिली हातेमालो गरेर संस्थालाई अगाडि बढाउदै जाने कुरामा जोड दिदै आफ्नो प्रतिबद्धता ब्यक्त गर्दै सबैलाई नेपाली नयाँ बर्षको २०८१ को शुभकामना दिनुभएको थियो।

केप कड नेपाली समाज, नेपाली कला र संस्कृतिको संरक्षण र प्रवर्द्धन गर्न २०११ मा केप कड, मासाच्युसेट्स, अमेरिकामा स्थापना गरिएको सामाजिक संस्था हो । यो संस्थाले नेपाली समुदायको हितका लागि विभिन्न कार्यक्रमहरू गर्दै आएको छ।

टेक्सस ।

नेपाल अमेरिका पत्रकार संघ (नेजा) ले आफ्नो ‘स्थापना दिवस’ मनाउने भएको छ । संघका अध्यक्ष सुरज भण्डारीको अध्यक्षतामा नेजा कार्यसमितिको जनवरी २०, २०२४ मा सम्पन्न बैठकले ‘अप्रिल २१’ लाई संस्थाको ‘स्थापना दिवस’ का रुपमा मनाउने निर्णय गरेको हो । संस्थाको विशेष दिन अर्थात् ‘स्थापना दिवस’ को मितिलाई सबै दृष्टिकोणबाट उपयुक्त एवं सर्वमान्य बनाउनका लागि वर्तमान कार्समितिले संस्था स्थापनाका आधिकारिक कागजातमार्फत प्राप्त विभिन्न मितिका बारेमा छलफल गरेको थियो ।

यस सम्बन्धमा नेजाका संस्थापक एवं पूर्वअध्यक्षज्यूहरूसँगको परामर्श एवं छलफलबमोजिम अप्रिल २१-२२, २००७ मा अमेरिकाको वासिङटन डीसीमा भएको संघको प्रथम अधिवेशनलाई उपयुक्त आधार मानी सोहीअनुसार कार्यसमितिको संस्थापक/पूर्वअध्यक्ष एवं सल्लाहकारज्यूहरूसँगको संयुक्त बैठकले अप्रिल २१ लाई ‘नेजा दिवस’ मनाउने निर्णय गरेको संघका महासचिव बाबुराम दाहालले प्रेस बिज्ञप्ति मार्फत जानकारी गराएका छन् ।
साथै, ‘अप्रिल २१’ लाई ‘नेजा स्थापना दिवस’ घोषणा गरी कार्यान्वयन गर्ने र सो दिन संस्थाका लागि महत्त्वपूर्ण हुने हुँदा संस्थाको विधानमा समेत समावेश गरेर जाने बैठकबाट निर्णय गरिएको छ ।
साथै, नेजाको स्थापना दिवसको अवसरमा संस्थाको गरिमालाई उच्च बनाउने एवं आमसमुदायको हितअनुकूल विशेष एवम् फलदायी कार्यक्रमको आयोजना गरेर सो दिवस मनाउने नेजाको उद्देश्य रहेको बताईएको छ ।

न्यूयोर्क

नेपाल संवत ११४४ प्वहेलागाः अष्ठमी,शनिबार (Saturday, February 3, 2024) का दिन नेवा: नख: न्यूयोर्कका महासचिव तुलसी नारायण चित्रकारले जूम (zoom) को माध्यमबाट संस्थाको पाँचौं साधारण सभा संचालन गरेका छन् । साधारण सभाको अध्यक्षता नख:का अध्यक्ष महेन्द्र बीर बज्राचार्यले गरेका थिए । प्रमुख अतिथिमा नख:का पूर्व अध्यक्ष तथा सल्लाहाकार विष्णु मान प्रधान थिए । उक्त सभामा उपस्थित सबैलाई प्रथम उपाध्यक्ष डा. नरेश मान शाक्यले स्वागत गरेका थिए । नख:का प्रमुख अतिथि, संस्थापक उपाध्यक्ष, पूर्व अध्यक्ष तथा सल्लाहाकार विष्णु मान प्रधानले नेवाः नखः न्युयोर्कको स्थापना, यसको महत्त्व र इतिहासको बारेमा प्रकाश पारेका थिए ।

उहाँले “Teamwork Makes A Dream Work” भनेर सबै सदस्यहरू मिलेर संस्थालाई अझ राम्रोसंग अगाडि बढाउनु पर्ने कुरामा जोड दिदैं कार्यक्रम सफलताको शुभकामना व्यक्त गरेका थिए । द्वितीय उपाध्यक्ष श्रुती अमात्यले नखःको बारेमा बोल्नुका साथै सबै मिलेर काम गरि नयाँ पु्स्तालाई समेटेर नेवाः संस्कार र संस्कृति सिकाउँदै लानु पर्ने र सदस्यहरूलाई लाभान्वित हुने खालको कार्यक्रम ल्याउनु पर्ने कुरामा जोड दिंदै कार्यक्रम सफलताको शुभकामना दिएका थिए ।

कार्यक्रमको शुरूमै उपस्थित सदस्यहरूको सहभागीताको दर्ता कार्य, सचिव अनित श्रेष्ठ र सह-कोषाध्यक्ष मेनी श्रेष्ठले गरेका थिए । कार्यक्रममा उपस्थित सबै सदस्यहरुले आ-आफ्ना परिचय दिएका थिए ।

खुल्लासत्रमा, महासचिव तुलसी नारायण चित्रकारले संस्थाको दुई वर्षको कार्यप्रगति विवरण तथा संस्थाले भए गरेका गतिविधिहरू प्रस्तुत गरेका थिए भने कोषाध्याक्ष सलोनी वन्त श्रेष्ठले आर्थिक प्रतिवेदन पेश गरेका थिए । पेश गरिएको सो प्रतिवेदन सभाले सर्वसम्मत पारित गर्यो ।

सभामा, दिवंगत भएका नखःका प्रथम उपाध्यक्ष डा. नरेश मान शाक्यका पिता श्री कर्ण मान शाक्यको सम्झनामा एक मिनेट मौन धारणा गरि उहाँको आत्माको चिरशान्तिको कामना गर्दै हार्दिक श्रद्धांजली अर्पण गरिएको थियो ।

बन्द सत्रमा, नेवा: नख: न्यूयोर्कको चौंथो निर्वाचन, निर्वाचन आयुक्त विष्णु मान प्रधानले विधिपूर्वक सम्पन्न गरेका थिए । नयाँ कार्यसमितिको अध्यक्षमा डा. नरेश मान शाक्य, प्रथम उपाध्यक्षमा श्रुती अमात्य, द्वितीय उपाध्यक्षमा महेन्द्र कुमार बज्राचार्य, महासचिवमा तुलसी नारायण चित्रकार, सचिवमा अनित श्रेष्ठ, कोषाध्यक्षमा सलोनी वन्त श्रेष्ठ र सह-कोषाध्याक्षमा मेनी श्रेष्ठ निर्विरोध निर्वाचित भएका थिए भने कार्यसमितिको सदस्यहरूमा, दिपक कुमार प्रधान, नम्रता प्रधान, राधिका श्रेष्ठ, किरण कुमार रंजित, शोभना शाक्य, उजिला प्रधान, राजीव बाटाजु र सबिना शाक्य निर्विरोध निर्वाचित भएका थिए । १५ जनाको कार्यसमितिमा ८ जना महिलाहरू निर्वाचित भएका थिए ।सभाले विष्णु मान प्रधान र महेन्द्र बीर बज्राचार्यलाई सल्लाहाकारमा मनोनीत गरे ।

अध्यक्ष महेन्द्र बीर बज्राचार्यले नव निर्वाचित कार्यसमितिलाई सफल कार्यकालको शुभकामना दिएका थिए भने सभामा उपस्थित सबै सदस्यहरूलाई उहाँहरूको सहयोग, सपोर्ट र गरिमामय उपस्थितिको लागि हार्दिक धन्यवाद ज्ञापन गरेका थिए । उहाँले आफ्नो कार्यकालमा नखःको विभिन्न कार्यक्रममा सहयोग गर्नुहुने सम्पूर्ण सदस्य, संघ-संस्था, महिला तथा पुरूष, स्वयंमसेवी र सहयोगीहरूलाई विशेष धन्यवाद दिएका थिए । अन्तमा, नेवा: कला संस्कृतिको क्षेत्रमा सबै समुदायसँग सहकार्य गर्दै संस्थालाई अगाडि बढाउने र आधुनिक प्रविधि प्रयोग गरि भावी कार्यक्रमहरू संचालन गर्नु पर्नेमा जोड दिंदै नव निर्वाचित अध्यक्ष डा. नरेश मान शाक्यले सबैलाई धन्यवाद दिई सभाको अन्त्य गरेका थिए । अन्य पदाधिकारीहरू तथा सदस्यहरूले पनि आ-आफ्ना प्रतिवद्धता व्यक्त गरेका थिए।

नेवा: नख: न्यूयोर्क – नेवा: परम्परा, कला र संस्कृतिको संरक्षण, प्रवर्द्धन र नयाँ पिढिमा पुस्तान्तरणका लागि सन २०११ मा न्युयोर्कमा स्थापना गरिएको संस्था हो । यो संस्थाले समुदायको हितका लागि विभिन्न कार्यक्रमहरू सञ्चालन गर्दै आएको छ ।

सुपेन्द्र बस्नेत, बोष्टन

नेपाल अमेरिका पत्रकार संघ(नेजा-NEAJA)ले अमेरिकाको बोस्टनमा आयोजना गरेको ‘संस्थागत परिचय एवम् समन्वयात्मक बैठक तथा शुभकामना आदानप्रदान कार्यक्रम’ सम्पन्न भएको छ। कार्यक्रम अक्टोबर १५ तारिख आइतवार घटस्थापनाको दिन मासाच्युसेट्स राज्यको ब्रेनट्री स्थित मूलवासी नेपालीहरुको सामूदायिक भवनमा सम्पन्न भएको हो। मासाच्युसेट्स राज्यमा क्रियाशील रहेका मूलवासी नेपालीहरु आबद्ध संघ संस्थाहरुका बिच स्थापित भातृत्व, एकता र सहकार्यको सम्बन्धलाई थप आत्मीय र मजबुत बनाउने मूल उद्देश्य राखेर कार्यक्रमको आयोजना गरिएको थियो। कार्यक्रममा सहभागीहरुले सामुदायिक हितार्थ क्रियाशील संघ संस्थाहरुका बिच एकता, समन्वय र सहकार्य हुनु पर्नेमा जोड दिएका थिए। न्यू इंग्याल्याण्ड क्षेत्रका धेरै नेपाली संघ संस्थाहरु क्रियाशील भइरहेको तर विविध कारणले आपसमा यथोचित चिनजान, एकता, समन्वय र सहकार्य हुन नसकिरहेको स्विकार गर्दै सहभागीहरुले नेजाले चालेको पहलकदमीको खुलेर प्रशंसा गरेका थिए। नेजाका कारण इतिहासमै पहिलो पटक विभिन्न संघ संस्थाहरुका बिच संस्थागत परिचय र समन्वयात्मक बैठक हुन सकेको जिकीर गर्दै सहभागीहरुले भावी दिनहरुमा पनि यसप्रकारको क्रियाकलापलाई प्राथमिकताका साथ निरन्तरता दिनु पर्नेमा जोड दिएका थिए। मनतव्य व्यक्त गर्ने क्रममा सहभागीहरुले संघ संस्थाहरु र समुदायको उत्थानका लागि प्रेस जगतको महत्वपूर्ण भूमिका रहने स्मरण गर्दै प्रेसले खेलिरहेको सक्रिय भूमिकाका लागि धन्यवाद ज्ञापन गरेका थिए।

कार्यक्रमा नेपाल अमेरिका पत्रकार संघ(नेजा)का क्षेत्रीय (उत्तर-पूर्व)संयोजक सुपेन्द्र बस्नेतले संस्थाको ध्येय, लक्ष्य, उद्देश्य र क्रियाकलापहरुका बारेमा प्रकाश पार्दै संस्थागत संक्षिप्त परिचय प्रस्तुत गरेका थिए।सूचनाको हक तथा मानव अधिकारको सुनिश्चितता, स्वतन्त्र, निर्भिक र निश्पक्ष पत्रकारिता, व्यावसायिक पत्रकारिता जस्ता मूलभूत विषयहरु नै प्रेस जगतको मूल मर्म भएको बताउदै संयोजक बस्नेतले त्यसप्रति नेजा प्रतिबद्ध रहेर अघि बढिरहेको प्रस्ट्याएकाथिए। उनले प्रेस जगत र अन्य संघ संस्थाहरुको मूल उद्देश्य नेपाली समुदायको भलो चिताउने/ गर्ने नै भएकाले आपसमा एकताबद्ध भएर सहकार्य गर्दै अघि बढ्नु पर्नेमा जोड दिएका थिए। कार्यक्रमको दौरानमा उनले आउदै गरेका नेपाली चाड पर्वहरु बडा दशैं, तिहार, न्यू दया: भिम्तुना, छठलगायतको शुभकामनासमेत व्यक्त गरेका थिए। कार्यक्रमका अन्य सहभागीहरुले पनि आफ्नो र आफ्नो संस्थाको संक्षिप्त परिचयसहित आ-आफ्ना धारणाहरु राख्दै शुभकामना आदानप्रदान गरेका थिए।

कार्यक्रममा मासाच्युसेट्स तथा न्यू इंग्ल्याण्ड क्षेत्रका मूलवासी नेपालीहरु आबद्ध रहेका १५ वटा क्रियाशील संघ संस्थाहरुका प्रमुख तथा प्रतिनिधिहरुको सक्रिय सहभागिता रहेको थियो।

अक्टोबर १०, न्युयोर्क

केही महिनाअघि नेपाली काँग्रेसका प्रतिनिधि सभा सदस्य, डा चन्द्र भण्डारी आफ्नै घरमा खाना पकाउने ग्यास पड्किएर जलनमा परि सख्त घाईते भएका थिए। उनको हालत निकै चिन्ताजनक भएर उनलाई उपचारका लागि भारत लगिएको थियो। उनी देश र जनताको चिन्ता गर्ने एक गहिरो चिन्तक हुन् । खरो बक्ता र युवा पिडिमा निकै लोकप्रिय भएका कारण स्वदेश र विदेशमा उनको स्वास्थ लाभको कामना गरिएको थियो। उनी अहिले अन्तराष्ट्रिय जलन पिडितहरुको सम्मेलनमा भाग लिन अमेरिका आएको मौका पारि जनसम्पर्क समिति अमेरिकाले ज्याक्सन हाईट्समा एक छलफल अन्तरक्रिया कार्यक्रम आयोजना गरेको थियो।

अन्तरक्रिया कार्यक्रम आनन्द बिष्टको सभापतित्वमा भएको थियो। मुख्य अतिथि सांसद भण्डारी थिए र उनैले छलफलको बिषय उठान गर्ने र ति बिषयहरुमा सहभागीहरुले आफ्नो प्रतिक्रिया दिने र बिषयलाई उदाहरण सहित बिस्तार गर्दै सुझाव प्रस्तुत गर्ने सवाल थियो।
सांसद भण्डारी एक विद्वत व्यक्तित्व हुनुहुन्छ। उनले बिभिन्न फोरमहरुमा बोलेको देश र बिदेशमा नेपालीहरुले सुनेका छन। उहाँ देश र देशबासीको कसरी अवस्था सुधार्न सकिन्छ भन्ने बारे सधै चिन्तन मनन गर्ने व्यक्ति भएकोले अमेरिकामा रहेका नेपालीहरु माझ नेपालको अवस्था बारे बिस्तृत जानकारी गराउँदै त्यसको निराकरणको लागि के कस्ता उपाय अपनाउन सकिन्छ भन्ने धारण पत्ता लगाउन उनले बिस्तृत रुपमा नेपालको पार्टीहरु, बिशेष गरि कांग्रेस र एमाले, व्यवस्था परिवर्तन र त्यसको उपादेयता, संबिधान र त्यसको सही कार्यावन नहुनु, समाबेशिता र त्यसको बिकृति, नाताबाद फरियाबादको बिगबिगी, भ्रष्टाचार इत्यादि बारे लामो समय लिएर बिषय उठान गरि दिए। त्यस्तै जातीय विभेद प्रकाश पार्दै भने, ” एक दलित बिस्वकर्माले निर्माण गरेको त्रिशुल, घण्टा र अनेक सामाग्री मन्दिरमा चढाइन्छ । तर त्यही बिस्वकर्मालाई मन्दिर प्रवेशमा रोक लगाइन्छ। ” यसबाट सामन्ति व्यवस्था कायमै रहेको स्पष्ट पारे। काग्रेसले सामन्ति व्यवस्ता बिरुद्ध हतियार उठाएर ल्याएको प्रजातान्त्रिक व्यवस्थामा यद्यपि समाजमा सामन्ति व्यवस्था नै कायम रही रहनु सम्पुर्ण नेपालीहरुको लागि लजास्पद बिषय भएको स्पस्ट पारे।

डा भण्डारीले बिबिध बिषयहरु उठान गरि आफ्नो भनाई अन्त्य गरे पश्चात सहभागीहरुले ति बिषयहरुमा आफ्नो प्रतिक्रिया र सुझाव प्रस्तुत गर्न फ्लोर खुल्ला गरिएको थियो। अनि सहभागीहरुले हात उठाउदै आफ्नो प्रतिक्रिया र सुझाव दिन थाले। यसै क्रममा बिष्णु सिंहले जनप्रिय सांसद भण्डारी जलनमा परि ज्यान जोखिममा पर्दा उनको सुरक्षा र स्वास्थ लाभको लागि अमेरिकाको चर्चमा भगवानसंग प्रार्थना गरेको र अहिले भगवानको कृपाले अमेरिकामा देख्न पाउदा अत्यन्त खुसी लागेको बताए। तत्पश्चात उनले नेपालको संबिधान आफै नै समाजबाद उन्मुख हुने व्यवस्था गरेकोले अहिले बिभिन्न पार्टिहरुले मिलेर समाजबादी मोर्चा गठन गर्नुको कुनै तुक नभएको स्पस्ट पारे। साथै देशबाट सामन्ति व्यवस्था हटाउन संबिधानमा जात निरिपेक्ष व्यवस्था हुनुपर्ने, र राज्यले धार्मिक स्वतन्त्रताको व्यवस्था गर्दै धर्म निरिपेक्ष हटाएर आफुलाई धर्मबाट अलग राख्नु पर्ने अमेरिकाको उदाहरण सहित आफ्नो सुझाव पेश गरे। अन्तमा सभापति बिष्टले कार्यक्रममा पाल्नु हुने सबैले धन्यवाद ज्ञापन गर्दै कार्यक्रम बिसर्जन गरे।

न्युयोर्क

सेप्टेम्बर १७ तारिखमा जनसम्पर्क समितिले नेपालका परराष्ट्रमन्त्री एन पी सावद र भूपू मन्त्री जितेन्द्र देवको स्वागत कार्यक्रम आयोजना गर्यो। संयुक्त राष्ट्र संघको कार्यक्रममा सहभागी हुन आएका मन्त्री अति ब्यस्त भएकोले समयाभावको कारण सबैलाई ठिक अपरान्ह २ बजे उपस्थित हुन सुचना जनसम्पर्कका स्थायी महामन्त्री मुनेन्द्र नेम्वाङले सुचना जारी गरे। अनि अमेरिका जस्तो संसारको प्रमुख बिकसित देशमा समयको मूल्य र महत्व बुझेका बिभिन्न डाक्टर, वकिल, म्यानेजर, प्रोफेसर, जात जातका संस्थाका प्रतिनिधि, बिभिन्न संस्थाका बर्तमान र भुतपुर्व पदाधिकारीहरु, पत्रकारहरु मन्त्रीहरुको दर्शनार्थ २ बजे अगावै कार्यक्रम स्थल पुगे। तर मन्त्री त ३:३० सम्म पनि आईपुगेनन। बल्ल मन्त्री आईपुगे । सबैजना हतार गर्दै हल भित्र प्रवेश गरे। जनसम्पर्कका सभापति र महामन्त्रीले पाहुनाहरुलाई खादा माला लगाएर केही बोल्न दिएर चियापान गराई कार्यक्रम गर्लान भनि उपस्थितले सोचेका थिए। तर मन्त्रीको व्यस्त समयको बावजुद महामन्त्रीले सहभागीहरुको लामो परिचय गराए। अनि सहभागीहरुले मन्त्रीलाई खादामाला ओडाई स्वागत गर्न समय छुट्ट्याईयो। दर्शनार्थीहरुले खादामाला सहित उपस्थित हुनुपर्ने सुचना नपाएकोले केही समय त्यसै अलमलमा परे। अनि जनसम्पर्कको तर्फबाट एक गुण्टो खादा ल्याएर बीपीको फोटो छेउ थुपारियो। तर एक दुइ जनाले मात्र मन्त्रीलाई खादा लगाई दिए।

त्यसपछि २ मिनेटको समय दिएर मन्तब्य राख्न बक्ताहरु डाकियो। तर बक्ताले अहिले अल्पमतको प्रचण्ड सरकार भएको ठिक भएन। प्रजातन्त्रमा बहुमतको अथवा प्रमुख पार्टीले शासन चलाउन पर्छ। त्यसैले काग्रेस अगाडि बढी सरकार आफुले चलाउनु पर्छ भनि दिए। ति बक्तालाई अहिले माओबादी, समाजबादी र कांग्रेसले आलोपालो ५ बर्ष सरकार चलाउने सहमति अनुसार सरकार चलेको थाहा रहेनछ। अहिले कति त्याग तपस्या गरी बल्ल प्रचण्ड सरकारमा एन पी सावद मन्त्री हुन् पाएका छन। अब सरकार नै हटाउने माग भएपछि मन्त्री सावदको स्वागतको सट्टा बिदाईको कार्यक्रम गरे जस्तो सुनिएपछि मन्त्री सावदलाई आफ्नै सरकारको बद्खुवाई सुनेर हर्ष हुने त् कुरो नै भएन।
त्यस्तै अर्का एन आर एन आई सी सीका पदाधिकारीले दोहोरो नागरिकता दिन निवेदन गरे। तिनलाई अहिले नागरिकता बाड्ने प्रक्रिया शुरु भएको समेत जानकारी रहेनछ।
त्यस्तै अन्य बक्ताले युएनमा के बोले ठिक हुन्छ भनि मन्त्रीलाई सल्लाह सुझाव बिन्ति चढाए।

त्यस्तै जनजाति महासंघले बोले पनि अनेक जातजातकाले फेरी बोल्ने पालो आयो। अनि अनेक के के समयको पावन्दी बेगर बोलियो। यस्ता बकम्फुसे नेपालको गाउँ पाखातिर गर्न जस्तो कार्यक्रममा आएको महसुस भएपछि बिज्ञ ब्यक्तित्वहरु बिस्तारै बाहिरिदै गए। मन्त्रीले बोल्ने बेलासम्म त करिब करिब हल खाली हुन् पुग्यो ।
जनसम्पर्कका नेतृत्वकारीहरु मन्त्रीलाई एयरपोर्टमा स्वागत गर्न गएका थिए। फेरी यो अर्को कार्यक्रम गर्नुको पछाडि रहस्य बुझ्दा त चाकडी देखाउन मनसाय रहेको धेरैले बुझे। अमेरिका जस्तो देशमा आएर समयको महत्व र कार्यक्रमको प्रभावकारिता जानकारी नभएकाले के कार्यक्रम गर्नु भन्ने धेरैको भनाई रह्यो।